HM og æfingaferð til Dubai

Eðli málsins samkvæmt er verulega rólegt í fréttum af okkar mönnum enda HM í hámarki eins og stendur. Darwin Nunez er eini leikmaður Liverpool sem fór heim eftir riðlakeppnina og eins og flestir bjuggust við fara Alisson og Fabinho ekki heim alveg strax. Okkar maður frábær í markinu í dag gegn Son og félögum í S-Kóreu. Henderson kom Englendingum á bragðið og hefur verið að vinna í því látlaust með Trent að sannfæra Bellingham um að koma til Liverpool. Sá pjakkur er heldur betur að standa undir hype-inu það sem af er þessu móti. Van Dijk fór svo áfram með Hollendingum og Konate og félagar í Frakklandi eru til alls líklegir líka. Alvöru einvígi hjá honum næst gegn Henderson og félögum.

Liverpool fór annars með 33 manna hóp til æfinga í Dubai og koma til með að spila 2-3 æfingaleiki þar. Luis Diaz er mættur aftur til æfinga ásamt Keita og Matip sem vonandi er eitthvað sem heldur í þetta skiptið. Diogo Jota og Arthur eru þá þeir einu sem eru ennþá frá og er hvorugur væntanlegur í næsta mánuði ef ég skil þetta rétt.

Liverpool heldur annars áfram að vera orðað við allra þjóða kvikindi, sameiginlegur fjárfestingasjóður frá Katar og Saudi Arabíu var eitt slúðrið, þjóðir svo voru í viðskiptastríði bara um daginn! Þýskur hópur á að vera kominn á kaf í bækur félagsins einnig og auðvitað einn bandarískur hópur. Tökum ekki neinu af þessu trúanlega strax.

Stefnum á Gullkast annað kvöld.