Search

Menu
Search

Latest stories

  • Man City 2-2 Liverpool

    21 Comments

    Í dag fór fram ansi stór leikur í Úrvalsdeildinni og hefði hann getað farið langt með að kannski tryggja öðru liðinu titilinn ef ákveðin úrslit hefðu litið dagsins ljós en svo fór ekki þar sem liðin skildu jöfn og er enn aðeins eitt stig á milli liðana og sjö deildarleikir eftir.

    Klopp stillti upp sterku liði í dag og var ekkert að því. Þetta var eflaust það sem maður hefði líklega viljað og kallað á fyrirfram en þegar leikurinn hófst þá var bara eins og þessir leikmenn höfðu aldrei spilað saman áður!

    Man City byrjaði af miklu meiri krafti sem varð einhvern vegin til þess að leikmenn Liverpool virkuðu bara stressaðir. Gátu að því virtist ómögulega sent boltann sín á milli, töpuðu honum á mjög vondum stöðum og þetta var bara afar lélegt.

    Það tók Man City alveg heilar fimm mínútur til að nýta sér þetta þegar Kevin De Bruyne skoraði fyrsta mark leiksins. Jú, jú pínu heppnis stimpill á því en skot hans átti viðkomu í Joel Matip og breytti mikið um stefnu en rétt áður átti Man City ansi gott færi sem Alisson hafði varið frábærlega.

    Liverpool rankaði bara ekkert við sér eftir þetta opnunarmark og ef eitthvað þá varð þetta bara allt verra og verra! Það kom samt pínu eins og þruma úr heiðskýru lofti þegar Diogo Jota jafnaði metin á 13. mínútu með góðu marki eftir stoðsendingu Trent eftir fallegt uppspil.

    Þá vonaðist maður eftir því að það kæmi smá hugur í Liverpool en svo var ekki raunin, City bara tóku völdin frekar og Liverpool varð bara meira óstöðugt. Það munaði á einum tímapunkti minnstu að Ederson í marki Man City myndi missa boltann yfir marklínuna en rétt náði að bjarga og á 36. mínútu sofnaði varnarlína heldur betur þegar Gabriel Jesus átti gott hlaup inn fyrir vörn Liverpool og skoraði nokkuð laglega – auðvitað spilar hann varla fyrir Man City en kemur inn í liðið í dag og skoraði fyrsta markið sitt síðan sautján hundruð og súrkál.

    Jota komst í ágætis stöðu en náði ekki að leysa nægilega vel úr því þegar hann slapp í gegn og náði hvorki skoti né að leggja hann á Salah sem var við hliðina á honum og staðan því 2-1 í hálfleik en réttilega hefði Man City átt að fara inn í hálfleikinn með stærri forystu en sem betur fer var það á einhvern ótrúlegan hátt ekki.

    Það var svo töluvert annað lið Liverpool sem mætti inn í seinni hálfleikinn og það tók Sadio Mane 47 sekúndur eða eitthvað þar um bil að skora jöfnunarmarkið eftir að flautað var á seinni hálfleikinn. Frábært mark eftir góða sendingu Mo Salah.

    Liverpool var töluvert betra lið í seinni hálfleik og var leikurinn miklu jafnari og virtust menn fara aðeins að girða sig í brók eftir afleitan fyrri hálfleik. Bæði lið fengu sína sénsa án þess þó að vera kannski einhver dauðafæri þannig séð. Sterling skoraði mark fyrir Man City sem var réttilega dæmt af vegna rangstæðu og undir restina voru bæði Thiago og Fabinho kannski heppnir að fjúka ekki út af en sluppu blessunarlega við það.

    Leikurinn endaði svo 2-2 sem í raun eru bara ágætis úrslit svona miðað við hvernig leikurinn þróaðist. Það er enn bara stig á milli liðana og sjö leikir eftir, það er enn bullandi séns en klárt mál að Man City á töluvert þægilegra leikjaprógram eftir á pappír.

    Það er pínu erfitt að velja mann leiksins því flest allir voru afleitir í fyrri hálfleik. Jota skoraði gott mark en gerði annars ekki mikið, Salah lagði upp en gerði ekki mikið meira, Mane skoraði en var afleitur í fyrri hálfleik en fínn í seinni. Fabinho hlýtur að hafa verið með einhvern hausverk eftir höfuðhöggið sem hann fékk gegn Benfica því hann hefur svo sannarlega átt marga mun betri leiki en þennan! Van Dijk og Matip voru heilt yfir nokkuð slakir miðað við hvernig þeir eiga að vera og Trent átti mjög erfitt í fyrri hálfleik en mun skárri seinni. Ætli maður leiksins sé ekki bara Alisson sem varði vel heilt yfir í markinu og átti sinn þátt í að sjá til þess að Man City hafi ekki skorað fleiri mörk.

    Sjáum hvað setur, næsti leikur er seinni leikurinn gegn Benfica í átta liða úrslitum Meistaradeildarinnar og svo er það aftur leikur gegn Man City í undanúrslitum FA bikarsins.

  • Upphitun: Titiltoppslagur Man City vs. Liverpool

    9 Comments

    Þá er komið að stóru stundinni sem milljónir Púlarar allra landa hafa beðið eftir ásamt báðum Man City áhangendunum: stórmeistaraslagurinn mikli á Etihad þar sem enginn verður krýndur Englandsmeistari að leik loknum en ýmislegt tölfræðilega og tilfinningalega áhugavert gæti gerst í þá áttina.

    Funheitir fótboltaleikir sem þessir hafa gríðarháan eðlisvarma þannig að upphitunin þarf að ná sjóðheitu suðumarki við 451 gráðu fótboltafahrenheit!! Kyndilberum knattspyrnuna, bálbrennum boltasparkið og sous vide sjóðum soccerinn!! Komið að upphitun!!

    Mótherjinn

    Heimamenn hituðu upp fyrir heimsókn Rauða hersins með því að vinna tæpan 1-0 sigur á Atletico Madrid í Meistaradeildinni fyrr í vikunni í hörkuleik. Þar á undan unnu þeir Burnley á útivelli og hafa í sjálfu sér verið í fínu formi á þessu almanaksári en Liverpool hafa einfaldlega verið betri á sama tíma og nýtt sér öll þau mistök sem hinir ljósbláu hafa gert með jafnteflum við Southampton og Crystal Palace ásamt tapi fyrir Spurs. Nú er svo komið að forskotið er eingöngu eitt einasta stig þannig að mikið hvílir á þessari innbyrðisviðureign toppliðanna tveggja.

    Það verður sérlega áhugavert að sjá hvaða nálgun Guardiola og Klopp munu taka á leikinn, munu þeir spila sókndjarft til sigurs eða verður þetta varnarsinnaður og taktískur bardagi með áhersluna fyrst og fremst á að loka á andstæðinginn? Til að byrja með þá voru leikir liðanna undir núverandi þjálfurum opnari leikir þar sem að Man City spilaði einfaldlega sinn hefðbundna sóknarleik sem að Liverpool gekk oft vel að refsa grimmilega fyrir með hápressu og beittum skyndisóknum.

    Í seinni tíð hefur Pep hins vegar orðið mun varkárari og lagt meiri áherslu á að verja stigið með tilheyrandi fjölgun á jafnteflum í viðureignum liðanna. Ég hallast að því að það verði framhald á þeirri nálgun og nú er svo komið að Liverpool hefur ekki unnið í deildinni á Etihad síðan 2015 þó að vissulega hafi innist útisigur þar í Meistaradeildinni árið 2018. Það er því kominn tími til þess að sækja þrjú góð stig á heimavöll okkar helstu keppinauta um Englandsmeistaratitilinn og tímasetningin gæti ekki verið mikið mikilvægari í hinni hárfínu toppbaráttu.

    Til þess að það gerist þá þarf að komast í gegnum þá vörn sem hefur fengið á sig fæst mörk í deildinni eða 18 mörk en Liverpool hefur reyndar bara fengið á sig tveimur meira. Það ætti að hjálpa til að okkar menn hafa verið iðnir við kolann í markaskorun og hafa skorað liða mest í deildinni með 77 mörk og markamunurinn er okkur í vil gegn City svo munar 5 mörkum. Þetta er því með allra jafnasta móti sem að gerir leikinn á morgun enn meira spennandi fyrir vikið.

    Í liðsuppstillingu þá ætti aftast lína að vera nokkuð sjálfvalin vegna meiðsla Ruben Dias og á miðjunni tel ég að Pep muni veðja á meiri líkamsstyrk og með það í huga þá fari hinn fýlugjarni og smávaxni Bernardo Silva á bekkinn. Framlínan tel ég að verði alfarið engilsaxnesk til að byrja með og þannig vona heimamenn að hið stóra tilefni kveiki í breska bardagaandanum. Að mínu mati mun þó mest mæða á hinum magnaða miðjumanni Kevin De Bruyne sem hefur farið hamförum upp á síðkastið og virðist vera aftur kominn í sitt besta heimsklassaform.

    Liðinu verður því væntanlega stillt upp á þennan máta:

    Líkleg liðsuppstilling Man City í leikkerfinu 4-3-3

    Liverpool

    Hið magnaða tímabil Rauða hersins heldur áfram með einn nettan bikar í bakpokanum en ennþá með þrjú glitrandi gullverðlaun í augsýn. Frábært sigurinnlegg í fyrri leiklegg gegn Benfica í Lissabon gefur góðar vonir um að framvinda sé í vændum yfir í undanúrslit Meistaradeildarinnar. Þessi apríl-mánuður okkar manna hlýtur að teljast með þeim erfiðari sem að um getur þar sem að öllum hugsanlegum hindrunum er safnað saman gegn okkur:

    Von er á páskahreti í apríl með skafrenningi á fjallvegum og eingöngu vel útbúnum fótboltaliðum er ráðlegt að vera á faraldsfæti.

    Tvö skylduverkefni búin en stóra prófið bíður okkar í nærliggjandi sveitarfélagi. Eftir ágætis róteringu og vel valdar hvíldarskiptingar í síðustu leikjum að þá eru okkar menn í fínu formi með allan leikmannahópinn heilbrigðan til að vera valdir á völlinn af Klopp. Í vörninni þá ætti Joel Matip að endurheimta sæti sitt af Konaté og þá tel ég að fyrirliðinn Jordan Henderson komi einnig inn í byrjunarliðið á kostnað Keita.

    Stærsta spurningin um mannaval er í framlínunni þar sem við höfum núorðið frábært úrval og breidd til að velja úr. Sadio Mané hefur verið að finna taktinn að nýju og með mark í síðasta leik í Lissabon að þá ætti það að duga honum til að halda sínu sæti. Mo Salah hefur klárlega ekki verið upp á sitt besta upp á síðkastið en það vita allir hversu miklir heimsklassa hæfileikar búa honum þannig að allar líkur eru á því að hann fá tækifæri tl að láta ljós sitt skína líkt og hann gerði í fyrri deildarleik liðanna í vetur.

    Síðasta sóknarsætið er helsta vangaveltan en þar má færa góð rök fyrir því að það ætti að fara til Firmino út af hans reynslu og óeigingjörnu vinnslu er hann fyllir í glufur á miðjunni sem fölsk 9. Einnig væru vel hægt að rökstyðja að hin mikla markaskorun Diogo Jota ætti að tryggja hans aðkomu frá upphafi enda mikilvægt að spila til sigurs og til þess þarf mörk. Ég hallast þó að því að Klopp muni veðja á Kólumbíumanninn Luis Díaz sem fór hamförum í síðasta leik með marki og stoðsendingu. Sprengikraftur hans, hraði og snerpa gæti raskað ró Pep og City og verið ákveðinn óvissuþáttur sem þeir hafa ekki mætt áður í einvígum liðanna.

    Liðsuppstillingin væri því á þessa leið:

    Líkleg liðsuppstilling Liverpool í leikkerfinu 4-3-3.

    Kloppvarpið

    Jürgen Klopp rumdi rámri wiskíröddu: “Now it’s City time”! Okkar maður var hipp og kúl í hettupeysu og tæklaði spurningar snurðu á engilsaxnesku og þjóðversku. Enginn meiddur og allt í lukkunnar velstandi á öllum tungumálum:

    Josep “Pep” Guardiola Sala svaraði spurningum fyrir hönd síns liðs og þvertekur fyrir að vera besti þjálfari alheimsins sama hvað Jürgen Klopp heldur fram. Hann hafði sitt að segja á blaðamannafundinum og vonandi gengur hans liðsmönnum jafn vel á leikdegi:

    Upphitunarlagið

    Til þess að krifja knattspyrnuleik af þessum krafti þá þarf að kljúfa kjarnorkuna í örsmáar öreindir, mínimalismaðann mólikúlisma og gríðarlega vel ígrundaðar guðeindir. Þess vegna dugar ekkert minna en hið segulmagnaða lag Nick Cave & The Bad Seeds enda er magnaðrar snilligáfu þörf til að sigra stærstu stórleikina. Guðseindin verður því klofin í herðar niður og það verður blússandi ljósblár blús í upphitunarlaginu:

    Tölfræðin

    • Liverpool hafa unnið síðustu 10 deildarleiki sína.
    • Man City hafa unnið 8 af sínum síðustu 9 heimaleikjum.
    • Liverpool hefur haldið hreinu í sínum síðustu 5 deildarleikjum.
    • Man City hafa haldið hreinu í 5 af síðustu 7 deildarleikjum sínum.
    • Bæði lið hafa skorað a.m.k. 2 mörk í 5 af sínum síðustu 6 leikjum.
    • Liverpool hafa unnið 19 Englandsmeistaratitla og aldrei gróflega brotið fjármálareglur UEFA eða FA.
    • Man City hafa unnið 7 Englandsmeistaratitla, þ.m.t. 5 titla síðasta áratug.

    Spaks manns spámennska

    Öllum sparkspekingum kemur saman um það að um verði að ræða hörkuleik með hámarks hamförum milli tveggja langbestu liða Englands. Þegar stálin stinn mætast á þann máta þá verður niðurstaðan oft hógværari og ég hallast að frekar hefðbundinni markatölu okkar mönnum í hag.

    Ég spái því að Mo Salah muni dusta englarykið af heimsklassa sínum og skora eitt geggjað mark ásamt því að Virgil van Dijk muni hamra annað inn með höfðinu eftir hornspyrnu. Kevin De Bruyne mun minnka muninn fyrir heimamenn en ég spái 1-2 útisigri fyrir Liverpool sem lokatölum.

    Hvernig fer leikurinn gegn Man City?

    Skoða niðurstöður.

    Loading ... Loading ...

    YNWA

    Við minnum á #kopis á Twitter og umræðuna í athugasemdum hér að neðan og á Facebook.

  • Nýr samstarfsaðili Kop.is – Sólon Bistro bar

    11 Comments

    Það er ákaflega ánægjulegt að bjóða nýjan samstarfsaðila Kop.is velkominn til leiks. Sólon Bistro bar hefur slegist í hópinn og fögnum við því mjög, enda eðal staður, á besta stað í hjarta Reykjavíkur. Verið er að gera verulega flottar og spennandi endurbætur á þessum rómaða stað sem heldur upp á 30 ára afmæli sitt í haust.

    Að sjálfsögðu hvetjum við alla velunnara Kop.is, lesendur jafnt sem hlustendur, til að líta við á staðnum og gæða sér á hágæða veitingum í flottum húsakynnum.

    Undirskrift samstarfssamningsins fór fram í Hellinum og var það eigandinn, Þórir Jóhannsson, sem var mættur á svæðið fyrir hönd Sólon. Það þarf ekkert að velkjast í vafa með það að Þórir er grjótharður stuðningsmaður Liverpool FC og hefur verið það síðan þeir sem eru aðeins eldri en elstu menn, muna. Við plötuðum Þóri jafnframt til að spjalla við okkur í þætti númer 375 af Egils Gullkastinu.

  • Liverpool að landa Fabio Carvalho(?)

    8 Comments

    Áreiðanlegri miðlar greina nú frá því að Liverpool sé búið að ganga frá kaupum á Fabio Carvalho. Hann mun ganga til liðs við Liverpool í sumar (og væntanlega staðfestir klúbburinn þetta ekki endanlega fyrr en þá), en áhugaverðast er að engin lánsklásúla er í samningnum. Fabio er fæddur í Portúgal en leikur með U21 landsliði Englands, sem hlýtur að þýða að hann teljist sem hluta af “homegrown” kvótanum.

    Bjóðum þennan kappa velkominn til leiks og byrjum að láta okkur dreyma um að sjá okkar mann leika svona listir í rauðu treyjunni:

  • Benfica – Liverpool 1-3

    13 Comments

    0-1 Konate, 17 min
    0-2 Mané, 33 min
    1-2 Nunez, 48 min
    1-3 Diaz, 87 min.

    Klopp gerði 6 breytingar frá því í sigurleiknum gegn Watford. Inn í vörnina kom Konate í stað Matip og Trent í stað Gomez, Fabinho og Keita koma inn á miðjuna í stað Henderson og Jones og Diaz og Mané komu inn í framlínuna í stað Firmino og Jota. Ekki amaleg breidd það!

    Leikurinn byrjaði afskaplega rólega þar sem að Liverpool sá um að stjórna leiknum en lítið var um færi fyrsta korterið eða svo. Salah komst í fínt, en þröngt, færi eftir góða hælsendingu frá Mané en markvörður heimamanna varði í horn.

    Það var svo eftir hornspyrnu frá vinstri sem fyrsta mark kvöldsins leit dagsins ljós. Robertson átti frábæra hornspyrnu á Konate, sem kom með hlaupið inn í miðjan vítateig og stangaði knöttinn í hornið hægra megin, 0-1, óverjandi!

    Það var svo á 33 mínútu sem að Trent átti þessa FRÁBÆRU sendingu í svæðið á bakvið vörnina, Diaz átti gott hlaup, skallaði boltann þvert fyrir markið á Mané sem skoraði í autt markið, 0-2, algjörlega frábært mark!

    (more…)

  • Byrjunarliðið gegn Benfica: Trent byrjar!

    23 Comments

    Ellefu kappar eru tilbúnir að hefja leik gegn Benfica og stíga fyrsta skefið í átt að undanúrslitum Meistaradeildarinnar þetta árið:

    Feykisterkt lið og mikið er gaman að sjá bekkinn hjá Liverpool og geta sagt “Vá!”

     

    Hvernig er fólkið stemmt fyrir þessu?!

  • Gullkastið – Risa mánuður, Risa vika, RISA leikur

    5 Comments

    Háspenna lífshætta framundan, útileikur í Meistaradeildinni til að hita upp fyrir stórleik tímabilsins á Etihad á sunnudaginn. Roy Hodgson og félagar í Watford voru afgreiddir um helgina og því búið að tía upp hreint rosalegan leik næstu helgi.
    Annarsstaðar í deildinni er Everton er áfram í vandræðum, United er í verulegri brekku í baráttunni um Meistaradeildarsæti og Chelsea fékk Will Smith löðrung.

    Fyrir þáttinn var undirritaður nýr samstarfssamningur við hinn goðsagnakennda Sólon Bistro Bar í Bankastræti 7A sem fagnar í haust 30 ára afmæli. Þórir Jóhanns mætti í undirritun og var með okkur í fjarveru Magga.

    Stjórnandi: Einar Matthías
    Viðmælendur: SSteinn og Maggi

    MP3: Þáttur 375

  • Upphitun: Benfica í 8-liða úrslitum

    5 Comments

    Eftir langt landsleikjafrí náðu okkar menn að kreista fram sigur gegn Watford um helgina en ferðast nú til Portúgal til að mæta Benfica áður en við spilum stærsta leik síðustu ára í ensku úrvaldsdeildinni um næstu helgi gegn Manchester City. Það er þó þannig að þegar liðið er að berjast á öllum vígstöðum eru allir leikir gríðarlega mikilvægir og mikilvægt að vanmeta ekki Benfica enda komnir í átta liða úrslit Meistaradeildarinnar.

    Liðin mættust síðast í Evrópudeildinni árið 2010 þar sem Liverpool komst áfram eftir að hafa tapað útileiknum en klárað dæmið á heimavelli með 4-1 sigri. Fjórum árum áður mættust liðin síðast í Meistaradeildinni en þá unnu Benfica báða leikina, okkar menn féllu úr leik í sextán liða úrslitum sem þáverandi Evrópumeistarar. Liðin hafa þó mæst einu sinni síðan því þegar Liverpool var að undirbúa sig fyrir úrslitaleik Meistaradeildar árið 2019 ákvað Julian Ward, sem mun taka við starfi Michael Edwards í sumar, að hringja í félaga sinn hjá Benfica og fékk þá til að koma til Marbella og taka þar æfingaleik. Benfica mættu og fengu upplýsingar um hvernig Liverpool bjóst við að Tottenham myndi spila í úrslitaleiknum og Benfica liðið spilaði eftir því leikplani. Liverpool vann þann leik 2-0 líkt og í úrslitaleiknum og var mikið rætt um að þessi æfingaleikur hefði skilað miklu í undirbúningi liðsins.

    Í Benfica liðinu er einn mest spennandi ungi sóknarmaðurinn um þessar mundir Úrúgvæinn Darwin Nunez. Hann er á sínu öðru ári hjá Benfica og hefur gjörsamlega sprungið út í ár og er orðaður við mörg lið á Englandi sem og Barcelona þar sem Luiz Suarez mælti með honum áður en hann var látinn fara. Nunez er virkilega snöggur og góður að finna sér svæði inni í teignum og hefur skorað 27 mörk í 34 leikjum fyrir Benfica í vetur. Miðvarðarparið er svo menn á seinni hluta ferilsins sem við þekkjum vel. Þar eru tveir fyrrum leikmenn úr ensku úrvalsdeildinni, þeir Nicolas Otamendi og Jan Vertonghen, mikil reynsla þar á ferð en var farið að hægjast á þeim báðum þegar þeir yfirgáfu deildina og vonandi hægt að nýta það á morgun. Annar áhugaverður leikmaður sem margir kannast við í Benfica er Adel Taarabt en í ár hefur hann fundið nýtt líf sem djúpur miðjumaður og komið öllum á óvart en er tæpur fyrir morgundaginn og ólíklegt að við fáum að sjá það.

    Benfica situr í þriðja sæti í portúgölsku deildinni og ólíklegt að það breytist þar sem þeir eru níu stigum á eftir Sporting í öðru sæti og níu stigum á undan Braga í því fjórða. Fæstir bjuggust við að sjá Benfica á þessu stigi keppninnar, þeir drógust í riðil með Bayern, Barcelona og Dynamo Kiev og náðu þar átta stigum, stigi meira en Barcelona. Í sextán liða úrslitum fengu þeir svo Ajax, gerðu 2-2 jafntefli í fyrri leiknum í Portúgal og unnu svo 1-0 á útivelli með marki frá Nunez eftir að hafa legið undir mikilli pressu frá Ajax.

    Okkar menn

    Stóra spurningin fyrir þennan leik hjá okkar mönnum átti að vera hvort Trent yrði heill en hann virðist hafa náð sér á methraða og var á bekknum gegn Watford og mun því klárlega spila á morgun. Eina spurningin í mínum huga er hvort Klopp vilji byrja með Gomez og gefa Trent síðasta hálftímann eða öfugt. Aðrir eru heilir fyrir utan Naby Keita sem var frá gegn Watford en gæti þó náð leiknum á morgun.

    Með mikið af leikjum framundan verður áhugavert að sjá hvernig Klopp nýtir fimm skiptingar í þessum leik. Geri ráð fyrir að við sjáum besta mögulega byrjunarlið en ef við náum forystu snemma gæti ég vel séð nokkrar skiptingar á lykilmönnum stuttu eftir leikhlé.

    Eins og ég sagði áðan þá gæti alveg verið að Gomez fái byrjunarliðssæti í hægri bakverði ef menn eru stressaðir með Trent fyrir City leikinn og Gomez sýndi það í síðustu tveimur leikjum að hann getur vel fyllt upp í þá stöðu en býst við að Trent byrji frekar. Luis Diaz ætti að þekkja það vel að spila gegn Benfica og geri ráð fyrir að hann fái möguleikan á því og Mané hvíldi gegn Watford eftir að hafa fagnað sæti á HM og kemur líklega aftur inn í liðið. Salah hefur síðan verið aðeins of mikið í höfðinu á sér undanfarið og ekkert sem lagar það betur en eitt mark eða svo og það væri gríðarlega gott að ná að trekkja hann almennilega í gang fyrir næstu helgi.

    Spá

    Hef fulla trú á því að við séum mun betri en Benfica en í átta liða úrslitum Meistaradeildar eru allir leikir erfiðir. Spái 3-0 sigri þar sem Diaz, Salah og Van Dijk skora.

  • Tryggja stelpurnar sig upp í efstu deild í dag?

    4 Comments

    Liverpool varð í dag fyrsta kvennaliðið til að hafa unnið bæði efstu deild og næstefstu deild! Eftir að hafa unnið Bristol 2-4 varð þetta ljóst. Það voru þær Niamh Fahey, Jasmine Matthews, Katie Stengel og Missy Bo Kearns sem skoruðu mörkin.

    Hvað segið þið, verður þetta fimma í vor?

    Það er komið að þriðja síðasta leiknum hjá stelpunum okkar á leiktíðinni, en þær heimsækja aðalkeppinautana í Bristol. Eitt stig í dag og þá er sætið í efstu deild tryggt. Það væri nú heldur betur gaman að byrja mánuðinn á slíku.

    Leikurinn fer fram á heimavelli Bristol, og svona stilla okkar konur upp:

    Laws

    Roberts – Fahey – Matthews

    Hinds – Holland – Furness – Campbell

    Kiernan – Stengel – Lawley

    Bekkur: Clarke, Wardlaw, Moore, Silcock, Kearns, Humphrey, Bailey, Hodson, Daniels

    Þetta myndi líklega vera sterkasta liðið sem hægt er að stilla upp í augnablikinu, þó það megi færa rök fyrir því að Missy Bo gæti átt tilkall í aðra hvora miðjustöðuna. Hins vegar hafa bæði Ceri Holland og Rachel Furness verið að spila vel og halda henni út úr byrjunarliðinu í augnablikinu. Furness og Laws munu hafa tekið þátt í 50 leikjum fyrir félagið með þessum leik.

    Leikurinn verður sýndur á The FA Player – skárra væri það nú, enda toppslagurinn í deildinni. Að sjálfsögðu uppfærum við færsluna síðar í dag með úrslitum og stöðu, og vonum að þá getum við flutt skemmtileg tíðindi af stelpunum okkar!

Load More
Congratulations. You've reached the end of the internet.

© 2019 KOP.is

Back to Top
Close