Allar færslur eftir Daníel Sigurgeirsson

Kvennaliðið leikur í Continental Cup

Annasamur dagur hjá klúbbnum að baki. Aðalliðið vann Tottenham 1-2, U23 liðið vann Swansea 3-0 með mörkum frá Nat Phillips, Origi og Solanke, og U18 liðið vann Newcastle 4-1. Og í dag leikur svo kvennaliðið í Continental Cup gegn Durham. Durham konur leika í næstefstu deild, þar eru þær í 1.-5. sæti en reyndar aðeins eftir eina umferð.

Eins og kom fram í vikunni lét Neil Redfearn af störfum sem knattspyrnustjóri Liverpool Women, og því munu þau Chris Kirkland og Vicky Jepson stýra liðinu í dag og þangað til nýr stjóri finnst. Það er ekki gott að segja af hverju Neil ákvað að hætta eftir að hafa tekið við liðinu núna í vor, en leikmenn liðsins voru a.m.k. duglegar að lýsa yfir vonbrigðum með ákvörðunina á Twitter.

En leikurinn hefst núna kl. 11 að íslenskum tíma, og svona verður stillt upp:

Preuss

S.Murray – Bradley-Auckland – Matthews – Robe

C.Murray – Coombs – Rodgers

Charles – Babajide – Clarke

Bekkur: Kitching, Kearns, Sweetman-Kirk, Linnett, Daniels

Við uppfærum svo færsluna með úrslitum eftir leik.


Leiknum er lokið með sigri Liverpool, 3-3 eftir venjulegan leiktíma, þá var farið í vítakeppni sem endaði 4-3 fyrir Liverpool, eftir bráðabana. Liðið náði forystunni strax á 2. mínútu með marki frá Sophie Bradley-Auckland, en Durham jafnaði mínútu síðar og var svo komið í 2-1 skömmu síðar, og þannig var staðan í hálfleik. Durham komst svo í 3-1 á 57. mínútu, Rinsola Babajide minnkaði muninn á 71. mínútu, henni var svo skipt út af 4 mínútum síðar fyrir Courtney Sweetman-Kirk, og hún náði að jafna á 87. mínútu, og þannig lauk venjulegum leiktíma. Þá var farið beint í vítakeppni, þar sem bæði lið áttu stangarskot auk þess sem báðir markverðir vörðu eitt skot. Í bráðabana var svo Anke Preuss hetja liðsins þegar hún varði skot frá Roberts, og Sophie Bradley-Auckland skoraði svo að vörmu spori.

Semsagt, markaleikur og dramatík, og nú er að vona að liðið hafi lagt vonbrigði tveggja síðustu leikja að baki. Við munum halda áfram að fylgjast með stelpunum hér á kop.is.

Wembley um helgina

Þessu blessaða landsleikjahléi lýkur formlega á laugardaginn næstkomandi, þegar okkar menn hefja eina erfiðustu lotu sem liðið hefur staðið frammi fyrir lengi með því að heimsækja Spurs á Wembley. Það má segja að lotunni ljúki þegar liðið fær City í heimsókn þann 10. október, og mun þá hafa spilað á móti Tottenham, PSG, Milano, Southampton og Chelsea (tvisvar). Þetta verða ansi margir erfiðir leikir á ekki lengri tíma, svo nú loks fer að reyna á breiddina.

Völlurinn

Eins og kunnugt er átti þetta að verða opnunarleikur hins nýja heimavallar Tottenham – White Hart Lane – en af ýmsum ástæðum þurfti að fresta þeirri opnun, ástæðan sem gefin hefur verið upp er sú að ýmis öryggiskerfi séu ekki tilbúin. Heimamenn hafa reyndar verið í standandi vandræðum með að finna staði fyrir þá leiki sem áttu að fara fram í haust, því Wembley er alls ekkert laus alla daga sem Tottenham á heimaleiki. Þar að auki er ekki einusinni vitað hvenær nákvæmlega hægt verður að opna völlinn, opinberlega er talað um að það verði í lok október í fyrsta lagi, heyrst hefur að það verði jafnvel ekki fyrr en um áramótin (en það eru sjálfsagt bara getgátur). Við skulum vona – svona fyrir hönd Spursara – að það fari ekki með þessa framkvæmd eins og Brandenburg flugvöllinn í Þýskalandi sem átti að vera tilbúinn árið 2011 en hefur enn ekki verið opnaður.

Hinn nýji White Hart Lane mun verða hinn glæsilegasti, verður með sæti fyrir 62062 manns, og byggingin sjálf er á 9 hæðum.

En við erum semsagt ekki að fara þangað.

Heldur á Wembley.

Það þarf kannski ekki að rifja upp síðustu heimsókn Rauða hersins á Wembley, en sá leikur tapaðist 4-1. Reyndar hefur svo öll tölfræði síðan þá verið ákaflega jákvæð, hvort sem við horfum á skoruð mörk, hrein lök (sorrýmemmig), mörk fengin á sig o.fl. Mögulega hefur þessi leikur verið dropinn sem fyllti mælinn hjá Klopp, eða svo segir a.m.k. James Pearce í grein á Liverpool Echo.

Andstæðingarnir

Tottenham voru fyrir síðustu umferð eitt fjögurra liða sem höfðu unnið fyrstu 3 leikina á mótinu, en misstigu sig í stórleiknum gegn Watford og þurftu þar að lúta í gras. Þeir mæta því væntanlega foxillir til leiks, en jafnframt örlítið vængbrotnir, því nú hefur verið staðfest að hvorki Hugo Lloris né Dele Alli verði með. Báðir eru þeir meiddir, Lloris auðvitað bæði með hnjask í baki og tognun á heila eftir að hafa verið gripinn glóðvolgur fullur undir stýri. Þetta mun þó engu breyta um stöðu hans sem fyrirliða. Það má því reikna með Vorm í markinu, en það eru svosem engar stórfréttir í ljósi þess að hann var líka í markinu í síðasta leik. Það að Dele Alli verði frá setur kannski meira strik í reikninginn hjá Pochettino. Þá kom Son aftur til klúbbsins frá Asíukeppninni núna í vikunni, og ólíklegt að honum verði hent í djúpu laugina strax um helgina. Enda eru bæði Kane og Lucas Moura leikfærir eftir því sem best er vitað. Jafnvel þó svo Son væri kominn á fullt væri vafasamt að hann ætti öruggt sæti í byrjunarliðinu. Lucas Moura hefur heldur betur fundið taktinn, var valinn leikmaður mánaðarins í úrvalsdeildinni í ágúst, og var m.a. potturinn og pannan í sigri liðsins á United.

Kane skyldi svo enginn vanmeta. Ef við skoðum tölfræði síðasta tímabils, þá var það aðeins Christiano Ronaldo sem fékk fleiri færi heldur en Kane. Þá er markaskorunin hjá honum með því besta, á síðasta tímabili var hann með fimmta hæsta xG (expected goals) í efstu 5 deildunum í Evrópu, 0.742 nánar tiltekið, og hann gerði svo gott betur með því að skora að meðaltali 0.817 mörk pr. 90 mínútur. Kane er búinn að spila 83 leiki síðan í ársbyrjun 2017, og það þrátt fyrir að hafa meiðst tvisvar á þessum tíma. Þess háttar leikjaálag getur auðvitað haft neikvæð áhrif, sérstaklega ef meiðsli blandast þar inn í. Það er ekki ólíklegt að hann hafi farið að spila eins fljótt og mögulegt var eftir meiðslin í vor til þess að eiga einhvern séns í að hirða markakóngstitilinn af Salah, og mögulega fór hann of snemma af stað því hann hefur ekki átt jafnmörg skot á mark eftir meiðslin eins og fyrir þau.

Þó svo að Kane sé sá sem skorar mest fyrir liðið, þá er enginn skortur á mönnum sem kunna að sparka í leðurtuðruna í liðinu. Þetta er að auki lið sem er í raun búið að spila sig saman síðustu 3 tímabil. Vissulega var engum leikmönnum bætt við í sumarglugganum. Það geta verið ýmsar ástæður fyrir því. Kannski mat Pochettino það þannig að það þyrfti einfaldlega ekki að styrkja liðið. Kannski fann hann engan leikmann sem var klár bæting á hópnum sem hann er með í höndunum (staða sem maður er að vona að Jürgen Klopp sé mögulega loksins að komast í). Nú og kannski var ekki til peningur. Smíði nýja leikvangsins kostar vissulega seðilinn, og ekki bætir þessi seinkun úr skák. Hver raunveruleg ástæða er skiptir kannski ekki öllu máli, því hópurinn er einfaldlega mjög sterkur. Þá er þetta jafnframt hópur sem má segja að sé á besta aldri:

Þar að auki er Tottenham með einn yngsta hóp deildarinnar, eða með jafn lágan meðalaldur og Newcastle, 26.4 ár. Aðeins eitt lið er með lægri meðalaldur (25,9 ár), það lið spilar í rauðum búningum og er að mæta á Wembley um helgina.

Semsagt, við erum að fara að mæta gríðarsterku liði sem hefur verið meðal efstu liða í deildinni undanfarin ár, á velli sem okkar mönnum hefur ekkert gengið neitt svakalega vel á síðustu árin.

Og hvernig er svo líklegt að Pochettino muni stilla upp? Í síðasta leik henti hann í 3-5-2, í leikjunum þar á undan var verið að henda í 4-4-2 (þar á meðal með tígulmiðju) en fjarvera Dele Alli gæti þýtt að það yrði að hrista upp í kerfinu frá síðasta leik, sem þar að auki tapaðist. Nú er undirritaður alls enginn sérfræðingur í því hvernig sé best að stilla upp liði Tottenham (og ósköp lítill sérfræðingur í uppstillingu annarra knattspyrnuliða ef út í það er farið), en gerum samt tilraun til að skjóta:

Vorm

Trippier – Alderweireld – Vertonghen – Rose

Dembéle – Eriksen – Dier – Lamela

Moura – Kane

Stilli þessu upp í klassísku 4-4-2, en þetta gæti vel orðið meira 4-2-3-1, og auðvitað skal alls ekki útiloka að 3-5-2 fái að halda sér, en þá myndi Sanches væntanlega mæta í miðja vörnina milli þeirra Toby og Jan.. Hér er ég að veðja á að Lamela sé orðinn leikfær, hann var að glíma við einhver meiðsli en æfði víst í vikunni.

Lærisveinar Klopp

Hinir rauðklæddu mæta í þennan leik með einn besta árangur síðustu ára eftir fjórar umferðir á bakinu: 4 sigrar, 9 mörk skoruð, eitt fengið á sig. Og samt vitum við alveg að liðið hefur í raun bara verið í 2. gír eða svo. Sem getur auðvitað bæði verið jákvætt og neikvætt, svigrúmið til að gefa í er talsvert, en ekki gott ef liðið er fast í þessum gír. Megnið af leikmönnum kom til baka úr landsleikjahléinu í vikunni, og reyndar mun Klopp ekki fá nema tvær æfingar með öllum leikmönnum til undirbúnings.

Meiðslalistinn hefur oft verið verri. Auðvitað tókst Lallana að meiðast í byrjun landsleikjahlés, og reyndar krækti Mignolet sér líka í eitthvað smá hjask á fingri og þurfti að draga sig úr belgíska hópnum. Það kom samt ekki í veg fyrir að hann mætti á æfingu í dag (miðvikudag), svo hann verður að öllum líkindum á bekknum. Fjarvera Lallana þýðir að það losnar pláss á bekknum, Maddock vill meina að Fabinho taki það sæti. Reyndar er það svo að Klopp mun örugglega stilla upp sínu sterkasta – eða allt að því – liði, enda gæti ég alveg trúað að nú setji menn höfuðáherslu á að ná góðum árangri í deild. En auðvitað vita menn vel af því að PSG mæta á Anfield á þriðjudagskvöldið. Ég hugsa að Klopp hugsi sem svo að liðið eigi alveg að ráða við að spila tvo leiki með rúmlega þriggja sólarhringa pásu á milli, enda skammt liðið á tímabilið.

Ég ætla því að spá sama byrjunarliði og síðast:

Alisson

TAA – Gomez – Van Dijk – Robertson

Winjaldum – Henderson – Milner

Salah – Firmino – Mané

Bekkur: Mignolet, Clyne, Fabinho, Matip, Shaqiri, Keita, Sturridge

Í ljósi væntanlegs leikjaálags er auðvitað allt eins líklegt að Klopp fari nú að rótera, t.d. gæti hann hent Keita aftur í byrjunarliðið. Hvað bekkinn varðar, þá miða ég við að taka Moreno af bekknum, síðast var Clyne sá sem fékk að færa sig upp í stúku. Veit ekkert um það hvorn Klopp vilji hafa til að geta skipt inná.

Þá er það spáin (mjög mikilvægt, og að sjálfsögðu er haldið bókhald yfir allar spár okkar kop.is penna, sama hvar þær koma fram). Einar Matthías vill meina að Alisson muni ekki fá á sig fleiri mörk. Eigum við ekki bara að segja að það sé rétt hjá honum, og að þetta fari 2-0? Mané með bæði mörkin.

Það væri a.m.k. æðislegt að vera komin með 15 stig eftir 5 leiki, og veitir víst ekki af miðað við liðin sem eru að narta í hælana á okkur.

Koma svo!

Opinn þráður

Landsleikjahléð rétt rúmlega hálfnað. Sitthvað að frétta:

  • Brasilía og USA léku um helgina, Firmino skoraði og Fabinho vann víti. Alisson auðvitað í markinu.
  • Salah var allt í öllu þegar Egyptaland unnu Níger 6-0 á laugardaginn, og skoraði m.a. 2 af þessum mörkum.
  • Winjaldum og Virgil van Dijk léku með Hollandi gegn Frökkum í gær. Van Dijk var fyrirliði, og Winjaldum náði 100% sendingahlutfalli. Hann er sá fyrsti sem gerir það fyrir hollenska landsliðið í 5 ár.
  • Shaqiri lék ágætlega í stórsigri Sviss í þjóðadeildinni (þarf eitthvað að koma fram við hverja þeir voru að spila?)
  • Robertson lék sinn fyrsta leik sem fyrirliði Skotlands þegar liðið tapaði fyrir Belgum 0-4. Eins gott að við þekkjum engan sem er að fara að spila við Belga á næstunni.
  • Henderson og Gomez léku með Englandi í tapleik á móti Spáni, TAA var á bekknum.
  • Kvennalið Liverpool hóf leik í deildinni í gær þegar þær heimsóttu Arsenal. Það er ljóst að það er allnokkur brekka framundan hjá Neil Redfearn að púsla saman liðinu eftir hræringar sumarsins, því Arsenal konur unnu örugglega 5-0. Ekki bætti úr skák að um morguninn var tilkynnt að Becky Flaherty varamarkvörður myndi yfirgefa klúbbinn og ganga til liðs við Everton, þó þetta ætti svosem ekki að koma mikið á óvart í ljósi þess að tveir markverðir voru keyptir í sumar.

Talandi um Henderson, þá hefur því oft verið haldið fram að hann spili boltanum bara til baka eða til hliðar. Tölfræðin segir okkur samt annað. Þessar tölur eru frá síðasta tímabili:

Það væri nú gaman ef Henderson fengi þá umfjöllun sem hann á skilið hjá okkur aðdáendum.

Annars er orðið laust.

Landsleikjahlé – opinn þráður

Minnum á hópferð Kop.is á leik Liverpool og Fulham – sjá nánar hér


Þó svo að deildin sé komin í frí í tvær vikur þá er sitthvað að frétta af okkar mönnum.

Annars er orðið laust og liðugt.

Leicester 1 – 2 Liverpool

Mörkin

0-1 Mané (10. mín)
0-2 Firmino (45. mín)
1-2 Ghezzal (63. mín)

Leikurinn

Leikurinn fór fjörlega af stað og strax á 4. mínútu fékk Salah gullið tækifæri til að skora fyrsta markið, fallegur samleikur hans við Firmino gaf af sér skot frá þeim síðarnefnda sem var varið, Salah náði frákastinu en skaut naumlega framhjá. Við þurftum samt ekki að bíða mjög lengi eftir fyrsta markinu því á 10. mínútu átti Robertson gott upphlaup upp vinstri kantinn, komst af harðfylgi framhjá varnarmönnum, átti fasta sendingu inn í teig þar sem Mané var fyrstur til að átta sig og skoraði fram hjá Schmeichel með föstu skoti.

Fyrsta almennilega sókn Leicester kom ekki fyrr en á 23. mínútu og þá varði Alisson vel frá Gray, og skömmu síðar greip hann hornspyrnu afar glæsilega. Gaman að vera komin með markvörð sem hleypur út í teig að hirða fyrirgjafir og gerir það vel! Næstu 20 mínúturnar eða svo voru í eigu Leicester sem voru meira með boltann á meðan okkar menn sátu meira til baka og voru tilbúnir í skyndisóknir, en pressan hjá Leicester kom í veg fyrir að það yrði af neinum slíkum. En undir lok hálfleiksins fékk Liverpool 2 hornspyrnur í röð, það hefði nú alveg verið hægt að dæma víti á varnarmenn Leicester í þeirri fyrri þegar það var haldið í Van Dijk, en það kom ekki að sök þegar Firmino skoraði upp úr seinni hornspyrnunni, þar sem svæðisvörn hinna bláklæddu klikkaði. N.b. þá var þetta stoðsending nr. 80 hjá Milner í deildinni, og hann er þar með kominn í 7. sæti yfir stoðsendingar þar frá upphafi. Staðan 2-0 í hálfleik.

Í síðari hálfleik mætti mun grimmara Leicester lið til leiks, og áttu meira í leiknum. Þeir uppskáru svo afrakstur erfiðis síns á 63. mínútu þegar Van Dijk átti sendingu til baka á Alisson, hann fór í einhverja skógarferð og ætlaði að sóla Maddison úti við endalínu en missti jafnvægið, Maddison gaf inn á teig og þar afgreiddi Ghezzal boltann í netið. Fyrsta markið sem okkar menn fá á sig á leiktíðinni staðreynd. Alveg klárt mál að þarna átti Alisson bara að þruma fram, og hann mun sjálfsagt læra af þessu.

Klopp hristi aðeins upp í hópnum, setti Keita inn fyrir Henderson, og Shaqiri fyrir Salah. Í lokin kom svo Matip inn fyrir TAA. Pressan hélt áfram, og það var ekki laust við að það færu um mann ónot þegar Leicester fengu hornspyrnu þegar mínúta var eftir af 5 mínútna uppbótartíma, og Schmeichel kom fram í sóknina. En úr henni varð ekkert, leikurinn fjaraði út og 3 stig í hús.

Bestu/verstu menn

Stundum spilar allt liðið vel, og það væri hægt að velja hvaða leikmann liðsins sem er sem mann leiksins. Því var ekki að heilsa í dag. Alisson lék reyndar vel langstærstan hluta leiksins, en þessi mistök hans hefðu vel getað kostað 2 stig. Sóknin skoraði vissulega 2 mörk, en þar fyrir utan voru skytturnar þrjár alls ekki að finna sig, sérstaklega ekki Salah sem var tekinn út af í seinni hálfleik. Ætli slagsmálin við knattspyrnusamband Egypta séu farin að há honum? Vonum ekki. Hvorki Winjaldum né Henderson voru að sýna neinn stjörnuleik, og Van Dijk hefur oft spilað betur, fékk m.a. gult spjald fyrir klaufalega tæklingu upp við vítateig. TAA var alls ekki slæmur en hefur oft spilað betur. Í mínum huga stendur valið á milli Robertson, sem var síhlaupandi og átti stoðsendingu, Milner sem einnig átti stoðsendingu og var líka sífellt á ferð, og svo að lokum Joe Gomez sem átti mjög góðan leik í vörninni, átti blokkeringu sem kom í veg fyrir mark í síðari hálfleik, og hlýtur því nafnbótina í þetta skiptið. Mistök Alisson eru svo það sem verður mest talað um væntanlega, en það má líka alveg tala um Van Dijk sem getur spilað svo miiiiikið betur.

Næstu skref

Nú tekur við landsleikjahlé, og nú þarf bara að leggjast á bæn og vona að okkar menn komi heilir á höldnu þaðan. Við heimsækjum svo Tottenham á Wembley eftir 2 vikur. Þá væri nú alveg rosalega gaman að liðið verði almennilega hrokkið í gang, því þrátt fyrir að vera með fullt hús stiga eftir 4 umferðir, og aðeins eitt mark fengið á sig, þá vitum við að það býr svo mikið meira í þessu liði.