Fari svo að Liverpool kaupi Wijnaldum er áhugavert að rýna í það hvaða núverandi leikmönnum liðsins hann kemur til með að ógna? Það er ljóst að fyrir hvern einasta nýja leikmann sem kemur inn í sumar fer annar út, ekki endilega í sömu stöðu en oftast.

Wijnaldum er reyndar mjög fjölhæfur leikmaður en hans besta staða er klárlega sú sama og hentar einnig Coutinho, Firmino, Lallana og Markovic best. Þar spilaði hann 14 leiki í fyrra og skoraði 3 mörk. Rétt eins og Coutinho hefur hann einnig spilað mikið sem réttfættur vinstri kantmaður, þar spilaði hann 19 leiki í fyrra hjá Newcastle og skoraði 8 mörk. Vonandi er hann ekki að koma inn fyrir Coutinho en leikjum Milner á hægri kantinum gæti fækkað verulega spái ég með komu Wijnaldum enda getur Hollendingurinn leyst þá stöðu vel rétt eins og Mané, hin stóru kaup sumarsins. Það er því nokkuð ljóst að Klopp horfði (réttilega) á hægri kantinn sem stöðu sem hægt væri að bæta, þrátt fyrir ágæta tölfræði hins sívinnandi Milner. Gleymum ekki að Ibe spilaði einnig helling af mínútum.

Margir vilja meina að úr því fókusinn fór á Wijnaldum eftir að Piotr Zieli?ski datt út úr myndinni þá sé verið að kaupa hann sem miðjumann. Hvorugur þeirra er miðjumaður að upplagi nema þá sem fremsti maður og því erfitt að meta nákvæmlega hvað það er sem Klopp er að leita eftir. Wijnaldum spilaði aðeins þrjá leiki í fyrra á miðri miðjunni. Ekki að það sé endilega mælikvarði á það hvort hann geti leyst þá stöðu, McClaren var ekkert með þetta á hreinu síðasta vetur frekar en annað er viðkom stjórunum á Newcastle liðinu.

Eitt er alveg á tæru og það er að bæði Mané og Wijnaldum skila mikið fleiri mörkum en menn eins og Henderson, Milner og Lallana. Þeir búa yfir mikið meiri hraða og krafti en þessir þrír sem hingað til hafa verið lykilmenn í liðinu. Veit hinsvegar ekki með vinnusemina.

Sterkasta byrjunarlið Liverpool held ég að innihaldi alltaf Can, Sturridge, Coutinho og Firmino þegar allir eru heilir. Reyndar myndi ég setja Henderson með í þann hóp en líklega er Wijnaldum ógn við Englendingana þrjá fyrst og fremst. Joe Allen gæti verið með í þeim hópi en hann hefur nú varla verið lykilmaður Liverpool undanfarið.

Auðvitað er Klopp ekkert búinn að negla niður byrjunarlið fyrir næsta tímabil, meiðsli, form og annað munu hafa sitt að segja þar en eins og við sáum 2013/2014 er alveg svigrúm fyrir því að spila nánast sama liðinu leik eftir leik þegar álagið er lítið og meiðslalistinn ekki endalaus. Með því að nota útilokunaraðferðina er því áhugavert að stilla upp liðinu.

Sama hvernig ég hugsa þetta sé ég ekki Wijnaldum taka stöðu fyrirliðans ef hann er heill og ef hann gerir það erum við að tala um ansi sókndjarft lið á pappír, of sókndjarft. Eins vona ég að með þessum kaupum sé ekki verið að undirbúa brottför Coutinho sem ég útiloka þó ekki fyrr en 1.september. Vonandi erum við frekar að kaupa Wijnaldum og Mané í staðin fyrir Ibe og Markovic til að styrkja liðið á vængjunum. Ef það er ástæðan fyrir því að Liverpool er á eftir Wijnaldum er ég mjög sáttur við þessi kaup. Ef hann er lausn okkar á miðjunni og sá sem á að kepp við Can og Henderson um stöðu er ég enganvegin sannfærður.

Helsta vandamál Liverpool er að mínu mati að okkur vantar mjög góðan miðjumann, mér lýst mjög vel á Wijnaldum sem leikmann og held að hann myndi styrkja hópinn hjá Liverpool mikið en ég bara sé hann ekki sem neina lausn við þeim vanda sem var á miðri miðjunni í fyrra, ekki frekar en Zielinksi reyndar. Þarna treysti ég hinsvegar Klopp vel til að vita hvað hann er að gera og mæli eindregið með grein Paul Tomkins um það afhverju við vildum Klopp til Liverpool.

Wijnaldum spilaði eitt ár í ensku deildinni og þar áður hafði maður séð honum bregða fyrir í landsliðinu eða Evrópukeppninni, oftast í leikjum sem maður horfði aldrei á, sá bara það helsta úr leikjunum. Fyrir mér virkar þetta eins og nýr kantmaður frekar en miðjumaður en ég verð seint sakaður um að vera sérfróður um þennan leikmann. Vara þó við því búast við miðjumanni sem skoraði 11 mörk á síðasta tímabili, það er ekki rétt, hann skoraði þessi mörk spilandi nákvæmlega sama hlutverk og Coutinho gerði hjá Liverpool (og skoraði svipað).

Liverpool hefur í raun ekki verið orðað við neinn eiginlegan miðjumann í sumar fyrir utan Dahoud.

Þeru vangaveltur sem eru settar í loftið áður en staðfest er að Liverpool hafi boðið í leikmanninn, helstu fréttir herma þó að vonast sé eftir að klára þessi leikmannakaup í þessari viku, áður en liðið fer í æfingaferð til Bandaríkjanna.