Það kom okkur algjörlega í opna skjöldu þegar myndband af David Coote fór að birtast á Twitter núna eftir hádegi, þar sem hann lýsir skoðun sinni á Klopp og jafnframt á Liverpool. Við Liverpool aðdáendur erum auðvitað í sjokki því það var ekkert sem benti til að þetta gæti verið raunin.

Not.

Nú er bara að sjá hvort PGMOL gerir eitthvað í málinu. Höldum ekkert niðri í okkur andanum samt.

UPPFÆRT: þessi skilaboð bárust frá PGMOL:

David Coote has been suspended with immediate effect pending a full investigation. PGMOL will be making no further comment until that process is complete.

Liverpool tóku á móti Bayer Leverkusen eins og höfðingjar í kvöld, en voru þó ekki gestrisnari en það að skora fjögur mörk á þá þýsku og ekki hleypa einu marki inn. Öruggur og góður sigur í höfn og Liverpool sitja einir á toppi bæði ensku og Meistaradeildarinnar.

Mörkin

Diaz – ’61
Gakpo – ’63
Diaz –  ’83
Diaz – ’92

Hvað gerðist markvert í leiknum?

Fyrri hálfleikur var ein löng og falleg vögguvísa. Það er ekki svo að segja að Liverpool hafi verið að spila hrikalega illa, en liðið var ekki að spila mjög vel, tenging milli manna lítil og sókn og miðja virtust í sitthvorum taktinum. Á sama tíma voru gestirnir að spila þétta og góða vörn og náðu tvisvar að koma með storma inn í vítateig Liverpool og búa til fín færi.

Í annað sinn í vikunni var eins og endurnýtt lið kæmi inn eftir hálfleik. Fyrsta korterið í hálfleiknum unnu okkar menn sig inn í leikinn og byrjuðu að skapa sér betri og betri stöður. Tilfinningin var þó þannig að þjóðverjararnir væru vel fókuseraðir og gætu mögulega haldið þetta út.

En þeir misstu einbeitingu í andartak. Curtis Jones var hins vegar vel vakandi og þræddi nálarauga með boltanum inn á sjóðheitan Luis Diaz. Maður leiksins lét ekki bjóða sér þetta tvisvar og vippaði boltanum smekklega yfir markmanninn, staðinn 1-0.

Í næstum hálfa mínútu eftir markið virtust Leverkusen ætla að svara þessu af krafti. En sóknin endaði í að Konate vann boltann og hóf skyndisókn. Salah endaði með boltann úti á kanti sem sendi guðdómnlega sendigu á kollinn á Cody Gakpo, sem þakkaði pent fyrir sig og tvöfaldaði forystu Liverpool. Það þurfti langa VAR stund til að staðfesta að Hollendingurinn hefði verið réttstæður.

Eftir það virtust Liverpool ekki líklegir til að fá á sig mark. Þjóðverjarnir sóttu að krafti, en eftir að Duiz bætti við öðru marki á áttugustu mínútu var aldrei í vafa hvar stiginn þrjú myndu enda. Leverkusen náði reyndar nokkrum frábærum sóknum á þessum ruslmínútum. En Liverpool náði oft að snúa þessum sóknum í skyndisóknir og það var úr slíkri sem Diaz fullkomnaði þrennuna. Nunez bar boltann upp, með þrjá púllara með sér. Hann var gráðugur og kaus að skjóta, boltinn varinn en Diaz náði frákastinu og skoraði. Fullkominn hálfleikur og myndi ég þyggja með þökkum að Liverpool prófaði að spila svona hálfleik fyrir hálfleik.

Hvað réði úrslitum?

Elja Liverpool í upphafi seinni hálfleiks. Það hefði verið létt að missa móðinn á móti þessari sterku vörn en um leið og Diaz braut ísinn opnaðist allt.

Hverjir stóðu sig vel?

Curtis Jones verður að fá stórt hrós fyrir sinn leik, sérstaklega í stoðsendingunni fyrir fyrsta markið. Allir framherjarnir okkar voru flottir í kvöld, Kelleher varði nokkrum sinnum frábærlega undir lok leiks. Í raunar mætti telja upp alla leikmenn liðsins í seinni hálfleik.

Ég ætla líka að setja stórt hrós á Slot. Vissulega er það vandamál að liðið er hægt af stað í leik eftir leik, en hann er aftur og aftur er hann að breyta leikjum í hálfleik, hvort sem hann er að gera það með litlu skipulagsbreytingum eða eldræðum.

Hvað hefði mátt betur fara?

Okkar menn hefðu virkilega mátt koma betur stilltir inn í fyrri hálfeik. Þetta var alls ekki jafn slæmt og um helgina, en miðjan og sóknin voru alls ekki að tengja nógu vel og menn virkuðu eins og þeir vissu ekki alveg hvað hinir væru að gera. Einnig langar mig að skjóta létt á Trent. Kannski er það vegna skipulagsbreytingu hjá nýjum stjóra eða hann er að venjast breyttu hluverki, en hann má spila miklu betur en hann gerði í kvöld.

Umræðan eftir leik

Liverpool er á toppnum í ensku og toppnum í Meistaradeildinni. Þó það séu allskonar hlutir sem má bæta í spilamennsku liðsins þá er ekki hægt að horfa framhjá að byrjun tímabilsins hefur verið gjörsamlega stórfengleg. Megi Arne Slot halda áfram þessu geggjaða starfi.

Hvað er framundan?

Aston Villa á laugardagskvöldið þar sem hundrað fulltrúar Kop.is verða í rífandi stuði!

Liðið gegn Leverkusen er komið í loftið

Báðir vinsti vængmennirnir byrja og því líklegt að Gakpo verði upp á topp. Nunez þarf að fá hvíld einhversstaðar og út því Jota er meiddur er skiljanlegt að Gakpo leysi eitthvað upp á topp.

Szoboszlai og Robbo eru líka á bekknum en Konate er mættur aftur sem eru frábærar fréttir

Bekkur Jaros, Davies, Gomez, Endo, Szoboszlai, Nunez, Robertson, Quansah, Bradley, Morton.

Leverkusen

Leverkusen er ung borg en hefur áhugaverða sögu, sérstaklega tengda iðnaði og efnaiðnaði. Borgin er staðsett í Nordrhein-Westfalen-ríki í vesturhluta Þýskalands, nærri borgunum Köln og Düsseldorf. Hún varð formlega til árið 1930 þegar mörg smærri þorp voru sameinuð, þar á meðal Opladen, Wiesdorf og Schlebusch, en saga svæðisins nær aftur til fornaldar.

Ástæða þess að Leverkusen varð svona sérstök borg er tilkoma lyfjafyrirtækisins Bayer AG, sem hóf starfsemi á svæðinu á síðari hluta 19. aldar. Karl Leverkus (!), efnaiðnfræðingur frá Wermelskirchen, stofnaði litlar litunarverksmiðjur á svæðinu um 1860 og flutti þær svo til Wiesdorf til að stækka þær. Þetta varð grunnurinn að Bayer, sem var formlega stofnað árið 1863 af Friedrich Bayer og Johann Friedrich Weskott, en síðar urðu höfuðstöðvar Bayer staðsettar í Wiesdorf, sem er nú hluti af Leverkusen.

Bayer AG hafði mikil áhrif á uppbyggingu borgarinnar, ekki aðeins með því að skapa störf heldur einnig með því að stuðla að þróun samfélagsins. Fyrirtækið styrkti byggingu skóla, íbúða, spítala og annarrar grunnþjónustu fyrir starfsmenn sína, og það kom einnig að uppbyggingu íþróttamannvirkja, sem varð til þess að Bayer Leverkusen íþróttafélagið var stofnað. Með tímanum varð vaxandi íbúafjöldi og iðnvæðing þess valdandi að Leverkusen varð ein af mikilvægari iðnaðarborgum Þýskalands.

Í seinni heimsstyrjöldinni varð Leverkusen fyrir loftárásum, þar sem iðnaðarframleiðsla borgarinnar var mikilvæg fyrir stríðsrekstur Þýskalands. Mikil eyðilegging varð í borginni, en eftir stríðið hófst endurreisn, og Bayer og aðrir iðnaðarframleiðendur tóku þátt í að byggja borgina upp á ný. Á sjötta og sjöunda áratugnum stækkaði borgin og laðaði að sér fleiri íbúa.

Í dag er Leverkusen ekki aðeins þekkt fyrir Bayer fyrirtækið heldur einnig sem ein af þekktustu knattspyrnuborgum Þýskalands. Bayer Leverkusen knattspyrnuliðið er í Bundesliga og er eitt af þeim liðum sem hefur skapað borginni mikla frægð á alþjóðavísu.

Félagið

Saga Bayer Leverkusen er í senn merkileg og dramatísk, þar sem félagið hefur reglulega verið nálægt því að vinna titla án þess að það hafi tekist. Félagið var stofnað árið 1904 af starfsmönnum þýska lyfjafyrirtækisins Bayer. Fyrstu áratugina keppti liðið í neðri deildum og náði smám saman að byggja upp sterkari stöðu innan þýska fótboltans.

Á áttunda áratugnum hóf Bayer Leverkusen að festa sig í sessi í efri deildum og komst loks í Bundesliguna árið 1979. Þetta var mikilvægur áfangi og á næstu áratugum tókst liðinu að tryggja sér fast sæti í efstu deild og byggja upp stöðu sína í þýska fótboltanum. Bayer Leverkusen varð þekkt fyrir að þróa unga leikmenn og byggja upp hópa sem spiluðu skemmtilegan og sókndjarfan fótbolta. Á níunda áratugnum tókst félaginu loksins að landa sínum fyrsta stóra titli þegar þeir unnu UEFA bikarinn árið 1988, eftir frækinn sigur á Espanyol í vítaspyrnukeppni í úrslitum.

Bayer Leverkusen hefur í seinni tíð verið kallað „Neverkusen“. Þetta nafn er tilkomið vegna þess að liðið hefur oft endað í öðru sæti og aldrei náð að landa Bundesligu-titlinum, þrátt fyrir að vera meðal sterkustu liðanna í Þýskalandi (fyrir utan auðvitað síðasta vor). Árið 2002 var eitt af frægustu tímabilum félagsins, þar sem þeir enduðu í öðru sæti í þremur helstu keppnum þess tímabils: Bundesliga, DFB-Pokal (þýska bikarnum), og Meistaradeildinni. Það ár töpuðu þeir úrslitaleiknum í Meistaradeildinni gegn Real Madrid, þar sem Zinedine Zidane skoraði eitt frægasta mark keppninnar. Þetta tímabil varð Bayer Leverkusen táknmynd liðs sem komst nálægt en náði ekki toppnum.

Bayer Leverkusen hefur lengi verið vettvangur fyrir hæfileikaríka leikmenn. Michael Ballack er einn frægasti leikmaður félagsins, en hann sló í gegn með Bayer Leverkusen og varð einn þekktasti leikmaður Þýskalands. Önnur nöfn sem hafa blómstrað hjá félaginu eru meðal annars Bernd Schuster, Dimitar Berbatov og nýlega Kai Havertz, sem vakti mikla athygli fyrir frammistöðu sína og var seldur til Chelsea árið 2020.

Liðið

Þegar rætt er um lið Bayer Leverkusen er nafn Xabi okkar Alonso það fyrsta sem kemur upp í hugann. Hann hefur gert frábæra hluti og var orðaður við Liverpool í sumar – þótt sá orðrómur hafi líklega verið úr lausu lofti gripinn. Þeir náðu frábærum árangri í fyrra undir stjórn Xabi, unnu Bundesliguna, fóru taplausir í gegnum deildina og töpuðu í úrslitum Evrópudeildarinnar. Það verður án efa tekið mjög vel á móti Xabi Alonso á Anfield.

Leikmannahópurinn þeirra er sterkur, nöfn á borð við Florian Wirtz, Jeremie Frimpong, Granit Xhaka, Jonathan Tah, Piero Hincapié og Lukas Hradecky prýða hópinn og eru helstu lykilmennirnir. Flestir ættu að kannast a.m.k við hluta af þessum nöfnum, T.d. hafa Teh og Hincapié verið orðaðir frá félaginu til stórliða Evrópu.

Leverkusen situr nú í fjórða sæti Bundesligunnar með 16 stig eftir 9 leiki, gerðu markalaust jafntefli við Stuttgart um helgina. Til samanburðar er RB Leipzig í öðru sæti með 20 stig, þannig að ég myndi giska á að við séum að fara í sambærilegan leik og gegn þeim.

Líklegt byrjunarlið Bayer Leverkusen er svona:

Hradecky

Tapsoba – Tah – Hincapié

Frimpong – Xhaka – Garcia – Grimaldo

Terrier – Wirtz – Boniface

Liverpool

Frábær seinni hálfleikur gegn Brighton tryggði þrjú stig og toppsæti ensku úrvalsdeildarinnar. Eins og seinni hálfleikur var góður, var fyrri hálfleikur alveg hræðilegur og það er eitthvað sem þarf að laga hið snarasta. Ég held að Slot og þjálfarateymið hans hafi lært mikið af leiknum gegn Brighton, það er stundum ágætt að vera yfirspilaður, það getur verið lærdómsríkt, svo framarlega sem það kostar ekki stig og/eða mikið af mörkum á sig. Ég hef a.m.k trú á því að Slot og co dragi lærdóm af leiknum og nái að loka betur, pressa betur, þvinga andstæðingana í erfiðari sendingar eins og raunin varð í seinni hálfleik. Frábært að sjá viðbrögðin þar.

Leverkusen gæti alveg orðið svipaður leikur, þeir eru vel spilandi og þetta snýst um að vinna tæklingar, loka sendingaleiðum og keyra sig út. Ég held að einhverjir hafi alveg gert það á laugardaginn og því sé þörf á einhverjum breytingum – líka með það í huga að staðan í Meistaradeildinni er mjög góð og svo er erfiður leikur gegn Aston Villa á laugardagskvöld. Arne Slot hefur þó sýnt okkur með liðsvalinu sínu að hann er ekkert að gera neinar brjálæðislegar breytingar á milli leikja. Hann vill bara vinna og stilla upp nógu góðu byrjunarliði til að gera einmitt það. En ég held það verði nokkrar breytingar – mín ágiskun er þessi:

Game on, fjörið heldur áfram, við fáum skemmtilegt 3-3 jafntefli í þessum leik.