Ef þú ert fótboltaáhugamaður og vilt umfram allt horfa á skemmtilega leiki. Þá horfir þú á alla leiki Liverpool. Það er bara þannig.

Liverpool með Kop.is í broddi fylkingar tóku á móti Swansea mönnum á Anfield í dag og var leikurinn hin besta skemmtun, en jafnframt hættulegur heilsunni ef þú ert hjartveikur Liverpool stuðningsmaður.

Þrjár breytingar voru gerðar á liði Liverpool frá því í tapleiknum gegn Arsenal. Mignolet, Glen Johnson og Henderson komu inn á kostnað Jones, Cissokho og Allen. Virkilega gott uppá endasprettinn að fá Glen Johnson aftur inn!

Liverpool liðið leit sem sagt svona út:

Á meðan Swansea stillti þessu liði upp:

Öll toppliðin sigruðu sína leiki í gær og Tottenham átti seinni leik dagsins, það var því hrikalega mikilvægt að vinna þennan leik!

Fyrri hálfleikur

Það tók Sturridge þrjár mínútur að bæta upp fyrir klúðrin gegn Arsenal um síðustu helgi. Rangel missti boltann á vondum stað og Sterling brunaði upp völlinn, sendi frábæran utanfótarbolta innfyrir á Sturridge, sem fór framhjá Vorm, sem kom á móti, og skoraði í tómt markið! 1-0.

Næstu tíu mínútur gerðist nú ekki mikið, við vorum að missa boltann oft á vondum stað, spila boltanum illa úr vörninni og Swansea að pressa vel, án þess að skapa sér eitthvað færi þó sem heitið getur. Bony virtist ekki vera í miklum vandræðum að taka á móti boltum með Agger eða Skrtel í bakinu og spila honum frá sér. Shelvey átti jú frábæran bolta inn á teiginn á 13 mínútu en Bony rétt missti af honum.

Swansea menn voru sífellt að finna Jonjo á milli miðju og vítateigs og manni leist ekkert á blikuna. En það var svo Liverpool sem skoraði aftur á 20 mínútu. Suarez sendi háan bolta á Sturridge sem náði honum ekki langt frá hornfánanum hægra meginn. Tók skærin og lék á Taylor, lagði boltann á Henderson sem var rétt fyrir utan teig. Henderson lagði boltann svo upp í hornið vinstra meginn, frábært mark og óverjandi fyrir Vorm í marki Swansea.

Jonjo vildi ekki vera síðri og smellti honum örfáum mínútum síðar, sláin inn rétt fyrir utan vítateig. Óverjandi fyrir Mignolet. Fagnaði ekki og var klappað lof í lófa af báðum settum stuðningsmanna. 3 mörk eftir rétt rúmar 20 mínútur, 2-1.

Það var svo örfáum mínútum síðar sem að Swansea jafnaði. Fyrst var dæmd aukaspyrna á Skrtel, fyrir að sparka til Jonjo, liggjandi, eftir að boltinn var farinn. Aukaspyrnan kom inná teig þar sem að Bony var aleinn, skallaði boltann í öxlina á Skrtel og þaðan inn, líklega fær Bony markið þar sem mér fannst skallinn stefna að markinu. En who cares, staðan 2-2.

Að missa niður tveggja marka forystu á rétt rúmum sex mínútum á heimavelli er einfaldlega bannað. Það á ekki að vera hægt! Þessi varnarleikur liðsins er svo slakur að maður á varla lýsingarorð fyrir það. Bony, þeirra langbesti skallamaður, var ódekkaður á vítapunktinum í föstu leikatriði. Voru þeir svona uppteknir af því að passa Dyer? Ótrúlegt.

Ég þurfti nánast að fletta því upp eftir hálftímaleik hvort að Suarez væri ekki örugglega með. Ég heyrði jú nafn hans þegar boltinn barst vinstra meginn í teiginn. Kom þá ekki líka þessi fáránlega góða sending inn á markteiginn þar sem að Sturridge skoraði annað mark sitt, þetta sinn með skalla, staðan 3-2…. þrjú tvö … fimm mörk eftir 35 mínútna leik. Ótrúlegar tölur, eða eins og menn kalla það, Liverpool leikur.

Á 42 mínútu sá maður kannski svolítið vel ástæðuna fyrir því að Liverpool fær á sig svona mörg mörk. Liverpool var að sækja, missti boltann í vítateig Swansea og þeir sóttu á okkur. Svæðið, frá vítateig Swansea að varnarmönnum okkar, sem voru s.a. á miðjunni, var covera-að af einu manni. Gerrard. Allt í einu var þetta 3 á 3, restin var nánast öll inní vítateig Swansea. Þetta var á 42 mínútu leiksins þegar við erum yfir í leiknum. Ekki þeirri nítugustu og þriðju í bikarnum og Liverpool undir. Sturlun. Það þarf líka að spila vörn í þessu kerfi þó að andstæðingurinn sé ekki eins sexy og Arsenal eða Everton! Gerrard var þarna að covera fyrir alla miðjumennina og annan bakvörðinn.

Coutinho reyndi svo að láta Swansea jafna í uppbótartíma þegar mjög einföld pressa á miðju vallarins virkaði hjá Swansea, og þeir voru 3 á 3 aftur. Henderson fannst þetta rosa sniðugt og ákvað að reyna eitthvað svipað. Sendi 20 metra þversendingu á Swansea mann, en þrátt fyrir ítrekaðar tilraunir Liverpool manna þá tókst ekki að láta Swansea jafna, vantaði þó ekki viljann!

Ótrúlegum 45 mínútum lokið, eiginlega því betur fer. Hafði ekki taugar í meira nema að fá smá pásu til að ná andanum. Ég hef sagt þetta áður, að vera Liverpool aðdáandi er rússíbanaferð og það var eitthvað þarna í hálfleik sem sagði mér að þetta væri sko ekki búið.

Síðari hálfeikur

Sú tilfinning reyndist rétt. Bony fékk vítaspyrnu á 46 mínútu eftir að Skrtel hélt honum í teignum. Ég sá þetta nú ekkert alltof vel, sjónarhornið sem var boðið uppá var lélegt. En Skrtel er auðvitað búinn að stefna að þessu í nokkra mánuði, það tókst sem sagt að lokum. Kemur eflaust engum á óvart nema honum sjálfum ef marka má svipbrigði hans. Aðdragandinn var meira en lítið klaufalegur, Liverpool vann boltann á vinstri vængnum, held það hafi verið Sturridge sem svo datt með boltann aftur og Dyer náði honum, sendi fyrir og úr því kom vítið. Skrtel var í þokkabót á gulu spjaldi og getum við talist heppnir að hann hafi ekki fokið útaf. Bony tók vítið sjálfur og jafnaði metin, 3-3.

Suarez var næstum búinn að koma okkur aftur yfir tveimur mínútum síðar. Þegar Sturridge sendi fínan bolta innfyrir á Suarez, sem lét Vorm verja frá sér. Heitur Suarez hefði skorað þarna. Dauðafæri. Tvö mörk á fyrstu 5 mínútum síðari hálfleiks hefði ekki komið manni neitt á óvart.

Þetta sló okkur svolítið útaf laginu. De Guzman skaut rétt framhjá úr aukaspyrnu og svo varði Mignolet vel frá Routledge sem var við það að sleppa einn í gegn eftir hælsendingu Bony og Skrtel spilaði hann réttstæðan. En Glen gerði vel að trufla hann.

Allen kom inná á 57 mínútu fyrir Sterling (og átti flottan leik). Ég skildi skiptinguna, þ.e. að fjölga á miðjunni, en hefði líkelga frekar tekið Coutinho útaf (sem varla sást í síðari hálfleik). Agger fór svo útaf á 62 mínútu í stað Kolo. Meiddur? Lélegur? Kannski bæði. Þarna í millitíðinni áttu við fínt færi þegar Allen vann boltann á miðjunni og sendi á Sturridge sem var að komast einn í gegn, Williams hljóp hann þó uppi og náði að koma sér fyrir skotið. Suarez átti svo fínt færi eftir hornspyrnuna í kjölfarið en boltinn fór rétt yfir.

Tveimur mínútum síðar ætlaði Skrtel að láta skjaldbökubolta, sem varla dreif inní teig, fara og láta Mignolet taka hann. Hann gerði það að lokum en var þá nánast kominn út úr teignum, og sést í endursýningunni að boltinn skoppar í hendina á Mignolet fyrir utan teig. Klaufaskapurinn hrikalegur. Hálf vandræðilegt á köflum. Þetta var klaufalegt hjá Skrtel, á því er enginn vafi, en guð minn góður Mignolet. Þú verður að vera á tánum, bæði með þessa bolta sem og að hirða svona eins og eina fyrirgjöf annað slagið væri vel þegið. Sbr annað markið hjá Fulham.

Suarez vildi fá víti á 66 mínútu þegar hann var að taka snúning inní teig Swansea, en fékk ekki. Það var snerting, spurning hvort hann var ekki búinn að missa boltann og hvort að snertingin hafi verið nægjanleg. Ég verð að sjá betra sjónarhorn til að geta gert upp hug minn.

Á 73 mínútu hoppaði ég hæð mína og öskraði sem villtur maður. Gerrard átti frábæran bolta á Suarez, sem tók hann á bringuna, lék framhjá varnarmanni Swansea og skaut í Williams, þaðan fór boltinn til Henderson sem kom á ferðinni og skaut í fyrsta, Vorm varði en af því að þetta var Henderson þá náði hann sjálfur frákastinu og skoraði, 4-3. Ekki margir sem hefðu fylgt þessu eftir, en Henderson er einn þeirra. Annað mark hans í leiknum!

Moses kom inn í stað Sturridge á 78 mínútu. Og Kop.is ferðalangar fengu draum sinn uppfylltan þegar David nokkur Ngog kom inn hjá Swansea, en þeir keyptu frakkann í janúar frá Bolton. En samt, í alvöru talað, Sturridge út eftir 2 mörk og stoðsendingu í stað Suarez sem var klárlega ekki að eiga sinn besta leik og virkaði kaldur og þreyttur. Mér fannst það frekar skrítið svo ekki sé meira sagt.

Það gerðist lítið næstu mínúturnar, eða þar til á 88 mínútu þegar að Gerrard skaut í innanverða stöngina eftir að skotið hafði haft viðkomu í varnarmanni Swansea, en inn fór boltinn ekki. Við náðum frákastinu og Gerrard fékk hann aftur að lokum í miðjum teignum en Vorm varði skot hans. Hefðum getað klárað leikinn þarna! Við tóku því stressandi fimm mínútur þar sem að Liverpool reyndi að landa stigunum þremur. Það hófst og guð minn góður hvað þetta var erfið fæðing!

Þrjú stig, sjö mörk. Typical Liverpool leikur.

Lokaorð

Það er kannski óþarfi að halda áfram að telja leikina þetta tímabilið þar sem við fáum 2+ mörk á okkur. Þannig var það í dag og í þetta sinn, eins og svo oft áður, náði sóknin að skora þessi 3+ mörk sem við oft þurfum til þess að klára leiki. Swansea var fyrir þennan leik búið að skora 33 mörk í 26 leikjum. Auðvitað urðu þeir að skora þrjú stykki á Anfield og þar af tvö mörk á einhverjum sex mínútum. En hvað gerir maður þá? Jú, maður skorar bara meira. Þetta var einmitt svoleiðis leikur að liðið sem skoraði meira vann (höfundarréttur KAR). Þvílík sturlun og þvílík skemmtun sem þetta Liverpool lið er. Að hugsa sér að fyrir rétt rúmum þremur árum var Roy Hodgson á hliðarlínunni og Poulsen inná vellinum. Og að horfa á Liverpool leik var drep drep leiðinlegt. Ef Agger var tekinn útaf bara vegna Bony og slakrar frammistöðu þá óttast ég um framtíð hans á Anfield. En varnarleikurinn skrifast að sjálfsögðu á allt liðið. En við erum þar fyrir utan auðvitað að gera alltof mikið af einstaklingsmistökum. Skrtel gaf í dag víti og aukaspyrnuna sem leiddi til annað marks Swansea, svo sem ágætis dagsverk.

Þetta var HRIKALEGA mikilvægur sigur. Chelsea marði þrjú stig í gær með marki í uppbótartíma. Við mörðum þrjú stig í þessum leik þrátt fyrir að spila ekki vel. Lið með karakter vinna leiki sem þennan og Fulham leikinn fyrir rúmlega 10 dögum síðan. En það er samt hellingur til að hafa áhyggjur af. Við getum ekki alltaf verið að fá þessi 2+ mörk á okkur í leik. Og að skipta sífellt um miðverði er ekki lausnin. Þegar þú stillir liðinu svona upp, og varnarvinnan frá miðju og sókn er ekki betri en þetta, þá færðu einfaldlega helling af mörkum á þig. Það er enginn miðvörður þarna úti sem lagar það. Varnarvinnan er vinna allrar liðsheildarinnar og það er engin tilviljun að okkar besta varnarvinna þetta tímabilið er líklega í leikjunum gegn Everton og Arsenal þar sem að þau fá varla færi og hefðu ekki skorað ef ekki væri fyrir vítaspyrnuna sem Gerrard gaf Arsenal. Þar var jú liðsheildin að virka og menn hlupu úr sér lungun. Þeir nenna því ekki alveg jafnmikið gegn WBA, Fulham, Aston Villa og nú Swansea.

Ég trúi því og treysti að það verði unnið í þessu. Og á meðan við höldum áfram að skora 3 mörk+ í leik þá er erfitt að kvarta.

Slakur leikur af okkar hálfu, en þrjú stig. Ótrúlega mikilvægt og ég er hrikalega sáttur með að Liverpool geti í dag unnið ljótt (ef það er á annað borð hægt). Það hefur liðið klikkað á síðasta áratuginn eða svo.

Eflaust velja margir menn leiksins í þeim Henderson og Sturridge. Ég ætla að velja Sturridge sem mann leiksins, Hendo fær annaðsætið. Afhverju? Ég held að Sturridge fái ekki það lof sem hann á skilið. Maðurinn er kominn með 30 deildarmörk í 34 leikjum. Þrjátíu. Þrír, núll. Samt fær hann brotabrot af athygli Suarez og er skipt útaf í hverjum leik á meðan Suarez spilar áfram, eins og í dag, sama hvernig frammistaðan hans er. Til að undirstrika hve óheppinn hann er þá var Suarez valinn leikmaður mánaðarins hjá LFC í janúar. En Sturridge er núna búinn að skora í 8 deildarleikjum í röð. Við hefðum tapað stigum gegn Swansea, Stoke og Fulham ef ekki væri fyrir hann, hið minnsta. Ég vil bara þakka Chelsea enn og aftur fyrir þennan strák, þvílíkur leikmaður.

Endum þetta á jákvæðu nótunum:

Liverpool hefur aldrei, frá stofnun EPL, verið með þetta mörg stig (56) eftir 27 leiki.

Markahæstu leikmenn deildarinnar eru Suarez (23) og Sturridge (18). En Suarez missti af fyrstu fimm leikjunum og Sturridge verið frá í átta leikjum sökum meiðsla.

Gerrard og Suarez eru efstir í stoðsendingartölfræðinni þetta tímabilið, báðir með 9 stoðsendingar.

Liverpool er búið að skora 70 mörk í 27 deildarleikjum. Bara Real Madrid hefur skorað fleiri (71).

YNWA

Liðið gegn Swansea er komið. Frábærar fréttir þar sem að Glen kemur til baka, stimplum slaka frammistöðu hans síðustu misseri á meiðsli og fáum hann tvíefldan til baka, díll? Annars er ekkert óvænt þarna, Henderson og Mignolet einnig komnir til baka. Cissokho, Jones og Allen taka sér sæti á bekknum.

Lið gestanna er sem hér segir:

Vorm, Rangel, Chico Flores, Williams, Taylor, Britton, de Guzman, Shelvey, Dyer, Routledge, Bony

Koma svo!!

Fyrsta tap ársins staðreynd þegar Arsenal sló Liverpool úr bikarnum í dag á Emirates í hörkuleik.

Liðin stilltu þessu svona upp í dag:

Jones tók sæti Mignolet á milli stanganna, Agger kom inn í stað Toure og Allen lék við hlið Gerrard í stað Hendo sem var á bekknum eftir smá aðgerð á úlnliðnum í vikunni.

Fabianski, Jenkinson, Sanogo, Podolski og Flamini komu allir inn hjá Arsenal.

Fyrri hálfleikur

Það voru fimm mínútur búnar af fyrri hálfleik þegar maður var blótandi yfir því að vera ekki í 0-2. Fyrst fékk Sturridge frábæran bolta frá Gerrard, ekki ósvipað sendingunni gegn Fulham, reyndi að skjóta á milli fóta Fabianski sem varði í horn, dauðafæri. Það var svo mínútu síðar eða svo sem Suarez vippaði boltanum yfir vörn Arsenal á Sturridge sem lék á Fabianski en skaut í hliðarnetið í dauðafæri. Hefði eflaust viljað vera með boltann á þeirri vinstri þarna, en átti engu að síður að gera mikið betur!

Það var svo á 16 mínútu, eftir hornspyrnu Arsenal, sem að fyrirgjöf kom af hægri kanntinum, Skrtel fór upp í óskiljanlegan bolta, var svo langt frá því að ná honum að þetta minnti mann á David James á sínum Liverpool árum. Sanogo fékk því nægan tíma til að taka boltann á kassann og skjóta. Mér sýndist boltinn fara í hönd Gerrard, þaðan barst hann til Chamberlain sem var einn og óvaldaður og skoraði örugglega, 1-0.

Eftir þetta var ekki mikið að gerast, fyrri hálfleikur var frekar rólegur og spilaður mjög hægt. Eins og hvorugt liðið vildi taka almennilega sénsa. Það átti svo sannarlega eftir að breytast.

Seinni hálfleikur

Fyrstu mínúturnar í síðari hálfleik voru nákvæmlega eins og fyrstu 45 mínúturnar, við fengum dauðafæri þegar Suarez spólaði sig í gegnum vörn Arsenal en Fabianski varði frábærlega með fótunum. Í næstu sókn kom Podolski Arsenal í 2-0 þegar þeir komust á bakvið vörn okkar, sendu út í miðjan teiginn á þjóðverjan sem skoraði örugglega.

Stuttu síðar hefði Özil svo getað klárað leikinn en Jones varði mjög vel. Þegar þarna var komið var hrikalegur hraði í leiknum og liðin skiptust á að sækja. Suarez fékk boltann á hægri vængnum, lék inní teig þar sem Podolski kom og sparkaði aftan í Suarez og Webb dæmdi víti. Upp steig fyrirliðinn og setti boltann í sama horn og gegn Fulham fyrr í vikunni, staðan 2-1 og game on! Í kjölfarið kom Hendo inn í stað Cissokho og nú átti að vinna leikinn.

Sturridge fékk stuttu síðar sitt þriðja dauðafæri eftir frábæran bolta frá Coutinho, aftur reyndi hann að sóla Fabianski sem sá við honum í þetta skiptið. Maður hafði varla tíma til að sækja sér kaffibolla á þessum tíma. Í næstu sókn kom vendipunktur leiksins, Suarez ætlar að taka boltann með sér vinstra meginn í teignum en Chamberlain nelgdi Suarez niður beint fyrir framan Webb. Af einhverjum óskiljanlegum ástæðum ákvað Webb að sleppa augljósustu vítaspyrnu tímabilsins. Hræðileg ákvörðun!

Arsenal menn þurftu eftir þetta að verjast löngum stundum. Við pressuðum ofarlega á vellinum og fannst mér Sterling vera frábær, lék sér að Monreal lengi vel og var alltaf hætta þegar hann fékk boltann. Þetta minnti lengi vel á handboltaleik, hrikalegur hraði og liðin skiptust á að sækja.

Gerrard var heppinn að fá ekki sitt seinna gula spjal eftir brot á títt nefndnum Chamberlain, en sendi svo fimm mínútum síðar heimsklassabolta innfyrir vörn Arsenal á Coutinho sem náði ekki almennilegu valdi á boltanum og skotið var slakt. Hefði e.t.v. geta sent boltann út á Suarez í staðinn.

Við fengum lokatækifæri til þess að jafna þegar Agger skallaði framhjá eftir aukaspyrnu Gerrard. Fabianski kom út og náði ekki til boltans (náði aðeins til Aggers í staðinn), en Agger hefði bara þurft að hitta á markið, en þetta var svona dagur, inn fór boltinn ekki.

Leikurinn fjaraði svo út eftir þetta og niðurstaðan svekkjandi 2-1 tap gegn Arsenal.

Niðurstaða

Byrjum á manni leiksins, það er auðvitað Fabianski, klárlega. En besti leikmaður Liverpool í þessum leik fannst mér Sterling (eins og svo oft áður á síðustu vikum og mánuðum). Vantaði kannski upp á end prodöktið hjá honum en hann skapaði hættu hvað eftir annað og var virkilega sprækur í þessum leik.

Sko, við áttu að vinna þennan leik. Við fengum amk 4-5 dauðafæri ásamt því að Webb gerði sig að athlægi þegar hann dæmdi ekki víti þegar Suarez var sparkaður niður. Það var eins og hann vildi ekki dæma annað víti svona stuttu eftir hitt. Alveg hreint fáránlegur dómur!

En ég sagði það fyrir þennan leik og fyrir leikinn á Anfield, ef ég hefði mátt velja annan þessara leikja til þess að vinna þá hefði það verið deildarleikurinn allan daginn, alla daga vikunnar. Við höfum átt erfiðu gengi að fagna þarna á Emirates í gegnum árin en frammistaðan og spilamennskan í dag fannst mér nokkuð góð, þrátt fyrir tapið.

Það er oft stutt á milli hláturs og gráturs, þessi leikur tapaðist vegna þess að sóknin skoraði ekki þrjú mörk að þessu sinni (djúpt, ég veit). Við fáum á okkur of mörg mörk, 2 í dag og er það í þrettánda sinn á leiktíðinni þar sem við fáum á okkur 2+ mörk. Hingað til hefur sóknin reddað því fyrir okkur en náði því ekki í dag, því miður. Á góðum degi hefði Sturridge getað sett þrennu, en hann var búinn að skora í 7 leikjum í röð áður en það kom að þessum leik og því varla við hann að sakast, það hlaut að koma að þessu.

Sigurvegarinn í þessum leik fær Everton á heimvelli í næstu umferð. Maður horfði á liðin sem eru eftir í pottinum og það var tækifæri þarna til að ná í dollu! En það verður ekki þetta árið því miður.

Nú er ein keppni eftir, og þar erum við í flottum málum. En það er stutt í næstu lið, fyrir ofan og neðan, og því má ekkert útaf bregða. Þetta tímabil er svo jafnt að við gætum alveg eins endað í sjötta sæti eins og því fyrsta. Liðin fyrir ofan okkur eru að fara spila stóra leiki í CL á næstu vikum og eiga eftir að koma á Anfield á meðan við höfum viku á milli leikja núna þar til í maí. Á þessum tímapunkti er hinsvegar ekkert gefins, allir leikir eru úrslitaleikir þar til sú feita syngur í maí. Við erum á rosalegu rönni og þurfum að halda því áfram og klára tímabilið með stæl!

Liðið gegn Arsenal er komið, Agger er kominn til baka og tekur sæti Toure. Jones stendur á línunni og Allen kemur í stað Henderson, sem fór víst í litla aðgerð á úlnliðnum í vikunni og tekur sér sæti á bekknum.

Fínasta lið, ég skil þó ekki alveg í því að gefa Jones þennan leik á kostnað Mignolet, en hvað um það. Sterkt lið, eins og við var búist, á með topp topp leik að geta lagt þetta Arsenal lið.

Lið Arsenal er:

Þeir skipta s.s. einnig um markmann, Jenkinson kemur inn í stað Sagna, Flamini kemur úr banni, Podolski og Sanogo koma einnig inn, sá síðarnefndi á kostnað Giroud, sem er að biðja konunnar afsökunar.

KOMA SVO!!