Upphitun: Southampton á Anfield

Sérútgáfa af Gullkastinu með Snorra Dýrðling

 

Dýrðlingarnir mæta í dýrðina á Merseyside er SunnEnglendingarnir sækja höfuðborg Norður-Englands heim. Hinn rammþýski Jürgen Klopp fer í hugrænan sjómann við hinn austuríska Klopp í formi Ralph Hasenhüttl. Hver mun hafa betur í bardaga gallharðra germanskra? Ich weiß es nicht, aber wir spielen Fußball!!

Vér skírum yður séra Jürgenhüttl af Suðurdýrðum. Far í friði.

Mótherjinn

Southampton byrjuð tímabilið illa og náðu ekki að vinna sigur í fyrstu 7 deildarleikjum tímabilsins og virtist vera sem slæmar forspár svartsýnna sparkspekinga væru að rætast fyrir sunnanmenn. Í síðustu 5 deildarleikjum hefur Saints þó tekist að vinna 3 sigra sem hefur hýft þá hraðbyr upp í 13.sæti deildarinnar og virðist sem þeim hafi tekist að trekkja sig í gang. En tap gegn Norwich í síðustu umferð var löðrungur raunveruleikans um að nóg væri eftir af blóðugri baráttu fyrir tilverunni í úrvalsdeild hinna bestu þetta árið.

Hægt væri að rita mörg lærð orð um The Saints en það væri ólympíuæfing í óþarfleika þegar hægt er að fá alviturt akademískt korter með Yfir-Dýrðling Íslands og Encyclopedia Southamptanica; djassgeggjarinn, trompettröllið, vallarmeistarinn og lífskúnst-Nesbúinn Snorri Sigurðarson í sérútgáfu af Gullkastinu:

Ein albesta djassplata Íslandssögunnar er toppeintakið Vellir og það er alltaf völlur á toppeintakinu Snorra!

Að þeim spöku orðum mæltum þá er líklegt byrjunarlið Southampton neðangreint og líklega þeirra sterkasta uppstilling sem í boði er með lítil meiðsli í hópnum:

Líklegt byrjunarlið Southampton í leikskipulaginu 4-4-2

Tölfræðimolar

  • Liverpool hafa haldið hreinu í síðustu 5 heimaleikjum sínum gegn Southampton í öllum keppnum.
  • Liverpool eru ósigraðir í 21 af síðustu 22 úrvalsdeildarleik.
  • Liverpool hafa unnið Southampton í 7 af síðustu 8 leikjum liðanna í öllum keppnum.
  • Southampton hafa ekki náð að vinna sigur í 10 af síðustu 11 útileikjum sínum í Úrvalsdeildinni.

Samheitalið

Í ljósi gríðarlega mikilli leikmannatengsla Liverpool og Southampton þá er ekki annað hægt en að henda í samansafn af bestu XI manna sameiginlegu liði hins öfluga Liverhampton FC. Það samanstendur af leikmönnum sem hafa spilað fyrir bæði lið og margir seldir þráðbeint á milli. Það þarf enginn að segja mér að þetta lið yrði ekki dóminarandi stórveldi í enskri knattspyrnu!!

Liðsuppstilling Liverhampton FC í leikskipulaginu 3-4-3

Bekkurinn: Paul Jones, Barry Venison, Nat Clyne, Sammy Lee, Danny Ings, Rickie Lambert (vítaskytta af bekknum)

Stillt yrði upp í sókndjarft 3-4-3 með góða vinnslumenn sem síhlaupandi vængbakverði í Ox og Adam. Grjóthörð vörn sem lætur granít gráta með Grobbelaar að grínast fyrir aftan en enginn kemst í gegn nema fuglinn fljúgandi. Jimmy Case sér um tæklingarnar á miðjunni og Jamie Redknapp um sykursætar spékoppasendingar og skotfastar aukaspyrnur. Í fremstu víglínu skallar Crouch boltann niður fyrir skotfætur Kevin Keegan og Sadio Mané ásamt öflugum varamönnum, Venisonum og vítaskyttum af bekknum. Getur ekki klikkað!

Liverpool

Okkar menn hafa mætt gríðarlega öflugir til leiks eftir landsleikjahléið með mögnuðum sigri á Arsenal og snyrtilega framkvæmdu skylduverkefni gegn Porto. Þriðji heimaleikurinn í röð fer því fram við bestu aðstæður þar sem sjálfstraustið er í botni og leikformið í góðum gír með fínum róteringarbónusum og batnandi meiðslalista. Klopp og allir Púlarar gera því kröfu um áframhaldandi kraft í frammistöðu liðsins til þess að ná að halda öflugum dampi í toppbaráttunni.

Hafa ber þó í huga við liðsvalið að næsti deildarleikur sem fer fram næsta miðvikudagskvöld er lítill innanbæjarslagur gegn Everton og Rafa Benitez. Með það í huga er mín spá um liðsuppstillingu sú að margir af þeim sem fengu róterandi hvíldarskiptingu gegn Porto haldi sæti sínu í liðinu og þar er ég sérstaklega að tala um Tsimikas, Tiago og Oxlade Chamberlain.

Einnig held ég að Matip fái hvíld eftir tvo leiki í röð og verði sparaður fyrir bláliðana þannig að Konate heldur einnig sínu sæti en fái VVD sér til halds og trausts. Sama gæti gilt um Minamino þar sem Jota er að koma úr smávægilegum meiðslum og betra væri að hafa hann til taks á bekknum ef vel gengur og hægt er að hvíla Salah eða Mané. Fyrirliðinn Henderson verður einnig sparaður fyrir borgarslag Bítlanna þannig að liðsuppstillingin gæti verið á þessa leið:

Líklegt byrjunarlið Liverpool í leikskipulaginu 4-3-3

Spakra manna spádómur

Heimaleikur gegn Southampton telst skyldusigur fyrir tititilvonir og væntingar Liverpool og þar má engu skeika í harðri baráttu við misbláa keppinauta. En fyrir Southampton væri gott jafntefli gulli betra og Snorri Djass-Dýrðlingur spáir leiknum 1-1 með mörkum frá Salah og Che Adams.

Sjálfur ætlar pistlahöfundur að gerast svo spádómslega vaxinn að giska á 3-1 sigur þar sem fyrrum Saints-mennirnir Salah, Virgil og Minamino skora fyrir heimamenn en Ward-Prowse setur sárabótarmark fyrir gestina.

YNWA

16 Comments

  1. “skyldusigur” þetta orð fer í mig. Skil alveg hvaða merkingu þú setur í þetta orð. Ef Liverpool ætlar að vinna deildina verður liðið að vinna lið sem er augljóslega ekki með sömu gæði og það sjálft.

    Það sem fer í mig varðandi þetta orð er að enginn sigur í ensku úrvaldsdeildinni er fjarri því að vera sjálfgefinn og lið spila alltaf best þegar þau eru á tánum. Þá á eg við að þau líta einmitt ekki á leikinn sem “skildusigur” heldur baráttu upp á líf og dauða.
    Mér finnst einmitt Jurgen Klopp vera með þannig hugarfar. Hann vanmetur aldrei andstæðinga sína og talar um þá af mikillr virðingu. Mjög meðvitaður um gæði þeirra.

    En ætli ég verði ekki að sætta mig það að menn leggi mismunandi skilning í orð. Skildusigur er þrátt fyrir allt ekki jafn pirrandi og hvernig orðið “áhrifavaldur” er misnotað í dag.

    3
  2. Nei nei ekkert 3-1. Þetta verður walk in the park a fallegum Laugardegi þar sem menn eru að skoða fallegar rósir.

    5-0. Salah þrenna, mane eitt og Arnold setur eitt og leggur upp 3 og á enn einn stórleikinn.

    3
  3. Takk fyrir upphitun flott hjá ykkur að vera með hlaðvarp tengt leiknum…Talað um að Keita gæti verið með á morgun..Curtis og Firmino klárir um miðjan des gott að menn eru að koma tilbaka..

    5
    • Kærar þakkir fyrir þakkirnar Börkur!

      Verður stórfínt að fá meiri liðsbreidd fyrir þéttan leikjapakka í desember til að rótera og dreifa álaginu.

      YNWA

      2
  4. Er ekki kominn tími á enn eitt 7-0 tapið hjá Southamtpon. Held það bara

    4
  5. Það eru svona leikir sem oft skilja á milli þess að berjast um titil eða ekki.
    Leikir á heimavelli gegn liðum sem eru flokkuð sem miðlungs/botn liðum og maður vill sjá 3 stig og ekkert annað.
    Síðasta tímabil var skrítið fyrir okkur en jafntefli gegn WBA og Newcastle á heimavelli og töp gegn Fulham, Everton og Brighton voru skelfileg úrslit og munaði ekki miklu að þessir leikir kostuðu okkur meistardeildarsæti.
    Maður vill að okkar strákar séu bara með hugan við verkefnið á morgun en ekki Everton leikinn sem kemur strax á eftir.

    Mín spá er 2-1 sigur með mörkum frá Mane og Van Dijk ( leikmenn sem spiluðu fyrir Southamtpon)

    p.s Mjög flott upphitun

    3
  6. Sælir félagar

    Takk fyrir flotta upphitun og að nota orðið skyldusigur sem má alveg þó BJ þoli það ekki. Það er einfaldlega þannig að orðið er frjálst og við megum nota þau orð sem okkur finnast hæfa. Ég tel að það sé skylda okkar manna að vinna þennan leik. Sem sagt skyldusigur. Það þarf ekki endilega að vera léttur sigur eða án áreynslu og erfiðis. Það eru afar fáir, ef nokkrir leikir í efstu deild á Englandi, auðveldir. En sigrarnir geta verið misjafnlega afgerandi og ég vona að þessi verði það. Mín spá 4 – 0

    Það er nú þannig

    YNWA

    5
    • fyrst og síðast að vinna. Skyldusigur vissulega.

      Að vinna með glæsibrag er bónus.

      3
    • Kærar þakkir Sigkarl og vonandi reynistu sannspár um lokatölurnar.

      Skyldusigur skilgreini ég út frá gæðum LFC sem toppliðs í titilbaráttu og ef ná á toppárangri þetta tímabilið þá er það skylda liðsins að vinna heimaleik gegn liði í neðri hluta deildarinnar. Eins og þú segir þá felst ekki í því nein yfirlýsing um laufléttan sigur eða vanvirðing við mótherjann heldur skýr krafa á okkar menn um að sýna sín gæði og landa 3 stigum.

      YNWA

      3
  7. …svo ljúft að lesa það sem þessi maður skrifar. Það eru margir, ef ekki allir, góðir hjá Kop, en fyrir mér þá eru þeir ekki hálfdrættingar á við Magnús í stafa- og orðaröðun. Takk fyrir mannbætandi skrif Dýrðlingur.

    4
    • mér finnst podcast þrennan fín,,, en í og með er ég alltaf að vonast eftir því að meistari MÞ verði með. Gerist sirka 2x á ári, en það er betra en ekkert.

      2
    • Kærar þakkir fyrir hrósið Kristján og Birgir!

      Glæsilegt að geta glatt gallharða og gefur gríðarlega gæfu, gleði og gott gengi!

      YNWA

      4
  8. Þvílíka veislan! Svo megum við ekki gleyma að kjósa besta leikmann heimsins hér vote.globesoccer.com

    3
  9. Sæl og blessuð.

    Þvílík upphitun sem við fáum fyrir leikinn. Svona lagað ætti að snara í gegnum google translate og leyfa leikmönnum að lesa fyrir leik. Þá þarf ekki að eyða frekari orku í að hita upp.

    Southampton er mitt lið #2 í enska og hefur verið það frá því ég fór að fylgjast með. Það er ekki erfitt að hrífast af þessu grasrótarliði sem dúndrar upp hverju ungstirninu upp úr sverðinum – oftar en ekki til að geta blómstrað hjá okkur þegar kallið kemur.

    Þeir hafa, eins og fram kom i þessu snilldarhlaðvarpi, staðið í hárinu á stórliðum og þeir ætla sér stóra hluti núna. Það verður ekkert markmanns/hafsenta tikitaka eins og hjá Nöllum og Porto. Féndur okkar ættu að vera búnir að læra lexíu af þeim hamförum öllum. Nei, nú verður dúndrað fram og djöflast í háu boltunum. Olnbogar verða yddaðir og reynt verður að keyra upp vinstri kantinn þar sem reynslan sýnir að færin geta skapast.

    Kosturinn er sá að við ættum að mæta til leiks buguð af virðingu fyrir rauðröndóttum og þar verður ekkert vanmat (er enginn Vaan Maat í hollenska boltanum?). Þetta verður því ekki skyldusigur heldur seiglusigur, vinnslusigur og úthaldssigur.

    Járnkarl í boði núna kl. 15.

    Takk fyrir mig.

    3
    • Takk sömuleiðis Lúðvík!

      Daryl Janmaat var orðaður við LFC fyrir ári síðan sem varnarredding í meiðslahrinunni. Hvort það var vanmaat eða ofmaat legg ég ekki maat á en pressan gerði sér maat úr því!

      YNWA

      4

Liverpool 2-0 Porto

Liðið gegn Southampton