Liverpool hafa tilkynnt það á opinberu síðunni að Aston Villa hafa tekið tilboði Liverpool í Stewart Downing. Ekkert er sagt til um upphæð tilboðsins. Við munum uppfæra þessa færslu þegar að meiri upplýsingar berast.
Mér líst ótrúlega vel á þessi kaup!
Uppfært (EÖE) Sky halda því fram að tilboð Liverpool hafi verið um 20 milljónir punda. Arsenal buðu víst líka í Downing, en leikmaðurinn hafði gefið það skýrt í skyn að hann vildi fara til Liverpool.
Fyrsti æfingaleikur sumarsins hefst núna kl. 12:00 og verður sýndur í beinni á LFC.tv fyrir áhugasama.
Byrjunarliðið er þetta:
Gulacsi
Flanagan – Carragher – Kelly – Wilson
Shelvey – Spearing – Poulsen – Cole
Pacheco – Ngog
BEKKUR: Jones, Hansen, Agger, Kyrgiakos, Robinson, Wisdom, Adam, Aquilani, Coady, Kuyt, Carroll.
Varamennirnir koma eflaust allir inn í seinni hálfleiknum nema kannski Hansen/Jones, þar sem báðir eru markverðir.
Þetta verður áhugavert.
Einnig: fyrir þá sem hafa ekki enn séð fréttirnar er búið að selja Paul Konchesky til Leicester City. Eflaust ágætis strákur en aldrei nógu góður fyrir Liverpool og það besta fyrir báða aðila að hann færi sem fyrst.
UPPFÆRT (KAR): Leiknum er lokið, Liverpool sigraði 4-3 í ágætis leik. Poulsen og Ngog skoruðu í fyrri hálfleik en heimamenn minnkuðu muninn fyrir hlé. Varamennirnir komu allir inn í hálfleik og þeir Conor Coady og Carroll skoruðu í seinni hálfleik áður en heimamennirnir skoruðu tvö mörk undir blálokin.
Lítið meira um þetta að segja, svo sem. Menn að spila sig í gang. Joe Cole fannst mér virka mjög fitt og frískur, kannski er hann búinn að taka sig í smá naflaskoðun í sumar, og svo fannst mér Shelvey, Adam og Coady spila ágætlega. Kuyt, Maxi og Aquilani svona manna ryðgaðastir.
Næsti leikur um helgina. Sjáum þá vonandi líka Pepe Reina og Martin Skrtel sem voru ekki í hópnum í dag.
The Guardian segja frá því í kvöld að Liverpool sé að takast að selja þá Paul Konchesky og Milan Jovanovic.
Samkvæmt fréttinni fer Konchesky til Leicester fyrir um 1,5 milljón punda (uppfært EÖE: Salan er staðfest). Nokkur lið hafi svo áhuga á Jovanovic, þar á meðal Lille og Anderlecht. Ben Smith blaðamaður Times segir á Twitter að Jovanovic muni fara ókeypis frá Liverpool.
Þetta er fínt mál. Þessir leikmenn eru að sögn á háum launum og eiga lítinn sjens á að komast í Liverpool liðið. Ben Smith segir svo líka á Twitter að hann telji líklegt að mál Stewart Downing muni þróast í rétta átt (það er að hann komi til Liverpool) seinna í þessari viku.
Það er mánudagur og lítið að frétta. Liðið lenti í Guangdong í Kína fyrr í dag og það er hægt að sjá alls konar myndir og vídjó frá ferðinni á LFC.tv. Mæli með því. Þá segir franska blaðið L’équipe frá því í dag að Hamburg SV sé að reyna að kaupa Joe Cole á 10.6m Evra, sem er án efa fyndnasta frétt ársins í boltanum.
Ræðið það sem ykkur sýnist. Að lokum, þá má ég til með að deila þessu með ykkur:
Þetta eru forráðamenn Napoli að afhjúpa nýjasta leikmann liðsins á fréttamannafundi í morgun. Það vissi enginn hver leikmaðurinn var fyrr en hann tók af sér ljónagrímuna og þá kom í ljós að þetta var Gökhan Inler frá Udinese.
Stórbrotið. Framvegis heimta ég að ný leikmannakaup Liverpool komi á blaðamannafundi í fuglabúningum og láti menn giska hver leikmaðurinn er.
Kominn tími á allskonar spjall, byggt á yfirferð um miðlaheima í morgunsárið.
Á opinberu síðunni útskýrir Comolli fyrir okkur hvernig hann hyggst skoða efnilegustu kínversku leikmennina í ferðinni, segir m.a. að við höfum boðið 2 efnilegum U-17 leikmönnum þaðan til æfinga síðsumars. Hann bendir líka á að við höfðum njósnara á HM U-17 nýlega og erum að senda fleiri á HM U-20, alltaf að leita að nýjum efnilegum mönnum. Fínt mál.
Töluverð umræða er komin í gang varðandi nýjan leikvang. Í vetur virtist allt stefna í endurgerð Anfield, en nú virðist eitthvað vera að breytast í þeim efnunum, hér er vísun í frétt í Liverpool Echo þar sem John W. Henry talar um það að vel gæti þurft að byggja nýjan völl til að ná langtímamarkmiðum í fjármögnun félagsins, enda ákvað félagið að framlengja leigurétti sínum í Stanley Park fram í september, en þá má telja líklegt að endanleg ákvörðun verði tekin.
Twitter-heimar greina helst frá því að Raul Meireles fari ekki með til Asíu, en það hefur hvergi komið fram annars staðar. Eina sem er klárt í því er að Gerrard og Henderson verða á Melwood, en þetta ætti allt að skýrast seinnipartinn í dag. Annað slúður er að Aston Villa séu búnir að hækka verðmiðann á Downing upp í 25 milljónir í kjölfar fundar hans með McLeish í gær. Það er auðvitað kjánalegt verð, svo að ég gæti alveg séð menn á Anfield fara að horfa annað. Hins vegar er ljóst að á meðan Asíuferðinni stendur verður minna bitastæt að frétta í þessum málum, end Dalglish, Comolli og aðrir lykilmenn í leikmannamálum uppteknir í öðru!
Svo má auðvitað spjalla um ýmislegt annað í opnum þræði, t.d. þá ótrúlegu staðreynd að nýji þriðji búningurinn okkar, með BLÁU í sér, er orðinn sá varabúningur sem mest hefur verið forpantaður (pre-ordered) í sögu félagsins. Það finnst mér skrýtið, en segir kannski bara meira um að markaðsdeildin hafi náð að höfða til fleiri aðdáenda um allan heim. Ég eiginlega neita að trúa því að fólk sé bara almennt ánægt með bláan lit í búningi liðsins okkar!
En – spjall, spjall!
Myndin er tekin af www.anfieldroad.com
LFC.tv staðfestir í kvöld að Charlie Adam hefur skrifað undir samning við félagið og er því núna opinberlega orðinn leikmaður Liverpool. Velkominn til Liverpool, Charlie!
Í fyrsta viðtali sínu fyrir LFC.tv segir Adam svo sjálfur allt það rétta; hann er feginn að vera loksins kominn til félagsins (munið, hann fór fram á sölu í janúar til að geta komist þá en hefur þurft að bíða í hálft ár til viðbótar) og fer mjög fögrum orðum um Dalglish. Það þótti mörgum skrýtið í gær þegar fréttir bárust af því að Dalglish sótti Adam sjálfur á bíl sínum og keyrði hann á Melwood til viðræðna og læknisskoðunar, en ef menn hafa fylgst með málinu ætti það ekki að koma á óvart.
Stór hluti af því af hverju Adam kom ekki í janúar er vegna þess að Comolli sá þá um að bjóða í Adam og það fór eitthvað fyrir brjóstið á Karl Oyston, stjórnarformanni Blackpool, að fyrsta tilboðið var í lægri kantinum. Hann og Ian Holloway knattspyrnustjóri lokuðu í kjölfarið á Comolli og neituðu að ræða frekar við hann, virtust hafa misst allt álit á honum. Auðvitað var þetta þeirra leið til að halda Adam lengur eða keyra upp verðið, Comolli gerði að mínu mati ekkert af sér (það er venjan að bjóða lágt í fyrsta tilboði og semja svo út frá því) en Oyston er sérkennilegur tappi sem hefur valdið okkur tómum erfiðleikum síðan.
Þess vegna kom ekkert á óvart í vor þegar slúðrið fór að segja að Dalglish væri að einbeita sér persónulega að þessum leikmannakaupum. Hann hefur sennilega séð um mikið af skilaboðum Liverpool til Blackpool og tekið virkan þátt í samningum við Oyston, það kæmi mér jafnvel ekkert á óvart ef Comolli hafi ekki komið nærri þessum kaupum nú í sumar.
Hvað um það. Dalglish landaði á endanum sínum manni sem hafði verið efstur á óskalista hans síðan hann tók við liðinu í byrjun árs. Við getum ekki annað en glaðst yfir því.
Eitt finnst mér nauðsynlegt að ræða og það er þessi umræða um líkamsástand Adam. Menn sáu myndir af honum berum að ofan í læknisskoðun í gær og það er satt að hann er ekkert sérstaklega skorinn en það er ekki eins og hann sé feitur og stuttur eins og sumir hafa verið að gefa til kynna. Hann er t.a.m. 185 cm á hæð – tveimur sentímetrum hærri en Steven nokkur Gerrard – og hann virkar þykkur af því að hann er þannig vaxinn (önnur dæmi: Wayne Rooney og Xavi Hernandez, sem virka ekki beint mjóir á velli en verða seint sagðir vera í lélegu formi). Ég hef engar áhyggjur af Adam sem hefur verið að æfa með meistara í hnefaleikum í sumar til að tryggja að hann sé klár í þessa nýju áskorun!
Comolli ræðir um Adam á LFC.tv og kemur einmitt inná líkamsástand hans:
“If you look at him physically, he’s very impressive. He’s got the power, the strength, the stamina, and then technically he’s got an absolutely fantastic left foot. We were looking with Kenny at data on how well Blackpool did at set pieces last season. If you look at them, they are at the very top of the Premier League. That’s another reason to bring in a player like this – he’s going to bring a lot to us in the run of play but also set plays.”
Við vitum að Adam er með frábæran vinstrifót og mun bæta föstu leikatriðin til muna en hann var ekki keyptur sem einhver stytta inná völlinn. Honum er vafalítið ætlað stærra hlutverk en það og ég geri fastlega ráð fyrir að hann verði strax frá upphafi fyrsti kostur á miðjuna ásamt Lucas Leiva og Gerrard.
Þegar okkar menn töpuðu seinni leik sínum gegn Blackpool í vetur skrifaði ég eftirfarandi orð um Adam í leikskýrslu minni:
„Staðan í hálfleik var 1-1 en þótt síðari hálfleikur hæfist á sama opna, jafna spilinu fór fljótlega að koma í ljós hvernig þetta myndi enda. Hjá Blackpool er nefnilega leikmaður sem heitir Charlie Adam og hann átti í síðari hálfleik í kvöld frammistöðu sem minnti mig hreinlega á Xabi Alonso upp á sitt besta. Hann bara tók völdin í leiknum, stýrði spili sinna manna svo að þeir Poulsen, Meireles og Lucas voru að elta skuggann á honum allan seinni hálfleikinn.“
Ég lauk svo leikskýrslunni á eftirfarandi beiðni:
„Einn Charlie Adam á diskinn minn, takk.
Damien, Kenneth, ég þakka bara fyrir mig.
Auðvitað er alltaf ákveðin áhætta fólgin í að kaupa leikmann en mig grunar að Adam – sem hefur ekki beint verið að æsa stuðningsmenn Liverpool af spenningi síðustu vikurnar – eigi eftir að koma flestum ykkar þægilega á óvart. Hann hefur svo margt sem okkur vantar – örfættur miðjumaður, góður spyrnumaður, fjölhæfur – en auk þess er þetta maður sem er vanur að bera heilt lið á herðum sér og ætti því að vera með ágætis persónuleika í að rísa upp og gangast við þá ábyrgð sem fylgir því að spila fyrir stórlið.
Ég hlakka til að sjá hann í rauðu treyjunni. Mig grunar, hverja aðra sem liðið kaupir í sumar, að þetta verði þegar upp er staðið talin bestu kaup gluggans.
Á opinberri heimasíðu Liverpool birtist áðan stutt frétt sem segir það sem við höfum beðið eftir frá í janúar.
Blackpool hefur nú samþykkt tilboð Liverpool í Charlie Adam sem er þessa stundina á leið í læknisskoðun á Melwood.
Ekkert kemur fram annað en um hrein kaup hafi verið að ræða og án þess að leikmaður / leikmenn hafi farið hina leiðina, en meira af því síðar.
Á myndum af æfingu Liverpool í morgun má meðal annarra sjá Emiliano Insua hlaupandi um í æfingagallanum svo það á allavega að líta á strák!
Svona fyrir samsæriskenningamenn þá má sjá að Aquilani hleypur um merktur númeri 36 og Insua er númer 29 – sumir vilja meina að þar með sé ljóst að þeir séu ekki líklegir áfram. Ef svo er þá má líka sjá að Agger er númer 30…
En aðalfréttin er auðvitað sú að líklega er lengsti leikmannaeltingaleikur í sögu félagsins okkar að klárast, sennilega ekki síðar en í fyrramálið sjáum við nýjasta leikmanninn okkar í rauðum búning og hann fer með til Asíu. Vonum það allavega en geymum að bjóða hann velkominn þangað til að allt er klárt!
Aston Villa hafa hafnað fyrsta boði Liverpool í Stewart Downing. Það var uppá 15 milljónir punda.
Annars er umræðan opin um leikmannakaup. Vinsamlegast virðið það að snúa ekki öllum umræðuþráðum uppí slúður-umræðu. En í þessum þræði er umræðan opin.
Rafa Benitez er farinn en í mínum huga er ennþá stór skuggi hans yfir vötnum á Anfield.
Eða kannski frekar í Kirkby, þar sem Akademían okkar er til húsa. Rakst á þýtt blogg Martins Parnau, þar sem hann hefur verið að ræða við yfirhugsuð yngriliðastarfsins, Pep Segura. Snilldargrein sem ég skora á okkur öll að lesa ef við viljum spá í hvað menn ætla sér á vettvangi yngri leikmanna.
Margt forvitnilegt þarna, kannski helst að verið er að vinna með hugmyndafræðina út frá 4-2-3-1 með sóknarþenkjandi uppleggi, arfur frá Rafa Benitez. Segura sjálfur hefði viljað stilla upp 4-3-3 en þar sem enski boltinn er öðurvísi uppbyggður en sá spænski varð þetta lendingin.
Einnig er sagt frá því að hver einasta æfing og leikur akademíunnar er tekin upp og klúbburinn fékk háskóla í Liverpool til að greina æfingarnar með það að markmiði að sjá hvort þjálfararnir hafa skilað þeirri vinnu sem af þeim er ætlast og kennt leikmönnum það sem lagt er upp með. Fagmennska fram í fingurgóm!
Í pistlinum er farið yfir vinnu félagsins með leikmenn frá 8 til 20 ára aldurs með það að leiðarljósi að skila reglulega upp leikmönnum í aðalliðið – mikið vona ég nú að Segura og félagar hans í Kirkby nái þeim árangri sem allra fyrst.
Endilega lesa!
LFC.tv staðfestir í dag: Steven Gerrard fyrirliði fer ekki með liðinu til Asíu í næstu viku.
Að vissu leyti er þetta eðlilegt og sniðug ákvörðun. Gerrard er að jafna sig eftir uppskurðinn sem batt enda á tímabil hans í mars sl. og því skiljanlegt að hann verði eftir heima til að einbeita sér að því að jafna sig. Hins vegar er þetta líka þörf áminning að við getum ekki treyst á Súpermann lengur. Gerrard er nýorðinn 31s árs gamall og ekki jafn sprækur og hann var fyrir 4-5 árum.
Það verður að byggja upp í kringum hann og nota hann sem plús ofan á það sem er fyrir, í stað þess að leggja of mikla ábyrgð á hans axlir og panikka svo ef/þegar hann meiðist eitthvað. Þess vegna grunar mig að við höfum byrjað sumarið á að kaupa Henderson og séum líka að reyna við Adam, af því að þá er breiddin á miðjunni áfram feykigóð þótt Gerrard eða Spearing, sem hafa meiðst mest af miðjumönnunum okkar sl. ár, missi eitthvað úr.
Breiddin skiptir máli. Fyrirliðinn minnir okkur á það. Vonandi þýðir þetta að hann verður 100% klár og óþreyttur í fyrsta deildarleik í ágúst, þótt vissulega sé svekkjandi fyrir aðdáendur í austurlöndum fjær að fá ekki að berja Súpermann augum.
Einnig: Gael Clichy, sem við buðum í, er farinn annað. Ég ætla ekki að hafa áhyggjur, ég ætla ekki að hafa áhyggjur, ég ætla ekki að hafa áhyggjur…