Framherjamálin…

Eins og Einar benti á í síðustu viku þá hefur framherjunum okkar gengið ömurlega að skora undanfarna mánuði, og þótt ég taki undir áhyggjur hans þá hef ég undanfarna daga pælt aðeins í þessu og ákvað að taka annan pól í hæðina. Í dag mátti sjá fréttir af Milan Baros, sem er eitthvað pirraður út í Rafa, og um leið fékk maður fréttir af Neil Mellor, sem ætlar að verða tilbúinn í haust. Þá fór ég aðeins að pæla, í sambandi við mörk Milan Baros í vetur…

Ef við tökum þá fimm framherja sem við höfum í dag – Morientes, Cissé, Baros, Mellor og Pongolle – þá hafa þeir skorað 29 mörk sín á milli í vetur, og þar af hefur Baros skorað 14. Hins vegar skoraði Baros 12 af þessum 14 mörkum fyrir áramót, fyrir meiðslin sín, og áður en Morientes kom til Liverpool. Ef við lítum aðeins á mörkin hans og hvernig taktík liðið var að spila þegar Baros skorar þessi mörk, þá kemur eftirfarandi í ljós:

Man City – 1 mark – með Cissé frammi
Mónakó – 1 mark – einn frammi (inná fyrir Cissé)
Norwich – 1 mark – með Cissé frammi
Fulham – 1 mark – með Cissé frammi
Millwall – 2 mörk – einn frammi (inná fyrir Pongolle)
Blackburn – 1 mark – einn frammi (Cissé farinn útaf)
C. Palace – 3 mörk – einn frammi
Newcastle – 2 mörk – með Mellor frammi
Fulham – 1 mark – með Morientes frammi
Leverkusen – 1 mark – einn frammi

Hvað fáum við ef við skoðum þennan lista? Þeir eru margir sem hafa talað um að vandamálið við markaþurrð Milan Baros sé það að það henti honum ekki að spila einn frammi með einhvern eins og García eða Gerrard fyrir aftan sig í “holunni” – en tölfræðin gefur annað til kynna. Af þeim 14 mörkum sem hann hefur skorað í vetur hefur hann skorað 8 á meðan hann var einn frammi. Hin sex mörkin skoraði hann með mismunandi félaga sér við hlið, þannig að það er ekki hægt að finna neitt áþreifanlegt mynstur þarna. Ekkert “hann vinnur betur með Cissé en Morientes við hliðina á sér” eða “hann þarfnast Mellor” … ekkert slíkt. Baros hefur einfaldlega ekki nýtt færin sín jafn vel eftir áramót og ekki verið jafn heitur.

Annað varðandi Baros og gagnrýni hans á Rafa Benítez í dag, þá segir hann að það henti honum einnig illa að vera alltaf tekinn útaf þegar kortér eða eitthvað álíka er eftir, til að Cissé fái að spreyta sig. Þetta stenst ekki alveg heldur, þar sem hann er tekinn út af í meira og minna öllum leikjunum sem hann skorar í fyrir áramótin. Hann skorar eitt, tvö, jafnvel þrjú, og er síðan tekinn útaf til að leyfa Cissé/Pongolle/Mellor að spreyta sig. Þannig að í raun hefur ekkert breyst í vetur: með örfáum undantekningum hefur Baros verið fastamaður í byrjunarliðinu, okkar helsta markauppspretta og jafnan verið tekinn útaf undir lok leiks.

Hvað er hann þá að væla? Ég er mikill Baros-maður, en ég held að svona gagnrýni sem, eins og ég hef sýnt fram á hér, á sér ekki mikla innistæðu muni aðeins gera það líklegra að hann yfirgefi Liverpool í sumar. Rafa líður örugglega ekki svona gagnrýni, ef ég þekki hann rétt.

---

En hvað þá með hina? Leggjum Baros aðeins til hliðar og pælum í hinum framherjunum. Þeir Cissé og Morientes eru búnir að skora 3 mörk hvor, Pongolle er með 4 mörk og Neil Mellor er með 5 stykki í vetur. En hvernig væri hægt að haga uppstillingu liðsins þannig að þeir skori meira, úr því að framherjamálin eru svona mikill vandi hjá Liverpool?

Sjáum hvernig Rafa var vanur að stilla upp hjá Valencia, þetta var allajafnan hans sterkasta lið:

Mista einn frammi, og það var ekki fyrr en í fyrra að framherji undir stjórn Rafa skoraði loks meira en 20 mörk. Mista skoraði minnir mig 24 í fyrra, þar áður held ég örugglega að enginn hafi skorað jafn mikið og Luis García, sem skoraði 16 mörk á tímabili sem kantmaður hjá Tenerífe.

Augljós samanburður sýnir að Morientes er næst því að vera okkar ‘Mista’ … og þar á eftir sennilega Neil Mellor. Báða skortir hraðann sem Cissé og Pongolle hafa, og hvorugur hefur jafn mikla tækni, en þeir eru á móti sterkari í loftinu og jafnvel grimmari í boxinu (þótt Cissé sé sennilega jafnoki þeirra þar) …

Að mínu mati þá hefur Rafa tvo kosti. Ef hann ætlar að spila 4-4-1-1 kerfið þá þarf held ég að fá meira jafnvægi í miðjuna til að það gangi upp. Þegar hann hefur verið að nota Morientes einan frammi hefur það í raun og veru ekki verið Morientes að kenna þegar það virkar illa, heldur því hvað miðjan á erfitt með að finna sig. Morientes á að vera í teignum, hann þrífst á því að halda boltanum og leggja hann á miðjumennina sem hjálpa til í sókninni – sem og að fá boltann inní teignum, annað hvort sem fyrirgjafir eða þá potboltana í teignum. Hann er ekki þessi leikmaður sem fær boltann útá velli og sólar tvo, og stingur svo John Terry af á leið sinni að markinu. Það eru Cissé og Pongolle sem eiga að gera það.

Í leikkerfinu 4-4-1-1 myndi ég vilja sjá nýjan mann við hliðina á Alonso, t.d. Juninho hjá Lyon eða Kevin Nolan hjá Bolton svo að dæmi sé tekið, og svo Gerrard þar fyrir framan. Einfaldlega af því að ég er ekki sannfærður um að Gerrard og Alonso geti báðir spilað af fullri getu hlið við hlið á miðjunni, með leikstjórnanda fyrir framan sig. Þá gætum við t.d. haft García á hægri kantinum og fullfrískan Kewell á vinstri kantinum – með Riise í bakverði fyrir aftan hann. Það væri sókndjörf uppstilling í góðu jafnvægi.

Hinn kostur Rafa væri sá að stilla upp 4-4-2, og þar myndu Alonso og Gerrard njóta sín saman á miðjunni. Ef við sleppum Baros áfram úr dæminu þá eru eftir fjórir framherjar sem gætu auðveldlega fyllt upp í 4-4-2 kerfið saman. Morientes myndi vera annar aðalframherjinn, sá hægari sem ætti að staðsetja sig í boxinu, með Mellor sem varamann fyrir hann. Cissé yrði síðan hinn aðalframherjinn, myndi spila í kringum Morientes og sjá um að pressa á varnarmennina, eftir hliðarlínunum og við rangstöðulínuna, með Pongolle sem varaskeifu.

Morientes – Cissé … og Mellor – Pongolle. Það yrði ekki slæmt jafnvægi, eins lengi og miðjan fyrir aftan þá væri í góðu jafnvægi.

---

Ég hef bara undanfarið verið að pæla meira og meira í því hvað við söknum Mellor og Pongolle mikið. Þeir eru engir heimsklassaframherjar – ennþá – en þeir gáfu liðinu ákveðna vídd. Eða eins og Rafa myndi orða það, “possibilities”. Manni hættir oft til að afskrifa Mellor sem neðrideildarframherja sem getur ekkert annað en að pota, en hann skoraði 5 mörk í einhverjum 15 leikjum í haust … slíkt skal ekki vanmetið.

Ég er á þeirri skoðun að Morientes, Cissé, Pongolle og Mellor gætu orðið góð framherjaferna næsta vetur. Pongolle og Mellor eru enn ungir og að vaxa og þeir Morientes og Cissé munu vafalítið sýna okkur sínar bestu hliðar í haust, þegar þeir hafa fengið heilt undirbúningstímabil til að koma sér í form.

En auðvitað er ekkert útséð með að Baros yfirgefi klúbbinn í sumar. Það virðist æ líklegra, sérstaklega þegar hann er að gagnrýna Rafa svona að ástæðulausu, og þá virðast flestir telja að Rafa muni nýta peninginn sem fengist fyrir Baros til að kaupa framherja í staðinn. Ég er ekki jafn sannfærður – ef við fengjum t.d. um 10m punda fyrir Baros mætti auðveldlega nota þann pening í heimsklassa miðvörð og einn góðan væng- eða miðjumann.

Eftir veturinn í vetur treysti ég allavega Pongolle og Mellor til að vera varaskeifur, og ég veit að Cissé og Morientes munu sanna sig strax í ágúst. Þeir eru einfaldlega það góðir.

Fyrir mér er þetta frekar spurning um að fá rétt jafnvægi á miðjuna fyrir aftan framherjana – og að fá Moro og Djib í toppform. Þá ætti þetta ekki að vera svona glatað, er það? 🙂