Jovanovic á förum, hjólin byrjuð að snúast?

Posted on by

Samkvæmt frekar öruggum heimildum á Twitter, þá er Milan Jovanovic á förum frá félaginu og er að hefja viðræður við gríska félagið Olympiakos. Það kemur fram að þetta sé samkvæmt íþróttamiðlum í Serbíu, heimalandi hans. Einhverjir halda því fram að hann fái fría sölu, og að Liverpool þurfi ekki að greiða upp samninginn hans. Gott ef satt er, þá allavega kostar hann okkur ekki frekari pening í laun og slíkt.

Annars mætti liðið okkar til æfinga í dag aftur, allir nema Luis Suárez, Lucas og Henderson. Henderson fær auka frí vegna þátttöku í U-21 í sumar og hinir tveir eru uppteknir í Copa America. Aquilani er meira að segja mættur. Eins er gleðilegt að sjá þá komna í boltaæfingar þá Agger og Kelly. Stevie G er í sér þjálfun, enda að jafna sig eftir uppskurð. Hægt er að sjá myndir hérna.

Annars má nú búast við að hjólin fari að snúast, ef við erum að fara að losna við einhverja af launaskrá sem ekki eru inni í plönum King Kenny. Held að það sé fyrst og fremst það sem er að hægja á málum varðandi leikmannakaup. Charlie Adam hefur staðfest það að Blackpool og Liverpool hafi rætt saman um kaup á honum og reikna ég með að það klárist núna á næstu dögum. Eins er það alltaf að verða sterkari og sterkari orðrómur að Downing kaupin klárist fljótlega. Sjá hvað setur, næstu 2 vikur verða fróðlegar svo ekki sé meira sagt.

Kevin Keen ráðinn þjálfari.

Posted on by

Í kvöld var tilkynnt á opinberri heimasíðu Liverpool FC að búið er að ráða Kevin nokkurn Keen sem þjálfara aðalliðsins og verður hann mættur til starfa á Melwood í fyrramálið þegar leikmennirnir koma til æfinga eftir sumarfrí.

Kevin þessi var nokkuð öflugur leikmaður á sínum tíma, helst náði hann árangri í léttleikandi West Ham liði á níunda áratug síðustu aldar. Hann starfaði sem þjálfari og síðar aðstoðarframkvæmdastjóri hjá Hömrunum frá árinu 2002 allt þar til í dag. Hann stjórnaði West Ham í síðasta leik liðins tímabils eftir að Avram Grant hafði verið rekinn og lék þann leik líka árið 2008 þegar hann var bráðabirgðastjóri í kjölfar brottreksturs Alan Curbishley og þar til Gianfranco Zola og Steve Clarke tóku við.

Keen er 44ra ára gamall og er mikils metinn þjálfari. Það er alveg ljóst að ráðning hans sýnir enn á ný hversu hátt klúbburinn metur Steve Clarke, þarna er verið að velja inn þjálfara sem að Clarke vill hafa með sér og þar með auka áhrif hans á æfingavellinum. Þeir náðu vel saman hjá West Ham og nú ætla þeir sér að ná frekari árangri undir stjórn kóngsins.

Keen var við vinnu hjá West Ham á meðan félagið var í íslenskri eigu og þótti afar samviskusamur og klár náungi með þægilega nærveru og öflugan fótboltahaus.

Velkominn til starfa hr. Keen!!!

Uppfært (Babu)

Mættur til starfa ásamt megningu af liðinu

Viðtal við Suarez í Don Balon

Posted on by

Sky taka upp nokkra punkta úr viðtali, sem að Luis Suarez veitti spænska blaðinu Don Balon. Hægt er að nálgast allt viðtalið á heimasíðu Don Balon. Það er á spænsku, en hérna er Google þýðing á því, sem að er nógu góð til að skilja flest.

Í viðtalinu eru aðallega tveir áhugaverðir punktar. Fyrst þá segist Suarez hafa hring í Fernando Torres daginn sem þeir voru báðir að skipta um lið – Torres yfir til Chelsa og Suarez til Liverpool.

“He told me to be the same player I always was, not to try to change, that Liverpool were a great team and that they would help me to grow a lot. “The truth is that his advice was a great help and he was not wrong; he was exactly right.”

Hann er svo spurður útí gamalt kvót um að honum dreymi að spila fyrir Barcelona. Umboðsmaður hans er bróðir Pep Guardiala. Hann segir að þau tengsl auki ekkert líkurnar á því að hann spili fyrir Barcelona, en hann viðurkennir að áður en hann kynntist umboðsmanni sínum hafi það verið draumur hans að spila fyrir Barcelona. Eflaust reyna einhverjir fjölmiðlar að gera sér fréttir úr þessu, en það að úrúgvæi segi að það hafi verið draumur hans að spila fyrir Barcelona eru álíka stórar fréttir og að jafngamall Íslendingur myndi segja að honum hefði dreymt að spila um Manchester United eða Liverpool. Það dreymir ALLA suður-ameríska stráka um þetta.

Í viðtalinu talar hann líka um að honum líði vel í Liverpool – hann sé mest fyrir það að vera heima hjá fjölskyldunni og þótt að Amsterdam og Liverpool séu ólíkar þá sé hann ánægður í Liverpool og að fólkið þar sé frábært. Hann hafi verið stressaður fyrir skiptin, en allt hafi gengið vel.

Hann talar um að í Liverpool hópnum sé hann í mestum samskiptum við Dirk Kuyt, þar sem þeir tala auðvitað hollensku – og svo við þá sem tala spænsku í hópnum – Maxi, Lucas, Meireles, Pepe og Glen Johnson (!)

Opinn þráður á föstudegi

Posted on by

Charlie Adam… geisp.
Juan Mata…geisp.

Og svo framvegis. Ég er kominn með svo mikið ógeð af því að refresh-a Twitter að ég er alveg að gefast upp. Ég held að ég færi mig algjörlega yfir á Guardian svo ég haldi geðheilsunni það sem eftir er af sumri.

Gael Clichy virðist vera að fara til Manchester City og Albert Aqulani segist vera spenntur fyrir því að spila fyrir Liverpool á næsta tímabili. Hann segir:

“I return to Liverpool with great enthusiasm,” Aquilani said. This is not a problem. It’s not true that I didn’t want to return to England.”

Er það svo slæmt að fá ítalskan landsliðsmann aftur á Anfield? En Liverpool fara varla að kaupa Charlie Adam ef að Aquilani verði seldur. Ég hefði heldur viljað fá Adam, en Aquilani er auðvitað góður líka. Varla ætlum við að fara inní tímabilið með Henderson, Lucas, Gerrard, Adam, Meireles og Aquilani + svo Spearing og Jonjo. Það er sturlun.

En allavegana, ræðið það sem þið viljið hér.

Þolinmæði þrautir vinnur…..

Posted on by

Fyrst, set hér inn tengil á póst Steina frá í gær vegna miðamála á Anfield í framtíðinni. Algjör skyldulesning fyrir okkur öll!

Í dag er málið svo að vera áfram þolinmóð en lesa fréttir sem berast. Af einskærum vilja tala ég ekki um leikmann Blackpool FC, enda nóg um sinn held ég. Þó er ný beygja í því máli að sagt er að beðið hafi verið um að Danny Wilson fari í lán þangað næsta vetur. Sjáum til.

Skrýtnari fréttir berast þó að utan í dag. Ekki hefur verið staðfest á opinberu síðunni en áreiðanlegir miðlar, síðast Liverpool Echo, segja frá því í dag að Sammy Lee og Liverpool hafi nú lokið samstarfi sínu. Ekki er vitað hvað olli, en þó virðast aukin völd Steve Clarke hafa orðið til þess að Lee hafi ákveðið að fara og sumir telja líklegt að Lee sé að fara að vinna með Allardyce nokkrum á West Ham. Þar fer góður biti í hundskjaft!

Á twitter er lítið rætt um þetta, en þó eru menn farnir að stinga upp á gömlum hetjum í þjálfarateymið, eins og Gary McAllister, Didi Hamann og Sami Hyypia. Sammy Lee var tenging við sögu klúbbsins og öllum finnst líklegast að einhver með þá vísun komi í stað Lee, en Clarke verði opinberlega Assistant manager.

Einnig greinir Echo-ið frá því að Connor Wickham muni líklega ganga til liðs við Sunderland í dag, fyrir 9 milljónir punda sem gætu endað í 13 milljónum. Liverpool muni þurfa að jafna það boð til að fá strákinn sem lýst hefur yfir vilja til að spila á Anfield. Þetta er auðvitað gríðarleg upphæð fyrir ungan strák og allt eins víst að ekki verði af því að við jöfnum boðið. Ef Sunderland kaupir Wickam er talið að þeir muni draga tilboð sitt í David N’Gog til baka.

Eins er komið spjall um það að ástæða þess að verið sé að skoða mál Meireles sé einfaldlega vegna þess að nú virðist sem Aquilani, Poulsen og Joe Cole verði áfram á Anfield og Raul karlinn sé sá eini “söluvænlegi” í þeim hópi. Gerrard, Lucas, Spearing, Cole, Shelvey, Meireles, Aquilani, Poulsen og Adam eru samtals 9 leikmenn að keppa um miðjuna, hugsanlega Henderson sá tíundi og augljóst að það er alltof mikið! Þeir þrír sem LFC vill helst selja eru allir á löngum og feitum samningum og alls ekki sjálfgefið að við losnum auðveldlega við þá! Ég kaupi alveg þessa skýringu en vona innilega að við losnum við þá þrjá sem við minnst þurfum!

Svo enda ég hér á verulega góðri grein um innkaupastefnu þá sem stunduð er þessa dagana hjá okkur. Tomkins er að mínu mati sá sem mest er mark takandi á og í þessari grein fer hann yfir breytinguna á unglingastarfinu og ræðir um það hvernig leikmenn eru valdir til félagsins. Þar sér maður strax hvers vegna Henderson varð fyrir valinu t.d., ungur maður sem í statistíkin hljóp einna mest í deildinni og átti einna flestar lykilsendingarnar líka, ungur og ferskur.

Þessa dagana horfum við mikið til þess að við höfum ekkert keypt og alls konar raddir komnar upp sem t.d. bera okkur saman við United. Við megum ekki gleyma því að á þeim bænum er ekki verið að glíma við þriggja ára hörmungasögu í leikmannakaupum þar sem Rafa var svikinn og síðan var peningum síðasta sumars eytt í vitleysu. Við þurfum að losna við “ónýta” leikmenn á alltof háum samningum og þurfum því að fara betur yfir málin. Á móti var alltaf ljóst að United þyrfti að kaupa markmann, auk þess sem Scholes og Hargreaves fylgdu í kjölfar Neville-systurinnar með að hverfa frá. Þeirra staða er önnur en okkar, við viljum ekki bæta við okkur 5 leikmönnum bara blint og halda samt Jovanovic, Kyrgiakos, Poulsen, Konchesky, Cole, N’Gog, Jones og jafnvel fleirum sem hafa verið boðaðir til æfinga í næstu viku. Vandinn verður líka að fá einhverja til að taka þessa menn frá okkur, það hlýtur að tefja okkur í leikmannamálunum.

In Dalglish and Comolli we have to trust!

Miðar á Anfield fyrir 2011/2012 tímabilið

Posted on by

Liverpool Football Club er þessa dagana að breyta talsvert því fyrirkomulagi sem hefur verið á miðaúthlutun til stuðningsmannaklúbba um allan heim. Á komandi tímabili þá verður algjörlega hætt með pappírs miða á völlinn eins og tíðkast hefur alla tíð, í staðinn koma svokölluð Smartkort. Þetta þýðir einfaldlega að allir þeir sem ætla sér að fara í ferð í vetur (tímabilið 2011/2012) VERÐA að ganga í hinn opinbera stuðningsmannaklúbb Liverpool Football Club. En hvað fá meðlimir fyrir það að ganga í þann stóra klúbb.

Eftirfarandi fylgir í kaupunum:
3 mánaða frí reynsluáskrift að LFCTV á netinu
Rafrænt fréttabréf mánaðarlega sem inniheldur einkaviðtöl og efni sem kíkir á bakvið tjöldin hjá LFC
Upphitunarpóstur í tölvupósti fyrir alla heimaleiki í ensku úrvalsdeildinni
Gjafapakki sem inniheldur USB lykil með sérstöku Liverpool efni á, að auki silfraður LFC penni
10% afsláttur í Liverpool búðinni, hvort sem um ræðir í gegnum netið eða opinberri verslun LFC
40% afsláttur af áskrift að LFC Weekly tímaritinu
30% afsláttur af áskrift að LFC Programme tímaritinu
10% afsláttur af opinberum LFC bókum
20% afsláttur af öllum Legends Tours og Anfield Stadium Tour & Museum (http://www.liverpoolfc.tv/history/tour-and-museum)
10% afsláttur af Anfield Experience og Ultimate Anfield Experience (http://www.theanfieldexperience.com/)
10% afsláttur af mat í Boot Room Sports Cafe, Anfield
Afslættir og tilboð frá samstarfsaðilum og fleira
Sitt eigið Smartkort, sem verður virkjað sérstaklega þegar viðkomandi ætlar sér á völlinn og verður því miðinn inn

Verðið fyrir þetta er 18,99 pund, eða 3.600 krónur.

Það er gríðarlega mikilvægt fyrir Liverpoolklúbbinn á Íslandi í heild sinni, sem og alla meðlimi hans og þá sem hafa einhvern hug á því að fara á völlinn í vetur, að bregðast hratt við og ganga í alþjóða stuðningsmannaklúbbinn. Fjöldi íslenskra meðlima þar inni mun ákvarða þann fjölda miða sem klúbburinn fær úthlutað á leikina í vetur. Það er því mikið í húfi fyrir alla, bæði þá sem ætla sér á völlinn í vetur og eins þá sem hafa hug á því að gera það í nánustu framtíð.

Þeir sem gengu í All Red klúbbinn í fyrra, hafa væntanlega fengið boð um endurnýjun ganga bara frá henni eins og fram hefur komið í tölvupóstinum. Við viljum þó biðja viðkomandi aðila um að senda okkur upplýsingar um sig, númer á Fan Card og í raun upplýsingarnar sem beðið er um hér að neðan, svo auðveldara verði fyrir okkur að halda utan um þetta og ganga fá miðamálum þegar þar að kemur. Allir hinir, sem vilja ganga frá aðgangi geta gert það í gegnum Liverpoolklúbbinn á Íslandi. Það sem senda þarf er eftirfarandi:

Nafn
Kennitölu
Heimilisfang
Póstnúmer
Sveitarfélag
E-mail
GSM númer

Ástæðan fyrir því að félagið (LFC) vill fá E-mail og GSM númer er að viðkomandi aðili mun fá sendan tölvupóst eða sms sé hann búinn að fá sæti á leik. Þar kemur fram hvaða sæti og hvar það er staðsett. Endilega sendið okkur þessar upplýsingar á felagaskraning@liverpool.is og við göngum frá málunum fyrir ykkur. Skráningarfrestur er til 4. júlí nk. Greiðsluna er hægt að inna af hendi með því að leggja inn á eftirfarandi reikning:

0537-26-116662
kt: 460896-2319

Opinn mánudagsþráður

Posted on by

Meðan við bíðum eftir einhverjum staðfestum fréttum af leikmannamarkaðinum er ágætt að vangavelta aðeins slúður helgarinnar.

* Charlie Adam á að vera koma í dag. Nýjustu fréttir af kaupverði eru 6 milljónir punda + Stephen Darby. Sumir twitterarnir tala um að Jonjo Shelvey fari að auki í lán í eitt ár á Bloomfield Road. Ansi löng þessi Adam-saga öll.

* Raul Meireles á að vera fúll þessa dagana. Í fyrrahaust fékk hann samning til eins árs upp á 30 þúsund pund tryggð og svo átti að tvöfalda samninginn nú í sumar ef aðilar væru sáttir við frammistöðu hans í fyrra. (Eilítið magnað að hans samningur var settur svona upp en ekki hinna snillinganna sem fyrrum stjóri fékk). Miðað við sögu FSG-manna er ekki sjálfgefið að þeir séu tilbúnir að hækka laun hans þrátt fyrir að óumdeilt sé að hann stóð sig mjög vel. “Laun samkvæmt frammistöðu” er lögmálið og ekki virðist á hreinu hvernig þetta fer.

* Juan Mata er nú kominn á radar Wenger, sagt að Arsenal, Liverpool og Manchester City horfi til hans. Persónulega þá er ég ekki viss um að við séum að eltast við Mata, hann vill spila aftan við senter, þó vissulega geti hann verið á kanti, og um þá stöðu eru margir að slást í LFC nú þegar. Ég sé þennan strák ekki sem kantmann í 4-4-2.

* Sex leikmenn unglingaliðs Liverpool FC eru komnir áfram með enska landsliðinu á HM U-17 í Mexíkó. Þegar Borell og Segura komu til starfa hjá LFC voru 5 leikmenn að spila með unglingalandsliðum, í dag eru þeir 25. Liverpool er það lið sem hefur flesta leikmenn í þessum U-17 hópi, þau nöfn sem mest er talað um eru Raheem Sterling á vængnum og strikerinn Adam Morgan.

* Stewart Downing þarf að biðja um sölu frá Aston Villa ef hann vill fara til Liverpool. Sumir tala um að með því þá gefi hann eftir upphæð þá sem hann ætti að fá við félagaskipti og þá muni Aston Villa samþykkja 18 milljón punda tilboð. Gerard Houllier skilur vel áhuga liða á þeim ágæta dreng.

* Slúðurmiðlar hafa talað um Aaron Lennon til Liverpool, ég held reyndar að þetta séu bara viðbrögð við því að Redknapp er búinn að lýsa því að hann þurfi að selja áður en hann fær að kaupa.

Semsagt, enn bíðum við staðfestinga á málum, en þó eru drengirnir Dalglish, Clarke og Comolli komnir til starfa eftir sumarfrí og viðbúið að eitthvað fari að gerast…

Myndin af Raul Meireles er sótt á snilldarsíðuna www.liverpool.is

Adam og Downing á leiðinni

Posted on by

Samkvæmt nýjustu grein Tony Evans hjá The Times (sem hægt er að lesa hér á RAWK, þarf áskrift til að lesa Times) er Liverpool nálægt því að klára kaupin á bæði Charlie Adam frá Blackpool og Stewart Downing frá Aston Villa.

Evans, sem ásamt Tony Barrett hjá The Times er sennilega áreiðanlegasti blaðamaðurinn þegar kemur að Liverpool, segir í grein sinni að Adam muni líklega kosta 8m punda upphaflega með 2m í viðbótarklausum á meðan talið sé líklegt að Downing muni kosta í kringum 16m punda. Við erum því að fá tvo vinstrifótarmenn á miðjuna og vænginn hjá okkur fyrir um 24-26m punda samtals.

Ég er hrifinn af þessum kaupum, ef af verður. Ég merki þetta slúður þar sem þetta eru bara blaðafréttir (hinir miðlarnir eru samt allir að segja sömu sögu: Daily Mail, Mirror (Downing), Mirror (Adam), Sky, Blackpool Gazette) en þegar Tony Evans er annars vegar getum við trúað því nokkuð áhyggjulaus. Þessi tvennu leikmannakaup eru greinilega í vinnslu.

Við erum hér að fá, eins og ég sagði áður, tvo vinstrifótarmenn á miðjuna okkar. Adam er playmaker sem getur opnað þéttar varnir með góðum sendingum auk þess að vera frábær skytta og stórhættulegur spyrnumaður í föstum leikatriðum. Hann er líka leiðtogi, eins og veturinn með fyrirliðaband Blackpool-liðsins sýndi. Ef hann getur sýnt okkur svipaða frammistöðu fyrir Liverpool og hann sýndi tvisvar gegn Liverpool síðasta vetur á hann eftir að slá í gegn á Anfield.

Downing er líka mjög áhugaverður kostur. Fyrir tveimur árum, þegar Middlesbrough féllu og Liverpool var í öðru sæti deildarinnar vildi ég ekki sjá hann þegar við vorum orðaðir. Hann fór til Aston Villa og mér fannst hann ofmetinn. Hann hefur hins vegar spilað talsvert betur með Villa, og verið stöðugt betri en ekki ójafn eins og fyrir Boro, og eiginlega hrifið mig meira og meira. Hann er þessi öskufljóti kantari sem vill keyra upp að endalínunni og finna svo ennið á mönnum eins og Andy Carroll. Á pappírnum ættu þeir tveir sérstaklega að smellpassa saman en við verðum að sjá hvernig Downing gengur að spila undir pressunni sem fylgir rauðu treyjunni. Hann var ekki beint að höndla pressuna með enska landsliðinu síðustu árin, vonandi er hann reiðubúinn í þennan slag.

Það verður í öllu falli að teljast jákvætt, ef þetta klárast fyrir mánaðarmótin, ef Comolli og Dalglish geta farið út á Evrópumarkaðinn frá og með 1. júlí með Henderson, Adam og Downing nú þegar í farteskinu. Ég sé ekki hvernig við getum kvartað yfir því. Við þurfum meira í sumar en þá þrjá, en þetta er ágætis byrjun.

Er Wickham næstur?

Posted on by

Echo greina frá því í dag að Liverpool sé líklegt til að reyna að klára kaupin á Connor Wickham á næstu dögum. Sunderland hafa víst gert tilboð í Wickham uppá einhverjar 8 milljónir punda.

Wickham er samt Liverpool stuðingsmaður og flestir virðast telja að hann sé ákveðinn í að koma til Liverpool. Ben Smith hjá Times orðaði þetta ágætlega á Twitter:

#LFC’s chase for Wickham is not a ‘battle’. Player wants to Anfield move, Dalglish very keen. #SAFC know this

Semsagt, Wickham heldur með Liverpool og hann vill koma til okkar. Sunderland geta gleymt þessu.

Hérna er ágætis myndband með mörkum Wickham og Fernando Torres. Sum þeirra eru nokkuð lík.

Wickham hljómar mjög spennandi. Ef við kaupum hann þá höfum við á síðasta rúma hálfa ári keypt sennilega 3 af 4 heitustu ensku leikmönnunum, sem hafa skipt um lið á þessum tíma. Og þeim fjórða misstum við af til ensku meistaranna. Það er greinilegt hver stefna FSG er og ég er mjög hlynntur henni.

Kop.is Podcast #2

Posted on by

Dömur mínar og herrar, hér er þáttur númer tvö af podcasti Liverpool Bloggsins!

KOP.is podcast – 2.þáttur

Þið getið hlustað á þáttinn beint með því að nota spilarann hér fyrir ofan en þið getið líka smellt á DOWNLOAD-takkann og sótt mp3-skrána ykkur til hæginda. Einnig er hægt að gerast áskrifandi að þættinum á iTunes með því að setja þennan link, í RSS-áskrift undir podcast-lið iTunes.

Ég (Kristján Atli) stýri þættinum sem fyrr og með mér að þessu sinni eru Einar Örn, Babú og Maggi en SSteinn var fjarri góðu gamni.

Í þessum þætti ræðum við meðal annars úrslitaleik Meistaradeildarinnar, sumarið það sem af er hjá helstu keppinautum Liverpool í Úrvalsdeildinni sem og Liverpool-liðinu sjálfu. Við lítum nánar á kaupin á Jordan Henderson, ræðum um valið á milli Charlie Adam og Alberto Aquilani og reynum að fá einhvern botn í slúðrið þessa dagana. Þá ræðum við einnig drykkju Andy Carroll, mikilvægi Luis Suarez og Steven Gerrard og margt, margt fleira.

Næsti þáttur verður svo að u.þ.b. mánuði liðnum.

Play

Podcast: Play in new window | Download