Search

Menu
Search

Latest stories

  • Newcastle 3 – 3 Liverpool

    43 Comments

    Liverpool mætti á St. James Park í Newcastle í kvöld og fór þaðan með eitt stig, sem að sumu leyti var bara ágæt uppskera, en að sumu leyti ógeðslega súrt að krækja ekki í öll stigin 3.

    Mörkin

    1-0 Isak (35. mín)
    1-1 Jones (50. mín)
    2-1 Gordon (62. mín)
    2-2 Salah (68. mín)
    2-3 Salah (83. mín)
    3-3 Schar (90. mín)

    Hvað gerðist markvert í leiknum?

    Hellingur. Fyrir það fyrsta þá var orkustigið hjá leikmönnum alls ekki gott, og Newcastle menn mættu mun ákveðnari til leiks. Í raun var ákveðinn léttir að fara bara með eitt mark á bakinu inn í hálfleikinn. Reyndar spilaði líka inn í að dómarinn var gjafmildur á gulu spjöldin, þó svo að heimamenn hafi nú minnst fengið að njóta þeirrar gjafmildi einhverra hluta vegna. T.d. var spjaldið sem MacAllister fékk sérlega furðulegt, og nokkur brot hjá þeim röndóttu sem hefðu frekar verðskuldað gult spjald.

    Seinni hálfleikur var að mestu leyti mun betri hjá okkar mönnum, enda var komið jöfnunarmark innan 5 mínútna, flott mark hjá Jones í sínum 150. leik fyrir félagið og stoðsending frá Salah (en ekki hvað?). Antony Gordon þurfti svo auðvitað að skora annað mark nokkru síðar, en Salah svaraði með marki rétt eftir að Trent, Szobo og Díaz komu inná, og þar var nú Trent potturinn og pannan. Svo bætti Salah öðru marki við þegar skammt var til leiksloka, en á lokamínútu venjulegs leiktíma náðu heimamenn að jafna þegar Kelleher lét bolta fara sem hann hefði a.m.k. átt að slá afturfyrir eða hugsanlega reyna bara að grípa. Þar sást vel að þrátt fyrir allt er hann reynslulítill og vafasamt að Alisson hefði fengið svona mark á sig. Og þannig enduðu leikar, drullufúlt að ná ekki að vinna, sérstaklega fyrst jöfnunarmarkið var eins og það er.

    Hverjir stóðu sig vel?

    Það eru mun færri á þessum lista heldur en eftir leikina gegn Real og City. Það er nú varla annað hægt en að setja Mo Salah efst á þann lista, nú er hann sá leikmaður í sögu úrvalsdeildarinnar sem hefur bæði skorað og átt stoðsendingu í sama leiknum. 37 leikir hjá kappanum, Rooney er næstur með 36 og Henry með 32. Trent kom sterkur inn síðasta hálftímann eða svo, MacAllister átti góðan seinni hálfleik, og Curtis má nú alveg fá smá hrós líka.

    Hvað hefði mátt betur fara?

    Hér setjum við frammistöðuna hjá Kelleher í fyrsta sætið, fyrst og fremst fyrir þessa einu fyrirgjöf sem hann hefði átt að díla öðruvísi við. En hann er ekki sá eini sem má líta í eigin barm. Darwin Nunez hljóp eins og vitleysingur, en það kom lítið út úr honum og hann átti nokkur færi sem betri slúttari hefði skorað úr. Gravenberch hefur oft spilað betur, kannski ósanngjarnt að gera kröfur til að hann haldi sama leveli allt tímabilið eftir að hafa verið þetta góður í haust. Quansah er enginn bakvörður, og líður greinilega mun betur í miðverðinum. Munum jú líka að hann er enn ungur og á ýmislegt eftir ólært.

    Slot notar þennan leik vonandi til að læra af, það má nú alveg færa rök fyrir því að hann hefði átt að skipta ferskum löppum inn eftir að Salah skoraði 2-3, og í raun magnað að nota ekki allar 5 skiptingarnar á þessu tímabili þar sem það er nauðsynlegt að dreifa álaginu eins og hægt er.

    Endum samt á dómaranum sem átti alls ekki góðan dag, og var mjög óstöðugur í sinni dómgæslu. Líklega ekki ástæða til að kenna honum um úrslitin samt.

    Umræðan eftir leik

    Fyrst og fremst þarf bara að klára að semja við Mo Salah, og reyndar við Virgil og Trent sömuleiðis. En þó svo Salah sé kominn yfir þrítugt þá er hann einfaldlega ennþá bestur. Svo er spurningin hvað Darwin Nunez á að fá mörg tækifæri. Persónulega hefur undirritaður alltaf haft miklar mætur á honum og hann getur orðið algjört skrímsli, en bara spurning hvað eigi að bíða lengi eftir að það gerist.

    Næsta verkefni

    Varðandi frammistöðuna í kvöld – sérstaklega í fyrri hálfleik, þá er kannski bara eðlilegt að menn séu ögn lúnir eftir tvo háspennuleiki gegn Real og City. En það þarf að endurheimta með hraði, því það er hádegisleikur á Goodison kl. 12:30 á laugardaginn. Við verðum án Alexis okkar í þeim leik, því hann er kominn í eins leiks bann eftir gula spjaldið í kvöld. Svosem ágætt að hann fái smá hvíld.

    Þeir bláklæddu náðu í 3 stig í kvöld gegn Úlfunum og koma í góðum gír inn í leikinn á laugardaginn, sem verður erfiður og mikil slagsmál eins og alltaf. Panta 3 stig í þeim leik takk!

  • Liðið gegn Newcastle

    94 Comments

    Slot búinn að tilkynna liðið sem hefur leik núna kl. 19:30 á eftir í Newcastle. Ekki mikið sem kemur á óvart, það þarf að rótera eins og hægt er án þess að veikja liðið að ráði, og hann hendir þrem leikmönnum inn sem byrjuðu ekki síðasta leik:

    Bekkur: Jaros, Nallo, Trent, Endo, Morton, Szoboszlai, Nyoni, Elliott, Díaz

    Jújú, kannski óvenjulegt að spila Quansah í hægri bak, en mögulega er það bara fín leið til að koma honum í spilaform, varnarskyldan er kannski ekki alveg sú sama þar eins og í miðverðinum (en samt talsverð). Það er líka bara nauðsynlegt að ætla Trent ekki um of verandi nýstiginn upp úr meiðslum.

    Við sjáum kjúklingana Nyoni og Nallo á bekk, Nallo er jú varnarmaður og virðist vera sá úr unglingahópnum sem er kominn fremst í goggunarröðina þegar kemur að varnarmönnum. Trey Nyoni fær líka sénsinn, og manni líður nú betur með það frekar en að vera með tvo varamarkverði í hóp. Ekki það að þessir tveir koma tæpast inná, en vonandi notar Slot skiptingarnar eins og hægt er til að hvíla menn og dreifa álaginu.

    Að sjálfsögðu byrjar Nunez, skemmst að minnast þess þegar hann mætti á þennan völl fyrir ári og skoraði tvö mörk sem tryggðu 10 leikmönnum Liverpool sigur gegn heimamönnum.

    Þigg hvaða sigur sem er, myndi alveg þiggja að menn sleppi heilir frá herlegheitunum.

    KOMA SVO!!!!!

  • Toppliðið heimsækir Newcastle á morgun

    7 Comments

    Annað kvöld mun lang efsta lið deildarinnar heimsækja lærisveina Eddie Howe í Newcastle í 14.umferð Úrvalsdeildarinnar en Liverpool kom sér heldur betur í þægilega stöðu um helgina þegar Liverpool rústaði Manchester City 2-0 á Anfield. Rústaði og 2-0 hljómar kannski klikkað en þau sem horfðu vita að þetta var rúst.

    Liverpool hefur verið á frábæru skriði undanfarið og komust svo sannarlega vel í gegnum þetta tíu leikja prógram í öllum keppnum þar sem ansi margir virtust handvissir um að Liverpool myndi nú fara að fatast flugið en svo var nú aldeilis ekki og Liverpool vann alla leiki nema einn þar sem liðið gerði 2-2 gegn Arsenal á útivelli í mögulega einum versta leik sem liðið hefur spilað í vetur. Það var nú ekki beint glæsibragur yfir leiknum gegn Southampton sem var fyrsti leikur eftir síðasta landsleikjahlé og fóru margir keppinautar eflaust að sleikja út um og bjuggust við að Liverpool færi nú að dala en heldur betur ekki.

    Á síðustu viku eða svo lék Liverpool sér að bæði Real Madrid og Man City og vann bæði lið 2-0 og situr nú með níu stiga forskot á Arsenal, Chelsea og Brighton og ellefu stig á Man City sem er bara drullu sæmileg staða til að vera í þegar desember törnin fer af stað og næsta verkefni er útileikur gegn Newcastle.

    Newcastle hefur verið svolítið upp og niður á þessari leiktíð, litið mjög flott út í einhverjum leikjum en alls ekki merkilegir í öðrum. Frá síðasta landsleikjahléi hafa þeir tapað gegn West Ham og gerðu jafntefli við Crystal Palace um núliðna helgi. Alexander Isak, þeirra skæðasti framherji, fór meiddur út af í síðasta leik og óvissa hefur verið með þátttöku hans á morgun en það virðist vera að útlitið sé bjartara með hann og að hann verði líklega með.

    Oft hafa þeir verið þéttir varnarlega og erfitt að brjóta þá niður, með nokkra grófa leikmenn hér og þar sem er nú ekki skemmtilegt að mæta eins og t.d. Joelinton. Þeir eru nokkuð hávaxið og sterkt lið sem gæti verið ógn í föstu leikatriðunum og þeir hafa nokkra beinskeytta sóknarmenn eins og áðurnefndan Isak og Harvey Barnes og Anthony Gordon – sem var nú nokkuð sterklega orðaður við Liverpool í sumar.

    Liverpool verður án leikmanna eins og Alisson, Bradley, Diogo Jota, Konate, Tsimikas og spurning verður hvort að Chiesa verði kominn aftur í leikmannahóp eftir meiðsli en sá ítalski er farinn að hefja æfingar með liðinu að nýju og ætti að vera væntanlegur inn í hóp aftur fljótlega og Harvey Elliott kom inn á í uppbótartíma gegn Man City svo það er að aukast aðeins í breiddina frammi en á móti þá hefur fækkað leiðinlega mikið úr vörninni eftir meiðsli Konate, Bradley og Tsimikas.

    Kelleher

    Trent – Gomez – Van Dijk – Robertson

    Szoboszlai – Gravenberch – Mac Allister

    Salah – Nunez – Gakpo

    Það er kannski pínu erfitt að spá fyrir um það hvernig Arne Slot ætlar að stilla upp í þessum leik og ekki ósennilegt að hann róteri einhverju svona nokkuð “óvænt” í næstu leikjum. Til dæmis hefur Gravenberch spilað mikið undanfarið en gæti þó verið mjög mikilvægur í þessari viðureign, Trent mun ekki spila tvisvar 90 mínútur gegn Newcastle á morgun og Everton um helgina svo það þarf að finna skiptimann fyrir það – það er því spurning hvort að Quansah gæti spilað annan leikinn í miðverði og Gomez í hægri bakverði eða þá annar þeirra komið inn sem hægri bakvörður seinna í leikjunum eins og Quansah gerði gegn Man City.

    Szoboszlai og Jones hafa skipt svolítið á milli sín stöðu á miðjunni líkt og Gakpo og Diaz hafa gert með vinstri vænginn og spurning hverjir þeirra koma til með að byrja en þeir voru allir frábærir gegn Man City, þá gæti Nunez alltaf fengið tækifæri á að byrja og ef hann gerir það ekki þá er það líklega Diaz sem að spilar fremstur.

    Sjáum hvað setur. Krefjandi útileikur framundan og á margan hátt allt, allt öðruvísi áskorun heldur en síðustu tveir leikir hafa verið svo Liverpool þarf að halda haus og spila vel til að halda sigurgöngu sinni áfram og vonandi fá hagstæð úrslit á morgun og auka bilið enn meira á toppnum!

    Sjáum hvað setur annað kvöld.

  • Gullkastið – Olíulaust Man City

    9 Comments

    Þvílík vika, Real Madríd var pakkað saman í miðri viku og Man City jafnvel ennþá meira sannfærandi um helgina. Liverpool er afgerandi á toppnum allsstaðar fyrir vikið. Framundan eru tveir erfiðir útileikir, Newcastle á St. Jamses áður en Liverpool heldur í síðasta skipti yfir Stanley Park til að spila í Guttagarði. Ljómandi að losna við þá úr hverfinu.

    Ögurverk liðið er á sínum stað, það var töluverð barátta um fagmann vikunnar í boði Húsasmiðjunnar

    Happatreyjur.is – Gjafaleikur

    Minnum áfram á Happatreyjur.is eru auðvitað jólagjöfin í ár, endilega kynnið ykkur málið á happatreyjur.is.
    Lesendur Kop.is geta notað afsláttakóðan afsláttakóða KOP10

    Stjórnandi: Einar Matthías
    Viðmælendur: SSteinn og Maggi

    Þökkum að vanda samstarfsaðilum þáttarins fyrir að hjálpa okkur að halda síðunni úti.


    Egils Gull / Húsasmiðjan / Verdi Travel / Ögurverk ehf / Done

    MP3: Þáttur 499

  • Liverpool 2 – 0 Man City

    22 Comments

    1-0 Gakpo 12′

    2-0 Salah 78′ (víti)

    Leikurinn byrjaði með gríðarlegum yfirburðum okkar manna og voru þeir hreinlega bara klaufar að ganga ekki frá leiknum á fyrstu tíu mínútunum. Gakpo fékk nokkrar góðar stöður ásamt því að Ortega varði vel hörkuskot Szoboszlai og Van Dijk átti skalla í stöngina í hornspyrnunni sem fylgdi. Liverpool náði þó loks að nýta yfirburði sína í leiknum þegar Trent átti flotta sendingu upp í horn á Salah sem setti boltann milli markmanns og varnarmanna þar sem Gakpo kom honum í netið eftir tólf mínútna leik.

    Við höfum oft séð það í leikjum í ár að þegar við skorum fyrsta markið minnkar aðeins ákefðin og Liverpool fer að stýra leikjunum meira en það átti ekki við í dag og næstu mínútur eftir markið áttu City menn bara erfitt með að finna samherja.

    Yfirburðirnir fóru dvínandi því sem leið á hálfleikinn og þó Man City hafi ekki fengið neitt sérstakt marktækiflri var maður stressaður að hafa ekki gert út um leikinn þegar tækifæri gafst til.

    Seinni hálfleikurinn hófst eins og sá fyrri endaði að City hélt boltanum en náði ekki að skapa nein sérstök færi en Liverpool hélt áfram að koma sér í hættulegar stöður en ekki ná að koma þeim í markið þegar Gakpo fékk sendingu frá Robbo en setti skot sitt beint í Ortega og síðan náði Salah að stela boltanum og sleppa einn inn fyrir en setti skot sitt yfir.

    City átti sína bestu sókn eftir um klukkutíma leik án þess þó að ná af skoti en þar var mikill darraðadans á teignum og boltinn barst aftur og aftur til City manna en komu þó aldrei skoti á markið.

    Þegar korter var eftir af leiknum var Darwin Nunez kominn inn á og átti hann flotta pressu sem varð til þess að Diaz náði að pota boltanum framhjá varnarmönnum City og ætlaði svo framhjá Ortega í markinu en var tekinn niður og vítaspyrna dæmd sem Mo Salah skoraði úr og loksins, loksins kominn tveggja marka forustan sem við áttum svo skilið.

    Kelleher fékk svo loks að taka þátt í leiknum þegar átta mínútur voru eftir þegar Van Dijk var alltof rólegur á boltanum og De Bruyne náði að stela honum af Van Dijk en Kelleher var mættur vel á móti og át skot De Bruyne.

    Bestu menn Liverpool

    Mo Salah átti bæði mark og stoðsendingu í dag og heldur áfram að vera leikmaður stóru leikjanna. Það áttu í raun allir góðan dag í dag en það ber að nefna Szoboszlai sem byrjaði kannski óvænt í dag og átti frábæran leik sem og Trent sem er að stíga upp úr meiðslum en var með betri mönnum vallarins í dag. Vörnin hinsvegar stóð allt af sér í dag fyrir utan mistökin hjá Van Dijk, miðjan var frábær og eina sem hægt er að kvarta undan er að sóknarmennirnir hefðu mátt klára fleiri af þessum færum sínum, því leikurinn hefði auðveldlega getað endað í niðurlægjandi tölum fyrir Englandsmeistarana.

    Vondur dagur

    Það var enginn sem átti slæman dag í dag.

    Umræðupunktar

    • Liverpool er á toppnum með níu stiga forustu á næsta lið.
    • Auk þess erum við með ellefu stiga forustu á Man City.
    • Vika þar sem við vinnum bæði Real Madrid og Man City og erum bara hreinlega miklu betra liðið í báðum þessum leikjum.
    • Pep taldi sig þurfa að labba um völlinn og minna menn á hversu marga titla hann hefði unnið sem minnti óneitanlega á Jose Mourinho þegar hann var á leiðinni niður brekkuna.
    • Eina neikvæða er að nú eru 30 dagar í að þrír af bestu mönnum vallarins í dag geta farið að tala við önnur lið og við þurfum að fara fá lausn í þau mál.

    Næsta verkefni

    Nú er leikið þétt og næsti leikur er gegn Newcastle á miðvikudaginn.

  • Byrjunarliðið gegn Man City

    25 Comments

    Nokkrar óvæntar breytingar á liðinu fyrir stórleikinn í dag. Eins og búist var við víkja meiddu mennirnir Bradley og Konate fyrir Gomez og Trent, en Curtis Jones og Darwin Nunez víkja einnig fyrir Szoboszlai og  Gakpo. Fréttir sem koma á óvart sérstaklega að Jones missi sæti sitt eftir góðan leik í vikunni en gæti haft eitthvað með það að gera að þegar Slot bekkjaði Szoboszlai gegn Arsenal vantaði orku á miðjuna í byrjun leiks og vill kannski frekar fá kraftinn í Szobo þar og eiga Jones inni.

     

    Bekkur; Jaros, Davies, Quansah, Jones, Elliott, Nyoni, Morton, Endo og Nunez

    En dauðafæri fyrir okkar menn að koma sér í algjöra drauma stöðu í deildinni!

  • Liverpool-Man City

    12 Comments

    Þá er komið að því – Arabíuprinsarnir koma í heimsókn á Anfield.

    Forsagan

    Síðustu árin hafa leikir þessara liða verið hreint út sagt magnaðir. Pep Guardiola hefur sagt að hann hafi lært endalaust af Jurgen Klopp og út af honum og Liverpool-liði síðustu ára hafi hann stöðugt þurft að gera liðið sitt betra og betra, enda hefur árangur þessara tveggja liða verið út úr kortinu sum af síðustu tímabilum.

    Nóg um það. Best að minnast líka aðeins á mennina sem eiga Man City. Best að minnast líka aðeins á 115 kærurnar, sem eru víst samt bara 8. Best að minnast líka aðeins á að Manchester City hefur keypt leikmenn fyrir mörg hundruð milljónir punda síðustu árin, mokað peningum í aðstöðu félagsins og gert auglýsingasamninga við sig sjálfa til að vega upp á móti öllum kostnaðinum. Þeir eru núna á annarri eða þriðju kynslóð City-galacticos sem hafa unnið fjölmarga titla undanfarin ár. Ég ætla ekkert að skafa neitt sérstaklega af því, þetta lið er svindl og árangurinn þeirra er svindl. Hann byggir engan veginn á eigin árangri heldur er þetta allt byggt upp á svokölluðu “sport-washing” eða sportþvotti. Fólk sem er með óhreint mjöl í pokahorninu þvær hendur sínar oft einhvern veginn þannig, svona eins og eigendur Man City gera.

    Lið Man City

    Það breytir þó ekki því að inni á vellinum eru Manchester City með frábært lið sem er þjálfað af frábærum knattspyrnustjóra. Hversu marga leikmenn sem Man City hafa keypt hefði maður ekki viljað sjá fara til Liverpool. Allt frá Aguero til Haaland til Gvardiol. Bara svo einhverjir séu nefndir.

    Þeir hafa samt verið í miklu brasi undanfarið, hafa tapað 5 leikjum af síðustu 6 þegar þeir mæta á Anfield, þar af þremur í deild. Síðasti leikurinn þeirra var jafntefli við Feyenoord í Meistaradeildinni þar sem stuðningsmenn Feyenoord sungu nafn Arne Slot að leik loknum. Það hefur væntanlega kynt verulega undir stuðningsmönnum City fyrir leikinn á sunnudaginn. Síðasti leikurinn í deildinni var gegn Tottenham og þeim leik töpuðu þeir 0-4 á heimavelli. Það er því kjörið að mæta þeim núna fyrir Liverpool, nema að þeir séu eins og sært dýr með bakið upp við vegg – sem þeir geta alveg verið – og þannig dýr getur sannarlega bitið frá sér. Það er því alls ekkert öruggt, þessi árin er ekki séns að vera fyrirfram öruggur gegn Man City, jafnvel þótt þeir hafi tapað 0-4 fyrir Tottenham í síðasta leik. Og fyrir báða Citymennina sem koma hingað: 0-4 gegn Tottenham, 1-2 gegn Brighton, 1-4 gegn Sporting Lissabon, 1-2 gegn Bournemouth og 1-2 gegn Tottenham í bikarnum. Síðasti sigur kom fyrir réttum mánuði síðan, 1-0 gegn Southampton, 26.október. Black november much?

    Meiðslalistinn þeirra er þokkalegur. Stærsta vandamálið þeirra er að brimbrjóturinn á miðjunni, Rodri, er meiddur. Þeim hefur aldrei gengið vel án hans og á undan honum gekk þeim aldrei vel án Fernandinho. Það er eiginlega kómískt að velta því fyrir sér að þeim hafi ekki dottið í hug að kaupa almennilegt back-up fyrir hann. Guardiola hefur líka talað um að hann ætli ekki að breyta neinu í taktík, sem væri kannski líka ráð – 4-2-3-1 hefur t.d. gengið alveg þokkalega hjá Arne Slot. Vonandi heldur hann sig samt við einn djúpan á miðjunni.

    Einnig er vafi á því hvort John Stones verði með, en Ruben Dias er líklega klár í leikinn. Mateo Kovacic og Oscar Bobb eru einu kláru fjarvistirnar hjá þeim ásamt fyrrnefndum Rodri. Ekki er víst að De Bruyne og Jeremy Doku geti byrjað. Sem þýðir að Rodri er eini alvöru lykimaðurinn sem er örugglega fjarri góðu gamni en eitthvað er um mögulega bekkjarsetu lykilmanna.

    Liðið þeirra verður væntanlega eitthvað á þessa leið:

    Ederson

    Walker –  Dias – Akanji – Gvardiol

    Silva – Gundogan – De Bruyne

    Foden – Haaland – Grealish

    Talandi um afleysingu fyrir Rodri – ég hefði svosem haldið að Gundogan væri nú alveg þokkalega öflugur í djúpu miðjustöðunni.

    Liverpool

    Það er óhætt að segja að Liverpool sé búið að vera á myljandi siglingu undanfarið. Rétt nýbúnir að salta Real Madrid 2-0 í leik sem hefði svosem getað farið öðruvísi, en Caoimhin Kelleher varði glæsilega víti annan leikinn sinn í röð og kom í veg fyrir jöfnunarmark Real Madrid. Annan leikinn í röð fékk Andy Robertson á sig klaufalegt en vafasamt víti sem VAR ákvað ekki að snúa við þótt vafinn hafi verið ansi mikill í bæði skiptin. Það var þó ansi súrt í broti að lítið brassagerpi ákvað að reyna að tjóna eins mikið í Liverpool og hann gat með þeim árangri að Konate okkar verður frá í líklega 6 vikur. Ef við þekkjum hann rétt þýðir það líklega nær 6 mánuðum. Eins fann Conor Bradley fyrir aftanlærisveseni þannig að hann verður eflaust ekki með. En það þýðir að Quensah eða Gomez verður hent út í Maríana djúpálinn, mögulega en ólíklega þó báðum – þar sem okkar allra besti Trent er sagður klár í slaginn á ný. Eins er Kostas Tsimikas að kljást við smávægileg meiðsli. Það eru því “aðeins” þrír lykilmenn úr okkar liði frá vegna meiðsla, Alisson, Konate og Jota. Muniði – Arsenal vælið þegar Timber fékk krampa og Saliba var í banni og núna City – með 1-2 lykilmenn meidda? Þetta er bara standard hjá okkur og við vitum að það þýðir ekkert að væla. Og þetta minnir okkur líka á það að Jurgen Klopp kom b-liðinu ansi langt bæði í deild og bikurum á síðasta ári þegar nánast allt byrjunarliðið var í meiðslum vikum og mánuðum saman.

    Ég giska á byrjunarliðið svona:

    Vafamálin:

    Gomez eða Quensah: Gomez er reyndari og hefur staðið sig betur þegar hann hefur komið inn á núna í haust og raunar hefur Quensah afar lítið spilað í haust.

    Trent/Gomez/Robertson/Bradley: Bradley er tæpur – Gomez í miðverðinum, Robbo á sínum stað. Við vitum hvað Robbo getur þótt hann sé óumdeilanlega búinn að vera í töluverðri lægð undanfarnar vikur. Svo mikilli að hann er nánast búinn að missa sæti sitt sem öruggur byrjunarliðsmaður. Held að Slot sé samt frekar íhaldssamur og hann veit alveg hvað hann hefur í Trent og Robbo.

    Miðjan: Curtis Jones er búinn að vera yfirgengilega góður síðustu vikurnar. Hann var magnaður á miðvikudaginn, sérstaklega í fyrri hálfleik. Sama á við um Gravenberch, hann var nánast maður leiksins gegn Southampton og MacAllister var geggjaður í seinni hálfleik gegn Real. Szoboszlai hefur átt hvað erfiðast uppdráttar af þessum fjórum sem hafa skipt með sér miðjustöðunum í haust. Elliott er auðvitað að koma inn eftir meiðsli og á nokkuð í land að eiga séns í byrjunarliðið.

    Sóknin er síðan nokkurn veginn sjálfvalin, Salah auðvitað á sínum stað, ég held að Nunez byrji frammi til að keyra í plássið sem skapast fyrir aftan vörn City og svo verður Gakpo vinstra megin, kannski bara af því að Diaz byrjaði gegn Real. Og Gakpo skoraði auðvitað þar. Slot virðist skipta leikjum jafnt á milli þeirra sem er í mínum huga fullkomlega skiljanlegt. Samt gæti Diaz alveg verið í níunni.

    Spáin mín: Anfield verður á yfirsnúningi eins og gegn Real Madrid. Síðdegisleikur á sunnudegi, stuðningsmenn búnir að fá sér aðeins og litlu mélkisarnir í Man City eiga eftir að brotna saman. Okkar menn eiga eftir að refsa grimmt, Salah elskar að skora gegn stóru liðunum og 3-0 verður niðurstaðan.

    YNWA

  • Konate frá fram yfir áramótin

    10 Comments

    Það virðist vera ljóst að Konate spili ekki meira á árinu, og kemur væntanlega ekki til baka fyrr en um miðjan janúar.

    Nú reynir á þá Joe Gomez og Jarell Quansah, líklegt að sá fyrrnefndi sé nú framar í röðinni í stöðu miðvarðar, en hann hefur líka verið að covera fyrir bæði vinstri og hægri bak og því líklegt að þeir verði báðir kallaðir til.

    Við skulum hafa sem fæst orð um gerpið sem meiddi Konate á síðustu sekúndum leiksins gegn Real, en sá er heldur betur búinn að stimpla sig inn á gerpalistann.

  • Liverpool 2-0 Real Madrid

    40 Comments

    Liverpool vann virkilega sannfærandi sigur á Real Madrid á Anfield í dag með tveimur mörkum gegn engu. Alexis Mac Allister kom Liverpool yfir og Cody Gakpo innsiglaði sigurinn, Salah klúðraði víti og Kelleher varði eitt.

    Hvað gerðist markvert í leiknum?
    Liverpool tók bara stjórn á öllu í leiknum bara frá upphafsflauti og út leikinn. Strax á þriðju mínútu átti Liverpool álitlega sókn þegar Nunez á skot sem fer framhjá Courtois í marki Real Madrid og fór í varnarmann sem náði að bjarga á línu.

    Áfram var það Liverpool sem átti færin en vantaði kannski aðeins upp á að geta gert betur úr þeim og sömuleiðis var Courtois enn að þvælast fyrir skotum Liverpool eins og honum einum er lagið – helvítið á honum!

    Það var ekki fyrr en snemma í síðari hálfleik að Liverpool átti hörku spil og endaði með því að Bradley átti sendingu á Mac Allister sem skoraði með lúmsku skoti. Mjög verðskuldað mark fyrir Liverpool sem hélt svo bara áfram að stýra leiknum eftir það.

    Nokkur álitleg færi komu frá Liverpool en Robertson fékk á sig afar óheppilegt víti en Kelleher gerði sér lítið fyrir og varði spyrnuna. Tvær vítavörslur á nokkrum dögum er ekki amalegt hjá þessum virkilega góða markverði. Skömmu síðar fíflaði Salah varnarmann og var felldur og fékk tækifæri á að koma Liverpool í tvö núll en skot hans var mjög slakt og endaði framhjá.

    Cody Gakpo kom inn á af bekknum og skoraði svo annað markið sem gerði út um leikinn með frábærum skalla eftir góða útfærslu á föstu leikatriði. Real reyndi aðeins að klóra í bakkan en Kelleher og varnarmenn Liverpool sáu auðveldlega við því.

    Hvað réði úrslitum?
    Einfaldlega bara gæðamunurinn í frammistöðum liðanna. Liverpool var lang, lang, lang besta liðið á vellinum. Þeir sóttu frábærlega, miðjan yfirtók leikinn og vörnin kaffærði öllu sem Real Madrid reyndi að gera.

    Hverjir stóðu sig vel?
    Allir. Það voru allir frábærir í dag – flottar einstaklings frammistöður en það var aðallega þessi liðsheild sem gjörsamlega gerði út um leikinn.

    Kelleher gerði allt sig virkilega vel og varði þessa vítapsyrnu. Robertson átti að mér fannst góðan leik og miðverðirnir tveir þurftu ekki að hafa mikið fyrir hlutunum.

    Gravenberch heldur áfram að vera frábær og þeir Mac Allister og Curtis Jones líka. Salah fannst mér sterkur, Nunez var mjög líflegur í fyrri hálfleik og Diaz átti góðar rispur en ég held að maður leiksins sé bara Conor Bradley. Bakvörðurinn lagði upp mark, átti gott skallafæri og gjörsamlega kæfði Kylian Mbappe í dag og stimplaði sig vel inn í leikinn þegar hann straujaði Mbappe snemma í leiknum sem virtist koma liði og stúku í annan gír.

    Hvað hefði betur mátt fara?
    Það var ekkert að þessari frammistöðu, hún var að mestu fullkomin. Jú, Salah hefði átt að skora úr vítinu en áfram gakk bara.

    Konate haltrar eftir leik eftir að krakkaskíturinn Endrick keyrði inn í hann og virtist stíga á hann eða eitthvað og Bradley fór út og hélt um lærið. Ef þeir eru meiddir þá er það ömurlegt og hefði mátt fara betur.

    Umræðan eftir leik
    Liverpool er áfram á toppnum á öllum keppnum og líta bara fáranlega vel út – enda skiljanlegt því þeir hafa átt svo auðvelt prógram og ekki spilað við nein góð lið hingað til…

    Man City um næstu helgi og þeir hafa verið í skelfilegu formi, sigur þar kæmi Liverpool ellefu stigum á undan þeim og öll umræðan fer eflaust út í það. Job done og staða Liverpool í Meistaradeildinni er frábær og þá er það að stíga fastar á forskotið í deildinni.

  • Liðið gegn Real Madrid

    56 Comments

    Þá er komið að því að Real Madrid heimsækir Anfield í fimmtu umferð Meistaradeildarinnar og er Liverpool enn sem komið er taplaust í keppninni en fær nú sína stærstu áskorun í keppninni hingað til í kvöld.

    Lið Liverpool í kvöld er skipað svo:

    Kelleher

    Bradley – Konate – Van Dijk – Robertson

    Jones – Gravenberch – Mac Allister

    Salah – Nunez – Diaz

    Bekkurinn: Jaros, Davies, Gomez, Endo, Gakpo, Quansah, Morton, Elliott, Trent, Szoboszlai

    Heilt yfir sterkt lið en Tsimikas er frá vegna meiðsla og Alisson, Jota og Chiesa eru ekki klárir til að vera í hóp en það er hins vegar Trent sem er kominn á bekkinn. Szoboszlai á bekknum er kannski svona það óvæntasta að mínu mati og smá hissa að Gomez væri kannski ekki í bakverðinum.

    Sjáum hvað setur!

Load More
Congratulations. You've reached the end of the internet.

© 2019 KOP.is

Back to Top
Close