Search

Menu
Search

Latest stories

  • Podcast – Hitað upp fyrir Roma

    5 Comments

    Meistaradeildin var efst á baugi í þætti vikunnar þá helst auðvitað Roma, andstæðingar Liverpool í næstu viku. Bræðslustjórinn Áskell Heiðar Ásgerisson var með okkur að þessu sinni en hann verður eldhress á vellinum í næstu viku.

    Kafli 1: 00:00 – Viðbrögð við Meistaradeildardrætti
    Kafli 2: 07:35 – Heimavellir liðanna
    Kafli 3: 15:25 – Samanburður á Liverpool og Roma
    Kafli 5: 37:55 – Leið Roma í undanúrslit og álag í Seria A
    Kafli 6: 45:40 – Alls ekki vinaklúbbar
    Kafli 7: 50:30 – Besti útlendingur í sögu Liverpool?
    Kafli 8: 59:40 – Man City meistarar, anti-climax?
    Kafli 9: 01:03:05 – Hvernig stillir Klopp liðinu upp í næstu leikjum?

    Stjórnandi: Einar Matthías
    Viðmælendur: SSteinn, Maggi og Áskell Heiðar Ásgeirsson

    MP3: Þáttur 190

    Hvaða þjónustu notar þú til að hlusta á Podcast Kop.is?

    Skoða niðurstöður.

    Loading ... Loading ...

  • 4 leikir eftir í deild: WBA næst

    15 Comments

    Þegar þetta er skrifað þarf Liverpool 5 stig til að tryggja meistaradeildarsætið á næstu leiktíð. Mögulega koma 3 af þeim stigum um næstu helgi, og mögulega saxast enn frekar af þessari tölu á fimmtudagskvöldið þegar Chelsea mætir Burnley. Semsagt: ef Chelsea vinnur ekki gæti þetta blessaða 4 sæti verið tryggt með sigri um helgina. Fyrir utan fjórða sætið er þriðja sætið vel innan seilingar sömuleiðis, svona fyrst Tottenham náðu aðeins jafntefli gegn Brighton um helgina. Annað sætið er auðvitað ekkert útilokað heldur, en þar sem munurinn er fjögur stig í dag er ljóst að United þyrfti að misstíga sig í a.m.k. tveim leikjum til að það náist, og líkurnar á því eru ekkert svakalegar. Vissulega munu undanúrslitin í bikarnum eitthvað hafa að segja um það hvert United, Tottenham og Chelsea beina athygli sinni á næstu vikum.

    En allt þetta eru aðeins vangaveltur, og allt gæti þetta mögulega farið í vaskinn ef liðið heldur ekki dampi í næstu leikjum. Nú þarf að einbeita sér að því að mæta á Hawthorns völlinn á laugardaginn og ná þar í 3 stig.

    Andstæðingarnir

    Andstæðingarnir að þessu sinni hljóta að falla í flokkinn “sýnd veiði en ekki gefin”. Lið sem er í neðsta sæti deildarinnar þegar fjórar umferðir eru eftir bara getur ekki verið mikil fyrirstaða. Eða hvað? Við ættum kannski að spyrja vin okkar Jose Mourino? Reyndar merkilegt þetta að bæði Liverpool og United unnu City í deildinni núna eftir áramót, og töpuðu svo fyrir botnliði deildarinnar í næsta leik á eftir. Sýnir bara hversu óútreiknanleg þessi deild er, og að efstu liðin geta tapað fyrir hvaða liði sem er. Það sem er kannski merkilegt er að þetta tap gegn Swansea er eina tapið gegn neðstu 14 liðunum:

    Semsagt, Klopp þarf að ná að sameina árangurinn gegn top 6 á síðasta tímabili, og gegn neðstu 14 á þessu, og þá erum við í góðum málum.

    En aftur að andstæðingunum. Leikformið hjá þeim í síðustu 6 leikjum er LLLLDW, semsagt jafntefli á móti Swansea og svo sigur á United. Daniel Sturridge er búinn að vera hjá þeim í láni síðan á áramótum, en hefur merkilegt nokk lítið geta spilað vegna meiðsla. Hann kom þó aðeins inn á í síðasta leik, en við munum auðvitað ekki sjá hann með liðinu á laugardaginn. Þarna eru svo leikmenn sem geta alveg átt leik lífs síns. Ben Foster er enginn aukvisi í markinu. Salomón Rondon og Jay Rodriguez geta alveg skorað mörk þegar sá gállinn er á þeim. Það þarf því klárlega að taka þennan leik alvarlega, og ef það á að sækja 3 stig úr þessum leik þarf að hafa fyrir þeim.

    Liðsvalið

    Jafnvel þó svo að Klopp tali alltaf um að það sé bara næsti leikur sem einhverju máli skiptir, þá hlýtur hann a.m.k. að gjóa augunum aðeins á leikinn næsta þriðjudag gegn Roma. Liðið er svosem búið að fá viku pásu núna, og kannski engin svaka ástæða til að hvíla menn, og enn síður ástæða til að hvíla menn til að koma í veg fyrir meiðsli, enda geta menn allt eins meiðst á æfingasvæðinu. Það eru því allar líkur á að það verði fullsterkt eða allt allt því fullsterkt lið sem byrjar leikinn á laugardaginn. Hugsanlega sjáum við 2-3 róteringar, en tæpast mikið meira en það. Lovren ætti víst að vera leikfær þrátt fyrir að hafa þurft að fara útaf í síðasta leik, og Gomez er farinn að æfa aftur en verður nánast örugglega ekki í byrjunarliðinu þó hann gæti ratað á bekkinn. Woodburn, Solanke, Ward, Jones, Masterson og fleiri léku með U23 á mánudaginn í sigrinum gegn Everton, og gætu vel komið við sögu í síðasta leik tímabilsins sem er gegn Chelsea næsta þriðjudag, og koma því tæpast við sögu á laugardaginn, enda ætti þess ekki að þurfa.

    Semsagt, ég myndi veðja á nokkuð hefðbundið lið.

    Karius

    Alexander-Arnold – Lovren – van Dijk – Robertson

    Chamberlain – Henderson – Milner

    Salah – Firmino – Mané

    Bekkur: Mignolet, Gomez, Moreno, Klavan, Winjaldum, Ings, Solanke

    Ég geri þarna ráð fyrir nokkuð hefðbundnu liði, en eins og áður sagði ættum við ekki að láta það koma okkur á óvart þó við fengjum að sjá allt að 2-3 önnur andlit í byrjunarliðinu.

    Ég er nokkuð viss um að Klopp vill negla meistaradeildarsætið fyrir næsta ár og mun því örugglega spila til sigurs. Það er svakalega freistandi að spá því að sá sigur náist. Spái 3-1, með mörkum frá Salah, Firmino og Chamberlain.

    Koma svo!

  • Jamie Carragher og árshátíð Liverpoolklúbbsins

    3 Comments

    Það verður enginn smá hvalreki fyrir stuðningsmenn Liverpool á Íslandi, þegar Jamie Carragher mætir á svæðið á árshátíð Liverpoolklúbbsins á Íslandi þann 19. maí nk. Okkur skilst að aðeins örfáir miðar séu eftir á þennan mikla viðburð og hvetjum við áhugasama að tryggja sér miða sem allra allra fyrst, ætli þeir sér að mæta.

    Hægt er að tryggja sér miða hérna

  • Opinn þráður – Meistaradeildar Quiz

    8 Comments

    Hendum í einn laufléttan opinn þráð með Meistaradeildarþema enda hugur okkar flestra kominn á Roma leikinn. Mig (EMK) vantaði fjóra leikmenn á þessu prófi, þar einn sem er að spila í dag. En þú?


    Bannað að svindla.

    Annars er ekki podcast fyrr en á fimmtudaginn og þar hitum við upp fyrir helgina og næstu viku.

  • Liverpool 3-0 Bournemouth.

    53 Comments

    Mörkin

    Sadio Mané ‘7

    Mohamed Salah ‘ 69

    Roberto Firmino ‘ 90

     

    Leikurinn

    Liverpool unnu nokkuð léttan og þægilegan sigur í dag þegar lærisveinar Eddie Howe mættu á Anfield. Leikurinn fór fjörlega af stað og strax á 3. mínútu gáfu þeir tóninn þegar Trent Alexander átti frábæra sendingu innfyrir á Salah en hann klikkaði í dauðafæri. Nánast í næstu sókn slapp Mané næstum í gegn en náði ekki að gera sér mat úr því. En á 7. mínútu kom fyrsta mark leiksins og eina mark fyrri hálfleiks þegar Henderson átti virkilega góða sendingu inn fyrir vörnina á Mané sem var einn á auðum sjó og náði skallanum sem Begovic varði en missti boltann frá sér og Mané var eldsnöggur að átta sig og þrumaði boltanum auðveldlega í markið 1-0.  Sautjánda mark Mané í vetur og það tíunda í deildinni.  Eftir þetta róaðist leikurinn töluvert en fór nánast allur fram á vallarhelmingi Bournemouth. Bournemouth fengu engan frið á boltanum á meðan Liverpool fengu nokkur hálffæri. Bestu færi Liverpool eftir þetta í fyrri hálfleik voru annars vegar þegar Mané  átti magnaða sendingu innfyrir á Salah sem klikkaði aldrei þessu vant á fyrstu snertingu og ekkert varð úr þessu færi, en þetta hefði orðið geggjað mark, og hinsvegar skallaði Robertson fyrir markið en aðeins of hátt fyrir Mané sem náði ekki til knattarins. Fyrri hálfleik lauk því með 1-0 forystu Liverpool sem hefði átt að vera mun meiri enda 10-1 í marktilraunum og er maður aldrei í rónni með aðeins eitt mark í forskot. Henderson var besti leikmaður vallarins í fyrri hálfleik þar sem hann át miðjuna, var virkilega yfirvegaður og átti margar frábærar sendingar. Chamberlain, Robertson og Mané áttu líka mjög góðan hálfleik. Liðið allt var bara rock solid svo við slettum smá en það vantaði aðeins meiri greddu til að ná inn öðru markinu.

    Seinni hálfleikur fór nokkuð varlega af stað. Áfram héldu Liverpool boltanum og stjórnuðu leiknum frá A til Ö. Það fyrsta markverða sem gerðist í seinni hálfleik gerðist á 56′ mínútu þegar Dijk negldi boltanum af einhverjum 35 metrum en yfir fór boltinn. Ágætis tilraun og ljóst að hann má alveg skjóta meira enda með þvílíkar sleggjur. Á 62′ mínútu átti Trent Alexander frábæran sprett upp allan völlinn og fann Salah sem reyndi máttlaust skot en hefði getað gefið hann aftur á Trent sem hóf sóknina. Á 67′ mínútu ýtti Ake aðeins í bakið á Salah sem vildi víti eins og Herra Klopp en dómarinn dæmdi ekki. Alls ekki ósvipað og Lovren atvikið gegn Everton fyrr í vetur sem við vorum virkilega ósátt við enda verulega soft en það er samt alveg kominn tími á að enskir dómarar velji sér línu til að dæma eftir og dæmi eins. Á 69′ mínútu kom svo mark leiksins. Trent Alexander átti stórkostlega sendingu innfyrir á Salah sem slúttaði eins og kóngurinn sem hann er og skallaði yfir Begovic í markinu, flikkaði honum í bláhornið, algjörlega geggjað mark 2-0 og Salah kominn með 30 mörk í deildinni og 40 alls. Fleiri færi litu dagsins ljós, Mané átti skot framhjá og Firmino slapp einn í gegn en reyndi máttlaust skot sem var auðvelt fyrir begovic að verja. Bournemouth vöknuðu aðeins til lífsins á 82′ mínútu og áttu nokkur hálffæri ásamt fyrsta skoti sínu á rammann sem Karius varði vel en þessi ákefð þeirra Bournemouth manna varði stutt og var aldrei nein alvöru ógn. Á 90′ mínútu kláruðu Liverpool leikinn með pompi og prakt þegar Firmino skoraði fallegt mark eftir stoðsendingu Chamberlain 3-0 og leikurinn búinn. Lovren fór eitthvað lemstraður útaf í lokin en við krossleggjum fingur og vonum að það sé ekki neitt neitt, við megum bara alls ekki við því á þessum tímapunkti að hann verði eitthvað frá.

     

    Bestu menn Liverpool

    Það voru allir góðir í dag og skiluðu sínu. Henderson var bestur á vellinum í fyrri hálfleik að mínu mati en miðjan var heilt yfir mjög góð og örugg í öllum sínum aðgerðum. Vörnin var að sama skapi skotheld og hin heilaga þrenning skoruðu allir í dag en þurftu fannst mér aldrei að setja í fimmta gír. Ég gef Trent Alexander nafnbótina maður leiksins að þessu sinni. Það sem drengurinn hefur verið að spila vel undanfarið er unun að horfa á og hann var frábær allan leikinn í dag ásamt þessari mögnuðu sendingu á Salah í marki tvö. Að eiga uppalinn svona góðan dreng er gulls ígildi, gæinn er 19 ára við skulum ekki gleyma því. Ég hefði líka getað nefnt Chamberlain sem var frábær í dag.

     

    Umræðan

    Það voru svosem engin sérstök atvik sem þarf sérstaklega að ræða eftir þennan leik nema hvað þetta virkaði svakalega auðvelt eitthvað. Ég bjóst við sterkara Bournemouth liði í dag en okkar menn yfirspiluðu þá á öllum sviðum fótboltans. Áfram er Salah eðlilega í umræðunni enda nú kominn með 40 mörk í öllum keppnum og er aðeins þriðji leikmaður Liverpool sem tekst að komast í 40 mörkin. Hinir eru Rush 47 mörk og Hunt 42 mörk. Við eigum enn eftir að minnsta kosti sex leiki eftir og vonandi sjö og gæti Salah vel slegið hið magnaða met Ian Rush. Hin heilaga þrenning Salah, Mané og Firmino eru nú  komnir með 82 mörk samanlagt í öllum keppnum og Mané var með marki sínu í dag markahæsti Senegali ensku úrvalsdeildarinnar frá upphafi með 44 mörk. Það er svo gaman að vera Púllari í dag og við skulum njóta þess í botn. Liðið virkar með sjálfstraust uppá 100 og fátt sem maður er hræddur við nema þá helst ef Lovren ætlar að fara detta í einhver meiðsli núna. Ef við höldum Can ásamt því að fá inn Keita og heimsklassa miðvörð ásamt heimsklassa sóknarþenkjandi leikmanni verður þetta lið svo gott að maður fær sæluhroll við tilhugsunina. Einhverjir vilja kaupa markmann á metupphæðir en eins og staðan er í dag finnst mér það algjör óþarfi eins og Karius er að spila.

     

    Næsta verkefni

    Leikmenn fá vikuhvíld áður en þeir heimsækja botnlið West Brom um næstu helgi og geta farið langt með að tryggja meistaradeildarsæti með sigri þar. Þar á eftir eru svo undanúrslitin gegn Roma en við komum að þeim leik síðar.

    Þangað til næst YNWA!!!

     

     

     

  • Liðið gegn Bournemouth.

    39 Comments

    Þá er byrjunarliðið í dag orðið ljóst og stillir Klopp svona upp í dag:

    Karius

    TAA – Lovren – Van Dijk – Robertson

    Wijnaldum – Henderson – Chamberlain

    Salah – Firmino – Mané

    Bekkur: Mignolet, Milner, Klavan, Moreno, Ings, Solanke, Woodburn.

    Sama byrjunarlið og gegn City í vikunni nema að fyrirliðinn Henderson kemur aftur inn og Milner fær hvíld.  Þetta lið á að klára verkefnið í dag.

    Fyrir leik verður Hillsborough harmleiksins minnst með mósaík í Kop stúkunni en á morgun eru 29 ár liðin frá harmleiknum.

    Koma svo!!

     

    Við minnum svo á #kopis á Twitter og athugasemdakerfið hér að neðan.


  • Roma var það – fyrri á Anfield!

    33 Comments

    Niðurstaðan er ljós: við mætum Roma, fyrri leikurinn verður á Anfield. Það lið sem vinnur verður útilið í úrslitaleiknum í Kiev.

    Fyrri leikurinn fer fram þriðjudaginn 24.apríl og síðari leikurinn miðvikudaginn 2.maí.

    Við eigum til smá textabrot í góðu lagi…

    “Bring on your Internazionale,
    BRING ON YOUR ROMA BY THE SCORE,
    Barcelona – Real Madrid,
    who the f**k are you trying to kid,
    Cause Liverpool is the team that we adore.”

    =============================================

    Jæja. Núna kl. 11 kemur í ljós hvaða liði okkar menn mæta í undanúrslitum meistaradeildarinnar.

    Hægt er að fylgjast með drættinum hér: http://www.uefa.com/uefachampionsleague/season=2018/draws/round=2000884/index.html#/

    Eins og Andy Robertson segir, þá skiptir í raun engu máli hvaða lið við fáum, það verða engir auðveldir leikir.

    Við uppfærum svo færsluna um leið og niðurstaða fæst.

    Hótel og Miðar á leiki á Anfield

    Við á Kop.is erum ákaflega stoltir af því að geta sagt frá því að við höfum samið við aðila frá Noregi um milligöngu um miða á Anfield. Framboðið hjá þeim er talsvert og bjóða þeir upp á miða og hótel í kringum leikina. Stóri kosturinn við þetta allt saman er að þetta eru svokallaðir Hospitality miðar og eru official miðar frá Liverpool Football Club. Ekkert svartamarkaðsbrask og leynimakk heldur allt upp á borðum og í samvinnu við félagið okkar. Hótelin sem í boði eru, eru líka fínustu hótel með góðum staðsetningum.

    Miðarnir eru pappírsmiðar og verða afhentir kl. 14 á leikdegi á hóteli viðkomandi ferðalangs og innifalið er ferð frá hóteli upp á Anfield og svo til baka eftir leik.

    Síðan sem þeir eru með og hægt er að bóka miðana í gegnum, er á norsku, en það er einfalt mál í tölvu að láta standard translate á síðuna sem slíka (kunni menn ekki Norsku) og kemur sú þýðing bara fínt út. Til að bóka hjá þessum aðilum þá þurfa menn að setja inn Discount Code (Rabattkode) og að auki fá menn þar með sérstakan Kop.is afslátt. Kóðinn sem menn þurfa að nota er kopis (allt litlir stafir). Þessir aðilar eru traustir og eru nú þegar byrjaðir að bjóða til sölu miða á undanúrslitin í Meistaradeildinni, þrátt fyrir að mótherjar séu ekki vitaðir eða dagsetning á leiknum. Hér að neðan er einmitt linkur á þann leik, muna bara að nota kopis sem kóða:

    https://norwegiansportstravel.no/butikk/champions-league

    Við munum setja inn á síðuna okkar frekari upplýsingar þegar nær dregur leiknum og senda þær líka til ferðalanga.

  • Bournemouth á laugardaginn

    8 Comments

    Eftir ævintýrið á Etihad er röðin aftur komin að deildinni, því á laugardaginn koma Eddie Howe og lærisveinar hans í heimsókn á Anfield. Leikurinn hefst kl. 16:30, þannig að okkar menn ættu því að hafa fengið hátt í fjögurra sólarhringa hvíld, og veitir víst ekki af. Liðið mætir í þennan leik í þeirri stöðu að þurfa að fá a.m.k. 8 stig út úr síðustu leikjunum, fyrst David Moyes gerði okkur þann greiða að gera jafntefli við Chelsea um síðustu helgi. Þessi 8 stig munu semsagt duga ef markamunurinn helst nokkurnveginn óbreyttur.

    Baráttan um markakóngstitilinn

    Þessir síðustu 5 leikir í deildinni snúast auðvitað fyrst og fremst um það að ljúka keppni eins ofarlega í töflunni og hægt er, en þegar fjórða sætið virðist verða æ líklegra er annað markmið sem menn eru örugglega með annað augað (og hitt eyrað) á, en það er slagurinn um markakóngstitilinn. Þar er okkar maður – Mohamed Salah – auðvitað efstur á blaði sem stendur, en Harry Kane andar ofan í hálsmálið á honum, og fékk í gær stuðning frá deildinni þegar mark sem Tottenham skoraði gegn Stoke var skráð á hann, í stað þess að vera skráð á Eriksen. Allt hið furðulegasta mál því engar upptökur sýna snertingu, en hann sver og sárt við liggur að hafa snert boltann. Gott og vel, í sjálfu sér er ekki ástæða til að rengja það. Okkar menn verða bara að tryggja að þetta mark skipti engu þegar upp er staðið, auðvitað er markmið númer eitt að liðið nái að skora, en eitthvað segir mér að menn muni hjálpa Salah alveg extra að finna netmöskvana í þessum síðustu leikjum. Þess má geta að Salah lýsti yfir undrun yfir dómnum á Twitter, og félagar hans voru duglegir að svara með hvers konar meme-um. Semsagt, vonandi mun þessi ákvörðun FA engu máli skipta þegar upp er staðið.

    Bournemouth

    Það þarf í sjálfu sér ekki að hafa mörg orð um andstæðinganna. Eddie Howe er núna einn langlífasti stjórinn í deildinni þrátt fyrir ungan aldur, og hann hefur náð undraverðum árangri með þetta lið. Ef árangur liðanna frá því um jólin er skoðaður kemur í ljós að þeir eru í 6. sæti, og eru þar fyrir ofan lið eins og Chelsea, Arsenal og Everton, svo dæmi séu tekin:

    Auðvitað fást engin verðlaun fyrir að vera ofarlega á þessum lista, en þetta er engu að síður ágætis vísbending um það hvernig liðunum hefur verið að ganga undanfarna 4 mánuði eða svo. Semsagt: ekki búast við að þetta verði einhver skemmtisigling. Góðvinur okkar Jordon Ibe er á meiðslalistanum sem stendur, en er þar skráður sem “slight doubt”, svo kannski fáum við að njóta starfskrafta hans á laugardaginn.

    Meiðslalistinn

    Í sjálfu sér eru ekki það margir á meiðslalistanum hjá Liverpool: Lallana, Matip, Gomez, og Can. Lallana og Gomez gætu sést í mýflugumynd fyrir lok leiktíðarinnar, en Matip og Can spila ekki aftur á þessari leiktíð – og Can gæti þar með verið búinn að spila sinn síðasta leik fyrir liðið. Af hverju hann er ekki búinn að skuldbinda sig til að verða áfram er hulin ráðgáta, en maður veit svosem ekkert hvað er að fara í gegnum hausinn á honum, ekki frekar en hjá Coutinho í janúarglugganum. Ef menn vilja ekki vera virkir þátttakendur í þessu ævintýri sem nú stendur yfir þá eiga þeir bara að vera einhversstaðar annars staðar.

    En þó svo að það séu ekki margir meiddir, þá er hópurinn ekkert svakalega breiður, og því munar um þessa leikmenn. Sem betur fer er Clean Sheet Klavan aftur orðinn leikfær, ef svo væri ekki þyrfti aftur að leita í smiðju akademíunnar til að eiga miðvörð á bekknum. Woodburn er líka kominn aftur á stjá og var á bekk á þriðjudaginn.

    Væntanleg uppstilling

    Ég hef enga trú á því að Klopp sé að fara að hvíla menn eitthvað unnvörpum. Eins og áður sagði fá menn rétt tæpa 4 sólarhringa til að hvíla sig, og Klopp hefur oft talað um að lið þurfi að “ná upp takti”. Ég tel nánast öruggt að Henderson komi aftur inn í liðið, þrátt fyrir að Winjaldum hafi bara staðið sig með ágætum í hlutverki sexunnar á móti City. Mögulega fær Winjaldum að halda áfram að spila í því hlutverki, enda hefur Henderson alveg getað spilað framar líka. Hugsanlega fær Milner smá pásu, enda búinn að spila 3 leiki á 6 dögum, en toppaði samt hlaupalistann á þriðjudaginn:

    Semsagt, ég spái því að Henderson verði sá eini sem komi inn, þó ég gæti svosem alveg séð Clyne t.d. fá sénsinn. Stillum þessu einhvernveginn svona upp:

    Karius

    TAA – Lovren – van Dijk – Robertson

    Winjaldum – Henderson – Chamberlain

    Salah – Firmino – Mané

    Bekkur: Mignolet, Clyne, Klavan, Moreno, Woodburn, Milner, Ings

    Spá

    Ég ætla að spá því að liðið vinni 2-0 sigur, þar sem Salah skorar bæði mörkin, en ég yrði reyndar alveg sáttur við hvaða sigur sem er. Með því myndi aðeins vanta 5 stig í viðbót til að tryggja meistaradeildarsætið, sem liðið ætlar auðvitað að tryggja sér hvort eð er með því að vinna dolluna.

  • Podcast – Man City afgreitt / Miðar á leiki

    8 Comments

    Ekki flókin dagskrá í dag, Liverpool er komið í undanúrslit Meistaradeildarinnar eftir 10 ára bið, Man City afgreitt 5-1 samanlagt. Djöfull er þetta gaman.
    Kop.is er með möguleika á miðum á heimaleikinn í undanúrslitum sem og aðra heimaleiki Liverpool. Meira um það neðst í þessari færslu.

    Kafli 1: 00:00 – “We have to change from doubters to believers. Now.” – Tékk
    Kafli 2: 10:15 – Umræður stóru atriðin í leiknum
    Kafli 3: 23:00 – Lífshættuleg fagnaðarlæti í seinni hálfleik
    Kafli 4: 32:10 – Menn eivígisins
    Kafli 5: 46:50 – Undanúrslit, tilhlökkun fyrir föstudeginum
    Kafli 6: 58:15 – Deildin, Everton, Kane og Bournemouth næst

    Stjórnandi: Einar Matthías
    Viðmælendur: SSteinn og Sveinn Waage

    MP3: Þáttur 189

    Hótel og Miðar á leiki á Anfield

    Við á Kop.is erum ákaflega stoltir af því að geta sagt frá því að við höfum samið við aðila frá Noregi um milligöngu um miða á Anfield. Framboðið hjá þeim er talsvert og bjóða þeir upp á miða og hótel í kringum leikina. Stóri kosturinn við þetta allt saman er að þetta eru svokallaðir Hospitality miðar og eru official miðar frá Liverpool Football Club. Ekkert svartamarkaðsbrask og leynimakk heldur allt upp á borðum og í samvinnu við félagið okkar. Hótelin sem í boði eru, eru líka fínustu hótel með góðum staðsetningum.

    Síðan sem þeir eru með og hægt er að bóka miðana í gegnum, er á norsku, en það er einfalt mál í tölvu að láta standard translate á síðuna sem slíka (kunni menn ekki Norsku) og kemur sú þýðing bara fínt út. Til að bóka hjá þessum aðilum þá þurfa menn að setja inn Discount Code (Rabattkode) og að auki fá menn þar með sérstakan Kop.is afslátt. Kóðinn sem menn þurfa að nota er kopis (allt litlir stafir). Þessir aðilar eru traustir og eru nú þegar byrjaðir að bjóða til sölu miða á undanúrslitin í Meistaradeildinni, þrátt fyrir að mótherjar séu ekki vitaðir eða dagsetning á leiknum. Hér að neðan er einmitt linkur á þann leik, muna bara að nota kopis sem kóða:

    https://norwegiansportstravel.no/butikk/champions-league

  • Manchester City 1 – Liverpool 2

    87 Comments

    1-0 Gabríel Jesus 2′

    1-1 Mo Salah 56′
    1-2 Roberto Firmino 77′

    Leikurinn

    Þetta tókst og Liverpool er komið í undanúrslit Meistaradeildar í fyrsta sinn í tíu ár! Leikurinn byrjaði jafn illa og hægt væri að óska sér þar sem brotið var á Van Dijk sem lyfti upp hendi að biðja um aukaspyrnu meðan Sterling stal af honum boltanum og var þá allt opið fyrir City menn og skoraði Gabriel Jesus eftir aðeins tveggja mínútna leik. Við tók einn erfiðasti hálfleikur sem ég hef horft á í langan tíma. City menn settu upp stöðvar fyrir utan vítateig Liverpool og stýrðu leiknum algjörlega en gekk þó illa að koma sér í góð færi. Það var augljóst til að byrja með að Liverpool eru ekki vanir því að liggja svona tilbaka og gekk illa að elta City menn og enn verr þegar boltinn loks barst til okkar manna að halda honum. Eftir hálftíma leik vildu City menn fá víti þegar boltinn fór í hendina á Milner en það var lítið til í því enda hendinn við síðu og hélt leikurinn því áfram. Eitthvað var loftið létt í leikmönnum City í kvöld sem féllu oft við minnstu, ef einhverja, snertingu og í kjölfarið féll Sterling tvisvar við í teig Liverpool en réttilega ekkert dæmt. Það var Alex Oxlade-Chamberlain sem átti fyrsta tækifæri Liverpool í leiknum þegar hann átti fínt skot undan af velli en það var auðvelt fyrir Ederson í marki City. Á 40. mínútu átti Bernardo Silva skot í stöng og rúmri mínútu síðar skoraði Sané annað mark City en það var dæmt af vegna rangstöðu. Sané var vissulega rangstæður en boltinn barst til hans eftir að Karius kýldi boltan í Milner þaðan sem hann kom til Sané og markið hefði því átt að standa. Við fögnum því hinsvegar bara fyrra markið átti líklega ekki að standa og hlutirnir féllu þarna með okkur. Rétt fyrir hlé átti Liverpool loks góðan sprett þegar Firmino og Salah spiluðu sig fallega í gegnum vörn City komu boltanum á Chamberlain sem skaut yfir í þröngu færi. Svo var loks flautað til hálfleiks og hjartað var komið í buxurnar eftir stanslausa pressu City manna. City menn umkringdu dómaran þegar flautað var til hálfleiks, brjálaðir útaf markinu sem Sané fékk ekki, en skilaði það aðeins því að Guardiola fékk að horfa á seinni hálfleik úr stúkunni.

    1-0 fyrir City í hálfleik

    Pressa þeirra kostaði þó sitt og náðu Liverpool að hæga vel á leiknum. Á 56. mínútu skaust Mané framhjá Laporte og Fernandinho en náði ekki að halda jafnvægi og virtist vera að færið væri að fara í sandinn þegar Ederson náði að pota í boltan en Mo Salah var mættur til að taka við boltanum og vippaði yfir Otamendi sem reyndi að renna sér í boltan og staðan 1-1 og þungu fargi lyft af Liverpool. City menn hefðu þarna þurft að skora fjögur til að komast áfram og virtist mikill vindur fara úr þeim. Aguero kom inn á á 66. mínútu og hann komst strax inn í leikinn og átti fínt skot hálfri mínútu eftir að hann kom inn á völlinn. Það var svo á 77. mínútu þegar Firmino pressaði á Otamendi sem missti boltan og Firmino tók stefnuna beint á markið og setti boltan framhjá Ederson í markinu 2-1 og verkinu lokið – Game over!

    Bestu menn Liverpool í dag var hreinlega liðsheildin að standa af sér pressuna í fyrri hálfleik og koma tilbaka og sigra, ekki bara einvígið heldur leikinn. Sadio Mané var mjög öflugur bæði í pressunni og sem outlet til að koma boltanum aðeins af vörninni. Mo Salah er nátturulega unaðslegur leikmaður og skoraði markið sem létti pressunni lítið hægt að segja um hann sem hefur ekki verið sagt. Trent átti í vandræðum með Sané til að byrja með en óx aðeins inn í leikinn þegar hann fékk meiri hjálp, sérstaklega þegar Mané var kominn yfir hægra meginn, leit út fyrir að geta verið mikið vandamál fyrir okkur í leiknum en minnkaði þegar á leið. Milner og Wijnaldum áttu í vandræðum í fyrri hálfleik enda undirmannaðir gegn miðju City en leystu ágætlega úr því. Hafsentarnir Van Dijk og Lovren voru undir mestri pressu og fyrir utan að ég hefði viljað sjá Van Dijk bara losa boltan áður en hann fór að heimta aukaspyrnu í marki City var ekki yfir neinu að kvarta og ég vel Dejan Lovren sem minn mann leiksins.

    Umræðan

    Klopp vann ákveðinn taktískan sigur. Hjálparvörnin frá Mané eftir að kantmennirnir skipta um kant Salah á réttum stað til að skora eftir að hann og Firmino skipta um leikstöður. Það hefur oft verið rætt hversu fluid þessi sóknarlína er en sjaldan hefur hún flotið jafnmikið og í dag. Liðið átti erfitt með að liggja en óx í það hlutverk og að lokum hrundi City liðið. Einnig er liðið loks komið í lokaumferðir Meistaradeildarinnar eftir alltof, alltof langan tíma og hafa oft verið alltof, alltof langt frá því. Klopp er nú búinn að vera með liðið í tvö og hálft ár og þvílík hamskipti sem hafa verið á þessu liði síðan hann tók við!

    Það verður partý í Liverpool borg í kvöld og það verður gaman í hádeginu á föstudaginn þegar Liverpool verður eina enska liðið í pottinum þegar dregið verður í undanúrslit Meistaradeildar.

Load More
Congratulations. You've reached the end of the internet.

© 2019 KOP.is

Back to Top
Close