Liverpool Bloggið

Luis Aragones er búinn að tilkynna spænska hópinn fyrir EM. Það verða eflaust margir Liverpool stuðningsmenn spenntir fyrir spænska liðinu, enda eru fjórir Liverpool menn í spænska hópnum. Það eru einmitt fleiri leikmenn en eru frá Real Madrid (2 – Casillas og Ramos) og Barcelona (Xavi, Iniesta, Puyol). Hópurinn lítur svona út:

Markverðir: Iker Casillas (Real Madrid), Pepe Reina (Liverpool), Andres Palop (Sevilla).
Varnarmenn: Raul Albiol (Valencia), Carlos Marchena (Valencia), Joan Capdevila (Villarreal), Sergio Ramos (Real Madrid), Juanito Gutierrez (Real Betis), Fernando Navarro (Mallorca), Carles Puyol (FC Barcelona), Alvaro Arbeloa (Liverpool).
Miðjumenn: Xavi Hernandez (FC Barcelona), Andres Iniesta (FC Barcelona), Cesc Fabregas (Arsenal), David Silva (Valencia), Xabi Alonso (Liverpool), Ruben De La Red (Getafe), Marcos Senna (Villarreal), Santi Cazorla (Villarreal).
Framherjar: Fernando Torres (Liverpool), David Villa (Valencia), Daniel Guiza (Mallorca), Sergio Garcia (Zaragoza).

Sérstaklega gaman að sjá Arbeloa þarna. Hinir voru nokkurn veginn öruggir. Ekkert pláss í hópnum fyrir Raúl eða Bojan.

The Independent greinir frá því að í dag að Rafa hafi tjáð Pennant það að hann muni verða seldur ef rétt kaupverð fáist fyrir hann. Hann mun vera hluti af þeim leikmönnum sem eru inní tilboðinu í Barry sem og bæði Newcastle og West Ham hafa lýst áhuga á honum. Í stað Pennant eigi David Bentley að koma en hann hefur neitað nýjum samning við Blackburn og er í landsliðshóp Capello. Reyndar eru fleiri um hituna ef Bentley verður seldur frá Blackburn, hann er sagður falur á í kringum 15 milljónir punda. Það sem talið er hafa áhrif á hækkandi verð enskra leikmanna eru hugsanlegar nýjar reglur í evrópukeppnum félagsliða varðandi fjöldrar enskrar eða uppaldra leikmanna í hverju liði.

Ég er á því að Pennant sé ekki nógu góður til að vera byrjunarliðsmaður í Liverpool en ég er ekkert frekar á því að Bentley sé helmingi betri en Pennant. Bentley hefur staðið sig einkar vel með Blackburn og virðist hafa meira til bruns að bera en Pennant en það er langur vegur frá því að vera lykilmaður í Blackburn og síðan byrjunarliðsmaður hjá Liverpool.

Í sömu frétt frá The Independent kemur fram að Rafa sé búinn að ganga frá Philipp Degen en hann mun þá koma á frjálsri sölu frá Dortmund. Ég man ekki neitt sérstaklega eftir Degen en hann er 25 ára svissneskur landsliðmaður (26 landsleikir) og hefur verið í Dortmund í 3 tímabil. Áður var hjá uppeldisfélagi sínu FC Basel sem gerði það afar gott um tíma og m.a. gerðu tvisvar jafntefli við Liverpool í riðlakeppni Meistaradeildarinnar tímabilið 2002-03 (1-1 á Anfield og 3-3 á Saint Jakob St.) og komumst við ekki uppúr riðlinum það árið. Geri ráð fyrir því að ef þetta sé rétt þá hafi Rafa hug á því að Degen taki við af Finnan á næstu 2 árum.

Af markvarðarmálum hjá okkur hefur Maik Taylor hjá Birmingham verið nefndur í því sambandi en hann er með lausan samning. Rafa mun vilja hafa reynslubolta á bekknum í stað markvarðar eins og Itjande. Skv. fréttamiðlum mun Taylor hins vegar vera áfram í Birmingham þar sem hann er ekki tilbúinn að sitja á tréverkinu og vera æfingapúði. Það er samt á hreinu að Scott Carson verður varla Liverpool leikmaður þegar nýtt tímabil hefst en hann hefur tjáð sig að verðmiðinn uppá 10 milljónir punda sé alltof hátt. Ég er sammála því en þegar Craig Gordon fer á 9 milljónir punda til Sunderland þá á ég bágt með að trúa því að Carson sé mikið ódýrari sem og ég er viss um að það séu fleiri lið en Villa sem hafa áhuga á honum. Ég er hins vegar með hugmynd varðandi varamarkvörð, Santiago Canizares! Hann er laus allra mála eftir tímabilið frá Valencia og er á 38 aldursári sem og hann þekkir Rafa vel frá tíma hans hjá Valencia. Af hverju ekki Canizares eins og Maik Taylor á tréverkið? Þetta eru nú samt allt vangaveltur en ein staðreynd, markvörðurinn ungi David Martin verður áfram hjá Liverpool til 2010. Þessi 22 ára markvörður hefur ennþá ekki náð að spila leik með aðalliðinu en hefur verið lykilmaður í varaliðinu sem nýverið varð enskur meistari varaliða.

Þar sem Liverpool spilar ekki næst fyrr en þegar undirbúningstímabilið hefst þá er tilvalið að horfa á úrslitaleikinn í enska bikarnum (FA Cup) milli Portsmouth og Cardiff en Robbie Fowler er í hópnum hjá Cardiff þrátt fyrir að hafa verið meiddur mest allt tímabilið. Hann hefur einungis náð að spila 13 leiki og skorað í þeim 4 mörk. Væri nú ekki amarlegt að sjá Le God koma inná og tryggja Cardiff enska bikarinn.

Opinbera síðan staðfestir í dag verst geymda leyndarmál enskrar knattspyrnu. Sammy Lee, sem lék með Liverpool á gullaldarárunum og var í þjálfarateymi þeirra Graeme Souness, Roy Evans og Gérard Houllier hjá Liverpool, hefur snúið heim og verður aðstoðarframkvæmdarstjóri Rafa Benítez.

Þetta hefði verið staðfest fyrr, og hefur verið vitað talsvert lengi, en vegna samnings Lee við Bolton mátti hann ekki vinna fyrir annan klúbb í Englandi á nýloknu tímabili (svipaður samningur og við höfðum við Paco Ayesteran, sem hætti í september sem aðstoðarmaður Rafa). En nú er Lee laus allra mála og þá er endurkoman staðfest med det samme.

Velkominn heim, Sammy. Þetta er mikill fengur fyrir Liverpool FC, það efast ég ekki um!

Dagurinn í dag virkar rólegur.

Helstu fréttir dagsins svosem sáust flestar í gær. Verið er að tala um að stálmúsin Sammy Lee muni sitja við hlið Rafael karlsins á næsta ári, verða hinn nýji Paco! Á nokkrum stöðum hef ég lesið að viðbúið sé að auki verði ráðinn „first team coach“ einnig í stað Alex Miller. Ég verð glaður ef Sammy kemur aftur, að mínu mati langbesti kosturinn í stöðunni, vel menntaður þjálfari sem hefur fengið mikla reynslu frá því hann fór frá Anfield. Gleymum því ekki að Rafa bauð honum þessa stöðu þegar hann kom, en Sammy ákvað að leita annað.

Ansi mikið pláss fer núna í umræðu um peningavandamál Tom Hicks. Auðvitað erum við orðin þreytt á því bulli öllu, en miðað við viðtöl við Rafael er kannski málið bara núna að Hicks ætlar að leggja aðaláhersluna á LFC og draga úr umsvifum í Bandaríkjunum. Eða hvað? Verst í þessu er auðvitað að framkvæmdir við nýja völlinn virðast vera í stöðugri seinkun.

Við höfum örugglega öll verið að lesa um kaup á Barry, og væntanlega brottför Crouch, Pennant og Riise. Hins vegar virðist ljóst að Xabi Alonso er ekkert á útleið, allavega er það ekki hans vilji. Nýjustu beygjur í leikmannamálum eru í dag þó þær að framherjinn David Villa sé að velja á milli stóru liðanna í Englandi, en allra nýjasta slúðrið er þó áhugi Rafael Benitez á franska vængmanninum Florent Malouda, sem á að vera til sölu fyrir 10 milljónir!

Svona til að hafa eitthvað til að hugsa um!

Hver man ekki eftir sumartímanum sem gerir það að verkum að refresh takkinn er notaður oft og mörgum sinnum á hverjum einasta degi? Jú, þetta er byrjað. Það er ekkert að gerast í fréttum í dag og þrátt fyrir að Rafa vilji klára sem flest af sínum transfer málum, þá fer í hönd þessi óþolandi tími þar sem vonir og væntingar fara sem rússíbanareið í hugum stuðningsmanna Liverpool FC. Erum við að fara að versla heimsklassa leikmenn? Vonandi. Hverja? Ja, þegar stórt er spurt þá er oft lítið um svör.

Margir af fremstu knattspyrnumönnum álfunnar eru að undirbúa sig þessa dagana fyrir Evrópukeppnina sem fram fer í sumar. Eflaust vilja flestir klára sín mál fyrir hana, en óhjákvæmilega þá hefur þessi keppni áhrif á þann tíma sem er til stefnu. Menn eru ekkert að flykkjast á samningafundi í miðju móti. Það verður því fróðlegt að fylgjast með næstu 2-3 vikum, því það er þá eða eftir mót. Nema auðvitað leikmenn sem ekki taka þátt í mótinu góða, og eru þeir nú fjölmargir og sumir hverjir ansi sterkir. Ég ætla mér ekki strax að setja upp line up target listann sem við erum vanir að setja upp og meta hvern fyrir sig. Það er bara allt svo óljóst ennþá. Nöfn sem helst eru í fjölmiðlum þessa dagana í sambandi við að færa sig um set eru t.d. Davidarnir Villa og Silva hjá Valencia. Joaquin hjá sama félagi. Dani Alves eina ferðina enn. Luis Fabiano félagi hans hjá Sevilla og svo menn eins og Lahm, Barry og Huntelaar. Ég segi fyrir mitt leyti að allir þessir leikmenn myndu sóma sér vel hjá okkur og ég gæti hugsað mér að næla í (þó það sé alveg á tæru að það er ekki raunhæft að ná í meira en 2-3 slíka stóra pósta) og aðeins Luis Fabiano af þessum leikmönnum vekur ekki hjá mér talsverðan spenning.

Keep the ball rolling.

Dömur mínar og herrar, bjartsýnisverðlaun ársins hlýtur Roman Abramovich, sem er sagður hafa boðið 40m punda í Fernando Torres hjá Liverpool.

Torres er búinn með 10 mánuði af sex ára samningi sínum við Liverpool og er hæstánægður með lífið við Mersey-ána. Hann sagðist nýlega geta hugsað sér að klára feril sinn hjá Liverpool og hefur vart leynt aðdáun sinni á Rafa Benítez í vetur. Það þarf varla að taka það fram en tilboði Abramovich var hafnað áður en blaðið var komið alla leið út úr faxtækinu.

Hvað gengur mönnum annars til með svona tilboði? Ég trúi varla að þetta sé svona Real-taktík til að reyna að gera leikmanninn órólegan. Tímasetningin er kolröng fyrir slíkt, þar sem Torres er að einbeita sér að Spáni núna og hefur allt sumarið til að ‘jafna sig’ eftir að Chelsea hafa ruglað í honum (ef það var ætlunin). Þannig að það mistókst væntanlega.

Voru menn kannski bara að taka sénsinn á að Tom Hicks væri nógu gráðugur til að selja Torres? Enn og aftur sé ég það ekki, þar sem meira að segja Hicks og Gillett vita að þeir fengju borgarastyrjöld á sig ef þeir seldu Torres fyrir gróða núna.

Hvað sem það var, þá er ljóst að Abramovich sá einhverja ástæðu til að reyna þetta. Ég sé enga, og get ekki annað en hlegið að þessari tilraun Chelsea.

Jæja, þá er „officially“ fyrsti dagur í „silly season“ hafinn.

Næstu vikurnar liggjum við flest yfir kjaftasögum, slúðri og smámolum sem detta í okkar átt varðandi okkar lið.

Undanfarin ár hefur mér þótt mest vit koma frá heimablöðunum tveimur, Liverpool Echo og Liverpool Daily Post. Aðalástæða þess er að þrátt fyrir allt og allt eru þeir blaðamenn sem búa í borginni meira með puttann á púlsinum, möguleiki að þeir þekki leikmenn, þjálfara eða annað starfsfólk á Anfield sem getur lekið upplýsingum. Þarna t.d. heyrði maður löngu fyrr af Benayoun og Lucas en hjá Lundúnapressunni alræmdu.

Núna fyrir nokkrum dögum kom þarna fyrsta fréttin sem ég hef séð varðandi markmanninn Maik Taylor. Sem gamall markmaður lýsi ég þeirri skoðun minni hér að það væri góður kostur fyrir LFC að eiga slíkan markmann í hópnum. Strákurinn er fæddur á undraári, 1971, og er hokinn af reynslu. Hefur verið aðalmarkvörður Birmingham í fimm ár og leikið þar 195 leiki í öllum keppnum. Hann er að auki þrautreyndur landsliðsmaður, hefur leikið 68 leiki fyrir Norður Írland.

Breytingin á nútímabolta virðist vera orðin sú að nú fá varamarkmenn stóru liðanna að spila í bikarkeppnunum. Ég er ekki endilega glaður með það en ef svo á að vera finnst mér við verða að fara að fá betri ása á bekkinn okkar.

Dudek var einfaldlega búinn og átti arfaslaka leiki í fyrra, í vetur átti Itandje einn góðan hálfleik, á Stamford Bridge. Þess vegna held ég að fínt væri að fá mann vanan enskum hasar til að sitja á bekknum okkar þar til David Martin kemur þangað, haustið 2009 myndi ég halda. Að auki ætti Taylor að geta miðlað reynslu á yngri mennina í hópnum.

Í dag fljúga margar sögur, Joaquin, Seydou Keita, Valon Behrami á leiðinni inn og Guthrie á leiðinni út. Við lítum örugglega á það á næstu dögum, þegar eitthvað meira gerist þar.

En núna held ég að tveir leikmenn búsettir í næststærstu borg Englands séu í fókusnum, umræddur Taylor og fyrirliði Aston Villa, Gareth Barry sem virðist fá frítt að borða á matar-, kaffi- og kvöldfundum með öllum stóru köllunum á Villa Park.

Ekki það að sú vinna skili neinu. Er handviss að Barry verður í rauðu treyjunni fyrir maílok……

Jæja, þá er það síðasta leikskýrsla vetrarins 2007 – 2008. Lokaleikur tímabilsins hafði litla þýðingu og maður bjóst við talsverðum breytingum á byrjunarliði og kannski skrautlegum leik.

Rafael karlinn kom því mér á óvart með frekar hefðbundnu liði.

Byrjunarlið dagsins var þetta:

Á bekknum: Itandje – Finnan – Hyypia – Lucas og Benayoun.

Insua leyft að spreyta sig áfram, breytingin helsta sú að Gerrard var nú settur inná miðju með Mascherano og vinsælasti vinur okkar hér, Voronin spilaði í holunni milli miðju og sóknar.

Fyrstu mínútur leiksins voru afar rólegar, þó að okkar lið hafi verið meira með boltann í meiri sóknargír. Í raun var lítið að gerast þangað til á 25.mínútu þegar Reina varði vel frá Berbatov eftir horn. Þaðan frá var áfram rólegt og í raun steindautt. 0-0 í hálfleik.

Aðeins lifnaði yfir í þeim seinni. Torres fékk fínt færi sem Cerny varði og Gerrard og Voronin fengu fín skotfæri sem gátu nýst betur. Tottenham fékk líka hálffæri, en tempóið í leiknum var ekki mikið, þó ekki sé nú meira sagt!

Á 69.mínútu brotnaði svo ísinn frægi. Skrtel átti langa sendingu sem Torres nikkaði áfram í gegnum vörnina þar sem leikmaður sem hafði verið ósýnilegur í leiknum fram að því, Andriy Voronin, lagði knöttinn vel fyrir sig og setti undir Cerny í markinu. 0-1, en vonandi dugði þetta mark nú ekki fyrir nýjum vetri hans á Anfield, hann fór svo útaf tveimur mínútum seinna, ef ég fengi að ráða, í sínum síðasta leik fyrir liðið……

En á 74.mínútu kom svo það sem allir biðu eftir. Torres. Bara, rest my case. Michael Dawson skilinn eftir berfættur og markmaðurinn klobbaður. Dawson fór heim að sækja sokka strax að þessu loknu. En án gríns var markið tær snilld, nú á Fernando Torres einn metið yfir flest mörk nýliða í Úrvalsdeildinni. Nistelrooy fucking hvað!!! Deildarmark nr. 24, ekkert úr víti. Í heildina nr. 33 fyrir liðið. Frábært fyrsta season, mun örugglega ekki versna á næsta ári!

Á þeirri 79. setti svo „El Nino“ hann svo í þverslána með markmanninn helfrosinn, en Tottenham voru þarna bara dánir með stæl.

Síðustu mínúturnar var bara spurningin hvort Pepe Reina setti met, sem hann svo sannarlega gerði. Hélt hreinu í 17 leikjum í vetur, sem er árangur með ólíkindum! Lokastaða 0-2, að lokum semsagt 4.sæti með 76 stig og markaskorið endaði í 119.

Þegar kemur að því að velja mann leiks, sem var nú ekki mikil flugeldasýning, valdi ég milli þessara metdrengja, Reina og Torres. Ekki endilega bara út af deginum, heldur líka bara áfanganum sem þeir náðu. Ég ákveð svo núna að Torres situr uppi með það að vera síðasti „maður leiksins“ á kop.is í vetur.

Næsti leikur er ekki tímasettur ennþá, en við munum auðvitað láta vita af því hér á síðunni um leið og það liggur fyrir.

Svona í framhjáhlaupi féllu Reading og Birmingham í dag, samhryggist íslensku stáldrengjunum með það en óska Danny Murphy til hamingju með að halda sínu liði, Fulham, uppi. Ég var sáttur með þá útkomu en ætla ekki að tjá mig um aðra atburði dagsins í Englandi……

Byrjunarliðið okkar í dag:

Sýnist þetta allavega vera ca. það sem verið er að tala um.

Á bekknum í dag eru: Itandje – Hyypia – Finnan – Lucas – Benayoun.

Umræðan verður vafalaust um það að Crouch – Riise – Pennant og Alonso eru hvergi þarna en ég hlakka til að sjá hvernig Gerrard kemur út þarna aftarlega á miðjunni, hvernig Insua verður, hvort Torres skorar og slær met hestsins góða.

Ætla að njóta síðustu beinu útsendingarinnar frá Liverpool í bili!

Jæja, það er komið að því. Síðasta upphitunin á þessu tímabili er að verða að veruleika. Mér finnst alltaf jafn gaman að skrifa upphitanir, og kannski eins og margir hafa tekið eftir, þá er ég ekki jafn hrifinn af því að skrifa leikskýrslur. Ástæðan? Veit ekki alveg, það er kannski vegna þess að ég er alltaf bjartsýnn fyrir leiki og hlakka ávallt til þegar er að styttast í leik hjá Liverpool. Eftir leik sem hefur boðið upp á vond úrslit, þá stundum fer ég hreinlega ekki á netið dögum saman. Menn taka þetta misjafnt út, og kannski er þetta einmitt megin ástæðan fyrir því að ég er alltaf “up for” upphitanir.

Hvað um það nóg af mér, þessi leikur er sem sagt á White Hart Lane á morgun gegn liði Tottenham. Ég hef nú komið inn á það nokkrum sinnum áður að Tottenham (ásamt Newcastle) er eitt mesta “næstumþvílið” í Evrópu. Þeir hafa oft verið með mjög öflug lið og eytt fúlgum fjár, en geta samt aldrei tekið þetta skref yfir í það að geta talist sem gott lið. Ég hef ávallt haft svona “soft spot” fyrir þessu liði, finnst það oft á tíðum spila skemmtilegan bolta og hafa margoft haft virkilega góða og skemmtilega leikmenn innan sinna raða. Þeir klúðruðu auðvitað tímabilinu strax í byrjun tímabilsins með fáránlega lélegum úrslitum undir stjórn Jol. Ég fer ekki af því að núna gætu þeir fyrst orðið virkileg “threat” á næsta tímabili, því í fyrsta skipti (nánast síðan ég man eftir mér) eru þeir komnir með stjóra sem ég tel vera virkilega góðan.

Þeirra helsta hætta er auðvitað Berbatov, og svo eiga þeir nokkra öfluga sókndjarfa leikmenn. Vörnin er nokkuð solid þegar kemur að miðvörðunum, en svo eru þeir auðvitað með brandarann Robinson í markinu. Þeir hljóta hreinlega að losa sig við hann í sumar og fá sér alvöru mann í þá stöðu. Woodgate er klassa miðvörður fyrir framan hann og King er einn sá hæfileikaríkasti. Þetta er sem sagt lið sem getur á góðum degi unnið flest öll liðin í deildinni, en ef okkar menn hitta á góðan dag, þá er þetta engin spurning.

Þá að okkar mönnum. Jákvæðar fréttir úr herbúðum okkar, Aurelio og Agger byrjaðir að æfa á nýjan leik. Leikurinn kemur of snemma fyrir Agger, en Aurelio gæti verið klár í slaginn. Hey, Kewell er líka heill, en ég stórefa að einhver missi hjartslátt yfir því, enda hann væntanlega búinn að spila sinn síðasta leik fyrir Liverpool. Það verður einmitt fróðlegt að sjá uppstillinguna, því eflaust munu einhverjir lesa eitthvað út úr henni með það hverjir hverfa á braut í sumar. Ef Liverpool spilar sinn leik, þá á þetta ekki að vera spurning. Ég held að núna snúist málið ekki um að leikmenn séu að spila fyrir framtíð sinni hjá liðinu, það er of seint í rassinn gripið fyrir sumar og þessi síðasti leikur mun ekkert skera úr um það. Ég er mjög beggja blands með uppstillingu á liðinu. Ein röddin í hausnum á mér segir að liðið verði hefðbundið, en önnur treður Crouch inn í liðið. Ég ætla að taka fyrri kostinn og tippa á tiltölulega venjulegt byrjunarlið. Ég reikna jafnframt með því að sjá einhvern af kjúllunum á bekknum. Ég held að Rafa komi öllum á óvart og setji Nemeth þar og leyfi honum því að prófa sig í fyrsta skipti með aðalliðinu.

Ég ætla sem sagt að tippa á að Riise fái kveðjuleik frekar en að Insúa spili (reikna ekki með að hann treysti Aurelio inn svona strax eftir meiðslin). Eins og áður sagði, þá var ég í mestum vandræðum með að koma ekki Crouch fyrir í liðinu, þá væntanlega á kostnað Babel eða Kuyt og Gerrard myndi þá færast út á annan hvorn vænginn. Ég er eins og áður ávallt bjartsýnn og held að við endum þetta tímabil on the high. Eigum við að segja að Pepe haldi upp á gullhanskann með því að halda hreinu og þeir Torres og Babel setji sitt hvort kvikindið? Er það ekki bara díll?

Ég vil hér með þakka fyrir lesturinn á upphitunum þetta tímabil, get ekki beðið eftir þeirri næstu því það þýðir að allt er að fara af stað aftur. Við tekur núna algjört silly season þar sem við munum vera með puttann þétt á púlsinum og fjalla um það sem um er að vera hverju sinni.

Bring on Spurs