Enn er verið að karpa um það hvenær leikurinn við Arsenal verður spilaður nákvæmlega, tillögur um að spila hann á aðfangadag virðast fara illa í nánast alla sem koma að leiknum, skal það engan undra. Fyrir okkur sem horfum heima í stofu gæti þetta mögulega virkað, en ég myndi ekki vilja vera að fara á völlinn og eiga svo eftir að koma mér heim eftir leik kl. 18 á aðfangadagskvöld.
Maður veit varla hvað maður á að segja um þennan leik. Ef eitt orð ætti að súmmera hann upp fyrir mig væri það orðið leiðindi. Liverpool voru eins og venjulega meira með boltann án þess að skapa sér svo til nokkuð. Benitez kom með sína taktík inní leikinn þ.e allir þeirra leikmenn vörðust fyrir aftan bolta og markið þeirra kom eftir eina flotta sendingu í gegn og sofandi miðja og miðverðir réðu ekki við það. Coutinho kom okkar mönnum yfir með frábæru skoti vel fyrir utan teig áður en Newcastle jöfnuðu. Miðverðir okkar litu oftar sem áður illa út í markinu en Shelvey á heldur ekki að fá þennan tíma og pláss á miðjunni til að stinga boltanum í gegn. Að öðru leyti er fátt um leikinn að segja. Ef vörnin var döpur má segja að sóknin hafi verið skelfileg. Engin af okkar sóknarmönnum steig upp og bjó eitthvað til, menn virkuðu áhugalausir og hugmyndasnauðir. Við hefðum átt að fá víti þegar Lovren og Matip er haldið inni í teig en fengum ekki og við slíkt mótlæti svara góð lið með mörkum en þetta var hreinlega steingelt hjá okkar mönnum í dag.
Bestu menn Liverpool
Allt liðið var í meðalmennsku í dag og engin einn sem stóð uppúr að mínu mati. Helst fannst mér baráttuandi í Joe Gomez ( mér fannst hann reyna) og Henderson átti ágæta kafla og nokkrar góðar tæklingar. Coutinho náttúrlega skorar markið fallega og átti nokkrar góðar rispur svo hann fær nafnbótina besti maður Liverpool í dag.
Vondur dagur
Sóknarlínan eins og hún lagði sig var hrikalega döpur. Mest er rætt um Sturridge og það er eðlilegt þar sem að hann var að fá sénsinn hjá Klopp en gerði fátt, en mér fannst Mané áberandi lélegastur í dag. Miðverðirnir gleyma sér sem oft áður og ég hefði viljað sjá Can inná fyrir Wijnaldum snemma í síðari hálfleik. Liðið var heilt yfir bara lélegt í dag og miðað við spilamennskuna hlakka ég ekkert sérstaklega til að mæta erkifjendum okkar eftir landsleikjahlé.
Umræðan eftir leik
Við erum alltaf að ræða sömu hlutina eftir leiki. Vörnin gerir mistök leik eftir leik, við getum ekki haldið hreinu og við getum ekki brotið niður góð varnarleg taktísk lið. Nú erum við að detta inní landsleikjahlé og förum með þetta í veganesti. Þar á eftir tökum við á móti Man Utd þann 15. október og Guð minn eini ég hlakka ekkert sérstaklega til þess. Umræðan snýr líka að Sturridge sem ég held hreinlega að sé búinn sem markaskorari. Það er alveg ljóst að aðdáendur Liverpool eru orðnir pirraðir. Það er samt stutt á milli í fótbolta og nú þarf bara að gjöra svo vel og þjálfari og leikmenn þurfa hver og einn að fara í algjöra naflaskoðun. Með sigri gegn Man Utd í næsta leik værum við með í baráttunni aftur en ef sá leikur tapast er staðan orðin grafalvarleg. Þangað til YNWA!!
Sterkt lið. Klopp setur Sturridge á toppinn og bekkjar Firmino. Can fer einnig á bekkinn og Trent Alexander er ekki í hóp. Henderson spilar sinn 250. leik fyrir Liverpool í dag.
Við minnum á #kopis og ummælakerfið hér að neðan á meðan leik stendur.
Svona kyrjuðu áhangendur Newcastle á Anfield síðast þegar við mættum þeim vorið 2016. Ástæðan var ástfengni þeirra á nýja stjóranum sínum og taktíska meistaranum frá Madrid. Þeir voru orðnir hugfangnir af Rafalution byltingunni . Við Púlarar þekktum þessa tilfinningu mætavel eftir byltingarkennt og árangursríkt ástarsamband og höfðum ekkert á móti því þó að söngnum okkar hefði verið stolið norður í land til að hylla Rafa “okkar” Benitez. Reyndar keyptum við Wijnaldum úr erindinu stuttu síðar þannig að tónskáldin þurftu eitthvað að uppfæra söngtextann en því miður fyrir okkur þá svínvirkaði söngurinn sem áður var sunginn af ástríðu í The Kop og liðsstýring yrkisefnisins var formúlan til að ná í 2-2 jafntefli á þessum vordegi eftir að Liverpool hafði komist tveimur yfir. Þau úrslit dugðu Rafa til að vera áfram ósigraður í leikjum sem hann hefur stýrt gegn Liverpool en áður hafði hann náð nákvæmlega sömu úrslitum í einum leik með Chelsea og unnið tvo CL-leiki með Valencia.
En næsta sunnudag verður söngurinn mun háværari og sunginn af um það bil 50 þúsund upptjúnuðum Norðanmönnum. Og taktíski espanjólinn okkar fyrrverandi hefur unnið heimavinnuna sína samviskusamlega upp á 10,0 að vanda og mun mæta þýska þungarokkaranum okkar í þungum þönkum. Það verða því stálin stinn í fuglabardaga svarthvítu Skjóanna við eldrauða Liverfuglinn!
Hefjum upphitunina!
Sagan
Einvígi Liverpool og Newcastle hafa yfir sér áru sókndirfsku og sögulegra úrslita eftir marga frábæra leiki síðustu áratugina. Þar er auðvitað efst á blaði sá leikur sem oft er nefndur besti leikurinn í sögu Úrvalsdeildarinnar þegar meistaraefni Kevin Keegan lutu í gras 4-3 gegn mörkum Fowler og Stan the Man í apríl árið 1996. Upphitunarritari var svo lukkulegur að hafa einmitt farið á þann leik á Anfield í sínum fyrsta Liverpool-leik og séð berum augum þann kamakazi-fótbolta sem spilaður var það kvöldið. Meistari Beardsley var að sjálfsögðu í byrjunarliðinu fyrir þá röndóttu og hann er einn af fjölmörgum leikmönnum sem spilað hafa fyrir bæði lið. Viðskiptasamband liðanna er það sterkt að það skákar næstum tíðum innkaupaferðum okkar í Suðurhafnartúnum en á síðustu tveimur áratugum hefur Liverpool keypt leikmenn frá Newcastle fyrir yfir 75 milljónir punda samtals og tvívegis var keyptur þáverandi dýrasti leikmaður í sögu Liverpool.
Styrkleiki þeirra sem spilað hafa fyrir bæði lið er slíkur að ekki er annað hægt en að stilla upp í geysiöflugt sameiginlegt lið LiverCastle United FC. Taktíkin er að sjálfsögðu sókndirfska í ætt við kamakazi-fótbolta 4-3 leiksins og varnarleikurinn algert aukaatriði. Byrjunarliðið yrði svona:
Mike Hooper fær hanskana verandi eini markvörðurinn í boði og í hafsentastöðunum er bakvarðafílingur með Alan Kennedy, James Milner og Jose Enrique en sá síðastnefndi hefur reyndar hnykklað vöðvana í miðvarðarstöðunni í eitt skipti fyrir LFC. Varnartengiliðirnir eru ekki af verri taginu með keisarann Didi Hamann og og meistara Terry McDermott að verja baklínuna. Fram á við fer að færast fjör í leikinn með Digger Barnes á vinstri væng og Peter Beardsley fórnar sér fyrir málstaðinn að vanda með því að taka hægri vængframherjastöðuna. Keegan er settur í holuna til að mata markamaskínurnar Rush og Owen. Á bekknum er svo nóg af mönnum til að breyta gangi leiksins eða að lenda í tómu tjóni með golfkylfu. Þetta lið gæti spilað hinn líflegasta sóknarbolta með alla leikmenn upp á sitt besta og með grjótharða gutta aftar á vellinum til að strauja mann og annan. Ég yrði illa svikinn ef svona lið gæti ekki skilað 4-3 í flestum leikjum sínum.
En að sagnfræðilegum dagdraumum slepptum þá höfum við bara unnið 1 af síðustu 6 leikjum á St James’ Park og í heildina er sigurhlutfall Liverpool á þeim velli eingöngu 28% en þar höfum við tapað 44% af okkar leikjum. Nokkrir eftirminnilegir stórir sigrar hafa komið inn á milli eins og 0-6 árið 2013 og 1-5 árið 2008 en heilt yfir er þetta ekkert sérlega auðveldur útivöllur fyrir okkur þó að við tökum Newcastle oft í bakaríið á Anfield. Það er því engin sérstök ástæða til að vera sigurviss miðað við fyrri tíð.
Mótherjinn
Newcastle byrjaði tímabilið með tveimur töpum í deild og einum í deildarbikar og við það fór smá skjálftahrina í gang, sérstaklega sökum þess að Rafa hafði ekki fengið frjálsar hendur eða fjármagn til að annast sumarinnkaupin með aurapúkann Mike Ashley á handbremsunni. Aðgerða var þörf og Rafa fór í nýrnaaðgerð sem hafði svona aldeilis góð áhrif á liðið og það vann næstu 3 leiki í röð. Síðustu helgi tapaði liðið 1-0 fyrir Brighton en þeir sitja í 8.-10. sæti í deildinni með 9 stig og yrðu eflaust hæstánægðir með slíka niðurstöðu í deildinni næsta vor.
Þetta væri ekki lið undir Rafa ef það væri ekki vel skipulagt varnarlega og vörnin hjá Newcastle hefur eingöngu hleypt 5 mörkum í gegn í þessum 6 deildarleikjum. Enda eru varnarmennirnir í liðinu hæstir á einkunnalistanum skv. tölfræðinni hjá Whoscored og þar er bakvörðurinn Chancel Mbemba, varnartengiliðurinn Mikel Merino og hafsentinn Jamaal Lescalles efstir á blaði. Sprækastur fram á við er hinn skoski Matt Ritchie með 4 stoðsendingar en því miður fyrir okkur þá er hann lunkinn í föstum leikatriðum sem er alræmdur akkilesarhæll okkar. Það kæmi mér ekki á óvart ef Rafa myndi stíla inn á að fá sem flestar hornspyrnur til að gefa okkur hroll af stressi og reyna að pota inn marki eftir mistök.
Uppleggið hjá Newcastle er kunnugleg uppskrift með að liggja þéttir og skipulagðir aftarlega með snögga sóknarmenn sem bíða færis að sprengja fram á við. Þeir eru varla að fara að leggja langferðarbílnum á heimavelli en við getum gert ráð fyrir að þeir verði í kringum sitt 43% meðaltal með boltann. Í takt við það þá eru þeir rétt með eitt mark að meðaltali í leik og varla von á flugeldasýningum í sóknarleiknum. Undir Rafa er sigurhlutfall Newcastle 55,7% en allan hans tíma með Liverpool þá var það 55,4% og því er hann kominn með þá á gott sigurról þó að vissulega megi rýna í deildir og andstæðinga í þessum samanburði. Þeir verða því ekkert lamb að leika sér við nema það sé þá helst úlfur í þeirri sauðagæru sem bíður í dans.
Líklegt byrjunarlið Newcastle í taktíkinni 4-2-3-1
Liverpool
Það er sem einhver tilvistarkreppa sé að hefta framþróun Liverpool þessa dagana. Fornir draugar fyrri jóla eru mættir aftur til að valda vandræðum í vörn og markvörslu en núna er ný afturganga í formi færanýtingar mætt á svæðið til að hrella sóknarmenn rauðliða. Eitthvað virðist vefjast fyrir okkur að skjóta síldina í tunnunni vopnaðir hríðskotabyssu og skæðadrífu af sóknarfærum dugar ekki til. Í síðustu 5 leikjum í öllum keppnum höfum við átt 119 skot að marki en það hefur eingöngu skilað okkur 7 mörkum sem er engan veginn nógu mikið þegar við getum sjaldnast haldið hreinu marki í hinum enda vallarins. Reyndar hafa gæðin ekki alltaf verið í takt við magnið en í þessum aragrúa af skotum leynast samt vannýttar vítaspyrnur, skot í tréverkið og markmannslausir galopnir markrammar sem illa gengur að hitta.
Heimspeki Klopp í knattspyrnulegri aðferðarfræði er rock & roll & go for goal og því er grundvallaratriði að nýta sóknarlega yfirburði þegar við erum að ná að skapa færin. Mörk breyta gangi leikja og 2-3 vel tímasett mörk af mýmörgum skotum á þessu tímabili hefðu klárað leiki sem við höfum misst í ósanngjörn jafntefli. Það má svo sem líka horfa á glasið ögn fyllra með því að benda á að við höfum eingöngu tapað 2 leikjum af 11 í öllum keppnum það sem af er tímabili og við erum í seilingarfjarlægð frá toppnum. Sóknarleikurinn hefur verið líflegur og herslumuninn hefur vantað til að vinna fleiri leiki. Það þýðir því ekki að gráta Björn Tore Kvarme bónda og átta sig á að í næsta leik eru 3 stig í boði sem þarf að heyja af túni.
Einhver rótering mun eiga sér stað eftir Rússkí-karamba-ferðalagið og Klopp gæti komið eitthvað á óvart með liðsvalinu. Ég ætla að spá því að hann gefi Karius annan séns og að Skotinn Robertson fái leik í námunda við landamæri heimalandsins. Að mínu mati verður byrjunarliðið svona:
Líklegt byrjunarlið Liverpool í taktíkinni 4-3-3
Spaks manns spádómur
Rafa hefur ekki tapað fyrir Liverpool, söguleg tölfræði er gegn okkur og hingað til hafa allir mínir upphitunarspádómar endað með jafntefli. Eina skynsamlega niðurstaðan er því að leikurinn endi í jafntefli en þar sem ég er meira þrjóskur en skynsamur þá spái ég okkur 1-2 útisigri með mörkum frá Mané og fyrsta útivallarmarki Wijnaldum á Englandi.
Það er eins gott að geðheilsan sé í lagi ef maður ætlar að leggja í það þrekvirki að horfa á Liverpool leik þessa dagana, liðið hefur oft á tíðum verið að spila flottan fótbolta og skapa að maður myndi ætla miklu meira en nóg af dauðafærum en liðinu er bara fullkomlega fyrirmunað að kála leikjum þessa dagana. Liðið setti líklega ný viðmið í þessari viku hvað þetta varðar og það var um nóg að tala í þessum þætti.
Stjórnandi: Einar Matthías Viðmælendur: SSteinn og Maggi.
Leikurinn
Þetta var leikur sem okkar menn áttu að vinna, en verður líklega helst minnst fyrir glötuð marktækifæri. Firmino fann sig alls ekki í leiknum, hefði getað skorað snemma í leiknum þegar hann fékk frían skalla rétt fyrir framan markteig en skallaði nánast beint á markvörðinn. Salah fékk svipað færi í lokin. Sturridge kom inn á í seinni hálfleik og fann sig ekki, fékk samt nokkur færi til að skora en nýtti ekkert þeirra. Mané og Coutinho gerðu vel í markinu, en því miður var það eina sóknin sem skilaði marki.
Vörnin fannst mér alls ekki slæm í þessum leik, þó svo að hún sé auðvitað ennþá umfjöllunarefni og verður það alveg örugglega næstu mánuðina. Markið má e.t.v. einna helst skrifa á Can sem tapaði boltanum klaufalega á miðjunni, það leiddi til áhlaups sem endaði á því að Coutinho gaf aukaspyrnu, og svo má spyrja sig hvort Karius hefði átt að gera betur í aukaspyrnunni. Almennt fannst mér Karius ekki vera að gera neitt til að undirstrika að hann eigi að fá einhver fleiri tækifæri í deildinni, og undirritaður er hreinlega farinn að hallast að því að Ward megi alveg fara að fá fleiri tækifæri á kostnað Karius og jafnvel Mignolet.
Bestu menn leiksins
Eins og kemur fram að ofan voru nokkrir leikmenn sem voru ekki að finna sig. Mér fannst vörnin þó vera nokkuð solid, en ætla að tilnefna fyrirliðann Henderson sem mann leiksins, mér fannst hann vera að vinna vel allan leikinn, braut upp nokkrar skyndisóknir Spartak og hefði með réttu átt að eiga stoðsendingu þegar hann átti frábæra sendingu á Sturridge sem var aleinn fyrir innan vörnina en náði ekki að klára sitt færi. Coutinho og Mané áttu líka spretti, persónulega hefði ég viljað sjá Mané klára leikinn og frekar að fá Firmino útaf þegar Sturridge kom inn á. Þá fannst mér varnarlínan eiga nokkuð góðan dag, svona heilt yfir.
Vondur dagur
Hér er það klárlega Can sem er nefndur fyrstur. Hann fékk á sig gult spjald strax á 5. mínútu, missti boltann klaufalega í markinu, og var svo að lokum tekinn út af. Honum skammt á hæla kemur svo Firmino sem er í einhverri lægð. Ég er búinn að nefna Karius, ef hann er sá sem Klopp keypti til liðsins til að verða markvörður nr. 1, þá má hann alveg fara að sýna það. Það þarf klárlega að gefa honum tíma, rétt eins og öðrum leikmönnum, en í augnablikinu virkar hann ekki á mig sem upgrade á Mignolet.
Umfjöllunin eftir leik
Færanýtingin. Þetta átti að vera sterka hlið þessa liðs, nú loksins með Coutinho, Mané, Salah og Firmino í framlínunni. En nei, útkoman er eitt mark. Maður spyr sig hvort Solanke hefði mátt koma inn á, Klopp notaði bara tvær skiptingar og hefði að mínu mati alveg mátt skipta Firmino fyrr út og setja Solanke inn á.
Við skulum samt muna að þetta var útileikur í Rússlandi, stemmingin á pöllunum var gríðarleg, og í sjálfu sér er ágætt að fara þaðan með eitt stig. En þá verður líka heimaleikurinn að vinnast. Nú er það ljóst að liðið má t.d. ekki tapa úti á móti Sevilla, verður að vinna Spartak heima, og svo þarf að sjálfsögðu að klára Maribor bæði heima og heiman, ekkert ósvipað eins og Sevilla gerðu í kvöld með því að vinna 3-0.
Næst heimsækja okkar menn St. James’ Park og hitta þar fyrir Rafa nokkurn Benitez. Newcastle töpuðu síðasta leik og verða því örugglega grimmir, enda höfðu þeir átt nokkuð gott mót fram að því, voru í efri hlutanum, og vilja örugglega komast þangað aftur. Sá leikur er á sunnudaginn svo okkar menn fá nú smá hvíld fyrir þann leik. Ég á svosem ekki von á því að liðið sé orðið eitthvað úrvinda strax í lok september, og virtist a.m.k. vera í mun betra leikformi heldur en Spartak menn.
Á nýjum heimavelli Spartak Moskva er óvenjulega staðsett stytta af fjórum mönnum fyrir aftan annað markið, þessir menn voru bræður og með því að kynna sér sögu þeirra er auðvelt að skilja afhverju þeim er sýndur slíkur heiður. Saga þeirra er samofin sögu Spartak og meiri goðsagnir muni stuðningsmenn Spartak líklega aldrei eignast.
Það er sjaldan lognmolla í kringum Klopp-stýrt Liverpool og þessi leikur á King Power vellinum var engin undantekning. Hjartað var margsinnis í buxunum og stundum jafnvel eitthvað meira en það og þá erum við bara að tala um úthlaupin hjá Mignolet.
Mörkin
0-1 Mohamed Salah 15.mín 0-2 Philippe Coutinho 23.mín 1-2 Shinji Okazaki 45.mín 1-3 Jordan Henderson 68.mín 2-3 Jamie Vardy 69.mín
Leikurinn
Þetta byrjaði nokkuð þétt hjá okkar mönnum og við vorum vel inni í leiknum fyrstu mínúturnar á meðan bæði lið voru að stunda þreyfingar. Okkur óx ásmegin og Emre Can smellti góðu skoti í stöng og Salah feilaði frákastið á betri löppinni. Einni ögurstund síðar sendi Coutinho gylltan bananabolta á fjærstöng þar sem hinn egypski Messi skallaði boltann í netið framhjá erfðaefni Peter Schmeichel.
Eftir það var leikurinn okkar og þungi í sóknarleiknum. Á 25.mínútu fengum við aukaspyrnu 25 jarda frá marki. Coutinho ákvað að hlaða í fallega afsökunarbeiðni fyrir Barca-bullið í sumar með því að krulla glæsilegt skot út við stöng framhjá blondínubaunanum. Komnir á beinu brautina en Mignolet fannst þetta ögn of auðvelt og hafði aðrar hugmyndir um hvernig skemmtilegur knattspyrnuleikur á að þróast. Hann hafði daðrað við vandræði með hreinsun á snigilhraða en þegar að rétt var að detta í hálfleik fór flippið í gang. Samvinnuverkefni Símons og dómarans í röngum ákvörðun endaði með klúðurslegu marki á versta tíma sem aldrei átti að verða til.
1-2 í hálfleik.
Seinni hálfleikur var óttaleg moðsuða framan af en allt í einu fór leikurinn á yfirsnúning þegar að Liverpool átti frábæra skyndisókn eftir að hafa verið djúpt í vörn. Sprengdum fram á margmenni og Henderson sem byrjaði manna dýpstur skeiðaði tignarlega upp allan völlinn, fékk fína sendingu frá varamanninum Sturridge og sendi hann framhjá vinalega danska draugnum í markinu.
Game over? Alls ekki enda væri það allt of auðvelt. Gray átti skot úr teignum sem Mignolet varði beint fyrir kollvikin á Vardy sem þakkaði fyrir sig með auðveldu marki. Þarna liðu 90 sekúndur á milli þess að sigur ætti að vera kominn á örugga siglingu en nú sigldi Liverpool á milli skers og báru. Einni ögurstundu síðar var það blindsker! Vardy fær stungu innfyrir og eltir boltann, Mignolet er á undan en kiksar boltann og straujar Jamie í leiðinni. Víti! Vardy kunni greinilega ekki góðu gömlu regluna um að sá tekur ekki vítið sem brotið er á og stígur upp móður og másandi. Símon segir víti skal varið og tekur til eftir eigið klúður með því að verja þrumuskot Vardy.
Eftir þetta var leikurinn alveg á hnífsegg en hvorugt lið fékk færin til að drepa eða jafna leikinn. Hendi á Can hefði getað sett leikinn í vitleysu en sem betur fer héldum við þetta út og kærkominn sigur staðreynd.
Bestu menn Liverpool
Coutinho lagði upp og skoraði þannig að hann er að nálgast sitt eðlilega form eftir farsakennt sumar með vottorð í leikfimi og yfirdrifið spænskt fáránleikhús. Að mínu mati var samt fyrirliðinn herra Henderson frábær í leiknum. Ódrepandi, stanslaust hlaupandi og skoraði á endanum sigurmarkið. Jordan Henderson fær Kop.is-kampavín leiksins.
Vondur dagur
Séra Símon hefur ekki haft gott af hvíldinni eða róteringardansinum sem Klopp hefur boðið upp í. Ákvarðanatakan og almenn fagmennska er úti á túni og vítamarkvarslan er rétt sárabót sem bjargar honum frá því að vera allsherjar skúrkur leiksins. Karius mun pottþétt byrja í marki í Moskvu og ef það endar ekki í stórslysi þá gæti hann haldið stöðunni lengur.
Tölfræðin
Leikina tvo á undan þessum átti Liverpool 56 markskot sem enduðu með einu ögurmarki en nú brustu stíflurnar með 3 mörkum í 23 skotum.
Umræðan
Það hlaut að koma að því að flóðgáttirnar myndu opnast og hægðatregðan fyrir framan markið myndi á endanum skila sér sína leið. Á þessari speki byggði tölfræðitröllið og einkavinur minn Biscant sinn spádóm með hárréttum úrslitum um 2-3 sigur. Biscant, take a bow!
Allir andstæðingar okkar í toppbaráttunni unnu sína leiki í dag og því var lífsnauðsynlegt fyrir okkur að fylgja hópnum. Þrátt fyrir rússíbanareið þessa leiks þá kláruðum við þó ferðina þrátt fyrir miklar meltingartruflanir og það mun væntanlega gera margt gott fyrir sjálfstraustið. Umræðan hafði skapað pressu á liðið og Klopp en í bili þá er því létt og vonandi beina brautin framundan.
Þá er komið að seinni hlutanum í tvíleik vikunnar gegn Leicester City og vonandi gengur betur að þessu sinni gegn Refunum frá Eystri-Miðlöndum.
Byrjunarliðin eru klár og þau eru svona:
Á bekknum hjá Liverpool eru Karius, Klavan, Milner, Alexander-Arnold, Oxlade-Chamberlain, Solanke, Sturridge.
Sagnaskáldið Shakespeare stillir sínu liði svona upp:
Helstu tíðindi eru þau að Matip og Lovren hafa jafnað sig nógu tímanlega til að byrja báðir í hjarta varnarinnar. Can var líka tæpur en er nógu hraustur til að byrja inná ásamt Coutinho sem er vonandi að komast í almennilegt leikform.
Hjá Leicester þá eru allir þeirra sterkustu leikmenn komnir í byrjunarliðið eftir deildarbikarleikinn fyrr í vikunni. Vardy, Mahrez og Schmeichel allir mættir til leiks.
Koma svo Rauðliðar! Förum á refaveiðar og rífum þetta tímabil í gang! YNWA!
Við minnum svo á #kopis á Twitter og umræðuna í athugasemdum hér að neðan.
Daníel Sigurgeirsson
Eiríkur Rúnarsson
Magnús Þórarinsson
Einar Matthías
