Þá að liðinu gegn Bolton í dag:

Bekkur: Doni, Kelly, Carragher, Coates, Shelvey, Downing, Kuyt.

Sterkt lið hjá okkur, Downing á bekknum en Carroll inni. Gerrard og Agger heilir og byrja. David N’gog er svo fremstur hjá Bolton í kvöld. Ég er skíthræddur um að hann skori gegn okkur. Það er alltaf svoleiðis.

Koma svo! Áfram Liverpool!

Chris Bascombe skrifar í Telegraph að klúbburinn hafi ákveðið að byggja nýjan völl í Stanley Park eftir allt saman, þar sem of erfitt hafi reynst að endurnýja Anfield. Ókei, okkur grunaði það svo sem. En það sem er athyglisverðast í þessu er að hann segir að nú sé stefnan tekin á að uppfæra upprunalegu teikningarnar – sem eru núna 10 ára gamlar – og byggja 60 þúsund sæta völl í Stanley Park.

Fyrir þá sem ekki muna litu upphaflegu teikningarnar svona út, skál svipuð Emirates Stadium hjá Arsenal:

Svo eignuðust Hicks & Gillett klúbbinn fyrir fimm árum, sögðu að þessar teikningar væru úreltar og pöntuðu nýjar teikningar. Þá átti völlurinn að líta svona út:

Svo eignast FSG klúbbinn fyrir rúmu ári, hafa eytt öllu árinu 2011 í að kanna hvort hægt væri að endurnýja Anfield í staðinn en það virðist ekki vera hægt og samkvæmt frétt Telegraph á núna að taka aftur upp upprunalegu teikningarnar og uppfæra þær, og henda teikningum Hicks & Gillett sem og áformum um endurnýjun Anfield.

Komin með hausverk? Ég líka. Sjáum hvað verður staðfest en FSG-liðar verða að fara að kynna eitthvað fljótlega. Eftir að hafa verið teymd á asnaeyrunum af kúrekunum tveimur mun fólk ekki bíða endalaust áður en það fer að gagnrýna FSG fyrir aðgerðarleysi.

Og þá að hinu málinu: forsvarsmenn ADIDAS hafa staðfest að samningurinn við Liverpool verður ekki endurnýjaður eftir þetta tímabil.

Slúðrið hefur hingað til bent til þess að Liverpool hafi sjálfir kosið að framlengja ekki við Adidas þar sem Warrior hafi boðið betur en Adidas-menn neita þessu í fréttinni hér að ofan og segja að þeir hafi bakkað út því kröfur Liverpool hafi verið „óraunhæfar“. Það er augljóst að mínu mati að Adidas-menn eru að reyna að forðast álitshnekki með því að skjóta fyrsta skotinu og staðfesta þetta á undan klúbbnum en hvað sem því líður þá er það hér með orðið 99,9% staðfest að okkar menn leika í Warrior-treyjum næstu árin.

Janúar/febrúar er yfirleitt sá tími sem líklegar hannanir af treyjum næsta tímabils byrja að leka og þessi mynd hér hefur verið að breiðast víða síðustu 1-2 daga. Hvort þetta er endanlegt útlit eða plat skal ekki ábyrgst hér en mér líst vel á þessa hönnun ef hún er rétt:

Svei mér þá ef meira að segja græna treyjan er ekki bara flott líka.

Hvað finnst fólki? Erum við sátt við að fara í Warrior-treyjum á „gamla“ Nýja-Anfield – sem verður nota bene nær örugglega ekki kallaður Anfield heldur nefndur eftir styrktaraðila – á næstu árum?

Daily Mail eru með frétt í fyrramálið þar sem þeir halda því fram að Fernando Torres sé til sölu fyrir 20m punda. Nú þegar eru einhverjir Púllarar byrjaðir að óska þess á Twitter að við tökum hann til baka. Endilega ræðið þetta eða hvað sem þið viljið.

Ég minni á frábæra færslu Magga um Hillsborough Justice Campaign hér fyrir neðan!

Annars er þetta opinn þráður. Þið megið ræða það sem ykkur sýnist.

Samkvæmt Supersport – afrískum fótboltamiðli – er Liverpool nálægt því að tryggja sér bakvörðinn Samuel Inkoom frá Ghana, sem leikur í dag fyrir Dnipro í Úkraínu. Inkoom er 22ja ára hægri bakvörður, mjög sókndjarfur víst og samkvæmt Sirjandeep Das á Twitter hefur hann verið eilítill meiðslapési.

Þetta er allajafna svona frétt sem maður myndi hunsa ef ekki væri fyrir þá staðreynd að Inkoom staðfestir þetta sjálfur:

“Very soon a deal would be complete. My agent is still in talks with them. A scout of Liverpool came over some time back and that was how it started. A deal will soon be done.”

“I cannot say what it will be exactly because nothing has been decided yet on whether I will join Liverpool on loan or move permanently.

Það er spurning hvað Liverpool hefur með annan hægri bakvörð að gera, sérstaklega mann sem á erfitt með meiðsli, en við erum fyrir með Glen Johnson, Martin Kelly og John Flanagan í þessa stöðu. Þetta flokkast því undir slúður í dag, en það er áhugavert að leikmaðurinn skuli staðfesta þetta sjálfur.

Hvað halda menn? Er verið að kaupa staðgengil Glen Johnson þarna, eða er Inkoom bara að ljúga þessu til að fá launahækkun eins og við höfum séð oft áður?

Hér er svo að sjálfsögðu YouTube-myndband af kappanum undir tónlist frá … Akon, að sjálfsögðu.

Sjáum hvað setur, en þetta er allavega slúður dagsins.

Slúðrið í upphafi dags virðist helst snúast um mögulegar brottfarir Joe Cole, Christian Poulsen (staðfest í gærkvöldi), David Ngog og hugsanlega Raul Meireles og svo er einna helst talið að reynt verði að kaupa framherja í stað Ngog ef hann fer. Kaupin á Sebastian Coates voru staðfest á LFC TV í gær og þar er hægt að lesa allt um hann og hið venjulega viðtal við Comolli um kaupin.

Við verðum á fréttavaktinni og uppfærum þessa færslu með helstu tíðindum og tenglum. Við hvetjum lesendur til að taka þátt í umræðunni og fréttavaktinni með okkur í ummælunum.

06:00 (KAR): Í upphafi dags er kannski hægt að rifja upp geðveikina í lok janúar á þessu ári. Ég er ekki viss um að dagurinn í dag geti toppað þann dag hvað dramatík varðar, en það er þó aldrei að vita. Við verðum á vaktinni!

09:14 (KAR): Þessi dagur fer rólega af stað hjá okkar mönnum. Það er eitthvað slúður um að Bolton nái ekki að semja við Ngog um laun. Sunderland náðu því ekki heldur í vor. Á hvaða launum er hann eiginlega?! En allavega, flestir miðlar halda því fram að Liverpool vilji klára sölur áður en þeir kaupa mögulega framherja þannig að við gætum þurft að bíða eitthvað fram eftir degi eftir alvöru fréttum.

09:32 (Maggi): Búið að staðfesta að Coates verður númer 16 í vetur, númerið sem Kyrgiakos skildi eftir. Einn naglinn tekur þar við af öðrum! Kjaftasögur voru á Twitter í gær um að hann yrði nr. 6 og Aurelio þá í hættu en það verður ekki. Á Twitter núna er það heitast að Liverpool vilji fá forkaupsrétt á Eden Hazard sem hluta af dílnum við Lille vegna Joe Cole og svo er Craig Bellamy að ræða við QPR þessa stundina. Barton og Bellamy saman í liði – það væri vissulega eitthvað!

11:35 (KAR): Joe Cole er farinn til Lille á láni! Bæði LFC TV og heimasíða Lille staðfesta þetta! Ég stórefa að við sjáum hann nokkurn tímann aftur í Liverpool-treyju. Annars eru einnig að berast fréttir af því á Twitter að Ngog-salan til Bolton sé í nánd þannig að við bíðum frekari frétta.

12:38 (KAR): Hér er Cole með Lille-treyjuna:

Annars er það helst að frétta að Bellamy-slúðrið er farið í gang aftur á Twitter. Menn segja að hann hafi yfirgefið æfingabúðir velska landsliðsins til að fara í læknisskoðun hjá annað hvort Liverpool eða QPR. Kemur í ljós.

13:06 (Maggi): Ekki alltaf stóru nöfnin sem færa sig um á þessum degi. Við erum búin að lána Valerij Bijev til Fortuna Düsseldorf í næstefstu deild Þýskalands út þetta ár. Þetta er strákur sem mikið hefur verið rætt um, bandarískur framherji sem við fengum til okkar í sumar. Verður gaman að sjá hvað verður úr því.

14:31 (KAR): Christian Poulsen er farinn til Evian í Frakklandi! Staðfest á opinberri síðu þeirra, með mynd af honum haldandi á bleiku treyjunni þeirra. Ef Ngog fer líka í dag held ég að okkur sé óhætt að opna kampavínið, hreinsunin mikla er að hafast!

15:41 (Maggi) Ákaflega öflugir twitter-miðlar slá því föstu að samningar hafi náðst milli Craig Bellamy og Liverpool, kappinn sá komi í læknisskoðun á Melwood milli kl. 17 og 18 en að því loknu þurfi að ná samkomulagi við Manchester City.

16:57 (KAR): Allir helstu miðlarnir eru að tala um eftirfarandi atriði: Craig Bellamy er á Melwood í læknisskoðun en ekki hefur verið tilkynnt enn um samkomulag við Man City (hann fær að fara samt í læknisskoðun svo menn brenni ekki inni á tíma í kvöld). Yossi Benayoun er sagður vera á leiðinni til Arsenal sem eru víst líka að reyna að fá Mikel Arteta frá Everton. Og Philipp Degen er orðaður við Glasgow Rangers. Svo bíða menn bara eftir staðfestingu á sölu David Ngog til Bolton en það er víst nánast klárt. Krossleggjum fingur, bara sex klukkutímar eftir!

19:23 (KAR): Fréttamenn á Twitter segja nú að Ngog sé búinn að skrifa undir hjá Bolton og að Bellamy sé að skrifa undir hjá Liverpool og að það megi vænta opinberrar staðfestingar á báðum þessum dílum innan mjög skamms. Einnig eru áreiðanlegir miðlar að segjast hafa heyrt það frá Liverpool að Bellamy verði síðasti díll okkar í þessum glugga. Þannig að þetta ætti að vera að klárast hjá okkar mönnum. Við uppfærum næst þegar staðfestingar á Ngog og Bellamy-skiptunum liggja fyrir, eða ef eitthvað annað óvænt gerist.

19:37 (KAR): Þar er Ngog-staðfestingin komin: Hann er farinn til Bolton. Gangi honum vel. Mér hefur alltaf líkað við Ngog og fannst hann efnilegur en síðasta árið hefur verið mjög slappt hjá honum og hann virtist vera hratt að dragast aftur úr samherjum sínum þegar Dalglish bætti spilamennsku liðsins. Vonandi gengur honum vel hjá Bolton.

21:30 (KAR): Raul Meireles hefur farið fram á sölu frá Liverpool FC! Ja hérna. Það segir mér að hann er frekar ósáttur við að fá ekki launahækkunina sem hann bað um í vor og vill komast frá Liverpool á næstu tveimur tímunum. Er þetta of seint? Til hvers að bíða þangað til svona seint? Er hann þá væntanlega á leið til Chelsea, úr því að þeir lánuðu Benayoun til Arsenal og gátu ekki keypt Modric? Kemur í ljós á næstu tveimur tímum.

21:38 (KAR): Hlutirnir eru að gerast hratt á lokametrunum – Craig Bellamy er orðinn Liverpool-leikmaður! Skrifar undir tveggja ára samning. Frábærar fréttir.

22:10 (KAR): Glugginn lokaði fyrir nokkrum mínútum og heimasíða Chelsea hefur staðfest að þeir hafa keypt Raul Meireles frá Liverpool! Verðið er talið vera um 12-13m punda. Ja hérna.

Þar með lýkur þessu nær örugglega. Við þökkum ykkur fyrir lesturinn og þátttökuna á fréttavaktinni í dag og í allt sumar.

Uppfært

Komin staðfesting á opinberu síðunni að Úrúguayinn Sebastian Coates hefur skrifað undir langtímasamning við liðið, atvinnuleyfið klárt og því mál hans frágegngin.

Velkominn ungi maður!

Mér finnst tilvalið að spyrja ykkur lesendurna hvað ykkur finnst um þessar fréttir:

Endilega kjósið og gerið grein fyrir ykkar atkvæði í ummælum. Ngog eða Bellamy? Eða einhvern annan en Bellamy?

Samkvæmt fréttinni fer Konchesky til Leicester fyrir um 1,5 milljón punda (uppfært EÖE: Salan er staðfest). Nokkur lið hafi svo áhuga á Jovanovic, þar á meðal Lille og Anderlecht. Ben Smith blaðamaður Times segir á Twitter að Jovanovic muni fara ókeypis frá Liverpool.

Þetta er fínt mál. Þessir leikmenn eru að sögn á háum launum og eiga lítinn sjens á að komast í Liverpool liðið. Ben Smith segir svo líka á Twitter að hann telji líklegt að mál Stewart Downing muni þróast í rétta átt (það er að hann komi til Liverpool) seinna í þessari viku.

Evans, sem ásamt Tony Barrett hjá The Times er sennilega áreiðanlegasti blaðamaðurinn þegar kemur að Liverpool, segir í grein sinni að Adam muni líklega kosta 8m punda upphaflega með 2m í viðbótarklausum á meðan talið sé líklegt að Downing muni kosta í kringum 16m punda. Við erum því að fá tvo vinstrifótarmenn á miðjuna og vænginn hjá okkur fyrir um 24-26m punda samtals.

Ég er hrifinn af þessum kaupum, ef af verður. Ég merki þetta slúður þar sem þetta eru bara blaðafréttir (hinir miðlarnir eru samt allir að segja sömu sögu: Daily Mail, Mirror (Downing), Mirror (Adam), Sky, Blackpool Gazette) en þegar Tony Evans er annars vegar getum við trúað því nokkuð áhyggjulaus. Þessi tvennu leikmannakaup eru greinilega í vinnslu.

Við erum hér að fá, eins og ég sagði áður, tvo vinstrifótarmenn á miðjuna okkar. Adam er playmaker sem getur opnað þéttar varnir með góðum sendingum auk þess að vera frábær skytta og stórhættulegur spyrnumaður í föstum leikatriðum. Hann er líka leiðtogi, eins og veturinn með fyrirliðaband Blackpool-liðsins sýndi. Ef hann getur sýnt okkur svipaða frammistöðu fyrir Liverpool og hann sýndi tvisvar gegn Liverpool síðasta vetur á hann eftir að slá í gegn á Anfield.

Downing er líka mjög áhugaverður kostur. Fyrir tveimur árum, þegar Middlesbrough féllu og Liverpool var í öðru sæti deildarinnar vildi ég ekki sjá hann þegar við vorum orðaðir. Hann fór til Aston Villa og mér fannst hann ofmetinn. Hann hefur hins vegar spilað talsvert betur með Villa, og verið stöðugt betri en ekki ójafn eins og fyrir Boro, og eiginlega hrifið mig meira og meira. Hann er þessi öskufljóti kantari sem vill keyra upp að endalínunni og finna svo ennið á mönnum eins og Andy Carroll. Á pappírnum ættu þeir tveir sérstaklega að smellpassa saman en við verðum að sjá hvernig Downing gengur að spila undir pressunni sem fylgir rauðu treyjunni. Hann var ekki beint að höndla pressuna með enska landsliðinu síðustu árin, vonandi er hann reiðubúinn í þennan slag.

Það verður í öllu falli að teljast jákvætt, ef þetta klárast fyrir mánaðarmótin, ef Comolli og Dalglish geta farið út á Evrópumarkaðinn frá og með 1. júlí með Henderson, Adam og Downing nú þegar í farteskinu. Ég sé ekki hvernig við getum kvartað yfir því. Við þurfum meira í sumar en þá þrjá, en þetta er ágætis byrjun.