Search

Menu
Search

Latest stories

  • Gullkastið – Húkkaraballið byrjað í boltanum

    11 Comments

    Æfingatímabilið er farið að stað og spurning hvort við lærðum eitthvað í fyrstu tveimur æfingaleikjunum? Coutinho hefur verið fyrirferðarmikill í slúðrinu í vikunni, er líklegt að Liverpool kaupi hann og viljum við hann yfirhöfuð? Hvað eru hin liðin að gera í sumar og hvaða væntingar geta þau haft til næsta tímabils? Veltum þessum spurningum og fleiri fyrir okkur í framlengdum Gullkastþætti.

    Stjórnandi: Einar Matthías
    Viðmælendur: SSteinn og Maggi

    MP3: Þáttur 245

    [...]

  • Gluggaspurningar & svör

    14 Comments

    Þann 8. ágúst kl.17:00 að staðartíma þá verður söluglugganum í ensku úrvalsdeildinni lokað og í dag eru eingöngu 3 vikur þangað til að bjallan gellur. Enn sem komið er LFC í blússandi hagnað í sumar eftir að hafa formlega selt Danny Ings (20 mill) og Rafael Camacho (5 mill + 2 í klásúlum) en eingöngu lagt út tæpar 2 mill fyrir hinn 17 ára Sepp van den Berg. Að auki lauk samningum Sturridge og Moreno sem báðir halda á ný mið. Nokkrir lánssamningar hafa verið kláraðir fyrir Sheyi Ojo (Rangers), Marko Grujic (Hertha Berlin) og Kamil Grabara (Huddersfield Town) en fátt annað markvert gerst.

    Það hefur því lítið verið um kaup og sölur en að sama skapi hefur ríkt ró og friður um okkar lykilmenn sem allir verða áfram á Anfield og langflestir á langtímasamningum (undanteknir eru Milner & Matip til 2020 og Wijnaldum, Lovren og Mignolet til 2021). Það skal ekki vanmetið og með þá öflugu liðsheild sem fyrir er þá hafa margir velt fyrir hvort nokkuð verði aðhafst að ráði en aðrir vilja nýta sögulegt tækifæri til að styrkja liðið til enn frekari dáða.

    Þessi rólegheit hjá Evrópumeisturunum og 97 stiga leikmannahópnum leiðir óneitanlega til þess að stuðningsmenn spyrja sig ýmissa spurninga um framvindu næstu þriggja vikna. Við þeim má veita (mis)gáfuleg svör eða jafnvel spyrja stuðningsmennina sjálfa skoðunar. Vindum okkur í spurningaflóðið:

    Verður Nathaniel Clyne seldur?

    Enski landsliðsmaðurinn Clyne hefur verið afar óheppinn með meiðsli síðustu ár og framgangur efnilegasta hægri bakvarðar í heimi, Trent Alexander-Arnold, ásamt fjölhæfni Gomez hefur gert hann næsta óþarfan hjá LFC. Í æfingaleikjunum í sumar hefur hann þó virkaði í fínu formi með glæsimarki gegn Tranmere Rovers í nærskeytin. Hann á eingöngu 1 ár eftir af sínum samningi og hefur verið sterklega orðaður við Crystal Palace sem seldu Wan Bissaka á fúlgu fjár til Old Trafford. Hægri bakvarðastaðan þar er því laus og Michael Edwards ætti að geta kreist út vænt seðlabúnt fyrir hann ef af sölu yrði. Hvort Clyne dreymir um að komast í enska landsliðshópinn fyrir EM 2020 skal ósagt látið en það væri vissulega lúxus fyrir Liverpool að eiga hann sem back-up fyrir báðar bakvarðastöðurnar næsta vetur.

    Líkur á sölu = 70%

    Á að selja Nathaniel Clyne?

    Skoða niðurstöður.

    Loading ... Loading ...

    Kaupum við vinstri bakvörð?

    Moreno er farinn til Villareal og örfættir bakverðir í góðum gæðaflokki sem eru tilbúnir í bekkjarsetu eru vandfundnir. Vissulega geta margir réttfættir á okkar bókum leyst stöðuna en einbeitum okkur að vinstri fætinum að sinni. LFC voru mikið orðaðir á vordögum við enska U20 landsliðsmanninn Lloyd Kelly sem er mikið efni en 13 mill kaup Bournemouth á honum tók hann af innkaupalistanum okkar.

    Ryan Sessegnon hefur í mörg ár verið linkaður við LFC og býður upp á fjölbreytni upp allan vinstri vænginn ásamt PL-reynslu. Hann á eingöngu 1 ár eftir af sínum samningi og Fulham fallnir um deild sem þrýstir á sölu, en margir eru líklegir um hituna í kaupum á honum. Svo er hinn valkosturinn að gefa ungliðunum Adam Lewis eða Yasser Larouci sénsinn en báðir hafa verið sprækir sóknarlega í æfingaleikjum en vafasamir varnarlega.

    Líkur á kaupum á örfættum vinstri bakverði = 30%

    Á að kaupa örfættan vinstri bakvörð?

    Skoða niðurstöður.

    Loading ... Loading ...

    Fara Dejan Lovren og Mignolet í glugganum?

    Báðir leikmenn eiga 2 ár eftir af sínum samningi og eru orðnir ansi fastir á varamannabekknum eða sjúkrabeddanum. Yfir þrítugt og með háa launapakka en með mikla reynslu og óumdeilanleg gæði sem gætu reynst gríðarlega verðmæt ef að eitthvað óheppilega óvænt kemur upp á. AC Milan hafa sterklega verið orðaðir við Lovren fyrir 25 mill og orðrómurinn hitnaði í dag með slúðri um að umboðsmaðurinn hans hefði fundað aftur með AC Milan.

    Mignolet hefur einnig verið orðaður við Crystal Palace og Bournemouth en á endanum gæti þetta snúist um vilja leikmannanna og svo tímasetningu á sölu í samhengi við að Liverpool kaupi aðra inn í staðinn. Þó að Klopp segi þessa dagana að hvorugur fari þá er hann þekktur fyrir að virða ákvörðun leikmanna í þessari stöðu. Við gerum klárlega ráð fyrir að Edwards myndi vera grjótharður á topp verði fyrir báða ef til þess kæmi og skotmark væri í sigtinu til að fylla í skarðið. En hverjir kæmu þá inn í staðinn og í því samhengi væru allar hugmyndir velkomnar.

    Líkur á sölu á báðum = 55%

    Á að selja Lovren og Mignolet?

    Skoða niðurstöður.

    Loading ... Loading ...

    Kaupum við framherja?

    Vangaveltur með hágæða framherja hafa verið miklar í sumar eftir að Sturridge fór og Origi skrifaði undir nýjan samning. Hinn ofur-efnilegi Rhian Brewster hefur látið ljós sitt skína í æfingaleikjum með þremur mörkum og almennt flottum frammistöðum. Bobby Duncan setti einnig eitt mark en hann er ólíklegur til að koma mikið til greina í vetur nema í fyrstu umferðum bikarsins. Þá hafa Ryan Kent og Harry Wilson sýnt góða takta sem vængframherjar en þó hafa báðir einnig verið orðaðir til láns eða jafnvel sölu.

    Þeir framherjar sem helst hafa verið nefndir í innkaupum eru Nicolas Pépé hjá Lille sem raðaði inn mörkum í Ligue 1 og fyrr á árinu var Timo Werner mikið nefndur en hann á bara 1 ár eftir af sínum samningi. Lítil skjálftavirkni hefur verið varðandi stórkaup á sóknarmanni síðustu daga en hver veit hvað Klopp og Edwards eru að hugsa og getur Liverpool leyft sér að treysta á Origi og unglingana fyrir sóknarbreidd yfir heilan vetur.

    Líkur á kaupum á hágæða framherja = 40%

    Eigum við að kaupa hágæða framherja?

    Skoða niðurstöður.

    Loading ... Loading ...

    Krossaspurningaprófinu er lokið í bili en endilega spáið og spökúlerið í þessum spurningum og fleirum á kommentakerfinu.

    YNWA

    [...]

  • Coutinho?

    19 Comments

    Byrjum bara á einfaldri könnun

    Myndir þú vilja Coutinho aftur til Liverpool?

    Loading ... Loading ...

    Það er mögulega til marks um hversu lítið er að frétta af leikmannamarkaðnum tengt Liverpool en Coutinho orðrómar hafa fengið smá bensín eftir að Kia Joorabchian umboðsmaður Coutinho fór í viðtal og talaði nokkuð frjálslega. Hann taldi á sama tíma 60/40 líkur á að hann yrði áfram hjá Barcelona og hafði ekki heyrt annað frá félaginu en að hann væri stór partur af þeirra plönum.

    Það stenst samt tæplega skoðun enda hefur hann átt gríðarlega erfitt uppdráttar á Spáni og félagið hefur í sumar síður en svo staðið í stað. De Jong tekur sitt pláss á miðjunni og Girezmann fer beint í byrjunarliðið frammi. Messi og Suarez eru ennþá á sínum stað og Coutinho er einnig að keppa við Malcom og Dembele um stöðu. Þar að auki er Barcelona orðað við Neymar á nýjan leik og þarf líklega að selja á móti.

    Það er satt að segja ekkert sem bendir til þess að Liverpool vilji Coutinho aftur og hvað þá losa Barcelona úr einhverri fjárhagslegri klípu tengdum kaupum á leikmanni sem ekki gengu upp. Því síður efast ég um að það sé áhugi á launapakka Coutinho hjá Barcelona. Slúðrið segir að Barcelona skuldi Liverpool ennþá um 88m fyrir Coutinho og jafnvel er talað um að þeir taki hann á tveggja ára lánssamningi með 88m klásúlu að þeim tíma liðnum. Þetta er ekkert útilokað og Kia gefur þessu smá undir fótinn með því að segja að Coutinho sé með svo sterk tengsl við Liverpool að það yrði erfitt fyrir hann að fara til annars liðs á Englandi.

    Það fór minna fyrir því þegar hann gerði sér í tvígang upp bakmeiðsli og neitaði að spila leiki fyrir Liverpool til að komast til Spánar. Hann var svo ólmur í að komast frá Liverpool að hann heimtaði að fara á miðju tímabili. Þannig að ég tæki ekki mark á neinu sem hann segir og síður en svo því sem umboðsmaðurinn segir.

    Niðurstaða. Ég hef enga trú á því að Coutinho verði leikmaður Liverpool þegar glugganum lokar í ágúst en það kæmi ekkert rosalega á óvart að Barcelona vilji losna við þessa skuld og eins er ekkert svo fjarstæðukennt að hann vilji losna frá Barcelona eftir undanfarna 18 mánuði.

    Persónulega tæki ég honum alveg aftur ef Klopp vill bæta honum við hópinn, hann var heimsklassa leikmaður hjá Klopp og Liverpool má alveg við því að bæta svona gæðum við hópinn. Mest væri ég samt til í Coutinho tegund af leikmanni í svipuðum gæðaflokki sem er ekkert endilega Coutinho.

    Klopp/Dortmund hefur áður misst sína bestu leikmann sem komu aftur nokkrum árum síðar. Sahin og Kagawa komu aftur með skottið milli lappana eftir að hafa farið frá Dortmund. Götze og núna Hummels hafa einnig skilað sér aftur til Dortmund þar sem þeir áttu frábær ár.

    Hvort að Coutinho fengi eitthvað meiri spilatíma hjá Liverpool en hann fær hjá Barcelona er svo önnur umræða…

    Embed from Getty Images

    [...]

  • Byrjunarliðið gegn Bradford City

    7 Comments

    Æfingaleikur nr.2 þetta sumarið fer senn að hefjast og að þessu sinni er það gegn Bradford City á Valley Parade í Vestur-Jórvíkurskíri. Líkt og í síðasta leik þá spilar hver leikmaður 45 mínútur og öllum skipt út í hálfleik (nema einum).

    (more…)

    [...]

  • Vinnan bakvið tjöldin

    18 Comments

    New England Sports Group, seinna betur þekktir sem Fenway Sports Group eða FSG, tóku yfir rekstur Liverpool þann sjötta október 2010. Þá skuldaði liðið 218 milljónir punda og rekstrarárið 2010-11 var tap félagsins um fimmtíu milljónir punda. Sem dæmi um sturlun fyrri eiganda þá eyddu þeir fimmtíu milljón punda í þróun á nýjum velli sem varð aldrei meira en nokkrar flottar tölvumyndir. Liðið var nýbúið að falla úr deildarbikarnum gegn fjórðu deildarliði Northampton, það var ugla í þjálfarasætinu og allt logaði í innra átökum. Níu árum seinna, ekki einni grunnskólagöngu síðar er liðið búið að fara í þrjá úrslitaleiki í Evrópu og eru núverandi Evrópumeistarar.

    Myndaniðurstaða fyrir stanley park stadium
    Þetta kostaði 50 milljón punda.

    (more…)

    [...]

  • Tranmere Rovers 0-6 Liverpool

    4 Comments

    Mörkin

    0-1   Nathaniel Clyne 6.mín
    0-2   Rhian Brewster 38.mín
    0-3   Rhian Brewster 45.mín
    0-4   Curtis Jones 53.mín
    0-5   Divock Origi 60.mín
    0-6   Bobby Duncan 67.mín

    Leikurinn

    Byrjunarlið fyrri hálfleiks: Mignolet, Clyne, Phillips, Gomez, Larouci, Milner, Oxlade-Chamberlain, Lallana, Kent, Wilson, Brewster.

    Upphaf leiksins var eins og búast mátti við fyrirfram með Liverpool mikið að halda boltanum og Tranmere að liggja aftur. Fyrsta markið var ekki lengi að koma og kom úr óvæntri átt. Á 6. mínútu keyrði Gomez úr vörninni með boltann og nálægt vítateignum fann hann Brewster sem sendi á Clyne í teignum. Nathaniel var ekkert að tvínóna við þetta og kanónaði boltann í skeytin nær með þrumufleig. Glæsilegt mark og góð byrjun.

    Stuttu síðar gerði Gomez mistök sem leiddu til ágætis færis hjá Tranmere en Joe bætti fyrir eigin klúður með því að blokka markskotið af stuttu færi í teignum. Frábær sprettur hjá unga bakverðinum Larouci á 10.mín. er hann keyrði inn frá vængnum, átti nett samspil við Lallana og var kominn einn á móti markmanni en sá örfætti treysti sér ekki í hægri fótarskot og endaði með slöku skoti beint á markmanninn.

    Leikurinn var líflegur og Harry Wilson keyrði upp völlinn, sendi á Kent sem fékk byltu frá varnarmanninum en Mike Dean dómari sem er grjótharður Tranmere stuðningsmaður var ekki á þeim skónum að gefa víti. Aftur komst Larouci í ágætt færi á 19. mín. og í þetta sinn lét hann vaða með vinstri fæti og markmaðurinn gerði vel að verja fyrnafast lágt skot. Tveimur mínútum síðar átti hættulegasti leikmaður Tranmere, Blackett-Taylor, gott skot fyrir utan teig sem Mignolet þurfti að hafa fyrir að verja.

    Að sléttum hálftíma liðnum tóku LFC aukaspyrnu snöggt og Ryan Kent keyrði inn í teiginn en ágætt skot hans fór naumlega yfir slánna. Gott færi. Á 38.mín. slapp Milner upp vinstra megin og krossaði lágan bolta þvert yfir teiginn sem fann en á engan þar. Harry Wilson var hins vegar á hinum vængnum og sendi boltann strax aftur fyrir og þar kom Brewster og skallaði boltann í netið. Vel gert Rhian að vera vel vakandi fyrir seinni fyrirgjöfinni.

    Liverpool sýndi þolinmæði og héldu boltanum vel þegar nálgaðist hálfleik en sóttu allt í einu rétt undir lokin. Kent sendi á Milner sem átti ágætt skot fyrir utan teig en markvörðurinn varði til hliðar. Brewster mætti leiftursnöggur í frákastið eins og góðum framherja sæmir og kláraði vel í netið.

    0-3 í hálfleik

    Byrjunarlið seinni hálfleiks: Jaros, Hoever, Matip, Johnston, Lewis, Fabinho, Jones, Woodburn, Duncan, Glatzel, Origi.

    Eins og vitað var fyrirfram þá skipti Klopp öllu liðinu útaf þannig að nýtt og fersk byrjunarlið hóf seinni hálfleikinn. Tranmere skipti við sama tækifæri Darren Potter inná en hann er uppalinn í akademíu LFC og spilaði samtals 17 leiki fyrir aðalliðið á árunum 2004-2006 undir stjórn Rafa Benitez. Okkar menn héldu áfram að stýra leiknum og á 53.mín. gerði Origi vel að vinna sér stöðu hægra megin við vítateiginn. Sendi boltann á Paul Glatzel sem átti flotta fyrirgjöf á fjærstöngina þar sem Curtis Jones kom aðvífandi og slúttaði vel í netið.

    Á 56. mín þá keyrði Blacken-Taylor enn og aftur á vörn LFC. Ungliðinn George Johnston braut á honum og víti hefði átt að vera niðurstaðan en af undarlegri ástæðu sleppti Mike Dean tækifærinu til að styðja sitt uppáhalds lið. Stuttu síðar keyrði LFC upp og hættuleg sókn endaði með skoti en Tranmere gerðu gagnárás beint í kjölfarið sem endaði með vörðu skoti hinu megin. Líf og fjör í leiknum.

    Á 60. mínútu átti Matip frábæra sendingu inn fyrir vörnina á Divock Origi. Fyrirliðinn átt magnaða móttöku, fór framhjá markverðinum og sendi boltann auðveldlega í netið. Glæsilegt mark og frábærir tveir dagar hjá meistara Divock staðfestir með undirskrift og flottu marki. Mörkin orðin fimm talsins og sléttur klukkutími liðinn.

    Hoever keyrði upp hægri vænginn á 67.mín. og valsaði inn í vítateiginn, lagði á Glatzel en boltinn barst þaðan til Bobby Duncan sem skoraði ekta markahróksmark af stuttu færi. Tranmere héldu að þeir hefðu náð að kvitta smá fyrir sig á 70.mínútu þegar Walker-Rice komst inn fyrir og kláraði vel af stuttu færi en markið var veifað réttilega af vegna rangstöðu.

    Því miður þurfti Glatzel að fara af velli stuttu síðar vegna meiðsla á hné sem vonandi eru ekki alvarleg. Inná í hans stað kom vara-varamarkvörðurinn Daniel Atherton og spilaði hann í framlínunni það sem eftir lifði leiks og var býsna sprækur í þeirri stöðu. Atherton tókst þó ekki að skora og aðrir leikmenn Liverpool létu líka þar við sitja og hlífðu Tranmere við meiri niðurlægingu.

    0-6 fyrir Liverpool lokatölur leiksins

    Tölfræðin

    Bestu leikmenn Liverpool

    Í fyrri hálfleik var Rhian Brewster augljósa ansi sprækur með 2 mörk og stoðsendingu til viðbótar og er hann minn maður leiksins. Larouci var líflegur í vinstri bakverði og hefði geta skorað mark til að toppa frammistöðuna. Milner og Gomez voru fagmannlegir og lögðu báðir sitt af mörkum með marktæku framlagi. Þá fannst mér Kent og Wilson líka vera fínir og skapandi á vængjunum.

    Í seinni hálfleik var Hoever mjög flottur í hægri bakverði og Matip og Origi sýndu sín gæði með yfirveguðum leik. Adam Lewis virkaði líka fínn í vinstri bakverðinum og verður áhugavert að sjá hann í þessari stöðu í fleiri æfingarleikjum. Curtis Jones var líka sprækur og undirstrikaði það með góðu marki.

    Heilt yfir skiluðu nokkurn veginn allir sínu en það var helst að George Johnston leit út fyrir að eiga ekki heima þarna í hafsentinum og líklegt að Sepp van den Berg taki hans stöðu í næsta leik ef FIFA heimildin verður komin tímanlega.

    Næsti leikur er á sunnudaginn kemur gegn Bradford City á Valley Parade.

    YNWA

    [...]

  • Byrjunarliðið gegn Tranmere Rovers

    4 Comments

    Fyrsti æfingaleikur sumarsins er rétt að fara að hefjast og Evrópumeistararnir að stíga fyrstu skref tímabilsins 2019-2020. Eins og venjulega þá fá margir af yngri leikmönnum og minni spámönnum tækifæri til að láta ljós sitt skína á þessum tíma árs og þess ber glöggt merki á liðsuppstillingunni sem verið var að birta rétt áðan. Öllu liðinu verður skipt út í hálfleik og nýtt inn þannig að allir fá 45 mínútur í dag.

    Liðsuppstilling fyrri hálfleiks er eftirfarandi:

    Mignolet, Clyne, Phillips, Gomez, Larouci, Milner, Oxlade-Chamberlain, Lallana, Kent, Wilson, Brewster.

    Liðið í seinni hálfleik verður svohljóðandi:

    Jaros, Hoever, Matip, Johnston, Lewis, Fabinho, Jones, Woodburn, Duncan, Glatzel, Origi.

    Simon Mignolet mætti til æfinga fyrst í dag þannig að hann fer beint á milli stanganna á fyrsta degi. Clyne fær leik til að sýna sig í söluglugganum en allar líkur eru á því að hann yfirgefi LFC í sumar og hefur Crystal Palace helst verið orðað við hann eftir að Wan-Bissaka var seldur. Hinn ungi alsírski Yasser Larouci byrjar í vinstri bakverði og verður áhugavert að sjá hvernig hann spjarar sig þar en þeir sem vilja vita meira um piltinn geta lesið stórfína grein Jack Lusby um hann.

    Miðjan er stútfull af enskum landsliðsmönnum í nútíð og þátíð en í framlínunni þá spilar besti ungi leikmaður skosku deildarinnar að spreyta sig með Wales-verjanum Harry Wilson og ungstirninu Brewster. Spennandi uppstilling.

    Liðið yngist ögn meira í seinni hálfleik en þar verður Vítezslav Jaros í markinu en hann var víst keyptur til okkar fyrir 2 árum og er eingöngu 17 ár að aldri. Jafnaldri hans Ki Jana Hoever spilar í hægri bakverði en hann kom eftirminnilega inn á í leik gegn Wolves í FA Cup í vetur. Hoever varð Evrópumeistari með Hollandi U-17 ára og spilaði þá í þeirri stöðu en hann er jafnfær um að spila hafsent. Adam Lewis þykir ansi efnilegur vinstri bakvörður og fær tækifæri til að sannfæra Klopp um að hann geti verið varamaður fyrir Andy Robertson í vetur og að það þurfi ekki að kaup neinn þar inn.

    Woodburn er kominn aftur eftir nokkra misheppnaða lánsdíla og vonandi nær hann sér aftur á strik eftir að hafa ungur fengið sénsa með aðalliðinu. Besti súper-sub í heimi leiðir svo línuna eftir að vera nýbúinn að skrifa undir nýjan samning í gær og með honum eru ungu uppöldu Englendingarnir Bobby Duncan og Paul Glatzel sem röðuðu inn mörkunum með U18 liði LFC í vetur.

    Mótherjinn í dag eru góðir grannar okkar í Liverpool-borg en Tranmere Rovers eru þriðja besta lið borgarinnar á eftir LFC og varaliðið LFC. Það hefur ávallt verið góður andi milli liðanna og margir leikmenn sem hafa komið upp úr akademíu okkar en ekki meikað það í rauðu treyjunni hafa farið yfir Mersey-ánna til að spreyta sig hjá Tranmere. Frægt er þegar John Aldridge var spilandi stjóri þeirra og undirritaður var einmitt á vellinum fyrir rúmum tveimur áratugum til að sjá Aldo skipta sjálfum sér inná. Leikurinn er spilaður á heimavelli Tranmere sem heitir Prenton Park en heimamönnum tókst að komast upp um deild í umspilsleik á vordögum.

    Byrjunarlið Tranmere Rovers er svona:

     

    Leikurinn er sýndur á LFCTV-sjónvarpsstöðinni og vonandi ná sem flestir að horfa á hann hvar sem þeir eru staddir í sínum sumarfríum.

    Come on you REDS! Allez! Allez! Allez!

    YNWA!

    Við minnum á #kopis á Twitter og umræðuna í athugasemdum hér að neðan.


    [...]

  • Evrópumeistarinn Divock Origi skrifar undir nýjan samning!

    4 Comments

    Fyrir fimm árum kom Divock Origi til Liverpool, þá nítján ára. Árin hafa verið stormasöm en eftir ómetanlegt framlag hans í vetur er klúbburinn búin að verðlauna hann með nýjum langtímasamning. Það er ekki komið slúður um hversu langur samningurinn er, líklegast er samningurinn til fjögur til fimm ár, eða þangað til hann er 28 eða 29 ára.

    Væntanlega þýðir þetta að það verður ekki nýr sóknarmaður keyptur í liðið í sumar og að Belginn er óumdeildur fjórði maður í sóknina í vetur. Miðað við hvað hann lagði á sig til að koma sér inn í plön Klopp veðja ég ekki á móti því að hann vinni sig ofar í goggunarröðina á næstu tímabilum.

    Origi hefur nú þegar skorað 28 mörk í 98 leikjum með Liverpool. Það er almennt talið að sóknarmenn toppi um 27 ára aldur. Bestu ár hans eru framundan og þau verða hjá Liverpool!

    [...]

  • Staðfest leikmannasýsl & annað áhugavert

    24 Comments

    Liverpool FC eru Evrópumeistarar 2019

    Evrópumeistarar alheimsins hafa haldið sinni stóísku ró í innkaupaglugga sumarsins en ýmis minniháttar leikmannamál hafa átt sér stað á síðastliðinni viku sem vert er að minnast á.

    Fyrst ber að nefna Rafael Camacho sem var seldur til Sporting Lissabon fyrir viku síðan en sú brottför hafði legið í loftinu frá því fyrr í vetur samkvæmt fregnum. Eitthvað var pilturinn ósáttur við sitt hlutskipti hjá LFC og þrátt fyrir að hafa staðið sig vel í þeim tækifærum sem honum bauðst að þá kaus hann að þrýsta á sölu í sumar. Vitandi að einungis eitt ár var eftir af samningi Rafael þá gerði Michael Edwards vel í að fá 5 milljónir punda í reiðufé á borðið ásamt 2 milljóna upphækkunum og framtíðarklásúlum sem gagnast gætu félaginu ef rætist úr stráknum.

    Fingrar hafa verið fettir út í upphæðina en hún er líklega vel sanngjörn hafandi séð João Carlos Teixeira samlanda Camacho vera öflugan hjá varaliði LFC en aldrei náð að stíga almennilega upp í aðalliðið þrátt fyrir lánssamninga og að snúa aftur til heimalandsins. Teixeira hafði spilaði fjórum sinni fleiri leiki fyrir meistaraflokk Liverpool en Camacho áður en hann kvaddi klúbbinn og í dag er hann hjá Vitória Guimarães SC og metinn á litla 1 milljón evra. Knattspyrnuheimurinn er grjótharður bransi og það verða ekki allir ofurstjörnur þótt þeir séu efnilegir á yngri árum.

    Talandi um brottfarir ungliða þá lét hinn tvítugi Bobby Adekanye sig hverfa á braut að samning útrunnum og hélt suður til Rómaborgar í ljósbláan faðm Lazio en við fengum litlar 240 þús.pund í sárabætur. Liverpool hafði boðið honum nýjan samning fyrir stuttu til að verja hagsmuni sína og munu halda þeirri baráttu áfram með því að kæra Lazio til FIFA fyrir að brjóta reglur um samskipti við samningsbundin ungstirni. Í sjálfu sér var ólíklegt að Adekanye myndi nokkurn tímann spila fyrir LFC þó að vissulega hafi hann verið efnilegur er hann kom frá Barcelona á sínum tíma og tapið því ekki mikið. En að sama skapi er það sjálfsagt mál að senda öðrum liðum þau skilaboð að þeim sé ekki frjálst að stela okkar yngri leikmönnum án þess að við verjumst hraustlega og heimtum sanngjarnt kaupverð og krassandi klásúlur. Prinsippmál.

    Stýrivaxtalækkun Seðlabankans í síðustu viku hefur hleypt miklu lífi í lánveitingar og Liverpool voru engir eftirbátar í endurfjármögnun og hafa endurlánað Marko Grujic til Herthu Berlin fyrir næsta tímabil. Að launum hljótum við 2 milljónir punda í eingreiðslu ásamt hugsanlegum 500 þús. punda í bónusa en Berlínarliðið borgar einnig launakostnað á meðan á láni stendur. Vonandi heldur Marko áfram að setja mark sitt á Bundesliguna og koma enn öflugri til baka síðar meir.

    Þá höfum við framlengt samning við hinn uppalda 17 ára leikmann Leighton Clarkson en miðjumaðurinn er sérlega góður í föstum leikatriðum og vanmetinn gimsteinn að margra mati. Vert að fylgjast vel með honum ásamt Bobby Duncan, Paul Glatzel og hinum bikarmeisturunum í Liverpool undir 18 ára á næsta tímabili.

    Um miðja þessa viku kom mikill kraftur í áhugaverðan orðróm um að Liverpool væri að fá til sín hinn 16 ára Harvey Elliott frá Fulham en hann er að klára sinn samning og vill leita á önnur mið. Elliott þessi hefur á stuttum ferli helst unnið sér það til frægðar að vera yngsti leikmaður til að spila í úrvalsdeildinni en hann gerði það núna í vor hjá fallistum Fulham. Af gömlum Twitter-aðgangi stráksa að dæma þá er ljóst að hann er vel uppalinn sem Púlari frá barnæsku og væri því að uppfylla sinn æskudraum um að spila fyrir Rauða herinn. Hann er örfættur sókndjarfur vængmaður sem skoraði 5 mörk og lagði upp 4 til viðbótar í 18 leikjum í deildarkeppni undir 18 ára í vetur og spennandi væri að sjá hann í okkar röðum.

    Einnig láku myndir á alnetið af hugsanlegum seinni varabúning næsta vetrar og er hann í ágætari kantinum að mati pistlahöfundar. Meistari Bobby Firmino sem er að brillera með Brössum í Brasilíu í Copa America tekur sig í það minnsta vel út í honum.

    Af slúðri er fátt að frétta en Lovren hefur verið linkaður við nýdæmda AC Milan en Klopp ku vilja halda Króatanum kröftuga fyrir næsta tímabil. Það er helst ef að Lovren sjálfur færi fram á sölu sem að eitthvað myndi gerast í þeim málum en það þykir harla ólíklegt að svo stöddu. Í vikunni voru Liverpool líka linkaðir við tvo óskandinavíska Dani en þeir eru reyndar Spánverjar og heita Dani Ceballos og Dani Olmo. Ekki veit ég hvort þeir séu neitt líklegri en næsti maður til að vera keyptur til Liverpool í sumar en það má stytta sér stundir í gúrkutíðinni við það að spá í spænsk spil sem þessi.

    Til að bæta í slúðrið þá var markmannssamloka frá Southampton orðuð við okkur ef ske kynni að Mignolet vildi finna nýtt lið og okkur myndi vanta nýjan varamarkmann. Báðir Forster og McCarthy eru alveg raunhæfir valkostir á bekkinn með úrvalsdeildarreynslu og á fínum aldri. Ef Forster gæti nálgast sitt fyrra form þá væri þetta fundið fé en McCarthy hefur oft verið tengdur við okkur og staðið sig ágætlega á suðurströndinni. Svo væri nú ekki slæmt að bæta í safnið af Saints-mönnum fyrir spurningasmiði framtíðarinnar í pub quiz og víðar.

    Að lokum þá var verið að birta lista af þeim leikmönnum sem hefja æfingar á Melwood á morgun en fyrsti æfingaleikurinn er næstkomandi fimmtudag gegn grönnum sínum í Tranmere Rovers. Hinn nýkeypti Sepp er í hópnum en einnig vekur athygli nafnið Arroyo á listanum en þar er um að ræða 19 ára kólumbískan vinstri bakvörð sem kom á bækur félagsins í febrúar 2018. Hann fór strax á láni til varaliðs Mallorca og í Gent fyrir síðastliðið tímabil í þeim tilgangi að vinna í vinnuleyfismálum en hann hefur spilað 16 sinnum fyrir yngri landsliði Kólumbíu. Hugsanlegt er að Klopp vilji skoða gæðin í honum persónulega og þá máta hann sem varaskeifu fyrir Robertson en öll slík plön velta á hinu opinbera í Bretlandi. Hér má sjá kröftuga spretti hjá Arroyo en þó er ofsagt í titli myndbandsins að þeir séu fantastíkir:

    Að öðru leyti þá er umræðan opin á þessum sólríka föstudegi og allir hvattir til að láta ljós sitt skína á kommentakerfinu.

    YNWA

    [...]
Load More
Congratulations. You've reached the end of the internet.

© 2019 KOP.is

Back to Top
Close