Burnley á nýársdag

Það gefst rétt svo tími til að fagna áramótunum eftir þennan ágæta sigur á Leicester, en strax á nýársdag mæta okkar menn á Turf Moor og taka þar á móti Jóhanni Berg og félögum heimamönnum í Burnley.

Andstæðingarnir

Það má færa ansi góð rök fyrir því að Burnley sé spútnik lið deildarinnar það sem af er, liðið situr sem stendur í 7. sæti deildarinnar en komst upp í það 4. á tímabili. Aðalsmerki liðsins hlýtur að teljast sterkur varnarleikur, enda hefur liðið aðeins fengið á sig 17 mörk það sem af er tímabili. Aðeins 3 efstu liðin hafa fengið á sig færri mörk. Á móti kemur að liðið skorar almennt ekki mörg mörk, aðeins 18 komin það sem af er. Til samanburðar eru okkar menn búnir að koma tuðrunni 48 sinnum í netið.

Prímusmótorinn á bak við gengi Burnley hlýtur að teljast knattspyrnustjórinn þeirra: Sean Dyche. Hann er með yngri mönnum sem stýra liði í úrvalsdeildinni, er örlítið yngri en Pep Guardiola (Eddie Howe er auðvitað langyngstur, rétt nýskriðinn í fertugt, en það er önnur saga sem ekki verður sögð hér). Dyche er uppalinn hjá Nottingham Forest, en slæmt beinbrot í upphafi ferlisins þýddi að hann lék með Chesterfield megnið af sínum ferli. Hann tók svo að sér stjórastöðuna hjá Watford árið 2011 eftir að hafa þjálfað yngri flokka og aðstoðað hjá aðalliðinu síðan 2007. Þrátt fyrir að hafa náð góðum árangri með Watford fyrsta árið urðu eigendaskipti til þess að hann færði sig um set, og var kominn til Burnley í september árið 2012. Þetta þýðir að einungis Arséne Wenger og Eddie Howe hafa stýrt sínum liðum lengur heldur en Dyche, og munar aðeins 17 dögum á þeim Dyche og Howe.

Dyche er afskaplega skipulagður stjóri, og á það t.d. til að mæla völl andstæðinganna þegar liðið leikur á útivelli, til að tryggja að liðið viti nákvæmlega hve langt eigi að vera á milli varnarmanna. Þetta er eitthvað sem hann tók upp á að gera meðan hann var leikmaður, en hann var einmitt miðvörður á sínum tíma.

Eins og áður sagði eru Burnley í 7. sæti í augnablikinu. Liðið gerði markalaust jafntefli við David Wagner og co hjá Huddersfield í gær, en þar á undan var liðið afar óheppið að ná aðeins jafntefli á móti United á rútubílastöðinni Old Trafford.

Við megum því eiga von á að mæta vel skipulögðu liði sem er erfitt að brjóta niður varnarlega. Hljómar það ekki spennandi?

Liverpool

Þá að okkar mönnum. Það eru núna 12 deildarleikir síðan liðið tapaði síðast leik, og þó svo að þarna séu nokkur jafntefli inn á milli sem við hefðum gjarnan viljað breyta í sigur með smá heppni, þá verður þetta nú samt að teljast ágætis árangur.

Rétt eins og andstæðingarnir fá skósveinar Klopp aðeins rétt rúma 46 tíma til að hvíla sig milli leikja. Sem betur fer er breiddin ágæt og meiðslalistinn hefur oft verið lengri (Clyne, Moreno, Henderson). Sturridge var að glíma við einhver smá meiðsli síðast þegar vitað var, nú og svo er verið að slúðra um að hann vilji fara frá félaginu til að fá meiri spilatíma. Salah haltraði víst eitthvað þegar hann var tekinn af velli, svo það verður að koma í ljós þegar á reynir hvort hann er leikfær. Auðvitað væri frábært að geta hent honum t.d. inn á í seinni hálfleik, enda er hann að eiga ótrúlegt tímabil og er næst markahæstur þegar þetta er skrifað. Hugsanlega eru aðrir leikmenn eitthvað krambúleraðir, en það hefur þá ekki farið hátt.

Klopp vill örugglega nota breiddina eins og hægt er, þó það megi ekki gleyma því að númer 1, 2 og 3 sé auðvitað að vinna leikinn og að spila eins sterku liði og mögulegt er til að það takist. Það vekur athygli að hann spilaði Fab 4 öllum á móti Leicester, og spurning hvort hann ætlar þeim öllum eitthvað hlutverk á mánudaginn.

Virgil van Dijk verður auðvitað orðinn leikmaður Liverpool þann 1. janúar, en ég á ekki von á því að sjá hann á leikskýrslu þetta snemma. Bæði leggur Klopp alltaf mikla áherslu á að liðið sé vel æft, og hversu góður sem hann er þá hefur hann jú ekkert æft með liðinu. Eins er líka ekki víst að félagaskiptin gangi í gegn áður en það þarf að skila inn leikmannalistanum fyrir þennan leik.

Ég ætla að spá þessu einhvernveginn á þennan veg:

Með þessu væru Mignolet, TAA, Klavan, Winjaldum, Ox, Lallana, Solanke og Ings að koma ferskir inn (þó Klavan, Gini og Ox hafi vissulega komið inn á sem varamenn í gær), og aðeins verið að spila þeim Lovren, Robertson og Mané aftur. Af þessum finnst mér kannski einna líklegast að það verði reynt að finna einhvern í stað Robertson, enda er hann búinn að spila alla leiki upp á síðkastið. Mané er svo vissulega sá sem hefur fengið mestu hvíldina en er e.t.v. í smá lægð núna, er þá ekki um að gera að hann nái upp leikformi? Það að setja Ings í byrjunarliðið er sjálfsagt líka full djarft, þar sem hann hefur bara leikið nokkrar mínútur með aðalliðinu í tvö skipti.

Eins og máltækið segir: “Your guess is as good as mine”. Kannski róterar Klopp minna, og dembir bara Fab 4 beint í byrjunarliðið. Kannski hvílir hann einhverja allt aðra leikmenn. Kannski kallar hann til einhverja kjúklinga. En það er nú einmitt eitt af því sem gerir þennan leik svo spennandi, þ.e. að spá fyrir um hvað Klopp gerir og að sjá svo hvernig niðurstaðan verður.

Að lokum veit maður svo aldrei hver staðan verður með Philippe Coutinho. Þetta Nike klúður gæti hafa verið enn eitt ömurlega stuntið hjá Barca til að koma því inn í undirmeðvitundina að PC eigi að fara þangað. Þetta gætu líka bara hafa verið mannleg mistök, smá séns að einhver hafi hakkað sig inn á vefinn, en svo er sá möguleiki líka fyrir hendi að það sé búið að semja um félagaskipti hans til Barcelona og þetta hafi einfaldlega farið í loftið aðeins á undan áætlun. Við skulum vona ekki, enda væri það undarlegt að litla galdramanninum okkar að vera að stökkva frá borði núna. Vill hann ekki vinna meistaradeildina með Liverpool?

Við vonum að þessar hræringar hafi ekki áhrif á liðið fyrir þennan leik. Það sem skiptir auðvitað mestu máli er að ná að vinna leikinn. Ég ætla að spá því að þetta fari 2-1 fyrir okkar mönnum, þar sem Mané og Lallana sjái um að skora, en að Scott Arfield skori fyrir Burnley, líklega eftir stoðsendingu frá Jóhanni Berg.

KOMA SVO!!!