Hver tekur við Liverpool?

Síðast þegar FSG þurfti að leita að nýjum stjóra fyrir Liverpool náðu þeir bókstaflega að sannfæra þann besta sem var í boði. Klopp var búinn að vera undir smásjánni hjá þeim frá því þeir keyptu félagið og þegar hann var staðfestur var hann strax svo gott sem óumdeild ráðning með öllu, stemmingin hér var sannarlega góð.

Krafan núna er augljóslega að endurtaka leikinn. Liverpool er mætt aftur á efsta þrep fæðukeðjunnar og á ekki að bjóða neinum að taka við liðinu nema þeim besta í faginu. Vandamálið er bara að núna er alls ekki jafn auðvelt að skilgreina hver það ætti að vera og hvaða stjóri hentar Liverpool best?

Gefum okkur auðvitað að Pep Guardiola er ekki í boði, fyrir utan hann væri erfitt að svara þessu þó við mættum velja frjálst úr hópi allra annara stjóra í heimsfótboltanum, satt að segja er Liverpool líklega ekki langt frá því að geta gert einmitt það eins og staðan er núna.

Hvaða kröfur gerir FSG?

FSG hefur alveg sýnt það í hafnabolta að þeir eru tilbúnir að leggja traust sitt á óþekkta aðila ef þeir kaupa það sem viðkomandi hefur að selja. Það á þó mögulega frekar við um líklegan yfirmann knattspyrnumála frekar en næsta stjóra. Hlutverk sem líklega verður ekki síður mikilvægt á ný eftir að Klopp tók undanfarin ár meiri og meiri ábyrgð utanvallar og við horfuðum á eftir mönnum eins og Michael Edwards og Julien Ward án þess að fylla þeirra skarð.

Reynsla af því að stjórna stórliði eða a.m.k. reynsla af stórliði er líklega á listanum. Þekkja það að spila tvisvar í viku megnið af tímabilinu o.þ.h. FSG er núna tólf árum seinna vaxið upp úr því að velja á milli stjóra Swansea eða stjóra Wigan sem báðir voru vissulega að gera sæmilega spennandi hluti með sín lið á þeim tíma.

Höfum samt alveg hugfast að Arteta, Zidane og Guardiola eru allt dæmi um stjóra sem höfðu ekki reynslu af stjórastarfi, hvað þá hjá risaliði áður en þeir gengu í slíkt starf og náðu strax fótfestu. Allir höfðu tengingu við félagið sem þeir tóku við og voru búnir að taka smá reynslutíma bak við tjöldin sem stjórar B-liða eða sem aðstoðarstjórar.

Nútíma hugmyndafræði hvað leikstíl varðar, einhvern sem fellur undir skilgreininguna að vera snjallari en andstæðingurinn. Árangur Liverpool undir stjórn Klopp er lygilegur í samanburði við eyðslu helstu keppinauta og næsti stjóri þarf að bjóða upp á eitthvað sem sker Liverpool úr innan vallar. Eins þarf viðkomandi að passa við það sem Liverpool 2024 er að gera og vilja nota það sem er til staðar nú þegar hjá félaginu.

FSG er líklega ekki mikið að spá í tengingu við Liverpool og vilja líklega forðast það að lenda aftur í þeirri stöðu að þurfa að segja upp goðsögn eins og Kenny Dalglish sem dæmi. En stjóri Liverpool þarf að vera persónuleiki sem skilur félagið og stuðningsmenn þess. Frumskilyrði er líklega að kunna ensku ágætlega.

Þetta er langt í frá tæmandi listi og líklega er ekkert eitt rétt svar.

Hvaða nöfn eru helst til umræðu?

Alonso er langefstur hjá veðbönkum núna fyrstu dagana sem segir mögulega eitthvað um þennan markað í dag. Stjórar eins og Klopp og Guardiola eru svo rosalega miklar undantekningar í dag því flestir knattspyrnustustjórar eru aðeins 2-3 ár í sama starfinu núorðið og því erfiðara að skilgreina hver er afgerandi bestur líkt og þeir tveir hafa verið í áratug.

Hlutabréf í Alonso eru í hámarki akkuart í augnablikinu og hann er með augljósa Liverpool tengingu. Það er alls ekkert víst að staðan verði ennþá þannig í maí. Byrjun hans hjá Leverkusen er vissulega lyginni líkust, tók við liðinu í næst neðsta sæti en skilaði þeim í 4.sæti. Vantar aðeins í þá jöfnu að liðið var að spila langt undir getu enda þriðja besta lið deildarinnar tímabilið á undan.

Byrjun Leverkusen í vetur er hinsvegar í alvöru mjög spennandi og margt af því sem hann er að gera með þetta lið er auðveldlega hægt að heimfæra á Liverpool liðið og sjá það virka. Það er líklega mun nær að horfa í það heldur en þá staðreynd að liðið er núna með 49 stig í 19 leikjum (86%) 50 mörk skoruð og aðeins 14 á sig. Eins má alveg gera ráð fyrir að Alonso sé bara rétt að byrja að þróast sem stjóri og geti bætt sig.

Alonso tók svipað og æskuvinur sinn Mikel Arteta, Guardiola og Zidane sinn tíma í að undirbúa sig undir það að verða stjóri með því að þjálfa unglingalið Real Madríd og fór svo heim til Sociedad til að stýra B-liðinu í þrjú tímabil og kom þeim m.a. upp í B-deild í fyrsta skipti í 50 ár. Mögulega horfir hann til þess sem Arteta er að gera hjá Arsenal þrátt fyrir að hafa ekki verið með reynslu sem aðalliðsstjóri áður en hann tók við Arsenal.

Alonso þekkir það svo auðvitað betur en allir að vera hjá stórliði, þekkir í raun ekkert annað og vann allt galleríið sem leikmaður og lykilmaður hjá Liverpool, Real, Bayern og landsliðinu sem var sturlað lið. Spilaði fyrir Guardiola, Ancelotti, Mourinho, Benitez og Del Bosque.

Stóra spurningin er hvort hann sé að koma fram á sjónarsviðið sem boðberi nýrra tíma og að þróa leikstíl Klopp og Guardiola sem smátt og smátt hefur orðið mainstream. Það koma alltaf nýjar kynslóðir sem þróa leikinn og koma með nýjar hugmyndir sem bylta því sem við þekkjum fyrir. Hvort Alonso sé slíkur stjóri er erfitt að greina.

FSG vona ég samt að séu að leita af því heldur en einhverju gamla skóla þroti.

De Zerbi er svosem ekkert mikið ofar en aðrir hjá veðbönkum og langt á eftir Alonso. Hann hefur engu að síður verið hvað mest í umræðunni núna fyrsta kastið og alls ekkert hægt að útiloka að Liverpool horfi til hans. Hann væri kannski nálægt Brendan Rodgers ráðningunni?

RDZ myndi klárlega koma með persónuleika og karakter sem gæti tengt vel við Anfield. Hann er eins og Alonso með nýjar og spennandi hugmyndir hvað leikstíl varðar og hefur verið að gera mjög spennandi hluti undanfarin ár með Sassoulo, Spartak Moskva og núna Brighton. Lið sem alltaf selja sína bestu leikmenn þegar þeir tengja saman sjö sendingar í röð.

Gengi Brighton má ekki vera aðalatriði þegar De Zerbi er mátaður við Liverpool, heldur hvernig hans hugmyndafræði mátast við það að stýra Liverpool? Hvernig árangri næði hann á Ferrari í staðin fyrir Sauber ef við notum Formúlu 1 samlíkingu?

De Zerbi er á fínum aldri og búinn að hlaupa af sér hornin og þróa sinn leikstíl með misjöfnun árangri sem hann hefur fram yfir Alonso. Hann mun taka við stærra lið fljótlega, spurningin er hvaða liði og hvenær? En það er erfitt að segja að hann sé meira spennandi en Xabinn okkar eftir 4-0 skell gegn Luton í þessari viku!

Red Bull stjórarnir

Það hefur aðeins komið á óvart hversu lágt Red Bull stjórarir skora hjá veðbönkum miðað við tengingu FSG við Red Bull og samlíkindi með hugmyndafræði.

Julien Nagelsmann auðvitað blasir við úr þeim hópi og hefur ferilsskrá sem ætti að vekja athygli FSG. Hann er bara 37 ára og hefur auðvitað lengi verið talinn helsti arftaki Jurgen Klopp í þýska boltanum. Hann tók 28 ára við Hoffenheim og náði frábærum árangri með það lið, bjargaði frá falli á fyrsta tímabili og skilaði þeim svo m.a. í Meistraradeild. Áður en hann tók við sem stjóri aðalliðsins hafði hann verið yngriflokkaþjálfari í læri hjá Ralf Ragnick.

Ralf Ragnick var maðurinn á bak við fáránlegan uppgang Hoffenheim upp allar deildir í Þýskalandi og var svo fenginn til að leiða Leipzig (og Red Bull samsteypuna) í sambærilegu verkefni. Það kom því ekki á óvart 2018 að Leipzig réði Nagelsmann.

Bayern Munchen hafði það mikla trú á Nagelsmann 2021 að þeir keyptu hann frá Leipzig á €25m. Hann var rekinn 2023 þrátt fyri að vera með betra sigurhlutfall en Tuchel hefur verið með síðan og er núna með samning við Þýska landsliðið út næsta stórmót.

Þetta er ungur stjóri sem er kominn í efstu deild. Hann er með miklu flottari ferilskrá en Alonso og De Zerbi en stendur kannski ekki fyrir jafn spennandi nýungum í leikstíl?

Nagelmann gerði þó ein stór mistök hjá Bayern…

Marco Rose sem er núverandi stjóri Leipzig er annar sem FSG þekkir vel til og hefur stjórnað báðum Red Bull liðunum, Dortmund og Borussia Mönchengladbach. Hann var auk þess leikmaður undir stjórn Jurgen Klopp hjá Mainz og hefur tileinkað sér margt úr hans hugmyndafræði í þjálfun.

Roger Schmidt sem nú er stjóri Benfica er enn einn þjóðverjinn með Red Bull tengingu, sá var reyndar líka stjóri Leverkusen fyrir nokkrum árum.

Jesse March er svo enn einn Red Bull stjórinn sem vonandi er nú ekki á radar hjá FSG.

Oliver Glasner er annar ólíklegur og svosem ekki Red Bull stjóri en stendur fyrir svipaðan fótbolta og skilaði Wolfsburg og Frankfurt í Evrópu frá 2017-2023. Frankfurt vann m.a. Evrópudeildina undir hans stjórn.

Önnur áhugaverð nöfn í umræðunni

Er Zidane hættur í fótbolta? Talar hann ensku? Á rosalega erfitt að máta hann við Liverpool og held að hann hafi ekkert alltaf verið mjög sannfærandi með Real liðið þó Meistaradeildarárangurinn tali sínu máli. Hann er allavega ennþá með það há hlutabréf að hans nafn er með í umræðunni þegar svona stjórastaða losnar. Tengi hann samt betur við PSG, Chelsea, City eða Real, lið þar sem veskið skiptir ekki máli. Já eða landslið.

Hansi Flick er enn einn þjóðverjinn sem kannski væri rétt að gefa meiri gaum? Hann var stjóri Hoffenheim þegar liðið var í neðri deildum frá 2000-2005 en var svo aðstoðarstjóri í 13 ár frá 2006-2019. Fyrst hjá RB Salzburg, svo landsliðinu og því næst hjá Bayern. Hann tók sjálfur við Bayern frá 2019-21 sem er hans eina reynsla sem stjóri aðalliðs á efsta leveli.

Hann nýtti það hinsvegar ágætlega og vann þrennuna á öðru tímabili (deild, bikar og Meistaradeild) og svo deildina árið eftir líka með gríðarlegum yfirburðum. Stjóri ársins 2020.

Hann bað sjálfur um að hætta eftir þriðja tímabilið til að taka við sem landsliðsþjálfari, tók við af Low. Hjá landsliðinu er hann með næst versta sigurhlufall í nútímasögu landsliðsins (1,72 stig) og var rekinn eftir tvö ár.

Erfitt að meta hvort þetta sé ferilskráin sem Liverpool er að leita að, Flick er t.a.m. þremur árum eldri en Klopp.

Luis Enrique er stjóri PSG og óvíst hvort hann sé eitthvað að fara þaðan. Var þar á undan með landslið spánverja og Barcelona. Flest hin stóru liðin á Englandi eru með spænska stjóra og þetta er sannarlega eitt af stjóru þjálfaranöfnunum á Spáni.

Ruben Amorim er nafn sem kannski ætti að vera með Alonso í umræðunni. Hann var var stjóri B-liðs Braga í 11 leiki áður en þeim varð ljóst að hann væri allt of góður fyrir það level. Hjá aðalliðinu náði hann 13 leikjum áður en Sporting keypti hann á €10m. Þetta er klárlega heitasti bitinn í Portúgal og að gera frábæra hluti með Sporting. En er þetta nýr Villas Boas eða Mourinho?

Andoni Iraola stjóri Bournemouth er að sanna sig í ensku deildinni. Einn af nokkrum frábærum stjórum baskahéraðanna. Hann er aðeins 41 árs en hefur verið stjóri frá 2018, byrjaði ferilinn á Kýpur. Kannski ekki Liverpool level strax en þetta virðist vera mjög efnilegur stjóri.

Thomas Frank hjá Berntford hefur verið líkt við Klopp hefur sannarlega sýnt fram á að hann getur náð miklu úr litlu. Var aðstoðarstjóri Brentford frá 2016-18 og tók þá við liðinu. Nei takk frá mér en hans nafn hefur alveg verið í umræðunni.

Terzic er stóri Dortmund er efnilegur stjóri sem byrjaði árið 2010 sem njósnari fyrir Jurgen Klopp hjá Dortmund og hefur verið hjá félaginu allar götur síðan. Hann átti auðvitað að vinna deildina á síðsta tímabili en Dortmund klúðraði því á markamun.

Þekkja enska boltann

Unai Emery ætti kannski að vera á lista yfir mögulega stjóra Liverpool? Fyrir utan þann skamma tíma sem hann fékk hjá Arsenal hefur hann almennt gert góða hluti með sín lið og gert þá leikmenn sem hann hefur betri.

Ljinders hefur tekið fyrir það sjáflur að hann sé að fara taka við en er eðlilega einn af þeim sem er nefndur enda verið 10 ár aðstoðarstjóri liðsins og með metnað til að taka sjálfur við liði.

Postecoglou myndi eflaust vilja taka við Liverpool enda stuðningsmaður liðsins en er líklega kominn núna á stað sem hentar honum vel. Kom þessi gaur ekki 10-15 árum of seint til Evrópu?

Marco Silva – Fínn stóri en once Everton hans touched you….

Stjórar sem eru að gera áhugaverða hluti

Arne Slot er besti stjóri Hollendinga í dag og hefur náð að byggja upp öflugt lið hjá Feyenoord. Hann hefur ítrekað verið orðaður við enska boltann og var talinn líklegur til að taka við Tottenham í sumar.

Michel Sancehz er að gera fáránlega hluti með Girona á Spáni. Fór með þá upp um deild og er núna með liðið í öðru sæti og bullandi toppbaráttu í La Liga.

Abel Ferreira væri alvöru left field ráðning en þessi Portúgali er hefur farið sigurför um Brasilíu og Suður-Amerlíku með Palmeiras og verður vafalaust fengin aftur yfir hafið á einhverjum tímapunkti.

Lionel Scaloni er landsliðsþjálfari Argentínu og náðu auðvitað að gera það lið að heimsmeisturum.

Enzo Maresca er annar aðstoðarstjóri Pep Guardiola sem er að gera góða hluti sem stjóri. Maresca tók við Leicester fyrir tímabilið og er að rústa Championship deildinni spilandi öflugan fótbolta.

Vincenzo Italiano hefur verið stjóri Fiorentona frá 2021 og oft verið orðaður við stærri lið þó Liverpool sé líklega ekki eitt af þeim. Hann er samt einn af stjórunum í dag sem talinn er vera á uppleið og auðvitað á besta aldri.

Aðrir

Þessi listi inniheldur stjóra sem hefði kannski verið meira spennandi fyrir 7-10 árum en maður á erfitt með að máta við Liverpool. Tuchel hefur nú vonandi vit á því að taka ekki einn eina ferðina við af Klopp, er það ekki?

Hugsa sér hvað Gerrard greyið er langt frá því að vera talin líklegur. Hefði hlutabréf í honum verið hærri hefði hann haldið áfram að vinna sig upp innan Liverpool eins og hann var byrjaður að gera?

Önnur nöfn sem gætu komið meira inn í svona umræðu á næstu árum eru t.d. Francesco Farioli 34 ára gamall stjóri Nice og Sebastian Hoeneß stjóri Stuttgart og frændi Uli hjá Bayern.

En endum þetta á könnun