Upphitun: Brighton & Hove Albion á Anfield

 

Eftir hágæða heimsókn til höfuðborgarinnar sem skilaði tveimur toppklassa útisigrum, 6 stigum og 6 mörkum þá snýr Rauði herinn aftur í sitt höfuðvígi á Anfield Road í Liverpool með það markmið að halda áfram á sigurbrautinni.

Upp, upp mín Liverpool-sál á uppleið upp töfluna og lof sé Robbie Fowler í upphæðum!! Upphitun is on!!

Mótherjinn

Brighton hafa verið á ágætu róli upp á síðkastið og eingöngu tapað einum leik á almanaksárinu 2021 en það var 1-0 ósigur fyrir Man City um miðjan janúar. Mávarnir bláhvítu unnu góðan sigur á Mourinho og Spurs í síðasta deildarleik þannig að gestaliðið mætir með stélið stíft og stútfullir af sjálfstrausti.

Þrátt fyrir allar hrakspár þá hefur BHAFC tekist að festa sig í sessi sem sæmilegt úrvalsdeildarlið eftir að hafa komið upp í efstu deild árið 2017. Graham Potter er með liðið á sínu 3ja ári við stjórnvölinn og þrátt fyrir að liðið sé í 17.sæti deildarinnar að þá er það 7 stigum frá falli. Sigurhlutfallið er ekki það hæsta hjá Brighton en þeir hafa flest jafntefli í deildinni eða 9 talsins sem þýðir að þeir eru seigir í að forðast tap og stela stöku stigi.

Af áhugaverðustu leikmönnum gestanna verður langfyrst til að telja Adam sem var áður í Anfield-Paradís en er núna æruverðugur Hr. Lallana sem á ansi virðulegt verðlaunagripasafn. Því miður verður stúkan tóm þegar að Lallana snýr aftur til LFC en annars hefði hann fengið veglegt virðingarklapp sem hann á skilið eftir sinn 6 ára feril í herbúðum Rauða hersins.

Aðrir eftirtektarverðir eru hinn franski Maupay sem hefur skorað 7 deildarmörk og þeirra hættulegasti maður fram á við en einnig er hinn títtnefndi Ben White í vörninni sem hefur verið mikið orðaður við LFC síðustu misseri. Væntanlega verður White minna tengdur við innkomu í vörnina eftir innkaup gærdagsins en fyrir Púlara verður áhugavert að sjá hann spila gegn sóknarlínunni okkar á Anfield.

Byrjunarlið Brighton gæti litið út eitthvað í áttina að þessu:

Liverpool

Heimamenn eru vígreifir eftir vígalegu upprisu í síðustu tveimur leikjum og stefna á sinn fyrsta heimasigur á árinu 2021 eftir daprar lokatölur í síðustu heimaleikjum. Meiðslalistinn hefur ekkert verið að styttast frekar en fyrri daginn og allt að 8 meistaraflokksleikmenn eru meiddir fyrir miðvikudagsmætinguna gegn mávamótherjunum. Seint í gær staðfesti Klopp að Joel Matip myndi missa af restinni af leiktíðinni sem gerir innkomu Kabak og Davies þeim mun mikilvægari það sem eftir lifir tímabils.

Stigin 3 sem í boði verða gegn Brighton eru jafn góð og í flestum deildarleikjum og við munum að sjálfsögðu stilla upp liði til að sigra leikinn. En hætt er við því að ákvarðanir með uppstillingu liðsins verði með stórleikinn gegn City á sunnudaginn í huga þar sem hann gæti haft mikið um titilvonir LFC að segja þetta árið. Hugsanlegt er að menn eins og Tsimikas, Neco Williams eða Oxlade-Chamberlain fái sjaldséða byrjunarleiki í nafni róteringar en erfitt er að gægjast inn í hugargátt þjálfarans hvað slíkt varðar.

Að mínu mati ætti Shaqiri og Nat Phillips að fá að halda sæti sínu og í ljósi flottrar innkomu mætti Curtis Jones fylla skarð Milner sem fór tæpur af velli gegn West Ham. Origi gerði ekki nógu mikið til að réttlæta slíkt en það er aldrei að vita hvort hann verði notaður til þess að spara aðra fyrir City-slaginn en það eina sem er víst er að Minamino verður ekki valkostur eftir óvæntan lánssamning til Southampton. Mané verður ekki tilbúinn eftir sín meiðsli og það gæti þýtt að Firmino kemur inn í framlínu til að aðstoða við að brjóta niður varnarpakka gestanna.

Að öllum fyrirvörum framsettum þá tel ég að 4-3-1-2 leikskipulag síðasta sigurleiks haldi velli og liðsuppstillingin verði eftirfarandi:

Tölfræði

• 1 deildarósigur í röð á Anfield eftir að hafa verið ósigraðir í rúm 3 ár og 68 deildarleiki. Tími til að hefja nýja sigurgöngu!
• Liverpool hefur unnið síðustu 4 heimaleiki gegn Brighton í öllum keppnum.
• Brighton hefur haldið hreinu í síðustu þremur úrvalsdeildarleikjum.

Blaðamannafundur

Klopp mætti glottandi og glaðbeittur fyrir framan fjölmiðlafólkið og gat loks svarað varðandi staðreyndir í stað slúðurs um innkaup á leikmönnum er hann ræddi nýju mennina Ben Davies og Ozan Kabak. Þá fór hann yfir meiðslastöðuna á hópnum með nýjustu tíðindum um Matip ásamt því að svara spurningum um gæði mótherjans:

 

Upphitunarlagið

Til endurheimta meistaralega sigurstemmningu þá þarf grjótharðan töffaraskap í upprisuna og enginn betur til þess fallinn en meistarinn, erkitöffarinn og fyrrum Brighton-búinn Nick Cave með sínum Vondu fræjum. Með Vestur-Berlínarbrjálæðinginn og stofnanda Einstürzende Neubauten, Blixa Bargeld á grillandi gítar þá er tími til að Bring it On vs. Brighton!!

(Viðkvæmir fyrir kaldhæðnis-tónlistar-twerki eru beðnir um að varast áhorf)

Spaks manns spádómur

Síðasti leikur gegn Brighton fór afar illa með VAR-vitleysu sem reyndist afar kostnaðarsöm í stigum talið. Ég hef fulla trú á að Liverpool hafi hug á að bæta úr þeim rangindum og tryggja sigur gegn liði rétt yfir fallsætunum. Við höfum vaknað að nýju í síðustu leikjum og vonandi er það form komið til að vera. En ég er einnig varasamur um dapurt og dýrkeypt gengi okkar gegn liðum í neðri hlutanum sem hafa pakkaði í vörn gegn okkur og City-leikurinn handan hornsins gæti truflað einbeitinguna.

Ég mun því hallast að því að við sleppum með skrekkinn og vinnum óþægilega torsóttan 2-1 sigur eftir vandræðagang fram eftir leik. Salah mun halda áfram að skora og Shaqiri mun setja eitt smekklegt í Samúelinn af sérlega löngu skotfæri.

YNWA