Upphitun: Norwich City á Carrow Road

Kanarífuglarnir vs. Liverfuglinn

Óveðursský á ströndum eylanda við Atlantshafið valda verulegum vandræðum víða og stóra spurningin er hvort að fuglastríðið milli Kanarífuglanna og Liverfuglsins fari fram á morgun. Þytur í laufi mun valda fjaðrafoki sem fýkur yfir hæðir og þörf verður á bjargvætti í grasinu.

Gul viðvörun er innan vallar sem utan í Norwich City

Engu að síður mun uppstreymi yfir Mexíkóflóa valda fiðrildablaki á Færeyjum sem stillir upp stórstreymi í Stórhöfða og skilar sér í flæðandi og funheitu eldgosi af upphitun á Kop.is.

Veðurviðtalið

Þegar veður eru válynd þá þarf að vitja viturra vísindamanna og af því tilefni bjóðum við grjótharðan Norwich áhanganda og langvarandi Púlara til leiks í stuttu spjalli. Dr. Össur Skarphéðinsson er Kanarífugl dagsins og það eru fáir betri en fyrrum utanríkisráðherrar til að spá í spilin í erlendu fótboltasparki:

Mótherjinn

Norwich City komu græneygðir og ljósfiðraðir upp úr Championship sem meistarar næstefstu deildar Englands. Leiftrandi sóknarlið sem skoraði 93 mörk það tímabil en með virkilegan veikleika varnarlega. Stjórinn Daniel Farke sem þjálfaði varalið Dortmund á sama tíma og Jurgen Klopp stýrði aðalliðinu hafði byggt upp léttleikandi, leiftursnöggt og líflegt lið sem gat skorað mörg mörk en líka hleypt þeim inn í miklu magni. Hans háfleyga hugmyndfræði og enginn afsláttur gefinn með sóknarteningum kastað.

Evrópumeistararnir nýttu sér vægðarlaust veikleikana í brynjunni í fyrsta leik tímabilsins með því að setja 4 mörk í net kanarífuglanna sem gaf slæman fyrirboða fyrir nýliðana frá Austur-Anglíu. Tveir góðir sigrar snemma tímabils, þar á meðal gylltur sigur yfir Englandsmeisturum Man City, voru fölsk von þar sem liðið hefur eingöngu unnið 2 deildarleiki af síðustu 20 spiluðum. Þetta hefur þýtt það að Norwich hefur sokkið til botns í deildinni og situr þar í dag heilum 7 stigum frá öruggu sæti í deild hinna bestu Breta.

Eftir tvö blindsker hefur Norwich lent á sjávarbotni deildarinnar

Þrátt fyrir þunglyndið í botnbaráttunni þá hefur Finninn fljúgandi Teemu Pukki verið glaðbeittur og haldið áfram sinni markaskorun frá tímabilinu áður. Eftir 29 mörk í 43 leikjum í Championship þá hefur púkinn Pukki haldið áfram að skora með 11 úrvalsdeildarmörk í 23 leikjum en það er jafn mikil markaskorun og hjá Sadio Mané, Harry Kane og Raheem Sterling. Ef illa fer fyrir Kanarífuglinum í búrinu þetta tímabilið þá er það klárt mál að sökin liggur ekki hjá Finnanum fótafima.

Fótvissi Finninn fetar í fótspor fagurskeggjaðra fótboltamanna

Fyrir forvitna fótboltafíkla má því við bæta að Teemu Pukki og Virgil van Dijk voru samherjar hjá skoska risunum Glasgow Celtic á árunum 2013-2015. Þeir félagarnir léku meðal annars báðir í gulu og grænu á Meistaravöllum gegn stórveldi Knattspyrnufélags Reykjavíkur sumarið 2014, en það var akkúrat 50 árum eftir að KR mætti Liverpool í fyrsta Evrópuleik beggja liðanna. Framtíðarspurning í pub quiz þar á ferð.

Meistari Virgil van Dijk lék á alls oddi gegn mág Suarez á Meistarvöllum árið 2014. VÍSIR/Daníel

Lið heimamanna snýst ekki eingöngu um aðalmanninn Teemu Eino Antero Pukki heldur eru einnig ungir og sprækir leikmenn í liðinu sem hafa vakið athygli í vetur þrátt fyrir ótal ósigra. Emiliano Buendía hefur vakið verðskuldaða athygli fyrir flott uppspil en hann hefur hlaðið í heilar 7 stoðsendingar sem er með þeim þriðju hæstu í úrvalsdeildinni í þeim flokki. Þá hefur hinn ungi Englendingur Todd Cantwell slegið í gegn með 6 mörk úr kantstöðu og jafnvel vera vafasamt orðaður við okkar eigin Rauða Her. Að baki þeim hefur Tim Krul verið betri en Engin Ipekoglu í markinu og bjargað því litla sem bjargað verður þar á bæ.

Að því sögðu eru yfirgnæfandi líkur á að Herr Farke stilli upp eftirfarandi herjum gegn Rauða hernum:

Líklegt byrjunarlið Norwich City í leikskipulaginu 4-2-3-1

Liverpool

Hvað er hægt að segja um okkar fullkomna og frábæra Rauða her sem ekki hefur verið sagt á þessu stórkostlega tímabili? Jú, það má svo sem segja það að þrátt fyrir allar krýningar á okkar mönnum sem kóngum alheimsins að þá eigum við enn eftir að klára það pínulitla smáatriði að ljúka því að vinna úrvalsdeildina!

Hvað sem öllum bakskitum Man City líður þá vantar okkur ennþá 6 sigra í næstu 13 deildarleikjum mögulegum til að fullkomlega klóra okkar 30 ára kláða og fagna epískum Englandsmeistaratitli. Formsatriði þarf að fullnægja líkt og Magnús af Þórsgötunni lagði drög að.

Að því einstaka marki munum við stilla upp okkar sterkasta liði eftir vetrafríið verðmæta sem varnarmaðurinn Klopp háði heilagt vetrarstríð til að verja. Mín tilfinning er sú að Klopp vilji keyra sinn mannskap í gang fyrir einvígið gegn Atletico Madrid á Wanda Metropolitano að nokkrum dögum liðnum. Fátt betra en leikur gegn botnliði til að fíra upp mannskapnum og prufukeyra lærvöðva og leggi. Hvíld og rótering kæmi frekar þar beint á eftir gegn West Ham og Watford.

Stóra spurningin varðandi byrjunarliðið verður um stöðuna á Sadio Mané sem er að koma úr meiðslum og þar sem við höfum ekki aðgang að hávísindalegum heilbrigðisskýrslum þá verður happadrætti að ráða för varðandi hans aðkomu. Ef hans krafta nýtur ekki þá verður Oxlade-Chamberlain væntanleg í hans kojuplássi en fyrir fagurfræðina þá stillum við þessu ofursterka og ofurfallega liði upp:

Líklegt byrjunarlið Liverpool í leikskipulaginu 4-3-3

Blaðamannafundur

Klopp var orðspakur að vanda og tæklaði nokkur mál á blaðamannafundi dagsins; t.d. hvort að Salah fari á Ólympíuleikana, vetrarfríið, meiðsli leikmanna, ógn Norwich o.fl.

 

Spakra manna spádómur

Liverpool hefur sjaldan gengið illa að skora gegn Norwich og í síðustu 8 leikjum gegn þeim höfum við skorað 31 mark. Það gerir tæp 4 mörk að meðaltali og í þessum 8 leikjum hefur LFC fjórum sinnum skorað 5 mörk. Mín tilfinning er þó að við verðum eitthvað ryðgaðir eftir vetrarfríið og leikurinn gegn Atletico Madrid verði ofarlega í huga. Það mun valda því að mörkunum muni fækka en snyrtimennskan verður enn í fyrirrúmi í því að skila tabula rasa réttu megin í leikskýrslunni.

Mín veðurblásna innspá er á þeim lengdarlínum og breiddarbaugum að rauðliðar muni skila öruggum sigri í höfn á Merseyside. Ég hallast að því að fyrirliðinn Henderson hendi í vinkilsnuddu til að bæta í sinn tveggja marka sarp gegn Norwich og til að toppa tvímarkið þá mun Mohamed Salah setja eitt egypskt af engu færi. Niðurstaðan verður 0-2 toppsigur sem ég tileinka tveimur Hröfnum.

Hvernig fer leikurinn gegn Norwich City?

Skoða niðurstöður.

Loading ... Loading ...

YNWA

Leikurinn hefst klukkan 17:30 á morgun og minnum við að sjálfsögðu á heimavöll okkar, Sport & Grill í Smáralind. Boltatilboð yfir leikjum og um að gera að hafa samband uppá að panta borð.

11 Comments

  1. Takk fyrir góða og skemmtilega upphitun,vonandi verður leikurinn spilaður og úrstlitinn okkur í hag….nýjustu fréttir segja að man-city séu komnir í 2 ára bann í meistatdeildinni það mun hafa mikil áhrif á city….5 sætið fer i staðinn í meistaradeildina….

    1
  2. Man City í 2 ára bann úr meistaradeildinni. Góðu fréttirnar: Gott á þá þeir eiga það skilið, þvílíkt tekjutap og bömmer fyrir leikmenn og Guardiola. Slæmu fréttirnar: Þeir verða úthvíldir um helgar í 2 ár ekki gott fyrir okkur.

  3. Það á að svipta þá Englands-meistaratitlinum líka. Svindl er svindl er svindl.

    6
    • Að sjálfsögðu á að gera það! En FA eru auðvitað of miklar gungur.

      1
      • Það verður samt vonandi þokkalega LEIÐINLEGT fyrir þá að standa heiðursvörð þegar Englandsmeistararnir ganga inn á Etihad 4. apríl!

        4
  4. Sælir félagar

    Takk fyrir Magnús frábæra upphitun og framlag af þessu tagi fer að slaga uppí það bezta hjá Einari Matthíasi. Hvað leikinn varðar þá held ég að það taki Liverpoolmenn nokkurn tíma að hrista af sér ryðið eins og Össur nefndi. Þetta fer þó í eitt mark í fyrri og tvö í seinni. Salah, Mané og Hendo setja mörkin. Ef til vill veður Össuri að ósk sinni og Pukki hendi í eitt undir lok leiksins en ég held ekki. Ef Pukki skorar þá verður það í ryðinu í fyrri. Spáum því öruggum tveggja marka sigri 1 – 3

    Það er nú þannig

    YNWA

    ES. Rætt er umm að M.City verði dæmt niður um deildir amk. eina deild og þá er spurningin. Verður ekki dæmdur af þeim titillinn frá síðustu leiktíð því stór hluti brotanna var framinn þá? Ef svo fer þá erum við að henda í tvo titla sem væri ekki leiðinlegt. 🙂

    YNWA

    3
  5. Frábær upphitun.
    Sósíaldemókratinn er með munninn fyrir neðan nefið og vel að sér í ofanálag.
    Gott að rifja upp bulluskapinn á síðustu öld og þó flestir séu sammála um að þar hafi orðið breyting til batnaðar þá er einhver gróteskur sjarmi yfir þeim tíma kartöflugarðanna.
    Eina sem ég get sett út á þetta tímabil er að ég er farinn að mæta inn í leiki helslakur. Gæti þess vegna hætt á blóðþrýstingslyfjunum.
    Klopp er ekki þar og eins og sagt hefur verið, setur þennan leik upp sem úrslitaleik.
    Þessi snillingur mannlegs eðlis knýr fram hvítuna í augum okkar manna og þeir elska það.
    Við fáum frábæran leik í dag.
    Fyrsta korterið fer í upphitun og svo hefst keyrslan.
    0-5
    YNWA

    1
  6. Var gaman að hlusta á viðtalið við Össur, enda hefur alltaf verið með eindæmum skemmtilegur karakter, sem hefur heldur betur lífgað upp á tilveruna, sérstaklega í flokki þeirra sem oft virka frekar þurrir á manninn. Þessi leikur verður svona ,, í gang leikur,, og því frábær að því leiti, 1-4.

    YNWA

    1

Borgarlýsing uppfærð

Liðið gegn Norwich