Flokkaskipt greinasafn: Opin Umræða

Opinn þráður – Eyðsla

Podcast frestast þar til annað kvöld.

Hendum í opinn þráð fram að því, læt þennan þráð flakka með enda tekur hann vel á gríðarlega villandi umræðu um Liverpool undanfarið. Umræðu sem stjóri Man Utd leiðir…

Spá Kop.is – síðari hluti

KOP.IS – pennar eru búnir með spána sína í ár!!!

Eins og fyrri ár ætlum við að rúlla yfir það hvernig við spáum um lokastöðu ensku deildarinnar vorið 2019. Við röðum allir liðunum upp í sætin frá 1 – 20 og fá þau „öfuga stigatölu“, þ.e. liðið í 1.sæti fær 20 stig og það í 20.sæti 1 stig. Við leggjum svo stigin saman til að búa til þessa sameiginlegu spá okkar.

Ég held að við séum ekkert að fara yfir okkar spádómsgáfur í gegnum árin, enda þetta algerlega til gamans gert, en þó henti það í fyrra í fyrsta sinn að lið vann þessa spá með fullu húsi stiga. Um var að ræða Manchester City lið sem að setti svo met að vori…svo að eitthvað vissum við þá!

Í síðari hlutanum rúllum við yfir liðin frá 10.sæti og upp til meistaratitils…að þessu sinni ætla ég að uppfæra eftir hvert sæti…hafa svona eins konar „live feed“ ef einhver skyldi vera að lesa núna.

Leggjum af stað…

10.sæti Wolves 81 stig

Nýliðarnir frá Wolverhampton, portúgalska nýlendan í enska boltanum er fyrsta liðið á blað þegar við horfum til efri hluta deildarinnar. Nuno Espirito Santo er klókur stjóri sem bjó til afskaplega skemmtilegt fótboltalið sem að fór býsna létt í gegnum Championshipdeildina. Í sumar hafa þeir styrkt liðið all duglega, með a.m.k. 9 öflugum leikmönnum sem margir hverjir eru landsliðsmenn öflugra landa. Markvörðurinn Rui Patricio, kantmaðurinn Diego Jota og Joao Moutinho á miðjunni bætast við nýlenduna, Armand Traore kemur á kantinn auk nokkurra annara. Liðið ætlar sér í efri hluta deildarinnar og við teljum að svo verði, nokkuð sem ætti að gleðja fyrirliðann þeirra, Scouserinn Conor Coady sem uppalinn er hjá LFC.

9.sæti Leicester 92 stig

Meistararnir frá 2016 enda í 9.sætinu í vetur, nokkuð ofan við Úlfana ef okkar spá reynist rétt. Franski refurinn Claude Puel er öflugur stjóri sem mun þó þurfa að díla við að missa stjörnuleikmanninn Ryad Mahrez, auðvitað verður það lykillinn að þeirra velgengni. Í stað Mahrez fjárfestu þeir í nokkrum leikmönnum sem eru spennandi, dýrastur sóknarmiðjumaðurinn James Maddison sem kemur frá Norwich, portúgalski bakvörðurinn Pereira kemur frá Porto og gaman verður að sjá tyrkneskan hafsent að nafni Caglar Söyüncü sem kemur til liðsins frá Freiburg, sá var undir smásjá stórliða og valdi Leicester. Hryggjarsúlan er sterk í þeim Schmeichel, Maguire, Ndidi og Vardy, það mun skila þeim í efri helminginn en þó ekki í Evrópusæti.

8.sæti West Ham 100 stig

Fyrsti mótherji okkar í deildinni, Hamrarnir frá London enda í sæti númer átta. Þeir ákváðu að losa sig við David Moyes þó hann hafi náð að halda þeim nokkuð duglega uppi og fengu í staðinn rótgróinn meistara, Manuel Pellegrini, til að stýra liðinu. West Ham hafa lengi haft stórliðsdrauma, eru komnir með geggjaðan völl á flottu markaðssvæði í London og þessi árangur er klárlega lágmarksárangur í huga eigendanna. Liðið hefur styrkt sig duglega í sumar, vængmennirnir Felipe Anderson og Yarmolenko eiga að skaffa hraða og vídd, framherjinn Lucas Perez á að skora, Lukas Fabianski verður með hanskana og til að verjast betur sóttu þeir öflugan Frakka, Issa Diop og miðjumanninn Carlos Sanchez. Stóra sagan var svo kannski að Jack Wilshere er mættur á miðjuna hjá klúbbnum sem hann studdi sem barn, töluvert gert úr því. Bætum Manuel Lanzini í jöfnuna og við erum með fínt skipað lið…og stjóri sem kann öll trikkin. West Ham verður alvöru lið.

7.sæti Everton 108 stig

Gylfi Sig og félagar enda í 7.sæti – sem gefur möguleika á Evrópusæti. Þeir létu Sam Allardyce fara þrátt fyrir að hann hafi náð að halda þeim uppi (okkur pennunum til mikillar ógleði) og sóttu í staðinn Marco Silva sem hefur náð fínum árangri í Englandi. Hann þarf að gjörbreyta leikstíl liðsins sem var beinlínis „hit and hope“ í fyrra og til þess sótti hann sex leikmenn, vængmennina Richarlison og Bernard, bakvörðinn Digne, sóknarmiðjumanninn André Gomes, bakvörðinn Lucas Digne og miðverðina Kurt Zouma og Yerry Mina. Gylfa er víst ætlað hlutverk á miðju félagsins, allt þetta leiðir okkur til þeirrar ályktunar að liðinu muni ganga býsna vel og ná sínu klassíska toppsæti. Þeir ætla sér miklu stærri skref í framtíðinni vissulega en þetta ætti að gleðja þá í bili…satt að segja held ég að þeir hafi náð sínum draumum þegar Allardyce var látinn fara!

6.sæti Arsenal 127 stig

Wenger horfinn frá, eftir tæplega 30 ár. Það verður stórt hjá skyttunum í Norður London og nokkuð sem margir stuðningsmenn biðu eftir. Það verður mjög fróðlegt að fylgjast með Arsenal eftir Wenger og getur farið í allar áttir. Stjórinn er auðvitað þrælreyndur og hörkuflottur, Unai Emery hefur unnið titla þar sem hann hefur verið og hefur reynslu af toppslag. Kaupin þeirra í sumar minna svolítið á LFC fyrir Klopp, verið að reyna að finna óslípaða demanta í hillunni þar sem að þarf að leita. Vissulega eru Lucas Torreira, Bernd Leno, Sokratis og Lichtsteiner leikmenn sem hafa verið í stórum liðum og/eða deildum en þeir eru engir ásar svona að sjá fyrirfram. Árangurinn mun ráðast hvernig tekst að virkja og svo finna stöðugleika hjá sóknarmönnununm Özil, Lacazette, Aubemyang og Mkhitaryan. Ef þeir verða í standi munu Arsenal gera atlögu að Meistaradeildarsæti. En það mun ekki ganga…eyðimörk Arsenal hverfur ekki með Wenger.

5.sæti Chelsea 130 stig

Annar Lundúnarisi teljum við að verði utan Meistaradeildar. Chelsea ákvað að reka Antonio Conte eftir lengsta skilnaðarferli fótboltasögunnar. Sá kvaddi Chelsea eftir að hafa skilað meistaratitli og bikar. En það var öllum ljóst að allt var gallsúrt hjá bláum í fyrravor, Roman var hundfúll að horfa á liðið sitt spila fótbolta og stjórinn var grautfúll með starfsumhverfið. Maurizio Sarri var sóttur til Napoli, stjóri sem vill að sín lið spili hápressu sóknarfótbolta…jább…nefnilega það. Það verður verk fyrir hann eftir Mourinho og Conté! Stóru kaupin voru dýrasti markmaður knattspyrnusögunnar, Kepa Arrizabalaga sem á að baki eitt tímabil í La Liga og á að fylla í skarð Courtois og síðan tveir býsna öflugir miðjumenn, þeir Jorginho og Mateo Kovacic. Serri virkar býsna hress og flottur gaur sem ætlar sér svo sannarlega að uppfylla óskir eigandans um árangursríkan OG áferðarfallegan fótbolta. Þar mun margt standa og falla með því að fá Eden Hazard til að vera með…við reiknum með að það takist en það muni ekki duga Chelsea til að ná sæti í Meistaradeildinni 2019.

4.sæti Tottenham 133 stig

Sigurvegari Lundúnadeildarinnar í vetur verð Tottenham. Eins og þið sjáið munar býsna litlu í spádómsstigunum milli þessara þriggja liða svo að við teljum að þau muni berjast hatrammlega um síðasta sætið sem enska deildin gefur í Meistaradeildinni. Tottenham breytti einfaldlega engu í sumar. Missti engan sem máli skipti og keypti engan. Samt höfum við trú á þeim. Ástæðan er einföld…Mauricio Pochettino. Þar fer stjóri sem við höfum mikla trú á og alger lykill að öllu hjá Spurs. Fótboltinn sem hann spilar er afar skemmtilegur og leikmenn njóta þess að spila fyrir hann. Vissulega mega þeir lítið við meiðslum lykilmanna eins og Kane, Alli, Erikson, Dier og Lloris en á sama hátt er hörkuflott lið á ferð þegar þessir eru allir heilir. Við munum opna nýja völlinn þeirra, sá hefur áhrif á kaupgetu liðsins en ætti að skila þeim fleiri stigum en Wembley gerði. Spurs komast í Meistaradeild en munu missa Pochettino til Spánar í kjölfarið.

3.sæti Manchester United 138 stig

Já. Mourinho og félagar falla um eitt sæti milli ára. Gríðarlega sterkur leikmannahópur, sá dýrasti í deildinni og fullur af hæfileikamönnum en mixið er skrýtið. Stjórinn virðist hafa borðað skipsfarm af súrum gúrkum og hent öllum hárvörunum sínum í sumar og opinbert rifrildi við yfirmenn hans í lok gluggans tóku mikið pláss. Kannski var Móri bara að blása upp leikþátt til að berja sínum mönnum orku í brjóst, hver veit. Hins vegar held ég að allir séu sammála um það að United var ekki að styrkja lið sitt á þeim stöðum eða með þeirri týpu af leikmönnum sem við reiknuðum með. Ef að Pogba, Sanchis, Martial, Lukaku…getum haldið áfram töluvert…ná að uppfylla sína hæfileika verður United ofar og gæti tekið titilinn. Til þess þurfa allir að toga í sömu átt. Það virðist alls ekki vera á ferðinni, United endar í 3.sæti og Mourinho klárar ekki tímabilið á Old Trafford. Zidane bíður eftir símhringingunni….

2.sæti LIVERPOOL 153 stig

Jebb. Allverulega ofan við United, Spurs, Chelsea og Arsenal en náum ekki titlinum. Við erum allir óskaplega ánægðir með sumargluggann með Fabinho, Keita, Allison og Shaqiri…kannski mest því að missa engan stórlax…og höfum óbilandi trú á Klopp og þjálfarateyminu. Við munum gera alvöru atlögu að titlinum og vinna eina bikarkeppni á meðan, en erum ekki alveg tilbúnir að verða meistarar. Það eru þó tveir okkar sem trúa á titilinn, þeir Beardsley og Einar Matthías. Vonandi munu þeir hafa rétt fyrir sér!

1.sæti Manchester City 158 stig

Fáum á óvart auðvitað. City bætti bara við sig einum stórum, fengu Ryad Mahrez frá Leicester en þeir halda sama liði, leikmann fyrir leikmann, sem settu öll met möguleg í ensku deildinni og með síhungraðan Pep Guardiola við stjórnvölinn munu þeir ná að verja titil sinn, sem ekki hefur gerst lengi á Englandi. Þeir munu hins vegar þurfa að hafa miklu meira fyrir því en í fyrra og ef þeir misstíga sig ætlum við að grípa gæsina um leið og hún gefst – en þó höfum við ekki trú á að það muni gerast. Ljósbláir vinna.

Og þar með má þetta hefjast. Fyrsta upphitun fyrir leik er rétt undan og fjörið byrjar á sunnudag.

Þetta verður ROSALEGT!!!!!

Spá Kop.is – fyrri hluti

Þá er komið að því krakkar mínir!

KOP.IS – pennar eru búnir með spána sína í ár!!!

Eins og fyrri ár ætlum við að rúlla yfir það hvernig við spáum um lokastöðu ensku deildarinnar vorið 2019. Við röðum allir liðunum upp í sætin frá 1 – 20 og fá þau „öfuga stigatölu“, þ.e. liðið í 1.sæti fær 20 stig og það í 20.sæti 1 stig. Við leggjum svo stigin saman til að búa til þessa sameiginlegu spá okkar.

Ég held að við séum ekkert að fara yfir okkar spádómsgáfur í gegnum árin, enda þetta algerlega til gamans gert, en þó henti það í fyrra í fyrsta sinn að lið vann þessa spá með fullu húsi stiga. Um var að ræða Manchester City lið sem að setti svo met að vori…svo að eitthvað vissum við þá!

Dembum okkur í þetta, við vorum 8 sem spáðum svo hæsta mögulega stigaskor var 160 stig en það minnsta 8 stig. Eins og venjulega skiptum við í tvo hluta og byrjum á 11. – 20.sæti…neðan frá.

20.sæti Cardiff City 15 stig

Hæ Neil minn Warnock og bless Neil minn Warnock. Við þekkjum öll boltann hjá Warnock sem er sennilega ýktasta long-ball útgáfan af fótbolta með djúpum varnaleik og honum öskrandi brjáluðum á hliðarlínunni. Vissulega er okkar ástkæri landsliðsfyrirliða á meðal leikmanna Welska liðsins en það er bara ekki nóg til að við öðlumst trú á lið sem öskrar á okkur Championship gæði.

19.sæti Huddersfield 19 stig

Lærisveinar David Wagner voru í frjálsu falli eftir áramót í fyrra en héldu sér uppi á góðum fyrriparti. Við höfum töluverða trú á að þeir muni verða fórnarlamb „second season syndrome“ og vanti einfaldlega gæði til að ná að vera áfram á meðal þeirra bestu. Wagner hefur þó unnið aðdáunarverða vinnu og alls ekkert víst að hann fari niður með þeim…er jafnvel dark horse að fá stærra lið ef einhver yrði rekinn.

18.sæti Brighton 39 stig

Ef við lesum í stigatöluna má telja nokkuð ljóst að við erum allir á því að Cardiff og Huddersfield ströggli en það er töluvert stökk upp í næstu lið. Brighton fær þriðja sætið í spánni okkar en það skiptist til helminga okkar á milli, helmingur telur þá bjarga sér og helmingur spáir falli. Hughton er að reyna að láta þetta lið spila fallegan fótbolta og á liðnu tímabili tókst það nokkuð vel. Þeir hafa í sumar keypt erlenda leikmenn, lítt þekkta, frá meginlandi Evrópu svo kokteillinn á að verða svipaður. Við semsagt teljum að hann verði súr að lokum.

17.sæti Southampton 41 stig

Við semsagt teljum að nágrannar Brighton á suðurströndinni verði í sætinu ofan við þá, naumlega…ræðst líklega bara í síðustu umferð og þar munu mörk Danny Ings skipta þá miklu máli. Mark Hughes hefur átt í bölvuðu basli sem stjóri undanfarin ár og þarf virkilega að fara að beygja upp á við en satt að segja þá virkar það ekki þannig að klúbburinn sé á réttri leið og kaupin í sumar (utan Ings) eru á leikmönnum sem eru frekar lítt þekktir og ekki með mikla reynslu í toppfótbolta, þó má vissulega nefna hafsentinn Jannik Vestergaard sem leikmanns sem horfa má til. Dýrðlingarnir rétt sleppa við fall og líklega verður Hughes ekki til loka tímabilsins þar!

16.sæti Fulham 49 stig

Nýliðarnir frá London munu verða í fallbaráttu en halda sér uppi. Jean Michael Seri, André Schurrle, Alexander Mitrovic…allt býsna öflug kaup hjá nýliðunum sem geta sótt í digra sjóði eigandans aftur í janúar ef þarf til. Áhugaverður knattspyrnustjóri, Slavisa Jokanovic vill að liðið spili hraðan sóknarfótbolta og innan þeirra raða er eitt mesta efni enska fótboltans, Ryan Sessegnion, sem hefur m.a. verið orðaður reglulega við Liverpool í gegnum tíðina. Vert er svo að muna að Fulham er eitt „Íslendingaliðanna“ í deildinni, Jón Ágúst Þorsteinsson hefur farið mikinn með unglingaliðum félagsins og eygir von um að vera í leikmannahópnum í vetur. Það yrði skemmtilegt!

15.sæti Crystal Palace 51 stig

Rétt ofan við Fulham er annað Lundúnalið, lærisveinar Roy Hodgson hjá Palace og mótherjar í okkar fyrsta útileik í vetur. Selhurst Park er einn erfiðasti útivöllurinn að fara á, gríðarlegur hávaði frá áhorfendum, gamaldags þröngur völlur tilvalinn fyrir Woy-boltann. Palace héldu Zaha sem skipti þá miklu máli og náðu í feitan bita á miðjuna þegar þeir náðu í Max Meyer á frjálsri sölu, hann ásamt Kouyaté sem kom frá West Ham mynda saman nokkuð sterka miðju. Þeir verða ólseigir alla leið í gegn og munu ná í þau úrslit sem þurfa til að halda sæti á meðal þeirra bestu áfram. Þrátt fyrir stjórann….

14.sæti Watford 53 stig

Í svipaðri stöðu og liðin tvö á undan. Útborgarlið frá London sem spilar kraftabolta. Misstu Richarlison yfir til Everton í sumar…reynar fyrir svakalegan pening, keyptu Deulofeu í staðinn og í raun lítið annað. Javi Garcia stjórnar hringekjunni að þessu sinni en það er eitt minnsta atvinnuöryggi fyrir stjóra deildarinnar að stýra Watford enda býsna skrautlegir eigendur þar á ferð. Watford heldur sínum kjarnamönnum eins og Deeney, Caboue og Kaboul og mun sleppa nokkuð örugglega við fall að okkar mati.

13.sæti Bournemouth 56 stig

Ævintýrið hans Eddie Howe heldur áfram og suðurstrandardrengirnir hans verða örugglega áfram í deildinni, vissulega skammt undan botnsins en samt með mörg lið fyrir neðan sig. Það er auðvitað ekkert vit að lið með 12500 manna heimavöll í smáborg nálægt risum haldist í þessari deild en þannig er það nú samt…og þar á stjórinn klárlega stærstan heiðurinn. Í raun er hálfgert blaðamál að hann hafi enn ekki verið veiddur yfir í stærra lið og hreinlega hlýtur að fara að gerast. Stóru kaup sumarsins voru í kólombíska varnarmiðjumanninum Jefferson Lerna en eins og hjá Watford liggur kraftur Bournemouth í samheldum leikmannahóp sem hélt sínum nöfnum í sumar og stjóra sem veit nákvæmlega hvernig á að ná út úr þeim því besta!

12.sæti Newcastle 59 stig

Newcastle verða um miðja deild. Fyrir því er ein ástæða…Rafael Benitez. Ef hann gefst upp á þeim sirkus sem er í kringum eiganda félagsins og ótrúlega lélegum afrakstri á leikmannamarkaðnum undanfarin ár verður leiðin niður greið. Það er í raun magnað að Rafa sé þarna enn og segir bara mest um það hversu hátt hann metur félagið sjálft og umgjörð þess, þ.e. áhorfendur og borgina. Hann þurfti í sumar að horfa til frjárlsra sala og kaupa undir 10 milljónum punda og um leið selja leikmenn á móti. Rafa hefur náð í óslípaða demanta sem falla inn í leikstíl hans í gegnum tíðina og honum mun takast það áfram. Vá hvað Newcastle gætu náð langt með því að bakka kappann upp á markaðnum!

11.sæti Burnley 75 stig

Eftir nokkuð þéttan pakka frá 12 – 16 teljum við Burnley verða nokkuð ofan við hann, en þó í neðri hlutanum. Evrópuævintýrið og það að „surprise“-faktorinn er horfinn frá Turf Moor mun sjá til þess að eilítið skref verður tekið til baka en þó mun klúbburinn sigla lygnan sjó. Jóhann Berg verður í lykilhlutverki hjá Sean Dyche í vetur en stjórinn sá hefur náð flottum árangri. Í sumar bætti hann við tveimur leikmönnum, Ben Gibson og Matej Vydra, en þeir voru lykilmenn í góðum Championshipliðum síðasta vetur og svo splæsti hann í Joe Hart á síðustu dögum gluggans. Lykilatriðið var að halda mannskapnum sem gerði svo vel í fyrra og það tókst. Burnley verða í fínum málum og halda áfram að festa sig í sessi í toppdeildinni…en svo selja þeir Jóa fyrir metfé næsta vor eftir flottan vetur!

Þar með er fyrri hluti spár okkar opinber – sá síðari (sem upplýsir trú okkar á Liverpool FC líka) birtist á morgun áður en fyrsta upphitun leiktímabilsins dettur í hús…

ÞETTA ER ALLT AÐ FARA AÐ GERAST KRAKKAR!!!!

Lokadagur gluggans

Jafnvel þó svo að glugganum hafi verið lokað, þá er ennþá smá séns að Danny Ings fari til Southampton að láni. Það er víst búið að skila inn nauðsynlegum pappírum, en afgangurinn þarf að klárast á næstu 2 tímum (tæplega) til að þetta geti gengið eftir.


Þá er runninn upp lokadagur sumargluggans 2018, bjartur og fagur (a.m.k. hér á skerinu).

Ekki er búist við að það gerist neitt sérlega markvert hjá okkar mönnum, Pearce ku þvertaka fyrir að það sé von á neinum leikmönnum til liðsins, mögulega gætu einhverjir farið. Það er líka rétt að muna að þó svo glugginn loki núna seinnipartinn, þá á það aðeins við um kaup og sölur milli liða á Englandi. Glugginn lokar að jafnaði í lok ágúst í Evrópu, og það má selja/lána leikmenn þangað á meðan sá gluggi er opinn. Semsagt, þó svo að Mignolet, Origi, Markovic og fleiri verði ennþá leikmenn Liverpool í lok dags, þá er ekkert víst að þeir verði það í lok ágúst.

Við uppfærum færsluna jafn óðum og nýjar fréttir berast, bæði af okkar mönnum og eins ef áhugaverðar fréttir af okkar helstu andstæðingum berast, en annars er orðið laust.


Dómaravæl?

Síðasta tímabil var ekkert eðlilegt þegar kemur að dómgæslu í leikjum Liverpool. Við ræddum það margoft í vetur (misjanflega miklar undirtektir) að þetta væri versta tímabil sem maður man eftir hvað dómgæslu varðar, sérstaklega á Anfield. Það er nákvæmlega ekkert eðlilegt við það að þetta Liverpool lið sem er eitt besta sóknarlið sem við höfum átt hafi fengið eitt víti í deildinni (1.umferð) og annað í bikarleik þar sem pína þurfti dómarann til að dæma víti með aðstoð VAR. Hann tók sér líka heldur betur tíma í þá augljósu niðurstöðu. Það var hinsvegar öllu minna mál að dæma víti á Liverpool, janfvel til liða sem fóru bara einu sinni yfir miðju í öllum leiknum.

Auðvitað gerir maður sér grein fyrir að stuðningsmenn allra liða upplifa þetta þannig að dómgæslan halli á þeirra lið og við erum alls ekkert með samsæriskenningar um að dómarinn væri beinlínis meðvitað á móti Liverpool. Síðasta tímbil var bara óvenju slæmt og maður veltir fyrir sér hvað veldur. Er það leikstíll liðsins? Fjöldi erlendra leikmanna í sóknarlínu liðsins? Eru dómarar að reyna forðast um of að fá þann stimpil að Kop hafi haft áhrif á þá eða er áhersla Klopp á Fair Play að koma niður á stigasöfnun?

ESPN tók þátt í greiningu á dómaramistökum með Intel og Háskólanum í Bath, verkefni sem var leitt af fyrrum dómara og hver einasti leikur greindur. Auðvitað er ekki hægt að taka svona niðurstöðu sem gospeli en hún er algjörlega í takti við það sem haldið var fram síðasta vetur. Liverpool var „óheppnasta“ lið deildarinnar þegar kom að stórum ákvörðunum dómara og það kemur væntanlega engum á óvart að United var heppnast.
Sjá nánar hér

Samkvæmt þessu hefði United með réttu átt að fá sex stigum minna og Liverpool 12 stigum meira, þetta er 18 stiga sveifla sem er ansi mikið í toppbaráttu þar sem hvert stig skiptir máli. Hefði t.d. úrslitaleikurinn spilast öðruvísi ef Liverpool hefði tryggt Meistaradeildarsæti löngu fyrir þann leik og væri pressulaust í deildinni?

Það gefur okkur ekkert að röfla yfir þessu núna og blessunarlega hafði þetta ekki stórvægileg áhrif þegar upp var staðið. Liverpool komst í Meistaradeildina og hefði ekki unnið deildina með Man City í þessu formi. Fullomlega óþolandi engu að síður og ástæða þess að ég skipti alveg um skoðun varðandi VAR.

Það er samt hægt að horfa á björtu hliðarnar, þetta getur varla haldið áfram næsta vetur er það? Hvað þá versnað? Bíðum allavega spennt áfram eftir að dómaramistök jafnist út yfir tímabilið, þvílíka fjarstaðan sem sá frasi nú er.

Bendi á lokum á nokkrar áhugaverðar greinar á Tomkins Times sem fór mjög ítarlega ofan í þessu mál síðasta vetur.
Allt öðruvísi dómgæsla á Anfield
Erlendir leikmenn njóta ekki sammælis hjá enskum dómurum
Bretar fá oftar víti