Search

Menu
Search

Latest stories

  • Hamraheimsókn

    7 Comments

    Eftir að hafa heimsótt Tottenham í Lundúnum síðasta fimmtudag, nánar tiltekið á Tottenham Hotspur Stadium, þá liggur leiðin í rétt rúma 10 kílómetra í suðsuðaustur, eða á London Stadium sem í dag er heimavöllur West Ham. Sá völlur var byggður sérstaklega fyrir Ólympíuleikana 2012, en féll svo í hlut liðinu frá Austur London sem gegnir nafninu West Ham. Leikurinn kemur í kjölfar þess að Everton töpuðu gegn Newcastle, og geta því ekki lengur komist upp fyrir Liverpool þó þeir vinni leik sem þeir eiga inni (í bili a.m.k.), United gerði jafntefli gegn Arsenal, og City vann enn einn leikinn gegn Sheffield. En nóg um það, snúum okkur að andstæðingum okkar í næsta leik, enda er það eini andstæðingurinn sem Liverpool getur tæklað í bili.

    Gengi andstæðinganna

    West Ham er eitt af þessum liðum sem hefur verið að daðra við efsta hluta deildarinnar, en það hafa í raun verið að bætast ný lið á þann lista eftir því sem líður á tímabilið. Síðasti leikurinn sem liðið tapaði var gegn Chelsea þann 21. desember, svo komu 2 jafntefli, en svo komu 4 sigurleikir í deild og 2 í bikar. Staðan er því sú að liðin sitja hlið við hlið í 4. og 5. sæti í deildinni í augnablikinu, og það mun væntanlega ekki breytast fyrir leik. Hamrarnir gætu því komist aftur upp í 4. sætið með sigri, en Liverpool gæti annaðhvort haldið 4. sætinu eða komist upp í það þriðja ef Leicester vinna ekki sinn leik gegn Leeds.

    West Ham hafa reyndar verið með virkari liðum á leikmannamarkaðinum núna í janúar. Sebastian Haller var seldur til Ajax, en í staðinn er Jesse Lingard kominn frá United á láni, og þá keyptu þeir Saïd Benrahma sem hafði verið á láni hjá þeim.

    Þess má svo geta í framhjáhlaupi að kvennalið West Ham fékk ágætis liðsstyrk núna í vikunni, þegar landsliðskonan Dagný Brynjars gekk til liðs við kvennalið félagsins, en hún hefur verið stuðningsmaður Hamranna frá unga aldri.

    Gengi West Ham hefur ekki verið neitt sérstakt í síðustu leikjum gegn Liverpool, en síðasti leikur sem þeir unnu var í fjórðu umferð bikarkeppninnar árið 2016, annars hefur Liverpool haft yfirhöndina og við vonum auðvitað að það haldi áfram.

    Liðin áttust við á Anfield í lok október, og þá fóru okkar menn með sigur af hólmi eftir að hafa lent undir, en náðu að jafna með marki frá Salah og svo skoraði Jota sigurmarkið undir lok leiksins.

    Okkar menn

    Byrjum á að skoða meiðslalistann. Við þurfum ekkert að ræða stöðuna á VVD og Gomez, Klopp staðfesti í vikunni að Gomez myndi ekki spila meira á þessari leiktíð, en hann hefur ekki ennþá gefið út slíka yfirlýsingu varðandi Virgil. Vonum að það þýði að meiðslin hafi e.t.v. ekki verið alveg jafn alvarleg og útlit hafi verið fyrir, en vonum líka að það verði ekki reynt að flýta endurkomu hans í trássi við bestu mögulegu ráðleggingar lækna. Við treystum læknateymi klúbbsins auðvitað til að gera það sem er best fyrir leikmanninn til lengri tíma litið.

    Það sem verra er að við verðum án bæði Fabinho og Matip í leiknum á morgun. Fabinho er eitthvað lítillega meiddur, missti af leiknum á fimmtudaginn, en Matip meiddist jú í þeim leik og það er alls óvíst hvort hann sjáist meira á leiktíðinni, þó það sé ekki fullljóst hve alvarleg meiðslin voru sem hann hlaut í fyrri hálfleik. Í ljósi þess að klúbburinn á núna enga heila miðverði fyrir utan U23 leikmenn (við teljum Nat Phillips í þeim hópi), og að téðir U23 leikmenn eiga talsvert í land með að verða klárir í baráttuna í úrvalsdeildinni (Sepp og Koumetio fengu t.d. á sig 6 mörk í leik U23 í dag), þá hafa líkurnar á því að eitthvað verði verslað í janúarglugganum aukist allnokkuð. Líkurnar eru samt ekki 100%, enda vill klúbburinn eðlilega ekki kaupa bara einhvern miðvörð. Svo virðist sem það hafi verið veðjað á að það væri hægt að selja Lovren síðasta sumar og bíða með að kaupa framtíðar miðvörð í hans stað þangað til sumarið 2021, en það veðmál sprakk heldur betur í andlitið á þeim með meiðslum VVD, Gomez og Matip. En málið er líklega að helstu skotmörk eru einfaldlega ekki laus núna. Spurning hvort það verður farið í skammtímalausn í millitíðinni, það kemur í ljós á næstu sólarhringum enda lokar glugginn seinnipartinn á mánudaginn. En það er nokkuð ljóst að það kemur enginn leikmaður fyrir leikinn gegn West Ham, og því allar líkur á að við sjáum miðvarðarparið Nat Phillips og Jordan Henderson aftur.

    Þá eru Keita og Jota ennþá frá, ekkert hefur heyrst um hvenær sé von á þeim til baka.

    Klopp verður líklega að spila sínu sterkasta liði, og vona að menn þoli leikjaálagið. Hugsanlega eitthvað hægt að rótera á miðjunni, en lang líklegast er að sterkasta liðinu verði stillt upp og svo skipt inná fyrir þá sem eru tæpastir.

    Alisson

    Trent – Phillips – Henderson – Robertson

    Thiago – Gini – Milner

    Salah – Firmino – Mané

    Miðað við hvað Milner var liðinu mikilvægur í leiknum gegn Spurs er ég að veðja á að hann byrji aftur, og að það verði frekar róterað í Brighton leiknum í miðri viku. Það er svo alveg ljóst að það verður að stilla upp allra sterkasta liðinu gegn City um næstu helgi, enda eru þeir komnir á ógnvænlegt skrið og það verður ekkert grín að stoppa þá.

    Dómari leiksins á morgun verður John Moss, svo ekki eigum við von á neinum gjöfum frá dómaratríóinu. Ekki að þær hafi verið margar á leiktíðinni, og ekki eins og maður vilji vera að fá gjafir. Það eina sem maður biður um er sanngjörn dómgæsla, ólíkt því sem var t.d. í leik Villa og Saints í kvöld.

    Þar fyrir utan biður maður bara um 3 stig. Jú og ég væri rosalega til í ef liðið slyppi við fleiri meiðsli.

    Þó svo útivallagengi Liverpool á þessari leiktíð sé ekkert til að hrópa húrra fyrir, þá ætla ég að spá sigri í útileik númer 2 í röð. 1-2 með mörkum frá Salah og Robertson.

    KOMA SVO!!!

  • Tottenham 1 – 3 Liverpool

    51 Comments

    0-1 Firmino (45. mín)

    0-2 Alexander-Arnold (47. mín)

    1-2 Hojberg (49. mín)

    1-3 Mané (65. mín)

    Leikurinn hófst eins illa og hægt er fyrir lið með jafnlítið sjálfstraust þegar að Mané klúðraði dauðafæri og í kjölfarið Son skoraði en sem betur fer fór þetta í VAR og loks endaði það vel fyrir okkar menn þegar það kom í ljós að hællinn á Son var fyrir innan og því rangstæða dæmd. Þetta reyndist nokkur uppvaknig fyrir okkar menn og fyrri hálfleikurinn var ágætur hjá okkar mönnum. Liðin skiptust á ágætis sóknum, Mané fékk nokkur góð tækifæri en náði aldrei að klára nægilega vel. Það var svo nokkrar mínútur inn í uppbótatíma í fyrri hálfleik þegar stíflan loks brást þegar Henderson fann geggjaða sendingu á Mané inn fyrir vörnina og hann lagði boltann þvert yfir teiginn þar sem Bobby Firmino skoraði fyrsta mark leiksins.

    Í hálfleik fór Matip meiddur af velli og segja fréttir að hann sé jafnvel alvarlega meiddur og því eru engir heilir aðalliðshafsentar eftir í leikmannahópnum. Hann var þó ekki sá eini sem fór útaf því Harry Kane fór sömuleiðis meiddur af velli í hálfleikshléinu. Ef fyrri hálfleikurinn var skref í rétta átt fyrir Liverpool þá var seinni hálfleikurinn nokkur því þar sáum við liðið sem við höfum saknað síðan fyrir jól. Í byrjun seinni hálfleiks kom Trent Liverpool í tveggja marka forrustu þegar hann fylgdi á eftir skoti Sadio Mané sem Hugo Lloris varði út í teiginn. Tottenham klóruðu í bakkann með stórkostlegu marki frá Hojberg nokkrum mínútum seinna með skoti fyrir utan teig.

    Það hægðist lítið á leiknum við þessi mörk en næstur var það Mo Salah sem náði að koma boltanum framhjá Lloris en það mark var dæmt af vegna hendi á Firmino í uppbyggingunni. Það var þó ekki fyrir öllu því á 65. mínútu gerði Joe Rodon varnarmaður Tottenham sig sekan um mistök í vörninni þegar hann misreiknaði fyrirgjöf sem var að koma inn á teiginn og missti boltann framhjá sér þar sem Sadio Mané var staðsettur og skoraði þriðja mark Liverpool.

    Bestu menn Liverpool

    Sadio Mané var hrikalega góður í dag skoraði og lagði upp mark, auk þess lagði hann upp mark Salah sem var dæmt af og kom sér í góð færi og hefði á betri degið geta komið að enn fleiri mörkum. Trent fór loks að sýna sitt rétta andlit og Henderson stóð sína vakt vel í vörninni.

    Vondur dagur

    Þetta er vondur dagur fyrir Joel Matip en ef þær fréttir eru réttar að hann hafi slitið liðbönd í ökkla. Matip hefur einu sinni á þessu tímabili spilað tvo leiki í röð og var það fyrir og eftir landsleikjahlé. Oft var vilji en nú er hreinlega þörf á því að liðið versli eins og einn miðvörð bara til að ná í lið það sem eftir er tímabils.

    Umræðupunktar

    • Loksins, loksins, loksins jákvæð úrslit. Með tapi í dag hefðum við líklega endanlega getað gleymt einhverskonar titilvörn og þurft að fara að einblína á það hreinlega hvort við næðum meistaradeildarsæti fyrir næsta tímabil.
    • Eftir að hafa ekki sýnt mikið undanfarið fengum við aðeins að smakka á því hvað Thiago gerir fyrir þetta lið. Hann og Wijnaldum skiptu um stöðu og þó Thiago hafi kannski ekki verið frábær allan leikinn og varnarvinnan var stundum slök þá sýndi hann okkur hvers megnugur hann er.
    • Velkominn til leiks Trent Alexander-Arnold, hvað við höfum saknað þín!
    • Liverpool hefur nú spilað 20 leiki í deildinni í ár og í þeim notað 16 hafsentapör, það er gjörsamlega galinn tölfræði.
    • Næstu tveir deildarleikir er gegn West Ham og Brighton áður en Manchester City kemur í heimsókn. Ef við vinnum þá leiki setjum við pressu á City fyrir þann leik og gætum mögulega náð að pússla saman titilvörn þrátt fyrir sár síðustu vikna.

    Næsta verkefni

    Næst er það svo David Moyes og strákarnir hans í West Ham á London Stadium á sunnudaginn en Hamrarnir hafa ekki tapað deildarleik síðan 21. desember þegar þeir lágu fyrir Frank Lampard og hans fyrrum strákum í Chelsea.

  • Byrjunarliðið gegn Tottenham

    36 Comments

    Fréttir dagsins reyndust réttar og Fabinho er ekki í leikmannahópnum í kvöld gegn Tottenham. Enn halda því hafsenta vandamál Liverpool áfram á þessu tímabili en Matip og Henderson byrja leikinn í hjarta varnarinnar í kvöld.

    Fabinho er frá vegna lítillegra vöðvameiðsla en þetta setur enn og aftur spurningamerki við af hverju var ekki hægt að sækja varnarmann í byrjun janúargluggans.

    Bekkur: Kelleher, R.Williams, Phillips, Tsimikas, Jones, Chamberlain, Shaqiri, Minamino og Origi

    Þetta er liðið sem Klopp treystir á gegn Tottenham og vonandi ná þeir að sækja í mjög svo langþráðan sigur!

  • Útileikur við Spurs annað kvöld

    17 Comments

    Enn rúllar boltinn og annað kvöld mun Liverpool heimsækja Tottenham, það er ekki langt síðan liðin mættust á Anfield en þá voru liðin í efstu tveimur sætunum og með því að sigra þann leik náði Liverpool forskoti á toppnum og bjuggust menn við að liðinu myndi í kjölfarið fara á siglingu og ná góðri forystu á toppnum. Annað hefur verið raunin.

    Liðin eru núna aftarlega eða í miðri baráttu um eitthvað. Ég veit ekki einu sinni hvað ég á að kalla þetta því bæði lið eru klárlega enn í einhverri titilbaráttu en samt alveg líka í Meistaradeildarbaráttu eða í Evrópudeildarbaráttu eða… já, þetta er algjör hrærigrautur sem erfitt er að lesa í þar sem einhver lið eiga leik eða leiki inni. Staðan er í sjálfu sér þannig að maður þarf bara eiginlega að bíða og sjá til að vita hvar og hvernig lið standa.

    Allavega, að leiknum á morgun. Liverpool hefur verið í einhverji bölvaðri lægð og ekki verið að ná í jákvæð úrslit úr sínum leikjum. Liðið kannski átt smá kafla í leikjum sínum þar sem þeir virka fyrir að vera fínir en heilt yfir hefur bara alltof mikið vantað og á alltof löngum kafla, þá sérstaklega frammi. Töp gegn Burnley og Southampton og jafntefli við Newcastle, WBA og Man Utd eru rosa mikil vonbrigði og fjandi mörg óþarfa töpuð stig þarna.

    Spurs hefur á meðan verið að gera jafntefli við Wolves og Fulham en unnið Leeds og Sheffield United. Þeir róteruðu liðinu sínu eitthvað aðeins í bikarleik gegn Wycombe á síðastliðnu mánudagskvöldi. Óvíst er með vinstri bakverðina þeirra Reguilon og Ben Davies en þeir hafa ekki verið á æfingum í vikunni hjá þeim, Lo Celso er frá vegna meiðsla eins og Dele Alli og óvíst er með Matt Doherty í bakverðinum hjá þeim. Flestir þeirra lykilmenn eins og Hojberg, Kane, Son og Ndbombele eru heilir og í fínu standi. Kane og Son hafa verið frábærir á leiktíðinni fyrir Spurs en eru kannski ekki alveg eins heitir í markaskorun og þeir voru í aðdraganda fyrri leik liðana sem er nokkuð eðlilegt því það var gjörsamlega allt inni hjá þeim fyrir það.

    Jordan Henderson og Joel Matip eru að æfa á fullu aftur með liðinu svo það má sterklega reikna með þeim aftur í liðið á morgun og líklega fara þeir báðir beint í byrjunarliðið. Ekki hefur komið fram hvenær von sé á Naby Keita aftur en það vonandi fer að styttast í að Diogo Jota verði klár sem fyrst.

    Það var drullu pirrandi tapleikurinn gegn Man Utd í bikarnum á sunnudaginn en þó má taka jákvæða punkta úr þeim leik og sáum við hluti sem við vorum farin að sakna mikið í sóknarleiknum. Þeir sköpuðu betri og öðruvísi færi en manni hefur fundist þeir gera undanfarið og skoraði Salah til að mynda tvö mjög góð mörk og kannski óheppinn að hafa ekk skorað þriðja. Vonandi eitthvað sem hann heldur áfram að gera!

    Alisson

    Trent – Fabinho – Matip – Robertson

    Henderson – Thiago – Wijnaldum

    Salah – Firmino – Mane

    Ætla að giska á að þetta verði liðið og svona á pappír besta liðið sem Liverpool gæti stillt upp þessa dagana. Kannski kæmi Henderson í djúpa miðjumanninn og Thiago færi ögn framar en undnafarið, ég að minnsta kosti tippa á að þessir þrír verði á miðjunni. Salah, Mane og Firmino verða pottþétt frammi og Matip kemur inn fyrir Rhys Williams.

    Þetta er algjör must win leikur ef Liverpool vill ekki hellast algjörlega úr lestinni í toppbaráttunni og jafnvel lenda í óþægilegri stöðu í baráttu um Meistaradeildarsætin. Erfiður útileikur gegn góðu liði en mikið væri rosalega gott að fá ansi langþráðan og góðan sigur. Allir tengdir Liveprool þurfa á sigrinum að halda.

  • Gullkastið – Déjà vu

    24 Comments

    Það er eins og við séum stanslaust að horfa á sama leikinn þessa dagana, tveir vondir tapleikir í þessari viku og áframhald á ömurlegu gengi. Aðalvandamálið blasir við en eigendur félagsins eru ekki aðeins farnir að fara í taugarnar á stuðningsmönnum liðsins heldur stjóranum líka sem er meira áhyggjuefni. Frank var sparkað hjá Chelsea og framundan eru Mourinho og Moyes með tilheyrandi gleði.

    Stjórnandi: Einar Matthías
    Viðmælendur: SSteinn og Maggi

    MP3: Þáttur 321

  • United 3 – 2 Liverpool

    49 Comments

    Liverpool tókst á afar lúmskan hátt að minnka hjá sér leikjaálagið á næstu vikum með því að tapa 3-2 gegn United í kvöld. Jafnframt tókst Klopp að senda þau skilaboð til eigenda að það hreinlega verður að útvega miðvörð eða miðverði áður en glugginn lokar. #ljósupunktarnir #pollýanna

    Mörkin

    0-1 Salah (18. mín)
    1-1 Greenwood (26. mín)
    2-1 Rashford (48. mín)
    2-2 Salah (58. mín)
    3-2 Fernandes (78. mín)

    Gangur leiksins

    Leikurinn byrjaði nokkuð jafnt, en á 18. mínútu sýndi Roberto Firmino að hann er ennþá meðal þeirra allra bestu þegar hann átti hárnákvæma sendingu á Salah sem kúrði milli tveggja varnarmanna, og Salah gerði engin mistök þegar hann vippaði yfir Dean Henderson í markinu. 0-1 og afar jákvætt að liðið er farið að skora aftur. En því miður hélst þetta forskot ekki lengi, United unnu boltann við eigin vítateig, boltinn barst til Rashford á hægri kanti þeirra, hann sá hlaup frá Greenwood og sendingin rataði á hann þrátt fyrir hetjulega tilraun hjá Milner að skalla boltann. Greenwood renndi boltanum í fjærhornið og Alisson kom engum vörnum við. Engin fleiri mörk voru skoruð í hálfleiknum, en United voru meira með boltann og voru heldur líklegri, að hluta til vegna þess að Rhys Williams var ansi mistækur í miðverðinum og átti alveg til að selja sig. En 1-1 í hálfleik og alveg hægt að lifa með því.

    Það var hins vegar ekki langt liðið á seinni hálfleikinn þegar sending barst frá miðjunni í átt að Rashford á hægri kantinum. Rhys var í veginum og hefði alltaf átt að hreinsa boltann en kiksaði svo Marcus slapp í gegn og gerði engin mistök. Okkar menn fóru reyndar að sækja í sig veðrið eftir þetta mark, Milner átti dauðafæri þegar hann fékk boltann á markteig en skóflaði boltanum yfir. Milner bætti hins vegar fyrir þetta örskömmu síðar; liðið vann boltann framarlega eftir útspark United, boltinn barst á Firmino vinstra megin sem gaf inn í teig, Milner lét boltann fara á Salah sem var fyrir aftan hann, og Salah átti gott skot sem Henderson átti engan séns í. Þarna var staðan orðin 2-2, og allt í járnum. Mané kom inná fljótlega fyrir Gini, Curtis fór niður á miðjuna og Mané í sína hefðbundnu stöðu.

    Næstu mínútur sáum við glitta aftur í gamla góða Liverpool. Liðið var meira með boltann, og þegar United fékk boltann var pressan frá okkar mönnum fín. En því miður náðist ekki að bæta við marki á þessum kafla leiksins. Þegar 12 mínútur voru til leiksloka gerði Fabinho sig sekan um að brjóta klaufalega á Cavani á vítateigslínunni, aukaspyrna var dæmd sem Bruno Fernandes tók og skoraði í markmannshornið, reyndar alveg út við stöng. Thiago hefði sjálfsagt getað gert betur því hann var nálægt boltanum, en líklega er helst hægt að skrifa þetta á Fab fyrir að hafa gefið aukaspyrnuna til að byrja með.

    Okkar menn reyndu að jafna og áttu einhver hálffæri, en besta færið féll í skaut United undir lok leiksins þegar Cavani skallaði í stöng. Leiknum lauk því með 3-2 sigri United.

    Bestu/verstu menn

    Það verður auðvitað ekki horft framhjá frammistöðu Rhys Williams. Drengurinn er alls ekki tilbúinn í svona leiki, hugsanlega getur hann spilað eitthvað hlutverk í deildarbikar og leikjum sem skipta minna máli. En gleymum heldur ekki að hann er 19 ára, og í fullkomnum heimi þá væri hann á láni hjá liði sem hæfði hans getustigi í augnablikinu. Og Klopp vill örugglega ekkert vera að spila svona ungum strák í þessari stöðu, en hann er með nákvæmlega einn heilan miðvörð (í augnablikinu) og sá er ekki með skrokkinn í að spila 3 leiki á 8 dögum. Hinir möguleikarnir eru Nat Phillips og Billy Koumetio, það eru allar líkur á að Klopp og félagar séu búnir að vega og meta hvort hinir tveir séu betri en Rhys og hafi komist að þeirri niðurstöðu að svo sé ekki (sem er líklega rétt hjá þeim). Þá er það hinn möguleikinn og það er að spila tveim miðjumönnum í þessari stöðu. Eftirá er auðvelt að segja að það hefði verið málið að setja Gini í þessa stöðu, en munum að leikurinn fyrir viku síðan var einmitt með tveim miðjumönnum. Vissulega tapaðist sá leikur ekki, en á móti kemur að liðið skoraði ekki heldur.

    Ef maður á að velja hver var að standa sig best, þá er svosem alltaf erfitt að horfa framhjá því þegar leikmaður skorar 2 mörk. En það má líka nefna Milner og eins var Curtis Jones líflegur, sótti t.d. aukaspyrnu í uppbótartíma þegar restin af liðinu var allt of mikið í því að finna sendingu sem var ekki smuga að kæmist til andstæðinganna. Þar er leikmaður með ákveðið svægi sem við eigum alveg örugglega eftir að sjá meira af. Curtis má hins vegar taka aðeins minna alvarlega þetta með að hafa tekið við af Lallana, og má á köflum klappa boltanum aðeins minna. Nú og svo er hann pínku stöðuvilltur á köflum en kannski er það bara hans karakter.

    Umræðan eftir leik

    Fyrst það þurfti að tapa á móti United þá var líklega skömminni skárra að það gerðist í kvöld frekar en í deildinni fyrir viku, en samt drullufúlt. Höfum það alveg á hreinu.

    Höfum það líka á hreinu að í kvöld kom í ljós að miðvarðarkrísan getur vel kostað okkur leiki. Núna var vandamálið í raun ekki markaskorunin, heldur vörnin. Rhys þurfum við ekki að ræða meira, nema í samhenginu “af hverju þarf að setja hann í þá stöðu að vera að spila yfirhöfuð?”. Það sem þarf aðallega að ræða er af hverju eigendum Liverpool finnst allt í lagi að ætla að klára þetta tímabil með hálfan miðvörð í hópnum. Nú fer janúar að klárast, og það virðist ljóst að enginn verði keyptur. Þar með getum við afskrifað þetta tímabil, síðustu vikur hafa sýnt okkur það.

    Þessi leikur sýndi okkur líka hvað það er mikilvægt að fá Fabinho aftur í sína stöðu. Hann er vissulega búinn að bjarga því sem bjargað verður varðandi miðvarðarstöðuna, en hans besta staða er sem varnarsinnaður miðjumaður. Thiago hefur verið að spila þá stöðu, en hann er ekki að skila því eins og Fabinho getur. Best væri að fá hann framar.

    En það eru því miður engar líkur á að þetta verði hægt á þessari leiktíð. Klopp virðist sitja uppi með stöðuna eins og hún er núna, og stendur ekki til að eyða meiri peningum í leikmannakaup, þó svo þörfin sé gríðarleg.

    Framundan er svo leikur gegn vini okkar, Jose Mourinho á fimmtudagskvöld. Ef liðið tapar þeim leik og liðin í kringum okkur vinna, þá gætum við verið að sjá Liverpool í kannski 7. sæti í deildinni.

    Ef möguleikinn á því að fara úr 1. sæti fyrir nokkrum vikum í það 7. eru ekki skýr skilaboð til eigendanna, hvaða skilaboð þurfa þeir þá að fá?

  • Liðið gegn United í bikarnum

    36 Comments

    Í bikarkeppnunum er liðið tilkynnt 75 mínútum fyrir leik, og því er búið að gefa út hverjir byrja núna kl. 17:00 á Old Trafford:

    Bekkur: Kelleher, Tsimikas, Nat, Neco, Ox, Shaqiri, Minamino, Mané, Origi

    Henderson ennþá frá eins og búist var við, en Matip er hvergi sjáanlegur. Eigum við að veðja á að hann sé meiddur?

    Undirrituðum finnst jákvætt að Milner sé inná, nú þarf styrka stjórn frá “senior” leikmanni sem hefur marga fjöruna sopið.

    Annars er þetta með sterkasta liði sem hægt er að stilla upp. Mané vissulega á bekknum, en hann fékk enga hvíld í síðustu tveim leikjum og mikilvægur leikur gegn Spurs framundan á fimmtudaginn, svo það er ekkert skrýtið að hann fái aðeins pásu. Það sem er áhugaverðast í þessu er að svo virðist sem Jones taki hans stöðu. Jones er vissulega fjölhæfur leikmaður, og þetta er staða sem hann tók að sér í einhver skipti með U23, svo hann er ekkert alveg ókunnugur að spila þarna. Vissulega er líka möguleiki að það verði stillt upp í meira 4-4-2, en það er ólíklegra.

    Klopp hefur aldrei unnið United á Old Trafford, er ekki bara kominn tími til að snúa því, sem og gengi síðustu vikna? Ekki það að bikarinn er auðvitað allt önnur skepna heldur en deildin, en hér væri afar kærkomið ef sóknarlínan myndi kannski hrökkva aðeins í gang.

    KOMA SVO!!!

  • Upphitun: Bikarleikur gegn Manchester United

    10 Comments

    Á morgun, aðeins viku frá því að við mættum þeim í deildarleik, ferðumst við til Manchester að mæta þar United mönnum á Old Trafford í enska bikarnum. Það er alls ekki svo oft sem þessi lið mætast utan deildarleikja en frá aldarmótum verður þetta níundi leikurinn milli liðanna í öðrum keppnum.

    Eina skiptið sem það hefur gerst undir stjórn Klopp var þegar liðin mættust heima og heiman í 16-liða úrslitum Evrópudeildarinnar í mars 2016. Liverpool fór áfram með sigri á Anfield og jafntelfi á Old Trafford en aðeins þrír leikmenn eru enn í leikmannahópnum sem byrjuðu þá leiki. Firmino og Henderson spiluðu báða leikina og Milner aðeins þann seinni en auk þeirra kom Divok Origi inn á sem varamaður í báðum leikjunum.

    Tveir eftirminnilegustu leikirnir af þessum átta sem spilaðir hafa verið voru þeir tveir fyrstu eftir aldarmót, þar sem Liverpool gekk burt með titla eftir þá báða. Fyrst mættust liðin 2001 á Þúsaldarvellinum í Cardiff í leik um góðgerðarskjöldinn þar sem Gary McAllister og Michael Owen skoruðu í 2-1 sigri en tæpum tveimur árum síðar mættust þau á sama velli í úrslitaleik deildarbikarsins og voru það þá Owen og Steven Gerrard sem skoruðu mörkin í 2-0 sigri.

    Andstæðingurinn

    Þessi dráttur er nánast jafn slæmur fyrir Solskjær eins og hann er fyrir okkur. Þeir hafa komið öllum á óvart og sitja á toppi deildarinnar þegar tímabilið er hálfnað (þó City geti komist upp fyrir þá ef þeir vinna leikinn sem þeir eiga inni). Það er því spurning hversu miklu púðri United vilja eyða í bikarkeppnina þegar þeir sjá fram á að eiga loks einhvern möguleika á deildinni í fyrsta sinn síðan Sir Alex steig til hliðar.

    Ef Solskjær gerir of miklar breytingar og tapar fyrir Liverpool verða stuðnigsmenn liðsins ósáttir en það gæti allt eins gerst að hann spili á sínu sterkasta liði og liðið hiksti svo í deildinni í kjölfarið þá verður hann einnig gagnrýndur fyrir að hvíla ekki í bikarnum.

    Þó það séu engir léttir leikir í ensku úrvalsdeildinni gæti verið að Manchester United menn horfi í það að í næstu umferð þar eiga þeir Sheffield United og sjá líklega fyrir sér að þeir geti hvílt aðeins þá. Því á ég von á þeirra sterkasta liðið með hugsanlega einstökum breytingum á morgun.

    Eftir að hafa komið tilbaka og náð leiknum gegn Liverpool í síðustu viku var Lindelöf aftur fjarverandi gegn Fulham í miðri viku en búist er við að hann verði aftur klár á morgun, annars eru meiðsli United manna ekki hjá mönnum sem eru líklegir til að koma við sögu á morgun.

    Það verður hinsvegar áhugavert að sjá hvort Donny Van Der Beek fái tækifæri að sanna sig en hann hefur aðeins fengið um 250 mínútur síðan hann gekk til liðs við United í sumar.

    Okkar menn

    Það hefur verið mikið rætt um dýfu Liverpool síðan þeir völtuðu yfir Crystal Palace fyrir jól en fyrir utan sigur leik í bikarnum gegn unglingaliði Aston Villa hefur liðið spilað fimm leiki og skorað í þeim eitt mark. Það mark kom snemma í fyrsta af þessum fimm leikjum og síðan þá hefur liðið átt 87 skot án þess að skora. Vandamálið er þó ekki aðeins skortur á mörkum því þrátt fyrir öll þessi skot þá hafa gæði færana hreinlega ekki verið nægilega góð.

    Klopp viðurkenndi það á blaðamannafundi að sjálfstraustið er ekki gott þessa dagana og ljóst að við erum ekki að horfa á lið af Mentality Monsters eins og hann hefur talað um síðustu ár.

    Hinsvegar þarf oft ekki mikið til að snúa svona gengi á haus og eins og einn bolti sem slysast í netið hjá andstæðingnum á heppilegum tíma getur verið nóg til að byrja að byggja trúnna aftur en það má eiginlega ekki gerast mikið seinna en á morgun!

    Fyrirliðinn Jordan Henderson verður ekki með á morgun en hann er enn frá vegna vöðvameiðsla en auk hans eru fastir liðir eins og venjulega Van Dijk, Gomez, Keita og Jota á meiðslalistanum. Kostas Tsimikas snéri hinsvegar aftur á bekkinn í síðasta leik og þó hann sé ekki líklegur til að spila mikið á kostnað Robertson þá hljótum við að fagna öllum sem snúa aftur af meiðslalistanum þessa dagana.

    Ég á erfitt með að meta hversu mikið Klopp mun breyta liðinu fyrir þennan leik. Kelleher hefur verið að fá bikarleikina og gæti alveg verið í markinu og Tsimikas gæti leyst Robertson af en liðinu sárvantar að fara vinna fótboltaleiki og gæti því trúað að Klopp fari með frekar sterkt lið í leikinn.

    Firmino og Salah hvíldu báðir gegn Burnley og ég gæti því séð Mané hvíla þennan leik. Matip gæti einnig fengið frí til þess að hann gæti spilað gegn Tottenham á fimmtudaginn en tel að Trent sé sá leikmaður sem þurfi mest á smá pásu að halda svo ég setti Neco inn í liðið og sé hann ekki fara með óreyndan mann við hliðinna á honum og þar sem Henderson er meiddur að þá var Matip eini kosturinn sem var eftir í stöðuna.

    Á miðjunni býst ég við að Gini Wijnaldum fái frí og reyndi að púsla heilum mönnum í kringum það. Vissulega gætum við séð Oxlade-Chamberlain eða Shaqiri í einni af þessum stöðum í stað Milner eða Jones en á endum ákvað ég að spá þessu svona.

    Mín spá

    Vegna gengi undanfarinna ára hef ég gengið inn í hvern einasta Liverpool leik að búast við sigri í langan tíma en ég væri að ljúga ef ég vildi meina að gengi síðustu vikna væri ekki farið að hafa áhrif á þá trú. Ég held að þessi leikur verði opnari en deildarleikurinn í síðustu viku og bæði lið muni skora. Við munum því enda markaþurrðina í 2-2 jafntelfi þar sem Salah og Jones skora fyrir Liverpool og við vinnum svo leikinn í vítaspyrnukeppni þar sem við höfum aldrei tapað í vítaspyrnukeppni í FA cup.

  • Liverpool 0-1 Burnley

    50 Comments

    0-1 Ashley Barnes 83.mín

    Leikurinn

    Liverpool voru grútlélegir í fyrri hálfleik fyrir utan eitt færi. Divock Origi slapp einn í gegn á móti markverði eftir mistök varnarmanns á 44.mínútu. Meistari Divock setti sitt skot samskeytin og staðan var jöfn í hálfleik.

    0-0

    Liverpool voru grútlélegir í seinni hálfleik og án alvöru sóknarfæra. Burnley fengu vítaspyrnu á 82.mín og skoruðu úr henni. Liverpool átti engin svör við því og töpuðu leiknum.

    0-1 tap

    Tölfræði

    Liverpool voru mjög lélegir í kvöld og skotatalning eða boltaprósenta er blekkjandi í tölfræðinni og engin ástæða er til þess að taka mark á henni. Sanngjarnt tap.

    Bestu menn

    Allir það langt undir meðaltali að enginn á skilið jákvæða umfjöllun.

    Vondur dagur

    Allir það langt undir meðaltali að allir eiga skilið það tilkall að hafa átt vondan dag.

    Umræðan

    Okkar menn hafa verið fullkomin hörmung í síðustu 5 leikjum. Af hverju er erfitt að svara en þeir eru í frjálsu falli þessi stundina. Viðmiðin sem Englands- og Evrópumeistararnir hafa sett síðustu árin eru hvergi sjáanleg. Vissulega getur verið erfitt að verja titil en af hverju toppstaða um jólin endar í þessari hörmung mánuði síðar er óskiljanlegt og eitthvað sem Klopp verður að tækla og horfast í augun með. Enn er auglýst eftir kaupum á miðverði til að fylla skarð hinna meiddu VVD og Gomez og hins selda Lovren. Þó að besti maður leiktíðarinnar Fabinho sé að reyna að bjarga einhverju í vörninni þá er hans saknað á miðjunni. Og sóknarþrennan þarf að bóka sig á heilsubælið í Gervahverfi til að finna bót sinna meina því að þetta er hætt að vera fyndið.

    YNWA

  • Byrjunarliðið gegn Burnley á Anfield

    74 Comments

    Árið 2021 hefur ekki byrjað neitt sérstaklega vel hjá Púlurum sem vakna allt í einu upp við vondan draum heilum 6 stigum frá toppsætinu. Í heimsókn eru komnir Burnley-liðar sem hafa oft valdið Rauða hernum verulegum vandræðum með varnarsinnuðu veseni. Þá er möguleiki á því að Jói Berg spili á Anfield og oftar en ekki hefur hann bókstaflega sett mark sitt á leiki gegn Liverpool.

    Byrjunarliðin

    Klopp hefur valið eftirfarandi leikmenn til að herja á Burnley í kvöld með þeim sérstöku áherslum að Matip er kominn aftur eftir meiðsli en hins vegar fyrirliðinn Henderson meiddur.

    Liverpool: Alisson; Trent, Matip, Fabinho, Robertson; Thiago, Wijnaldum, Oxlade-Chamberlain; Shaqiri, Mane, Origi

    Bekkurinn: Kelleher, Phillips, Tsimikas, N.Williams, Milner, Oxlade-Chamberlain, Jones, Origi, Minamino, Firmino, Salah

    Hjá gestunum eru blikur á lofti með Blikann GUDMUNDSSON á bekknum en liðið annars skipa svona:

    Upphitunarlagið

    Til að heiðra orðleikjavífillengjuviskubúskap þá er er klárt mál að upphitunarlagið verður brennandi heitt með bruna á engilsaxneskiu að leiðarljósi. Útbrunnu öskubuskudrengirnir í Ash eru því tilvalið íkvekjutilefni enda Íslandsvinir með meiru sem að leikskýrsluskríbent hitaði upp við í Laugardalshöllinni forðum daga. Hið eldheita Burn(ley) baby Burn(ley) er því brennandi heitt upphitunarlag kvöldsins:

    Come on you REDS! Allez! Allez! Allez!

    YNWA!

    Við minnum á #kopis á Twitter og umræðuna í athugasemdum hér að neðan og á Facebook.

Load More
Congratulations. You've reached the end of the internet.

© 2019 KOP.is

Back to Top
Close