Allar færslur eftir Maggi

Liverpool 2 – Burnley 1 (leikskýrsla)

0-1 Barnes á 7.mínútu
1-1 Wijnaldum á 45.mínútu
2-1 Can á 61.mínútu

Ótrúlega mikilvægt að draga þessi þrjú stig út úr pokanum í dag. Fullt af mótlæti en bros í lokin.

Bestu leikmenn Liverpool

Ætla að fá að tala bara um fyrri hálfleikinn síðar því hann var afar slakur og í raun afskaplega erfitt að taka upp ljósa punkta. Í síðari hálfleik er hins vegar hægt að finna hrós. Emre Can steig vel upp, auk þess að skora sigurmarkið var hann grimmur varnarlega og fór að flytja boltann vel milli svæða.

Ragnar Klavan átti tvær alvöru reddingar og fær gott hrós auk félaga hans í vörninni Matip sem var yfirvegaður og skallaði marga hættuna burt, svo var Mignolet gallalaus og greip vel inní leikinn. Hefur í raun átt afskaplega langt gott tímabil í frammistöðum. Þessir fjórir voru lyklar að því að við sigruðum þennan leik.

Vondur dagur

Fyrri hálfleikurinn var hrein hörmung og hrein hending næstum að staðan var jöfn að loknum fyrstu 45. Þá var ekkert tempó í gangi, við áttum ekki skot að marki fyrr en eftir 38 mínútur og maður var að verða virkilega niðurdreginn bara þegar Wijnaldum fékk óvænt færi og kláraði vel. Enginn sem stóð uppúr.

Seinni hálfleikurinn var allt annað en það voru þó tveir leikmenn sem voru að mínu mati alveg utan takts allan tímann. Sá fyrri var Brassinn okkar, Coutinho var úti á væng og sást ekki í fyrri og svo færður meira inn á miðju en eftir kortér af seinni ákvað Klopp að kippa honum út. Svei mér ég held að hann hljóti enn að vera að vinna sig upp í leikform, hann hefur verið algerlega neistalaus í ansi mörgum leikjum að undanförnu sem er mjög vont.

Hinn er Divorck Origi sem fékk nú sénsinn. Utan við stoðsendinguna var hann ekki með því miður og að lokum fór svo að Klopp kippti honum líka út og lét Mané hlaupa uppi á topp. Origi var linur í þessum leik, varnarmenn Burnley átu hann í hvert sinn sem langur bolti kom upp, hann lét teyma sig út á kanta þar sem hann tapaði iðulega boltanum og hann var alltof langt frá sínum manni í pressunni. Betur má ef duga skal kæri Divorck.

Umræða eftir leik

* LOKSINS unnum við leik gegn „litlu“ liði eftir að hafa lent undir. Klopp var enda miklu glaðari í viðtalinu eftir hann þennan en um síðustu helgi eftir Arsenal sigurinn. Til að ná árangri þarftu að vinna „ljóta“ sigra og þessi var svo sannarlega einn slíkur.

* Skiptingar Klopp voru allt aðrar en við höfum áður séð. Woodburn kom inná og var greinilega skipað að búa til vídd á völlinn sem hann gerði vel, allt annað en þegar Coutinho leitaði inn. Svo þegar Origi var alveg búinn að tapa baráttunni uppi á topp ákvað Klopp að henda refnum Lucas inn til að verja svæðið enn betur framan við hafsentana og freista þess að Mané fengi að komast á bakvið vörnina. Við höfum oft skammast yfir skiptingum Klopp en þær virkuðu í dag.

* Hvers vegna náum við ekki að keyra eins yfir þessi lið og þegar stóru liðin mæta? Þrátt fyrir að hafa unnið í dag var þetta ólíkt síðustu helgi, um stund voru Burnley um 60% með boltann og við virtumst eiga erfitt með að ná almennilegum tökum.

* Við náðum að landa þessum sigri þó að Firmino, Lovren og Hendo væru í burtu…og svo bættist Coutinho við í þann hóp. Þegar maður horfði yfir liðið síðustu 10 mínúturnar þá var maður pínu stressaður, en baráttan var til staðar sem skiptir öllu máli þegar uppá vantar í gæðum.

Næstu verkefni

Þá er stór leikur framundan. Það var alger skylda að vinna þennan því næst förum við á Etihad Stadium. Mikið vona ég að það verði nú eitthvað komið inn af „Lasarusunum“ okkar því þeirra verður þörf í þeim stórleik. Sigur þar myndi veita okkur töluvert frumkvæði í baráttuna um Meistaradeildarsætið.

Liverpool 2 – Burnley 1

LEIK LOKIÐ!!!

75 mín Áttum flottan kafla sem kom okkur yfir í leiknum en Burnley eru nú komnir ofar á völlinn og ætla að gera læti úr leiknum. Verða spennandi síðustu 15!

61 mín 2-1 Frábært langskot Emre Can upp úr innkasti. Dásamlegt, eitthvað sem gleður mitt gamla hjarta.

60 mín Við erum loksins að ná upp smá pressu í þessum leik. Ben Woodburn var að koma inn fyrir Coutinho!!!

46 mín 1-1 Wijnaldum nokkrum sekúndum fyrir leikslok, sending frá vinstri sem vörn Burnley tekst ekki að hreinsa og Wijnaldum skorar úr markteignum. Ekkert endilega sanngjarnt en vá hvað við tökum þetta!

30 mín Sorgleg frammistaða. Eftir 30 mínútur höfum við ekki átt skot á mark og erum einu marki undir.

7.mín 0-1 Þar með hófst það. Burnley búið að vera í sókn síðustu þrjár mínútur, fengu nægan tíma til að senda sendingu frá miðju í gegnum alla vörnina á fjær þar sem Barnes kláraði örugglega. Verulega vond byrjun.

Leikur hafinn;

Þar með hefur verið lagt í hann í rigningunni á Merseyside.

Spörkum í átt að Annie Road í fyrri eins og við viljum – að Kop-stúkunni í seinni hálfleik.

Byrjunarliðið mætt:

Bekkur: Karius, Moreno, Lucas, Wilson, Gomez, Alexander-Arnold, Woodburn.

Semsagt enginn Lovren í hóp ofan á að Firmino er ekki með heldur. Risaleikur fyrir Origi í dag!!!

Minnum á tístkeðjuna.


Þá hefjum við leikþráð fyrir leik okkar við Jóa Berg og félaga í Burnley…og treystum auðvitað á það að okkar menn sýni nú fram á það að þeir hafi nú eitthvað þróað leik sinn og geti nú græjað sig upp í gæðaframmistöðu gegn liði utan topp sex sætanna.

Í Liverpool er 10 stiga hiti og milt veður, rignir eitthvað á meðan á leik stendur og eykur auðvitað möguleikann á hröðum fótboltaleik. Sem er gott. Annars er enn lítið nýtt að frétta úr þessari himnesku borg, óvíst með þátttöku Firmino og Jói Berg verður í jakkafötum og hvergi nálægt liði gestanna.

Bæti hér inn á leiðinni fram að leik ef eitthvað fréttnæmt kemur upp, tístkeðjan kemur upp 90 mínútum fyrir leik og svo auðvitað byrjunarlið og síðan breytist þráðurinn i uppfærslu af stöðunni í leiknum jafnóðum og eitthvað gerist.

KOMA SVOOOOOOOOOOO!

Leicester 3 – Liverpool 1 (leikskýrsla)

1-0 Vardy á 28.mínútu
2-0 Drinkwater á 39.mínútu
3-0 Vardy á 60.mínútu
3-1 Coutinho á 67.mínútu

BESTU LEIKMENN LIVERPOOL

Það er einn sem ekki þarf að skammast sín fyrir frammistöðu kvöldsins, Simon Mignolet bar af í arfalélegu Liverpool-liði, hefðum tapað mun stærra ef hann hefði ekki haldið okkur á floti.

VONDUR DAGUR

Allir útileikmenn sem tóku þátt í þessum leik, þeir tíu sem hófu hann og þeir tveir sem komu inná þegar eitthvað var eftir. Coutinho gat eitthvað í 5 mínútur en frammistaða annarra var sjokkerandi vond. Can sýndi endanlega að hann ræður ekki við að spila á miðju, Lucas vinur minn á aldrei að fá að spila hafsent aftur og Firmino svaraði pistil Óla Hauks. Við vinnum í dag ekki leiki með hann sem framherja – hvað þá mót. Hrein ömurð.

UMRÆÐA EFTIR LEIK

  • Hversu mikill óstöðugleiki er mögulegur í einu knattspyrnuliði. Liverpool FC er að svara því. Í toppsætum 1.janúar með öllu að keppa. Tveimur almanaksmánuðum síðar höfum við náð okkur í 6 stig í 7 leikjum í deild. Það er árangur liðs sem fellur eftir tímabil. Þetta er kannski ekki rannsóknarspurning því það er orðið svo augljóst að við eigum ekkert plan B. Að því næst.

  • Ég er enn með mancrush fyrir Jurgen Klopp og hef fulla trú á honum. Hins vegar hafa nú minni spámenn séð við honum. Paul Clement hjá Swansea, Sousa hjá Hull og nú Craig Shakespeare munu ekki koma sínu liði í Meistaradeild. En þeir hafa nú með stuttu millibili fundið út okkar leikplan og hann virðist engin svör kunna. Chelsea, City og Spurs komu ofarlega á okkur og spiluðu fótbolta. Til að vinna Klopp-lið Liverpool þarftu að þrýsta liðinu okkar út á vængi og leyfa okkur að krossa inn í box, sparka langt og klára sóknir. Þetta ræður liðið hans ekki við og hann kann engin ráð. Hann var öskrandi á hliðarlínunni vissulega en undirbúningur hans teymis fyrir þennan leik fær fullkomna falleinkunn og það er virkilega sláandi að hann virðist ekki læra af mistökum.

  • Hver það er sem tekur ákvarðanir um leikmannakaup fyrir þetta tímabil skal slá sig utanundir. Fast! Vissulega sóttum við Mané og Matip en svo bættum við við okkur varnarmanni sem ekki er treyst og markmann á varamannabekkinn, auk efnilegs miðjumanns sem hefur alls ekki sannfært alla. Bekkurinn okkar í kvöld var einfaldlega sjokkerandi og það að setja Moreno og Origi inn sem fyrstu valkosti til að breyta svona leik fær mann til að langa til að kasta upp. Það er algerlega orðið ljóst að í þetta lið okkar vantar a.m.k. afburða hafsent, afburða miðjumann og afburða striker til að klára heilt tímabil. Vanmat á leiktímabilinu í Englandi virðist algert, þetta eru bara alls ekki lengur einhver slys…

  • Þreyta er ekki lengur afsökun takk krakkar. Við vorum a.m.k. jafn lélegir núna eftir þetta 16 daga frí og þegar við spiluðum fleiri leiki. Öll þvælan um það að detta út úr bikarkeppnum og spila ekki í EL. Takið hana og troðið þar sem sólin ekki skín. Þessu liði vantar fleiri gæðaleikmenn og frammistöður undanfarið voru ekki vegna þreytu.

  • Liðið okkar er ekki hugað. Leicester tóku völdin með tæklingu eftir 25 sekúndur og héldu þeim í 60 mínútur. Alveg sama hvert litið var…við fengum ekki eitt gult spjald í þessum leik enda fórum við ekki í tæklingu í þessum leik. Þar fór miðjan fremst í flokki – það er þar sem baráttan byrjar og endar. Hjá okkur byrjaði hún aldrei.

  • Þetta lið spilar ekki í Meistaradeild á næsta ári. Sigurliðið í deildarbikarnum verður í toppsætum og því erum við nú í EL sæti. Það er að mínu mati það hæsta sem við getum horft til á þessu ári sem er orðið mesta vonbrigðatímabilið í mínum kolli bara, utan við mánuðina hjá Hodgson. Það er ekki auðvelt að elska þetta lið…það er hunderfitt.

  • Liverpool FC er heimsþekkt vörumerki þrátt fyrir arfaslaka frammistöðu síðustu ára. Ótrúleg frammistaða „Travelling Kop“ í kvöld bara enn ein sönnun þess. Hversu lengi heldur það þegar enn eitt tímabilið er runnið upp þar sem liðið hrynur fullkomlega undan væntingum okkar og er áfram utan toppsæta ensku deildarinnar?

  • Afsakið dramatíkina og niðurrifið hérna. Veit að það verða margir fúlir út í þessi skrif hérna en ég bara er ekki í neinu Pollýönnuskapi hérna eftir að liðið mitt eyðilagði enn eina tveggja klukkutíma setuna í mínu lífi!!!

NÆSTU VERKEFNI

Arsenal um næstu helgi. Það verða góðir vinir mínir margir á Anfield. Mikið vona ég að þau fái að sjá annað en þennan aumingjaskap sem pirraði mig svona svakalega í dag.

Það hlýtur að koma að því að topplið stúti okkur þó…því það er alveg klárt að við erum í frjálsu falli.

Leicester 3 – Liverpool 1

Leik lokið

ÖMURLEG FRAMMISTAÐA – TIL SKAMMAR FYRIR LIVERPOOL FOOTBALL CLUB!!!

3-1 Coutinho skorar af vítateignum á 68.mínútu. Mikið vonum við að hann vakni við þetta.

3-0 Vardy á 60.mínútu. Ömurleikinn bara heldur áfram. Fullkomið ráðaleysi hér í gangi.

Hálfleikur Vá. Þvílík skita. Liðið ekki getað neitt. Leicester komu inn með látum, berjast fyrir öllum boltum og hafa einfaldlega dúndrað okkar mönnum inn í vel þekkta skel. Við höfum varla farið í sókn sem heitið getur og það þarf eitthvað rosalegt að gerast í síðari hálfleik. Því miður hef ég enga trú á því. Karlmenn á móti drengjum hingað til. Ég er einfaldlega brjálaður hérna í hálfleik!

2-0 Drinkwater á 39.mínútu. Skulum vera hreinskilin hérna. Fullkomlega sanngjarnt. Versta frammistaða liðsins í vetur hingað til. Leicester að stúta okkur.

1-0 Vardy skorar á 28.mínútu. Hamagangur á miðjunni, Wijnaldum með skelfilega sendingu sem er étin, stungið inn á Vardy sem stútar vörninni og skorar. Sanngjarnt.

15 mín Heldur mikill hasar, Vardy hefði getað fengið spjald eftir nokkrar sekúndur, Mignolet búinn að verja einu sinni virkilega vel, heimamenn í heilmiklum djöflagangi og við ekki alveg búnir að ná tökum á leiknum.

Leikurinn er farinn af stað.

19:10: Byrjunarliðið er komið. Henderson er ekki með eins og hafði frést um helgina:

squad

Bekkur: Karius, Klavan, Moreno, Trent, Stewart, Origi, Woodburn.

Sterkt lið þótt fyrirliðann og Dejan Lovren vanti en bekkurinn frekar veikur og það vekur athygli að Daniel Sturridge er ekki í hóp.


Við minnum á tístkeðjuna okkar – endilega taka þátt í umræðunni!


Færsla kl. 16:08

Gleymdi að rúlla því hér inn að Jordan Henderson verður ekki með í dag, hann er meiddur og er líka tæpur um næstu helgi gegn Arsenal. Lovren verður skoðaður rétt fyrir leik…Can og Lucas nefndir í þessar leikstöður.

Færsla kl. 15:00

Þá er loksins komið að því að við fáum að sjá okkar ástkæra Liverpool lið inni á fótboltavelli aftur.

Drengirnir eru mættir á King Power Stadium í þeirri góðu borg Leicester til að leika við ríkjandi meistara í ensku úrvalsdeildinni. Uppselt er á leikvanginn í kvöld, rúmlega 32 þúsund manns komast þar fyrir. Þó hefur heyrst að mögulega muni ekki allir skila sér á völlinn sem eiga ársmiða í kvöld og það er þá gert til að mótmæla brottvikningu Claudio Ranieri en í kvöld verða heimamenn undir stjórn þessa ágæta manns Craig Shakespeare sem var einn aðstoðarmanna Ítalans geðþekka.

Um fátt hefur meira verið ritað undanfarna daga en þá brottvikningu svo segja má að Craig karlinn, leikmennirnir og klúbburinn allur verði undir stækkunargleri í leiknum í kvöld. Hann snýst um það fyrir heimamenn að krafla sig úr fallbaráttunni en við erum að keppa um CL-sæti svo leikurinn er gríðarmikilvægur.

Hitastigið í Leicester verður um 5°C á meðan á leik stendur og dómari dagsins er hann Lee Mason.

Þráðurinn uppfærist þegar líður á daginn, tístkeðjan kemur inn um hálf fimm og síðan byrjunarlið um klukkutíma fyrir leik. Treystum á að okkar menn séu í góðum gír eftir 16 daga frí.

KOMA SVOOOOOOOOOOOOOOOOOOOOOOOO!!!

Liverpool – Chelsea 1-1 (leik lokið)

1-1 – 90 min. Leik lokið, 1-1 niðurstaðan. Skýrsla kemur síðar.

1-1 – 56 min. Wijnaldum jafnar með skalla eftir fyrirgjöf Milner (sem fór af varnarmanni). Game on.

0-1 – 25 min. David Luiz beint úr aukaspyrnu. Frábært.

Risaleikur á Anfield í kvöld þegar Chelsea mæta á Deadline Day sem er sá dauðasti í sögunni sennilega.

Nóg um það, liðið komið:

Mignolet

Clyne – Matip – Lovren – Milner

Can – Henderson – Wijnaldum

Lallana – Firmino – Coutinho

Bekkur: Karius, Klavan, Sturridge, Lucas, Moreno, Origi, Mane.

Mané kominn á bekkinn og liðið hefðbundið.

Minnum á tístkeðjuna okkar!