Search

Menu
Search

Latest stories

  • Liðið gegn Aston Villa – Mane á bekknum

    33 Comments

    Liverpool er að fara að mæta Aston Villa á Anfield eftir klukkustund og hefur Klopp gert tvær breytingar á byrjunarliði sínu frá tapleiknum gegn Real Madrid í miðri viku.

    Alisson

    Trent – Kabak – Phillips – Robertson

    Milner – Fabinho – Wijnaldum

    Salah – Firmino – Jota

    Bekkur: Adrian, Thiago, Mane, Keita, Chamberlain, Tsimikas, Shaqiri, Ben Davies, Rhys Williams

    James Milner og Firmino koma inn í liðið fyrir Naby Keita og Sadio Mane sem áttu alls ekki góðan leik gegn Real Madrid. Keita kom nokkuð óvænt inn í það byrjunarlið en svona fyrirfram var ágætis pæling í því en hann líkt og flestir leikmenn, og sérstaklega miðjumenn, Liverpool átti ekki góðan leik og var tekinn út af í fyrri hálfleik. Wijnaldum sem var nú alls ekki mikið skárri heldur sæti sínu í liðinu og gæti nú alveg talist heppinn að gera það.

    Það er enginn Jack Grealish hjá Aston Villa í dag sem eru vonandi ágætis fréttir fyrir Liverpool sem þarf mikið á sigri að halda í dag til að halda sér í baráttunni um Meistaradeildarsætið og vonandi kveikja neista fyrir erfiðan seinni leik gegn Real Madrid í næstu viku.

  • Upphitun: Villa mætir á Anfield

    6 Comments

    Eftir sigur gegn Arsenal í síðustu umferð og úrslitum liða í kringum fjórða sætið er aftur orðinn möguleiki að tryggja Meistaradeildarsæti í gegnum deildina. Liðið er nú þremur stigum frá West Ham sem situr í fjórða sæti eins og er. Á morgun mæta Aston Villa á Anfield, liðin mættust í október í fyrri leik liðanna í stórundarlegum leik í fjórðu umferð deildarinnar þegar Villa menn gjörsamlega gengu frá okkar mönnum og unnu 7-2 sigur á ríkjandi meisturum og var það kannski okkar fyrsta vísbending um það undarlega tímabil sem við vorum að ganga inn í.

    Aston Villa hefur átt ágætis tímabil og var lengi með í baráttu um Meistaradeildarsæti, allt þar til Jack Grealish þeirra langbesti leikmaður meiddist en hann hefur misst af síðustu sjö deildarleikjum. Villa menn hafa aðeins náð að sækja átta stig í þessum sjö leikjum án Grealish og er ekki búist við að hann nái leiknum á morgun og gæti jafnvel verið frá í mánuð í viðbót eftir bakslag um síðustu helgi. Ef það reynist rétt er ljóst að Aston Villa er fallið úr allri evrópubaráttu sem hefði getað verið raunveruleg í ár.

    Dean Smith þjálfari Aston Villa hefur náð að skapa skemmtilegt lið með áhugaverðum og góðum kaupum síðasta sumar en þeir sóttu meðal annars Emiliano Martinez frá Arsenal sem hefur verið frábær í markinu hjá þeim og tvo stráka úr Championsship deildinni, þá Matty Cash og Ollie Watkins sem hafa báðir reynst happafengur.

    Liverpool

    Eftir góðan sigur gegn Arsenal um síðustu helgi áttum við afleitan leik gegn Real Madrid í vikunni og komum okkur í ansi erfiða stöðu fyrir seinni leikinn næstkomandi miðvikudag. Liðið er þó nýkomið úr landsleikjahléi þar sem margir leikmenn fengu frí og það eru fjórir dagar milli leikja svo ég tel að við sjáum lítið hvílt milli þessara leikja.

    Keita og Trent áttu skelfilegan dag gegn Real í vikunni. Þeir voru langt frá því að vera þeir einu sem áttu vondan dag en flestir voru slakir í vikunni. Keita var skipt útaf í fyrri hálfleik og Trent á stóra sök í fyrstu tveimur mörkum Real. Báðir urðu fyrir kynþáttafordómum á samfélagsmiðlum í kjölfarið og hefur það eignað sér fyrirsagnirnar í vikunni. Umræðan um fordóma í fótbolta er of stór til að taka í upphitun og eins slæmt og það er að lesa um svona árásir á eigin leikmenn, eða á hvern sem er, þá er spurningin einnig hvað Klopp gerir með þá tvo eftir frammistöðuna. Klopp hefur oftar en ekki reynt að gefa mönnum séns á að svara fyrir sig strax í næsta leik og er nokkuð ljóst að Trent fær að byrja en Keita er stærri spurning.

    Ætla skjóta á að Keita fái tækifæri til að bæta fyrir leik sinn gegn Real og verði á miðsvæðinu með Fabinho og Thiago. Mane og Firmino hafa báðir verið langt frá sínu besta á tímabilinu og undanfarið hefur það verið Firmino sem hefur vikið þegar Jota kemur inn í liðið en hef það á tilfinningunni að Mane fái sér sæti á bekknum á morgun.

    Liverpool hefur ekki unnið heimaleik á Anfield síðan gegn Tottenham 16 desember en síðan þá höfum við spilað níu heimaleiki þar sem sex hafa tapast tvö jafntefli og eini sigurleikurinn var gegn Leipzig og var spilaður í Budapest. Ef Liverpool ætlar sér að komast í Meistaradeildarsæti og hvað þá snúa við eigvíginu gegn Real þá verður gegni liðsins á Anfield að lagast og fyrsta skrefið í þá átt er gegn Villa á morgun.

    Spá

    Eftir langa þrautagöngu á Anfield held ég að sigurinn komi loks á morgun þegar við vinnum 2-0 þar sem Jota og Salah setja sitt hvort markið.

  • Real Madrid 3 – Liverpool 1 (Skýrsla uppfærð)

    47 Comments

    Það er svo afskaplega spes hversu oft þetta lið kemur illa undirbúið inn í leiki. Strax frá fyrstu mínútu var eins og okkar menn hefðu enga trú á verkefninu. Í handbolta hefði maður sagt að þeir væru að reyna að skora tvö mörk í hverri sókn. Niðurstaðan: Menn bókstaflega runnu á rassinn oftar en einu sinni, sendingaklikk hægri vinstri og pressan máttlaus.

    Fyrri hálfleikur

    Fullkomnlega verðskuldað komust Real Madrid yfir á 25. Mínútu. Kroos átti sendingu yfir nánast allan völlinn á Vinícius sem átti frábæra fyrstu snertingu, stakk Nat Phillips af og slúttaði fagmannlega framhjá landa sínum. Ansi margir af okkar mönnum sem máttu gera betur þarna og spurning hvers vegna Kroos fékk svona langan tíma til að velja sér sendingu. Spurning sem var oft viðeigandi í kvöld. Maður vonaði innilega að þetta vekti okkar menn til lífsins.

    Það gerðist ekki. Þegar annað markið kom var maður mest hissa á að það hefði tekið heilar tíu mínútur. Aftur var það langur bolti en í þetta sinn var Trent algjörlega sökudólgurinn. Hann reyndi einhvers konar flugskalla á Alisson en misreiknaði sig herfilega og skallaði beint í lappirnar á Marco Ascencio sem lét ekki bjóða sér færið tvisvar og tvöfaldaði forystu heimamanna. Skömmu síðar fékk Mané gult fyrir mótmæli, heitt í hamsi eftir að hafa verið rúgbý tæklaður í bakið rétt fyrir markið.

    Þegar fjórar mínútur voru til hálfleiks gerði Klopp nokkuð sem hann er alls ekki vanur: Breytingu snemma. Keita fór svekktur af velli og Thiago kom inn á í staðinn. Kabak gaf í kjölfarið Real gullið tækifærið til að komast í 3-0 og stuðningsmenn Liverpool komnir á bæn að hálfleikur væri flautaður á. Skelfing hreint út sagt. Liverpool ekki með skot! Notabene ekki núll skot á markið, núll skot!

    Seinni hálfleikur

    “Ok strákar, prófum að spila vel!” Sagði Jurgen Klopp væntanlega í hálfleik. Það var allt annað að sjá til Liverpool og liðið náði draumabyrjun. Wijnaldum, eftir að hafa verið ósýnilegur í fyrri, tók hlaup í átt að teig Real, gaf á besta portúgala í heimi sem skaut að sjálfsögðu. Skotið var klúðurslegt en datt fyrir lappirnar á Salah Konungi sem skaut í Curtois, slánna og inn! 2-1 og einvígið allt í einu galopið!

    Thiago hefur svo liðið eins og það vantaði eitthvað og náði sér í sitt vanabundna gula spjald, er einhver með tölfræðina yfir gul spjöld per 90 mínútur hjá honum? Hlýtur að vera með þeim hærri í þeirri tölfræði.

    Næstu mínútur jókst pressan á mark Real en færin komu á báða bóga. Það var darraðadans í vítateig Liverpool þegar þegar Thiago reyndi að vera of sniðugur. Svo gátu okkar men jafnað í skyndisókn en Mendy sýndi frábæra varnartakta. Eftir hornið náðu Real sinni eigin skyndisókn sem þurfti Hollywood varnartakta til að stoppa. En svo lagði Liverpool vörnin sig sem hóp og Modric hljóp beint í gegnum hana, gaf á Vinícius sem og kom Real í 3 -1 á 65. mínútu.

    Skelfilegt í alla staði og vindurinn horfin úr seglum okkar manna. Þetta mark steinrotaði okkar menn og í raun gerðu þeir ekkert markvert það sem eftir lifði leik. Eftir markið gerði Zidane breytingu og okkar menn fóru að vera mun meira með boltann. Gallinn var að Real voru að leyfa okkur að vera með boltann og þó boltinn gengi á milli okkar manna fyrir framan teiginn hjá Real þá avr enginn hætta á ferð.

    Á áttugustu mínútu gerði Klopp loksins breytingar, Shaqiri og Firmino komu inn fyrir Kabak og Jota. Ákaflega spes breyting og vonandi var þetta ekki útaf meiðslum hjá Kabak því drottinn minn ég vil hafa Fabinho á miðjunni. Trent lét svo veiða sig all hressilega í gildru og uppskar gult fyrir mótmæli.

    Svo gerðist ekkert. Þessar loka tíu voru við meira með boltann en aldrei líklegir, Real lokaði einfaldlega búllunni og það er fjall að klífa á Anfield eftir.

    Maður leiksins

    Robbo? Hann og Salah áttu skítsæmilega leiki sem þýðir að þeir báru höfuð og herðar yfir aðra leikmenn Liverpool í þessum tiltekna leik,

    Slæmur dagur.

    Klopp fær þessa vafasömu nafnbót í dag. Þegar hálft liðið mætir með hausinn öfugan inn á völlinn og þjálfari hins liðsins rassskellir þig taktískt þá áttirðu slæman dag.

    Umræðupunktar eftir leik

    • Klopp ætlaði væntanlega að sjá við Real með því að setja Keita óvænt inn fyrir Thiago og hámarka þannig pressuna af miðsvæðinu. Það voru það gekk engan vegin, miðjan okkar náði engum takti og þess fyrir utan sá Zidane við þessu með því að láta sína menn dæla boltanum yfir miðjuna okkar.
    • Eftir slakan leik missti Trent alveg hausinn þegar fór að líða á leikinn. Hann er ennþá ungur og ungir leikmenn eru í eðli sínu óstöðugir en maður hélt að hann væri búin að ná því úr kerfinu á sér.
    • Hvað var í gangi með þessar skiptingar í seinni hálfleik? Hvað vorum við að reyna að gera?
    • Kabak og Nat eru mjög fínir miðverðir, en á þessu stigi þarf frábæra miðverði og það er Liverpool ekki með.
    • Keita var líklega að stimpla sig úr framtíðarplönum Klopp, þetta gífurlega efni hefur bara engan veginn náð að verða að þeim leikmanni sem stuðningsmenn Liverpool héldu að þeir væru að fá á sínum tíma. Bara svo það komi fram: Gini var líka slæmur í þessum fyrri hálfleik og það hefði alveg verið hægt að skipta honum út á sama tíma punkti.
    • Oh Mané Where Art Thou? Hvað er langt síðan kallinn átti góðan leik, skil ekki hvað er búið að koma fyrir hann í vetur.
    • Venjulega myndi ég alltaf veðja á að Liverpool gæti komið til baka á Anfield eftir svona leik. Ég er ennþá tilbúin að veðja á það… en það verður lág upphæð.

    Næst á dagskrá

    Aston Villa. Harmur að hefna. Laugardagurinn. Í svona hundraðasta sinn í vetur verða okkar menn að svara fyrir skitu. Ég hef trú á þeim. Ekki mikla, en hún hverfur ekki.

  • Byrjunarliðið klárt: Keita og Jota byrja!

    80 Comments

    Það er ekki ofsögum sagt að stærsti leikur tímabilsins (hingað til) er að bresta á og ljóst hvaða byrjunarlið fær það verkefni að ganga fram á æfingarvelli Real Madrid. Varnarlínan er eins og flestir bjuggust við en man ekki eftir að hafa séð marga spá Keita í byrjunarliðinu ásamt Fabinho og Wijnaldum. Jota er svo verðlaunaður fyrir frábæra innkomu um helgina með því að byrja. Það verður að teljast ágætt að eiga bæði Bobby og Thiago inni til að breyta leiknum. Einnig fæst það væntanlega staðfest í kvöld hvort Ben Davies sé til, en hann er allavega á bekknum.

    Lið Real er eftirfarandi:

     

     

    Fyrir þá sem eru að farast úr spenningi og vilja stytta sér stund fram að leik mæli ég auðvitað með Gullkasti gærkvöldsins.

     

    Hvernig líst ykkur á?

  • Gullkastið – Frá höfuðborg Englands til höfuðborgar Spánar.

    4 Comments

    Real Madríd bíður í 8-liða úrslitum Meistaradeildarinnar og hressandi yfirspilun á Emirates var einmitt upphitunin sem við þurftum fyrir það. Reyndar líka þessi upphitun frá því í gær. Baráttan um Meistaradeildarsæti er síður en svo búin en Liverpool nær að spila svona áfram.

    Stjórnandi: Maggi
    Viðmælendur: SSteinn og Einar Matthías

    MP3: Þáttur 329

  • Helvítis Real Madríd

    10 Comments

    Landslagið hefur breyst þó nokkuð á þeim skamma tíma sem er liðin frá því Liverpool mætti Real Madríd síðast í Meistaradeildinni. Hópur spænska liðsins samanstóð af leikmönnum með samanlagt yfir þúsund leiki í Meistaradeildinni á móti Liverpool liði sem var að mestu að stíga sín fyrstu skref í keppninni. Sá leikur fór eins og við þekkjum og Real Madríd vann sinn þriðja Meistaradeildartitil í röð og þann fjórða á fimm árum. Einfaldlega eitt af betri liðum sögunnar

    Tilfinningin þá var engu að síður sú að stutt gæti verið í endalok valdatíma spænsku risanna sem annars drottnuðu yfir öðrum áratug aldarinnar. Stuðningsmenn Liverpool vonuðust auðvitað eftir því að þeirra valdatíma myndi ljúka í Kiev og óbragðið eftir þá viðureign er síður en svo farið. Ágætt dæmi um þetta óbragð er t.d. þegar að einum stuðningsmanni Liverpool var boðið að hitta fyrirliða Real Madríd er hann var með pabba sínum að skoða aðstæður hjá spænska risanum. Ungi strákurinn sem var á leiknum í Kiev hafnaði boðinu pent og sagðist ekki hafa líkað það sem hann gerði Salah. Þetta var þáverandi unglingaliðsmaður Fulham og eitt mesta efnið í heimsfótboltanum, Harvey Elliott.

    Raunar skilur saga Real Madríd eftir sig óbragð líkt og tekið hefur verið rækilega á í upphitunum fyrir síðustu viðureignir liðanna. Árið 2014 skoðuðum við hvernig Franco lagði með beinum og óbeinum hætti grunninn að því veldi sem þeir urðu á stofnárum Evrópukeppni Meistaraliða, m.a. með sínum manni Santiago Bernabeu. Þjófnaður þeirra á Di Stefnao er sérstaklega lýsandi fyrir félagið þá og ekki bendir margt til þess að þetta sé eitthvað mikið betra nú.

    Árið 2019 kynntum við okkur svo forseta félagsins Florentino Perez, langmikilvægasta mann félagsins. Hann endurvakti galaticos innkaupastefnu félagsins í kringum aldamótin. Perez stofnaði verktakafyrirtækið ACS sem er í dag alþjóðlegur risi, ekki síst einmitt þökk sé fjölmargra grunsamlega hagstæðra verkefna sem þeir fengu frá stjórnvöldum á Spáni. Besta dæmið er innkoma hans til Real Madríd um aldamótin er félagið var skuldum vafið. Verktakinn Florentino Perez seldi borgaryfirvöldum í Madríd æfingasvæði Real í miðborg Madríd á €480m sem var fullkomlega galin fjárhæð. Tæplega fjórum sinnum hærri fjárhæð en velta félagsins var þá. Real keypti í staðin land undir nýtt æfingasvæði fyrir brotabrot af þessari fjárhæð. Það var ekki allt heldur fór landið sem Real seldi í byggingu þriggja háhýsa sem ACS verktakafyrirtæki Florentino Perez var svo einstaklega heppið að fá. Hrein tilviljun auðvitað. Hið gríðarlega skuldsetta Real Madríd keypti þá um sumarið m.a. Figo frá Barcelona og Makalele.

    Real Madríd og Barcelona hafa undanfarna tvo áratugi haft töluvert samkeppnisforskot á keppinauta sína, ekki bara heima á Spáni heldur líka í Evrópu sem hefur hjálpað þeim við að sannfæra bestu leikmenn í heimi að ganga til liðs við félögin. Þessi félög hafa raunar í gegnum söguna jafnan keypt bestu leikmenn í heimi en það var ekkert lögmál áður fyrr að þeir nánast yrðu að fara til Real Madríd eða Barcelona ef þau lið sýndu áhuga. Áhugi bestu leikmanna frá Suður-Ameríku á þessum liðum er ekkert bara vegna þess að þetta er kúltúr og veðurfar sem þeir tengja betur við eða vegna þess að La Liga var sýnd í þeirra heimalandi. Þau gátu boðið þeim miklu betri kjör (og auðvitað fylgdi velgengni oftar en ekki með).

    Margt af þessu sem veitti spænsku risunum samkeppnisforskot á ekki lengur við, ekki í eins afgerandi mæli og líklega erum við nú þegar farin að sjá áhrifin. Enginn hefur talað meira fyrir sjálfstæðri Evrópskri Ofurdeild sem myndi tryggja enn meiri tekjur stærstu liðanna en Florentino Perez, ekki bara núna heldur undanfarin 20 ár. Aldrei meira en núna samt þegar Real Madríd hefur ekki það gríðarlega forskot á leikmannamarkaðnum sem það hafði.

    Beckham Law 2003

    Eitt af því sem hjálpaði La Liga að taka við keflinu af Seria A og Premier League sem heimavöllur stærstu stjarnanna á fyrsta áratug nýrrar aldar voru m.a. svokölluð Beckham lög sem sett voru á Spáni árið 2003. Lögin höfðu svosem ekkert með Beckham að gera beint utan þess að hann var fyrsta ofurstjarnan sem hagnaðist á þeim. Lögin voru sett til að laða erlenda ríkisborgara, helst vel efnaða til Spánar og gengu út á að þeir þurftu aðeins að greiða 23% skatt af tekjum sínum á Spáni fyrsta árið og svo í fimm á eftir það, samtals allt að sex ár. Þetta átti ekkert bara við um knattspyrnumenn en hafði auðvitað mikil áhrif fyrir lið eins og Real Madríd og Barcelona sem gátu samið á allt öðrum grundvelli en ensku, þýsku og ítölsku risarnir. Spænsku liðin höfðu fyrir forskot hvað tekjur á leikdegi og sjónvarstekjur varðar.

    Árið 2010 í kjölfar fjármálakreppu voru gerðar breytingar á þessum reglum þar sem þak var sett á hversu háar launatekjurnar máttu vera sem féllu undir þessi lög, það útilokaði flestar stærstu stjörnunar. Árið 2015 var lögunum svo breytt aftur þannig að íþróttafólk var sérstaklega tekið út fyrr sviga þannig að það fellur ekki undir Beckham regluna lengur. Skattur á erlenda knattspyrnumenn er því í takti við önnur lönd núna.

    Launatekjur stærstu stjarnanna eru reyndar ekki lengur eins mikilvægar og þær voru fyrir 15-20 árum, ímyndarrétturinn er öllu stærra mál í dag og eru þær tekjur jafnan meira í rekstrarfélögum og skattlagt sem rekstrarfélag (ekki einstaklingar). Spænski skatturinn hefur hjólað af hörku í stærstu stjörnurnar undanfarin ár enda kom á daginn að þeir voru flestir með tekjur sínar faldar í skattaskjólum utan spánar. Ronaldo og Messi voru t.a.m. báðir dæmdir fyrir slíka fjármálafimleika.

    Jafnari skipting sjónvarpstekna

    Árið 2015 var einnig gerð stór breyting á reglum La Liga sem hefur töluverð áhrif á Real Madríd og Barcelona. Spænsku risarnir höfðu fram að því réttinn á sínum leikjum og tóku auðvitað hagnaðinn af sjónvarpstekjum sinna leikja sem voru miklu hærri en minni liðin gátu aflað. Hin 18 liðin í deildinni höfðu lengi barist fyrir miklu jafnari skiptingu á sjónvarpstekjum og voru flest meira og minna í fjárhagserfiðleikum. Þau bentu á að án þeirra væri deildin lítið, krafan var svipað kerfi og þekkist á Englandi, sem hafðist loks árið 2015.

    Núna dreifast 50% af sjónvarpstekjum deildarinnar jafnt á öll liðin en hinum helmingurinn fer eftir árangri. Real og Barcelona fá ennþá langmest en ekki nálægt því þrefalt eða fjórfalt á við næstu lið eins og tíðkaðist fyrir árið 2015.

    Er enda von að forráðamenn Barcelona og Real Madríd eru meðal þeirra sem eru í fararbroddi um að stofna nýja ofurdeild í Evrópu, mjólkurkúin er hætt að gefa eins mikið. Skuldastaða beggja er þannig að núna tala þeir eins og Ofurdeild sé algjör nauðsyn fyrir framþróun fótboltans. Fögnum hverju ári meðan svo er ekki.

    Tími Messi og Ronaldo er liðin

    Einokun Barcelona og Real Madríd undanfarin áratug má að mjög miklu leiti rekja til Messi og Ronaldo sem eru báðir á topp fimm yfir bestu leikmenn sögunnar. Raunar erfitt að færa rök fyrir öðru en að þeir séu númer eitt og tvö á þeim lista. Messi þá að sjálfsögðu númer eitt.

    Þeir hafa báðir auðvitað verið partur af frábærum liðum sem munu alveg halda áfram að vera partur af elítunni. En án þeirra eru tennurnar töluvert teknar úr báðum liðum og það er enginn beinn arftaki í sjónmáli eins og staðan er núna. Bæði lið þurfa raunar að endurnýja liðin töluvert, ekki bara fylla þeirra skörð.

    Messi er vissulega ennþá hjá Barcelona, samningurinn rennur út í sumar og hann verður 34 ára í júní. Það er ágætt dæmi um hversu mikil bull hann og Ronaldo hafa verið að Messi er búinn að skora 23 mörk í deildinni í vetur og leggja önnur átta mörk upp í 24 leikjum. Samt er það í Barcelona liði sem er langt frá bestu Barca liðunum sem Messi hefur verið partur af. Guði hjálpi þeim sem ætlar að fylla þetta skarð. Hvorugur er partur af 8-liða úrslitum Meistaradeildarinnar í fyrsta skipti í 16 ár (samt spila þeir með Barcelona og Juventus).

    (more…)

  • Leikir hjá kvennaliðinu og U23

    2 Comments

    Þetta er ein af þessum helgum þar sem öll liðin okkar eru að spila. Aðalliðið afgreiddi Arsenal jú eftirminnilega í gær, en fyrr um daginn höfðu U18 afgreitt United 0-1 í útileik í bikarnum.

    Í dag eru svo tveir leikir – sem hófust reyndar báðir núna kl. 11. U23 liðið okkar mætir Brighton, og stilla svona upp:

    Hughes

    Gallacher – Beck – Savage – Boyes

    Clayton – Clarkson – Dixon-Bonner

    Longstaff – Hardy – Woodburn

    Sumir þeirra sem hafa verið að spila með U23 léku með U18 í gær, eins og Billy Koumetio t.d., og svo er Jake Cain á bekknum. Liðið er strax lent 0-1 undir þegar þetta er skrifað.

    Stelpurnar okkar eru svo að spila við Lewes, og þetta er byrjunarliðið hjá þeim:

    Foster

    Roberts – Fahey – Moore – Hinds

    Jane – Bailey – Holland

    Hodson – Linnett – Furness

    Bekkur: Heeps, Robe, Thestrup, Lawley, Rodgers, Kearns, Parry

    Aftur er Rachel Laws frá vegna meiðsla, og því heldur Rylee Foster stöðu sinni í markinu, enda nýbúin að framlengja samning sinn við liðið.

    Liðið er strax komið 1-0 yfir eftir sjálfsmark Lewes snemma leiks. Leikurinn er hvorki sýndur á The FA Player, né á opinberu rásinni hjá Liverpool, en hins vegar eru Lewes með streymi á sinni YouTube rás.

    Við komum svo með úrslit síðar í dag úr báðum þessum leikjum.

  • Arsenal 0 – 3 Liverpool

    31 Comments

    Mörkin

    0-1 Jota (64. mín.)
    0-2 Salah (68 mín.)
    0-3 Jota (82 mín.)

    Gangur leiksins

    Það var örlítið ryðgað Liverpool lið sem hóf leikinn, en var samt síst lakara. Eftir að liðið hafði hrist af sér mesta vetrarfrísdoðann, þá fór spilið að ganga mun betur og færunum fjölgaði. Hættulegasta færi fyrri hálfleiksins féll James Milner í skaut, en þá komst Trent í opið svæði efst í hægra horninu og spændi í átt að marki, en renndi á Milner sem kom á siglingu af miðjunni. Milner tók líklega ekki alveg nógu margar skotæfingar í vetrarfríinu því hann setti boltann framhjá í upplögðu færi. Það voru fleiri færi sem féllu liðinu í skaut, en mest hálffæri þar sem vantaði aðeins upp á síðustu snertingu hjá fremstu þremur.

    Fyrri hálfleikur endaði 0-0, og alveg klárt mál að Liverpool var betri aðilinn í hálfleiknum.

    Í síðari hálfleik kom svolítið sprækara Arsenal lið inná, en þó án þess að skapa neinn afgerandi usla. En upp úr 60. mínútu kom svo fyrsta skipting okkar manna. Diogo Jota kom inn á fyrir Andy Robertson, Milner datt því niður í vinstri bak og Firmino fór aftar á völlinn, en Jota fór í framlínuna. Við þessa skiptingu var eins og eitthvað smylli saman hjá liðinu. Aðeins þrem mínútum síðar komst Trent í góða stöðu uppi í hægra horni, lagði boltann í fyrsta með góðri fyrirgjöf á markteigshornið fjær þar sem téður Jota beið og afgreiddi boltann í netið með góðum skalla. 0-1, og þarna þekkti maður bæði Trent, Jota, sem og Salah sem hafði lagt boltann á Trent. Aðeins fjórum mínútum síðar vann Liverpool boltann á miðjunni, Fab sendi boltann inn á hægra vítateigshorn þar sem Salah og Gabriel börðust um boltann, Salah hafði betur og kláraði dæmið sjálfur með því að renna boltanum milli fóta Leno. 0-2, og leikurinn langleiðina með að vera búinn, þó maður vissi að mark frá Arsenal gæti alveg sett stöðuna í uppnám. En það voru í staðinn okkar menn sem bættu í og Jota skoraði þriðja markið á 82. mínútu: Trent vann boltann þegar Arsenal voru að byrja uppspil, boltinn barst inn á teig þar sem Mané var við það að missa boltann en Jota kom á siglingu og negldi boltanum í netið og gerði þar með endanlega út um þær litlu vonir sem Arsenal höfðu um að fá eitthvað út úr leiknum. Klopp gat meira að segja gefið Kabak smá pásu og setti Rhys inná, en það breytti engu um það að það kom í raun engin ógn frá Arsenal. Leiknum lauk því með öruggum og sanngjörnum sigri Liverpool, 0-3.

    Bestu/verstu menn

    Þetta var einn af þessum leikjum þar sem liðið var heilt yfir að spila mjög vel, og erfitt að taka einhvern einn útfyrir sviga. Ég ætla þó að gera það og tilnefna Fabinho sem mann leiksins, en þessi ágætlega lýsandi mynd náðist af honum í hita leiksins:

    Ekki það að Jota kæmi alveg til greina í þessari umræðu líka, hann kemur með ferskan blæ inn í sóknina, og það virðist losa um hina sóknarmennina, þó sérstaklega Salah. Trent sýndi líka hvers konar hálfvitagangur það var að velja hann ekki í landsliðið (en takk fyrir að gefa honum pásu Gareth!), lagði upp mark og hans vinnusemi bjó til þriðja markið, auk þess sem hann var mjög öflugur varnarlega. Firmino og Mané áttu frekar erfitt uppdráttar fyrsta klukkutímann, en þegar Firmino færðist niður á miðjuna var hann meira í boltanum og blómstraði þar. Við gætum vel átt eftir að sjá hann meira í því hlutfelli á næstu misserum, þ.e. að vera aftar á vellinum.

    Umræðan eftir leik

    Þegar Liverpool og Chelsea luku leik fyrir réttum mánuði – þann 4. mars sl. – var útlit fyrir að Liverpool væri endanlega búið að stimpla sig út úr baráttunni um meistaradeildarsæti, og ekki skánaði það eftir tapið gegn Fulham þrem dögum síðar. En síðan þá er Liverpool búið að vinna þrjá leiki, tvo í deild og einn í meistaradeild, og hafa ekki fengið á sig mark. Chelsea aftur á móti töpuðu illa fyrr í dag, og nú er aðeins tveggja stiga munur á þessum liðum. Chelsea eiga þar að auki eftir sæmilegt leikjaprógram, og enda t.d. á að spila við City, Arsenal, Leicester og Villa, auk þess sem liðið mætir West Ham þar á undan. Þetta er því svo langt í frá búið, og það má alveg búast við baráttu milli Chelsea, Liverpool, Tottenham, West Ham og Everton um þetta blessaða 4. sæti allt fram í síðustu umferð.

    Klopp, Lijnders og co. munu núna beina athyglinni að leiknum á þriðjudaginn þegar liðið sækir Real Madrid heim. Það er alveg ljóst að menn vilja enda tímabilið eins vel og kostur er, og í augnablikinu þá sér maður smugu á því að tímabilið fari ekki alveg í vaskinn. Það er afar jákvætt að liðið sé farið að vinna leiki, halda hreinu, og það án þess að hafa Henderson. Lykilatriðið að baki þessari velgengi er sjálfsagt það að Fabinho er loksins kominn aftur í sína lang bestu stöðu. Þá eru Nat Phillips og Ozan Kabak að ná upp ágætis samspili, eru hæfilega ólíkir leikmenn til að bakka hvorn annan upp.

    Njótum þess að vera búin að fá Liverpool liðið okkar aftur. Njótum þess að sjá Jota funheitan, sjá Salah enn efstan á lista yfir markaskorara deildarinnar, og sjá Trent sýna að hann hefur engu gleymt. Styðjum svo við bakið á okkar mönnum í 8 liða úrslitum meistaradeildarinnar, sem er næsta verkefni!

  • Liðið gegn Arsenal

    18 Comments

    Þá er vetrarfríinu loksins lokið, og þetta er liðið sem mætir Skyttunum í London í kvöld:

    Bekkur: Adrian, Wijnaldnum, Keita, Ox, Jones, Jota, Tsimikas, Shaqiri, Rhys

    Jota er semsagt á bekk á meðan þríeykið okkar byrjar. Jota er svosem nýkominn úr landsliðsverkefni þar sem hann spilaði ansi margar mínútur, en Firmino hefur fengið góðan tíma til að jafna sig á hnjaskinu sem hélt honum utan vallar í síðustu leikjum, og honum hefur nú aldrei leiðst að spila gegn Arsenal!

    Eins er Milner kallaður til í byrjunarliðið og það kemur kannski líka aðeins á óvart, en á sama hátt má líka segja að Gini spilaði helling í landsleikjahléinu og er svosem búinn að spila mjög mikið í vetur heilt yfir.

    Kelleher ekki ennþá orðinn leikfær, og því er Adrian eini markvörðurinn á bekknum. Við höfum nú alveg séð veikari bekki, a.m.k. hafa oft verið fleiri kjúklingar þar. Rhys er vissulega eini miðvörðurinn á bekknum, það verður áhugavert hvort við eigum einhverntímann eftir að sjá Ben Davies í Liverpool treyjunni í opinberum leik.

    Hafi einhverntímann verið mikilvægt að hirða stigin þrjú, þá varð það ennþá mikilvægara þegar Chelsea töpuðu fyrir FC Barcelona WBA. En þetta eru sýnd þrjú stig en ekki gefin.

    KOMASO!!!

  • Landsleikjahléi lokið – Arsenal á morgun

    5 Comments

    Liverpool heimsækir Arsenal á morgun þegar alvöru fótboltinn byrjar eftir landsleikjahlé, gott ef það eru ekki bara þrjár vikur frá síðasta leik Liverpool sem lauk með 1-0 deildarsigri á Wolves þar sem Diogo Jota skoraði sigurmarkið gegn sínum gömlu félögum.

    Eftir afar dapurt og fúlt tap gegn Fulham tókst Liverpool að snúa blaðinu aðeins við og vann tvo leiki í kjölfarið. Annan gegn RB Leipzig sem gulltryggði farmiðan í næstu umferð í Meistaradeildinni þar sem liðið mætir Real Madrid og útisigrinum á Wolves.

    Ég man ekki til þess að maður hafi nú heyrt af einhverjum nýjum meiðslum í leikmannahópi Liverpool en Curtis Jones skoraði fyrir u21 ár landsliðið, Wijnaldum skoraði fyrir Hollendinga, Salah fyrir Egyptana og Diogo Jota skoraði tvö eða þrjú fyrir Portúgal – sem er bara algjör snilld að hann sé kominn til baka úr meiðslunum og mundi eftir að taka markaskóna með sér aftur á völlinn. Þá fékk Trent afar furðulega hvíld frá landsliðsverkefnum með Englandi en við fögnum því svo sem bara. Þá er Firmino aftur til taks eftir að hafa misst úr síðustu tveimur leikjum vegna meiðsla.

    Það er ekki mikið af meiðslum að ég held í herbúðum Arsenal. David Luiz mun ekki vera með vegna meiðsla en Saka, Xhaka, Willian og Smith Rowe gætu allir talist tæpir en það er talið nokkuð líklegt að flestir þeirra verði til takst fyrir þá á morgun.

    Ég reikna nokkuð sterklega með að Klopp muni stilla upp mjög líklegu byrjunarliði og hann hefur gert síðustu tvo leiki. Kabak og Phillips hafa haldið hreinu síðustu tvo leiki saman í vörninni og gert vel, Klopp gaf að mér fannst smá hint um daginn að hann muni reyna að halda þeim saman í vörninni á meðan hann getur og koma Fabinho á miðjuna aftur. Thiago fékk að mig minnir hvíld í síðasta leik Spánar svo hann ætti að vera ferskur og Liverpool er nokkuð líklegt til að ætla að kreista alla síðustu dropana sem mögulega hægt er úr Wijnaldum en þar sem stutt er í útileikinn gegn Real Madrid þá gæti vel verið að Naby Keita eða Chamberlain komi inn í hans stað eða jafnvel Firmino og Liverpool keyri á öllum fjórum framherjunum í þessum leik. Það er solid að giska á Wijnaldum svo ég held mig bara við það og Diogo Jota er ansi heitur þessa dagana í markaskorun svo ég vona að hann haldi sæti sínu frammi.

    Alisson

    Trent – Kabak – Phillips – Robertson

    Thiago – Fabinho – Wijnaldum

    Salah – Jota – Mane

    Staða Liverpool í deildinni er nú ekki merkileg og á liðið á brattann að sækja í baráttunni um Meistaradeildarsæti, sigur annað kvöld heldur að minnsta kosti nokkuð veikri von lifandi en ég get trúað að það verði aðeins meira horft til Meistaradeildarinnar og reyna að koma með eins mikinn þunga í hana og mögulegt er.

    Ef ekki væri fyrir langt hlé þá hefði ég alveg getað trúað því að Klopp myndi rótera liðinu aðeins fyrir þennan leik en þar sem það er langt síðan þeir spiluðu saman þá finnst mér líklegt að hann noti þennan leik til að gefa þeim tækifæri á að slípa sig saman fyrir leikinn gegn Real Madrid.

    Sigur, nokkur mörk og góður sannfærandi sigur væri mjög vel þegið á morgun og vonandi verður það raunin.

Load More
Congratulations. You've reached the end of the internet.

© 2019 KOP.is

Back to Top
Close