Tottenham á morgun

Það er ekki löng pása sem menn fá á milli leikja núna, sem er að mínum dómi afar gott mál. Tottenham koma í heimsókn á Anfield á morgun, og nú þarf að fylgja eftir góðum leik gegn Newcastle. Það er afar mikilvægt að koma sér á gott “rönn” með þessum heimaleikjum sem verið er að spila þessa dagana, minnka bilið í liðin fyrir ofan okkur og vonast til að hin liðin fari að tapa stigum. Ég var viss um það fyrir tímabilið að titilbaráttan yrði mun jafnari en síðustu ár, og það virðist allt benda til þess þar sem liðin hafa öll verið að tapa stigum núna í upphafi móts. Það er gríðarlega mikilvægt að vinna nánast alla heimaleiki sem í boði eru og ef menn spila svipað og á miðvikudaginn, þá er ég ekki í neinum vafa með að sigur okkar manna verður niðurstaðan úr leiknum.

Vandamálið hefur verið að framherjar okkar hafa ekki verið að nýta færin sín. Það leit allt út fyrir það að það yrði einmitt staðan í síðasta leik, við yfirspiluðum Newcastle en náðum ekki að koma okkur í þægilega stöðu í leiknum fyrr en langt var liðið á hann. Sá sigur ætti þó að geta virkað sem vítamín sprauta á liðið og hleypa auknu sjálfstrausti í framherjana. Kuyt er búinn að brjóta ísinn, og það væri ekkert slæmt ef þetta væri það sem opnaði flóðgáttir marka hjá honum. Ég hef verið gríðarlega ánægður með byrjunina hjá honum, virkilega skemmtilegur leikmaður og eflaust hræðilegt fyrir varnarmenn að eiga við hann. Ég vonast til að sjá hann byrja næsta leik líka, í rauninni vonast ég til að sjá sem minnst breytt byrjunarlið.

Tottenham hafa valdið stuðningsmönnum sínum miklum vonbrigðum í byrjun tímabilsins. Þeir bjuggu til miklar væntingar með góðu spili og árangri á síðasta tímabili og bjuggust menn við þeim enn sterkari núna. Það hefur þó ekki verið að ganga eftir og má eiginlega búast við þeim alveg brjáluðum til leiks á morgun. Þeir eru með sterkt lið og að mínum dómi engin spurning um að þeir séu með eitt af 5 bestu liðum deildarinnar. Þetta hefur þó ekki verið að falla fyrir þá og vonandi byrjar það ekkert á morgun. Berbatov er víst ennþá meiddur, sem og Lennon og í morgun sá maður að Martin Jol var að senda skilaboð til Danny Murphy og hvetja hann til dáða fyrir leikinn. Ég hef ávallt borið mikla virðingu fyrir super Dan og vonast ég til þess að hann nái að festa sig í sessi hjá Spurs. Hann má samt alveg eiga rólegan dag gegn okkur, takk. Það er sem sagt ekki mikið um meiðsli hjá þeim, þannig að þeir koma með afar sterkt lið til leiks.

Sama sagan áfram hjá okkar mönnum. Aðeins tveir meiddir sem vitað er um. Það kom mörgum á óvart þegar Pennant var ekki einu sinni í hópnum síðast, en það verður að segjast að Rafa veðjaði rétt og setti Garcia í liðið. Það er langt síðan maður hefur séð litla Luis jafn sprækan. Stóra málið var samt að sjá “gamla” góða Xabi á ný í góðu formi. Hann er alla jafna lengi í gang á haustin, en miðað við síðustu tvo leiki, þá er hann að komast í sitt besta form. Hann og Momo á miðjunni eru hreinlega okkar sterkasta uppstilling. Ruglið í kringum það að Rafa sé að festa Stevie á öðrum hvorum kantinum er eitthvað sem ég er alveg hættur að skilja. Hver maður sem horfir á leiki Liverpool ætti að sjá það að Stevie hefur afskaplega litlar varnarskildur og í rauninni fær að spila þar sem hann vill. Það er besta staða Stevie G. Það hreinlega má ekki festa hann um og of í einhverju fyrirfram ákveðnu hlutverki. Hann þarf að geta farið kanta á milli og inn á miðju. Hann hefur ekki verið í sínu besta formi, en hann er klárlega að spila þá stöðu sem hann getur notið sín best í. Rafa hefur ekki verið þekktur fyrir að setja inn óbreytt lið, en ég ligg á bæn núna um að hann breyti akkúrat engu í uppstillingunni. Líkurnar á því eru engar, en það eru hvort sem er engar líkur á að giska á rétt lið hjá honum. Ég ætla því að voga mér að giska á sama byrjunarlið og síðast:

Mér finnst helst að það gæti komið til að Rafa myndi henda Gonzalez inn í liðið í þessum leik, en ég er hreinlega ekki viss um það þá hvern hann tæki út. Þannig að ég er hættur við að giska á þá breytingu. Daniel Agger er sá leikmaður sem hefur hrifið mig mest af öllum á þessu tímabili. Ég hreinlega hlakka til að sjá drenginn spila og man ég hreinlega ekki eftir jafn “impressive” innkomu hjá varnarmanni Liverpool, hvað þá svona ungum strák.´

Bekkurinn: Dudek, Hyypia, Gonzalez, Pennant og Crouch

Ég held áfram að vera bjartsýnn og spái því að við vinnum þennan leik 2-0. Reina heldur áfram hreinu og Kuyt mun setja mark í öðrum leiknum í röð. Ég ætla að spá því að Luis bæti svo við marki. Ef við náum að vinna þennan leik sannfærandi, þá er ég þess fullviss að við séum búnir að snúa við blaðinu og tímabilið því komið á fullt. Það er í sjálfu sér enginn teljandi munur í toppliðin, allavega ekkert óyfirstíganlegt. Við erum jú ennþá bara að tala um fyrstu leiki tímabilsins sem mun verða langt og strangt. Koma svo…

Smá viðbót:
Pennant var víst smávægilega meiddur á miðvikudaginn og því ekki með. Staðan á honum verður tekin á morgun og kemur þá í ljós hvort hann er leikfær eða ekki.