KÖNNUN: Óskamótherjar í 16-liða úrslitum ECL

59 Comments

Hvaða lið vilt þú sjá Liverpool dragast gegn í ECL 2008?

  • Real Madrid (35%, 268 Atkvæði)
  • Sevilla (25%, 188 Atkvæði)
  • AC Milan (22%, 167 Atkvæði)
  • Internazionale (9%, 70 Atkvæði)
  • Barcelona (8%, 64 Atkvæði)

Fjöldi atkvæða: 757

Loading ... Loading ...

Við erum enn að ræða leikinn og einstök atriði hans í leikskýrslunni hér fyrir neðan, en mér fannst samt við hæfi að við settum upp könnun og gæfum ykkur næstu tvo dagana eða svo til að smella ykkar atkvæði á það lið sem þið viljið helst sjá Liverpool FC mæta í 16-liða úrslitum Meistaradeildar Evrópu vorið 2008.

Ég hef Sevilla með í könnunninni þótt þeir séu ekki öruggir. Tek þá þá bara út ef það breytist í kvöld.

Annars er merkilegt að spá í þennan hóp. Þessi lið væru öll að einhverju leyti „óskamótherjar“. Við skulum renna aðeins yfir þessi lið og sjá hvað myndi gera rimmu Liverpool og hvers þeirra svona merkilega:

**AC Milan:** Höfum mætt þeim tvisvar á síðustu þremur árum í úrslitum ECL. Yrði gaman að fá þá í heimsókn á Anfield og fara á San Siro, þar sem saga þessara liða og stuðningsmanna þeirra hefur tengst svo náið síðustu þrjú ár á hlutlausum völlum.

**Internazionale:** Kannski það lið sem á minnst skylt við Liverpool FC í dag, en við munum þó að Benítez var einn þeirra sem var þrálátlega orðaður við stjórastöðuna hjá Inter fyrir svona ári síðan, þegar Mancini var valtur í sessi. Nú hins vegar er allt á blússandi siglingu hjá Inter og það gæti verið gaman að sjá þessi lið mætast. Einnig: Zlatan vs. Torres. 🙂

**Barcelona:** Við. unnum. þá. á. Nou. Camp. Punktur. Þeir vilja fá okkur, þá dreymir um að fá okkur, þetta yrðu geggjaðar viðureignir! Einnig: Torres, sem leikmaður Atletico á Spáni, sérhæfði sig í að skora gegn Barca.

**Real Madrid:** Myndi Rafa vilja fara með rauðu lærisveina sína yfir á Bernabeau-völlinn og sýna stjórnarmönnum Real fyrsthendis hvernig alvöru þjálfari stillir upp liði, hvernig Real-liðið *gæti spilað* í Evrópu ef þeir væru með Rafa við stjórnvölinn og hann fengi þá þolinmæði sem honum hefur verið sýnd hjá Liverpool? Uuuu, JÁ TAKK. Einnig: Torres er Atletico-maður og myndi hreinlega frussa blóði af spenningi við að fá að slá Real út. Einnig: við fengjum miiiiikinn stuðning meðal rauða helmings Madríd-borgar. 🙂

**Sevilla:** Kannski slakasti mótherjinn á pappírnum, en gleymum því ekki að þeir hafa unnið Evrópukeppni félagsliða síðustu tvö ár í röð og eru því réttilega þriðja liðið í heilagri Evrópuþrennu þessa áratugs (ásamt okkur og Milan). Þessi rimma væri æskileg af þeirri einu ástæðu að kannski þarf Daniel Alvés að upplifa Evrópukvöld á Anfield í eigin persónu til að gera upp hug sinn fyrir næsta sumar. 🙂

Þannig er nú það. Mögulega fimm stórfenglegar rimmur á pappírnum og það er ljóst að Liverpool eiga massíft verkefni fyrir höndum, sama hvaða liði þeir mæta.

Hitt er líka alveg ljóst að það skiptir engu máli hvaða lið dregst gegn okkur, við erum ekki aðilinn sem kemur með ótta og pressu inn í þá rimmu. Við erum í potti #2 ásamt liðum eins og Olympiakos, Celtic, hugsanlega Rangers, hugsanlega Schalke, Roma, hugsanlega Fenerbache og hugsanlega Arsenal.

Með öðrum orðum, þá erum við liðið sem stóru liðin vilja forðast. Við óttumst engan, en þessi lið eru öll skíthrædd við okkur! 🙂

fb-share-icon
Tweet

58 Comments

  1. Best að ég skjóti svo mínu vali hér inn í ummælin.

    Ég vill helst fá AC Milan í 16-liða úrslitum. Bæði af því að við skuldum þeim hefnd eftir að þeir unnu okkur í vor (sem var þó þeirra hefnd eftir 2005) og líka af því að ég er sannfærður um að við höfum hið aldna Milan-lið yfir tvo leiki á heima- og útivelli.

    Svo gæti líka vel farið svo að José Mourinho verði orðinn stjóri þeirra þegar að rimmunni kemur. Það yrði óvæntur en skemmtilegur bónus að slá hann út með nýja liðinu sínu … 🙂

  2. Já, valið hjá mér stendur að ég held á milli Sevilla og Real Madrid. AC Milan væri í lagi, en ég vil sleppa við Barcelona og Inter. Ég held hins vegar að það sé pottþétt að Liverpool er það lið sem að stjórarnir í fyrsta potti eru hræddastir við, á því er enginn vafi.

    Það væri ótrúlega skemmtilegt að spila við Real Madrid. Ef við ynnum þá, þá væri Rafa búinn að slá út á síðustu árum Barcelona, Real Madrid, AC Milan, Juventus og Chelsea. Það væri hreint ekki slæmur árangur 🙂

    Annars væri það náttúrulega Sevilla. Ég er enn veikur fyrir Alves, þrátt fyrir að Arbeloa hafi vissulega verið frábær og mér finnist meiri þörf á að styrkja vinstri bakvörðinn. En Sevilla liðið er skemmtilegt og ég er viss um að leikirnir yrðu frábærir.

    En semsagt, svo ég ákveði mig: REAL MADRID!

  3. Ég hef kosið og valdi Real Madrid … einfaldlega vegna þess að í spænsku deildinni er ég Barca maður, og líkt og Einar bendir á, þá væru þetta engin smálið sem Rafa væri búinn að slá út.

  5. Ég vil helst EKKI fá Inter eða Barcelona.

    Ég kaus Sevilla því ég tel að það sé slakasti mótherjinn af þessum sem við gætum mætt. Hins vegar væri náttúrulega frábært að mæta Real Madrid og slá Schuster og félaga út. Vitanlega væri gaman að hefna ófaranna gegn Milan. En já Sevilla fékk mitt atkvæði.

  6. Þetta er ekki spurning, Real Madrid er fyrsti kostur. Liverpool má allveganna ekki mæta minni spámönnum. Liðið virðist spila best þegar að það er talið vera það lakara í viðureignunum. Svo er þetta bara svo góður punktur ,, Torres er Atletico-maður og myndi hreinlega frussa blóði af spenningi við að fá að slá Real út. ´´ Ég veit eiginlega að við munum fá Real Madrid, það virðist einhvernveginn bara vera örlög sem Liverpool eru ætluð og þeir munu klára það með stæl!

  7. Vert að nefna að Fernando Torres gekk aldrei neitt rosalega vel að skora á móti Real Madrid þegar hann var hjá Atletico. Skoraði aftur á móti alltaf gegn Barcelona.

  8. Ég persónulega skil ekki hvers vegna fólk kýs Real Madrid. Ef við fáum þá og sláum þá út verður Schuster rekinn … og hvern ætli þeir vilji fá í staðinn? Það að slá Real út myndi bara bjóða uppá endalaust slúður og leiðindi næsta vor.

  9. Sama er mér hvert við förum og við hvern við spilum á leið til Moskvu SVO LENGI SEM ÞAÐ ER EKKI NÁLÆGT STAMFORD BRIDGE OG CHELSEA!!!

  10. Það sem er best er að búið verður að selja Sissoko fyrir næsta leik í meistaradeildinni.

  11. Allt frábærir leikir framundan. Vil síst Inter af þessum liðum. Væri gaman að ná fram hefndum gegn Milan, sjá Torres & Benitez vs. Real, Endurtekningu á Liverpool-Barca og svo eitthvað alveg nýtt Liverpool vs. Sevilla.
    Það hefur hentað Liverpool vel að vera álitnir “underdogs” síðustu ár þannig að maður fer nokkuð bjartsýnn í allar þessar viðureignir. Pressan gæti reynst mest að spila á móti Sevilla þar sem þeir væru álitnir minna liðið.
    Erfiðast held ég samt muni vera að eiga ekki heimavöllinn í síðari leiknum.

  13. Reynir, það er dregið föstudaginn 21. desember kl. 11:00. Drátturinn verður í beinni útsendingu á UEFA.com, fyrir áhugasama. 🙂

  17. Arnar, hún gerir það. Ef þú ert að nota skólatölvu og getur ekki kosið gæti hjálpað þér að fara í næstu tölvu við hliðina, eða annað tölvuherbergi ef slíkt er til. Annars geturðu líka kosið þegar þú kemur heim til þín ef því er að skipta. 🙂

  18. mér er alveg sama..komið bara með e-ð, skiptir engu máli á þessu stigi keppninnar hverjir mætast, þetta eru öll topplið..annars þætti mér ágætt svosem að fá real eða ac milan..við náum langt í ár, ég veit að benítez nær okkur aftur og enn eina ferðina í úrslitaleikinn og ef það gerist þá fer ég heim til hans og hylli kappann með því að hlaupa nakinn í garðinum hans!!

  19. ef það gerist þá fer ég heim til hans og hylli kappann með því að hlaupa nakinn í garðinum hans!!

    Er ekki einhver búinn að skjalfesta þetta?

    Sé fyrirsagnirnar fyrir mér… bandóður íslenskur aðdáandi handtekinn í Liverpool borg ber rassaður í garðinum hjá Rafael Benites!!!!!

  20. Real Madrid, ekki spurning. Mig hefur lengi dreymt að fá Real á Anfield og verð fyrstur að kaupa miða komi þeir.

  21. eitt enn, eru ekki allir örugglega búnir að lesa nýjasta pistil Tomkins. Maðurinn er snillingur, einn besti íþróttapenni sem maður les.

  23. valdi sevilla en við svona frekari hugsun þá langar manni meira í Ac milan vegna þess hvað þeir eru orðnir gamlir 😉 og svo væri ekkert leiðinlegt að taka á móti Real Madrid og sýna þeim hvernig á að spila flottan bolta 😉

    • Ac milan vegna þess hvað þeir eru orðnir gamlir

    Trúi ekki að það þurfi að vara menn við svo heimskulegum hlut eins og að vanmeta AC Milan!!!! 😉

    og Olli ekki segja honum frá þessum áformum þínum fyrr en á staðnum, gæti fengið hann til að tapa viljandi.

  25. Ég vil Real Madrid. Flott lið sem Liverpool hefur ekki mætt í langan tíma í Evrópukeppni. Mjög ögrandi verkefni en eitthvað sem ég held að Liverpool geti alveg ráðið við.

  26. Real Madrid!! Þeir mega eiga það að þeir eru að spila mjög vel þessa dagana en ég held að það yrði flottur leikur, það er að segja ef að Agger verður kominn!!

  27. Valdi Sevilla því það væri auðveldasti kosturinn almennt séð. Mikið til í því samt að liverpool er oft hvað sterkastir þegar þeir teljast lakari andstæðingurinn í leiknum. Real væri því sérstaklega skemmtilegur kostur sem og AC. Ég myndi segja að Barca væri sá kostur sem ég myndi síst vilja ef ég fengi að ráða.

    Eina sem ég veit að það verður sama hvaða liði við mætum í þessum leik að þetta verður svaðalegur knattspyrnuleikur, hæfileikar þessara liða sem þarna eru er svakalegur. Eins og einhver sagði hér líka að Liverpool verður pottþétt það lið sem fæstir vilja mæta og ekki skrítið með við skrið liðsins í meistaradeildinni í síðustu leikjum, leikmannahóp, stuðningsmanna, Anfield, Gerrard, Torres… hvar á ég að hætta?

    Tek annars undir með einare hérna að ofan og vona að liverpool fái síðari leikinn á Anfield.

    Ps. Commentaði ekkert eftir leikinn í gær en djöfull var liðið að spila vel. Markið hjá Torres var bara svo einum of magnað. (Babel ekki síðra)

    YNWA

  28. AC milan eru í bölvuðu ströggli í ítölsku deildinni en samt sem áður alltaf ótrúlegir í meistardeildinni. Væri gaman að ná fram hefndum við þá, en ég held að ég verði að vera sammála Magnúsi Agnari og velja Sevilla frekar. Ástæðan er einföld; reynsluleysi í meistaradeildinni.

  29. Sevilla tóku samt Arsenal í skemmtilegum leik á heimavelli í CL.

    Hef ekki hugmynd um hvað ég vil, veit bara hvað ég vil ekki.

    Barcelona og Inter

  30. Upp á bestu möguleikana að komast áfram væri það Real eða Sevilla.

    Annars gaman að sjá að astúríanski ökumaðurinn Fernando Alonso er kominn með nýtt starf en hann virðist hafa skorað stórglæsilegt annað mark Liverpool gegn Marseille í gær skv. Adolfi Erni Erlingssyni 🙂

  32. Vil hvorki sjá Inter eða Real, kaus AC því ég tel að við getum unnið þá sannfærandi. Inter og Real spila bæði bolta sem Liverpool gæti átt í vandræðum með, og ég vil ekki hugsa það að sjá Zlatan gegn Carra og Agger/Hyypia.

  33. Sælir félagar.
    Ég valdi Inter. Agger verður kominn og það verður gaman að sjá þá félaga Carrager/Agger hakka í sig sókir þeirra uns þeir gefast grátandi upp. Slatan á ekki möguleika gegn þeim. Ofvaxið sjálfsálit hans mundi hjaðna eins og sprungin blaðra. Hinumegin á vellinum mundu svo Torres og Babel stja nokkur mörk ásamt Carra mínum manni sem örugglega setti eitt í hvorum leik eins og alltaf. 🙂
    Það er nú þannig.

    YNWA

  34. Elías Már, þú gast ekki mögulega haldið að þú kæmist upp með að hrósa bæði Inter og Real á þessari síðu?

    Þú hlaust að vita að ég myndi stökkva til og segja fólki að þessi skoðun þín byggist eingöngu á því að þú heldur með bæði Internazionale og Real frá Madríd.

    Ekki satt? 🙂

  35. Kristján, að sjálfsögðu byggist þessi ósk mín á því að ég styð bæði þessi lið að hluta, en það má heldur ekki horfa fram hjá því að Inter og Real eru með gríðarsterk lið og væri því gott að sleppa við þau fyrst í stað.

    Milan á líka mjög erfitt prógram eftir áramót og spila þétt, gætu verið þreyttir um miðjan ferúar.

    Svo er mér líka alveg sama hvað fólki finnst um mínar skoðanir. 😉

  36. Hey, ég kaus Milan rétt eins og þú. Hins vegar byggði ég val mitt á knattspyrnutengdum ástæðum, ekki vegna þess að ég er með myndir af Zlatan og Guti hangandi innaná skápahurðinni heima hjá mér, eins og sumir. 😉

  37. Ég persónulega skil ekki hvers vegna fólk kýs Real Madrid. Ef við fáum þá og sláum þá út verður Schuster rekinn.

    Gott að vita að það er bara 100% að Schuster verður rekinn ef Liverpool myndi slá þá út.

    Skil svo ekki alveg af hverju menn voru að missa sig yfir þessu marki hans Torres í gær. Ágætis mark, en að kalla það stórglæsilegt er ofmat.

    Það að hver og einn einasti lesandi þessarar síðu sé ekki að kjósa Sevilla er líka beyond me, þar sem að menn eiga að vilja fá veikasta liðið, sem er klárlega Sevilla, en ekki að leita hefnda gegn liði (AC Milan) eða fá einhverja skemmtilega viðureign (Barcelona/Real Madrid).

  38. Halldór, í fyrsta lagi þá hefur Rafa aðeins tapað einni viðureign í útsláttarkeppni Evrópu með Liverpool. Það var gegn Benfica, í einu viðureigninni sem við þóttum vera nánast öruggir áfram úr fyrirfram. Þannig að það að fá auðveldasta liðið er ekki trygging fyrir einu né neinu.

    Í öðru lagi, þá bent ég á að Sevilla hafa unnið UEFA-keppnina síðustu tvö ár. Þessir menn einfaldlega þekkja ekki þá tilfinningu að tapa í heima/úti-útsláttarfyrirkomulagi í Evrópu. Þá bið ég frekar um Real Madrid, sem hafa gert uppá bak í þessari keppni undanfarin tímabil.

    Í þriðja lagi, þá sér það hver heilvita maður að allt sem Fernando Torres gerir er stórglæsilegt og einstakt afrek. 🙂

  39. “Torres er Atletico-maður og myndi hreinlega frussa blóði af spenningi við að fá að slá Real út.” frábær setning :D!!

  40. Jæja, þá er umferð kvöldsins búin og Sevilla kláruðu sinn riðil, þannig að þeir fá að vera memm í þessari könnun áfram. 🙂

    Sýnist vera orðið nokkuð ljóst, eftir 500+ atkvæði (við erum að verða kjördæmi útaf fyrir okkur hérna á Blogginu) að Barca og Inter eru liðin sem langflestir vilja forðast, á meðan hin þrjú eru nokkuð jöfn þar langt fyrir ofan.

    Sem þýðir væntanlega að við drögumst gegn Inter eða Barca. Það er alltaf svoleiðis.

  41. Kristján, ég hélt að þú þekktir mig betur en þetta. Það eru myndir af Zanetti og Hierro á vegnnum hjá mér sko. 🙂

  42. Halldór. Ef Ronaldinho eða Christian Ronaldo hefðu skorað þetta mark, hefði það verið kallað tær snilld. Þetta mark var stórglæsilegt, því jafnvægið og boltameðferðin hjá Torres er til hreinnar fyrirmyndar og ekki oft sem maður sér varnarmenn líta út eins og appelsínugular keilur.

  43. Mig langar í nýtt blóð Real eða Sevilla er orðinn leiður á AC þó þeir séu mínir menn í Ítölsku. Gaman að fá önnur lið að eigast við og líka að fá eitthvað fyrir Spánverjana í LFC.

  46. Ég kaus Real Madrid það yrði frábærir leikir svo vill ég Barca og svo manu í undanúrslitum og Ac milan í úrslitum og sína hverjir eru bestir (tveir af þrem gildir) það er held ég ekki hægt að fá betri og flottari leið í úrslitin!!

  47. Varnarmaðurinn bað um rangstöðu af því hann er vitlaust.

    Þú hefur reyndar lög að mæla Kristján að allt sem Torres gerir sé stórglæsilegt. Ég hafði bara heyrt um markið hans, og hélt að hann hefði kannski loksins skorað úr einum af þessum hjólurum sem hann er alltaf að reyna, eða eitthvað svipað því.

    Annars synd að við skyldum ekki vinna riðilinn. Langt síðan maður hefur séð jafnmörg léleg lið (þótt ekkert lið sé lélegt í meistaradeildinni) komast áfram. Schalke / Olympiakos / Fenerbahce hefðu einungis verið fallbyssufóður fyrir Benitez og lærisveina hans.

  48. Meðan Gerrard er að spila besta fótbolta sem hann hefur spilað á ferlinum þá hef ég ekki áhyggjur. Það sést á honum langar leiðir hvað hann elskar að spila með Torres. Ég er ekki sammála því hérna fyrir neðan að Kuyt hafi verið maður leiksins á móti Marsille því Gerrard og Torres eru í allt öðrum heimi miðað við aðra Liverpool leikmenn. Kuyt var samt mjög góður.

    Er alveg nákvæmlega sama hvaða lið við fáum ef þessir tveir snillingar spila!!!

  49. Halldór, áttu Benfica ekki líka að vera fallbyssufóður í 16-liða úrslitum hér um árið? 😉

    Liverpool ber virðingu fyrir öllum liðum, það setur okkur líka skör ofar en hina hrokafullu oflátunga í Man Utd. Djöfull bara verðum við að vinna þá á sunnudag.
    ÁFRAM LIVERPOOL!

  50. haha… vá, hvað það er fyndið þegar varnarmaðurinn biður um rangstöðu! Torres er nýi besti vinur minn..

    Sevilla og AC er klárlega veikustu andstæðingarnir og vill þ.a.l. mæta þeim. Langar svo að slá AC út – að ég frussa blóði út af því – en held að Sevilla séu veikari.

  51. Mig langar í REAL MADRID… langt síðan við höfum mætt þeim, Rafa náttúrulega Madridar maður og Torres Atletico og svo yrði skemmtileg stemmning í kringum þennan risaslag liða sem eiga mikla og glæsilega sögu í Evrópufótboltanum

  52. Var að kjósa og kaus auðvitað Barcelona, til að þagga niður í Eiði Smára í eitt skipti fyrir öll. Mikið lifandi getur drengurinn verið hvimleiður þegar hann opnar þverrifuna. Hann talar sífellt um leikina sem töpuðust fyrir einu ári, tveimur árum. Hann vill sýna núna að Barcelona er með betra lið en það sem tapaði fyrir Liverpool í fyrra og árið þar áður. Gott hjá honum. Hvernig væri að bera saman liðin sem eru að spila í dag? Fáum Barcelona og skellum þeim. Og vonandi verður Eiður Smári í hópnum.

  53. Minnist þess ekki að hafa séð Liverpool – Real eða Liverpool – Inter. Væri hvort tveggja frábærir kostir. Reyndar væri líka hörkuskemmtilegt að spila við AC eða Barca. Síst vill ég Sevilla, því ég vill fá alvöruleiki út úr þessari keppni, tel hana ekki aðaláherslu okkar en vill fá sem flesta skemmtilega leiki!
    En ég held að það sé ofsagt að segja að allir hræðist okkur. Við og Arsenal pottþétt bestu liðin í potti 2, en í 16 liða úrslitum CL eru allir stórir!

  56. er Eiður Smári ekkert farinn að læra af þessum viðureignum við Liverpool í Meistaradeildinni ????

    hann hefur tapað í þeim hingað til og það mun ekkert breytast

  57. Það yljaði mér um hjartaræturnar að lesa ummæli Eiðs um að hann vildi helst af öllu fá Liverpool. Ég er viss um að hann og hinir Börsungarnir eru handvissir um að það er ekki séns að þeir geti tapað fyrir okkur tvisvar.

    Kannski eru þeir draumaandstæðingurinn eftir allt saman. 🙂

One Ping

  1. Pingback:

Marseille 0 – Liverpool 4!

Meiðslafréttir