Þolinmæði

Posted on by

Vonbrigði.

Auðvitað voru þetta vonbrigði. Nýir eigendur hafa eytt 100m+ punda í liðið á árinu 2011 (brúttó), Kenny Dalglish er aftur við stjórnvölinn og liðið átti heimaleik í fyrstu umferð gegn mikið breyttu liði Sunderland, sem við vorum að enda við að taka einn besta leikmanninn frá. Innst inni vissum við öll vel að það væru allar líkur á að þetta yrði erfiður leikur, og fyrir því voru ýmsar ástæður. En eins og góðum Liverpool-aðdáendum sæmir hunsuðum við þessar ástæður og létum telja okkur á að liðið myndi alveg örugglega kafsigla mótherjana í þessum fyrsta leik.

Það fór þó ekki svo. Niðurstaðan var 1-1 jafntefli og auk vonbrigðanna sem fylgdu í kjölfarið bar nokkuð mikið á hnéspörkum í allar áttir, að mínu mati. Dalglish og Comolli keyptu ekki nógu góða leikmenn í sumar, John Flanagan er ekkert efnilegur eftir allt saman, hver sér eiginlega um fitness-prógrammið á Melwood, og svo framvegis.

Það sem fór samt framhjá flestum, og er vert að minna á í kjölfar þessa leiks, er að byrjunarliðið á laugardaginn innihélt hvorki fleiri né færri en sjö leikmenn sem voru ekki í liðinu um síðustu áramót, þegar Dalglish tók við, og þar af voru fjórir leikmenn keyptir til liðsins í sumar og því allir að spila sinn fyrsta alvöru leik saman. Á miðjunni og í sókn léku sex leikmenn en af þeim var bara Lucas Leiva hjá liðinu um síðustu áramót, allt hitt eru nýir leikmenn, og í vörninni voru þeir Reina, Carragher og Agger með nýliðann Flanagan (sem er enn bara 18 ára) og hinn nýkeypta José Enrique sitt hvorum megin við sig.

Það gefur augaleið að þetta lið þarf tíma til að spila sig saman. Menn geta frekar talað um ábyrgð Dalglish en leikmannanna á laugardaginn, að mínu mati. Átti hann að velja Flanagan fram yfir Kelly í hægri bakverðinum? Átti hann að stilla svona mörgum „nýliðum“ saman í fyrsta byrjunarliði (til samanburðar keypti Steve Bruce tíu leikmenn í sumar en en hafði viljandi bara tvo þeirra í fyrsta byrjunarliði, sem skilaði greinilega árangri fyrir þá)? Átti hann að hafa tvo miðjumenn okkar gegn þremur miðjumönnum Sunderland? Átti hann að skipta inná fyrr? Dalglish getur gert mistök eins og aðrir og hann hefur breiðar herðar – horfið á hann ef þið þurfið endilega að fá útrás fyrir jafntefli í fyrsta leik.

Hvað nýju leikmennina varðar hef ég ekki áhyggjur. Mann grunaði þetta fyrir leik og það kom á daginn – þessir strákar þurfa nokkra leiki til að slípa sig til. Því miður er næsti leikur gífurlega erfiður útileikur gegn Arsenal og við þurfum því helst að sjá þá hrökkva ótrúlega snemma í samtaka gíra en jafnvel þótt illa fari í þeim leik mun ég ekki panikka. Ég hef trú á þessu liði, þótt það kunni að taka smá tíma að stilla strengina (ég á til fleiri klisjur ef þið þurfið þær, en þessar hljóta að nægja í bili).

Ég spáði Liverpool 4. sæti í Úrvalsdeildinni í vetur og byggði það mat sérstaklega á því að við myndum þurfa smá tíma til að sjá liðið spila af fullri getu og þá væri titilbarátta úr sögunni. Þetta lið er nógu gott til að klára Meistaradeildarsæti og meira til en það mun kosta okkur að vera með nánast nýtt lið í upphafi móts. Þannig að endilega, aðlagið væntingarnar fyrir næstu 2-3 leiki (þ.á.m. Arsenal og Stoke á útivöllum).

Þetta lið verður dúndurgott, en það mun taka tíma. Ég hef trú á að þetta lið skili Meistaradeildarsæti, og svo verði hægt að byggja á því með 1-3 toppkaupum næsta sumar (frekar en þeim 7 sem hafa komið í ár) til að fara skrefi nær titilbaráttu. En fyrst þarf liðið að samstilla sig og það tekur alltaf nokkra leiki.

Í öðrum fréttum: Graham Poll er sammála okkur Púllurum, þetta átti að vera klárt rautt spjald á Kieran Richardson á laugardag. Poll var ekki alltaf besti dómarinn sjálfur, en ég sakna hans nóg til að tárast þegar ég horfi á Phil Dowd dæma.

Christian Poulsen virðist loks hafa fengið skilaboðin sem allir aðrir lásu fyrir mörgum mánuðum: hann vill komast frá Liverpool í ágúst því hann skilur (loks) að hann mun ekki fá mínútu í spilatíma í vetur. Vonandi getur hann fundið sér klúbb sem fyrst, það er besta lausnin fyrir alla aðila.

Daniel Ayala hefur verið seldur til Norwich City. Ekki lánaður, seldur. Þetta eru skrýtin endalok ferilsins hjá Liverpool fyrir þennan unga miðvörð sem Rafa Benítez var farinn að láta spila í byrjunarliði undir vorið 2010 og sagði við Paul Tomkins haustið 2009 að yrði örugglega stórt númer í framtíðinni. Ekki virðist Dalglish hafa verið á sama máli og nú hefur Ayala verið seldur. Ég vona að hann standi sig vel hjá Norwich, þetta gæti verið frábær díll fyrir þá (og hann) ef hann réttir úr kútnum þar.

Og að lokum, verst varðveitta leyndarmál sumarsins er komið í ljós: Cesc Fabregas er farinn til Barcelona. Talið er næsta víst að Arsenal selji Samir Nasri líka á næstu dögum til Man City. Framundan er gífurlega athyglisverð vika hjá Arsene Wenger og Arsenal: leikur gegn sterku liði Udinese á þriðjudag í forkeppni Meistaradeildar, ótrúlegur þrýstingur á að kaupa leikmenn í kjölfar Cesc- (og Nasri?) -sölunnar og í hádeginu á laugardag, heimaleikur gegn okkar mönnum í Liverpool. Við munum læra ansi mikið um bæði þessi lið, sem flestir virðast spá einvígi um 4. sætið í Úrvalsdeildinni, á næstu viku.

Liverpool 1 – Sunderland 1

Posted on by

Niðurstaðan í fyrsta leik þessa tímabils er mikil vonbrigði. Liverpool liðið lék frábærlega í fyrri hálfleik og ömurlega í þeim seinni og niðurstaðan var 1-1 jafntefli á Anfield.

Dalglish stillti þessu upp svona:

Reina

Flanagan – Carra – Agger – Enrique

Lucas- Adam
Henderson – Suarez – Downing
Carroll


Á bekknum: Doni, Meireles, Kuyt, Spearing, Ngog, Kelly, Robinson

Liverpool liðið byrjaði frábærlega. Allan fyrri hálfleik var bara eitt lið á vellinum. Liverpool var með boltann 57% og hefði auðveldlega geta verið 3 eða 4-0 yfir í hálfleik.

Strax á fimmtu mínútu náði Luis Suarez að næla í boltann frá Kieran Richardson (sem var að hreinsa boltann á miðjulínunni). Suarez keyrði í átt að markinu, var á leiðinni framhjá markverði Sunderland þegar að Richardson klippti hann niður. Phil Dowd, afleitur dómari dagsins, dæmdi strax vítaspyrnu, en gaf Richardson bara gult spjald. Það fannst mér að mörgu leyti furðulegt – Dowd virtist gefa í skyn að Suarez væri á leið frá markinu, en það var bara vegna þess að Suarez var að sóla markvörðinn. Það má vel vera að þetta sé samkvæmt regubókinni, en mér fannst þetta furðulegur dómur. Allavegana Suarez tók sjálfur vítið og skaut boltanum lengst uppí stúku.

Aðeins nokkrum mínútum síðar var Luis Suarez búinn að bæta fyrir sig. Charlie Adam tók aukaspyrnu frá hægri kantinum, gaf gríðarlega hættalega sendingu fyrir, sem að Suarez nikkaði aðeins í og í markið. 1-0 – glæsileg samvinna hjá Adam og Suarez.

Á 20 mínútu náði svo Andy Carroll að skora, en það mark var dæmt af vegna þess að Carroll andaði á litla bróðir Rio Ferdinand, sem að fleygði sér í jörðina og aukaspyrna dæmd á Carroll. Varnarmenn munu eflaust reyna þetta oft í vetur og Carroll verður að passa sig á því að fá ekki dæmdar of margar aukaspyrnur á sig. Að mínu mati var þetta algjört bull.

Liverpool menn héldu svo áfram að sækja. Charlie Adam átti gott langskot og Stewart Downing var næstum því búinn að skora stórkostlegt mark þegar hann tók boltann frá eigin vallarhelming, keyrði upp og átti þrumuskot í slána. Staðan í hálfleik var því 1-0 fyrir Liverpool. Ég var smá órólegur yfir því að við næðum bara að skora eitt mark, en mér datt ekki annað í hug en að Liverpool myndi klára þennan leik – þvílíkir voru yfirburðirnir.

Seinni hálfleikurinn var hins vegar hörmung frá fyrstu sekúndu. Liverpool liðið hætti að spila og miðjan hjá okkur virtist algjörlega hverfa í baráttunni við Sunderland menn, sem spiluðu miklu betur. Liverpool missti boltann trekk í trekk og Phil Dowd gerði svo leikinn nánast óbærilega leiðinlegan með því að flauta endalaust á aukaspyrnur.

Það var bara spurning hvenær þetta myndi leiða til slæmra hluta og það kom loks á 57. mínútu þegar að það kom hár bolti fyrir mark Liverpool. Flanagan (sem átti mjög slæman dag) virtist enga hugmynd hafa um að Sebastian Larsson væri þar á markteignum. Larsson tók boltann á lofti og skoraði framhjá Reina.

Þarna var hins vegar nóg eftir af leiknum og ég hélt að Liverpool myndu nú vakna við þetta. Dalglish gerði nokkrar breytingar. Kuyt kom inná fyrir Henderson og svo Meireles inn fyrir Suarez (sem hvarf í seinni hálfleik). En þær skiptingar breyttu engi. Miðjan var ekki til staðar og sóknirnar urðu afskaplega kraftlausar og okkar menn ógnuðu aldrei marki Sunderland að viti. Mikil vonbrigði eftir frábæran fyrri hálfleik.

Maður leiksins: Það er hálf erfitt að velja einhvern í dag. Að mínu mati var enginn sem stóð uppúr allan leikinn – menn voru góðir í mesta lagi í 30-40 mínútur. Í vörninni komst Enrique nokkuð skammlaust frá sínu, en Flanagan átti verulega slæman leik og auk þess að eiga stóran hlut í Sunderland markinu gaf hann boltann nokkrum sinnum á glórulausan hátt frá sér. Á miðjunni var Lucas að mínu mati mjög slappur. Adam var betri og aukaspyrnan hans gaf okkur markið, en þeir virtust ekki ná nægilega vel saman þegar að leið á leikinn. Henderson og Downing áttu ágætis spretti í fyrri hálfleik, en hurfu í þeim seinni. Frammi var svo Suarez frábær til að byrja með en sprakk. Carroll gerði að mínu mati sæmilega úr því sem hann fékk, sem var ekki nógu mikið.

Fyrsti leikur tímabilsins búinn og niðurstaðan mikil vonbrigði. Við vorum ekki að fara að vinna titilinn í hálfleik og slæmur seinni hálfleikur þýðir ekki að við verðum í botnbaráttu. Þessi leikur sýnir að þetta lið þarf einhvern tíma til að spila sig saman. Það voru fjórir nýliðar í liðinu í dag (Enrique, Henderson, Adam og Downing) auk Suarez og Carroll, sem komu um áramótin og Flanagan. Liðið spilaði á tímum frábærlega, en það gat ekki aðlagast þegar að Sunderland byrjuðu að taka almennilega á móti þeim og það var einsog pressan dytti algjörlega niður í seinni hálfleik.

Ég sagði fyrir mót að við þyrftum 4 stig úr fyrstu 2 leikjunum til þess að ég yrði verulega sáttur við byrjunina. Það byrjar ekki vel. Menn hafa eina viku til þess að fara yfir þetta og mæta svo á Emirates í næstu viku og bæta upp fyrir þessa hörmung í seinni hálfleiknum.

Liðið gegn Sunderland – Suarez byrjar!

Posted on by

Jæja, þá er komið að því! Fyrsti leikur tímabilsins og ég er um það bil að missa mig af spenningi.

Sunderland mæta á Anfield og Dalglish stillir þessu svona upp:

Reina

Flanagan – Carra – Agger – Enrique

Lucas- Adam
Henderson – Suarez – Downing

Carroll


Á bekknum: Doni, Meireles, Kuyt, Spearing, Ngog, Kelly, Robinson

Semsagt Suarez mættur og Henderson spilar gegn sínum gömlu félögum. Aquilani og Cole ekki í hóp. Kuyt og Meireles á bekknun.

Ég spáði í podcastinu 2-0 sigri okkar manna og ég stend við það.

Koma svo!

Sunderland á laugardag – mótið byrjar

Posted on by

Du du du du duruddududu du ru du dududu – og svo framvegis.

Í dag er 12.ágúst 2011 og það þýðir bara eitt. Á morgun er fyrsti alvöruleikurinn í ensku Úrvalsdeildinni leiktímabilið 2011 – 2012 hjá okkar elskaða liði, Liverpool FC.

Áður en lengra er haldið er ekki úr vegi að benda öllum aðdáendum okkar á að skipt hefur verið um heimavöll á höfuðborgarsvæðinu. Við höfum nú þakkað fyrir okkur á Players og Liverpool-klúbburinn á Íslandi hefur nú fært heimavöllinn yfir á Górilluna Stórhöfða 17. Endilega smella á linkinn hér að framan til að kynna ykkur þá þjónustu sem þar er í boði.

En aftur að leiknum sjálfum.

Eftir ömurlegt gengi lengst af síðasta vetrar þar sem við flest biðum spenntust eftir því að mótið kláraðist og betri tíð með blóm í haga myndi birtast á nýju tímabili, sem jú núna er að hefjast.

Sumarið hefur verið bara nokkuð viðburðaríkt. Margir leikmanna okkar fengu langþráð sumarfrí, þar sem ekki voru úrslitakeppnir EM og HM í gangi, en þó voru það tveir sem héldu í sína álfukeppni, Copa America, og komu frekar seint til æfinga. Þegar þeir voru mættir höfðu nokkrir nýir leikmenn bæst í hópinn, og væntanlega mun sá nýjasti skrifa undir í dag, ef hann er bara ekki þegar búinn að því. Velkominn José Enrique.

En nóg af sumrinu, við höfum öll velt okkur upp úr æfingaleikjum og vangaveltum um kaup og sölur, snúum okkur nú að alvöru málsins, brauðinu og smjörinu, því að safna stigum í deildakeppni og pælingum hvernig þessi leikur mun ganga fyrir sig.

Byrjunarliðið

Eins og fram kom í podcastinu okkar frá því á þriðjudag teljum við ansi margt liggja á hreinu í uppstillingu liðsins. Þó að Enrique bætist við held ég að hann muni ekki vera í leikmannahóp dagsins þar sem hann hefur ekki fengið almennilega æfingu hjá klúbbnum og því vörnin að mestu klár, miðjuparið þar fyrir framan líka og framlínan að mestu.

Stóra spurningin er hver verður settur fyrir aftan Carroll, sem second striker í 4-2-3-1 kerfi og tilbúinn til að sækja eins og senter í 4-4-2 kerfi. Ég tel þá keppni standa milli Dirk Kuyt og Luis Suarez, sem ég held að sé tilbúinn að leika frá upphafi á morgun – veit að þar eru mér ekki allir sammála – en held mig við það og tippa á eftirfarandi byrjunarlið:

Reina

Kelly- Carragher – Agger – Aurelio

Lucas – Adam
Kuyt – Suarez – Downing
Carroll

Á bekknum verða Doni, Flanagan, Kyrgiakos, Spearing, Henderson, Aquilani og N’Gog.

Ég er bara að skjóta út í loftið og vel má vera að ekki verði þetta raunin. Ef að Suarez er ekki talinn tilbúinn til að byrja leikinn held ég að Kuyt fari undir Carroll og Henderson á hægri kant.

Ástæðurnar fyrir þessum skoðunum mínum er að ég er handviss um að ætlun Dalglish er að hápressa þessa mótherja okkar og það eru Kuyt, Henderson og Suarez betri í en Aquilani sem mun svo koma inná í leiknum þegar á hann er liðið. Svo við spáum áfram í okkar lið þá held ég að Charlie Adam muni taka allar hornspyrnur og þar munum við sjá útfærslur sem hafa bara verið teiknaðar upp á æfingavellinum en Dirk Kuyt verður vítaskyttan.

Liðið okkar mun hápressa andstæðingana og reyna að refsa hratt, en ef að Sunderland ná að komast að miðjulínunni mun Lucas detta oní hafsentana og vængsenterarnir loka inn á miðju með það fyrir augum að þrýsta hættunni út á vængina – nokkuð sem var aðalsmerki liðsins eftir að Dalglish tók við með Clarke sem varnarþjálfara. Hvort að Aurelio aftur ræður við þá hættu sem við það skapast kemur í ljós en ég held að Kelly muni standa hana af sér.

Mótherjinn

Eins og þeir sem lásu spána okkar sjá teljum við Sunderland ná góðum árangri í vetur, lenda í 7.sæti eftir ansi mörg innkaup í sumar. Þó er einn aðalásinn þeirra, nýkrýndur fyrirliði John O’Shea, nú þegar búinn að kynnast sjúkradeildinni á Stadium of Light og mun því miður ekki verða með.

Liðið er uppbyggt af physical fótboltamönnum og mun liggja aftarlega á vellinum en tilbúið að sækja hratt. David Vaughan og Lee Cattermole eiga að brjóta upp sóknirnar og flengja boltanum fram á nýja framherjann, Connor Wickham sem lengi vel var líklegur til að vera í rauða búningnum okkar í vetur.

Svo að það er alveg ljóst að við erum ekki að fara inn í einhvern sultuleik á Anfield í fyrstu umferð, verðugir mótherjar sem munu krefjast aga og grimmdar gegn.

Samantekt

Verður hrikalega gaman að sjá fyrsta alvöru leikinn á tímabilinu. Mikill hraði strax frá byrjun, hasar fram eftir fyrri hálfleik þar sem mikið verður um aukaspyrnur og pústra. Staðan 0-0 í hálfleik en í upphafi þess síðari setur Suarez gull af marki sem þýðir að Sunderland þurfa að koma framar á völlinn. Í blálokin tryggir svo Carroll okkur sigurinn og fagnar vel fyrir framan Kop stúkuna, en hleypur þó alveg völlinn á enda og brosir framan í Sunderlandaðdáendurnar.

2-0 sigur og málið látið

KOMA SVO!!!!!!

Spá Kop.is – hluti 2

Posted on by

Í gær fór ég yfir spá okkar pennanna um neðri helming deildarinnar í vetur og nú er komið að sætum 1 – 10.

Ætla ekkert að rifja upp stigagjöfina, þeir sem vilja kíkja bara á hluta 1. En þó, hámarksstigafjöldi er 100 og lágmarks er 5.

En byrjum þá uppá nýtt, hefjum spána í 10.sæti!

Continue reading →

Liverpool að kaupa Enrique – Staðfest!

Posted on by

The Guardian halda því fram að Liverpool og Newcastle hafi komist að samkomulagi um kaup á José Enrique fyrir um 6 milljónir punda. Talið er að hann fari í læknisskoðun á næstunni og væntanlega að félagaskiptin fari í gegn fyrir helgi.

Þetta er mjög got mál. Góðir vinstri bakverðir vaxa ekki beint á trjám og Enrique hefur staðið sig vel í enska boltanum, þannig að mér líst vel á þetta. Hann er klárlega betri kostur en Robinson og Aurelio.

Uppfært (Maggi)

Liverpool búið að staðfesta fréttina , stefnir í að við fáum nýjan vinstri bakvörð fyrir helgi!

Spá Kop.is – hluti 1

Posted on by

Þá er komið að því!!!

Kick-off bara nokkra daga í burtu (þ.e. ef að óeirðir í borgum Englands truflar ekki) og þá er kominn tími á að Kop.is-pennar dreifi almennri knattspyrnuvisku sinni hér á síðunni og birti spá okkar fyrir leiktímabilið 2011 – 2012!

Continue reading →

Kop.is Podcast #4

Posted on by

Hér er þáttur númer fjögur af podcasti Liverpool Bloggsins!

KOP.is podcast – 4.þáttur

Þið getið hlustað á þáttinn beint með því að nota spilarann hér fyrir ofan en þið getið líka smellt á DOWNLOAD-takkann og sótt mp3-skrána ykkur til hæginda. Einnig er hægt að gerast áskrifandi að þættinum á iTunes með því að setja þennan link, í RSS-áskrift undir podcast-lið iTunes.

Ég (Kristján Atli) stýrði þættinum sem fyrr og með mér að þessu sinni voru Einar Örn, Babú og Maggi.

Í þessum þætti ræddum við meðal annars æfingaleiki sumarsins, mögulegar leikmannasölur og -kaup í ágúst og meiðslavandræði liðsins auk þess sem við spáðum í spilin fyrir fyrstu umferð Úrvalsdeildarinnar um helgina og skoðuðum helstu keppinauta Liverpool í vetur.

Næsti þáttur verður svo í byrjun september, eftir að félagaskiptaglugginn lokar.

Play

Podcast: Play in new window | Download

Þrjár góðar vefsíður

Posted on by

Það styttist í að tímabilið hefjist og í mesta spenningnum er alltaf gott að fá eitthvað skemmtilegt að lesa um Liverpool og enska boltann. Hér eru þrjár vefsíður sem eru frekar nýlegar og ég mæli með að menn tékki á:

Nr7.is er íslenskt vefrit um enska boltann byggt á tölfræði og umfjöllun. Strákarnir sem standa að þessu ætla sér að fjalla um Úrvalsdeildina og Championship-deildina í vetur og eru þegar komnir á fullt í að hita upp fyrir öll liðin í Úrvalsdeildinni. Ég mæli með að menn skoði þetta og setji í áskrift hjá sér fyrir veturinn. Ég vona að þessi síða haldi áfram jafn vel og hún byrjar.

Rauði Herinn er bloggsíða Ólafs Hauks, mikils Púllara sem tekur virkan þátt í umræðum hér og skrifar stöku pistil inn á Liverpool.is. Óli er flinkur á lyklaborðinu og ég hef haft gaman af því að lesa pistlana hans. Ég mæli með að Púllarar tékki á þessari síðu sem hefur að geyma pistlana hans.

The Anfield Wrap er stórt og nýtt vefrit sem sett var í loftið sl. mánudag. Síðuna reka grjótharðir Púllarar frá borginni, þetta er mjög lókal og auk þess að vera með góðan Podcast-þátt skrifa þarna inn greinar margir af virtustu og þekktustu LFC-tengdu blaðamönnum Englands. Ef ykkur finnst gaman að lesa Kop.is hlýtur þessi síða að vera í skylduáskrift.

Þrjár góðar sem ættu að stytta mönnum stundirnar fram að helginni. Við verðum svo á fullu hér alla vikuna fram að fyrsta leik. Í kvöld kemur fjórði þáttur Kop.is Podcastsins, á morgun ætlum við svo að birta spá okkar fyrir Úrvalsdeildina þetta árið og svo verður upphitun fyrir stóru stundina að sjálfsögðu á sínum stað á föstudag. Þetta er allt að bresta á! :)

Liverpool: The Complete Record

Posted on by

Eins og við minntumst á í tvígang snemma í sumar voru þeir Arngrímur Baldursson og Guðmundur Magnússon – snillingarnir að baki LFC History vefsins – að gefa út bókina Liverpool: The Complete Record núna 1. ágúst síðastliðinn. Þeir félagar voru svo góðir að senda okkur hjá Kop.is eintak til yfirferðar og tók ég að mér að fara í saumana á þessari bók.

Bara svo það sé á hreinu þá þekki ég þá félaga lítillega í gegnum stuðningsmannaklúbbinn hér heima enda hef ég unnið aðeins með þeim að skrifum fyrir klúbbinn og Liverpool.is hér í den, og í seinni tíð hafa þeir báðir tekið þátt í umræðum hér á Kop.is. Mér finnst rétt að þetta komi fram svo enginn verði að ósekju sakaður um klíkuskap, því þótt ég þekki þá Arngrím og Mumma er ég þeim ekki það tengdur að mér finnist erfitt að gagnrýna störf þeirra. Enda stóð fyllilega til hjá mér að veita þeim málefnalega gagnrýni og benda á allt það sem mér þótti miður fara í þessari bók.

Ég leitaði líka vel og lengi að göllum í þessari bók og verð því miður að segja að ég finn bara enga. Eflaust eru einhvers staðar stafsetningarvillur eða eitthvað sem höfundar hefðu viljað geta gert betri skil fyrir skiladag og útgáfu bókarinnar – slíkt er óumflýjanlegt þegar stærri rit eru gefin út – en ég drakk bókina í mig síðustu tvo daga og hafði bara stórgaman af. Ég get bara ekki lagt nógu mikla áherslu á hversu ómissandi þessi bók er fyrir alla Liverpool-stuðningsmenn!

Bókin er skemmtilega sett upp. Eftir stuttan inngang höfunda hefst saga Liverpool FC. Sögunni er skipt niður í kafla eftir áratugum og er saga hvers áratugar rakin á mjög skýran og skemmtilegan hátt. Fyrst ætlaði ég bara að glugga í bókinni og lesa um stofnun félagsins en áður en ég vissi var ég kominn fram að stríðsárum. Meðfylgjandi þessum köflum eru töflur yfir lokastöðu deilda á hverju tímabili sem og tölfræði yfir spilaða leiki, skoruð mörk og viðureignir hvers tímabils. Þessi frásögn í réttri tímaröð af sögu klúbbsins tekur mest allan blaðsíðufjöldann en að honum loknum er í lokin heljarinnar uppflettitafla fyrir hvern einasta leikmann í sögu klúbbsins, í stafsetningarröð, og svo loks frekari tölfræði eins og titlar sem félagið hefur unnið og slíkt. Síðast er svo hinn svokallaði heiðurslisti þeirra sem pöntuðu bókina í forpöntun en sá listi er langur og ljóst að mikill áhugi var og er fyrir bókinni.

Það er heldur ekki að ósekju sem áhuginn er mikill. Það starf sem þeir Arngrímur og Mummi hafa ásamt öðrum unnið fyrir LFC History-vefinn er magnað og í raun erfitt að færa í orð hversu mjög sú vefsíða hefur aðstoðað mann við ýmislegt LFC-tengt síðustu árin. Með því að færa sögu Liverpool FC síðan núna yfir í bundið form hafa þeir skapað eiginlegan tvíbura LFC History-vefsins. Ég er nokkuð viss um að ég á eftir að fletta svipað oft í bókinni og ég heimsæki vefsíðu þeirra félaga því hún er stúttfull af skemmtilegum frásögnum og fróðleiksmolum sem finnast ekki hvar sem er og geta komið jafnvel fróðustu Liverpool-mönnum á óvart.

Hver vill til dæmis ekki lesa frábærar dæmisögur af Bill Shankly? Eða hvernig pólitískar deilur ollu því að John Houlding sagði skilið við Everton FC og stofnaði sinn eigin klúbb til að keppa við þrætunauta sína? (TAKK, JOHN HOULDING!) Eða hvernig Liverpool var næstum búið að kaupa Michael Laudrup og Eric Cantona en klúðraði þeim báðum? Eða hvernig Napoli var næstum búið að kaupa Ian Rush en gátu það ekki því forsprakkar Liverpool voru uppteknir við að horfa á Wimbledon-mótið í tennis í London svo að Napoli keyptu Diego Maradona bara í staðinn?

Bókin spannar alla sögu klúbbsins og hér ætti að finnast eitthvað fyrir alla. Ég skemmti mér til dæmis mjög vel við að lesa frásögnina af stjórnartíð Kenny Dalglish á níunda áratugnum og fannst sú frásögn mjög góð og enduróma sérstaklega núna þegar hann leggur upp í nýtt ferðalag með nýtt Liverpool-lið, tveimur áratugum síðar.

Treystið mér. Fáið ykkur eintak. Þessi bók er ómissandi fyrir Púllara og líka besta gjöf sem hægt er að gefa öðrum grjóthörðum Púllurum. Bókin er vegleg – þykk og þung, með fallegri kápu og fer vel í allar heldri bókahillur. Fimm stjörnur frá mér, frábær bók!

Hægt er að kaupa Liverpool: The Complete Record hérna.