Upphitun: Arsenal á Anfield og Suðurlandsins eina von

Það verður meistaramánudagur til magnaðra marka eða mikillar mæðu er Englandsmeistararnir taka á móti samfélagsskylduræknum bikarmeisturunum frá höfuðborginni. Bítlaborgin er senan eftir tvo lélega Lundúnaleiki gegn Skyttunum á stuttum tíma sem fóru verr en vonast var eftir en heilagur Anfield er varnarvirki sem fallbyssur vinna illa á og allt er tilbúið fyrir hörkubardaga!

Mótherjinn

Arsenal er eitt af stórveldunum á Englandi hafandi orðið deildarmeistarar 13 sinnum (þriðju sigursælastir á eftir MUFC og LFC) og oftast allra bikarmeistari í 14 skipti. Liðið hefur þó strögglað við að ná viðlíka árangri utan Englands og eftir mikla gósentíð undir Wenger í byrjun árþúsundsins fjaraði undan velsældinni síðasta áratuginn en þeirra fyrrum leikmaður, Baskinn Mikel Arteta, er kominn á fullt í uppbyggingarstarfi til framtíðar.

Til að fara stöðu mála hjá Fallbyssunum frá Lundúnum þá fengum við reffilega reginskyttu frá Selfossi í spaugsamt spjall til þess að spá í spilin. Hinn mikli meistari sem um ræðir er Suðurlandsins ein von eða enginn annar en Arilíus Marteinsson. Gefum orðið yfir í upphitunar-gullkast með gulldrengnum gráhærða og glæsilega:

MP3: Þáttur 303b

Arsenalíus Marteinsson skellti sér að spjalli loknu í þjálfarastólinn og spáir því að gestirnir muni stilla sínu liði upp á eftirfarandi hátt:

Liverpool

Rauði herinn hefur byrjað tímabil titilárásarinnar með fullu húsi stiga og eftir kamakazi-knattspyrnu í sigri gegn Leeds kom yfirburðarframmistaða á Brúnni gegn meintum meistaraefnum bláliða. Innkomur Thiago og Jota í föstudagsfíling síðustu viku hefur aukið bjartsýni í okkar herbúðum og voru akkúrat þær innkaupafréttir sem áhangendur vonuðust eftir. Hellisbúaþrenningin fór yfir þetta og margt fleira í glæstu Gullkasti gærdagsins.

Enn mætti þó skoða styrkingar fyrir miðri vörninni eftir að Lovren var seldur fyrr í sumar og meiðslatíðni Matip og Gomez er í meira lagi þannig að erfitt er að treysta á að þeir séu heilir í flesta leiki vetrarins. Þar fyrir aftan eru einu hreinræktuð hafsentarnir hinir ungu Billy “the Kid” Koumetio og Sepp van den Berg en hvorugur er tilbúinn í reglulegan EPL-fótbolta ennþá. Fabinho leysti varnarvandamálið frábærlega í síðasta leik en sú redding er á kostnað varnarsinnaðs miðjuhlutverks þar sem hann er mikilvægur og grjótharður boltaspilandi brimbrjótur. Vænlegast til vinnings væri því að styrkja vörnina áður en kaupglugganum lokar í næsta mánuði. Af öllum fregnum að dæma ætti þó Gomez að vera orðinn heill heilsu og spila við hlið VVD á mánudaginn.

Þá má spá því að Thiago komi inn í byrjunarliðið eftir magnaða spilamennsku í seinni hálfleiknum á Brúnni og mín uppstilling á liðinu er eftirfarandi:

Blaðamannafundur

Jürgen Klopp var í föstudagsfíling með fréttamönnum og svaraði spurningum á mis opinskáan hátt:

Arteta hafði einnig ýmislegt um uppkomandi leik að segja og hér er hans blaðamannafundur:

Tölfræðin

Liðin hafa mæst 28 sinnum á Anfield í Úrvalsdeildinni og hefur Liverpool unnið 14 þeirra með slétt 50% vinningshlutfall og er það í takt við hlutfallið aftur í aldir sem er ögn hærra með 54%. Arsenal hefur unnið 6 Úrvalsdeildarleiki á Anfield með 21,4% vinning sem er ögn lægra en allir leikir liðanna á Anfield frá upphafi þar sem þeir hafa 25,2% vinningshlutfall.

Mörk að meðaltali eru 2,2 fyrir heimamenn gegn 1,1 hjá Skyttunum og bara eitt 0-0 jafntefli verið milli liðanna á okkar velli í Úrvalsdeildinni. Síðustu ár hefur verið nóg af mörkum í viðureignunum og Liverpool hafa skorað 20 mörk í síðustu 7 leikjum með bara 9 mörk fengin á sig. Enda hefur LFC uppskorið góða sigra og verið með gott tak á Arsenal upp á síðkastið en síðasta tapið fyrir þeim á Anfield kom árið 2012.

Í fréttum er þetta helst

• Liverpool u23 ára mætti Man U u23 í miklum markaleik á föstudagskvöldinu þar sem ungstirnið Leighton Clarkson átti eftirminnilegt kvöld fyrir margar sakir.
• Hinn ungi og efnilegi James Balagizi skrifaði undir sinn fyrsta atvinnumannsamning og er vert að fylgjast vel með honum í framtíðinni.
• Verðlaun Liverpool fyrir að sigra Lincoln 2-7 í deildarbikarnum í miðri viku er heimaleikur gegn Arsenal þann 1.október nk.
• Framtíð Rhyan Brewster en ennþá óljós og hugsanlegt lán eða sala til Sheffield United er enn möguleiki.

Tilvitnunin

“A healthy economy only exists if you try to help the ones who need it most. It has to be a common approach. Life is a team sport.” – Pepijn Lijnders fyrr í vikunni um fjárhagslega stuðning við neðrideildarlið og almenna lífsspeki.

“In general people in a better position should help people in a less good position, 100%.” – Jürgen Klopp tók undir orð Pep með þessum orðum á blaðamannafundi gærdagsins.

Spakra manna spádómur

Spámennska þessarar upphitunar kom skýrt fram í sportspjallinu við Suðurlandsins einu von en fallbyssumeistarinn frækni spáði 1-2 útisigri sinna manna með mörkum frá Firmino fyrir LFC og jöfnunarmarki Aubameyang og rándýrt skyndsóknarmark Pepe í lokin. Við Púlarar bindum okkar Norður-Englands einu von við það að Arilíus sé ekki jafn sparkviss í spámennskunni og hann hefur verið með sínum 69 meistaraflokksmörkum á ferlinum.

Greinarhöfundur gerir sitt skásta til að skáka Stokkseyrar-goðsögninni með sínum eigin spádóm og mitt spaklega sparkgisk er 3-1 heimasigur þar sem að Salah, Mané og VVD sjá um markaskorun heimamanna ásamt sárabótarmarki frá Aubameyang. Þá er einnig spástuðull um að KR-ingurinn Rúnar Alex spili sinn fyrsta leik en það myndi krefjast dramatíkur í markmannamálum gestanna.

Í lokin er við hæfi að spila sunnlenskt og vongott upphitunarlag við hæfi og veðurguðinn gefur vonandi góða veðurspá með vænum meðvind fyrir fótboltaveisluna á mánudagskvöldið.

YNWA