Arsenal heimsóttir

Næsta verkefni hjá okkar mönnum er að heimsækja Emirates leikvanginn í Lundúnum, þar sem heimamenn í Arsenal munu freista þess að gera lærisveinum Klopp skráveifu í baráttunni um efsta sæti deildarinnar.

Það er kominn nýr maður í brúna hjá Arsenal: Unai Emery. Þessi réttsvotæplegafimmtugi Spánverji tók við af Arséne Wenger í sumar, eftir alllangt tímabil af #wengerout skilaboðum frá aðdáendum Arsenal. Emery þessi kom til liðsins frá PSG, sá sem tók svo við af honum þar er Thomas Tuchel, en það vill svo skemmtilega til að hann tók við af Jürgen Klopp hjá Dortmund á sínum tíma. Áður en Emery kom til PSG var hann við stjórnvölinn hjá Sevilla, og einn af síðustu leikjunum hans þar fór fram í Basel, í úrslitaleiknum í Evrópubikarnum árið 2016, þar sem Klopp mætti með okkar ástkæra lið. Við munum öll hvernig það fór, og eyðum ekki meiri tíma í að velta okkur upp úr því… Við getum huggað okkur við það að frá því að Klopp tók við hefur Liverpool ekki tapað fyrir Arsenal, 6 síðustu leikir liðanna hafa endað með 3 sigrum Liverpool og 3 jafnteflum, svo það er nú engin ástæða til að óttast neitt, þó það megi að sjálfsögðu búast við hörku leik.

Andstæðingarnir

Eftir fyrstu tvo leikina hjá Arsenal í deildinni leit þetta ekkert rosalega vel út hjá þeim. Báðir leikirnir töpuðust, og liðið með 0 stig. En á það ber að líta að andstæðingarnir í fyrstu tveim leikjunum voru líka ekkert slor: City og Chelsea. Þar að auki var liðið með nýjan stjóra og það átti eftir að stilla saman allnokkra strengi. Eftir þessa erfiðu byrjun hafa nallarnir ekki litið til baka, eru taplausir síðan þá, og reyndar er það svo að jafnteflið á móti Palace um síðustu helgi (sem Einar Matthías jinxaði svona stórkostlega) er eini leikurinn sem þeir hafa ekki unnið frá Chelsea leiknum.

Og hvernig má svo reikna með að Emery stilli sínum mönnum upp? Jú þar gætu málin aðeins vandast. Samkvæmt síðustu veðurathugunum eru allnokkrir annaðhvort meiddir eða í leikbanni. Í leiknum gegn Palace þurfti Xhaka að spila í bakverði, en þótti reyndar vera með betri mönnum liðsins. Í vikunni lék svo liðið gegn Blackpool í deildarbikarnum, vann þann leik svosem, en Guendouzi fékk rautt spjald og verður því í banni á morgun. Bellerin var svo í hægri bakverði fyrir viku, en óvíst hvort hann verður leikfær.

Það er því allt eins líklegt að liðið hjá Arsenal verði ákveðið með stuttum fyrirvara, eða um leið og læknateymið hjá þeim er búið að gefa grænt/rautt ljós á þá leikmenn sem eru tæpir.

Þetta hér er því bara skot í myrkri:

Eitt er víst: sóknarleikurinn þeirra hefur verið að virka ágætlega, eins og lið Leicester fékk heldur betur að finna fyrir fyrr í október. En varnarleikurinn hefur þótt vera tæpur, og ekki eru þessi meiðsli að hjálpa til.

Okkar menn

Það vill svo til að nú hefur liðið okkar haft heila viku til að jafna sig, en það hefur ekki gerst í allnokkurn tíma. Arsenal léku hins vegar í deildarbikarnum í vikunni eins og áður kom fram, það gæti þýtt að þeir verði þreyttari, en gæti svosem líka þýtt að það verði meiri taktur í þeirra spili. Ekki víst að þreyta vegna stífra leikja sé endilega farin að gera vart við sig á þessum tímapunkti á tímabilinu.

Á blaðamannafundi í dag fór Klopp yfir stöðuna á okkar mönnum. Það hefur lítið breyst síðustu daga. Eitthvað var fólk að hræðast það að Salah sást á æfingu með umbúðir um annan handlegginn, en það ku víst ekki vera neitt til að hafa áhyggjur af, og hann á að vera leikfær. Henderson og Keita eru áfram frá, en Klopp reiknar með að Henderson byrji að æfa eftir helgina. Ox og Brewster eru svo á langtímasjúkralistanum sem fyrr.

Spurningin er einna helst sú hvort Klopp haldi sig við 4-2-3-1 kerfið sem hann hefur svolítið verið að leika sér með upp á síðkasið, með Fabinho og Wijnaldum fyrir framan vörnina, eða hvort hann fari aftur í 4-3-3 eins og hafði verið algengara mánuðina þar á undan. Nú svo má líka halda því fram að eins og leikstíllinn er þá skipti kannski ekki alveg öllu máli hvað leikkerfið heitir, því leikmenn eru það fljótandi í sinni stöðu hvort eð er.

Í 4-2-3-1 er Salah meira miðsvæðis, með Mané og Shaqiri/Lallana sitt hvoru megin við sig, og Firmino fyrir aftan, en vissulega allt mjög flæðandi. Í 4-3-3 er Firmino meira sá sem leiðir sóknina, en þó hefur það sýnt sig að þegar meðalstaða leikmanna á vellinum er skoðuð, þá er Salah alltaf fremstur, þó svo hann sé meira hægra megin á kantinum. Mögulega mun Klopp horfa á bakvarðavandræði Arsenal og því kjósa að fara aftur í kerfið þar sem Salah herjar meira á bakverðina. En á hinn bóginn, þá var hann yfirleitt með Wijnaldum/Milner/Henderson/Keita sem miðjumennina í því kerfi, en nú eru tveir þeirra vant við látnir. Lallana gæti alveg spilað á miðjunni, sama gildir um Shaqiri, en það væri samt ákveðin tilraunastarfsemi. Það kæmi undirrituðum samt lítt á óvart þó svo Klopp horfi töluvert marga leiki fram í tímann og komi jafnvel með eitthvað útspil sem kæmi á óvart.

Prófum að stilla þessu upp svona:

Bekkur: Mignolet, Lovren, Moreno, Lallana, Milner, Sturridge, Origi

Ég myndi a.m.k. halda að hann stefni á að spila sínu allra sterkasta liði, menn hafa jú haft viku til undirbúnings eins og áður kom fram, og frekar hægt að rótera í miðri viku í útileiknum gegn Rauðu stjörnunni.

Spáin? Ég ætla að veðja á að okkar menn hafi þetta, og að leikurinn fari 1-3. Við komumst að hinu sanna í kringum kvöldmatarleytið á morgun.

KOMA SVO!