Ég er búinn að breyta útlitinu aðeins. Ég byrjaði á þessu í gærkvöld og þá tókst mér í asnaskap að eyða gamla útlitinu, svo að ég varð að byrja frá byrjun.

Helstu breytingar eru að liðsuppstillingin er núna stærri og skýrari. Texti er almennt séð smá stærri og skýrari. Og núna er hægt að svara kommenti beint, þannig að það geta myndast minni þræðir í ummælum við hverja færslu. Þetta gerirðu með því að smella á “reply” undir því kommenti sem þú vilt svara.

Ég ætla að prófa þetta og sjá hvernig þetta reynist, en þetta ætti að mínu mati að hjálpa til að gera umræðuna skýrari, þar sem fólk er oft að tala um ólíka hluti – sérstaklega í opnum þráðum.

Nýjir tímar – nýr haus á Kop.is. Enn og aftur er það Kristinn Geir, sem á heiðurinn að hausnum hérna á Kop.is og við þökkum honum fyrir!

Ég setti inn viðbót við ummælakerfið. Nú eiga lesendur að geta lagað sín ummæli í 5 mínútur eftir að þau eru send inn eða beðið um að þeim sé eytt.

Látið mig vita ef þið rekist á einhver vandamál þessu tengdu.

Ég tók einnig út Google+ og Twitter hnappana, sem voru við hverja færslu. Það var enginn að nota þá.

Það styttist í að tímabilið hefjist og í mesta spenningnum er alltaf gott að fá eitthvað skemmtilegt að lesa um Liverpool og enska boltann. Hér eru þrjár vefsíður sem eru frekar nýlegar og ég mæli með að menn tékki á:

Nr7.is er íslenskt vefrit um enska boltann byggt á tölfræði og umfjöllun. Strákarnir sem standa að þessu ætla sér að fjalla um Úrvalsdeildina og Championship-deildina í vetur og eru þegar komnir á fullt í að hita upp fyrir öll liðin í Úrvalsdeildinni. Ég mæli með að menn skoði þetta og setji í áskrift hjá sér fyrir veturinn. Ég vona að þessi síða haldi áfram jafn vel og hún byrjar.

Rauði Herinn er bloggsíða Ólafs Hauks, mikils Púllara sem tekur virkan þátt í umræðum hér og skrifar stöku pistil inn á Liverpool.is. Óli er flinkur á lyklaborðinu og ég hef haft gaman af því að lesa pistlana hans. Ég mæli með að Púllarar tékki á þessari síðu sem hefur að geyma pistlana hans.

The Anfield Wrap er stórt og nýtt vefrit sem sett var í loftið sl. mánudag. Síðuna reka grjótharðir Púllarar frá borginni, þetta er mjög lókal og auk þess að vera með góðan Podcast-þátt skrifa þarna inn greinar margir af virtustu og þekktustu LFC-tengdu blaðamönnum Englands. Ef ykkur finnst gaman að lesa Kop.is hlýtur þessi síða að vera í skylduáskrift.

Þrjár góðar sem ættu að stytta mönnum stundirnar fram að helginni. Við verðum svo á fullu hér alla vikuna fram að fyrsta leik. Í kvöld kemur fjórði þáttur Kop.is Podcastsins, á morgun ætlum við svo að birta spá okkar fyrir Úrvalsdeildina þetta árið og svo verður upphitun fyrir stóru stundina að sjálfsögðu á sínum stað á föstudag. Þetta er allt að bresta á! :)

Ég setti inn smá viðbót við síðuna áðan, sem bætir vonandi ummælakerfið. Núna þegar þú skrifar ummæli á síðuna geturðu auðveldlega sett inn tengla, gert textann feitletraðan, sett inn tilvitnanir og slíkt og það uppfærist sjálfkrafa, þannig að þú hefur betri hugmynd um það hvernig ummælin muni líta út. Ég hef aðeins prófað þetta og þetta virðist virka ágætlega. Ef að þetta lítur eitthvað skringilega út þá gætir þú þurft að refresh-a síðuna. Látið mig vita ef það eru einhver vandamál.

Dagurinn eftir leik og helgin rétt að rúlla af stað. Heil umferð í Úrvalsdeildinni framundan – muna ekki örugglega allir eftir að uppfæra Draumaliðin sín fyrir helgina?

Annars þarf ég að koma þrennu á framfæri:

Fyrst, tölvupóstur. Ég hef verið að fá nokkuð af tölvupósti tengdum síðunni að undanförnu, eins og venjulega. Hins vegar hefur mér verið bent á að síðustu daga gæti eitthvað af pósti hafa lent í ruslsíunni á tölvupóstinum mínum og verið eytt sjálfkrafa áður en ég náði að sjá hann. Þannig að ef einhver ykkar sem lesið síðuna hafið sent mér tölvupóst undanfarna daga en ekki fengið svar þá endilega sendið mér aftur póst á kristjanatli (hjá) gmail.com. Ég svara nær undantekningarlaust öllum pósti sem mér berst, hvert sem erindið er, þannig að ef þið hafið ekki fengið svar frá mér er það ekki af því að ég er að hunsa ykkur. Endilega sendið mér aftur póst ef það er raunin.

Í öðru lagi vil ég minna á Twitter-samfélagið okkar á Kop.is. Þetta fer sívaxandi og mér finnst alltaf fleiri og fleiri Íslendingar slást í hópinn. Liverpool Bloggið sjálft er með Twitter-síðu sem og við pennarnir þannig að endilega, ef þið hafið ekki tekið stökkið, sláist þá í hópinn, bætið okkur við Follow-listann ykkar og takið þátt í umræðunum yfir West Ham-leiknum á sunnudaginn. Þið verðið fljót að sjá kostina við Twitter ef þið prófið:

* Bloggið sjálft á Twitter
* Kristján Atli á Twitter
* Einar Örn á Twitter
* Babú á Twitter
* Maggi á Twitter
* SSteinn á Twitter

Í þriðja lagi þá kom lesandi síðunnar, Valli, með hugmynd í ummælum við síðustu færslu og hafa nokkrir tekið undir hana. Hugmyndin var sú að við á Kop.is settum upp einhvers konar kerfi til að taka á móti frjálsum framlögum frá lesendum síðunnar sem vilja geta styrkt síðuna. Síðan hefur verið í gangi núna í tæp sjö ár og við höfum aldrei krafist greiðslna eða styrkja frá lesendum síðunnar. Þetta hefur verið unnið í sjálfboðavinnu og kostnaður við úthald síðunnar upphaflega borgað úr eigin vösum okkar Einars en með auglýsingum á síðustu tveimur árum.

Ég spyr því einfaldlega: er einhver áhugi fyrir því að við setjum upp kerfi fyrir frjáls framlög? Auðvitað yrði slíkt undir hverjum og einum komið og menn þyrftu alls ekki að greiða neitt frekar en þeir vildu. Þetta væri bara frjálst kerfi fyrir þá sem vilja sýna þakklæti sitt á einhvern hátt, sem mér sýnist allavega vera einhverjir. Ef mönnum finnst þetta vera góð hugmynd megið þið endilega láta okkur vita í ummælum við þessa færslu, eða með því að senda mér tölvupóst ef menn vilja ekki gera það opinberlega.

Munið: þetta er ekkert sem fólk verður að gera, bara hugmynd. Hvað finnst ykkur?

UPPFÆRT (Kristján Atli): Við höfum fengið góð og jákvæð viðbrögð við þessari hugmynd en ákváðum að þiggja ekki frjáls framlög frá lesendum síðunnar að svo stöddu. Ég útskýri þessa ákvörðun betur hérna. Þakka ykkur fyrir.

Ég setti í morgun inn farsíma-þema á síðuna. Ég les Kop.is mikið í símanum mínum, en það er iPhone og síðan kemur vel útí þeim síma. Hins vegar eru jú flestir með aðrar tegundir af símum og síðan er oft mjög þung í þeim.

Ég setti inn standard WordPress þema fyrir farsíma, sem á að koma vel út á t.d. Nokia símum. Þeir sem nota t.d. iPhone eða Android eiga að geta auðveldlega skipt yfir í hefðbundnu útgáfuna af síðunni.

Endilega setjið inn komment varðandi það hvernig þetta kemur út.

Ok, það er alveg ljóst að þumlakerfið við ummælin hjá okkur er ekki að gera góða hluti þessa dagana. Til að mynda eru allar óvinsælar skoðanir við síðustu færslu þumlaðar niður þannig að þær hverfi.

**Uppfært (ég og Kristján höfum ákveðið að taka út “niður” þumalinn og prófa hvernig það virkar í smá tíma).** Continue reading →

Við síðustu uppfærslu á WordPress í gær virðast númer á kommentum hafa farið í eitthvað fokk. Í sumar þá reddaði einn lesandi síðunnar málinu þegar við vorum í svipuðum vandræðum. Málið er að ég man ekki hvað hann heitir og finn því ekki kommentið. Getur einhver hjálpað mér?

Við kynnum núna til leiks nýtt útlit á Kop.is. Gamla útlitið var orðið nokkura ára gamalt og var farið að verða lúið.

Einsog þið sjáið, þá eru breytingarnar ekki stórkostlegar. Við vildum halda sömu litum og slíkt, en bara poppa aðeins uppá útlitið og gera síðuna aðgengilegri. Stærsta breytingin er sennilega sú að síðan er breiðari. Síðan hefur verið frekar mjó á flestum tölvum, svo að við vildum nýta plássið betur og breiða aðeins úr henni. Ég notaðist við TwentyTen, nýja WordPress þemað og breytti útfrá því.

Textinn er líka aðeins stærri og vonandi lesilegri. Semsagt, breiðari síða, stærra letur og ögn hærra línubil. Ég held að þetta geri síðuna læsilegri.

Hausinn er líka nýr og einsog áður er það Kristinn Geir Pálsson, sem á heiður af honum. Við þurftum nauðsynlega að uppfæra hausinn, þar sem hann var fullur af myndum af leikmönnum í 2007 árgerð af búningum og einnig af Rafa Benitez, sem er auðvitað hættur. Við vorum sammála um að Reina ætti skilið að verða þarna uppi, ásamt Gerrard og Carra og svo auðvitað Dirk Kuyt, sem er vinsælasta umræðuefni þessarar síðu.

Í tengslum við breytingarnar erum við líka komin með Twitter reikning fyrir Kop.is. Um leið og við setjum inn nýja færslu á síðunni þá mun Twitter-ið okkar líka uppfærast. Fyrir þá, sem nota Twitter er það því einfaldasta leiðin til að sjá um leið og við setjum inn nýjar færslur. Við munum líka eitthvað nota þann Twitter reikning fyrir aðrar tilkynningar. Við sjáum hvernig það þróast. Við erum @kop_is á Twitter.

Ég er ekki búinn með allar breytingar, en ég ætla að henda þessu í loftið núna. Endilega komið með komment og athugasemdir við þessa færslu ef ég hef gleymt einhverju (sjá fyrsta kommentið mitt um hvaða vandamál ég veit um).

Ég lagaði aðeins til valröndina hérna hægra megin á síðunni. Tók út nokkra hluti (svo sem greinina um róteringu Rafa, sem ég trúi varla að menn nenni að rífast um lengur).

Neðst í valröndina er núna kominn listi yfir flokka og færslusafn eftir mánuðum. Núna á að vera hægt að nálgast allar færslur á síðunni frá upphafi. Ég breytti því líka aðeins hvernig þær síður birtast. Þannig að núna þegar menn velja ákveðinn mánuð eða ákveðinn flokk færslna, þá koma upp 100 færslur á síðunni. Þannig að ekki þarf að fletta á milli síðna til þess að finna rétta færslu.

Mér finnst þetta mun þægilegra svona og ég vona að flestir séu mér sammála. Ég er svo að vinna í stærri útlitsbreytingum á síðunni, sem ég mun setja í loftið áður en næsta tímabil byrjar.

Nú er það orðið opinbert, búið er að alþjóðavæða hann Magga okkar. Ritstjóri hins frábæra LFChistory.net fór þess á leit við Kop.is og Magga að fá að nota greinina hans um Roy Hodgson. Hún er sem sagt komin í loftið og birtist fyrir stundu á Newsnow. Hægt er að líta á meistarastykkið hérna, ef þetta segir ekki eitthvað um gæði greinarinnar, þá veit ég ekki hvað. Til lukku Maggi, til lukku Kop.is.

Ég setti inná síðuna Facebook “like” takka þar sem einhverjir hafa verið að biðja um slíkt. Þeir takkar eru fyrir neðan efni hverrar færslu.

Svo vil ég minna þá sem kommenta á að hægt er að setja inn myndir af sér svo þær birtist við komment. Það þarf bara að skrá sig á Gravatar.com, sem tekur um 2 mínútur og setja inn mynd þar og þá mun hún líka birtast við hvert komment á þessari síðu og öllum þeim síðum, sem styðja Gravatar.

Hér með er þessi Wigan leikskýrsla ekki það fyrsta sem maður sér á kop.is
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.

Vanalega reynir maður að finna eitthvað skemmtilegt til að skrifa um, en ég fann bara afskaplega lítið til að gleðjast yfir. En allavegana, við eigum enn möguleika á einum bikar í ár – það er þó allavegana eitthvað.

Jæja jæja, loksins eftir 5 ára sögu þessa bloggs þá setti ég inn leiðbeiningar um það hvernig maður getur sett inn ýmsa hluti í ummælum – einsog feitletrun, tengla og … liðstuppstillingu.

Þessar leiðbeiningar er núna að finna fyrir ofan gluggann þar sem ummæli eru sett inn. Smellið bara á það sem þið þurfið hjálp við. Þetta á vonandi að skýra sig sjálft, en ef þið hafið einhverjar spurningar endilega setið þær inn.

**Uppfært (EÖE)** Liðsuppstillingardæmið virkar ekki hjá þeim sem eru ekki skráðir inní kerfið. Sjá athugasemd hér. Öll hjálp væri vel þegin.

Eru ekki örugglega allir á Twitter?

Twitter er síða sem býður í raun upp á lifandi samtöl á milli fólks í rauntíma. Hægt er að senda inn litlar uppfærslur – aðeins 140 stafbil í einu – og er tilgangurinn sá að hafa þetta stutt, skýrt og beint að efninu. Það er erfitt að útskýra hvers vegna þetta er svona góð samskiptasíða en um leið og maður byrjar verður maður alveg ánetjaður. Ég hvet alla til að prófa.

Við sem skrifum á Liverpool Bloggið erum á Twitter og höfum nú stofnað sérstaka síðu þar sem við getum fylgst með allri Kop.is-tengdri umræðu á Twitter. Þá síðu má sjá hér eða í valmyndinni efst hér á síðunni. Það getur hver sem er tekið þátt í umræðunni, það eina sem fólk gerir er að skrifa eitthvað um Liverpool og enda skilaboðin á að skrifa #kopis.

Þannig að ef ég ætlaði t.d. að skrifa um leikinn í gær og láta það birtast á Kop.is-umræðunni á Twitter myndi ég t.a.m. skrifa eftirfarandi skilaboð: Frábær leikur í gær, virkilega ánægður með að vinna Everton tvisvar í vetur. #kopis

Ég mæli með að sem flestir skrái sig á Twitter og taki þátt í umræðunum. Það er erfitt að útskýra hvers vegna þetta er svona skemmtilegt en trúið mér, þegar þið byrjið verður erfitt að hætta. Það eru til frábær Twitter-forrit fyrir flesta síma þannig að megnið af umræðunum berast beint í símann hjá manni, maður bæði les uppfærslur þar og skrifar á móti á fullu yfir leikjum.

Endilega skráið ykkur, skoðið ykkur um og sendið okkur hinum skilaboð og/eða fylgist með streyminu okkar. Við erum með eftirfarandi notendanöfn:

* @kristjanatli
* @einarorn
* @ssteinn
* @babuEMK
* @maggimark
* @magnusagnar

Ef þið skoðið svo þau streymi sem við erum að fylgja getið þið fundið fullt af sniðugu Liverpool-tengdu fólki sem er gagnlegt að hafa á Twitter. Og ekki gleyma að setja #kopis í endann á Liverpool-tengdum skilaboðum ykkar svo þau birtist á Kop.is-umræðunni á Twitter.

Ég setti inn valmöguleika við komment á öllum færslum á síðunni. Núna geta menn gefið “þumal upp” eða “þumal niður” við hvert komment. Við ætlum að sjá hvernig þetta virki – hvort þetta fjölgi gáfulegum komment og dragi úr þeim allra vitlausustu.

Við gefum þessu sjens í sirka mánuð og metum svo hvort þetta sé sniðugt eða ekki. Ég reyndi að hafa þetta eins lítið áberandi, svo að þetta trufli ekki umræðuna alltof mikið. Þið sjáið þumlana fyrir neðan hvert komment.

Nota bene, ekki er hægt að gera “like” á sitt eigið komment. :-)

Ég veit að það er stutt í leikinn í kvöld en ég rakst á þetta í dag og mátti til með að prófa að setja Kop.is í gegnum þessa síu. Þetta er sem sagt vefsíða sem tekur aðrar vefsíður (eða textaskjöl) og býr til orðaský úr þeim.
Continue reading →

SSteinn félagi minn setti inn litla færslu hér að neðan til að kynna golfmót Liverpoolklúbbsins á Íslandi 2009. Í kjölfarið varð allt vitlaust í ummælakerfinu þar sem við síðuhaldarar vorum beinlínis skammaðir fyrir að leyfa slíkri færslu að vera efst á síðunni, í stað leikskýrslu við 4-0 sigurinn á miðvikudag og/eða umfjöllun um nýja leikmanninn, Kyrgiakos.

Það skal því að gefnu tilefni tekið fram, svo enginn vafi leiki á, að þetta er BLOGGSÍÐA. Síðan Kop.is ber titilinn Liverpool Bloggið, ekki Liverpool Fréttaveitan, og er mikilvægt að menn reyni að hafa þetta í huga þegar þeir koma hér inn. Við erum sex sem skrifum á þessa síðu og við reynum yfirleitt að fjalla um það sem er að gerast hjá LFC hverju sinni, nú eða bara koma með pælingar út í loftið ef okkur sýnist svo, en við erum EKKI bundnir neinum skyldum að fjalla um hvert einasta fréttnæma efni um leið og það fréttist.

Við erum bloggsíða. Ef þið viljið fá stöðugar uppfærslur frétta bendi ég mönnum á að lesa Liverpool.is sem er uppfærð oftar á dag en við. Þar getið þið lesið nýjustu fréttirnar á íslensku um leið og þær berast, auk þess sem þið getið skoðað mýmargar íslenskar og erlendar fréttasíður þar sem fylgst er með öllu. Þar er nefnilega fólk sem vinnur við að segja fréttir af Liverpool og enskri knattspyrnu.

Við erum bloggsíða. Hér fjöllum við um það sem er að gerast þegar við:

a) Höfum áhuga á að fjalla um það.
b) Höfum tíma til að setja inn færslu.

Þar sem við störfum allir við aðra hluti en þessa síðu höfum við beðið fólk um að sýna biðlund þó það komi ekki alltaf inn færslur samstundis og hlutirnir gerast (svo sem með Kyrgiakos í dag, það mun einhver okkar fjalla um hann fljótlega en við erum ekki í neinu kapphlaupi) og ef það er bið á að inn komi færsla um tiltekið málefni hafa lesendur síðunnar yfirleitt verið duglegir að uppfæra sjálfir í ummælakerfunum og koma umræðunum af stað þar.

Við erum ekki fréttasíða, né heldur í samkeppni við slíkar síður. Hér skrifa Liverpool-áhugamenn um það sem þeim þykir áhugavert hverju sinni. Að þessu sinni þykir okkur golfmótið Liverpool Open 2009 áhugavert og því er fullkomlega eðlilegt að það sé efsta færsla á síðunni, enda er það nýjasta færslan (fyrir utan þessa, að sjálfsögðu) og færslur á síðunni eru einfaldlega birtar í tímaröð, án fordóma.

Við viljum því af gefnu tilefni biðja menn um að sýna síðuhöldurum smá kurteisi og rjúka ekki í ummælakerfin með skammir eða annars konar lágkúrur þegar bið er á færslu um nýjustu Liverpool-tengdu fréttina eða þegar verið er að ræða eitthvað sem ekki allir hafa áhuga á. Ef menn nenna ekki að ræða um golfmót geta menn einfaldlega sleppt umræðum við þá færslu og haldið áfram að ræða Stoke-leikinn í næstu færslu þar fyrir neðan, þar sem ummælin eru enn opin og umræðan í fullum gangi.

Virðingarfyllst,
Kristján Atli og Einar Örn, ritstjórar Kop.is.

Kristján Atli: Fyrir fimm árum las ég færslu á heimasíðu Einars Arnar þar sem hann lýsti yfir áhuga sínum á að stofna sér bloggsíðu fyrir Liverpool-umfjöllun. Ég hafði sjálfur haft slíkar hugmyndir þannig að þótt við þekktumst ekki neitt á þeim tíma setti ég mig í samband við hann og fljótlega eftir það fór Liverpool Bloggið í loftið.

Það er eiginlega ótrúlegt að hugsa til þess að við séum búnir að reka þessa síðu í heil fimm ár. Við fórum í loftið með síðuna vikuna sem Houllier hætti, ef ég man rétt, þannig að segja má að síðan sé jafngömul stjóratíð Benítez hjá Liverpool. Á þeim tíma hefur margt gerst hjá félaginu en að sama skapi hefur mikið gengið á á þessari síðu. Stundum hefur hún valdið manni tómu mígreni og það hefur ekki alltaf verið auðvelt að finna tíma fyrir þá vinnu sem fer í að halda henni gangandi og halda utan um starfsemina hérna en sem betur fer hefur áhuginn alltaf verið til staðar, líka þegar á móti hefur blásið.

Þá höfum við Einar Örn einnig verið heppnir með samstarfsaðila. Í dag skrifa fimm aðrir pennar á síðuna utan okkar Einars og þrír aðrir hafa á einhverjum tímapunkti skrifað hér inn. Það er talsverð breyting frá því þegar við fórum af stað og eyddum öllu tímabilinu 2004/5 bara tveir í að halda síðunni gangandi.

Allavega, þetta er ansi merkilegur dagur fyrir okkur Einar Örn og vil ég nota tækifærið fyrir mína parta og þakka Einari fyrir samstarfið, strákunum okkar fyrir frábæra aðkomu og verðmæt innlegg á síðuna og síðast en alls ekki síst ykkur öllum sem lesið þessa síðu og/eða takið þátt í umræðunum. Þetta væri ansi tómlegt og leiðinlegt ef við Einar værum bara tveir að blaðra út í tómið, það eru ykkar viðbrögð og þátttaka sem gera síðuna svona skemmtilega.

Þannig að, til hamingju með fimm ára afmælið Kop.is! Á næsta ári færðu að fara í grunnskóla … ;)

Einar Örn: Það er ekki laust við að maður sé stoltur af barninu okkar Kristjáns þegar maður áttar sig á að það er orðið fimm ára gamalt. Löngu áður en bloggið varð jafn vinsæll miðill og það er í dag þá vorum við báðir að pirra okkar nánustu vini og fjölskyldu með reglulegum pistlum um Liverpool á okkar eigin bloggsíðum. Þeir byrjuðu á síðustu mánuðum Houlliers og voru því ansi oft verulega þunglyndir.

Þegar við loks stofnuðum Liverpool bloggið fengum við tækifæri til að skrifa eins mikið um liðið okkar einsog okkur langaði til. Það hefur verið gríðarlega skemmtilegt og það hefur verið frábært að sjá hóp lesenda vaxa gríðarlega í gegnum árin.

Það hefur ekki alltaf verið auðvelt að halda úti þessari síðu og við Kristján höfum nokkrum sinnum rætt um að hætta þessu. Við fórum í gegnum fyrsta tímabilið þar sem Kristján tók nánast hverja einustu upphitun og ég hverja einustu leikskýrslu, en núna í dag erum við með frábæra penna með okkur, sem að létta okkur heldur betur vinnuna. Þrátt fyrir að við höfum nokkrum sinnum pirrað okkur á síðunni þá hefur hún samt veitt okkur ótrúlega margar ánægjustundir í gegnum tíðina allt síðan 26.maí árið 2004.

Á þessum fimm árum hef ég heimsótt þessa síðu oft á dag og ég er viss um að ég á eftir að halda því áfram næstu árin.

Liverpool bloggið er fimm ára í dag. Það lengi lifi!

Jæja, eru ekki allir hressir á þessum yndislega föstudegi?

Tveir skemmtilegir hlutir hafa gerst í dag. Fyrir það fyrsta, þá komst handboltalandsliðið okkar í úrslit á Ólympíuleikunum! Það er hreint stórkostlegur árangur og svo sannarlega merkasti árangur í íþróttasögu okkar Íslendinga. Þrátt fyrir að við einbeitum okkur að Liverpool á þessari síðu, þá getur maður ekki sleppt því að óska þessu frábæra liði til hamingju með árangurinn.

Í öðru lagi, þá eignaðist yfirstrumpur þessarar síðu Kristján Atli, með henni Lilju sinni, dóttur í morgun. Að sögn Kristjáns heilsast bæði móður og dóttur vel.

Við óskum Kristjáni og Lilju innilega til hamingju með dótturina og minnum þau í leiðinni á mikilvægi góðs Liverpool heilaþvottar í uppeldi sérhvers barns.

Um síðustu mánaðarmót auglýstum við á Liverpool Blogginu eftir öflugum nýjum penna sem gæti hugsað sér að verða hluti af teyminu okkar hérna. Okkur bárust nokkrar góðar umsóknir og þökkum við þeim sem sóttu um kærlega fyrir sýndan áhuga.

Á endanum fór það svo að Einar Matthías Kristjánsson varð fyrir valinu og kynnum við hann því hér með til sögunnar sem sjöunda bloggara Kop.is. Þrátt fyrir stórkostlegt nafn (við, Einar og Kristján, erum hrifnir af nafninu Einar Kristjánsson ;) ) er það þó ekki það nafn sem hann er þekktur fyrir á þessari síðu, því hann hefur verið einn ötullasti spjallari síðunnar undir nafninu Babu.

Þið getið lesið allt sem þið þurfið um Babu á prófíl-síðunni hans sem þið finnið hér til hægri ásamt tenglum á prófíl-síður ykkar hinna.

Við hinir Liverpool Bloggararnir vonum að þið takið vel á móti Babu sem nýjasta penna síðunnar. Velkominn í hópinn, félagi!

Í síðustu viku útskýrðum við ákvörðun okkar um að auglýsa eftir einum gallhörðum Púllara til að slást í hóp með þeim bloggurum sem fyrir eru hér á Kop.is.

Ég vildi bara minna fólk á að það er enn hægt að sækja um! Umsóknarfresturinn rennur út við lok sunnudagsins 10. ágúst n.k. þannig að það er enn nægur tími fyrir áhugasama að láta í sér heyra.

Allar frekari upplýsingar er hægt að sjá á tenglinum hér til hliðar. Ef þið hafið áhuga, endilega sendið inn umsókn!

Við tilkynntum í síðustu viku um brottför Dodda úr bloggteymi okkar hér á Kop.is. Í kjölfarið hefur losnað staða og höfum við Einar Örn ákveðið að auglýsa eftir nýjum bloggara í stöðuna.

Þið getið lesið nánar um þær kröfur sem við gerum og hvernig á að sækja um með því að smella hérna. Þá getið þið nálgast tengilinn fyrir umsókn hér hægra megin á meðan umsóknartíminn er opinn.

Við hvetjum alla áhugasama til að senda okkur umsókn þar sem þið takið fram hvers vegna þið gætuð hentað sem næsti bloggari Kop.is. Við hlökkum til að heyra í ykkur!

Þetta er stutt færsla og því miður ekki skrifuð af góðu.

Ég vil tilkynna lesendum síðunnar að Doddi, einn harðasti Púllari höfuðstaðs norðursins, mun hverfa frá stöðu sinni sem penni á Liverpool Blogginu frá og með líðandi stundu. Hann bætist því í ansi fámennan og ansi góðmennan hóp þeirra Hjalta og Benna Jóns sem fyrrverandi Liverpool Bloggari. Eins og menn muna hvarf Hjalti af sviðinu í fyrrasumar, en Benni Jón hélt síðunni á lífi yfir eina helgi í febrúar ’05. Auk þess að vera heiðursforsetar þessarar síðu ævilangt eru þessir menn svo heppnir að mega rífa meiri kjaft en gengur og gerist á þessari síðu, auk þess sem þeir borga aldrei fyrir bjórinn mjólkina yfir leikjum á meðan við Einar Örn erum á staðnum (í alvöru strákar, það er undir ykkur að rukka).

Við Einar Örn viljum fyrir hönd Liverpool Bloggara þakka Dodda fyrir skemmtilegt tæpt ár, og ég vona að ég tali einnig fyrir hönd lesenda þegar ég segi að ég vona að Doddi sjái sér fært að heiðra okkur með nærveru sinni í ummælunum endrum og sinnum þótt hann sé ekki lengur með míkrófón eins og við hinir. :)

Annars er nýtt tímabil Liverpool framundan á næstu vikum og sem fyrr hyggjumst við Einar Örn ekki standa í stað með þessa síðu. Vonandi getum við flutt ykkur skemmtilegar fréttir af næstu skrefum í þróun síðunnar fljótlega.

Jæja, við Kristján vorum að halda stuttan ritstjórafund. Þar ákváðum við að henda aftur upp gamla kommentakerfinu. Það voru einfaldlega of margir gallar að okkar mati við þetta nýja kerfi. Í stað þess munum við reyna að bæta oná núverandi kommentakerfi fídusum. Það var ekki alveg nógu sniðugt að taka upp algjörlega nýtt kerfi.

Gallinn er sá að öll kommentin, sem voru sett inní nýja kerfið, eru farin.

Við töldum einfaldlega vera of marga galla við nýja kerfið. Það var erfiðara að fylgjast með því hvar umræðan átti sér stað á hverjum tíma, það vantaði númer á færslurnar og html og broskallar og slíkt virkuðu takmarkað.

Jæja, kominn nýr haus á síðuna, sem telur núna niður dagana og sekúndurnar þar til flautað verður til leiks gegn Sunderland. Sem fyrr er það Kristinn Geir, sem á heiðurinn skilinn fyrir bannerinn.

Ok, við ætlum að prófa nýtt kerfi fyrir kommentin á þessari síðu. Við notumst við plugin, sem heitir Disqus. Þetta ætti vonandi að bæta síðuna, en við ætlum þó eingöngu að prófa þetta í einhvern tíma og sjá hvort við verðum sáttir (þetta mun eingöngu breytast á færslur frá og með þessari).

Allavegana, það sem þetta breytir er að allir geta stofnað prófíl hjá Disqus, þar sem þeir geta á auðveldan hátt haldið utanum kommentin sín og flett í gömlum kommentum. Þar geta þeir einnig valið að fá sent email þegar að einhver svarar innleggi frá þeim. Fólk getur sett inn myndir af sér eða skrifað undir dulnefni eða gert hvað sem það vill.

Aðrir geta svo gefið kommentum einkunn, sem ætti að vera ágæt leið til þess að losna við drasl komment af síðunni. Ef að fleiri en 20 gefa kommenti mínus einkunn, þá dettur það sjálfkrafa út. Allavegana, prófum þetta í einhverja daga og sjáum hvernig þetta virkar.

Einn STÓR kostur við þetta er að menn geta leiðrétt kommentin sín, geri þeir einhverjar augljósar villur.

Eftir rúman mánuð verða fjögur ár liðin síðan að við Einar Örn og Kristján Atli stofnuðum Liverpool bloggið.  

Á þessum tíma hefur síðan vaxið gríðarlega í vinsældum.  Við byrjuðum á þessu tveir og uppfærðum af mikilli áfergju og náðum strax í nokkuð þéttan og góðan hóp lesenda, sem kunnu að meta okkar stíl og umfjöllun okkar um Liverpool.

Á þessum árum hefur pennum á Liverpool blogginu fjölgað jafnt og þétt og núna erum við sjö sem uppfærum þessa síðu reglulega.  Á þessum 4 árum höfum við sett inn 2.430 færslur, eða nærri því tvær færslur að meðaltali á dag.  Langflestar færslurnar eru eftir okkur Kristján Atla, en hinir pennarnir koma æ sterkari inn og hafa fyllt í skarð okkar á þeim tímum sem við höfum hálfpartinn gefist upp vegna sífelldra rifrilda.

Umræðurnar á síðunni hafa líka verið gríðarlega lifandi.  Frá því að við stofnuðum síðuna hafa um 30.000 komment verið skrifuð hér eða um 30 á hverjum einasta degi.  Á síðustu tveimur árum er þó líklegt að meðaltalið sé mun hærra, enda hafa vinsældirnar aukist mikið.  Síðan er klárlega ein af allra vinsælustu bloggsíðum landsins og samkvæmt Moggablogginu eru bara tvær MBL síður, sem eru með fleiri innlit en við.

Á þessari síðu hafa aldrei verið auglýsingar.  Jú, Einar hefur stundum komið með stuttar tilkynningar um það sem er að gerast á Serrano, en við teljum að þær séu klárlega færri en 10 á þessum fjórum árum.  Við höfum einfaldlega aldrei haft áhuga á því að gera þetta fyrir pening.  Við höfum alltaf verið á þeirri skoðun að ef við myndum fá borgað fyrir þetta, þá myndum við fara að líta á þetta sem vinnu og það er aldrei heillandi. Jú, það hefur stundum tekið á að þurfa að henda saman langri leikskýrslu eftir erfiða tapleiki, en okkur hefur aldrei liðið einsog þetta væri vinna. Við höfum gert þetta í sjálfboðaliðavinnu og aldrei fengið krónu fyrir. Kostnaðinn fyrir lén og slíkt höfum við greitt úr eigin vasa.

Þrátt fyrir þetta, þá ætlum við að byrja á því að birta auglýsingar hérna á Liverpool blogginu.  Það mun birtast hér ein auglýsing hægra megin.  Við hugsum þann pening sem við fáum fyrir þessar auglýsingar eingöngu sem pening sem mun nýtast okkur við að vera góðir Liverpool stuðningsmenn.  Þannig að aðallega munum við nýta peninginn sem við söfnum til að reyna að fara reglulega í ferðir á Anfield.

Þessar auglýsingar munu ENGIN áhrif hafa á ritstjórnina á þessari síðu.  Við fullvissum alla um að þetta mun ekki hafa áhrif á okkur.  Við þurfum ekki á þessum auglýsingum að halda.  Ef einhverjir hætta að auglýsa, þá breytir það litlu fyrir okkur.

Við munum aðeins birta eina auglýsingu í einu og hún verður lítil og smekkleg. Ekkert kaos af Flash auglýsingum, sem gefa manni flogaveikikast. Fyrir þá, sem vilja auglýsa þá verður auglýsingin 170 px á breidd og allt að 170 px á hæð. Hún má vera Flash en ef svo er, þá má Flash-ið ekki vera á endalausri loop-u. Það má i mesta lagi vera 7 sekúndur af Flash efni og það má aðeins keyra einu sinni í gegn. Auglýsingin verður á þeim stað og í þeirri stærð sem að Liverpool merkið er hér hægra megin. Áhugasamir geta sent Einari Erni póst á einar.orn@gmail.com. Fyrsta auglýsingin mun birtast í næstu viku.

Við vonum að lesendur taki vel í þessa breytingu.

Uppfært (EÖE): Ég er búinn að setja upplýsingar fyrir þá, sem hafa áhuga á auglýsingum hérna.

Jæja, loksins! Eftir tæplega fjögurra sólarhringa rugl er síðan loks komin aftur á réttan kjöl. Þetta gekk ekki þrautalaust og mér sýnist sem við gætum lent í örlitlum áframhaldandi vandræðum. Einar Örn uppfærir kannski þessa færslu með frekari upplýsingum, þar sem hann hefur meira vit á þessu en ég, en einhverra hluta vegna getur það tekið mislangan tíma hjá mismunandi tölvum að fá forsíðuna (www.kop.is) til að birtast hjá sér.

Þannig að þið ykkar sem komuð beint inn á þessa færslu en sjáið forsíðuna ekki getið farið í kringum þetta vandamál á meðan ykkar tölva aðlagast breyttum nafnaþjónum hjá okkur með því að slá alltaf inn **www.kop.is/index.php** þegar þið komið inn á forsíðuna. Með því að bæta ‘index.php’ aftan við slóðina farið þið beint inn á síðuna sem er á forsíðunni og þannig ættuð þið að sjá síðuna án vandræða.

Vonum að þetta verði ekki of mikið vandamál hjá fólki.

Ég biðst velvirðingar á því að síðan var niðri í gærkvöldi, sem var afleitt því loksins höfðu menn ástæðu til að koma inná síðuna í góðu skapi.

Allavegana, við ætlum að skipta um hýsingaraðila, enda með ólíkindum hversu oft hún liggur niðri. Ef einhver er með tillögur að góðum hýsingaraðila, þá megið þið endilega senda póst á mig (einarorn – hjá – gmail.com) eða Kristján Atla (kristjanatli hjá gmail.com).

Eins og lesendur síðunnar tóku eftir fórum við af stað með leit að nýjum bloggurum fyrir síðuna í síðustu viku. Viðbrögð fólks voru mjög góð, við fengum slatta af umsóknum og úr nægu úrvali var að velja. Nú er þessu ferli lokið öllu saman og það gleður mig að tilkynna að frá og með deginum í dag eru **þrír nýjir Liverpool-bloggarar** mættir á síðuna!

Þetta eru þeir:
- Doddi Jónsson, bókasafnsfræðingur á Norðurlandinu.
- Siguróli Teitsson, ungur Hríseyingur sem stundar nám í Reykjavík.
- Magnús Þór Jónsson, skólastjóri og knattspyrnuþjálfari sem býr á Hellissandi.

Þessir þrír einstaklingar, sem allir hafa lesið síðuna og tekið þátt í umræðum í lengri tíma, eru að okkar mati mjög góð viðbót við það sem fyrir var á þessari síðu og við viljum bjóða þá velkomna á síðuna!

Þið getið farið á einstaklingssíður þeirra hér að ofan til að lesa frekar um hvern þeirra.

Þá að aðeins öðru. Mér finnst rétt að við útskýrum aðeins nánar hvers vegna við fórum í þessa fjölgun á pennum á síðunni, nú þegar umsóknartíminn er búinn og búið er að bæta við. Eins og þið lesendurnir vitið stofnaði ég þessa síðu ásamt Einari Erni og við tveir höfum rekið hana frá byrjun, verið “kóngarnir” eins og SSteinn myndi orða það. Síðustu misseri höfum við hins vegar fylgst hálf máttlausir með ákveðinni þróun á síðunni sem við höfum vart getað stöðvað og er að okkar mati síðunni til vansa.

Málið er það að okkur þykir vera farið að bera svolítið á því að fólk persónugeri þessa síðu í okkur tveimur, svo að oft vill fólk frekar ræða okkur sem persónur í stað þess að ræða málefni Liverpool, sem er einmitt ekki það sem við viljum að gerist. Þegar við stofnuðum þessa síðu hugsuðum við okkur hana sem vettvang fyrir hreinar, skoðanaglaðar og skemmtilegar Liverpool-umræður, þannig að fyrir stuttu fannst okkur við standa frammi fyrir ákveðnu vali; við eða síðan. Við völdum síðuna og því var eftirfarandi ákvörðun tekin:

Við tveir ætlum að draga okkur eilítið í hlé frá síðunni, upp að vissu marki. Um leið og þrír kraftmiklir pennar koma inn og setja mark sitt á síðuna, ætlum við Einar Örn að stíga skref til baka og minnka bæði okkar pistlaskrif og þátttöku í umræðum á síðunni. Þetta teljum við okkur vera að gera síðunnar vegna, því það er ofar öllu í okkar huga að þetta verði áfram staður þar sem fólk getur rætt uppáhalds liðið sitt, Liverpool FC. Það er ekki þar með sagt að við séum að hætta, fjarri því. Við munum áfram blogga og kommenta þegar okkur sýnist, en við munum reyna að halda því innan ákveðinna marka, bæði til að gefa hinum bloggurunum rúm til að gera þessa síðu að sínum vettvangi og eins til að gefa lesendum frí frá “kóngunum”. Þetta teljum við að verði síðunni bara til tekna þegar fram líða stundir.

Önnur breyting sem þið lesendurnir munið ekki finna eins mikið fyrir er sú að við Einar Örn höfum tekið að okkur þá stöðu að vera ritstjórar Liverpool Bloggsins. Þetta þýðir í raun að þótt við minnkum aðeins skrif okkar, þátttöku og sýnileika á síðunni munum við áfram stjórna henni af sama áhuga og krafti og við höfum gert í núna þrjú og hálft ár. Við munum lesa öll ummæli og ritskoða það sem okkur finnst ekki við hæfi, auk þess sem við munum hjálpa hinum bloggurunum með það sem þeir kynnu að þarfnast af stjórnendum síðunnar.

Sem sagt, við Einar Örn erum hérna ennþá og munum skjóta upp kollinum með færslur af og til, en þetta er ekki okkar persónulega vefsíða heldur **ykkar** vefsíða og það er fyrir mestu. Aggi, SSteinn, Olli, Doddi og Maggi, let’s get ready to rumble …

Fyrir hönd ritstjórnar Liverpool Bloggsins :) ,
Kristján Atli Ragnarsson.

Ég vildi bara minna menn á að við erum enn að leita að nýjum Liverpool-bloggurum.

Eins og kom áður fram þá rennur frestur til umsókna út á miðnætti í kvöld. Við höfum fengið góð viðbrögð við leit okkar og þó nokkrar umsóknir borist inn, en ef einhver á eftir að senda inn umsókn fer hver að verða síðastur!

Uppfært 23:59 (Kristján Atli): Nú hefur verið lokað fyrir umsóknir. Við þökkum þeim sem sóttu um. Haft verður samband við alla umsækjendur á næstu dögum og svo verða nýir bloggarar kynntir á síðunni fyrir næstu helgi.

Við á Liverpool Blogginu erum að leita okkur að nýjum bloggurum! Allar frekari upplýsingar má finna á sérstakri síðu sem tileinkuð er þessari leit okkar!

Næstu daga munum við velta hverri þúfu í leit að næstu Liverpool-bloggurum landsins. Ef þú, lesandi góður, hefur einhvern áhuga á þessu geturðu séð upplýsingar um hvað þarf til og hvernig þú sækir um með því að smella á tengilinn hér að ofan. Einnig verður tilkynning efst á síðunni út þessa viku, eða þangað til umsóknarfrestinum lýkur.

Ég vek athygli á því að við erum að leita að fleiri en einum bloggara, þannig að líkurnar eru ykkur í hag! Við á Liverpool Blogginu vonumst til að sem flestir sæki um. Ef þið teljið þetta vera eitthvað sem gæti átt við ykkur, EKKI HIKA!

Umsóknarfresturinn er fram á sunnudaginn 14. október n.k., og vonandi munum við geta kynnt nýja bloggara fyrir ykkur áður en landsleikjahléð er úti. Það eru spennandi tímar framundan á þessari síðu. :)

Það er yndislegt að eiga góða vini, og það er líka yndislegt að eiga góða bloggvini. Heiðurshönnuður Liverpool bloggsins, Kristinn Geir Pálsson, hefur hannað fyrir okkur nýjan haus sem mun vera í sviðsljósinu eitthvað fram eftir vetri. Þessi er ögn öðruvísi en þeir sem við höfum verið með hingað til en breytingarnar eru fínlegar og ættu að fegra síðuna ef eitthvað er.

Við þökkum Kidda Geir enn og aftur fyrir frábært framlag til síðunnar. Hvernig líst fólki á? Er hægt að fá nóg af Fernando Torres? Neeeeei, það held ég varla! :-)

Þessi færsla þjónar tvennum tilgangi:

Fyrst, þá langar mig að tilkynna ykkur lesendum Liverpool Bloggsins að **Hjalti Þór Hreinsson** hefur ákveðið að draga sig í hlé frá síðunni að svo stöddu. Þetta varð reyndar ljóst fyrir nokkrum vikum og við ætluðum að vera búnir að tilkynna þetta fyrr, en það gerist hér með. Ástæðurnar fyrir brotthvarfi Hjalta af bloggsviðinu eru persónulegar og við hinir virðum þær og vonum að þið gerið það líka. Það skal þó tekið fram að það eru engin ósætti á milli Hjalta og okkar og hann skilur við síðuna í góðu. Það er ekki útilokað að hann láti sjá sig hér aftur, en þangað til það gerist óskum við sem eftir stöndum honum góðs gengis í hverju því sem hann tekur sér fyrir í lífinu. Takk fyrir okkur, Hjalti!

Þá að öllu gleðilegri tíðindum. Ofurbloggarinn, mannvitsbrekkan, dýravinurinn og allsherjar góðigæjinn **Einar Örn Einarsson** á stórafmæli í dag. Drengurinn er orðinn þrítugur og við hér á Liverpool Blogginu óskum honum að sjálfsögðu hjartanlega til hamingju með afmælið! Ég hef reyndar mjög sjálfselskar ástæður fyrir því að koma þessu á framfæri, því við brotthvarf Hjalta og stórafmæli Einars er ljóst að ég er eini eftirstandandi Liverpool Bloggarinn sem er undir þrítugu! ;) En það er ljóst að Einar Örn ber aldurinn vel og það er vonandi að næstu tíu árin verði honum jafn góð, sem Liverpool-stuðningsmanni, og síðustu tíu hafa verið. Helst betri, jafnvel. Til hamingju með daginn, gamli!!!

Kristján Atli kom fram í útvarpsþætti fyrir nokkru þar sem hann var spurður í gríni hvort að Liverpool bloggið væri vinsælla en bloggið hjá Ellý Ármanns. Ég held að hann hafi giskað á að svo væri án þess að hugsa eitthvað nánar útí það. Ég ákvað í framhaldinu að reyna að komast að því hvort það væri einhver bloggsíða á Íslandi vinsælli en Liverpool bloggið.

Aðeins er hægt að fá upplýsingar um vinsælustu bloggin á vísi.is og á mbl.is. Á Vísi.is eru [vinsælustu bloggin](http://blogg.visir.is/vinsaelir-bloggarar) þessi (og fjöldi innlita á einni viku fyrir aftan).

1. Henry Birgir – 9.296
2. Höskuldur Kári – 7.887
3. Steingrímur Sævarr – 6.735

Á Blog.is hjá MBL eru [vinsælustu bloggin](http://www.mbl.is/mm/blog/top.html) svona – ásamt fjölda innlita í síðustu viku:

1. Ellý Ármanns – 12.531
2. Áslaug Ósk – 12.050
3. Stefán Friðrik – 11.898

Samkvæmt Blogg Gáttinni er vinsælasta bloggið hjá Stefáni Friðrik – en hann er þó aðeins í þriðja sæti á mbl.is, sem þýðir væntanlega að fleiri aðilar stimpla beint inn Ellý og Áslaugu eða fara þangað af forsíðu mbl.is. Það gefur þó líka einhverja smá vísbendingu að það sé ekki líklegt að mörg blogg utan Moggabloggsins komist nálægt þeim stærstu þar í vinsældum.

Liverpool bloggið nýtur hins vegar ekki kosta ókeypis auglýsingar á forsíðu og í fréttum mbl.is einsog Mogga bloggin gera. Ef svo væri, mætti væntanlega búast við því að síðan væri enn vinsælli.

Hins vegar líta hlutirnir svona út á Liverpool blogginu varðandi heimsóknir. Í vikunni sem endaði 1.júlí (sem er síðasta vika sem við eigum upplýsingar um), þá var fjöldi innlita á Liverpool blogginu **13.905**, sem er 11% fleiri innlit en hjá næstvinsælusta blogginu, sem er bloggið hennar Ellý Ármanns (sjá skjámynd frá teljari.is [hérna](http://www.flickr.com/photos/einarorn/740513580/)).

Nú skal það tekið fram að ég hef ekki upplýsingar um önnur blogg utan Vísis og MBL, sem hugsanlega geta verið vinsæl, þar sem þær upplýsingar eru ekki opinberar. Hugsanlegt er að blogg einsog hjá Ármanni Jakobss og Pétri Gunnars komist nálægt þessum MBL/Vísis bloggum að vinsældum, en ég er þó ekki viss.

Semsagt, ef við tökum þetta allt saman miðað við opinberar tölur, þá líta vinsælustu blogg landsins svona út.

1. **LIVERPOOL BLOGGIÐ: 13.905**
2. Ellý Ármanns: 12.531
3. Áslaug Ósk 12.050
4. Stefán Friðrik 11.898
5. Jenný Anna 9.759
6. Henry Birgir 9.296

Semsagt, við erum langflottastir. :-)

Ástæðan fyrir þessari samantekt er líka auðvitað sú að við höfum íhugað það að setja inn einhverjar auglýsingar til að standa undir rekstri síðunnar, sem ég og Kristján höfum að mestu greitt fyrir hingað til – og einnig vegna þess að við erum að íhuga að færa hana inná nýtt lén, þannig að hún losni undan eoe.is léninu. Við erum búnir að finna eina hugmynd að léni, en allar tillögur eru vel þegnar.

Áfram Liverpool!

Ja hérna, í dag skreið teljarinn á þessari síðu (sjá neðst á síðunni) yfir 2 milljónir flettinga.

Við fórum yfir milljón í apríl í fyrra, þannig að það er greinilegt að aðsóknin er að aukast verulega.

Við erum ekki fyrr komnir yfir á nýtt kerfi og með nýtt útlit að stórsnillingurinn og heiðursmeðlimur Liverpool Bloggsins, Kristinn Geir Pálsson, lætur okkur í té nýja mynd fyrir haus síðunnar. Og ég verð að segja að þessi er alveg stórkostlegur!

Ég vona að það sjái þetta allir, það hefur verið eitthvað vesen með birtingu nýju síðunnar (sumir sjá bara gamla lúkkið) en þið sem sjáið þennan borða ættuð að taka eftir því að það eru 16 dagar, 2 klst, 5 mín og 10 sek í úrslitaleikinn gegn AC Milan. Nei, sjö sek, fimm sek, þrjár sek … :-)

Ég spyr bara: hversu flott er þetta?

Í kvöld eða á morgun þá mun ég reyna að færa þessa vefsíðu yfir á nýjan server, þar sem lokað var á vistun hjá gamla aðilanum. Allavegana, það gæti vel verið að menn lentu í vandræðum með að skoða síðuna á þessum tíma og einnig mögulegt að komment virki ekki í einhvern tíma. Bið fólk bara um að vera þolinmótt.

—

Uppfært (EÖE): Ég er búinn að biðja um að síðan verði flutt. Þegar að nafn síðunnar (í browsernum) birtist sem “Liverpool bloggið – NÝR SERVER” þá ætti þetta að vera komið á nýjan stað, en á móti gæti verið að ekki væri hægt að setja inn komment.

Það komu upp smá vandamál með hýsinguna á þessari síðu og því hefur nú legið niðri. Núna er þetta komið upp aftur.

Málið er að Bluehost, hýsingaraðilinn, getur ekki lengur hýst .is lén. Ég þarf því að breyta um hýsingu, en ISNIC klipptu á lénið mun fyrr en ég átti von á. Ég mun vinna í því á sunnudag eða mánudag að koma færa hýsinguna, þannig að það gætu komið einhver fleiri vandamál fram á næstu dögum.

Ég vona bara að menn hafi skrifað niður reiðilestrana yfir Zenden og mér og geti nú fengið ærlega útrás að nýju.

Jæja, við erum búin að uppfæra hausinn á síðunni aftur og nú er hausinn Flash-væddur,s em þýðir að það eru nokkrar myndir, sem að róterast þar. Mér finnst þetta alveg hrikalega flott og ég vildi að ég gæti eignað mér heiðurinn, en einsog áður er það Kristinn Geir Pálsson, sem á heiðurinn að þessu.

Stutt færsla. Við erum komin með nýjan haus á síðuna og aftur er það Kristinn Geir Pálsson, sem á heiðurinn. Carra er núna kominn á hausinn á Liverpool blogginu.

Einnig, ég setti inn [myndir úr ferð okkar bloggarana til Liverpool um síðustu helgi](http://www.flickr.com/photos/einarorn/sets/72157594577764711/) fyrir þá sem hafa áhuga.

Ok, ein spurning fyrir einhvern kláran CSS snilling. Trúi ekki öðru en að einhver slíkur lesi þessa síðu.

Vandamálið á þessari síðu er að þegar að fólk setur link inní komment í fyrstu línu, þá fokkar það upp hvernig dálkarnir sjást. Sjáið til dæmis [þessa færslu](http://www.kop.is/gamalt/2007/03/06/21.46.43/). Þarna er það linkurinn frá Kjartani, sem gerir allt vitlaust.

Getur einhver sagt mér hvernig er hægt að laga þetta. Annaðhvort að linkurinn skiptist á milli lína eða eitthvað. Allavegana að dálkaskipunin fari ekki í rugl.

**Uppfært (EÖE)**: Það er búið að laga þetta. Haukur kom með lausnina og verður hér með gerður að heiðursgesti á Liverpool blogginu, sem felst í því að hér eftir verður skoðunum hans á málefnum Liverpool tekið sem heilögum sannleik!

Jæja, þá er sex daga heljarferð til Liverpool lokið og “netlöggurnar” fjórar eru snúnar aftur á síðuna sem þær halda úti án endurgjalds, reiðubúnar að skrifa um og deila reynslu sinni með lesendum síðunnar. :)

Við ákváðum að reyna að halda þessu í styttra lagi – í stað þess að segja frá hverju einasta smáatriði að fá þá frekar stutta frásögn frá hverjum og einum – hvað stóð uppúr, hvað niðurúr, og svo framvegis. Þannig að hér kemur sú frásögn:

Kristján Atli: Tveir leikir á Anfield. Man U og Barcelona. 180 mínútur af knattspyrnu. Ekkert Liverpool-mark skorað. Tvö 0-1 töp á heimavelli. Það hljómar hálf skringilega, en þessi ferð var æðisleg. Og ég skal útskýra af hverju.

Ég er persónulega þannig gerður að lífið er skemmtilegt. Og af því að lífið er skemmtilegt, þá geta jafnvel stundum slæmu hlutirnir verið broslegir eftir á. Til dæmis, þá var maturinn sem við borðuðum í þessari ferð ömurlegur. En það er bara broslegt eftir á. Eins var gistiaðstaðan ekki sú boðlegasta, en menn gátu brosað að því líka. Þá ákváðum við bloggararnir frekar að leggja okkur í tæpa þrjá tíma í nótt í stað þess að djamma fram til klukkan 4, þegar rútan átti að mæta, og fyrir vikið misstum við af tækifærinu á að hitta leikmenn liðsins á pöbbnum hans John Aldridge. Svekkjandi, en broslegt eftir á.

Eitt er þó ekki broslegt, og það er að tapa fyrir Man U á 92. helvítis mínútu. Það er bara ekkert broslegt við það, og ég kvíði vinnudögunum sem eru framundan þegar allir United-aðdáendur heimsins skríða út úr skólplögnunum og minna mann á hverjir eru að vinna deildina. Fuckers.

Heildarmyndin segir þó aðra sögu, þrátt fyrir að leikurinn í gær hafi líka tapast 0-1. Það er nefnilega svo margt sem vegur upp á móti tveimur tapleikjum. Fyrir það fyrsta, og það langsóttasta, þá er alltaf gaman að fara á Anfield og þá sérstaklega tvisvar í sömu vikunni. Þá fengum við að hitta nokkrar goðsagnir, svo sem John Aldridge og David Johnson. Hjalti reyndar missti af Aldridge en hitti Alan Shearer í Newcastle í staðinn. Þegar hann reyndi svo að monta sig af því að hafa hitt Shearer minnti ég hann góðfúslega á það hvor þessara tveggja hefur skorað fleiri mörk á ferlinum. ;)

Þá eyddum við fjórum tímum á hinum víðfræga The Park fyrir utan Anfield í gær, fyrir leik. Það var í einu orði sagt stórkostlegt. Að sjá miðaldra karlmenn, bera að ofan uppi á borðum, veifandi treyjum og treflum yfir höfðum sér og syngjandi um Gary Macca klukkan fjögur um daginn á þriðjudegi er nokkuð sem ber að bæði dást að og óttast, virða og hlæja. Þessi staður er ekki víðfrægur fyrir ekki neitt og það er skemmst frá því að segja að maður var orðinn hás áður en maður mætti á Anfield. Segir allt sem segja þarf.

Stemningin á Anfield á laugardaginn var fín. Bar keim af hádegisleik, þ.e. menn ekki komnir í fullan gír (bjór + söngur = stemning) en það var fínt að vera á þeim leik samt sem áður. Leikurinn gegn Barca var síðan ein stór klikkun. Við Einar Örn sátum saman og við, sem og aðrir á vellinum, stóðum meira og minna allan tímann. Vorum komnir inná völlinn 45-50 mínútum fyrir leik og fórum ekki út fyrr en tíu mínútum eftir leikslok … og allan tímann var sungið. Þetta gekk svo langt að í hálfleik, þegar menn fóru á klósettið og slíkt og gerðu rétt sem snöggvast hlé á Liverpool-söngvunum, var spilað í hátalarakerfinu lagið “Ruby Ruby” með Kaiser Chiefs. Völlurinn gerði sér lítið fyrir og söng hástöfum með því lagi líka. Klikkuð stemning.

Þannig að á heildina eru tilfinningarnar blendnar en ánægjan mikil. Maður átti góða og afslappaða helgi í Liverpool, innbyrti nóg af fullorðinsmjólk, nýtti vorútsölurnar í þessari annars ódýru borg, upplifði klikkaða stemningu á The Park og sannarlega klassískt Evrópukvöld á Anfield, og tók þátt í því þegar Liverpool F.C. – ellefu leikmenn og Tólfti Maðurinn – slógu Evrópumeistara Barcelona út úr Meistaradeild Evrópu.

Sem sagt, snilldarhelgi. Ef ekki væri fyrir helvítið hann John O’Shit …

Einar Örn: Ég er að skrifa minn hluta af sögunni inn síðast eftir að hafa lesið ferðasögu hinna strákanna, þannig að ég hef ekki miklu við þetta að bæta.

Þetta var frábær ferð. Einhvern veginn var leikurinn við Man U bara “bónus” þar sem ég ætlaði upphaflega bara að sjá Barca leikinn. En að tapa fyrir því liði var fáránlega svekkjandi, sérstaklega í ljósi mikilla yfirburða í leiknum. Tapið gegn Barca gerðiþað líka að verkum að ég er með vægast sagt **hrikalegan** árangur í ferðum mínum á Anfield. Hef farið fjórum sinnum (Blackburn, Benfica, Man U og Barcelona) – séð einn sigur en þrjú töp. 25% árangur og markatalan er 1-4. Eina markið sem ég hef séð Liverpool skora var frá Cisse úr aukaspyrnu. Það er ljóst að ég fer ekki aftur á Anfield í bráð, en kíki auðvitað til Aþenu ef það er glæta, enda árangur minn á útivöllum talsvert betri. :-)

Ég afrekaði það líka í þessari ferð að borða 13 vondar máltíðir en eina góða og gisti á hóteli sem er með lélegri sturtu en hótel í Kambódíu.

En það skipti bara engu máli, því í 90 mínútur á Anfield fékk ég að upplifa stórkostlegustu stemningu sem ég hef nokkurn tímann upplifað á fótboltaleik. Það að standa í 90 mínútur og syngja og öskra fyrir Liverpool er einfaldlega lífsreynsla sem maður gleymir ekki. Það jafnast **ekkert** á við Evrópuleik á Anfield. Að hlusta á *Fields of Anfield Road* sungið af stuðningsmönnum Liverpool er ótrúlegt.

SSteinn: Já, hvað skal segja. Þessi ferð sem við félagarnir fórum í var ógleymanleg og það fyrir margra sakir. Úr kjallara og upp í hæstu hæðir skýjakljúfa. Á hinum ótrúlega fágaða hóteli, Brittannia Adelphi voru sem sagt saman komnir um 50 karlmenn frá Íslandi sem áttu eftir að vera í hinni frægu Liverpoolborg frá föstudegi og fram á miðvikudagsmorgun. Þrátt fyrir að einstaklingar innan hópsins hafi verið margir og sumir gerólíkir, þá virtust allir ná að finna sér eitthvað við hæfi allan tímann.

Ekki var ég fararstjóri í þessari ferð, heldur venjulegur borgandi farþegi. Það breytir því þó ekki að þegar á hólminn er komið, þá kemur þetta fararstjóra eðli upp í manni og fór það að lokum þannig að ég þurfti að “horfa” á leikinn á móti Man U á The Park. Vandræði og svik óprúttinna aðila varðandi miða gerðu þetta að verkum. Það er líklega mín alversta upplifun úr öllum mínum ferðum á leiki Liverpool. Það var einfaldlega ekki hægt að fólk sem var kannski að koma á einn af örfáum leikjum sínum, myndu missa af þessu. Það var því tekin erfið ákvörðun og ekki hef ég hugmynd um eitt né neitt úr þeim leik (við sáum ekkert af leiknum á troðfullum Park).

Það er oft talað um Liverpool anda og hann kom bersýnilega í ljós þarna. Af þessum 50 miðum þá vantaði 4. Ég bauð mig fram, og svo einnig þeir tveir sem skipulögðu ferðina. 4 maðurinn sem stóð með okkur á barnum hafði lagt af stað eldsnemma um morguninn frá heimili sínu í London, og fór svo strax tilbaka með lest eftir leikinn. Hann þekkti ekki þann sem fékk miðann hans, hann var ekki íslenskur og þurfti bara alls ekki að gera neitt í þessu. Hann hefði getað farið bara á sínum ársmiða á sinn stað og horft á leikinn. Nei, það kom ekki til greina hjá honum að vita af einhverjum sem hafi ferðast alla þessa leið til að missa af leiknum. Hann lét bara sinn. Þetta er hinn eini sanni Liverpool andi sem þessi aðili sýndi.

Allt frá þessum degi fór spennan að byggjast upp. Þriðjudagurinn var aðalmálið og það var alveg ljóst að það stefndi í eitt af þessum eftirminnilegu Evrópukvöldum. Það er óhætt að segja það að þetta stóðst allar væntingar og hrikalega rúmlega það. Það eru margir Íslendingar sem þekkja The Park fyrir leiki. Það mætti orða þetta sem svo að menn geta tekið venjulega upphitun á The Park og margfaldað hana með þúsund, þá fara menn að nálgast það að geta gert sér í hugarlund hvernig þetta var frá því klukkan 16 á þriðjudaginn og þar til hálftíma fyrir leik. Staðurinn var hreint út sagt FOKHELDUR og efast ég um að hægt verði að opna hann í bráð. Leikirnir sem ég hef farið á með Liverpool fara að nálgast sjötta tuginn, en ég hef aldrei áður upplifað The Park eins og hann var þennan dag.

Leikinn sjálfan er óþarfi að rifja upp, ekki sest niður eina sekúndu, ekki þagnað í eina mínútu og gæsahúð allan tímann. Það voru þreyttir, en afar ánægðir ferðalangar sem hittust á hótelinu um kvöldið. Sumir ákváðu nú að ekki tæki því að halla sér fyrir rútuferðina, en aðrir náðu sér í dýrmæta 3-4 tíma í svefn. Það er morgunljóst að svona ferð er ekki toppuð nema við mjög sérstakar aðstæður. Ég vil þakka öllum þeim sem voru í ferðinni, og eins þeim sem við hittum og voru á eigin vegum, fyrir frábæra skemmtun og sinn þátt í að gera þetta allt saman ógleymanlegt.

Hjalti: Eftir svekkjandi niðurstöðu á laugardeginum eyddi ég tveimur dögum í Newcastle. Það var frábært að vera þar en það var ekki fyrr en ég var í lestinni á leiðinni aftur til Liverpool að ég settist niður, sá Metro blað sem dreift er frítt, og sá fyrirsögnina: “Rafa´s best will beat Barcelona,” að ég fékk fiðring í magann.

Ég var búinn að sjá þrjá leiki á Anfield fyrir þessa ferð. Ég sá Liverpool vinna Chelsea árið 2001, sigurleik gegn Charlton 2004 og svo 1-1 jafntefli í endurkomu Robbie Fowler í fyrra. Þá sat ég í Kop stúkunni, í mitt eina skipti, en þessi leikur gegn Barcelona var í allt, allt öðrum klassa. Mig hefur langað til að upplifa Evrópukvöld á Anfield í háa herrans tíð, enda andrúmsloftið á þeim annálað, og ég varð svo sannarlega ekki fyrir vonbrigðum.

Ég kom út úr lestinni og labbaði niður í miðbæ í hádeginu þar sem stuðningsmenn voru byrjaðir að safnast saman og syngja, sjö tímum fyrir leik. Við fengum okkur í gogginn og svo var haldið á Park þar sem ég hitti hina strákana. Stemningin þar var mjög sérstök. Sungið endalaust, mis-fjölbreytilegir söngvar en “We won it five times” í fyrirrúmi á Evrópukvöldi. Það var magnað að sjá það á Park þegar stuðningsmenn Barcelona komu og leiddu sönginn til heiðurs Liverpool! Svona á að skemmta sér….

Ég þarf ekkert að fjölyrða um leikinn eða stemninguna þar, hún var ólýsanleg. Allskyns menn voru í kringum mig, fyrir framan sátu tveir drengir sem reyktu þrjár jónur á meðan leiknum stóð (ekki nema von að ég skemmti mér svona vel?), mér á hægri hönd var strákur sem ég spjallaði mikið við en hann á ársmiða sem hann kaus að lána til að sitja frekar þarna, nánast beint fyrir aftan markið í Anfield Road stúkunni, og svo fyrir aftan voru nokkrir gamlir karlar sem öskruðu líka.

Ég sat frekar nálægt stuðningsmönnum Barcelona sem stóðu sig vel. Magnað var það augnablikið eftir leikinn þegar þeir spænsku klöppuðu til okkar og öskruðu “Liverpool! Liverpool! Liverpool!” og að sjálfsögðu öskruðum við “Barca! Barca! Barca!” til baka. Einhvernveginn var það augnablikið sem ég dáleiddist mest af….

Ég gæti skrifað miklu mun meira en ætla að hemja mig en enda á nokkrum tilvitnunum frá því eftir leikinn gegn Barcelona:

Peter Crouch: It was probably the best atmosphere I have been part of to be honest.

Xabi Alonso: We knew that it was going to be a great atmosphere. The support has been massive and for me is why they are the best supporters in the world.

Rafael Benítez: I am really proud of the players and the supporters. They were amazing. We always have the best supporters in the world and tonight they were almost perfect.

Mig langaði bara að minna lesendur síðunnar á að fjórir af okkur fimm erum á leiðinni út til Liverpool eldsnemma í fyrramálið, og komum ekki heim fyrr en síðdegis á miðvikudag. Þannig að þótt það sé verið að skeggræða pistla síðustu daga og svona þá sýna menn því vonandi skilning ef það er lítið um svör á síðunni, þar sem fjóra fimmtu vantar.

Þeir sem fara út eru SSteinn, Einar Örn, Hjalti og ég, Kristján Atli.

Aggi mun sjá um síðuna í fjarveru okkar, enda snillingur mikill. :)

Allavega, vonandi komum við hinir heim og tökum þátt í fagnaðarlátunum eftir viku með ykkur hinum. Áfram Liverpool!!!

Jæja, þá er komið að því. Þá er loksins komið að því. Draumurinn mun rætast í mars, og þótt fyrr hefði verið. Let’s get it on!!!!!!!!!!

Allavega, í marsbyrjun munu fjórir/fimmtu af bloggurum Liverpool bloggsins ferðast saman yfir hafið og “niður” til Liverpool-borgar. Í apríl verða liðin þrjú ár síðan ég og Einar Örn opnuðum þessa síðu saman (vá hvað tíminn flýgur) og þetta verður fyrsta ferð okkar bloggaranna saman, og það er sko óhætt að segja að menn hlakki til.

Dagskrá ferðarinnar er sem hér segir:

* Fös. 2. mars = Flogið til London, rúta til Liverpool, SSteinn svæfður kl. 21 og svo djamm fyrir okkur hina.

* Lau. 3. mars = Hádegisleikur, Liverpool – Manchester United í Úrvalsdeildinni. SSteinn svæfður kl. 19 og svo djamm fyrir okkur hina.

* Sun. 4. mars – mán. 5. mars = Þetta venjulega túristastöff … menn skiptast á að vera á hótelinu og passa SStein.

* Þri. 6. mars = Kvöldleikur, Liverpool – Barcelona í Meistaradeildinni. SSteinn svæfður eftir leik og svo djamm fyrir okkur hina.

* Mið. 7. mars = Rúta til London, flogið heim.

Með í för verða eftirtaldir bloggarar: ég (Kristján Atli), Einar Örn, SSteinn og Hjalti. Upphaflega átti SSteinn ekki að fá að koma með af því að hann er svo lítill og ósjálfbjarga, en þá fór hann að gráta og við leyfðum honum að koma með. Við héldum hins vegar leynifund okkar á milli og ákváðum að Aggi mætti ekki koma með, og því var honum ekki boðið. Nei í alvöru, þá er hann svo óheppinn að búa úti í Danmörku og komst því ekki með að þessu sinni.

Það segir sig sjálft að á meðan við hinir fjórir erum úti í draumaferðinni mun Aggi sinna síðunni af sinni alkunnu snilld, og svo verða (vonandi) djúsí myndir og/eða ferðasögur í boði þegar við hinir erum komnir heim.

Eru einhverjir fleiri þarna úti á meðal lesenda síðunnar á leiðinni á þessa leiki? Endilega látið okkur vita ef þið verðið þarna, aldrei að vita nema þið getið hitt uppáhalds bloggarana ykkar á The Park fyrir leik … :)

Þar sem ég er alltof latur til að endurhanna útlit þessarar síðu, þá hefur útlitið verið eins frá fyrsta degi fyrir rúmum tveimur árum.

Þangað til í dag að við fengum sendan nýjan haus á síðuna frá dyggum lesanda. Kristinn Geir Pálsson á heiður skilinn fyrir þessa hönnun og þökkum við honum fyrir framlagið.

Sko, þetta er alveg einsog ný síða núna. :-)

Jæja, það er með mikilli ánægju, sem við kynnum núna til leiks nýjan penna á Liverpool blogginu. Flestir, sem hafa fylgst með starfi Liverpool klúbbsins hérna á Íslandi kannast vel við hann, en hann hefur verið formaður klúbbsins undanfarin ár. Einnig hefur hann verið duglegur við að tjá skoðanir sínar inná Liverpool.is og hérna á Liverpool blogginu. Við bjóðum Sigurstein Brynjólfsson velkomin í hópinn! Ég leyfi honum að kynna sjálfan sig:

Ég heiti Sigursteinn Brynjólfsson og hef verið mikill stuðningsmaður Liverpool FC frá því ég man fyrst eftir mér. Það ku hafa verið í kringum 4 ára aldurinn sem ég límdist fyrir framan sjónvarpið á laugardögum og hreifst mjög svo af þessu nafni á félaginu (mér er allavega tjáð það af móður minni sem ávallt hefur verið algjörlega laus við fótboltaáhuga). Liverpool FC hefur allar götur síðan, verið stór partur af mínu lífi. Það er í raun merkilegt hvað knattspyrnufélag úti í heimi getur haft mikil áhrif á manneskjur svona langt í burtu. Núna eru sem sagt liðin 30 ár og áhuginn er akkúrat ekkert að minnka, hann virðist hreinlega aukast með hverju árinu sem líðu.

Það eru margir hápunktar hjá mér þegar kemur að atburðum tengdum Liverpool. Suma hverja upplifði maður á pöbbnum í góðra félaga hópi, en aðra á vellinum. Auðvitað standa leikir meira upp úr þegar maður er staddur í eigin persónu á sjálfum vellinum. Það er orðið erfitt að gera upp á milli einstaka leikja, þegar leikir sem maður hefur farið á standa einhversstaðar í kringum fimmta tuginn. Það er þó alveg á tæru að það er ekkert, og mun væntanlega ekkert, toppa það að hafa upplifað Istanbul ævintýrið. Það næsta sem kemst því var ferðin í vor til Cardiff. En það eru svo mörg augnablik og leikir í viðbót sem vert er að minnast á, þannig að ég ætla að sleppa því svo menn sofni hreinlega ekki við þennan lestur.

Það er einnig erfitt að skýra frá því hvaða leikmenn Liverpool FC í gegnum tíðina hafa verið í mestu uppáhaldi. Þrír skipa þó ávallt stóran sess í huga mínum. Ég hef aldrei farið leynt með það hversu mikill aðdáandi Robbie Fowler ég er. Hann hafði, hefur og mun alltaf eiga vissan sess í mínum huga. Það er heldur aldrei hægt að tala um Liverpool og goðsagnir, án þess að minnast á menn eins og King Kenny Dalglish og Ian Rush.

Mikið af mínum tíma undanfarin 8 ár, hafa farið í störf fyrir Liverpoolklúbbinn á Íslandi. Fyrstu mánuðina eftir að vefsíðan liverpool.is fór í loftið, sá ég um nánast allt sem sneri að fréttaflutningi á síðunni. Núna, eftir að hafa lagt stjórnarstörf fyrir klúbbinn á hilluna, hefur aukist sá tími sem ég hef aflögu, og því þurfti maður að finna sér vettvang til að koma skoðunum sínum á framfæri. Er til betri mögulegur staður en Liverpoolbloggið? Held ekki. Áfram munu væntanlega slæðast inn fréttir frá mér á liverpool.is, en núna mun þessi síða verða minn vettvangur til að koma skoðunum mínum á framfæri, og vil ég þakka þeim góðu mönnum sem stýra þessari síðu fyrir að bjóða mér þetta tækifæri. Eitt er víst, ég mun ekki liggja á skoðunum mínum þegar kemur að Liverpool FC.

Mitt í þynnkunni í dag setti ég inn “comment preview” fyrir ummæli. Allir ættu því að sjá textann sinn einsog hann mun birtast um leið og þeir skrifa hann inn.

Ef þetta lítur ekki alveg nógu vel út gæti þurft að “refresh-a” síðuna til að uppfært stylesheet komi inn. Endilega látið mig vita ef þetta virkar ekki eðlilega. Er búinn að prófa þetta á öllum mac browserum.

Jæja, teljarinn okkar ágæti stendur núna í

996.718

heimsóknum. Spennan er því gríðarleg eftir því hvenær við komumst yfir eina milljón. Ætli milljónasti gesturinn skríði ekki hingað inn á morgun. Gaman gaman. :-)