Á morgun, þriðjudag, mætir Liverpool aftur á Carrow Road og mætir nú Norwich í Deildarbikarnum en þegar liðin mættust í fyrstu umferð deildarinnar í haust þá vann Liverpool ansi þægilegan 3-0 sigur á kanarífuglunum svokölluðu þar sem Jota, Salah og Firmino skoruðu mörkin.

Eitthvað mun liðið sem mætir í þennan leik vera töluvert öðruvísi en það sem spilaði í deildarleiknum, Liverpool hefur verið að lenda í smá meiðslaveseni. Firmino, Thiago og Elliott eru allir frá í þessum leik og Trent var meiddur um síðastliðna helgi. Það er því svolítið þannig að Liverpool grefur eflaust ögn dýpra inn í hópinn en maður hefði giskað á fyrir svona tveimur vikum eða svo þar sem nú verður meiri ábyrgð á leikmönnum eins og Keita og Milner í næstu tveimur til þremur leikjum.

Það er þétt prógram framundan fyrir næsta landsleikjahlé sem endar á leik gegn Man City og Klopp hefur verið að rótera liði sínu töluvert undanfarið og voru til að mynda nokkuð margar breytingar á liðinu í sigurleiknum gegn Crystal Palace um síðastliðna helgi. Matip, Gomez, Robertson og Trent voru ekki með, Keita byrjaði leik í fyrsta skiptið í smá tíma og Milner spilaði í hægri bakverðinum. Ég yrði í sjálfu sér ekkert rosa hissa þó Klopp ákveði að halda áfram smá róteringu með það í huga að geta mætt með sem sterkasta liðið ferskt í leikinn gegn Man City en við munum sjá ákveðna “varamenn” koma inn í liðið á morgun.

Ljinders sagði að Jones mun byrja leikinn og kemur það í raun ekki á óvart. Hann þarf mínútur til að komast í gang og er líklegt að hlutverkið hans sé að verða mikilvægara eftir meiðsli Elliott og þá sérstaklega þegar Thiago verður ekki heldur með næstu tvo leikina. Chamberlain, Origi og Minamino byrja held ég alveg pottþétt og annað hvort Henderson eða Milner verður á miðjunni held ég. Vörnin er pínu tricky, Matip hefur verið að hvíla smá og þykir mér ólíklegt að hann verði látinn spila þennan leik og sama með Van Dijk þó hann hafi hvílt gegn AC Milan um daginn. Konate spilaði sinn fyrsta leik fyrir liðið um helgina og kæmi ekki á óvart ef hann byrjar þennan leik og þá er spurning hver verði með honum. Gomez spilaði gegn Milan en ekki Crystal Palace svo ég held að hann muni byrja þennan leik en ég held líka að Nat Phillips byrji sinn fyrsta leik í vetur, þar sem Neco Williams er meiddur þá ætla ég að giska á að hann byrji í bakverðinum.

Það má fastlega búast við því að Kaide Gordon spili sinn fyrsta keppnisleik fyrir aðallið Liverpool á morgun og í raun bara spurning hvort að hann byrji eða komi inn á. Hann mun þá verða yngsti leikmaðurinn í sögu Liverpool til að spila sinn fyrsta leik. Ekkert smá efnilegur og spennandi strákur sem kom frá Derby í byrjun árs og hefur greinilega heillað Klopp og starfslið hans upp úr skónnum síðan hann kom. Sömuleiðis má vænta þess að bakvörðurinn Connor Bradley sem var með aðalliðinu í sumar verði með í hópnum en þeir voru ekki með varaliðinu í síðasta leik þeirra. Hann og Gordon gæti alveg byrjað í bakverðinum og á vængnum en ég held að reyndari leikmaður byrji og þeir komi inn á en væri mjög til í að sjá þá byrja, sérstaklega Gordon.

Norwich hafa byrjað deildina frekar illa svo ég veit ekki hverju ég býst við hjá þeim, hvort þeir muni reyna að rótera liði sínu í þessum leik og fókusa á deildina eða reyna að nota leik gegn róteruðu liði Liverpool til að freista þess að vinna og fá smá confidence boost. Eflaust rótera þeir eitthvað og reyna að halda einhverjum lykilmönnum ferskum.

Enn einn sigur og áfram í næstu umferð, takk!

Eftir góðan sigur í Meistaradeildinni mætum við á morgun Crystal Palace undir stjórn Patrick Viera. Palace hefur síðan þeir komu upp verið undir stjórn ýmissa óspennandi breskra þjálfara, fyrir utan fimm leiki þar sem Frank De Boer fékk að spreyta sig. Það er því spennandi að sjá þá fara í aðra átt í ár þegar þeir sóttu Viera. Á sama tíma var stór hluti liðsins samningslaus og er því Viera að sjá um ákveðna endurnýjun í liði Palace manna.

Þeir misstu menn sem hafa verið stórir póstar í liðinu á borð við van Aanholt, Townsend, Cahill og Dann ásamt fyrrum Liverpool manninum Sahko en sóttu í staðinn nokkra spennandi menn eins og Marc Guechi, ungan varnarmann frá Chelsea, Joachim Andersen, sem átti gott tímabil á láni hjá Fulham í fyrra, og Odsonne Edouard, frá Celtic sem kynnti sig vel um síðustu helgi þegar hann kom inn á sem varamaður og setti tvö mörk á sex mínútum. Auk þeirra fengu þeir á láni Conor Gallagher sem er með 2 mörk og 2 stoðsendingar í fyrstu þremur leikjum sínum hjá Palace.

Palace hefur byrjað ágætlega undir stjórn Viera töpuðu fyrsta leik fyrir Chelsea en hafa síðan þá náð í sigur gegn Tottenham og tvö jafntefli. Það verður því áhugavert að sjá hvað breytt Palace lið getur gert á heilu tímabili undir nýjum þjálfara.

Okkar menn

Nú er stutt á milli leikja og sáum strax í Ac Milan leiknum að Klopp er þegar byrjaður að rótera liðinu sínu og gæti því orðið erfitt á næstu vikum að skjóta á hvernig byrjunarliðið verður. Hins vegar sjáum við líklega nálægt okkar sterkasta liði á morgun og það verður frekar hvílt í bikarnum gegn Norwich í vikunni.

Okkar fremstu menn hreinlega elska að mæta Crystal Palace og sáum við meðal annars veislu gegn þeim í jólatörninni í fyrra þegar við lögðum þá 7-0. Þar fer Sadio Mané fremstur í flokki en hann hefur skorað flest mörk Liverpool gegn Palace í sögunni með 9 mörk í 9 leikjum. Salah er ekki langt undan með 6 mörk í 7 leikjum og Firmino, sem verður því miður ekki með vegna meiðsla með 6 mörk í 12 leikjum. Vonandi getum við því séð markaveislu á morgun og lagað það að nú í byrjun tímabils hefur færanýtingin verið skelfileg.

Sett þetta upp sem líklegt byrjunarlið. Matip hefur spilað alla leiki tímabilsins hingað til og því kæmi mér ekki á óvart að hann fengi hvíld á morgun og Gomez fengi annan leik. Klopp hefur oft gefið mönnum tækifæri á að bæta sig þegar þeir hafa átt slakan leik og Gomez gerðist sekur um mistök í báðum mörkum Milan í vikunni og gæti séð hann fá tækifæri til að bæta upp fyrir það. Á miðjunni er spurning með Fabinho en tel hann líklegri til að hvíla gegn Norwich enda afskaplega mikilvægur og verið einn okkar allra besti leikmaður í byrjun tímabils. Divok Origi fékk óvænt tækifæri í síðasta leik en meiddist og sé í raun engan fá jafn óvænt sæti í byrjunarliðinu á morgun.

Spá

Ég held að Mané haldi áfram að hrella Palace. Sáum gegn Leeds að hann er farinn að koma sér aftur í færin annað en við sáum á tímabili í fyrra og nú þarf bara að fara að koma boltanum yfir línuna nokkrum sinnum og komast í gang. Held að við sjáum 3-0 sigur þar sem Salah setur eitt og Mané tvö og verðum áfram á toppi deildarinnar og vonandi að það fari að fækka liðunum sem eru jöfn okkur að stigum.

Það er komið að fyrsta leik Liverpool í Meistaradeildinni leiktíðina 2021-2022. Andstæðingurinn er hið fornfræga lið AC Milan, og þetta verður fyrsti opinberi leikur þessara liða sem ekki er úrslitaleikur Meistaradeildarinnar. Jafnframt verður þetta fyrsta skiptið sem AC Milan mæta á Anfield til að leika opinberan keppnisleik. Óopinberir leikir milli þessara liða hafa hins vegar verið aðeins fleiri, t.d. leikur frá árinu 2016 sem Liverpool vann 2-0, og svo annar frá árinu 2014 sem endaði með sömu markatölu. En það er alveg ljóst að í sögulegu samhengi er þetta merkisleikur. Jafnframt er þetta næst ríkasti leikur riðlakeppninnar af Evrópubikurum, en samtals eiga þessi lið 13 bikara, og 15 bikarar í riðlinum í heild sinni (riðill A er með 0 bikara. Takk fyrir að spyrja).

Andstæðingarnir

Lið AC Milan er á pappírnum ekki nándar nærri jafn ógnvænlegt eins og það var í maí 2005, en engu að síður er þetta geysisterkt lið og ekki hægt að bóka eitt eða neitt gegn þeim. Liðið vann fyrstu þrjá leiki sína í ítölsku deildinni þetta haustið, þar á meðal síðasta leik gegn Lucas Leiva og félögum hjá Lazio um helgina. Liðið er því í öðru sæti í deildinni á markatölu.

Í leiknum á morgun verður enginn Shevchenko, Cafú, Kaká, Crespo eða Pirlo. Það gæti hins vegar verið einn Maldini, og jújú mikið rétt, sá er einmitt sonur Paolo Maldini sem spilaði í Atatürk forðum daga. Hann er þó enginn lykilmaður, og er t.d. aðeins búinn að spila síðustu 5 mínúturnar í einum leik það sem af er leiktíð. Svo eru tvö önnur nöfn sem við könnumst ansi vel við. Zlatan vinur okkar mun ekki spila þar sem hann er að glíma við einhver meiðsl, en þess má geta að hann er einn þessara leikmanna sem hefur aldrei verið í sigurliði gegn Liverpool. Svo er annar leikmaður þarna sem oft hefur reynst okkur óþægur ljár í þúfu, en það er Olivier Giroud. Hann greindist með Covid fyrir stuttu síðan en orðið á götunni er að hann hafi verið neikvæður í síðustu mælingu og gæti því verið í hóp á morgun.

Okkar menn

Það er lítið að frétta af okkar mönnum frá leiknum um helgina. Jú, Harvey Elliott gekkst undir uppskurð í dag og það er talað um að hann gæti jafnvel snúið aftur á völlinn á þessari leiktíð. Að sjálfsögðu skiptir mestu máli að hann nái sér að fullu, og hvort hann spilar í apríl eða ágúst á næsta ári er kannski ekki að fara að skipta öllu máli. Þá hefur enn ekkert verið gefið út hvenær Firmino snúi aftur. Eins eru Minamino og Neco Williams á sjúkrabekknum, og ekki alveg ljóst hvort Milner er að fullu leikfær (ég meina hann myndi alltaf spila ef hann væri beðinn um það, þetta er meira spurning hvort læknirinn hans myndi mæla með því), þó hann hafi vissulega verið á bekk á sunnudaginn (ekki sjúkrabekk semsagt). Enginn þessara leikmanna er með skráða endurkomudagsetningu, en James Pearce talaði um það um helgina að Firmino væri a.m.k. farinn að hlaupa og æfa með bolta aftur. Það er því orðið frekar fámennt í hópi þeirra sem Klopp treystir til að spila í framlínunni, gæti þetta þýtt að Origi sjáist í leikmannahópnum annað kvöld? Undirritaður er ekki svo viss, og það er meira að segja fjarlægur möguleiki að Kaide Gordon gæti fengið tækifæri á bekknum (þó það væri vissulega mjög ólíklegt að Klopp myndi skipta honum inná, Klopp einfaldlega vill gefa ungu leikmönnunum meiri tíma en svo).

Annað sem þarf að hafa í huga er að nú er gengið í garð tímabil þar sem það eru aldrei meira en fjórir dagar á milli leikja: Milan á miðvikudaginn, Palace á laugardaginn, Norwich á þriðjudag eftir viku í Carabao (OK við gætum vel séð Kaide Gordon þar), Brentford á laugardeginum þar á eftir og svo Porto á þriðjudeginum þar á eftir. Svo kemur smá pása (þ.e. 4 heilir dagar í frí) fyrir síðasta leik fyrir næsta landsleikjahlé, en þá mæta City á Anfield. Klopp þarf því að hafa leikjaálagið næstu vikurnar í huga við val á liðinu á morgun, og svo næstu leikjum á eftir. T.d. er hæpið að Matip geti spilað mjög marga leiki í röð, og því kæmi ekki á óvart að við sæjum Joe Gomez á morgun. Virgil er ekkert endilega klár í mjög marga leiki í röð og gæti fengið pásu fljótlega, en þó tæpast á morgun. Framlínan er nokkurn vegin sjálfvalin, en aðal róteringin verður sjálfsagt á miðjunni. T.d. kæmi ekki á óvart að sjá bæði Keita og Henderson byrja á morgun. Svo er spurning hvort Robbo byrji á morgun eða hvort Tsimikas verði verðlaunaður fyrir góða frammistöðu í upphafi leiktíðar. Munum samt að Klopp er frekar íhaldssamur þegar kemur að því að stilla upp liði.

Við skulum því prófa að stilla þessu upp svona:

Ég held að Klopp verði lítið í tilraunastarfsemi og vilji stilla upp sínu allra sterkasta liði. Líkamlegt ástand leikmanna gæti auðvitað breytt þessari mynd eitthvað, kannski taka menn sénsinn á að setja Matip við hliðina á VVD enda er hann heitur á meðan Gomez hefur lítið komið við sögu.

Ég bið bara um þrennt:

a) sigur og 3 stig
b) að leikmenn komist heilir frá þessum leik
c) að Alisson haldi hreinu

Mér finnst þetta ekkert til of mikils mælst. Ég spái 2-0 sigri með mörkum frá Salah og Trent úr aukaspyrnu.