Allar færslur eftir Eiríkur Rúnarsson

Liverpool 1-1 Everton

 

Mörkin:

42′ Salah

77′ Rooney víti

 

Leikurinn:

Klopp gerði fjölmargar breytingar á liðinu frá 7-0 sigrinum gegn Spartak. Coutinho og Firmino vermdu varamannabekkinn og munar um minna í Derbyslag!! Ég spyr mig afhverju það þurfti að fara útí þessar breytingar í þessum leik þegar næsti leikur er heima gegn WBA. Þessi leikur skiptir innfædda (Og okkur flest) hreinlega öllu máli og mátti sjá twitter loga fyrir leik vegna þessarar ákvörðunar Klopp.

Þrátt fyrir allt kom Liverpool liðið vel skipulagt til leiks og það var bara eitt lið á vellinum. Taktík og leikur Everton voru með þvílíkum eindæmum að maður hefur vart séð annað eins. Everton reyndu aldrei að spila fótbolta og þeir fögnuðu fyrstu hornspyrnu sinni á 77′ mínútu eins og þeir hefðu skorað mark.

Fyrri hálfleikur var heldur tíðindalítill lengst framan af, Liverpool héldu boltanum og reyndu að finna glufu á vörn Everton sem gekk enganveginn og saknaði maður strax Coutinho í þessum leik sem hefði mögulega geta skapað eitthvað. Það þurfti einstaklingsframtak frá okkar besta leikmanni Mo Salah á 42′ mínútu til að brjóta ísinn. Hann tók frábæran snúning, snéri af sér tvo leikmenn Everton og lagði hann snyrtilega í fjærhornið 1-0 beint í andlitið á stuðningsmönnum Everton. Í uppbótartíma geystist Mané inní teig eftir góða baráttu en kaus að skjóta með þrjá leikmenn Liverpool sér við hlið fyrir opnu marki og lullaði boltinn framhjá. Óskiljanleg og eigingjörn ákvörðun hjá Mané og hreinlega grátlegt í ljósi úrslitanna.

Síðari hálfleikur fór fjörlega af stað. Solanke var nálægt því að skora með skalla eftir flotta sendingu Chamberlain en á síðustu stundu bægðu varnarmenn Everton frá. Salah fékk svo opinn en erfiðan skallabolta en setti hann framhjá. Svona leið leikurinn, við héldum boltanum og fengum ótal hornspyrnur án þess þó að neitt kæmi útúrþví og Everton lágu áfram til baka. á 67′ mínútu kom fyrsta skiptingin þegar markaskorarinn Salah var tekinn útaf í stað Firmino. Skipting sem mér þótti hreinlega stórfurðuleg enda Salah okkar langsprækasti maður, heldur hefði ég viljað sjá Solanke eða Mané út fyrir Firmino.  á 76′ mínútu kom vendipunktur leiksins. Lovren fékk dæmt á sig víti fyrir nánast sagt litlar sakir en því er ekki að neita að þetta leit klaufalega út og sennilega algjör óþarfi að „ýta“ á eftir leikmanni Everton þegar hann er að hlaupa úr teignum.  Rooney fór á punktinn og skoraði örugglega. Þarna ákvað Klopp að bregðast við og setti Coutinho inn fyrir Chamberlain sem mér fannst vera einna sprækasti maður okkar á þessum tímapunkti. Ings kom svo inná fyrir Solanke á 82´mínútu en allt kom þetta of seint og leikurinn fjaraði út. Niðurstaðan mest svekkjandi leikur tímabilsins að mínu mati og hrikalega dýrmæt stig í súginn svo ekki sé talað um gegn erkifjendunum.

 

Bestu leikmenn Liverpool:

Það spilaði engin leikmaður illa í dag en það var heldur engin frábær.  Mér fannst Salah okkar sprækasti maður og hann skorar þetta gull af marki og fær því nafnbótina Maður leiksins. Einnig fannst mér Gomez og Chamberlain komast vel frá sínu.

 

Slæmur dagur:

Solanke þrátt fyrir að vera gríðarlegt efni er hreinlega ekki tilbúinn að byrja svona leik en hann var samt ekkert slæmur en það vantaði töluvert uppá hjá honum í dag. Klúðrið hjá Mané var svo stórt að það er erfitt að horfa framhjá því þótt hann hafi alls ekki verið lélegur. Henderson heldur svo áfram að vera á milli tannana á fólki og það skiljanlega en mér fannst hann betri í dag en undanfarnar vikur. Hvort hann er rétti maðurinn til að leiða þetta lið eru margir farnir að efast um en hann er góður fótboltamaður þegar sá gállinn er á honum.

 

Umræðan eftir leik:

Umræðan mun snúast um vítaspyrnudóminn og uppstillingu Klopp. Ég var sultuslakur að fara að skrifa um hvað það væri nú gott að vinna Everton og rótera aðeins og hvíla menn en svo kom þetta blessaða víti og á örstundu fór maður í að blóta því að hafa ekki byrjað leikinn á okkar sterkasta liði. Ég ætla að segja að þetta hafi verið víti fyrst að Jamie Carragher segir það en soft var það. Ótrúlega klaufalegt hjá Lovren sem annars var fínn í þessum leik. Maður spyr sig hvort Klopp átti sig ekki á hversu stórir leikir þetta eru fyrir aðdáendur?  Sjálfssagt veit hann það en tók þessa svakalegu ákvörðun með liðsuppstillingu sinni. Þetta er ekkert svartnætti, við sitjum ennþá í fjórða sæti deildarinnar og erum að spila skemmtilegan fótbolta ( Svona mest þegar önnur lið vilja spila fótbolta á móti okkur).

 

Næsta verkefni:

WBA á Anfield á miðvikudagskvöld í deildinni og þar er ekkert annað í boði en þrjú stig. Vonandi Keyrum við á okkar sterkasta liði í þeim leik. Þangað til lifið heil. YNWA!!!!

 

Liðið gegn Everton.

Góðan dag og gleðilega hátíð! Klopp hefur valið liðið sem mætir til leiks í grannaslagnum og lítur það svona út:

 

 

Mignolet

Gomez – Klavan – Lovren – Robertson

Milner – Henderson – Chamberlain

Salah – Solanke – Mané

Bekkur: Karius, Wijnaldum, Firmino, Coutinho, Can, Ings, Alexander-Arnold.

Virkilega óvænt lið hjá Klopp sem setur Solanke á topp og Chamberlain á miðjuna. Robertson fær svo sénsinn í vinstri bakverðinum. Firmino og Coutinho á bekknum ásamt Danny Ings!! Sturridge ekki í hóp í dag.

Sjáum hvað setur koma svo!!!

Við minnum á hashtaggið okkar #kopis og umræðurnar hér að neðan.


 

Stoke úti á miðvikudag.

 

Það er þétt prógramið þessa dagana og næsta verkefni bíður Rauða Hersins á miðvikudagskvöldið þegar þeir heimsækja Stoke City í deildinni.  Við erum núna að renna inní þessa mikilvægu jólatörn og þá fer að sjást á liðunum úr hverju þau eru gerð og hversu vel þau höndla álagið. Ef Liverpool vill vera í og við topp fjögur eru svona leikir algjör skylda að klára.

 

Andstæðingarnir

Stoke sitja í 15. sæti deildarinnar með 13 stig, hafa unnið þrjá leiki, gert fjögur jafntefli og tapað sex leikjum. Af þeim þremur leikjum sem þeir hafa unnið voru tveir á heimavelli, t.d unnu þeir Arsenal heima og gerðu jafntefli við Man Utd heima. Ég tala bara fyrir mig en þegar ég heyri minnst á Stoke kemur einhvernveginn Tony Pulis alltaf upp í huga mér og margir ( mjög margir) rudda og leiðindaleikir í gegnum tíðina rifjast upp. En þó Mark Hughes sé af gamla skólanum skulum við ekki ætla honum þau leiðindi sem Pulis bauð uppá, ég hef séð ágætis leiki með Stoke í tíð Hughes og í liði hans eru nokkrir frambærilegir knattspyrnumenn sem vilja leika fótbolta. Starf Hughes hlýtur að hanga á bláþræði og eftir slæmt tap gegn Crystal Palace um helgina liggur mikið undir fyrir Hughes og lærisveina hans.

Þrátt fyrir þessa neikvæðu tengingu þegar ég hugsa um Stoke höfum við unnið átta af síðustu tíu leikjum gegn þeim í öllum keppnum. Töpuðum 6-1 fyrir þeim í maí 2015 í versta leik sem ég hef séð Liverpool spila en annars höfum við haft ágætis tak á þeim.

Sem áður segir eru Stoke hættulega nálægt fallsæti og ég býst við þeim dýrvitlausum gegn okkur. Þeir hafa verið að spila með þriggja manna varnarlínu með turnana Shawcross og Zouma og hinn þýska Wimmer.  Þeir hafa fengið á sig 26 mörk en skorað 16. Jack Butland þeirra aðalmarkvörður er meiddur á fingri og hefur Lee Grant staðið vaktina í hans fjarveru.  Ég tippa á að þeir leggi svona upp:

 

Grant

Zouma – Shawcross – Wimmer

Diouf – Fletcher – Allen – Pieters

Shaqiri – Choupo-Moting – Sobhi

Liverpool

Eftir erfiðan leik gegn Chelsea um helgina þar sem nokkrir fengu hvíld býst ég við töluvert breyttu byrjunarliði frá þeim leik. Meiðslalistinn okkar er í sögulegu lágmarki og Klopp hefur nánast úr öllum hópnum að velja. Menn settu spurningarmerki við byrjunarliðið gegn Chelsea en ef Willian hefði ekki skorað þetta heppnismark væri umræðan sjálfssagt á þá vegu að Klopp væri taktískur snillingur og gæti farið með ferska fætur inní Stoke leikinn fyrir vikið, en það er stutt á milli skúrksins og hetjunnar í þessum blessaða bolta. Can og Lovren eiga að vera orðnir heilir og býst ég við þeim síðarnefnda í byrjunarliðinu. Lallana er ekki klár í 90 mínútur og mun aftur sitja á tréverkinu.  Ég tippa á þetta byrjunarlið:

 

Mignolet

Gomez – Matip – Lovren – Moreno

Wijnaldum – Henderson – Coutinho

Salah – Firmino – Mané

Bekkur:  Karius, Klavan, Chamberlain, Milner, Lallana, Can, Sturridge.

Wijnaldum kemur inn fyrir Milner, Mané fyrir Chamberlain og Firmino fyrir Sturridge. Lovren tekur svo stöðu Klavan í hjarta varnarinnar. Hópurinn er orðinn svo sterkur og meiðslalistinn jákvæður að það er ekki pláss fyrir Trent Alexander á bekk að þessu sinni í þessari spá minni.

 

Spá

Spáum þessu 1-2 fyrir okkur. Stoke komast yfir í fyrri hálfleik eftir vandræðagang eftir hornspyrnu ( hvað annað?) en okkar menn svara með tveimur mörkum í síðari hálfleik sem þeir vinirnir og samlandarnir Coutinho og Firmino sjá um.  YNWA!!!

 

 

Nýliðar Huddersfield mæta á Anfield.

Kl. 14:00 á kjördag fáum við nýliða Huddersfield í heimsókn á Anfield. Huddersfield hafa farið vel af stað og eru sýnd veiði en ekki gefin eins og vinir okkar í Manchester fengu að kynnast um síðastliðna helgi. Við áttum einnig erfitt síðustu helgi og þörfnumst sem aldrei fyrr þriggja punkta og hljótum að gera þá kröfu eftir martröðina gegn Tottenham.

 

Sagan

Ég kem betur inná það á eftir en Huddersfield er gamalt stórveldi í enskum fótbolta og þegar við skoðum viðureignir okkar við þá frá upphafi eru tölurnar nokkuð merkilegar. Liðin hafa mæst 75 sinnum, Liverpool sigrað 27 leiki, 17 sinnum hafa liðin skilið jöfn og í 31 skipti hafa Huddersfield lagt Liverpool að velli. Seinast mættust þessi lið í bikarnum 1999 á heimavelli þeirra og fórum við með sigur 0-2 þar sem Titi Camara og Dominic Matteo skoruðu mörkin. Þar á undan léku liðin síðast 1972 en síðasti tapleikur Liverpool gegn Huddersfield var 28. nóvember 1959 1-0.  Rétt rúmum hálfum mánuði síðar eða þann 14. desember réðu Liverpool nýjan stjóra. Stjórinn hét Bill Shankly.

Seinasta starf Bill Shankly áður en hann tók við Liverpool var einmitt að stýra Huddersfield og gerði hann það frá 1956-1959. Í nóvember 1959 buðu Liverpool Shankly samning sem hann varð spenntur fyrir enda fannst honum komið ákveðið metnaðarleysi hjá eigendum Huddersfield sem voru á þessum tíma að selja sína bestu menn án þess að kaupa neitt í staðinn fyrir þá ( hljómar kunnuglega). 1. desember sagði hann svo starfi sínu lausu þrátt fyrir sigurinn gegn Liverpool 28. nóvember. Shankly sem var í tilvistarkreppu stýrði Huddersfield ekki í þeim leik heldur Edward nokkur Boot sem átti eftir að stýra þeim til ársins 1964. Restina af sögu Bill Shankly hjá Liverpool þekkja svo allir.

 

Huddersfield Town A.F.C.

Borgin Huddersfield liggur mitt á milli Leeds og Manchester og telur um 163.000 íbúa sem gerir borgina að elleftu stærstu borg Englands. Borgin þykir falleg mjög og er þekkt fyrir arkitektúr frá Viktoríutímabilinu. Þekktustu synir Huddersfield eru þeir Harry Wilson fyrrum forsætisráðherra Bretlands, James Mason fyrrum kvikmyndastjarna og sjálfur ,Sheriff of  Huddersfield, Rod Smallwood umboðsmaður hljómsveitarinnar Iron Maiden ( mér finnst hann merkilegur).

Huddersfield Town A.F.C. var stofnað 1908 og byrjuðu í deildarkeppni 1910. Árið 1919 stóðu þeir frammi fyrir fjárhagsörðuleikum og voru íbúar Huddersfield beðnir um að kaupa hlut í félaginu fyrir eitt pund hver til að forðast hreppaflutninga til erkifjendanna í Leeds og heppnaðist sú aðgerð hjá þeim. 1922-1926 eru gullaldarár Huddersfield. 1922 urðu þeir bikarmeistarar og frá 1923-1926 unnu þeir deildina þrjú ár í röð, árangur sem aðeins Liverpool, Manchester Utd og Arsenal geta einnig státað af. Síðan þá hefur liðið rokkað upp og niður um deildir og ekki náð að hasla sér völl á meðal hinna bestu fyrr en nú.

Eigandi Huddersfield er hinn fimmtugi Dean Hoyle sem hagnaðist gríðarlega á gjafavöruversluninni The Card Factory sem hann og eiginkona hans stofnuðu 1997 og óx  reksturinn svo gríðarlega að árið 2009 voru verslanirnar orðnar rúmlega 500 talsins og höfðu þau hjónin um 5000 manns í vinnu. Keðjuna seldu svo hjónin árið 2010 og segir sagan að kaupverðið hafi verið um 350 milljónir punda. Hoyle hefur alltaf stutt Huddersfield og liðið er í dag hans líf og sál.

Árið 2015 réð Hoyle, David nokkurn Wagner 44. ára Þýsk-Amerískan efnilegan þjálfara til að stýra liðinu sínu. Þarna komum við að tengingu sem við þurfum að skoða. David Wagner og Jurgen Klopp eru nefnilega bestu vinir. Þeir spiluðu saman hjá Mainz snemma á tíunda áratugnum og urðu þeir strax góðir vinir. Wagner þótti betri kostur í framherjann og stal stöðunni af Klopp sem hafði leikið þar en Klopp færðist í vörnina.

“ I’ve known Jurgen longer than I’ve known my wife, We met at Mainz and i took his place in the team, so he changed his role from a striker to a defender because it was much easier for him!“

Síðar lék Wagner svo með Schalke og þar spilaði hann með Bandarískum landsliðsmanni Thomas Dooley sem fékk þáverandi landsliðsþjálfara Bandaríkjanna Steve Sampson til að velja Wagner í landsliðið. Wagner var gjaldgengur því faðir hans er Bandarískur en móðir hans þýsk. Wagner lék alls átta landsleiki fyrir Bandaríkin en lagði skóna svo á hilluna árið 2005 eftir viðkomu með nokkrum Þýskum smáliðum. Eftir að hafa hætt að spila tók Wagner sér pásu frá fótbolta og stundaði nám í líffræði og íþróttafræði við Darmstadt háskólann. Klopp og Wagner héldu sambandi og Klopp hvatti Wagner til að fara í þjálfun. Wagner þjálfaði U 17 og U19 ára lið Hoffenheim um stund en svo bauð Klopp honum að taka við varaliði Dortmund sem hann þáði og þótti gera góða hluti. Margir töldu að Klopp tæki Wagner með sér í þjálfarateymi Liverpool en ekkert varð úr því. Þeir félagarnir eru svo góðir vinir að Wagner var svaramaður Klopp í brúðkaupi hans. Wagner kom svo Huddersfield uppí úrvalsdeild og meðal hinna bestu síðastliðið vor eftir að hafa lagt Reading í umspili eftir vítaspyrnukeppni þar sem Danny okkar Ward varði tvær spyrnur.

Wagner vill spila heavy metal fótbolta eins og Klopp en liðið hans er ekki alveg komið á þann stall. Við megum búast við klassískum erfiðleikum þar sem Huddersfield munu liggja til baka og beita eitruðum skyndisóknum líkt og þeir gerðu með góðum árangri gegn Manchester Utd um síðustu helgi. Huddersfield eru með 12 stig og sitja í ellefta sæti deildarinnar aðeins stigi á eftir okkur. Ég ætla nú að giska á að þeir stilli upp sama byrjunarliði og gegn Manchester Utd og það verði svona:

Lossi

Smith – Jorgensen – Schindler – Malone

Kachunga – Hogg – Mooy – Van La Passa

Ince – Mounie

 

Liverpool

Tottenham leikurinn er að baki og algjörlega vonlaus frammistaða í þeim leik hlýtur að hafa hreyft við mannskapnum. Það er ekki gott að segja hvað Klopp muni gera en ég tel að hann róteri ekki mikið í liðinu þó svo að það sé mín persónulega ósk. Ég tippa samt á að hann prófi Gomez í miðvörðinn og setji Lovren útí kuldann enda nákvæmlega engu að tapa. Að öðru leyti held ég að hann geri ekki margar breytingar og Mignolet heldur plássi sínu í rammanum. Maribor leikurinn á að vera nokkuð þægilegur og við þurfum þrjá punkta á laugardaginn framar öllu svo ég held að hann muni frekar prófa sig áfram og hvíla menn í þeim leik enda eigum við svo West-Ham þar á eftir á útivelli í deildinni.  Ég tippa á liðið svona:

Mignolet

TAA – Matip – Gomez – Robertson

Can – Henderson – Wijnaldum

Salah – Firmino – Coutinho

Bekkur: Karius, Lovren, Moreno, Milner, AOC, Solanke, Sturridge

Wijnaldum kemur aftur inn fyrir Milner, Robertson fær sénsinn, Gomez fer í miðvörð og Trent Alexander í hægri bakvörðinn. Mikið væri ég samt til í að sjá Woodburn og eða Harry Wilson í hópnum en ég hef trú á að Klopp bíði með það um stund.

Spá

Ég ætla bara að vera bjartsýnn en spái samt sem áður hörkuleik. Ég spái 4-2  fyrir okkur þar sem Coutinho mun skora tvisvar og Salah og Firmino með sitt markið hvor. Eftir leik klæðum við okkur svo í sparifötin, göngum útí sólina og nýtum kosningarétt okkar með Liverpool brosi á vör.  YNWA!!!!

Liverpool 1-1 Newcastle.

 

Mörkin

29′ Coutinho 0-1

36′ Joselu 1-1

 

Leikurinn

Maður veit varla hvað maður á að segja um þennan leik. Ef eitt orð ætti að súmmera hann upp fyrir mig væri það orðið leiðindi. Liverpool voru eins og venjulega meira með boltann án þess að skapa sér svo til nokkuð. Benitez kom með sína taktík inní leikinn þ.e allir þeirra leikmenn vörðust fyrir aftan bolta og markið þeirra kom eftir eina flotta sendingu í gegn og sofandi miðja og miðverðir réðu ekki við það.  Coutinho kom okkar mönnum yfir með frábæru skoti vel fyrir utan teig áður en Newcastle jöfnuðu. Miðverðir okkar litu oftar sem áður illa út í markinu en Shelvey á heldur ekki að fá þennan tíma og pláss á miðjunni til að stinga boltanum í gegn. Að öðru leyti er fátt um leikinn að segja. Ef vörnin var döpur má segja að sóknin hafi verið skelfileg. Engin af okkar sóknarmönnum steig upp og bjó eitthvað til, menn virkuðu áhugalausir og hugmyndasnauðir.  Við hefðum átt að fá víti þegar Lovren og Matip er haldið inni í teig en fengum ekki og við slíkt mótlæti svara góð lið með mörkum en þetta var hreinlega steingelt hjá okkar mönnum í dag.

 

Bestu menn Liverpool

Allt liðið var í meðalmennsku í dag og engin einn sem stóð uppúr að mínu mati. Helst fannst mér baráttuandi í Joe Gomez ( mér fannst hann reyna) og Henderson átti ágæta kafla og nokkrar góðar tæklingar. Coutinho náttúrlega skorar markið fallega og átti nokkrar góðar rispur svo hann fær nafnbótina besti maður Liverpool í dag.

 

Vondur dagur

Sóknarlínan eins og hún lagði sig var hrikalega döpur. Mest er rætt um Sturridge og það er eðlilegt þar sem að hann var að fá sénsinn hjá Klopp en gerði fátt, en mér fannst Mané áberandi lélegastur í dag. Miðverðirnir gleyma sér sem oft áður og ég hefði viljað sjá Can inná fyrir Wijnaldum snemma í síðari hálfleik. Liðið var heilt yfir bara lélegt í dag og miðað við spilamennskuna hlakka ég ekkert sérstaklega til að mæta erkifjendum okkar eftir landsleikjahlé.

 

Umræðan eftir leik

Við erum alltaf að ræða sömu hlutina eftir leiki. Vörnin gerir mistök leik eftir leik, við getum ekki haldið hreinu og við getum ekki brotið niður góð varnarleg taktísk lið. Nú erum við að detta inní landsleikjahlé og förum með þetta í veganesti. Þar á eftir tökum við á móti Man Utd þann 15. október og Guð minn eini ég hlakka ekkert sérstaklega til þess. Umræðan snýr líka að Sturridge sem ég held hreinlega að sé búinn sem markaskorari. Það er alveg ljóst að aðdáendur Liverpool eru orðnir pirraðir. Það er samt stutt á milli í fótbolta og nú þarf bara að gjöra svo vel og þjálfari og leikmenn þurfa hver og einn að fara í algjöra naflaskoðun. Með sigri gegn Man Utd í næsta leik værum við með í baráttunni aftur en ef sá leikur tapast er staðan orðin grafalvarleg.  Þangað til YNWA!!