Til hamingju Luis Suarez!

Copa America meistari, næst markahæstur og valinn maður mótsins. Er einhver annar en ég pínu spenntur yfir því að sjá Suarez mæta til leiks í rauðu treyjunni á næsta tímabili?

Liverpool átti nokkra þátttakendur í landsleikjum gærdagsins.

Fyrst er að nefna auðvitað Steven Gerrard sem var fyrirliði enskra í gærkvöldi í 3-1 sigri á Egyptum. Strákur lék vel í 72 mínútur og hefur vafalítið tryggt sér varafyrirliðastöðuna hjá Capello karlinum.

Dirk Kuyt skoraði úr vítaspyrnu fyrir Hollendinga á 40.mínútu í 2-1 sigri á Bandaríkjunum. Dirk lék í 81 mínútu en þá tók Ryan Babel við af honum.

Annar höfðingi skoraði í gær, Yossi Benayoun skoraði fyrra mark Ísraela í 0-2 sigri í Rúmeníu. Sá lék allar 90 mínúturnar, eins og Sotiris Kyrgiakos sem var með Grikkjum í 0-2 heimatapi gegn Senegal. Báðir höfðu gott af því að fá heila leiki að mínu mati og styrkir þá bara í framhaldinu. Argentínski fyrirliðinn okkar Javier Mascherano kláraði líka leik sinna manna sem unnu góðan 0-1 sigur í Þýskalandi. Diego örugglega grátið af gleði og smellt á kinn Javiers eftir það!

Í Frakklandi unnu Spánverjar öruggan 0-2 sigur, þar sem Fernando Torres kom inná í hálfleik. Sem betur fer virðist hann, sem og allir landsliðsmennirnir aðrir, hafa sloppið ómeiddir í gegnum kvöldið og þar með tilbúnir í næsta leik, gegn Wigan á mánudagskvöldið.

Vicente del Bosque vonast til að Fernando Torres spili sem fæsta leiki fyrir Liverpool það sem eftir er tímabilsins. Ég skil hvað hann er að fara, enda þjálfari landsliðs Spánar, en til hvers að koma fram með þetta komment? Ekki er hann að koma með jákvætt innlegg inn í “Club vs. Country” rifrildið sem alltaf poppar upp reglulega. Aldeilis ekki og ég er hræddur um að svona gaurar þyrftu aðeins að horfa í eigin barm, sér í lagi ef þeir ætla sér að félagsliðið spili með þegar kemur að bestu leikmönnunum. Torres kemur oftar en ekki meiddur úr þessum “yndislegu” landsliðshléum. Þar er honum spilað aftur og aftur, og það alveg þrátt fyrir að leikirnir séu algjörlega tilgangslausir með öllu. Þessi tími sem hann er svo frá vegna meiðsla eftir þessi landsleikjahlé, þá er hann á fullum launum hjá Liverpool FC. Með öðrum orðum, það skiptir Vicente del Bosque akkúrat engu málið þótt hann verði meiddur næstu vikurnar, bara að hann verði orðinn heill heilsu fyrir næsta landsleik eftir nokkrar vikur eða mánuði.

Ég hef aldrei farið í grafgötur með mitt álit á þessu landsliðsdæmi öllu saman, ég skil alveg afstöðu hinna, sem fýla þetta allt saman. En þegar verið er að ræða um þetta “Club vs. Country” og þegar menn skilja ekki tregðuna við að hleypa mönnum í tilgangslausa leiki, þá er þetta innlegg frá þessum gaur ekki til að hjálpa. Það hreinlega verður að fara að gera eitthvað í þessum málum fljótlega, þ.e. þegar kemur að því að landsliðin spili hálfmeiddum leikmönnum og þurfa svo enga ábyrgð að taka. Landsliðin þurfa að bera einhverja ábyrgð, þau gera það ekki í dag. Fyrr verður ekki friður um þetta. Ég er nokkuð viss um að Rafa mun ekki verða samvinnuþýðari við þetta innlegg Vicente del Bosque í umræðuna. Landsliðsþjálfarinn hefði getað hugsað þetta og haldið þeim hugsunum fyrir sig, en ég skil ekki ástæðuna fyrir því að tjá sig um þetta í blöðunum.

Hérna eru nýjustu fréttir af meiðslamálum Fernando Torres og Steven Gerrard. Hvorki England né Spánn útiloka að þeir muni spila á miðvikudaginn, sem þýðir væntanlega að þeir eru þokkalega heilir. En aftur á moti verður að teljast líklegt að hvorugur þeirra muni spila, þar sem að leikir þeirra liða skipta nákvæmlega engu máli.

Ég horfði á Danmörk-Svíþjóð um helgina og sá þar Daniel Agger í fullu fjöri. Hann og Simon Kjaer voru saman í vörninni og voru sterkir. Dómarinn dæmdi reyndar löglegt mark af Svíþjóð, en fyrir utan það tókst þeim að halda þeim Zlatan og Larsson í skefjum. Persónulega fannst mér það hundleiðinlegt að sjá Agger spila gegn því liði sem ég hélt með – það er miklu betra að hafa hann í sínu liði. Hann á vonandi eftir að koma sterkur inn hjá Liverpool í næstu leikjum. Síðasti leikur Dana skiptir engu máli, þannig að það gæti vel verið að hann fengi frí.

Ef við hlaupum hratt yfir:

Steven Gerrard lék fyrri hálfleikinn gegn Slóvökum á Wembley í 4-0 sigri enskra. Var lengst af á vinstri kanti, lék vel og lagði upp mark fyrir Emile Heskey. Martin Skrtel lék allan leikinn fyrir Slóvaka og átti erfiðan dag án vinar síns Carragher.

Dirk Kuyt lék allan leikinn í 3-0 sigri Hollendinga á Skotum. Skoraði þriðja mark Hollendinga úr vítaspyrnu. Ryan Babel var ekki í 18 manna hóp Hollands í kvöld, veit ekki út af hverju.

Xabi Alonso og Fernando Torres léku báðir í 1-0 sigri Spánverja á Tyrkjum. Torres kom útaf á 87.mínútu, ekki vegna meiðsla! Reina, Arbeloa og Riera voru allir á bekknum þar, en komu ekki inná.

Daniel Agger lék allan leikinn í vörn Dana sem unnu 3-0 á Möltu. Fín leikæfing fyrir hann.

Sami Hyypia lék vel í 0-2 sigri Finna í Wales. Gaman að minnast á það að Jari gamli Litmanen var að standa sig vel líka í þeim leik!

Verstu fréttirnar í kvöld eru þær að Yossi Benayoun var borinn útaf á 76.mínútu í 1-1 leik við Grikki á heimavelli. Vissulega var þetta lykilleikur fyrir Ísraela og Yossi er fyrirliðinn þeirra, en ég er samt pirraður! Vonum bara það besta, væntanlega er þó um einhverja bið á því að ræða að við sjáum hann í rauðri treyju, og mér segir hugur að mr. Benitez sé ekki glaður…

Javier Mascherano var fyrirliði Argentínu og lék allan leikinn í öruggum 4-0 sigri á Venezúela í Buenos Aires.

Andrea Dossena og Nabil El Zhar fengu ekki náð fyrir augum landsliðsþjálfara sinna í kvöld. Ítalir unnu Makedóna 2-0 úti og Marokkó tapaði óvænt fyrir Gabon heima, 1-2.

Portúgalir og Svíar eyðilögðu svo fyrir mér kvöldið með 0-0 leik. Segi enn og aftur að það á ekki að gefa stig fyrir leiki sem enda 0-0. Svíarnir voru átta í vörn allan tímann og reyndu ekki að sækja. 28-6 í skottilraunum og 61-39 í posession. Meðalaldur sænska liðsins örugglega 34 ár og bandýspilari í senternum.

Og Arnar Björnsson hrósaði þeim fyrir skynsaman og árangursríkan leik! Ég trúi ekki því að margir hafi verið glaðir með að þurfa að borga sig inn á þann leik.

Svei mér þá, landsleikjafótbolti er að verða tilgangslítill á löngum stundum…

Myndin er tekin af vef BBC

Gærkvöldið fullt af landsleikjum.

Reyndar byrjaði fjörið á þriðjudagskvöld þegar Andrea Dossena kom inná fyrir Ítali í hálfleik gegn Brössum. Brasilía átti allan leikinn fannst mér og Dossena komst ekki í takt þann tíma sem hann spilaði. Martin Skrtel lék svo þá allan leikinn fyrir Slóvaka sem töpuðu 2-3 fyrir Úkraínu í undanúrslitum “Kýpurmótsins”. Þeir lentu þá í að keppa um þriðja sætið í gærkvöldi og töpuðu þá aftur 2-3, nú fyrir Kýpur en ég finn hvergi upplýsingar um hvort hann lék þann leik líka.

Daniel Agger (sem virðist vera orðinn leiður á bekkjarsetu) spilaði í 90 mínútur fyrir Dani gegn Grikkjum í 1-1 jafntefli og Hyypia spilaði allan leikinn í 0-1 tapi Finna í Portúgal.

Yossi Benayoun heldur áfram að vera í fínu formi, hann skoraði sigurmarkið fyrir Ísrael í 1-0 sigri þeirra á Ungverjum. Dirk Kuyt og Ryan Babel skiptu með sér jafnteflisleik gegn Túnis (1-1), Dirk tók fyrri og Ryan þann seinni.

Javier Mascherano var svo fyrirliði Argentínu og lék 90 mínútur í öruggum 2-0 sigri í Frakklandi.

David Ngog skoraði fyrir U-21s árs lið Frakka og fjölmargir yngri mannanna aðrir léku líka.

En stærsti leikurinn var auðvitað í Sevilla þar sem Spánverjar kjöldrógu Englendinga í 80 mínútur en unnu ekki nema 2-0 sigur. Xabi stjórnaði ferðinni allan tímann, átti frábæran leik! Torres fór útaf á 60.mínútu, Arbeloa og Reina komu inn í hálfleik. Allir skiluðu sínu í leik sem leit vandræðalega út fyrir varnarsinnað trukkalið enskra. Væri algerlega til í að fjölga spænsku sveitinni á Anfield um tvo leikmenn. Sergio Ramos sýndi hvernig á að spila bakvörð í 4231 kerfinu og David Villa er frábær og vinnur gríðarlega vel með Torres.

Í enska liðinu léku 2 vel. Wright-Phillips kom ágætlega út og Glen Johnson átti fínan leik, sérstaklega sóknarlega.

En auðvitað mikilvægast. Engin meiðsli!

Myndin kemur frá World Soccer

Hinni nýji landsliðþjálfari Argentínu, Diego Maradona hefur gefið sterklega í skyn að hann vilji að [Javier Mascherano verði fyrirliði argentíska landsliðsins](http://news.bbc.co.uk/sport2/hi/football/teams/l/liverpool/7711148.stm). Maradona segir um Mascherano:

>[Mascherano is] the Argentinian player who is closest to the idea I have about the Argentinian shirt – sweat for it, sacrifice for it, being a professional, being close to the team-mate.”

Maradona sagði einnig í viðtali við argentískt dagblað þegar hann var fyrst orðaður við þjálfarastöðuna hvert hugsanlegt byrjunarlið hans yrði. Svar hans var: Mascherano og svo einhverjir 10 aðrir.

Jæja, landsleikjahléð er búið og eftir að hafa horft á Ísland vinna sinn leik í gær er hægt að hlakka til Liverpool leiks á laugardaginn. Ég hef beðið spenntur og það verður svo sannarlega gaman að gleyma sér yfir enska boltanum um helgina.

Allavegana, tveir leikmenn eru meiddir eftir leiki gærdagsins. Ryan Babel og Fernando Torres byrjuðu báðir inná, en voru báðir teknir útaf eftir innan við hálftíma. Læknir spænska landsliðsins segir að Torres gæti verið frá í um viku. Þeir hafa þó enn ekki verið skoðaðir af læknum.

Ef þetta er rétt með Torres missir hann af leiknum gegn Wigan en gæti verið í lagi fyrir útileikinn gegn Atletico. Við ættum nú alveg að lifa það af að vera án Torres gegn Wigan á Anfield. Ánægjulegra var þó að Steven Gerrard skoraði fyrir England (Youtube), Robbie Keane skoraði sigurmark Íra gegn Kýpur og Yossi skoraði eina mark Ísraela. Dossena byrjaði aftur fyrir Ítalíu, sem og Kuyt fyrir Holland, Masche fyrir Argentínu og Hyypia fyrir Finna. Xabi kom inná sem varamaður fyrir Spán, en hinir þrír komu ekki inná (Pepe og Arbeloa á bekknum, Riera ekki í hópnum). Sjá samantekt á LFC.tv hér.

**Uppfært 12.35 (EÖE)** Surprise surprise! Rafa er ekki sáttur.

Riera hefur verið kallaður inní spænska landsliðshópinn eftir að Diego Capel þurfti að draga sig út úr hópnum vegna meiðsla. Þetta þýðir að LFC er með heil 5 stk. í spænska liðinu, geri aðrir gott betur.

Rafa vill meina að Riera hafi burði til að vera fastamaður í spænska landsliðinu:

“I could tell you he’s doing really well and leave it at that, but you also have to remember that since he’s been here the games have been United, Everton and Man City away. That makes how he’s doing even more impressive. Spain has a very good group of players, so it’s not easy – but he can be there. If he keeps playing well here, it will be easy for him.”

Ég segi fyrir mitt leiti þá hefur Riera komið á óvart og lítur út fyrir að vera betri en ég taldi í fyrstu.

Jæja, ég er nú ekki aðdáandi Englands (held ávallt með Hollandi á stórmótum) en það vilja eflaust margir spjalla um Englands og Íslandsleikina í kvöld. England tapaði allavegana fyrir Króatíu 3-2 á Wembley og verður því ekki með á EM næsta sumar. Steven Gerrard, Scott Carson og Peter Crouch fá því langt sumarfrí.

Scott Carson fékk á sig algjört aulamark í kvöld og enska pressan mun sennileg gera hann að blóraböggli fyrir tapið, sem og auðvitað Steve McClaren. Carson fékk á sig skot af löngu færi, sem skoppaði á hálum vellinum rétt fyrir framan hann og í netið. Það er alveg ljóst að kaupverð Aston Villa á Carson hefur eitthvað lækkað í kvöld. En fyrst og fremst verður það að teljast fáránlegt af Steve McClaren að skipta um markmann í mikilvægasta leik ársins á rennblautum Wembley vellinum.

Peter Crouch (sem mér fannst vera besti leikmaður Englands í leiknum) skoraði frábært jöfnunarmark Englands 2-2 og leit á tímabili út fyrir að hann yrði hetja liðsins, en Króatar skoruðu þriðja markið með langskoti. Guðjón Guðmundsson fór mikinn í að halda því fram að Carson hafi verið um að kenna fyrir markið, en það var í mínum huga **augljóst** að Micah Richards á sökina á markinu því hann víkur sér undan skotinu. Hann byrjar á að blokka útsýni fyrir Carson og þegar boltinn kemur að honum, þá snýr hann sér til hliðar og þá hefur Carson ekki nægan tíma til að bregðast við.

En hvað svo sem manni finnst um England, þá verður það leiðinlegt að hafa þá ekki með á EM. Ekkert lið frá Bretlandseyjum nær á EM, sem er nokkuð magnað.

—

Að lokum, þá verð ég að minnast á það hversu óbærilegt það getur verið að horfa á leik með lýsingu Guðjóns Guðmundssonar. Hann verður hreinlega að gera sér grein fyrir því að hann er *lýsandi* en ekki *gagnrýnandi*. Hann á að segja hvað er að gerast, en ekki segja okkur skoðun sína á hverri einustu sendingu.

Í kvöld fara fram landsleikir um víða Evrópu en þá verður leikin síðasta umferð undankeppni Evrópumótsins sem fram fer í Austurríki og Sviss næsta sumar. Um leið og við fögnum því að undankeppnin klárist og það styttist í stórmótið sjálft getum við aðdáendur enska boltans glaðst yfir þeirri staðreynd að þetta er síðasta landsleikjahléð í einhverja þrjá mánuði eða meira. Eftir kvöldið í kvöld er ekkert framundan nema stanslaus leikjatörn hjá okkar mönnum í Liverpool!

Það er samt ekki úr vegi að kíkja á nokkra áhugaverðustu leikina, sér í lagi hvað varðar okkur hér á íslenska Liverpool Blogginu, og spá í spilin:

**Danmörk – Ísland:** Við skulum bara byrja á þessum leik. Sem FH-ingur þekki ég aðeins til Óla Jó sem þjálfara og mín skoðun er sú að hann á annað hvort eftir að koma öllum á óvart og slá í gegn með landsliðið eða renna algjörlega á rassgatið með það. Óli er fær þjálfari en hann fer sínar eigin leiðir og tekur áhættur sem annað hvort borga sig eða ekki. Ég á þó ekki von á því að neitt af þessu komi í ljós í þessum leik þar sem eina dagskipunin verður að halda andlitinu gegn særðum Dönum. Það gæti verið okkur í hag að Parken verður víst bara hálffullur af stemningslausum, dönskum áhorfendum og því allt eins hætt við því að íslenskir áhorfendur verði háværari á vellinum. Það er hins vegar okkur í óhag að danska liðið hlýtur að vera sært eftir slakt gengi að undanförnu og hljóta að vilja sýna sínu fólki sitt rétta andlit. Þó er aldrei að vita nema þeir ætli sér að taka þetta létt og lendi í einhverju vanmati. Við vonum það besta. **Mín spá:** 3-1 fyrir Dani eftir að við komumst óvænt yfir.

**England – Króatía:** Þetta er stóri leikurinn á dagskrá og sá sem öll Evrópa mun fylgjast með. Á meðan Rússar vinna væntanlega Andorra örugglega nægir Englendingum jafntefli á Wembley til að komast áfram, en tveggja marka sigur á Króötum þýðir að svo ótrúlega gæti farið að Englendingar vinni riðilinn sinn, þrátt fyrir að hafa sennilega ekki leikið verr í undankeppni stórmóts í einhverja áratugi. Samkvæmt öllum fréttum verður „Púllarinn“ Scott Carson í marki Englendinga og okkar maður, Peter Crouch mun leiða sóknina í fjarveru Wayne Rooney og Michael Owen. Steven Gerrard verður á miðjunni en þó er óvíst í hvaða hlutverki. Ef ég þekki McClaren rétt verður besti miðjumaður Evrópu látinn hirða upp ruslið í varnarstöðu fyrir aftan hinn *óviðjafnanlega* Frank Lampard. Ég hef svo lítið álit á McClaren að ég vona eiginlega að Englendingar tapi á morgun, ég verð að viðurkenna það. Ég skal þó alveg una þeim sigur ef stóri maðurinn skorar þrennu. :) **Mín spá:** 1-0 baráttusigur Englendinga – Beckham kemur inn í seinni hálfleik og smellir aukaspyrnu.

Fleiri eru þeir nú varla, stórleikirnir sem varða þessa síðu beint. Johnny Riise og Norðmenn munu væntanlega vinna sigur á Möltu en verða að treysta á önnur úrslit til að komast á EM, á meðan *varamarkvörður* Spánverja, Pepe okkar Reina, verður væntanlega í markinu gegn Norður-Írum en fari svo að Írarnir vinni þann leik og Svíar tapi fyrir Lettum á heimavelli (ólíklegt) gætu Norður-Írar skotið nágrannaþjóðum sínum af Bretlandseyjum ref fyrir rass og farið óvænt á EM næsta sumar. Þó verður að teljast líklegra að Englendingar verði einu fulltrúar eyjanna í Sviss og Austurríki.

Hvað segja menn? Hafið þið einhverja trú á Óla Jó? Á íslenska landsliðið séns án Eiðs Smára, eða er fjarvera Daniel Agger og Martin Laursen í vörn Dana nóg til að Gunnar Heiðar og Veigar Páll geti valdið usla? Munu Englendingar vinna Króata? Hvað skorar Crouchinho mörg? Mun McClaren halda starfi sínu eftir þennan leik, jafnvel þótt þeir vinni riðilinn?

Mikið um spurningar, en sú mikilvægasta af þeim er samt þessi: Hversu gott verður að vera loksins búnir með landsleikjahléin í bili? :)

Talandi um markverði, þá segja blaðamenn Guardian að Scott Carson [verði í markinu gegn Króatíu](http://football.guardian.co.uk/News_Story/0,,2214085,00.html) eftir að Paul Robinson gerði fjölda mistaka á æfingu (!)

Ef hann stendur sig vel, þá ætti það ekki að lækka söluverðið til Aston Villa.

Það er svo innilega ekkert að gerast að við getum alveg eins rætt landsleiki dagsins, og þá sér í lagi þá tvo sem koma þessari síðu (augljóslega) mest við:

**Íslenska landsliðið** tapaði 3-0 fyrir stórveldi Liechtenstein í kvöld. Eftir leik sagði Eyjólfur Sverrisson, landsliðsþjálfari, að hann sæi sér fært að halda áfram með landsliðið og taldi sig ekki vera kominn í gjaldþrot. Undanfarið hefur sú slúðursaga gengið fjöllum hærra að nýhættur þjálfari FH-inga, Ólafur Jóhannesson, muni taka við landsliðinu eftir Danaleikinn í næsta mánuði, og í kvöld útilokaði Willum Þór Þórsson, þjálfari Íslandsmeistara Vals, ekki að hann vildi taka við liðinu ef til þess kæmi.

Hvað finnst mönnum? Er Eyjólfur kominn í gjaldþrot með þetta lið? Og ef svo er, hver ætti þá að taka við?

**Enska landsliðið** tapaði 1-2 gegn Rússum í Moskvu fyrr í dag, en þegar tuttugu mínútur voru til leiksloka voru Englendingar yfir. Dómari leiksins dæmdi glórulausa vítaspyrnu á Wayne Rooney (brotið átti sér stað talsvert utan teigs) og svo gaf Paul Robinson Rússum sigur þegar hann Dudek-aði frekar einföldu skoti beint út í teiginn þar sem Rússi náði að pota honum inn. Fyrir vikið þurfa Englendingar að sigra Króata í lokaleik sínum í riðlinum og treysta á að Ísraelar eða Andorramenn nái að taka stig af Rússum.

Hvað finnst mönnum? Var tapið í dag Steve McClaren að kenna? Eiga Englendingar séns í helvíti á að komast á EM 2008, eða fá Stevie Gerrard og félagar óvænt sumarfrí að yfirstandandi tímabili loknu?

Ryan Babel var ekki í byrjunarliði Hollendinga í gær vegna þess að…

Hann [svaf yfir sig](http://www.dailymail.co.uk/pages/live/articles/sport/football.html?in_article_id=487545&in_page_id=1779&ito=newsnow)!!!

Jæja, hvað segir fólkið?

Það er afskaplega lítið hægt að skrifa um Liverpool í þessu landsleikjahléi. Einhver blöð eru að skálda upp sögur um að við séum á eftir hinum mexíkóska [Giovanni dos Santos](http://en.wikipedia.org/wiki/Giovanni_dos_Santos) hjá Barcelona. Það væri náttúrulega stórkostlegt enda virkar sá strákur frábært efni og auk þess er hann frá Mexíkó, sem er land sem ég dýrka og dái og held mikið með.

En þetta er sennilega bara slúður, sem að blöðin skálda upp í fréttaþurðinni.

—

Ég sá ekki nema fyrri hálfleikinn af Ísland-Spáni, þar sem ég var á Chris Cornell tónleikunum. Sá ekki mikið af Liverpool mönnunum. Sá þó brotið hjá Xabi, sem ég skildi ekki alveg. Það sást allavegana ekki í sjónvarpinu að þetta væri rautt spjald, þar sem það vantaði myndavél hinum megin við völlinn. En þó var línuvörðurinn í góðu færi við þetta brot og gat því séð það.

Ég sá svo lítið til Torres. En það væri gaman að heyra frá fólki sem veit eitthvað hvernig Liverpool mönnum gekk í gær. Sá til dæmis einhver Agger í Dana leiknum? Gerrard spilaði víst ekki mjög vel í Englandsleiknum (ég sá hann ekki) og Benayoun var auðvitað í byrjunarliði Ísraels. Ryan Babel spilaði í þriggja manna framlínu Hollands ásamt RVN og RVP. Dirk Kuyt var á bekknum og ég veit ekki til þess að hann hafi komið inná.

Riise var í byrjunarliði Noregs og Hyypia auðvitað hjá Finnlandi.

Endilega setjið inn komment ef þið vitið eitthvað um það hvernig gekk hjá okkar mönnum.

Við munum að ekki er langt síðan að Rafa var að pirrast yfir leikjauppröðun hjá Liverpool eftir landsleikjahlé. Ég er ekki viss um að allir hafi náð því sem hann átti við þá. Hann sagði þetta í síðasta landsleikjahléi, og kom ég með dæmi um það þá. Í því tilviki þá náði liðið í heild sinni ekki fullri æfingu saman fyrir leikinn gegn Sunderland. Landsleikirnir eru á miðvikudagskvöldi og leikmenn eru að skila sér tilbaka á fimmtudegi og langt fram á kvöld þann dag. Á föstudegi þurfti svo að ferðast til Sunderland, því það er nyrsti staður sem liðin í Úrvalsdeildinni ferðast til og það vildi svo skemmtilega til að Liverpool þurfti að spila hádegisleik fyrir aðal umferðina.

Kíkjum nú á hvað verður í lok þessa landsleikjahlés. Sama staða er uppi með að landsleikirnir eru á miðvikudagskvöldi og leikmenn eru að koma sér tilbaka á fimmtudeginum. Föstudaginn þarf svo að nýta í að ferðast með liðið því á laugardeginum er Liverpool enn og aftur sett á hádegisleik og í þetta sinn er það til Portsmouth, sem er syðsti staður sem liðin í Úrvalsdeildinni þurfa að ferðast til. Reyndar mun Javier Mascherano ekki vera kominn í tæka tíð þar sem hann þarf að ferðast til Ástralíu í æfingaleik með Argentínu, en hvað um það. Það er eitt að vera með landsleikjahléin, en annað að geta ekki fengið liðið saman til æfinga vegna þess að leikurinn er svo snemma á laugardeginum að það verður ekki komið við æfingu þá.

Fjöldi hádegisleikja hjá Liverpool er alveg ótrúlega mikill, og á síðasta tímabili minnir mig að Liverpool hafi spilað lang flesta hádegisleiki. Það þarf ekki að tala við marga stuðningsmenn liðsins sem sækja leiki til að heyra hversu illa mönnum líkar þetta. Það er nefninlega ekki bara liðið sem þarf að ferðast, heldur stuðningsmennirnir líka. Leikir fara fram á alls konar tímum, en það er hreint út sagt ótrúlegt hversu oft við lendum í þessu. Það getur vel verið að einhverjir líti á þetta sem væl, en þetta er bara staðreynd. Ekki nein afsökun fyrir slökum úrslitum eða neitt þannig, maður bara heyrir gríðarlega óánægju meðal stuðningsmanna með þetta, enda skiljanlegt.

Ég hef oft velt fyrir mér fyrirkomulaginu á þessum landsleikjum. Það er alveg vitað mál að menn eru að ferðast þvert og endilangt út um allar trissur. Það er líka vitað að deildarkeppnin er svo strax helgina á eftir. Þetta á ekkert bara við Liverpool, heldur er þetta þannig í mjög mörgum deildum. Myndi það ekki gera mikið ef þessir leikir færu fram á þriðjudagskvöldum? Heill dagur í þessu getur skipt máli fyrir félagsliðin. Er of stutt að spila á laugardegi og svo strax aftur á þriðjudegi? Er það ekki gert allan veturinn í sambandi við deildarkeppnir og Meistaradeild Evrópu? Finnst mönnum virkilega skrítið að það sé kergja á milli þeirra sem eru að stýra félagsliðum og svo landsliðanna? Það er hreinlega ekkert verið að hugsa í þessu sambandi, einfalt mál. Bara þetta litla atriði gæti verið skref í rétta átt. Það eru jú einu sinni félagsliðin sem borga laun leikmanna en ekki landsliðin.

Nú krosslegg ég bara fingur um að Stevie G sjái að sér og dragi sig út úr hópnum fyrir leikinn gegn Ísrael. Hann er meiddur, hefur ekkert náð að spila og nánast ekkert æft. Finnan búinn að draga sig út úr hópnum en Torres ætti að vera klár á Laugardalsvöllinn. Vonandi koma menn heilir tilbaka. Get ekki beðið eftir að laugardagurinn 15. september renni upp á ný, þá byrjar boltinn að rúlla á ný. Var ég einhvern tíman búinn að segja frá því að ég HATA LANDSLEIKJAHLÉ? :-)

Hérna er vinsamleg ráðlegging til Steve McClaren: Ef þú vilt ekki að David Beckham og hans meiðsli/uppákomur verði forsíðufrétt hjá BBC allt þetta keppnistímabil, þá ættirðu að vera skynsamur í dag og velja í hans stað besta hægri kantmann Englands í dag í landsliðshópinn.

Það má vel vera að Beckham geti enn skorað úr aukaspyrnum, en hann gerir lítið annað en það af viti þessa dagana.

Ef að McClaren velur í staðinn David Bentley þá hefur hann enn sannað að hann er ekki að valda þessu starfi. Nógu slæmt er að hann hafi eina framherjann, sem getur skorað fyrir enska landsliðið, alltaf á bekknum

Jæja, Englendingar unnu víst Andorra 3-0 í kvöld. Ég sá ekki leikinn, enda var ég auðvitað að horfa á Ísland-Spán. Fyrir Englendinga skoraði **Steven Gerrard** 2 mörk. Síðasti maður á undan Gerrard til að skora í undankeppni EM var **Peter Crouch**.

Enska landsliðið hefur skorað 9 mörk í 5 leikjum í undankeppni EM. Hverjir hafa skorað mörkin?

Jú, þetta lítur svona út:

**Steven Gerrard 3**
**Peter Crouch 3**
Jermaine Defoe 2
David Nugent 1
Gary Neville -1

Semsagt, Liverpool menn hafa skorað **2/3** af mörkum enska landsliðsins. Wayne Rooney hefur ekki enn skorað mark og ekki heldur Andy Johnson. Samtals hafa leikmenn Manchester United skorað mínus eitt mark fyrir enska landsliðið í þessari keppni.

Gaman að þessu.

**Geeeeeeeeeisp!**

Hvað segiði annars, eitthvað að frétta?

Í dag leikur enska landsliðið mikilvægan útileik gegn Ísrael í Tel Aviv, og þar sem maður er að drepast úr leikjaskorti Liverpool þessar vikurnar neyðist maður til að hafa áhuga á þessum leik til að fá einhvern fótbolta í æð.

Allavega, Jermaine Pennant situr hálfsvekktur heima og finnst hann eiga skilið tækifæri til að sanna sig með enska landsliðinu. Hann segir meðal annars:

>”Some players aren’t playing week in and week out and yet they’ve been called into the squads. No disrespect to them at all, but I think I deserve a chance.”

Að vissu leyti held ég að þetta sé rétt hjá honum, eitt af því sem hefur háð enska landsliðinu undanfarin ár er að menn sem hafa ekki verið í neinu leikformi hafa samt verið valdir til að spila. Hélt t.d. einhver virkilega að þeir myndu vinna HM í fyrra með Rooney hálf-meiddan og Owen, Ashley Cole og Ledley King í nánast engu leikformi?

Hvað Pennant varðar held ég að hans tími með enska landsliðinu muni pottþétt koma. Það er svo sem enginn skandall að hann hafi ekki enn verið valinn í vetur, en það kemur að því. Pennant hefur að mínu mati aðlagast liðinu mjög vel í vetur og Rafa er farinn að treysta honum meira og meira. Ef við berum hann saman við t.d. Shaun Wright-Phillips á sínu fyrsta tímabili fyrir Chelsea, eða Damien Duff á sínu fyrsta tímabili fyrir Newcastle, held ég að við getum ekki annað en verið sáttir með strák. Þetta er hörkuleikmaður.

Jafnvel þótt Rafa kaupi einhvern eins og Daniel Alves á hægri hliðina í sumar held ég að við getum bókað það að Pennant er kominn til að vera, allavega í einhver ár. Hann er ungur, hann er áræðinn og honum vex ásmegin með hverjum leik sem hann spilar. Og þess verður ekki langt að bíða áður en hann er farinn að spila með enska landsliðinu.

Svona til að sanna það að enska pressan se [full af halfvitum](http://www.bbc.co.uk/dna/606/A16178961):

>Up front our cutting edge was supplied by those daring out-and-out strikers Rooney and Crouch. They simply don’t work together. One of them has to keep Lampard company on the bench.

>Given that Rooney is probably our best player (and on a night of utter mediocrity, probably was in Croatia), perhaps Crouchy can come towering on late in the game, which was always his best position to my mind.

>Get a fit Johnson or Bent up front with Rooney and the Shrek-like one will at least have someone to aim for.

Semsagt, Crouch skorar ekki tvo leiki i röð eftir að hafa sett **enskt met** fyrir fjölda marka i landsleikjum a einu ari, og þa vill pressan að Crouch fari a bekkinn og i staðinn fai Darren Bent eða Andy Johnson að spila. Gleymum öllum mörkunum hans Crouch! Gleymum þvi að það er engin astæða til að halda að Johnson eða Bent spili betur með Rooney. Gleymum þvi að Rooney hefur ekki skorað siðan… Æ, eg nenni þessu ekki.

Snillingar!

*(Þetta lyklaborð i Vietnam er ekki hrifið af broddstöfum!)*

Yndislegt. Eins og við séum ekki búnir að væla nóg yfir þriðja landsleikjahléinu á tveimur mánuðum á þessari síðu, þá gerðist í gær það sem við stuðningsmenn félagsliða óttumst alltaf þegar landsliðin leika: Dirk Kuyt meiddist í leik Hollands gegn Búlgaríu í gær.

Samkvæmt fregnum þá lenti hann illa á ökklanum sem bognaði undir hann og þurfti að fara strax útaf. Marco Van Basten, landsliðsþjálfari Hollendinga, er vonlítill um að hann verði orðinn heill fyrir leik Hollendinga gegn Albaníu á miðvikudag (ekki það að þeir þurfi á honum að halda í þeim leik, ætti að vera auðveldur sigur) en það sem verra er fyrir okkur Púllara er að hann er víst ekki öruggur um að vera orðinn heill um næstu helgi, þegar okkar menn mæta Blackburn í deildinni á Anfield.

Án þess að ég nenni að eyða fleiri orðum í yfirgang landsliðanna þegar kemur að notkun leikmanna, þá er þetta bara enn eitt dæmið í langri röð dæma þar sem illa er farið með félagsliðin. Eitt skýrasta dæmið um slíka misnotkun á stöðu sinni er mál Michael Owen, sem meiddist illa á HM í sumar eftir að hafa misst úr hálft ár með félagsliði sínu vegna meiðsla. Meiðsli hans í sumar eru svo alvarleg að hann verður sennilega ekkert með Newcastle í allan vetur og þurfti að berjast til að bjarga ferli sínum með skurðaðgerðum í Bandaríkjunum.

Fengu Newcastle einhverja sárabót fyrir þennan leikmann, sem kostaði þá átján milljónir punda fyrir ári síðan og átti að byggja allt liðið í kringum, en þeir þurfa nú að vera án í a.m.k. eitt og hálft ár þökk sé HM í knattspyrnu? Nei, þeir fá enga sárabót frá enska knattspyrnusambandinu né UEFA. G14, samtök félagsliða í Evrópu, hefur þegar lýst því yfir að þeir muni styðja Newcastle í viðleitni sinni til að fá sárabætur fyrir, og er það vel að mínu mati.

Kuyt er þó ekki alvarlega meiddur, en það er sama. Einn leikur er einum leik of mikið og Liverpool þurfa að borga honum laun á meðan. Það jákvæðasta sem ég sé við gærdaginn sem Púllari er það að Steven Gerrard skuli hafa fengið gult spjald í leik gegn Makedónum. Hann verður í banni á miðvikudag og mun því sennilega ekkert meiðast, sem betur fer. Maður er orðinn skíthræddur um leikmennina í hvert sinn sem landsliðin leika.

Ætli menn séu núna hættir að [púa á Peter Crouch](http://news.bbc.co.uk/sport2/hi/football/default.stm)?

11 mörk í síðustu 10 landsleikjum. Og það hjá manninum, sem að sögn sumra gat ekki skorað. Við sögðum að hann myndi komast á flug og við hérna á Liverpool blogginu elskum að hafa rétt fyrir okkur. :-)

Já, og Dirk Kuyt [skoraði líka](http://news.bbc.co.uk/sport2/hi/football/internationals/5321440.stm).

**Uppfært (EÖE)**: Hérna er markið:

**12 landsleikir og 8 mörk**. Þar af [tvö mörk í kvöld](http://news.bbc.co.uk/sport2/hi/football/internationals/4794867.stm). Ætli Englendingar séu ekki hættir að púa á Peter Crouch núna?

Meðalmarkafjöldi í leik með landsliðinu:

**Peter Crouch 0,67**
Alan Shearer 0,48
Michael Owen 0,45
Wayne Rooney 0,33

(tölfræði frá Wikipedia)

Sá annars einhver leikinn í kvöld? Endilega segið okkur hvernig okkar menn voru að standa sig.

Smá viðbót: Einstaklega gaman hvað enskir “sérfræðingar” hafa gott minni. [Lee Dixon eftir þennan leik](http://news.bbc.co.uk/sport2/hi/football/internationals/4800319.stm)

>Owen Hargreaves is now arguably first on the team sheet for England.

Jæja…

Eftir flottan sigur á Chelsea í gær gætu menn kannski haldið að Rafa Benítez væri sem stendur á fullu við að undirbúa lið sitt fyrir næsta leik, fyrsta deildarleikinn gegn Sheffield United á útivelli eftir fimm daga. Menn gætu haldið að það væri mikilvægt fyrir þjálfara liðs sem ætlar sér að vinna titilinn í ár að nýta þessa fimm daga í að gera menn andlega og líkamlega tilbúna í slaginn sem framundan er, auk þess að geta unnið í taktíkinni fyrir komandi leik og/eða leiki.

Ef menn myndu halda það myndu þeir hafa rangt fyrir sér. Rafa Benítez er sem stendur að láta þessa örfáu leikmenn Liverpool sem voru ekki valdir til að leika með landsliðum sínum spila reitabolta og borðtennis, á meðan landsliðsþjálfararnir njóta góðs af því sem ég get eiginlega bara lýst sem ótrúlegri frekju og yfirgangi landsliðanna!

Í alvöru, það eru fimm dagar í að fyrsta umferð í flestum deildum Evrópu hefjist. Og mönnum er kippt út úr undirbúningstímabilinu sínu og látnir spila tilgangslausa landsleiki? Hvað í fjandanum eiga þessir landsleikir að gera?! Mönnum verður kippt aftur frá liðum sínum til að leika landsleiki eftir tæpar þrjár vikur, og munu þá verða í rúma viku með landsliðum sínum og spila tvo leiki. Var ekki hægt að láta það nægja? Flest stærri liðin voru að spila í HM fyrir ekki svo löngu síðan, þurfa menn virkilega æfingaleik núna til að samstilla sig?

Þetta er svo mikið kjaftæði að það nær ekki nokkurri átt. Og það versta er að stærri liðin tapa öll á þessu. Á meðan Liverpool, Chelsea, Man U og Arsenal missa 80% af mannskap sínum í landsleiki eru lið eins og Sheffield United með nánast fullan mannskap þessa vikuna til að búa sig undir leik við … jú, akkúrrat, Liverpool! Og samt búumst við við að Liverpool vinni skyldusigur gegn Sheff Utd næstu helgi? Ég er bara hreint ekki svo viss.

Helvítis landsleikjahlé. Ég hef nákvæmlega ekkert á móti landsliðum og finnst frábært að fá að sjá löndin berjast, en þessar aukapásur vegna æfingalandsleikja fara óendanlega mikið í taugarnar á mér. Hvernig væri að taka bara þrjár tarnir yfir veturinn þar sem landsliðin fá að njóta sín í svona þrjár vikur? Þar væri hægt að spila tvo æfingaleiki og svo 3-4 leiki í undankeppnunum, og svo gætu menn bara farið og einbeitt sér að félagsliðum sínum næstu fjóra mánuðina án þess að vera truflaðir? Ekki þetta stanslausa bull … við fáum 2-3 umferðir í deild og svo þurfa menn aftur að fara aftur til að spila með landsliðum sínum?

Rugl. Ekkert annað en rugl. Þeir sem halda að leikmenn landsliða græði eitthvað á æfingaleik sem er spilaður þremur vikum fyrir fyrsta landsleik, eigandi svo eftir að spila 2-3 leiki með félagsliðum sínum áður en þeir spila aftur saman sem landslið, eru geðveikir.

Getur einhver útskýrt fyrir mér af hverju Shaun Wright-Phillips, sem spilaði nánast aldrei með Chelsea á síðasta tímabili [er tekinn fram fyrir](http://news.bbc.co.uk/sport2/hi/football/internationals/4784203.stm) David Beckham í enska landsliðið? Ég hreinlega get ekki skilið svona ákvarðanir.

Sjáiði bara til, [spádómur minn um Jermaine Pennant](http://www.kop.is/gamalt/2006/07/26/16.40.22/) mun rætast!

Í dag tilkynnti Steve McClaren, nýbakaður þjálfari enska landsliðsins, að John Terry fyrirliði Chelsea sé nýr fyrirliði landsliðsins. Okkar maður, Steven Gerrard, þótti koma sterklega til greina en hefur verið gerður að vara-fyrirliða landsliðsins. Gerrard var fljótur að óska Terry til hamingju.

Að mínu mati skipti eiginlega engu máli hvor þeirra fékk “djobbið” að endingu. Breska pressan, eins og henni einni er lagið, hefur gert fáránlega mikið úr “kapphlaupinu um armbandið” síðustu vikurnar og það var orðið hálf hjákátlegt á þriðjudag að lesa fyrirsögnina “Gerrard tekur forystu í fyrirliðakapphlaupinu” eftir að McClaren hitti hann og aðra Púllara á Melwood-æfingasvæðinu um helgina.

John Terry er að mínu mati frábær fyrirliði; hann er þegar orðinn andlegur leiðtogi Chelsea-liðsins á vellinum og maður sá það skýrt á HM í knattspyrnu í sumar að það er hann en ekki Rio Ferdinand eða Gary Neville sem stjórna ensku vörninni. Það er hann sem gargar á menn og lætur menn hafa það óþvegið þegar það er við hæfi, ekki þeir hinir.

Ef það er einhver ástæða fyrir því að ég hefði viljað sjá Gerrard vera gerðan fyrirliða væri það helst sú að Terry er þegar orðinn leiðtogi í vörn liðsins, en mér finnst vanta skýra valdaskiptingu á miðjunni. Lampard og Gerrard hafa núna í þrjú ár rembst hlið við hlið sem jafningjar og einfaldlega ná ekki að vinna saman. Þá hefur Eriksson einnig prófað að láta Gerrard sitja fyrir aftan Lampard sem varnarsinnaðan miðjumann, og það virkaði ekki heldur. Að mínu mati er ljóst að það er kominn tími á að Gerrard fái það frelsi á ensku miðjunni sem hann á skilið, og hefði fyrirliðabandið getað verið fyrsti liður í því að hann taki yfir spilamennsku liðsins á sama hátt og hann gerir hjá Liverpool. Rétt eins og hjá Liverpool gæti ég ímyndað mér framtíðarmiðju Englands þar sem Gerrard situr á toppi þriggja manna miðju, með Lampard og Carrick fyrir aftan sig.

Þetta gæti enn gerst svo sem og það verður vissulega athyglisvert að sjá hvernig McClaren leysir þetta undarlega Gerrard/Lampard vandamál, en á meðan finnst mér auðvelt að játa það að John Terry er vissulega vel að fyrirliðabandinu kominn. Hann er nýr fyrirliði og ég vona, Englendinga vegna, að þeir geti fylkt liði að baki sínum nýju leiðtogum, McClaren og Terry. Engu að síður er mér alveg ljóst að það skiptir engu þótt Gvuð Almáttugur þjálfi þetta lið og Jesú Kristur sé fyrirliði þess, ef menn finna ekki leið til að leyfa Steven Gerrard að njóta sín á miðjunni mun þetta lið halda áfram að valda vonbrigðum.

Gonzalez er 21 árs gamall og var rekinn heim úr keppnisferð Chile í Evrópu fyrir HM nú fyrr í sumar. Ástæðan fyrir brottrekstrinum var að hann á að hafa verið ásamt liðfélaga sínum, Reinaldo Navia, inná hótelherbergi með 3 dömum sólahring eftir vinnáttulandsleik þeirra gegn Írlandi. Hann hefur ávallt haldið fram sakleysi sínu og segist vera hneykslaður á framkomu þjálfarans og hafi þess vegna tekið þess ákvörðun.

“I am not going to continue. I am not going to wear the national shirt again and I don’t have to give any explanations to anyone. Now the only thing I am thinking of is to keep doing my work in England. All that has been said about me during the national team’s European tour has hurt me a lot.”

Þetta eru klárlega vondar fréttir fyrir Chile en hins vegar tel ég að þetta séu góðar fréttir fyrir Liverpool þ.e. minni hætta á meiðslum sem og hann getur 100% einbeitt sér að því að spila með LFC.

Þetta er helst í fréttum:

WAYNE ROONEY ER MEIDDUR!!!!!

Annað er ekki í fréttum.

Alan Hansen er snillingur, en hann er líka bullari. Á tímum kemur hann með svona gullmola – einsog þessa lausn hans á [Wayne Rooney vandamálinu fyrir enska landsliðið](http://news.bbc.co.uk/sport1/hi/football/4964924.stm):

>Personally, I think the answer is to play Joe Cole just off Owen and move Gerrard to the left, giving him a remit to roam.

Í alvöru talað? Besta miðjumann í heimi á vinstri kantinn? Hvaða landsliði öðru en því enska dettur í hug að láta besta leikmanninn sinn ekki leika í sinni bestu stöðu? Bara á Englandi. Alls staðar annars staðar væri lið byggð í kringum Gerrard, en í enska liðinu virðist hann vera einhvers konar afgangsstærð, sem er vegna hæfileika sinna alltaf settur í mestu vandræðastöðuna.

Þvílík vitleysa.

Þetta er vinsamleg ábending til forsvarsmanna Sýnar.

Næst þegar þið ætlið að sjónvarpa beint frá atburði á þýsku og fáið íslenskan þul til að lýsa því sem er að gerast, fáið þá þul, sem að **skilur þýsku!**

Takk fyrir.

Jaaá, hver sagði að enska pressan hefði eitthvað gáfulegt að segja?

Guardian: Gerrard ætti að vera á bekknum á HM næsta sumar.
BBC: Eriksson í klípu, verður að fórna Gerrard fyrir úlfana.

Sagan er beisiklí þessi: Ledley King, sem er miðvörður hjá Tottenham, var víst svo góður gegn Póllandi á miðvikudaginn að enskir blaðamenn sjá engan annan kost í stöðunni en þann að King sé svarið við öllum þeirra vanda. Með hann fyrir aftan sig getur Frank Lampard farið fram að vild og verið stórhættulegur, en með Gerrard við hliðina á sér er Lampard óöruggur og ekki viss um hlutverk sitt, og Gerrard ekki heldur.

Ég skal viðurkenna það að Lampard/Gerrard samstarfið hefur ekki alltaf virkað sem skyldi fyrir enska landsliðið, en að gefa það í skyn að miðvörðurinn Ledley King eigi að byrja inná fyrir Steven Gerrard á HM, byggt á einum góðum leik King gegn liði sem lá í vörn allan tímann á Old Trafford, er bara rugl og vitleysa.

Rugl … og … vitleysa!

Hvað er að fólki? Hafa þessir “blaðamenn” séð Stevie spila knattspyrnu? Hann spilaði varnarsinnaða hlutverkið, fyrir aftan Lampard, á laugardaginn og var út um allt á vellinum. Bæði í vörn og frammi. Og Lampard var þeirra hættulegasti miðjumaður í þeim leik, gegn Austurríki.

Fyrir mér er þetta mál skýrt. Á miðvikudaginn var miðja Englendinga skipuð af þeim Joe Cole, Frank Lampard, Ledley King og Shaun Wright-Phillips. Fjórir leikmenn sem eru uppaldir í Lundúnum og leika í dag fyrir lið frá höfuðborginni (Wright-Phillips er líka uppalinn í Lundúnum, þótt hann hafi leikið frá unglingsárum fyrir Man City).

David Beckham og Steven Gerrard … eru frá Norður-Englandi.

Breska pressan, fyrir utan staðarblöðin, er staðsett í Lundúnum. Enda segir það sig sjálft að einu mennirnir sem halda því fram að Ledley King sé betri miðjumaður en Steven Gerrard, eru menn sem hafa einhverjar aðrar ástæður en knattspyrnulegar, til að vilja sjá Stevie setjast á bekkinn.

Ég elska landsleikjahlé. Hef ég sagt það áður? Í síðasta hléi meiddist Morientes og hefur ekki leikið síðan, í þetta sinn snýr Stevie aftur meiddur og, að því er virðist, með sæti sitt í landsliðinu í hættu … og Peter Crouch var svo eyðilagður eftir að vera púaður niður á Old Toilet á miðvikudag að hann vildi ekki veita nein viðtöl eftir leikinn.

Býst ekki við að Crouchie spili með mikið sjálfstraust á laugardag, og ef hann leikur illa þá vitið þið að það hefur mikið gengið á hjá honum þessa vikuna. Ekki gætuð þið sinnt ykkar störfum vel á meðan 65,000 manns eru að púa ykkur niður…

Mæli einnig með góðri grein Paul Tomkins um landsliðin: Liverpool hampered.

Það gekk ágætlega hjá Liverpool leikmönnunum sem voru að [spila í gær með landsliðum sínum](http://www.liverpoolfc.tv/news/drilldown/N149880050904-0952.htm). Morientes skoraði þegar Spánn vann Kanada í vináttuleik 2-1, Cisse skoraði 2 og lagði upp þriðja marki þegar Frakkland vann Færeyjar 3-0 og síðan skoraði Sissoko þegar Malí vann Kongó 2-0.

Aðrir leikmenn sem spiluðu í gær voru þeir Hyypia sem spilaði í jafnteflisleik gegn Andorra, Gerrard og Carra voru í sigurliði gegn Wales, 1-0, og í lokinn var Riise á bekknum hjá Noregi gegn Slóveníu. Þann leik vann Noregur 3-2.

Frábærar fréttir fyrir okkur Liverpool menn. Stephen Warnock, sem Rafa hefur hrósað óspart að undanförnu, var í dag valinn í [enska landsliðshópinn](http://news.bbc.co.uk/sport1/hi/football/internationals/4190482.stm). Það virðist vera svo að Rafa sjái Warnock sem okkar framtíðar vinstri bakvörð og hann hefur kvatt Sven Göran til að velja hann, sem hann gerði nú í dag.

Í enska hópnum eru núna 4 Liverpool leikmenn: Chris Kirkland (sem mun því meiðast í þessari viku), Stephen Warnock, Steven Gerrard og Jamie Carragher. Ég gæti vel trúað því að Peter Crouch væri þarna líka ef hann væri ekki meiddur.

Ég fór á leikinn í gær ásamt rúmlega 41 þús. öðrum til að sjá stórstjörnurnar frá Englandi og þá náttúrulega sérstaklega Gerrard, Carragher og já líka Owen. Það var uppselt á leikinn, mikil stemming í Köben um daginn og margir Bretar sem voru á leiðinni á leikinn. Þeir voru út um allt. Fyrir leikinn sagði Morten Olsen að þessi leikur væri eingöngu æfingaleikur og skipti þá litlu máli, aðalatriðið væri næsti leikur gegn Tyrkjum (úti) þann 3. sept.
Hvað sem því líður þá var ljóst frá upphafi að Danir voru klárir í leikinn en Englendingar voru með hugann við smörrebröd og Tulip pylsur. Leikur kláraðist á fáum mínútum í seinni hálfleik þegar Danir skoruðu 3 mörk í röð og [leikurinn endaði 4-1](http://news.bbc.co.uk/sport2/hi/football/internationals/4161594.stm). Mikil stemming var á Parken, sungið var OL-SEN! og uppáhaldslagið hans Bjarna Fel. frá HM í Mexíkó, [Vi er røde, vi er hvide!](http://www.roliganklubben.dk/SANGE/4.htm) Danir eru yfirmáta ánægðir með sigurinn á meðan þetta er stærsta tap Englands í 25 ár. Hhhmm kannski var 6-1 tapið um árið ekkert svo slæmt!

Liverpool átti leikmenn í fjölmörgum landsliðum í gær. Enginn meiddist og er það líklega bestu fréttirnar.
Enska liðið spilaði gegn DK og tapaði sannfærandi. Gerrard spilaði 80 mín., Carragher kom inná í hálfleik líkt og næstum því leikmaður LFC aftur, Owen.
Spænska liðið vann Úrúgvæ 2-0. Þeir Alonso, Morientes og Reina voru allir í byrjunarliðinu en Luis Garcia kom inná í þeim síðari.
Hyypia og Finnland spiluðu gegn Makedóníu og unnu sannfærandi 3-0.
Cisse kom inná á 70 mín. gegn Fílabeinströndinni. Frakkland vann sannfærandi 3-0 sigur.
Þýskaland gerði 2-2 jafntefli gegn Hollandi og var Hamann tekinn út af seint í leiknum.

Svona leit byrjunarlið spænska landsliðsins út [gegn Úrúgvæ í kvöld](http://www.marca.com/edicion/noticia/0,2458,664761,00.html):

Ekki slæmt. Við þurfum bara að kaupa Joaquin og þá förum við að nálgast hreinan meirihluta. :-)

Luis Garcia (he drinks sangriiiia) kom svo inná í seinni hálfleik og skaut í stöngina einu sinni.

Steve McClaren [segir](http://www.mirror.co.uk/sport/football/tm_objectid=15858003%26method=full%26siteid=94762%26headline=england%2ds%2dbest%2dattacker%2dand%2dbest%2ddefender-name_page.html), eftir leikinn gegn Boro, að Gerrard sé besti varnarmaður og sóknarmaður enska landsliðsins. Ennfremur að hann sé sá leikmaður sem skipti sköpum fyrir landsliðið á HM í Þýskalandi næsta sumar.

Enska landsliðið spilar vináttuleik geng Danmörku á Parken á miðvikudaginn kemur og eru 2 leikmenn frá Liverpool í [hópnum](http://www.liverpoolfc.tv/news/drilldown/N149666050814-0849.htm), Gerrard og Carragher. Ég fer á leikinn fyrir hönd síðunnar og tek út hvernig liðið spilar sem og okkar menn. Jájá við erum allasstaðar :)

Aragones, landsliðþjálfari Spánar, er [ósáttur](http://skysports.planetfootball.com/list.asp?hlid=298371&cpid=23&CLID=14&lid=&title=ARAGONES+FEARS+EXPORT+POLICY&channel=football_home) við hið nýja landslag sem blasir við hjá honum að að margir landsliðsmenn séu að sækja á ný mið utan Spánar. Kemur þessi umræða í framhaldi af því að Liverpool er með 4 leikmenn í 22 manna hóp landsliðsins. Þetta er “vandamál” sem líklega allir landsliðsþjálfarar í dag þurfa að takast á við nema kannski Marcello Lippi með ítalska landsliðið.

Síðan útskýrir Aragones hvers vegna hann velur Moro aftur í liðið:

“Goalscorers can go through times when things do not go right, but I have followed him recently,” Aragones continued.

“Morientes has always played well for Spain and has experience and is important both for scoring goals and for his all-round game.”

Morientes var í dag aftur valinn í [spænska landsliðið](http://today.reuters.co.uk/news/newsarticle.aspx?type=footballNews&summit=&storyid=URI:urn:newsml:reuters.com:20050811:MTFH25500_2005-08-11_11-28-34_L11710265:1) fyrir vináttuleiki gegn Úrugvæ (17.ágúst) og Kanada (3.sept). Moro hefur ekki spilað með landsliðinu síðan í september á síðasta ári. Einnig eru þeir Xabi Alonso, Luis Garcia og Pepe Reina í liðinu. Það er athyglisvert að við eigum fleiri leikmenn í landsliðinu heldur en nokkuð annað lið.

Hamann var einnig valinn í þýska landsliðið fyrir vináttuleik gegn Hollandi á miðvikudaginn kemur. Hamann, sem hefur ekki átt upp á pallborðið hjá Jurgen Klinsmann landsliðsþjálfara, virðist hafa unnið sig í náðina á ný:

“I hope nothing happens and Didi can stay fit,” said manager Jurgen Klinsmann, who has named Hamann in two previous squads, only for the 58-times Germany international to drop out injured.

“He has a strong personality and, despite many injuries, has stuck at it and played a big part in Liverpool’s Champions League success.”

Að lokum [talar](http://skysports.planetfootball.com/list.asp?hlid=298193&cpid=8&CLID=14&lid=&title=Reds+working+on+additions&channel=football_home) Rick Parry um að Liverpool MUNI kaupa tvo leikmenn áður en félagsskiptaglugginn lokar sem og þau vonbrigði að Gonzalez fékk ekki atvinnuleyfi. Greinilegt er að Rafa hefur gríðarlegt álit á drengnum.

[Luis Garcia og Xabi Alonso](http://www.goal.com/NewsDetail.aspx?idNews=62608) eru báðir í spænska landsliðshópnum fyrir leiki gegn Litháen og Bosníu.

Jose Reina, sem menn telja að sé nær öruggt að komi til okkar í sumar, er líka í hópnum. Hann er að öllum líkindum markvörður númer 2, á eftir Iker Casillas, en á undan Canizares. Gott mál.

Talandi um Spán, þá finnst varaforseta Milan vera ástæða til að [gefa út yfirlýsingu](http://www.marca.com/edicion/noticia/0,2458,633566,00.html) um að hann sé *ekki* stressaður yfir því að dómarinn í leiknum sé Spánverji. Einhverjir eiga víst að hafa haft af því áhyggjur að Spánverjinn yrði of góður við landa sína hjá Liverpool.

Bleh bleh ble ble ble…

Við gleymdum alve að minnast á það, en Scott Carson hefur verið valinn í enska landsliðið fyrir ferðalag þeirra til Bandaríkjanna. Þetta er náttúrulega frábært fyrir hinn unga Carson.

Á Liverpoolfc er [stutt viðtal við Carson](http://www.liverpoolfc.tv/news/drilldown/N148841050517-1304.htm), þar sem hann tjáir sig um breytingarnar á þessu tímabili:

>”I was thinking to myself the other night how I’ve gone from sitting on the bench in the Championship to the Champions League final and England squad. Everything’s happened so quickly.”

Einsog við sögðum áður, þá hefur Carson staðið sig frábærlega. Það eru ekki margir sem geta farið frá því að vera varamenn í fyrstu deildinni til þess að byrja á móti Juventus í Meistaradeildinni á nokkrum vikum og staðið sig jafnvel og Carson gerði. Sannarlega framtíðarmaður hjá Liverpool.

Jæja, þá er [aprílgabbið](http://www.kop.is/gamalt/2005/04/01/08.52.55/) búið og við höldum áfram eðlilegri starfsemi :-)

Carlos Alberto, þjálfari Azerbasjan er vitleysingur, sem lifir á fornri frægð. Eftir tapleikinn réðst hann á [hreint ótrúlega grófan hátt á Michael Owen](http://sport.scotsman.com/football.cfm?id=340502005). Ég átti varla til orð þegar ég las þetta og ætlaði að skrifa um það, en ég sá að þeir á Kopblog höfðu skrifað [góðan pistil](http://www.thisisanfield.com/kopblog.php#208) um þetta, sem segir flest, sem segja þarf.

Ef að Höddi Magg segir: “Einhvern tímann hefði nú Michael Owen…. bla bla bla” einu sinni enn, þá brýt ég sjónvarpið.

Má Michael Owen ekki klikka á einu færi án þess að það þýði að ferill hann sé á niðurleið? Ég veit ekki hver ástæðan er, en mér þykir ennþá ferlega vænt um Michael Owen. Ég hélt að ég myndi snúast gegn honum eftir að hann fór til Real, en það hefur ekki gerst. Ef hann hins vegar ákveður að spila með öðru bresku liði, þá mun það fljótt gerast.

Annars talandi um þessa landsleiki, þá hafa nú tveir Liverpool menn skorað í vikunni. Milan Baros skoraði um helgina og Stevie G í kvöld. Gerrard er þá búinn að skora í tveimur af síðustu þremur leikjum sínum. Ég væri alveg til í að veðja nokkrum krónum um það að hann myndi skora á laugardaginn.

**Uppfært (Einar Örn)** Í kvöld þá fiskaði Milan Baros víti, lagði upp annað mark og skoraði það þriðja. [Ekki slæmt](http://fifaworldcup.yahoo.com/06/en/050330/7/3dsd.html). En gleymum því samt ekki að Milan Baros getur ekki neitt í fótbolta!

Eru menn ekki að grínast? Í síðustu viku lék England gjörsamlega tilgangslausan æfingaleik við Holland og þar sem flestir leikmenn toppliðanna voru teknir útaf í síðasta lagi eftir 55 mínútna leik spiluðu þeir Steve Gerrard og Jamie Carragher nærri því allan leikinn. Sem sást gegn Birmingham á laugardag.

Í kvöld var síðan þessi góðgerðarleikur á Nou Camp í Barcelona. Ronaldinho var fyrirliði síns liðs, heimsúrvalsins, og var tekinn útaf á 60. mínútu við mikið lófatak. Aðrir leikmenn hans spiluðu frá 20 mínútum og upp í 50 mínútur mest eða svo, Ronaldinho spilaði manna mest. Hinum megin fór Andryi Schevchenko, fyrirliði Evrópuúrvalsins, útaf í hálfleik og Thierry Henry kom inná í staðinn. Hann fór síðan útaf eftir að hafa spilað í varla 20 mínútur. Flestir aðrir leikmenn liðsins spiluðu bara 45 mínútur eða minna…

…nema okkar maður, Steven Gerrard. Hann spilaði allar 90 fokking mínúturnar, þar af síðasta hálftímann í miðri vörninni!?!?!?

Hvað er í gangi? Er einhver regla hjá UEFA og FA samböndunum sem segir að Liverpool-menn séu undanskildir þessari óskrifuðu reglu um hvíld í vináttuleikjum? Arnar Björnsson minntist mikið á það í kvöld að Gerrard gæti spilað lengur en aðrir þar sem hann væri í leikbanni í næstu viku í Meistaradeildinni, en það er andskotann engin afsökun.

Þetta er bara fáránlegt, jafnt skal ganga yfir alla og ef Henry sleppur með 20 mínútna framlag þá sé ég enga ástæðu til að láta Gerrard spila allar 90 mínúturnar. Enga fokking ástæðu.

Tók einnig eftir því að Chelsea sendu engan leikmann í þennan leik. Er hér hin ótrúlega manngæska Peter Kenyon og Roman Abramovitch að sýna sig enn og aftur … eða gilda sérreglur um Chelsea-leikmenn jafnt og Liverpool-leikmenn, nema á þverólíka vegu? Af hverju mátti Petr Cech ekki standa í markinu eða Frank Lampard spila í vörninni hjá Evrópu í dag eins og Gerrard þurfti að gera?

Asnalegt. Frábært að menn skyldu mæta og sýna góðu málefni athygli og leggja sitt af mörkunum … en jafnt skal ganga yfir alla!

Hey, sjáið hver er [maður leiksins](http://news.bbc.co.uk/sport1/hi/football/internationals/4251617.stm) hjá Englendingum gegn Hollandi og hvaða tveir menn fá hæstu einkunninrnar! :-)

Steven Gerrard mun að [sögn Rafa spila fyrir varaliðið á mánudaginn](http://news.bbc.co.uk/sport2/hi/football/teams/l/liverpool/4010211.stm). Þulirnir á C. Palace leiknum minntust einmitt á að Gerrard hefði spilað klukkutíma í æfingaleik í vikunni, án vandræða. Frábærar fréttir.

2/5 af vörninni okkar voru valdir í [22 manna enska landsliðshópinn](http://news.bbc.co.uk/sport2/hi/football/internationals/4005757.stm). Jamie Carragher og Chris Kirkland eru í hópnum. Kirkland hefur alltaf meitt sig áður en hann hefur fengið tækifæri, þannig að það er vonandi að honum takist að halda sér heilum núna.

Talandi um Kirkland, þá er Dudek farinn [að væla](http://www.koptalk.org/forums/showflat.php/Cat/0/Number/362281/page/0/view/collapsed/sb/5/o/all/fpart/1) um ástand sitt hjá liðinu. Hann segir að ef hann er enn markmaður númer 2 um jólin, þá fari hann að hugsa sér til hreyfings. Ég hef margoft sagt það að Jerzy eigi ekki að vera markmaður númer 1 hjá Liverpool. Kirkland er framtíðin og eflaust er Dudek of reyndur og virtur markvörður til að sitja á bekknum. Það er þó ólíklegt að Benitez leyfi Dudek að fara nema að Kirkland haldi sér heilt tímabil ómeiddum.

Xabi Alonso kemst einn [Spánverjanna okkar í spænska landsliðshópinn](http://www.marca.com/edicion/noticia/0,2458,558830,00.html). Alonso og Reyes eru einu mennirnir í hópnum, sem leika ekki á Spáni.

Lansleikjapásan er búin. Loksins!

Liverpool spilar við Fulham á morgun klukkan 2. Leikurinn er ekki á Skjá Einum, en verður hins vegar sýndur í beinni á Players.

Kristján mun setja inn upphitun í kvöld eða fyrramálið.

Þá er fyrri partinum af landsleikjahrinunni lokið og það styttist í næsta Liverpool leik. Það voru nokkrir Liverpool menn að spila í gær.

Djibril Cisse [byrjaði inná](http://www.uefa.com/competitions/WorldCup/FixturesResults/Round=1915/Match=75272/Report=MS.html) með Thierry Henry þegar Frakkar tóku á móti Írlandi. Hvorki Cisse né öðrum Frökkum tókst að skora. Það er einnig athyglisvert að Alou Diarra, sem er í láni hjá Lens, kom inná sem varamaður í leiknum. Steve Finnan lék fyrir Írland.

Xabi Alonso [kom inná sem varamaður](http://www.uefa.com/competitions/WorldCup/FixturesResults/Round=1915/Match=75359/Report=RP.html) þegar að Spánverjar unnu Belga. Alonso kom inná í seinni hálfleik fyrir Albelda, leikmann Valencia.

Auk þessara leikmanna spiluðu Dudek, Riise, Baros, Hyypia og Henchoz einnig í [landsleikjum í gær](http://www.liverpoolfc.tv/news/drilldown/N146297041010-0939.htm). Jamie Carragher komst hins vegar ekki á bekkinn fyrir enska landsliðið.

Já, og sumir leikmenn [læra seint af reynslunni](http://www.reuters.co.uk/newsArticle.jhtml?type=footballNewsUK&storyID=6459995&src=rss/uk/footballNews&section=news)

Ég hata landsleikjahlé!

Takk fyrir.

Helvítis tvær vikur á milli leikja. Nánast ólöglegt.

Takk sömuleiðis.

La Marca [telja nú líklegt að Josemi verði valinn í fyrsta landsliðshóp Luis Aragones](http://www.marca.com/edicion/noticia/0,2458,515232,00.html) (frétt á spænsku. Mjög bjöguð þýðing [hér](http://translate.google.com/translate?hl=en&sl=es&u=http://www.marca.com/edicion/noticia/0,2458,515232,00.html&prev=/search%3Fq%3Djosemi%2Bsite:marca.com%26hl%3Den%26lr%3D%26ie%3DUTF-8%26sa%3DG)).

Aragones, hinn nýji landsliðsþjálfari Spánar er hrifinn af Josemi og telur að hann sé rétti maðurinn til að veita Michel Salgado keppni í hægri bakverðinum.

Þetta eru náttúrulega frábærar fréttir fyrir Liverpool. Það er vonandi að Josemi fái að spreyta sig í landsliðinu, því það mun án efa styrkja hann sem leikmann.

Grikkir, leiðinlegasta liðið á EM komust í kvöld í úrslit EM eftir sigur á Tékkum. Í staðinn fyrir að fá draumaleikinn Tékkland-Portúgal, þá eru allar líkur á að við fáum þriðja hundleiðinlega leikinn með Grikkjum í röð.

Grikkland-Frakkland og Grikkland-Tékkland eru án efa leiðinlegustu leikir þessarar keppni. Núna er maður kominn í þá skrítnu aðstöðu að þurfa í raun að halda með Figo og Ronaldo og þeim spekingum. Því að ef Grikkir vinna EM, þá verður það stórkostlegur ósigur fyrir knattspyrnuna. Ég blæs á allt þetta blaður um að það sé skemmtilegt að “litla liðið” sé komið í úrslit og allt það. Grikkland er ömurlega leiðinlegt lið og þeir eiga ekki skilið að vera komnir í úrslit.

Þetta er vissulega leiðinlegur endir fyrir síðustu Liverpool mennina á mótinu. Baros og Smicer komu lítið við sögu í leiknum enda var gríska liðið með 10 menn í vörn allan tímann.

Það góða við þetta er þó að það eru allar líkur á því að Baros verði markakóngur EM. Eina, sem getur komið í veg fyrir það er ef að Charisteas, Ronaldo, Maniche eða Rui Costa skori 3 mörk í úrslitaleiknum.

Annars, þá er ég kominn heim frá Houston og mun því reyna að koma mér inní Liverpool mál smám saman. Vissulega frábært að koma heim og sjá að Gerrard er búinn lýsa því yfir að hann vilji vera áfram hjá Liverpool. Þegar ég var úti dreymdi mig eitt kvöldið leik, þar sem Gerrard var að spila í bláum Chelsea búningi. Það var ekki fögur sjón.

Þannig fór um sjóferð þá hjá mínum mönnum, Hollendingum, sem töpuðu gegn Portúgal, 2-1, í undanúrslitum EM 2004 í kvöld!

Þessi sigur var að mínu mati fyllilega verðskuldaður. Þótt ég haldi með Hollandi verður ekki hægt að líta framhjá því að þeir hafa bara einfaldlega ekki verið að spila nógu vel í þessari keppni. En einmitt þegar maður hélt að þeir gætu rifið upp stemninguna innan liðsins fyrir svona stóran leik komu þeir manni á óvart og virkuðu hálf daufir í fyrri hálfleik. Á meðan Portúgalirnir komu flugbeittir og ákveðnir til leiks fannst mér eins og ég væri enn að bíða eftir að Hollendingarnir byrjuðu að reyna á sig þegar Frisk dómari flautaði til hálfleiks.

Nú, Portúgalirnir skoruðu öll mörkin í leiknum og ef ekki hefði verið fyrir klaufaskap Jorgé Andrade (sem annars átti stórgóðan leik í vörninni og jarðaði van Nistelrooy algjörlega) þá hefðu Hollendingarnir aldrei átt séns. En úr því að sjálfsmarkið gaf þeim von pressuðu þeir rosalega undir lokin og ég var eiginlega orðinn viss um að mín spá myndi rætast (2-2 eftir 90 mín., Holland vinnur í vító). En allt kom fyrir ekki, Portúgalirnir héldu þetta út í 94 mínútur og eru núna komnir í úrslitaleikinn. Sem þeir eiga skilið – að undanskildum fyrstu 45 mínútunum gegn Grikkjum, þar sem þeir gerðu sig seka um rosalegt vanmat, hafa Portúgalirnir verið mjög góðir og ört vaxandi í gegnum alla keppnina.

Nú er bara að sjá hvort Baros og co. í landsliði Tékka tryggja sér ekki réttinn til að taka á heimamönnum á sunnudag. Sá úrslitaleikur ætti að verða rosalegur – en tékkneska liðið er það eina sem að mínu mati hefur spilað betur en það portúgalska í þessu móti.

Talandi um Milan Baros: tap Hollendinga í kvöld nánast tryggði honum markakóngstitilinn á EM 2004. Ruud van Nistelrooy var með 4 mörk fyrir leikinn í kvöld en tókst ekki að skora, þannig að eins lengi og hvorki Marek Heinz eða Jan Koller eru að fara að skora þrennu eða fernu á morgun þá er varaskeifa Emile Heskey þegar orðinn markakóngur EM 2004 og eina spurningin er hvort hann bætir við mörkum á morgun. Vonandi.

Á morgun er svo stór dagur í lífi allra Liverpool-aðdáenda. Nei, ég er ekki að tala um heimkomu Einars … ég er að tala um þriggja ára bið sem er nú loks á enda og verður því gert betur skil á þessari síðu á morgun, 1. júlí 2004. Stór dagur og svei mér þá ef ég fæ mér ekki franskt hvítvín yfir leiknum annað kvöld til að fagna þessu…

Hann er að koma. Á morgun. Loksins. Við höfum beðið allt of lengi.

Það verður að segjast, við Einar Örn vorum búnir að margspá þessu hér á blogginu. Fólk þarf bara að skoða færslurnar frá því í lok maí/byrjun júní til að sjá að við vorum ekki efins, við vorum vissir um að Milan Baros yrði ein af stjörnum EM 2004.

Í ljós hefur komið að við höfðum rangt fyrir okkur. Milan Baros er ekki ein af stjörnum EM 2004. Hann er stjarna EM 2004. Punktur.

Í kvöld lágu Danir í því. Þeir steinlágu fyrir Tékkum, 3-0 í leik sem var í raun jafnari en þær tölur gefa til kynna. Það sem bar á milli í hnífjöfnum leik var það sem hefur skilið Tékka frá öllum mótherjum sínum í þessari keppni hingað til: þeir hafa leikmenn sem þurfa ekki nema eitt tækifæri. Þeir refsa andstæðingunum best allra liða í Evrópu í dag.

Jan Koller. Marek Heinz. Pavel Nedved. Karel Poborsky. Tomas Rosicky. Vladimir Smicer. Og Milan Baros. Þetta eru allt leikmenn sem refsa andstæðingunum grimmilega fyrir mistök …

Eins og staðan er núna eru Tékkar komnir í undanúrslit og mæta þar Grikkjum. Í hinum undanúrslitaleiknum mætast heimamenn í Portúgal og hinir sókndjörfu Hollendingar. Milan Baros er nú markahæstur í Evrópukeppninni með 5 mörk í 4 leikjum og hefur skorað í síðustu sex landsleikjum Tékka í röð. Ágætt það … aðeins Ruud Van Nistelrooy getur ógnað honum sem markakóngi EM, sá hollenski er kominn með 4 mörk í 4 leikjum og er sá eini af markahæstu mönnum keppninnar, fyrir utan Baros, sem er enn með í keppninni. Þannig að annar þeirra mun væntanlega verða markakóngur … og eins og staðan er í dag myndi ég ekki veðja á móti Baros.

Þvílík mörk. Í fyrra markinu gaf Poborsky frábæra stungusendingu innfyrir vörnina og Baros stakk sér á milli varnar og markmanns, sumir myndu segja í anda Michael Owen, og lyfti boltanum svo rólega yfir Sörensen í marki Dana. 2-0.

Seinna markið var öllu massífara, en engu að síður alveg jafn öflugt. Aftur kom stunguboltinn innfyrir, í þetta sinn vinstra megin við miðverði Dana, og Baros hljóp þá einfaldlega af sér. Tók eina snertingu inn í teiginn og dúndraði boltanum svo upp í þaknetið með vinstri fæti … óverjandi fyrir Sörensen sem verður varla sakaður um neitt af mörkum Tékka í kvöld!

Þessi drengur er bara orðinn svo góður framherji að það hálfa væri nóg. Á blaðamannafundi í morgun sagði hann frá því að hann var reiðubúinn að yfirgefa Liverpool í vor áður en að Houllier var rekinn. Sennilega væri hann farinn frá félaginu í dag ef Houllier væri enn stjóri – þar sem hann (og við aðdáendurnir) var mjög ósáttur við það að vera alltaf settur á bekkinn á meðan gúmmítékkinn Emile Heskey fékk að spila, alveg sama hversu lítið hann skoraði.

Svo fór Houllier, Benítez kom og Heskey var seldur. Nú sér Baros fram á bjartari tíð hjá Liverpool og þrátt fyrir komu Djibril Cissé í sumar ætti Baros, í ljósi framgöngu sinnar á EM, að geta gert ráð fyrir miklu fleiri tækifærum með liðinu næsta vetur. Sem er gott – því nú eigum við þrjá heimsklassaframherja sem eiga allir jafnt tilkall til byrjunarliðsins í vetur. Sem þýðir að við þurfum vonandi aldrei aftur að líða Owen að spila áfram í byrjunarliðinu þrátt fyrir 10-leikja markaþurrð. Hann er að sjálfsögðu okkar maður #1 (þ.e.a.s. ef hann er enn á Anfield í byrjun leiktíðar) en ef hann eða Cissé (sem ég geri ráð fyrir að fái að byrja leiki með Owen í upphafi leiktíðar) eru ekki að spjara sig þá á að slúffa þeim, umsvifalaust. Baros er ekki lengur framtíðin – Baros er núna og hann á að fá að spila með byrjunarliðinu NÚNA!

Ókei, þannig að uppáhaldslið okkar Einars, Hollendingar, rétt mörðu Svía í vítaspyrnukeppni í kvöld. Sem betur fer, annars held ég að Einar hefði staðið sig frekar illa á viðskiptafundum í Houston næstu vikuna… :)

Þessi leikur olli samt nokkrum vonbrigðum að mínu mati. 0-0 eftir framlengingu var ekki það sem ég hefði giskað á, enda um tvö af skemmtilegustu sóknarliðum keppninnar að ræða. En þegar svona langt er komið í stórmóti sem þessu er ekki við öðru að búast en að menn leggi ofurkapp á að fá ekki á sig nein klaufamörk – og fyrir vikið varð leikur beggja liða mjög varkár, hægur og fyrirsjáanlegur. Vissulega fengu bæði lið nóg af tækifærum til að klára dæmið en á endanum var jafntefli sennilega sanngjörn niðurstaða og því þurfti happdrættið til að útkljá það hvort liðið fékk að halda áfram.

Á morgun: Milan Baros gegn frændum vorum: Tékkland – Danmörk! Það ætti að verða rrooooossalegt! Ég á enga ósk heitari en þá að Baros endi keppnina með fleiri mörk skoruð en Wayne “Shrek” Rooney. Og það væri líka það besta sem gæti komið fyrir okkur Liverpool-menn, að með góðri frammistöðu í þessu móti myndi Baros neyða Benítez til að líta á sig sem hugsanlegan byrjunarliðsmann í vetur. Við þurfum smá heilbrigða samkeppni þarna frammi, Owen og Heskey voru öruggir í liðið síðustu árin en nú ber annað við. Cissé, Baros og Owen eiga að standa jöfnum fæti í þessu liði að mínu mati.

Sjáum til, en ég spái allavega einu marki hjá okkar manni í bláu skónum á morgun…

Frakkar töpuðu fyrir Grikkjum í kvöld, 1-0, í 8-liða úrslitum EM 2004. Og það sem meira er, þá var það sanngjarn sigur. Þannig að nú eru bæði liðin úr B-riðlinum dottin út í 8-liða úrslitum; Frakkland og England.

Nú spyrja margir sig …… hvað vantaði Frakka svona sárlega í þessari keppni?
Svar:

Það skal enginn segja mér að ef Frakkar hefðu haft Djibril Cissé í þessari keppni hefðu þeir skorað fleiri mörk og gengið betur með lið eins og Grikki og Englendinga, sem þrífast á sterkum og skipulögðum vörnum. Ekki aðeins voru bæði Trézeguet og Henry í miklu óstuði alla keppnina (fyrir utan þessar 10 mínútur gegn Sviss þar sem Henry skoraði tvö mörk) heldur virtist Santini þjálfari ekki treysta Luyindula eða Saha til að koma inn fyrir þá. Hann hefði átt að láta Saha byrja inná fyrir Trézeguet í kvöld, þá er ég viss um að Frakkar hefðu aldrei lent undir í þessum leik. En hann vildi það ekki, enda var hann alla undankeppnina búinn að nota aðallega Henry, Trézeguet og Cissé og augljóst að hann treysti engum öðrum framherjum til að koma í þeirra stað.

Þannig að þegar Cissé fékk 5-leikja bannið sem varð til þess að hann missti af EM í sumar grunaði mig að það gæti farið illa fyrir Frökkum ef svo ólíklega myndi vilja til að Henry og Trézeguet myndu báðir eiga dapra keppni.

Nú – hið ólíklega gerðist. Zidane bar þetta lið á öxlum sér upp úr riðlakeppninni en þá komu Grikkirnir með sitt skipulagða baráttulið og sögðu hingaðogekkilengra! Au revoir, Francois…

Á HM 2006 munu Frakkar skarta nýju framherjapari: Thierry Henry og Djibril Cissé. Og þá, vinir mínir, munum við sjá hættulegri sóknarbolta hjá Frökkum en í síðustu tveim stórmótum til samans … sjáið bara til!

p.s.
Þessi Djibril Cissé sem þið eruð eflaust að spá í hver er … ekki segja neinum en … hann skrifar undir samning við Liverpool á næsta fimmtudag. :D

Haldiði að Englendingar hafi ekki tapað fyrir Portúgölum í 8-liða úrslitunum á EM í kvöld? Og það 6-5 í vítaspyrnukeppni … eftir að Owen hafði komið Englendingum yfir og Lampard jafnað fyrir þá í framlengingu töpuðu þeir 6-5 í vítaspyrnukeppni. Vondu kallarnir: David Beckham (yfir) og Darius Vassell (varið). Sem betur fer fyrir okkur L’pool-aðdáendur skoraði Michael Owen úr sinni spyrnu … hann hefði eflaust misst allt sjálfstraust á ný ef hann hefði klúðrað enn einni spyrnunni.

Vissulega er aðeins eitt sem allir Liverpool-aðdáendur hugsuðu þegar þeir sáu Englendinga ganga niðurlúta af velli. Nefnilega: “Núna leysist Gerrard málið vonandi strax á morgun!”

Og það er einmitt málið. Nú, þar sem Englendingar eru úr leik, er Steven Gerrard ekki lengur bundinn þagnarskyldu varðandi félagsliðamálefni. Næst þegar hann talar við blaðamann, væntanlega á morgun, verður hann 100% örugglega spurður hvort hann sé á leið til Chelsea. Og þá fáum við væntanlega svar … þar sem hann er ekki þekktur fyrir annað en hreinskilni í viðtölum!

Annars benti félagi minn mér á góða grein um Gerrard-málefnin núna í kvöld og mér fannst rétt að deila henni með ykkur. Greinina í heild sinni má lesa hér á spjallborði Liverpool.is, en ég hef valið úr nokkra frábæra punkta:

>The rumours spread like wild fire. Just like the vermin press many Liverpool supporters completely overlook the fact Gerard was happy to sign an extension to his contract earlier this year. They instead jump all over Gerrard. They are all raging. No matter what Gerrard does now he will be damned for eternity in their eyes. Why can’t Gerrard just come out and say something? Why cant Gerrard just open his mouth and let the supporters who love and adore him know his true intentions? “We have helped him be where he is today, we deserve better than to be hoodwinked” is the familiar cry. A large percentage of Liverpool’s own fan base are seriously angered and now talk of Gerrard with pure hatred NOT love.

Nákvæmlega. Gleymum ekki hvað það er stutt síðan Gerrard skrifaði undir samning við liðið. Krossfestum hann ekki fyrr en hann sjálfur hefur staðfest að hann sé að fara, ókei?

>In Portugal Gerrard is aware of what’s happening but two things are a problem here. Firstly he can’t talk to the press about club football, the FA have banned it. Secondly, he still wants a few world-class players to be signed. That hasn’t been achieved yet. If he was to come out and say “I’m staying put” and then get home to find there will be no knew players he will then look a right ******* if he then decided to go. Bringing in Benitez was the right way to go. It has helped matters but there still needs to be new faces of real quality.

Og að lokum…

>I am sure Gerrard will stay. Like I have already said it doesn’t make sense for him to leave now when we are about to embark on a new dawn. I am sure he will at least give the manager one season to see how things go. But why would he if the majority of supporters decide to lower their support for him just because he didn’t, for the umpteenth time, pledge his future to the club. And just because he didn’t break FA rules and speak out about it. Because he waited to see what new faces where in place first before saying something. If he commits then Parry will take this as being off the hook. Yet many Liverpool supporters know we need a few new faces of real quality. Gerrard could just be using the player power he has to force the clubs hand. Owen was being praised for doing this yet Gerrard isn’t being afforded the same thing.

Þetta mál með Gerrard hlýtur að leysast á morgun eða hinn … þ.e.a.s. að ef hann ætlaði sér aldrei að fara og þetta er bara slúður hlýtur hann að leiðrétta það sem fyrst, nú þegar hann má loks tjá sig aftur um klúbbamál. Ef hann hefur enn ekkert sagt á mánudaginn næstkomandi tek ég það sem sterkustu sönnunina hingað til um að hann sé virkilega að fara. Þannig að nú bíð ég bara spenntur eftir að fara á netið á morgun, þar sem ég vænti þess að sjá Steven Gerrard tjá sig um málið!

Annars var eitt enn fréttnæmt fyrir okkur Liverpool-aðdáendur í leiknum í kvöld og það var mark Michael Owen. Þetta mark reyndist frekar merkilegt, eins og kom fram í frétt á YNWA.tv í kvöld. Með því að skora í kvöld sitt fyrsta mark á EM 2004 varð Michael Owen fyrsti leikmaðurinn í sögu Liverpool til að skora mark/mörk fyrir sitt landslið í fjórum eða fleiri stórmótum landsliða.

Þá spilaði hann einnig sinn 60. landsleik sem þýðir að hann er nú leikjahæsti enski leikmaðurinn í sögu Liverpool-landsliðsmanna. Og það aðeins 24 ára gamall. Þá er hann á góðri leið með að verða markahæsti leikmaður Englendinga fyrr og síðar … mig minnir að hann vanti aðeins 18 mörk í að ná Gary Lineker, sem ætti alveg að takast ef hann spilar með landsliðinu í 7-9 ár í viðbót.

Jæja, látum þetta nægja í bili. Sorglegt tap hjá þeim ensku en mikil víma hjá heimamönnum í Portúgal. Núna kæmi mér ekkert á óvart þótt þeir fari bara alla leið, úr því þeir kláruðu Englendingana … samt kem ég til með að halda með Milan Baros, og Hollendingum! Væri til í að sjá Holland – Tékkland í úrslitum!

Á morgun: ummæli frá Steven Gerrard. Þ.e.a.s. ef allt er með felldu í Bítlaborginni. Ef hann er ekki á förum vill hann eflaust kveða niður orðróminn sem fyrst … ef hann er að fara mun þögn hans yfir helgina segja meira en þúsund orð!

Efaðist einhver um það, þegar að Milan Baros fékk boltann 40 metra frá markinu, að hann myndi skora?

Ég er svo viss um að hann vissi það allan tímann. Honum hefði verið nokk sama, þótt varnarmennirnir hefðu verið þrír, hann ætlaði að fara beint á markið og skora. Frábær frammistaða.

Þar sem flestar Liverpool fréttir undanfarna daga hafa verið slæmar fréttir, þá getum við svo sannarlega glaðst yfir frammistöðu Baros. Núna er hann búinn að skora 3 mörk í rúmlega tveimur leikjum. Ekki slæmt fyrir mann, sem komst ekki í Liverpool liðið vegna þess að þar var Emile Heskey fyrir!!

Og þar sem ritstjórar þessar síðu eru báðir Hollands-aðdáendur, þá verðið þið að fyrirgefa þennan Hollands áróður, en það geta fáir haldið því fram að Þjóðverjar hafi átt skilið að komast áfram. Bestu liðin í riðlinum, Holland og Tékkland komust áfram.

Núna er bara að vona að Baros haldi áfram á sömu braut. Ég er alveg ofboðslega hrifinn af Tékkum og ef að Hollendingar vinna þetta ekki, þá vona ég allavegana að Tékkar taki þetta. Danir eru nú ekki með sterkustu vörnina, þannig að Baros ætti að geta haldið áfram á sömu braut.

Viðbót (Kristján Atli): Ég var að átta mig á að Hollendingar og Svíar mætast í 8-liða úrslitunum á laugardaginn. Þau tvö lið sem eiga litríkustu áhorfendurnar. Getiði ímyndað ykkur litadýrðina á vellinum í Faró á laugardaginn? 50% gulur, 50% appelsínugulur. Brilljant! Áfram Holland … og áfram Baros!

Það er þriðjudagur – og gúrkutíð. Í kjölfar sigurs enskra á Króötum í gær, 4-2, er lítið rætt um annað en ágæti Wayne Rooney og væntanlega mótherja Englendinga, heimamenn í Portúgal. Það er meira að segja svo lítið rætt um annað en enska landsliðið að það hefur varla verið minnst á sölu Steven Gerrard. Sem er gott … okkur Púllurum veitti ekki af dagsfríi frá þeirri sturlun.

Annars langar mig bara að nota tækifærið og óska nágrönnum vorum í Danmörku og Svíþjóð til hamingju með að hafa slegið út hið grútleiðinlega lið Ítala í kvöld. Ekki það að ég hafi neitt á móti Ítölum, frábært fótboltalið og stórkostlegir knattspyrnumenn þarna inn á milli … en mér fannst það á HM 2002 og mér hefur fundist það aftur í sumar, að þeir spila allt of neikvæðan og leiðinlegan fótbolta. Þeir geta miklu meira en þeir hafa verið að sýna og ég vona bara að þessi skammarganga þeirra í kvöld verði til þess að Ítalir hristi upp í fótboltamálunum heima fyrir hjá sér og mæti til leiks á næsta stórmót með sóknarbolta í huga. Sem Svíar og Danir gerðu – og eiga því fyllilega skilið að komast í 8-liða úrslitin. Til hamingju!

Á morgun: Milan Baros v/s morðingjar knattspyrnunnar. Já, ég veit þetta uppnefni var eitt sinn notað á Liverpool en ekki meir. Nú eru það augljóslega Þjóðverjar sem eru að þessum titli komið – leiðinlegra fótboltalið hef ég aldrei séð og sá fáheyrði atburður átti sér stað sl. laugardag að ég slökkti á leik á EM, ég hreinlega nennti ekki að horfa á leik Þjóðverja og Letta. Þeir eru þetta leiðinlegir!

Mín spá, svo það sé skjalfest: 4-0 fyrir Tékka og Baros með þrennu. Er ekki um að gera að vera bjartsýnn? :D

Ég held með Hollandi og hef gert síðan ég var 10 ára. Því á ég erfitt með að jafna mig eftir Tékkaleikinn. Þvílík vonbrigði að Holland skuli hafa tapað þessu í seinni hálfleik. Dick Advocaat fær fyrstu opinberu viðurkenningu þessa Liverpool bloggs:

“Gerard Houllier verðlaunin, fyrir heimskulega áherslu á varnarleik”

Það er nokkuð ljóst að Chelsea hafa gert góð kaup í þessum Arjen Robben, allavegana var hann ógnandi allan leikinn. Því var alveg hreint óskiljanlegt að Advocat hafi tekið hann útaf fyrir varnarmann þegar meira en hálftími var til leiksloka. Hélt einhver virkilega að Holland myndi halda fengnum hlut?

Allavegana, þessi síða fjallar ekki um Holland, heldur Liverpool. Og þá kem ég að því, sem fær mig til að halda sönsum í kvöld. Það er frammistaða Milan Baros.

Baros er búinn að vera frábær á EM. Hann var maður leiksins á móti Lettum og hefði ekki verið fyrir hreint stórkostlegan leik hjá Nedved, þá hefði hann verið besti maður Tékka aftur í kvöld. Ég veit ekki hversu oft ég hef haldið því fram að Baros væri vanmetnasti maðurinn í enska boltanum. Hann er ekki lengur bara efnilegur, hann er einfaldlega orðinn einn af bestu framherjum í Evrópu. Og það án þess að fá almennileg tækifæri undir Gerard Houllier.

Þeir sem ekki styðja Liverpool hafa nefnilega ekki skilið almennilega hversu stórkostleg vonbrigði það voru fyrir okkur Liverpool menn að hafa Heskey alltaf í byrjunarliðinu. Allir vissu að Heskey var lélegur, en það voru bara þeir Liverpool stuðningsmenn sem horfðu á alla Liverpool leikina, sem gerðu sér grein fyrir því hvað brosmildi Tékkinn á bekknum var góður.

Það er hreint magnað þegar maður hugsar útí það að Gerard Houllier hafi verið svona blindur að halda að Liverpool myndi spila betur með EMILE HESKEY í liðinu í staðinn fyrir Baros. Það er bara ekki hægt að skilja það! Fyrir EM var Baros sá Liverpool maður, sem ég vonaðist einna mest að gæti sannað sig. Hann hefur svo sannarlega gert það í fyrstu tveimur leikjunum og ég vona að hann haldi áfram á sömu braut. Núna má hann skora þrennu á móti Þjóðverjum og senda þetta grautfúla þýska lið heim til Berlínar.

Við Liverpool stuðningsmenn höfum vitað hvað Baros getur. Það var kominn tími til að aðrir knattspyrnuunnendur kæmust að því.

Leikurinn í kvöld var náttúrulega stórkostleg skemmtun. Ágætis upprifjun á því af hverju maður elskar fótbolta. Baros gerði nánast allt rétt í leiknum. Hann barðist einsog ljón, sem sýndi sig einna best þegar hann hafði betur en þrír hollenskir varnarmenn í fyrsta markinu, sem hann lagði algerlega upp fyrir Koller.

Hann var svo sí ógnandi allan leikinn, hljóp útum allt og skoraði svo eitt besta mark keppninnar með þrumuskoti. Koller skallaði á Baros, sem var við vítateigslínuna, Baros tók boltann á lofti og þrumaði honum uppí samskeytin. Frábært mark og frábær leikur. Vonandi heldur Baros áfram á sömu braut.

Já, og svo langar mig að minna fólk á það að Baros er 22 ára gamall. Þvílíkur leikmaður! Það er nokkuð ljóst að Rafael Benitez brosir breitt eftir þennan leik.

Ég geri sterklega ráð fyrir að Benítez vilji samt byrja með Owen og Cissé frammi í haust, eða finnst það allavega lang-rökréttast. Það er bara of gott tækifæri til að sleppa því, að sjá þá tvo saman. En að sama skapi þá finnst mér engu að síður að Baros eigi að sitja við sama borð og þeir, þ.e. hann á ekki alltaf að vera átómatískt varamaður fyrir þá, eins og Houllier hafði hann alltaf. Houllier valdi Heskey alltaf fram yfir Baros. Ef Cissé eða Owen eru kaldir, eða annar þeirra lendir í markaþurrð, þá er mér sama þótt sá maður heiti “Saint Michael Owen of Wales” eða “Djibril landsliðsmaðurfrakklands Cissé” … Milan Baros á að fá að spila ef þeir standa sig ekki!

Að mínu mati erum við núna með þrjá framherja sem eru allir áþekkir að gæðum, þótt hver þeirra hafi sína sérstöku eiginleika fram yfir hina tvo. Cissé er bomban í hópnum, algjör Batistuta í raun, á meðan Owen hefur hraðann og þefvísina. Baros hefur svo að mínu mati sitt lítið af öllu, en sérgrein hans verður að teljast hvað hann er rosalega grimmur.

Þetta verður spennandi tímabil… vonandi er Benítez sá þjálfari sem leyfir þeim öllum að spila til jafns!

EM byrjar ekki ýkja vel hjá Liverpool mönnum. Owen og Gerrard voru sennilega (ásamt Scholes) slöppustu leikmenn [Englands á móti Frakklandi](http://news.bbc.co.uk/sport1/hi/football/euro_2004/3787491.stm). Vieira hafði betur í baráttunni á miðjunni. Gerrard virðist hafa verið beðinn um að liggja aftarlega á vellinum til að taka á móti pressunni frá Frökkum og því sýndi hann nánast enga sóknartilburði.

Eflaust mun enska pressan kenna Heskey og Gerrard um tapið. Heskey var náttúrulega algjör bjáni að brjóta af sér 5 metrum fyrir utan vítateig og Gerrard gerðist sekur um vítavert kæruleysi. Henry var náttúrulega fáránlega heppinn, því það var augljóst að hann nennti ekki að hlaupa útúr rangstöðunni þegar hann fékk boltann frá Gerrard.

Owen sást nánast ekki í leiknum. Hann var tekinn útaf fyrir Vassell í afskaplega skrítnum kafla hjá Englandi. Erikson skipti inn þrem mönnum á nánast sömu mínútunni. Tel að hann hafi gert stór mistök þar. Hjá BBC fá Gerrard og Owen 5 í einkunn, þeir eru [lægstir í einkunnagjöfinni](http://news.bbc.co.uk/sport1/hi/football/euro_2004/3802981.stm).

Gerard Houllier [skrifar í dag grein um Henry og Owen](http://www.telegraph.co.uk/sport/main.jhtml?view=DETAILS&grid=B&xml=/sport/2004/06/13/sfnhou13.xml), sem hann hefur báða þjálfað og fjallar um hvernig leikur þeirra hefur þróast undanfarin ár.

Glöggir menn hafa kannski tekið eftir að við Einar höfum ekki minnst mikið á Emile Heskey í sumar, ef nokkuð. Það er líka vel, okkur var báðum stórlétt þegar hann var seldur frá Liverpool í vor og held ég að það sé engum ofsögum sagt að líkurnar á því að Liverpool-liðið spili verr með Cissé í liðinu heldur en það gerði með Heskey í liðinu eru í kringum núll prósentin. 0%.

Eeeeen, þar sem það ríkir algjör gúrkutíð þessa dagana í Liverpool-málum og allt snýst um enska landsliðið og Evrópukeppnina í knattspyrnu (sem er að hefjast eftir 20 mín. þegar þetta er skrifað) þá fannst mér við hæfi að leyfa Emile Heskey að eiga gullkorn dagsins hvað varðar landsleikina sem framundan eru.

Í þessari grein talar Heskey um möguleika sína á að gera eitthvað af viti í þessari keppni, þar sem hann situr á bekknum þökk sé Wayne “Shrek” Rooney. En Heskey er hvergi banginn og um væntanlega meistaratakta sína á þessu móti hafði hann þetta að segja:

>I want to do as well as I can. I might get a chance so I must be focused and ready to go at a second’s notice. I can offer a different sort of option to the other two.

>From my point of view I certainly feel more relaxed after playing in a couple of tournaments previously. I know what is needed.

Hvað getur hann boðið okkur sem Owen og Rooney geta ekki boðið okkur? You guessed it … ef Englendingar vilja fá leikmann sem rennur á rassinn í dauðafæri undir lok leiksins þá eru Owen og Rooney ekki mennirnir sem ber að leita til, heldur Emile sjálfur Heskey!

Veit hann hvers er þörf? Eeeeh, ég hef núna fylgst með hverjum einasta leik sem Emile Heskey hefur spilað í rúm fjögur ár og ég skal ábyrgjast það að hann hefur ekki eina einustu hugmynd um það hvað er ætlast til af framherja. Sorrý, en það er satt. Emile Heskey = clueless.

Sorglegt. Þótt ég hafi ekki jafn hátt álit á Rooney og aðrir þá vona ég það, Englendinga vegna, að hann spili hvern einasta leik á þessu móti … því að öðrum kosti fær Heskey að spila og það veit aldrei á gott fyrir lið sem ætla að ná árangri!

Andvarp … af hverju tókst James Beattie ekki að sannfæra Alan Shearer um að spila með Englendingum á EM? Bara tilhugsunin um Owen og Shearer saman í framlínunni. Það eina sem er meira spennandi en það er tilhugsunin um Gerrard og Aimar saman á miðjunni…..

Svo virðist vera sem að Carragher verði ekki í enska landsliðinu gegn Frökkum. Eriksson [segir í viðtali](http://www.liverpoolfc.tv/news/drilldown/N145137040612-0755.htm):

>”I realise Carragher has more experience in internationals but Ledley is a bit quicker and a better header of the ball. And the only way to give somebody experience is to play him”

Það þarf enginn að segja mér að þetta tengist ekki hroðalegri frammistöðu hans og Biscan í Arsenal leiknum. Í öllum öðrum aðstæðum myndi Eriksson nota Carragher, en hann hefur sennilega fengið martraðir með því að Henry myndi endurtaka leikinn gegn Carragher hjá Englandi.

Thierry Henry var í viðtali í bresku fjölmiðlunum, þar sem hann sagðist ekki geta spilað einsog Michael Owen.

Henry hrósar ekki beint leikstíl Owen og því hafa bresku fréttamennirnir farið mikinn í umfjöllun sinni.

Það er misjafnt hvernig menn taka þessu. Fjölmiðlar hafa náttúrulega gert mikið úr þessu og hafa birst fyrirsagnir einsog:

[Henry: Why Owen's not in my class](http://www.mirror.co.uk/sport/sporttop/tm_objectid=14318643%26method=full%26siteid=50143%26headline=henry%2d%2dwhy%2dowen%2ds%2dnot%2din%2dmy%2dclass-name_page.html)

[Owen's game is too boring: Henry](http://icliverpool.icnetwork.co.uk/tm_objectid=14320528&method=full&siteid=50061&headline=owen-s-game-is-too-boring—henry-name_page.html)

Mér fannst þetta óþarfi hjá Henry.

Orðrétt sagði hann:

>”I admire what Michael Owen can do because I can’t do it myself,” said Henry. “I can’t stay in the box or stay around waiting for someone to deliver.

>”I just can’t. I would die. I can’t, I can’t. I have to move. Even if I have to drop and get the ball off our goalkeeper I will do it because I need to touch the ball.

Allavegana, hvernig sem menn túlka þetta, þá má Thierry Henry hoppa uppí sitt franska rassgat. Michael Owen er öðruvísi framherji en Henry. Það gefur Henry hins vegar engan rétt til að gera lítið úr þeim leikstíl. Michael Owen hefur nánast borið á herðum sér bæði Liverpool og enska landsliðið undanfarin ár. Hann hefur verið markahæsti leikmaður Liverpool undanfarin 5 ár.

Samt sem áður fær Owen alveg lygilega mikið af gagnrýni á sig.

Michael Owen var valinn knattspyrnumaður Evrópu þegar hann var 22 ára. Á nákvæmlega sama aldri var Henry varamaður hjá Juventus.

Owen hefur spilað með Liverpool undanfarin sex ár. Á þessum árum hefur hann þurft að spilað frammi með Emile Heskey. Henry hefur spilað með Dennis Bergkamp. Henry hefur haft Ljungberg og Pires fyrir aftan sig, Owen hefur haft Danny Murphy og El-Hadji Diouf. Það er augljóst að hann hefur ekki beint haft sama stuðning og Henry.

Owen hefur blómstrað í stórkeppnum. Hann var besti leikmaður Englands á HM 18 ára gamall og skoraði eitt af fallegustu mörkum keppninnar fyrr og síðar. Liverpool hefur alltaf þurft að treysta á Owen í erfiðustu leikjum félagsins.

Ég er orðinn ansi þreyttur á að heyra að Owen sé ekki nógu góður framherji, að hann hafi bara hraða og ekkert annað, eða að hann sé bara potari og að hann sé ofmetinn. Allt þetta er bull. Owen er einn af 10 bestu framherjum í heimi. Punktur!

Hann hefur skorað lygilega mikið af mörkum fyrir miðlungs Liverpool lið. Hann er búinn að skora 25 landsliðsmörk fyrir England. Hann hefur skorað 6 mörk í EM og HM keppnum. Og hann er TUTTUGU OG FJÖGURRA ÁRA! Vitiði hve mörg mörk Ruud Van Nilsteroy, sem er 27 ára, hefur skorað á EM og HM? [Núll](http://www.soccerage.com/en/04/05082.html)!

:-)

Svo mæli ég með þessari grein um [Owen](http://www.thisisanfield.com/kopblog#226).

Þegar ég var að fletta upp upplýsingum um Thierry Henry, þá komst ég að hann er fæddur nákvæmlega [sama dag og ég, 17. ágúst 1977](http://worldsoccer.about.com/cs/soccerstars/p/henrytee.htm).. Gott hjá stráknum :-)

Nokkuð athyglisverð grein, skrifuð af Liverpool aðdáenda frá Liverpool um enska landsliðið: [England, LFC and me](http://liverpool.rivals.net/default.asp?sid=890&p=2&stid=8350018). Þetta viðhorf hefur maður lesið um nokkuð oft. Það er að enskir aðdáendur Liverpool séu ekkert alltof hrifnir af enska landsliðinu. Þeim tengi landsliðið við London vegna þess að liðið spilar vanalega þar.

Allavegana, ég mæli með pistlinum. Þar segir m.a.

>England isn’t my team. My team is Liverpool. Liverpool belongs to me in a way that England never can. Liverpool is in my blood, Liverpool affects my moods. Following Liverpool has given me some of the best times in my life, and some of the worst. Liverpool FC is a part of who I am. To me, England is just a sideshow. This coming competition, a bit of interest during a summer barren of league football. England just doesn’t stimulate the same feelings of passion and allegiance that I feel for Liverpool. England isn’t important to me. I may feel a mild sense of pleasure if England wins, but I’m not elated. There may be a quickly passing sense of slight disappointment if they lose but I’m not ‘gutted’. In terms of football, the only team that can make me euphoric or leave me feeling desolate is Liverpool.

Einnig síðar í greininni.

>Supporting England with total passion cannot be achieved without overriding your club loyalties. It requires you to switch on and switch off feelings at a whim and I cannot manage to do this. How am I, as a Scouser, supposed to get behind the alleged Liverpool hating Gary Neville. I dislike him with a passion. I just can’t do it. How am I, as a Liverpool supporter, supposed to cheer on Wayne Rooney? I just can’t bring myself to do it. It would go against my whole identity as a Red. I think it could even trigger a personality crisis. Some things are just too dangerous to tamper with.

Ég verð að játa það að ég á oft í erfiðleikum með þetta sama, þó náttúrulega ekki eins mikið og hjá honum. Til dæmis finnst mér það afleitt að þurfa að taka 180 gráðu beygju og segja að Van Nilsteroy sé snillingur þegar hann skorar fyrir Holland, eða vona að Milan Baros skori ekki gegn Hollandi.

Þegar ég horfi á Holland Tékkland mun ég halda með Ruud Van Nilsteroy og vera á móti Milan Baros. Er það í raun hægt? Er það ekki dálítið skrítið að þurfa að svissa svona algjörlega um gír? Þetta tekur stundum á. Ég er ekki í vafa um að aðrir lenda í svipuðum erfiðleikum þegar þeir horfa á EM í sumar. :-)

EM er að hefjast eftir nokkra daga og allir að deyja úr spenningi. Ég held með Hollandi og hef gert það alveg síðan ég var 10 ára gamall. Fyrir utan Holland, þá fylgist maður af áhuga með Liverpool mönnum á EM og þeim mönnum, sem Liverpool hafa verið orðaðir við. Ég tók bjó til smá samantekt um þá menn, sem Liverpool stuðningsmenn ættu að fylgjast með á EM.

A Riðill

[Santiago Canizares](http://www.euro2004.com/tournament/players/player=4707/index.html) – Spánn. Canizares verður sennilega varamarkvörður á eftir Iker Casillas.

B Riðill

Igor Biscan kemst ekki í króatíska landsliðið. Það ætti ekki að koma mörgum á óvart.

Hjá Frökkum er Djibril Cisse í fimm leikja banni og verður því ekki með á EM, en væri líklega framherji númer 3 á eftir Trezeguet og Henry. Bruno Cheyrou sem hefur verið við hópinn komst ekki í EM hópinn. Mexes, sem hefur verið orðaður við Liverpool, er ekki í hópnum en [Boumsong](http://www.euro2004.com/tournament/players/player=48848/index.html), sem valdi að fara til Rangers, verður á bekknum.

Hjá Sviss er það náttúrulega [Stephane Henchoz](http://www.euro2004.com/tournament/players/player=8649/index.html), sem heldur uppi merki Liverpool.

Flestir Liverpool mennirnir eru hjá Englandi, alls 3. [Steven Gerrard](http://www.euro2004.com/tournament/players/player=31484/index.html) verður án efa aðalmaðurinn á miðjunni hjá Englendingum og [Michael Owen](http://www.euro2004.com/tournament/players/player=30553/index.html) hefur alla burði til að verða markahæsti maður keppninnar. Ef að John Terry verður ekki heill mun [Jamie Carragher](http://www.euro2004.com/tournament/players/player=24144/index.html) að öllum líkindum spila í miðri vörninni fyrir England, sem væri frábært tækifæri fyrir hann til að sanna sig. Einnig verður spennandi fyrir Liverpool stuðningsmenn að fylgjast með [Owen Hargreaves](http://www.euro2004.com/tournament/players/player=55966/index.html), sem hefur verið orðaður við Liverpool.

C Riðill

Þar er lítið um spennandi leikmenn fyrir Liverpool aðdáendur, nema ef að menn trúi því að [Matteo Ferrari](http://www.euro2004.com/tournament/players/player=30434/index.html) gæti verið á leið til liðsins.

D Riðill

Hjá Tékkum eru það náttúrulega félagarnir [Milan Baros](http://www.euro2004.com/tournament/players/player=43545/index.html) og [Vladimir Smicer](http://www.euro2004.com/tournament/players/player=46112/index.html). Ef Baros er heill verður hann líklega í byrjunarliðinu en Smicer á bekknum.

Einnig spilar með Tékkum [Tomas Rosicky](http://www.euro2004.com/tournament/players/player=33466/index.html), sem hefur verið orðaður sterklega við Liverpool.

[Dietmar Hamann](http://www.euro2004.com/tournament/players/player=14009/index.html) verður væntanlega á miðjunni fyrir Þýskaland. Hann er þó alls ekki öruggur með það að vera í byrjunarliðinu.

Hjá Hollandi munu væntanlega flestir Liverpool stuðningsmenn fygljast spenntir með [Rafael Van der Waart](http://www.euro2004.com/tournament/players/player=47516/index.html), sem hefur verið orðaður sterklega við Liverpool. Einnig er [Sander Westerveld](http://www.euro2004.com/tournament/players/player=11416/index.html), sem langflestir Liverpool stuðningsmenn hugsa hlýlega til, á bekknum. Hann mun ekki spila nema Van der Saar meiðist.

Andskotinn hafi það, en Milan Baros [meiddist í síðasta æfingaleiknum fyrir EM](http://www.ynwa.tv/ynwa_news.nsf/newsnow/3638145B123C204180256EAB005C1F85?OpenDocument).

Baros yfirgaf völlinn eftir 36 mínútur í leik á móti Eistlandi, eftir að hafa afrekað það að skora TVÖ mörk. Það er helvíti góður árangur á rúmum hálftíma. Tékkland vann 2-0. Rosicky, sem vill koma til Liverpool, lagði upp bæði mörkin.

Baros er talinn hafa tognað á lærvöðva, sem þýðir að hann mun að öllum líkindum missa af EM. Þetta eru hræðilegar fréttir fyrir Tékkland, Baros og Liverpool. Ég hef talið að Tékkland gæti komið á óvart í keppninni (þó vonandi ekki á kostnað Hollands, sem er með þeim í riðli) og ég trúði því að Baros gæti verið með markahæstu mönnum keppninnar. Liðið er með frábæra miðjumenn í Nedved og Rosicky og spilaði vel í undankeppninni.

Við verðum bara að vona að meiðsli Baros séu ekki alvarleg, svo við fáum að sjá hann á EM eftir viku.

Liverpool leikmennirnir stóðu sig einna best af ensku leikmönnunum í [landsleik Japana og Englendinga](http://news.bbc.co.uk/sport1/hi/football/euro_2004/england/3764139.stm) samkvæmt BBC. Owen (hver annar?) skoraði mark Englendinga og Gerrard var besti leikmaðurinn.

Sven Göran-Eriksson fær reyndar verðlaun fyrir stórkostlegasta asnaskapinn á EM ef hann ætlar að hafa Stephen Gerrard á vinstri kantinum. Það er ágætis regla að þú spilar besta leikmanninum þínum í hans bestu stöðu. Þú notar ekki besta leikmanninn til að fylla einhverja vandræðastöðu!

Stephen Gerrard er besti leikmaður Englendinga. Punktur. Hann á að vera á miðjunni. Punktur. Houllier er sannarlega meistari í því að spila mönnum í vitluausum stöðum en m.a.s. hann lærði (af reynslunn þó) að spila Gerrard ekki á kantinum. Gerrard er góður á kantinum, á því er enginn vafi (ef hægt væri að klóna menn myndi ég klóna Gerrard og láta hann spila allar fjórar stöðurnar á miðjunni fyrir Liverpool :-)). Hins vegar er hann bara svo miklu, miklu sterkari inná miðjunni.

Allavegana, Gerrard fær [8 í einkunn](http://news.bbc.co.uk/sport1/hi/football/internationals/england/3767223.stm) og Owen 7. Aðeins einn annar fær 8 (Ashley Cole) og aðeins einn annar fær 7 (Rooney), þannig að þeir geta verið sáttir. Þá er bara að vona að Gerrard fái að njóta sín inná miðjunni. Það er alveg glórulaust ef hann verður ekki þar gegn Frökkum.