Það er dagurinn eftir þennan magnaða úrslitaleik og maður er rétt að koma sér í gírinn fyrir félagsliðaknattspyrnu á nýjan leik. Það var sannarlega ömurlegt að vakna í morgun og sjá að það eru nánast engar fréttir af leikmannamálum að hafa. Ágúst nálgast og enn eru Pennant/Alves/Trabelsi/Joaquin/Sabrosa hvergi í sjónmáli. Endar þetta sumar eins og það síðasta?

En allavega, HM í knattspyrnu lauk í gær og hún kemur ekki aftur fyrr en eftir fjögur ár. Svona rétt til að binda endahnútinn á þessa keppni hef ég tekið saman smá lista. Þetta eru þau tíu atriði sem við lærðum um knattspyrnu yfir þessari Heimsmeistarakeppni:
Continue reading →

Í upphitunum helgarinnar talaði ég um að þessi leikur væri að öðrum ólöstuðum leikur áratugarins. Þótt ég efist um að nokkur knattspyrnuleikur á þessum áratug muni nokkurn tíma takast að vera betri, skemmtilegri og dramatískari en leikur Liverpool og AC Milan í Meistaradeildinni fyrir rúmu ári, þá er þetta sennilega eini leikurinn sem er klárlega stærri en úrslit Meistaradeildarinnar. Og það kom á daginn að þessi leikur olli ekki vonbrigðum.

Leikurinn fór vel af stað og eftir sex mínútna leik fengu Frakkar vítaspyrnu eftir að Marco Materazzi hafði brotið á Florent Malouda innan teigs. Það var erfitt að sjá snertinguna í sjónvarpinu en að mínu mati var samt klárt að Materazzi braut á Malouda; hann stöðvaði hlaupaleið hans og vítið fannst mér augljóst strax áður en ég sá það endursýnt. Úr vítinu skoraði svo Zinedine Zidane með einhverri ótrúlegustu spyrnu sem ég hef séð um ævina. Hann sendi Gianluigi Buffon í vitlaust horn og vippaði helvítis knettinum upp í slána og þaðan niður á grasið … rétt fyrir innan marklínuna. Markið gott og gilt, og ég sagði við sessunauta mína að þetta væri eitthvert ótrúlegasta mark sem sést hefur á HM. Stend við þau orð og mig grunaði jafnvel að þetta víti yrði ekki toppað hvað varðar ótrúlegheitin. Ég átti eftir að hafa rangt fyrir mér.

Á nítjándu mínútu tók Andrea Pirlo frábæra hornspyrnu sem datt niður í miðjan teig Frakka. Þar reis Marco Materazzi manna hæst, át Patrick Vieira upp til agna í skallaeinvígi og jafnaði metin fyrir Ítali. Staðan því orðin 1-1 eftir tuttugu mínútur og strax ljóst að hér væri klassískur leikur á ferð. Næstu 70 mínúturnar kom ekkert mark en leikurinn bauð upp á hina bestu skemmtun; í fyrri hálfleik skiptust liðin á að sækja enda á milli og hefðu bæði getað komist yfir fyrir hlé, en í síðari hálfleik var eins og botninn dytti úr leik Ítala sem hurfu sífellt aftar á vellinum. Það var um þetta leyti sem það sem margir áttu von á að myndi gerast fór að gerast; Zinedine Zidane fór að sýna sig meira og meira í spili Frakka og undir lok leiksins var hann orðinn svo gjörsamlega allsráðandi á vellinum að maður beið eftir því hvenær Frakkar skoruðu sigurmarkið, ekki hvort. Ítalir héldu þó út og leikurinn fór í framlengingu.

Í fyrri hálfleik framlengingar var mikið um baráttu og miðjumoð en Frakkar sköpuðu sér þó hættulegri færi. Það besta kom undir lok hálfleiksins, þegar Willy Sagnol gaf frábæra fyrirgjöf frá hægri á óvaldaðan Zidane sem átti fastan og flottan skalla að markinu. Þeir eru ekki margir markverðirnir sem hefðu varið þennan bolta en til allrar ólukku fyrir Zidane var Buffon í marki Ítala starfinu vaxinn og blakaði boltanum yfir. Zidane öskraði af pirringi, maður sá það á honum að hann vissi að þarna hafði farið kjörið tækifæri fyrir hann að tryggja sinn sess meðal knattspyrnuguðanna. Það kom á daginn að þetta átti eftir að verða það síðasta jákvæða sem við sáum til Zidane á hans langa og gifturíka ferli.

Fyrir leikinn hafði ég íhugað hversu grimm örlög það væru fyrir Zidane að enda mögulega feril sinn á því að tapa í úrslitaleik HM. Ég hugsaði með mér sem svo að það væri varla til ömurlegri endir á ferlinum fyrir þennan mikla kappa. Ég hafði rangt fyrir mér. Eitthvað gerðist utan myndavélar í upphafi síðari hálfleiks framlengingar og maður vissi ekkert hvað var að gerast þegar dómarinn hljóp að Buffon í marki Ítala til að stilla til friðar. Buffon var mjög æstur og Arnar Björnsson talaði eitthvað um David Trezeguet. Loks kom endursýningin, það sem aðal-myndavélin hafði ekki náð og ég held ég tali fyrir hönd okkar allra, knattspyrnuunnenda um allan heim, þegar ég segi að þessi þriggja sekúndna endursýning var sennilega eitt ógeðfelldasta atvik í sögu knattspyrnunnar.

Þarna var það, skýrt eins og sólin: Zinedine Zidane er að hlaupa framhjá Marco Materazzi en snýr skyndilega við, hleypur að þeim ítalska og skallar hann fast í bringuna. Gengur svo í burtu. Kjálkinn á mér í gólfinu, engin orð til að lýsa því sem ég sá. Síðan ég sat á sófa í Bandaríkjunum og horfði á World Trade Center hrynja í beinni útsendingu fyrir fimm árum síðan, þann 11. september, hefur enginn sjónvarpsatburður hneykslað mig jafn mikið, sjokkerað mig jafn svakalega.

Seinni endursýningar sýndu að Materazzi, sem ég hef áður sagt að er einhver ógeðfelldasti og svindlóðasti leikmaður í heiminum í dag, greip um Zidane í vítateig Ítala í hornspyrnu rétt áður. Hann virtist gera meira en halda utan um Zidane, hann virtist klípa í geirvörtu þess franska og láta einhver fúkyrði falla. Svo skokkuðu þeir báðir út úr teig Ítala er sóknin fjaraði út og Materazzi hélt áfram að hrópa svívirðingar í átt að Zidane. Að endanum virðist hann hafa hitt á hina gullnu móðgun, því Zidane sneri sér við og skallaði hann.

Þegar dómarinn var búinn að stilla til friðar og ráðfæra sig við aðstoðardómarann hljóp hann til Zidane og gaf honum rauða spjaldið. Ferlinum lokið. Það var þá sem það virtist daga uppi fyrir Zidane hverjar afleiðingar gjörða sinna eru: hann hafði ekki aðeins hneykslað heiminn og valdið sjálfum sér ótrúlegri skömm á þessari stærstu og glæstustu stund ferils síns (hugsið ykkur bara hvað hann var góður í leiknum) heldur var hann líka búinn að tryggja það að, sama hvernig leikurinn færi, hann yrði samt skúrkur dagsins. Ef Frakkar ynnu leikinn myndi Fabien Barthez hampa titlinum sem fyrirliði, ekki Zidane, og hann yrði vart velkominn í fagnaðarlætin nema þá bara í París daginn eftir. Það sem átti að vera stærsti dagur lífs hans hafði, með nokkrum vel völdum orðum hjá Marco Materazzi og yfirgengilega heimskulegum og ofbeldisfullum viðbrögðum þessa leikreynda kappa breyst í svörtustu martröð. Það síðasta sem við sáum til goðsagnarinnar var er hann grét í örmum Gianluigi Buffon, og svo þegar hann gekk niðurlútur framhjá Heimsmeistarastyttunni og til búningsklefanna.

Nú, eftir þetta atvik var eins og sjokkið drægi allan kraft úr báðum liðum. Franskir áhorfendur á vellinum púuðu það sem eftir lifði leiks, og ég skil þá vel því þeir höfðu ekki endursýningarnar sem við heima í stofu höfðum, og ég vorkenni þeim sárlega að eiga eftir að fara heim til sín og, ofan í öll sárindin að hafa tapað þessum leik, sjá síðan hvernig hetjan þeirra sveik frönsku þjóðina með hegðun sinni.

Eins stórkostlegur leikmaður og Zidane er, og eins viðbjóðslegur og Materazzi er og hefur alltaf verið sem leikmaður, þá þykir mér nánast ómögulegt að vorkenna þeim franska. Tíu mínútur eftir af framlengingu í úrslitaleik fokking Heimsmeistarakeppninnar í knattspyrnu, síðustu tíu mínútur þíns glæsta ferils og það eina sem þú þarft að gera er að bregðast ekki við móðgunum Ítalans á ofbeldisfullan hátt. Það er það eina sem þú þarft að gera; þú getur mætt heim til Materazzi strax á morgun með nokkra vini og kylfur og jafnað málin, en láttu það bara bíða í TÍU FOKKING MÍNÚTUR! Þið eruð með yfirburði á vellinum og hafið þetta allt í hendi ykkur. Og þú gast það ekki. Ég veit vel að Zinedine Zidane les þessa síðu ekki en ég ætla samt að segja þetta: SKAMMASTU ÞÍN!

Og Marco Materazzi má skammast sín líka. Helvítis viðbjóður að horfa á þennan leikmann, leik eftir leik alltaf með sömu ruddataktana. Maður getur rétt ímyndað sér hvað í ósköpunum hann sagði sem fékk Zidane til að fórna öllu sem hann hafði unnið svo hörðum höndum að síðasta mánuðinn, en ég satt best að segja veit ekki hvað í ósköpunum hann hefur getað sagt. Það hlýtur að hafa verið eitthvað magnað, eitthvað ofboðslega móðgandi, og þótt það afsaki gjörðir Zidane engan veginn þá á Materazzi mikla skömm í þessu máli líka.

Nú, að endingu fór þessi leikur í vítaspyrnukeppni og þar voru framkvæmdar níu spyrnur. Ítalir skoruðu úr sínum fimm en Frakkinn David Trézeguet sendi Gianluigi Buffon í rangt horn og skaut knettinum svo upp í markslána og niður á marklínuna. Einn sentimetri til og hann hefði skorað líka. Það er alltaf harður veruleiki að þurfa að tapa í vítaspyrnukeppni, en í kvöld var vart hægt að tapa með minni mun, og það í sjálfum úrslitaleik Heimsmeistarakeppninnar.

Þannig að á endanum eru Ítalir heimsmeistarar, og ég óska þeim innilega til hamingju. Þeir voru þegar allt kemur til alls vel að þessu komnir, höfðu verið jafnbesta liðið allt frá byrjun móts og sýndu bæði frábæra knattspyrnu og hetjulega baráttu í þessum leik. Þeir héldu höfði og Marcello Lippi höndlaði þetta taktískt séð frábærlega. Þeir eru verðugir sigurvegarar í þessari keppni!

Ég segi bara … ÞAÐ ER KOMIÐ AÐ ÞVÍ!!!

Megi betra liðið vinna. :)

“Auðvitað erum við sáttir við mótið hingað til, jafnvel stoltir, en við erum ekki enn búnir að ná markmiði okkar. Við megum ekki dást að okkar eigin afrekum of snemma, til að draumurinn rætist þurfum við að vinna einn leik til viðbótar.”
-Raymond Domenech, landsliðsþjálfari Frakka

Þann 13. júní síðastliðinn skrifaði ég um franska landsliðið að þeir væru “ótrúlega bitlausir” og stakk upp á því að S-Kórea og Tógó gerðu þeim greiða og linuðu þjáningar frönsku þjóðarinnar. Þetta skrifaði ég eftir fyrsta leik liðsins, 0-0 jafntefli gegn Sviss, og eftir annað jafntefli, 1-1 gegn Suður-Kóreu, var ég reiðubúinn að veðja hægri handleggnum á það að Frakkar myndu aldrei í helvíti komast lengra en í 16-liða úrslit keppninnar. Bæði af því að ég sá hversu andlaust liðið var, og af því að ég vissi að eftir jafnteflið gegn S-Kóreu voru þeir líklegast að fara að lenda í öðru sæti riðils síns og mæta Spánverjum í 16-liða úrslitum. Og ég var sko viss um að þeir ættu ekki séns í Spánverjana.

Svo gerðist nokkuð skrýtið. Ég sat heima hjá vini mínum og við horfðum á leik Frakka og Spánverja saman. Og fyrsta hálftímann einkenndust samræður okkar af því að leikurinn, þennan fyrsta hálftíma eða svo, virtist staðfesta allt sem við vissum um Frakkana; þeir voru andlausir, of gamlir, bitlausir og á leiðinni heim.

Svo fékk Patrick Vieira boltann; spænska vörnin lék Henry rangstæðan en gott hlaup Frank Ribery innfyrir kom þeim í opna skjöldu og þessi smávaxni vængmaður, sem kallaður er Jókerinn í heimalandi sínu vegna brunasára í andliti, var skyndilega búinn að jafna leikinn og “slá í gegn” á HM, eins og þulurinn orðaði það. En það var ekki jöfnunarmark Frakka sem varð til þess að á mig runnu tvær grímur. Nei, það voru viðbrögð þeirra. Þegar fagnaðarlátunum linnti sá ég, svo ekki varð um villst, hversu ákveðnir þeir voru. Zidane hljóp manna á milli rétt áður en Spánverjar tóku miðju og sendi hverjum manni sérsniðin skilaboð. “Henry, mundu hlaupin þín.” “Vieira, haltu áfram svona.” “Ribery, hlauptu þangað.” Eitthvað í þá áttina, en það var ljóst að heilinn í Zidane var að brenna yfirum á akkúrrat þessu augnabliki.

Nokkrum mínútum síðar var flautað til hálfleiks og á leiðinni til búningsklefanna sá maður Zidane, Gallas, Thuram og Makelele í hrókasamræðum. Kóngurinn lét ekki staðar numið við sóknarleikinn heldur var hann að samstilla sig og varnarmennina fyrir aftan sig líka. Þennan hálfleikinn spurðu ég og félagi minn okkur í fyrsta sinn í þessari keppni: Eru Frakkar að hrökkva í gang?

Svarið var ótrívætt já, og síðan Ribery skaut sér innfyrir vörn Spánverja og skoraði hafa þeir ekki litið um öxl. Ólíkt Ítölum, sem hafa verið massífir alla keppnina, má sjá ákveðinn stíganda hjá Frökkunum. Þeir hafa eftir því sem liðið hefur á mótið þróast úr algjörri meðalmennsku upp í að sýna sitt gamla, góða form:

Sviss: 0-0 jafntefli.
S-Kórea: 1-1 jafntefli.
Tógó: 2-0 sigur.
Spánn: 3-1 sigur.
Brasilía: 1-0 sigur.
Portúgal: 1-0 sigur.

Sex leikir; tvö jafntefli og svo fjórir sigrar. Markatalan er 8-2. Spánverjar skoruðu úr vítaspyrnu gegn þeim og Ji-Sung Park jafnaði fyrir Kóreu á lokamínútum þess leiks með poti yfir Barthez, sem verður að skrifast á markvörðinn. Og talandi um markvörðinn, þá er erfitt að finna bilbug á franska liðinu varnarlega þessa dagana en ef það er eitthvað sem getur látið undan þá er það Fabien Barthez. Við þekkjum hann allir og höfum séð þetta allt margoft til hans – spyrjið bara Rikka Daða. Hann er mistækur, og þótt honum hafi ekki verið refsað nógu grimmilega í þessari keppni hingað til (hefur átt a.m.k. eitt klúður í hverjum einasta leik) þá er hann að fara að mæta grimmustu framherjum heims; þeim ítölsku, og þeir munu éta upp öll mistök hans og nýta þau betur en Figo og félagar gerðu í undanúrslitunum.

Fyrir framan Barthez er hins vegar feykisterk vörn, sú sterkasta í keppninni á eftir þeirri ítölsku, og rétt eins og hjá Ítölunum er vörnin vernduð af tveimur miðjupaurum í feykistuði – Claude Makelele og Patrick Vieira – og þar fyrir framan eru tveir iðnir og góðir kantmenn, Malouda og Ribery, og svo krúnudjásnið sjálft, Zidane. Fremstur er svo Thierry Henry, sem þrátt fyrir að hafa skorað þrjú mörk í þessari keppni og fiskað eitt víti hefur ekki náð að sýna sínar bestu hliðar, enda er honum ekki eðlislægt að spila sem fremsti maður en hann skilar því hlutverki samt ágætlega sem slíkur.

Vandamál Frakka liggur því ekki í vörninni, og ef Barthez á góðan dag þarf ekki að hafa áhyggjur af honum. Vandamál Frakkanna liggur í því hvernig í ósköpunum þeir ætla að brjóta ítölsku vörnina á bak aftur. Átta mörk í sex leikjum er ekkert sérstök tölfræði fyrir lið sem er komið í úrslit HM, og ætti því ekki að skjóta Ítölunum skelk í bringu. Enn fremur, þá hafa aðeins fjórir Frakkar skorað þessi átta mörk; Henry (3), Zidane (2), Vieira (2) og Ribery (1). Á móti hafa tíu Ítalir skorað ellefu mörk, en Luca Toni er sá eini sem er kominn upp í heil tvö stykki í þeirra herbúðum. Þannig að þótt Ítalir skarti engum einum framherja sem er jafn skæður og Thierry Henry þurfa Frakkar að hafa áhyggjur af töluvert fleiri Ítölum, sóknarlega séð, en öfugt.

Á móti kemur þó að Frakkar hafa ekki aðeins besta framherjann í keppninni (já, ég sagði það!) heldur líka öflugasta miðjumanninn. Langöflugasta. Það þarf eitthvað alvarlega mikið að gerast til að Zinedine Zidane verði ekki valinn leikmaður mótsins, og ef hann vinnur HM á morgun með Frökkum getum við neglt það fast að hann verður valinn leikmaður ársins hjá FIFA líka næstkomandi desember. Þannig er það bara, og ég ætla að leyfa mér að varpa smá sprengju hérna: hvernig sem þessi úrslitaleikur á morgun fer er Zinedine Zidane, með frammistöðu sinni í þessu móti, búinn að tryggja sér sess við hliðina á þeim Pele og Diego Maradona sem þrír bestu knattspyrnumenn allra tíma! Allt frá því að ég man eftir mér hafa menn talað um þá tvo sem guði knattspyrnunnar, klassa ofar en alla aðra, en Zidane hefur að mínu mati sýnt það síðastliðin tólf ár (frá því ég tók fyrst eftir honum hjá Bordeaux; hann skoraði frá miðju í Evrópukeppni félagsliða og ég sá það í íþróttaþætti Ríkissjónvarpsins, gleymi því aldrei) að hann er fyllilega jafnoki þeirra tveggja.

Sumir myndu kannski vilja benda á Franz Beckenbauer og/eða Johan Cruyff í þessum efnum, en ég segi á móti að Cruyff vann ekkert í líkingu við það sem Zidane hefur afrekað sem leikmaður og Beckenbauer, þrátt fyrir að hafa unnið HM, var ekki sami listamaðurinn með knöttinn og Zidane. Hvernig sem fer á morgun þá held ég að menn geti farið að venjast því að tala um þrjá guði knattspyrnunnar. Kannski tyllir Ronaldinho sér endanlega á stall með þessum þremur á næstu árum; sem Barcelona-maður vona ég það allavega, en það er ekki hægt að neita því að ég hef rétt fyrir mér varðandi manninn sem kallaður er Zizou í heimalandi sínu.

Sem sagt, stærsti leikur áratugarins fer fram í Berlín á morgun og þar mætast tvö lið sem eru að upplifa ákveðin vatnaskil í knattspyrnusögu sinna þjóða. Hvort sem Frakkar vinna eða tapa er ljóst að lið þeirra mun hljóta endurnýjun lífdaga strax í haust, þegar gamla meistarasveitin með Zidane í broddi fylkingar lætur af störfum og nýir menn fá það verkefni að byggja upp lið, væntanlega í kringum Thierry Henry. Ef Ítalir vinna HM á morgun gætu margir leikmanna þeirra lent í þeirri skrýtnu stöðu að vera heimsmeistarar í knattspyrnu, en spilandi í næstefstu deild heimalands síns, eða jafnvel þriðju efstu. Á föstudaginn kemur verður dæmt í spillingarmálinu á Ítalíu og ef Ítalir vinna HM á morgun gæti sá dagur orðið mjög blendinn fyrir leikmenn landsliðsins.

Hvað sem verður er ljóst að dagurinn verður rosalegur. Totti, Del Piero, jafnvel Cannavaro hætta með landsliði Ítala eftir þennan leik og allt liðið er að leika til heiðurs vini sínum, Gianluca Pessotto sem er á spítala eftir sjálfsmorðstilraun. Heima fyrir er ítalska þjóðin, í miðju hneyksli, að verða ástfangin af hinni fallegu íþrótt upp á nýjan leik, á gamla mátann. Gegnt þeim eru fyrrverandi heims- og Evrópumeistarar Frakka, margir af snjöllustu leikmönnum síðustu ára með knattspyrnuguðinn Zinedine Zidane í fararbroddi.

Þetta verður magnað. Ég get ekki beðið, og mér dettur ekki í hug að spá fyrir um úrslit leiksins. AÐEINS EINN DAGUR TIL STEFNU!

“Við höfum safnað upp mikilli reiði á síðustu tveimur stórmótum. Í þessari keppni höfum við beislað þessa reiði og það hefur sýnt sig bersýnilega – við höfum nýtt þessa reiði okkar og gert úr henni eitthvað jákvætt”
-Fabio Cannavaro, fyrirliði Ítala

Tólf ár. Það er sá tími sem það tekur ítalska landsliðið að hlaða upp í alvöru atlögu að heimsmeistaratigninni í knattspyrnu. Árið 1970 voru þeir gjörsigraðir í úrslitaleik HM af liði Brasilíumanna sem sumir vilja meina að sé það besta í sögu knattspyrnunnar. Árið 1982 unnu þeir HM á Spáni með sigri á Vestur-Þýskalandi, en það ár var öll ítalska knattspyrnan í uppnámi vegna hneykslismála í sambandi við mútuþægni og spillingu. Hljómar það kunnuglega? Árið 1994 töpuðu þeir í úrslitum, aftur fyrir Brasilíumönnum, í vítaspyrnukeppni. Og nú, tólf árum síðar, eru þeir aftur komnir í úrslit.

1970: tap fyrir Brasilíu.
1982: mútuhneyksli, og svo sigur gegn Evrópuþjóð.
1994: tap fyrir Brasilíu.
2006: mútuhneyksli, og svo _____ gegn Evrópuþjóð?

Fyrir keppnina hefði ég sagt fólki að Frakkland og Ítalía væru tvö af minna spennandi Evrópuþjóðunum í keppninni. Ítalir hafa undanfarin ár getið sér góðs orðs fyrir að vera allt of varnarsinnaðir, varkárir og hreinlega leiðinlegir sem landslið, auk þess að vera með mikinn leikaraskap inná vellinum. Í þessari keppni hafa Portúgalir fyllilega tekið við Óskarsverðlaununum sem Ítalir hömpuðu áður, og svo hefur komið á daginn að þeir bláklæddu hafa verið með skemmtilegri, öflugri og betri liðum keppninnar. Leikir þeirra hingað til í keppninni hafa farið svo:

Ghana: 2-0 sigur.
USA: 1-1 jafntefli.
Tékkland: 2-0 sigur.
Ástralía: 1-0 sigur.
Úkraína: 3-0 sigur.
Þýskaland: 2-0 sigur.

Sex leikir; fimm sigrar og eitt jafntefli, og það í leik þar sem þrjú rauð spjöld litu dagsins ljós. Aðeins eitt mark fengið á sig í allri keppninni, og það kom gegn Bandaríkjunum þegar varnarmaðurinn Zaccardo ætlaði að hreinsa frá eigin marki en hitti boltann ekki og setti hann framhjá Buffon í staðinn. Zaccardo hefur spilað lítið í mótinu síðan hann skoraði sjálfsmark, og vörnin hefur fyrir utan þetta eina atvik verið gallalaus í þessari keppni. Markatala Ítala er 11-1 fyrir úrslitaleikinn.

Maður spyr sig hvort það geti eitthvað lið stöðvað þá. Auk þess að vera með besta markvörð í heimi og frábæra vörn skarta þeir geggjaðri miðju; ef Totti á góðan dag er hann lykilmaður þeirra og þeir Pirlo og Gattuso munu láta Zidane hafa meira fyrir hlutunum en nokkur önnur miðja sem hann hefur mætt til þessa. Simone Perrotta og Mauro Camoranesi hafa komið sterkir inn á vængjunum í keppninni, auk þess sem bakverðirnir Fabio Grosso og Gianluca Zambrotta hafa tekið við krúnu Roberto Carlos og Cafú sem kóngar sóknarbakvarðanna. Frammi hefur þjálfarinn Marcelo Lippi svo úr þeim Luca Toni, Alberto Gilardino, Vicenzo Iaquinta og Alessandro Del Piero að velja. Ekkert smá öflugur mannskapur það.

Svo er það bara spurning hvort örlögin eru ekki með Ítölum í þessari keppni? Sagan segir okkur allavega að þeir vinni Úrslitaleiki á HM, ef þeir eru að mæta Evrópuþjóðum og ef það eru hneykslismál heima fyrir. Þeir eru líka með vörn sem ég á erfitt með að sjá Frakkana brjóta á bak aftur, miðju sem gæti mögulega eyðilagt örlagadag Zinedine Zidane og sóknarmenn sem eru nógu grimmir til að nýta sér öll þau mistök sem Frakkar kunna að gera.

Það er allavega ljóst í mínum huga að ef Ítalir verða heimsmeistarar á sunnudaginn verða þeir vel að titlinum komnir; þeir hafa verið sterkasta liðið í þessari keppni frá fyrstu til síðustu leikja og virðast vera með besta landslið í heiminum akkúrrat núna, sem er það sem gildir í svona keppni.

Spurningin er bara: getur eitthvað lið stöðvað Ítali? Spáum í Frakkland á morgun.

Robbie Fowler [ver Jamie Carragher](http://home.skysports.com/worldcup/article.aspx?hlid=401045&CPID=4&clid=114&lid=3&title=Fowler+blasts+Carra+critics) vegna vítaspyrnunnar sem hann klúðraði á dögunum gegn Portúgal (djö… var ég ánægður þegar Frakkland vann í gær). Tord Grip gagnrýndi Carragher nýverið og núna var fyrrum þrekþjálfari enska landsliðsins, Ivan Carminati, að segja að Carragher hafi guggnað.

“There are plenty of players who don’t possess an ounce of courage and go missing when the chips are down. But to say that Carra doesn’t have bottle is ridiculous. You only have to look at his performances for Liverpool during big games to know nothing could be further from the truth. When the chips are down, Carra is one of the first players you would want alongside you in the trenches. It is insulting to blame Carra or any of the other players – it’s not as if they missed on purpose.”

Fowler klikkar aldrei og mun verja sína liðfélaga fram í rauðan dauðann (ætli Ronaldo myndi gera það?)

Tord Grip sem var aðstoðarmaður Sven-Goran Eriksson hjá enska landsliðinu [gagnrýnir Carragher fyrir að hafa ekki verið með reglurnar á hreinu](http://home.skysports.com/worldcup/article.aspx?hlid=400461&CPID=4&clid=114&lid=2&title=Grip+blasts+Carragher) varðandi framkvæmd vítaspyrnukeppni þ.e. Carragher skaut áður en dómarinn flautaði vítið á.

Mér segir sá hugur að Carragher hafi verið stressaður og bara farið á taugum og þess vegna skotið of snemma. Annars finnst mér nú lágkúrulegt að taka Carragher út þar sem vítin hjá m.a. fyrirliða okkar voru nú engu betri. En betra er að þeir tapi í vítaspyrnukeppni með enska landsliðinu en Liverpool.

“Við fórum kannski hægt af stað, en þær þjóðir sem voru að spila best í byrjun móts munu allar horfa á undanúrslitin í sjónvarpinu.”
-Raymond Domenech, þjálfari Frakka

Michael Ballack. Francesco Totti. Luis Figo. Zinedine Zidane. Fjórar af stærstu og mestu hetjum evrópskrar knattspyrnu síðasta rúma áratuginn, og burtséð frá áliti manna á hverjum og einum þeirra þá er eitthvað svo rétt við það að einn þeirra muni hampa heimsmeistaratitlinum eftir viku. Jafnvel þótt Fabio Cannavaro sé fyrirliði Ítala, og ekki Totti, þá þekki ég nokkra Ítali sem munu láta eins og allt sé gott í heimi vorum ef Totti fær að halda á styttunni þungu áður en hans ferli lýkur.

Eins og Raymond Domenech sagði eftir frækinn sigur á núverandi heimsmeisturum Brasilíu í gær, þá skiptir ekki mestu máli að byrja vel heldur að enda vel. Við Liverpool-menn þekkjum þessi fræði; þegar okkar menn töpuðu fyrir Olympiakos og Mónakó á útivelli, og spiluðu frekar illa, þá grunaði engann að nokkrum mánuðum síðar myndi Steven Gerrard lyfta Evrópubikarnum í Istanbúl (besta dæmi sem ég þekki um karmískt réttlæti heimsins, það sem Þjóðverjar, Ítalir, Portúgalir og Frakkar láta sig nú dreyma um). Það skiptir öllu að enda keppnina vel.

Hverjir munu standa uppi sem sigurvegarar? Margir veðja á að heimamenn fari alla leið, úr því þeir gátu unnið Argentínu, og benda þar á hina klassísku seiglu sem virðist vera hluti af súrefninu í Þýskalandi. Aðrir segja að Frakkarnir séu líklegir, þar sem í þeirra röðum séu enn margir leikmenn sem hafa farið alla leið áður og vita hvað til þarf. Enn aðrir segja svo eflaust að Ítalir hljóti að vinna þetta, þar sem hið dramatíska “slys” Gianluca Pessotto fyrir tæpri viku síðan hafi þjappað hóp þeirra saman og myndað þéttari einhug en fyrr, á meðan síðasti hópurinn vill meina að Big Phil Scolari, landsliðsþjálfari Portúgala, einfaldlega geti ekki tapað leik í Heimsmeistarakeppni.

Allt góðar og gildar ástæður fyrir sigri á HM, og allt eru þetta góðir leiðtogar og vel hæfir til að leiða lið sín til sigurs í stærstu íþróttakeppni heims. En það er nú einu sinni svo í knattspyrnunni að ekkert er fyrirfram öruggt; það er eitt af því sem gerir hana svo skemmtilega. Og rétt eins og Þjóðverjar gátu unnið Argentínumenn, sem flestir héldu að væru að innbyrða þessa keppni frekar létt, þá gætu þeir tapað fyrir Ítölum einmitt þegar engir nema Ítalir trúa að þeir geti tapað á heimavelli. Og rétt eins og Zidane reis upp úr ösku eigin ferils eins og fönix og hóf sig hátt til flugs í gær gegn Brasilíumönnum (besta frammistaða eins leikmanns í keppninni, ekki spurning) gæti Figo fellt hann á eigin bragði nú þegar allir halda að Frakkar séu ósigrandi.

Fyrir mótið var ég næsta viss um að Brasilíumenn yrðu ekki stöðvaðir. Í raun trúði ég því enn ekki að þeir gætu tapað fyrr en svona kortér var eftir í leik þeirra gegn Frökkunum. Í upphafi móts hugsaði ég fyrst með mér að kannski væri tími Spánverjanna loks kominn (hversu vitlaus getur maður verið?) og svo að Argentínumenn væru of góðir til að vinna þetta ekki. Nú síðast í gærmorgun fann ég svo innilega á mér að Englendingar gætu farið alla leið að ég var hreinlega steinhissa að sjá þá tapa fyrir Portúgölum.

Í dag finnst mér Zinedine Zidane vera langbesti leikmaður sem ég hef verið svo heppinn að sjá spila á minni ævi, Þjóðverjar vera sannarlega ósigrandi á heimavelli og algjörlega ómögulegt að hugsa til þess að Chelsea vinni ekki Englandsmeistaratitilinn á næstu leiktíð. En ég hef verið viss um margt í knattspyrnu áður, og jafnharðan verið minntur á að ekkert er fyrirfram öruggt. Þannig að ég býst við að vera leiðréttur; fyrst í undanúrslitum Heimsmeistarakeppninnar og svo vonandi í vetur líka. :)

Hvað halda menn? Hverjir verða Heimsmeistarar í knattspyrnu árið 2006? Skráið ykkar skoðun hér í dag, svo þið getið sagt “I told you so” við okkur hina eftir viku.

Og þar með er þátttöku leikmanna Liverpool á HM lokið, eftir að Englendingar töpuðu í vító fyrir Portúgal í dag. Peter Crouch spilaði síðasta hálftímann og framlengingu og var margfalt nær því að skapa mark eða skora sjálfur heldur en Wayne Rooney hafði verið fyrsta klukkutímann. Steven Gerrard lék allan leikinn og lét verja hjá sér spyrnu í vító, á meðan Jamie Carragher var settur inná á 117. mínútu til þess eins að geta tekið víti, en hann lét Ricardo líka verja frá sér, sem og Chelsea-maðurinn Frank Lampard sem fullkomnaði martraðarmót sitt með sínu víti.

Ég var tilbúinn með reiðipistil um Sven Göran Eriksson, sem lætur nú af störfum sem landsliðsþjálfari Englendinga eftir sex ár sem hafa lofað miklu en skilað nákvæmlega engu. Ég hef verið ósammála flestu sem hann hefur gert í þessari keppni og fundist nær ótrúlegt að, eftir sex ár skuli hann enn hafa verið að prófa sig áfram með leikaðferðir í 16-liða úrslitum þessarar keppni. Á endanum var það þó ekki honum að kenna að þeir duttu út í dag.

Vafalítið munu ensku blöðin fjalla um þá Lampard, Gerrard og Carragher sem létu allir Ricardo verja frá sér víti í bráðabananum. Þeir verða eflaust málaðir sem skúrkar dagsins og talað verður um að þeir hafi brugðist trausti ensku þjóðarinnar. Svo munu þeir eflaust eftir ár leika í auglýsingu fyrir Pizza Hut með bréfpoka á höfðum sínum, eins og Stuart Pearce og Gareth Southgate gerðu eftir EM fyrir 10 árum síðan.

En ég er nánast fullviss um að Englendingar munu hlífa manninum sem var virkilega sökudólgurinn í dag. Því þótt hann hafi fengið erfitt hlutverk, einn frammi, og jafnvel þótt Englendingar hafi verið með fín tök á þessum leik, þá er alveg ljóst í mínum huga (og Einars, sem ég ræddi við eftir leikinn og orð hans sannfærðu mig um sök málsins) að ungstirnið/ofurhetjan/undrabarnið WAYNE ROONEY skeit á sig í dag. Upp á bak!

Hvað var hann að hugsa? Að traðka á fjölskyldudjásnum Ricardo Carvalho, eftir að búið var að dæma aukaspyrnu á þann síðarnefnda? Og að innsigla svo brottvísunina með því að hrinda Cristiano Ronaldo, sem nota bene kom aðvífandi bara til þess eins að reyna að mana Rooney upp í frekari vitleysu? Það var mikið traust lagt á Rooney af hálfu ensku þjóðarinnar í ár, og jafnvel enn meira eftir að Owen haltraði meiddur af velli gegn Svíum, en í stað þess að leyfa Peter Crouch, sem hafði ekki brugðist trausti Englendinga svo mikið sem einu sinni, að axla hluta af ábyrgðinni og um leið gera Rooney auðveldara fyrir þarna frammi, þá tók Sven Göran þann stóra bara út úr liðinu algjörlega í síðustu tveimur leikjum og lét þetta allt saman standa og falla með Rooney.

Og á daginn kom að Wonder-Wayne stóð engan veginn undir þessari pressu, þessu áliti ensku þjóðarinnar eða því trausti sem hafði verið lagt á hann. Jú, hann var ekki í fullu leikformi í þessari keppni en hann var heldur ekki nægilega klókur leikmaður til að spila einn frammi, og á endanum hljóp skapið með hann í gönur.

Englendingar eru dottnir úr leik. Allt í lagi með það, mér hefur yfirleitt verið nokk sama um þá. En Gerrard og Carragher klúðruðu vítaspyrnum og verða örugglega hundeltir af fjölmiðlum fyrir vikið, sem er neikvætt fyrir okkur Púllarana. Það neikvæðasta af öllu saman þó er það að Portúgal – og þá sérstaklega Cristiano Ronaldo – eru komnir í undanúrslit. Ég hef sagt það áður og ég segi það aftur, þurfi einhver staðfestingu á því eftir að hafa horft á þessa leiksýningu í dag: PORTÚGALIR ERU LEIÐINLEGASTA FOKKING FÓTBOLTALIÐ Í HEIMINUM!

Cristiano Ronaldo. Luis Figo. Simao Sabrosa. Maniche. Pedro Pauleta. Petit. Tiago Mendes. Helder Postiga. Hugo Viana. Og til að toppa þetta er Luis Boa Morte, einn mesti leikari í enska boltanum, á bekknum hjá þeim.

Er til leiðinlegra fótboltalið í heiminum? Ég held ekki. Og alveg burtséð frá því hvort Frakkar eða Brasilíumenn vinna í kvöld, þá mun ég styðja fyllilega við bakið á sigurliðinu úr þeim leik gegn Portúgal í undanúrslitum. Mér er sama hverjir vinna HM í knattspyrnu, svo lengi sem það er ekki mesta leikaralið í heiminum, Portúgal. Þeir einfaldlega mega ekki vinna þessa keppni!

En já, þið lásuð það fyrst hér: Rooney var óheppinn í dag en Gerrard, Carragher og Lampard ættu að skammast sín. Þannig mun enska pressan fjalla um þennan leik, því að Wayne Rooney gerir aldrei mistök. Er það nokkuð?!?

Sven Göran Eriksson, þetta [eru skilaboð frá almættinu](http://news.bbc.co.uk/sport2/hi/football/world_cup_2006/4991618.stm): Spilaðu 4-4-2 með Beckham, Carrick, Gerrard, Cole á miðjunni og Crouch & Rooney frammi. Öðruvísi munt þú ekki vinna!

Í alvöru, ef að þetta sænska fífl ákveður að spila aftur með Rooney einn frammi, þá mun England ekki vinna. Þrátt fyrir að Rooney hafi klobbað einhverja Ekvadora, þá mun hann ekki geta staðið sig einn gegn Carvalho og félögum. Auðveldasta lausnin er að setja Lampard á bekkinn, gefa Gerrard meira frjálsræði og spila frammi með Crouch og Rooney.

En hverjum er ekki svo sem sama. Eina liðið mitt, sem er eftir í keppninni ætlar að taka Þýskaland í óæðri endann í dag. **ARRRRRR-Gen-tina!**

Jæja, það er komið að því. Á morgun eru fyrri tveir leikirnir í 8-liða úrslitum HM í knattspyrnu og það verður sko rosaleg veisla fyrir fótboltaaðdáendur! Af því að maður er þegar kominn með fráhvarfseinkenni, eftir tveggja daga frí frá HM, þá ákvað ég að stytta mér biðina aðeins og spá í spilin fyrir leiki morgundagsins. Þannig að hér kemur mín spá:

ÞÝSKALAND – ARGENTÍNA: Þetta er að mínu mati stórleikur 8-liða úrslitanna, því þótt Brasilíumenn og Frakkar rifji upp úrslitaleikinn frá því fyrir átta árum þá eru þetta tvö sigurstranglegustu lið keppninnar að mínu mati. Ég hef rætt þetta við marga í vinnunni í dag og segi það sama við alla: það lið sem vinnur þennan leik er það lið sem ég tel að muni vinna HM. Ef Þjóðverjar geta unnið Argentínumenn þá geta þeir unnið öll hin liðin sem eftir eru, en ef Argentínumenn komast framhjá heimamönnum ættu þeir að fara alla leið í þessari keppni.

Þetta verður rosalegur leikur, ekki síst vegna þess að Klinsmann er búinn að lofa sóknarbolta. Þjóðverjarnir hafa verið frábærir fram á við í þessari keppni og því er ljóst að þeir munu byrja af hörku og reyna að nota múgæsing aðdáenda sinna á heimavelli til að skora snemma og kaffæra Argentínumennina. Ég held að lykillinn að sigri Argentínumanna felist í því að ná að lifa af svona fyrsta kortérið og vinna sig svo smám saman inn í leikinn. Ef Argentínumenn skora á undan gæti þýska blaðran sprungið en ef Þjóðverjar skora á undan gæti krafturinn í þeim orðið til þess að þeir geri út um þetta strax í fyrri hálfleik, eins og gerðist gegn Svíunum.

MÍN SPÁ: Markalaust í hálfleik eftir algjöra flugeldasýningu en Argentínumenn vinna 2-1 í seinni hálfleiknum. Taktísk snilli Pekerman og frábærir einstaklingar Argentínumanna munu skila þeim í mark á endanum og ég spái því að Hernan Crespo fari fram úr Miroslav Klose í keppninni um markakóngstignina með tvennu á morgun.

ÍTALÍA – ÚKRAÍNA: Þessi leikur ætti á pappírnum að vera öllu ójafnari en sá fyrri, enda er Úkraína spútniklið keppninnar og í raun það eina sem ætti ekki að vera þarna, að öllu eðlilegu. Ef Frakkar hefðu unnið sinn riðil hefðu þeir átt að vinna Úkraínu í 16-liða úrslitunum og Spánverjar að vinna Sviss og mæta Brössum, en þá værum við með öll átta liðin sem voru í efsta potti fyrir riðladráttinn hérna. En svo fór þó ekki og þegar Úkraínumenn eru annars vegar er ekki hægt að afskrifa þá. Fótbolti er skrýtin íþrótt og ég myndi ekki deyja úr áfalli ef Andryi Schevchenko reyndist vera maður dagsins á morgun. Hann þekkir allavega vel inná ítalskar varnir.

Ítalir eru í smávegis vandræðum með meiðsli og bönn, en Alessandro Nesta verður ekki með á morgun og Marco Materazzi, varaskeifa hans, er í leikbanni. Þannig að hin annars sterka ítalska vörn verður veik fyrir á morgun og það er ljóst að hinn frábæri Fabio Cannavaro, sem hefur verið einn af mönnum þessa móts hingað til fyrir mér, þarf að hafa sig allan við að stöðva Sheva. Hinum megin þá bara hlýtur að vera kominn tími á að Luca Toni og/eða Alberto Gilardino fari að skora mörk í þessari keppni. Þeir hafa vaðið í færum í öllum leikjum en verið dæmalaust klaufskir.

MÍN SPÁ: Ítalía vinnur þennan leik 2-1 eftir að Schevchenko kemur Úkraínumönnum óvænt yfir. Toni og Totti skora mörk Ítalanna, sá síðarnefndi með einu af mörkum keppninnar. Þið lásuð það hér fyrst! ;)

Átta liða úrslitin á morgun! Djöfull er maður orðinn spenntur! Þetta verður ROSALEGT!!

Ég var eiginlega búinn að gleyma þessu, en var [minntur]() þegar ég las frétt á BBC.

Allavegana, eftir úrslitaleikinn í Meistaradeildinni kom Thierry Henry fram með þessi ummæli:

>Next time I’ll learn to dive maybe, but I’m not a woman

Eftir Spánarleikinn, þá er greinilegt að hann hefur [lært fljótt](http://www.youtube.com/watch?v=MLlruACJbvU&search=puyol%20henry). Þetta kallast víst hræsni.

Jæja, okkar menn í spænska landsliðinu eru dottnir útaf HM. Þeir töpuðu fyrir Frakklandi. Þetta var verulega sárt, því Spánn hefði vel getað unnið þennan leik, þeir höfðu svo sannarlega styrk til þess.

En Spánverjar réðu hreinlega ekki við vörn Frakkanna með þá Gallas og Thuram fremsta í flokki. Munurinn á liðunum sást oft greinilega á varnarleiknum, en Puyol var frekar óöruggur í spænska liðinu. Af Liverpool mönnunum, þá spilaði **Xabi Alonso** allan leikinn og lék ágætlega, en þó unnu Frakkarnir miðjubaráttuna líka.

**Luis Garcia** kom svo inn sem varamaður fyrir Raúl í kringum 60. mínútu. Hann var líflegur og átti einn skalla á markið. Hann og Joaquin sprautuðu smá lífi í sóknarleik Spánverja (sem var áður steindauður), en það var ekki nóg.

Helvítist Vieira og félagar eru því komnir áfram og enn einu sinni eru Spánverjar farnir alltof snemma heim. Þvílík vonbrigði. Núna eru einu Liverpool mennirnir eftir á HM Englendingarnir fjórir. Kromkamp, Kewell, Xabi, Luis og Pepe eru allir dottnir út í 16 liða úrslitunum. Það er sorglegt.

Rödd skynseminnar í dag: [Gordon Strachan: Bring back Crouch and let Rooney do his own thing](http://blogs.guardian.co.uk/worldcup06/2006/06/27/bring_back_crouch_and_let_roon.html).

Já, og svo vill Ronaldo bara [fara frá Man U](http://home.skysports.com/list.asp?hlid=398695&CPID=8&clid=359&lid=2&title=Ronaldo+ready+for+Real+switch). Ja hérna! Man U menn verða í verulegum vandræðum ef þeir missa bæði van Nilsteroy *og* Ronaldo.

Já, og þetta [kvót](http://football.guardian.co.uk/worldcup2006/story/0,,1806874,00.html) er einfaldlega of fyndið:

>When Aragonés was asked yesterday whether he would apologise to the forward in person tonight, he said: “No, no, don’t go down that road. Henry knows through Reyes, through everything [how I feel]. I won’t talk about it for another second. It’s a topic that isn’t worth talking about. Why? Because it’s not like that. I have black, Gypsy and Japanese friends, **including one whose job is to determine the sex of poultry.**”

Jæja, [ævintýri Ástrala á HM](http://news.bbc.co.uk/sport1/hi/football/world_cup_2006/4991534.stm) er núna lokið, en Harry Kewell og félagar töpuðu 1-0 fyrir Ítölum í dag.

Leikurinn var skemmtilegur og þrátt fyrir að Ítalir hafi verið sterkari, þá gátu Ástralir klárlega klárað þennan leik. Harry Kewell lék ekkert í leiknum, en hann var meiddur og sást m.a. á hækjum fyrir leikinn. Leiðinlegt fyrir hann og Ástrala.

Leikurinn réðist á **fáránlegri** vítaspyrnu. Ég hélt að það myndi seint gerast á þessari síðu að ég myndi verja gjörðir Lucas Neill, en að mínu mati var þessi vítaspyrnudómur fáránlegur. Neill renndi sér í tæklingu en náði hvorki í bolta né mann og lá eftir á vellinum. Þegar að Neill lá í jörðinni keyrði Grosso á hann og féll niður í teignum. Víti dæmt og úr því skoraði Totti og sendi Ítala áfram í 8 liða úrslitin þar sem þeir munu annaðhvort spila við Sviss eða Úkraínu.

**Uppfært (KAR):** Ókei, Ítalir munu mæta Úkraínu í 8-liða úrslitunum eftir að þeir síðarnefndu slógu Svisslendinga út í vítaspyrnukeppni í kvöld. Þeir unnu vítaspyrnukeppnina 3-0, og það þrátt fyrir að Andryi Schevchenko léti verja hjá sér fyrstu spyrnu kvöldsins. Ég held ég tali fyrir hönd allra Liverpool-stuðningsmanna þegar ég spyr: *um hvað ætli Sheva hafi verið að hugsa þegar hann steig á punktinn fyrir vítið sitt í kvöld? Hmmmmm … ?*

Jerzy, ég vona að þú hafir verið að horfa … ;)

Ókei, tveir leikir í dag en ég ætla bara að fjalla um einn. Fyrst unnu Englendingar nauman 1-0 sigur á Ekvador í einum leiðinlegasta leik mótsins. Ef Beckham hefði ekki sett þessa aukaspyrnu inn hefðu Englendingar ekkert gert til að vinna þann leik, þannig að þeir verða að gera betur í næstu umferð ef ekki á að fara illa.

Í seinni leiknum mættust síðan Hollendingar og Portúgalir, og þótt aðeins hafi verið skorað eitt mark var þetta einn skemmtilegasti og dramatískasti leikur keppninnar hingað til. Portúgalir unnu á endanum 1-0 eftir að Maniche skoraði í fyrri hálfleik, en alls fengu fjórir leikmenn að líta rauða spjaldið, eða tveir úr hvorum liðum.

Ég ætla ekki að ræða spjöldin sem mér fannst öll vera réttlát. Ég ætla heldur ekki að ræða Portúgalina, sem eru með eitt leiðinlegasta liðið í keppninni og eru svo óheiðarlegir að það hálfa væri nóg. Þeir áttu engu að síður sigurinn í þessum leik skilinn, og það er það sem ég ætla að ræða. Eins og glöggir lesendur síðunnar hafa tekið eftir berum við Einar Örn mjög sterkar taugar til hollenska liðsins, en fyrir utan leikmenn Liverpool í sínum landsliðum er lið Hollands jafnan það eina sem ég held með í stórmótum. Þetta tengist þjálfara liðsins, Marco Van Basten, allmikið því það var í blómatíma hans og hinna stjarnanna í gullliðinu sem ég féll fyrst fyrir Hollendingum. Þannig að í kvöld mætti segja að hafi orðið eilítið stjörnuhrap hjá mér, þar sem ég sá að þjálfarinn Van Basten kemst ekki með tærnar þar sem leikmaðurinn Van Basten hafði hælana.

Fyrst ætla ég að nefna það sem ég ætla ekki að skamma hann fyrir: liðsvalið. Ég var sammála því, þrátt fyrir gagnrýni annarra. Hann stillti upp sömu leikaðferð og í riðlakeppninni og sú aðferð hafði skilað ágætis árangri hingað til, þótt liðið hafi ekki beint sprungið út með látum eins og t.d. það spænska. Þá fannst mér ákvörðun hans að taka Ruud Van Nistelrooy út úr byrjunarliðinu réttlætanleg, því þótt hann hafi skorað eitt mark í keppninni (einu meira en Dirk Kuyt) þá var hann ekkert búinn að gera fyrir liðið í þremur leikjum en Kuyt átti góðan leik gegn Argentínu.

Síðan hófst þessi leikur og það kom fljótlega í ljós að Big Phil Scolari hafði undirbúið sína menn feykivel og Portúgalirnir áttu svör við öllu sem Hollendingarnir reyndu. Og það var þá, í hita leiksins, sem vankostir Van Bastens sem þjálfara sýndu sig í öllum regnbogans litum. Þetta fór úrskeiðis, meðal annars:

1. Arjen Robben og Robin Van Persie. Á meðan hinir hafa verið að syngja í grúppu í þessari keppni, og meira að segja Cristiano Ronaldo og Luis Figo sýndu samhug með liði Portúgala, héldu þessi tvö ungstirni áfram að syngja inná sitt hvora sólóplötuna á köntunum. Hversu margar fyrirgjafir framleiddu þeir fyrir Dirk Kuyt, og svo Jan Vennegor of Hesselink, í þessum leik? Ég taldi þær og þær sem voru ekki alveg út úr kú voru heilar tvær talsins! Robben þarf að þroskast, hann er einn hæfileikaríkasti knattspyrnumaður í heiminum en honum er algjörlega fyrirmunað að spila fyrir liðið, hann ætlar að gera þetta allt sjálfur og sýna hvað hann er góður. Hinum megin er Van Persie ekki mikið skárri, en hann náði þó betri árangri gegn Nuno Valente í kvöld en Robben, en hinn frábæri Miguel tók hann og snýtti honum í kvöld. Vandinn var bara sá að þegar Van Persie komst framhjá Valente leitaði hann alltaf að skotinu, í stað þess að gefa boltann. Þetta kom Marco Van Basten mikið við, því þar sem þetta var augljóslega ekki að ganga hjá Van Persie og Robben bjóst ég við breytingu strax í hálfleik, einhverju nýju í vængspili Hollendinga. Sú breyting kom þó aldrei, augljóslega af því að Van Basten átti engin önnur spil uppí erminni.

2. Ruud Van Nistelrooy. Á bekknum í 96 mínútur. Mörk skoruð í kvöld? 0. Þegar þú ert einum leikmanni fleiri, í stórsókn en vantar mann inní teiginn til að klára færin, og hefur bara 10 mínútur til að jafna leikinn ellegar detta út í 16-liða úrslitum HM í knattspyrnu, ÞÁ SETURÐU RUUD VAN FOKKING NISTELROOY INNÁ HELVÍTIS VÖLLINN! Í alvöru. Þótt hann sé leikmaður Man U og þótt hann sé hálfviti sem hafi æst sig ofan í rassgat og rifist við Van Basten á æfingu í gær eftir að ljóst varð að hann myndi byrja á bekknum í kvöld. Jafnvel þá, þá brýturðu odd af oflæti þínu og setur manninn sem skorar fleiri mörk en næstum því hvaða annar framherji sem er í heiminum inná völlinn! Van Basten lét hér persónulegar deilur sínar við Van Nistelrooy eyðileggja heilt heimsmeistaramót fyrir Hollendingum. Sniðugt!

3. Jan Vennegor of Hesselink? Og svo bara dæla boltanum inná völlinn? Á tímabili bjóst ég við að hann myndi setja Robert Huth inná líka, þá hefði ég farið að leita að José Mourinho þarna á hliðarlínunni. Þú ert með TÓLF VARAMENN TIL AÐ VELJA ÚR, og þú setur slánann inn í teiginn og lætur menn svo bara dæla honum inní? Ekki sniðugt. Ég meina, Hollendingarnir voru þó að komast í færin þangað til Vennegor of Hesselink kom inná, eftir það fóru þeir bara í dælingar að fyrirskipan þjálfarans. Þeir hefðu sennilega jafnað á endanum ef hann hefði ekki skipt neinum fleirum inná, en Jan Vennegor of Hesselink? Piff!

Já. Ég er pirraður. Hollendingarnir eru vissulega með ungt lið og þessi keppni kom sennilega tveimur árum of snemma fyrir þá. Ég mun sennilega búast við meiru af þessum strákum á EM 2008. En kvöldið í kvöld var samt algjört klúður af hálfu Van Basten. Og svo er það spurning hvað verður um hann. Þetta var jú fyrsti tapleikur hans sem þjálfari Hollendinga, í rúmlega 20 leikjum á tveimur árum. Er ekki frekar hart að ætla að láta hann fara eftir sinn fyrsta tapleik? Það er spurning hvort hann verður áfram, eða hvort hann hreinlega getur það því hollenska pressan mun sennilega slátra honum á morgun. En það sýndi sig greinilega í dag hver munurinn er á óreyndum manni eins og Van Basten og hinum stórsnjalla Big Phil Scolari, sem sýndi enn og aftur hvers vegna hann er einn besti landsliðsþjálfari í heiminum. Eins leiðinlegir og Portúgalirnir eru þá eru þeir fjandi góðir, og miklu beittari og öflugri í sínum aðgerðum en Hollendingarnir í kvöld.

Þeir mæta Englendingum á föstudag og miðað við leik liðanna í dag sé ég lítið annað í spilunum en að Portúgal vinni þann leik. Jafnvel án Deco og Cristiano Ronaldo ættu þeir samt að hafa sigur gegn þeim ensku. Af hverju? Jú, enn og aftur er það Big Phil sem mun ríða baggamuninn. Því ef Marco Van Basten er gallaður þjálfari þá kemst hann ekki með tærnar þar sem Sven Göran Eriksson hefur hælana í þeim efnum. Við skulum orða það svo: ég var fúll eftir kvöldið en hafði þó geð í mér til að skrifa reiðipistil um Van Basten. Get ekki sagt það sama um Sven Göran Eriksson; því færri orð sem höfð eru um hann, því betra …

Jæja, 16-liða úrslitin hófust með háværum hvelli í dag þar sem heimamenn Þjóðverjar og Argentínumenn tryggðu sér sæti í 8-liða úrslitunum, en þessar tvær þjóðir munu mætast á föstudaginn kemur.

Þjóðverjar unnu stórgóðan 2-0 sigur á Svíþjóð í leik sem var einhver mesta einstefna mótsins hingað til. Á pappírnum átti þetta að verða hörkuleikur en eftir ellefu mínútna leik var Lukas Podolski búinn að skora tvisvar, eftir þrjátíu og fimm mínútur voru Svíar orðnir einum færri og áttu aldrei séns í þessum leik. Henrik Larsson skaut yfir úr vítaspyrnu (sem var rugl dómur) í seinni hálfleik en að öðru leyti var sigur heimamanna aldrei í hættu og ef þeir geta spilað svona gegn Argentínumönnum eru þeir til alls líklegir.

Í seinni leik dagsins unnu Argentínumenn svo 2-1 sigur á Mexíkó í stórskemmtilegum leik, þar sem Maxi Rodriguez skoraði sigurmarkið í fyrri hluta framlengingar með sannkölluðu draumaskoti, eftir að Rafael Marquez hafði komið Mexíkóum yfir og Hernan Crespo jafnað á fyrstu tíu mínútum leiksins. Mexíkóar voru betri aðilinn í fyrri hálfleik en í þeim seinni jafnaðist þetta aðeins út og einkenndist leikurinn yfir heildina af mikilli stöðubaráttu, mikilli refskák. En á endanum voru Argentínumenn vel að þessum sigri komnir, og Maxi Rodriguez er hetja þeirra í dag.

Sem sagt, fyrsti leikur 8-liða úrslitanna verður viðureign **ÞÝSKALANDS og ARGENTÍNU.** Það verður klárlega rosalegur slagur, tvær af stærstu knattspyrnuþjóðum allra tíma berjast um sæti í undanúrslitum keppninnar. Ég hélt ég myndi aldrei segja eftirfarandi orð, en Þjóðverjar eru með eitt skemmtilegasta liðið í þessari keppni og Argentínumenn hafa verið að spila frábærlega og virðast með ofursterkt lið sem er líklegt til að fara alla leið. Það verður flugeldasýning á föstudaginn!

Á morgun mæta Englendingar svo Ekvador í fyrri leik dagsins og svo mætast Hollendingar og Portúgalir í leik sem er algjörlega ómögulegt að spá fyrir um. Mótið verður meira spennandi með hverjum deginum, enda er það yndislegt að horfa á HM! :)

Jæja, í gær lauk riðlakeppninni með því að Frakkar og Svisslendingar komust áfram úr G-riðli, og því er orðið ljóst hvaða lið mætast í 16-liða úrslitunum. Þau eru sem hér segir:

Þýskaland – Svíþjóð
Argentína – Mexíkó
England – Ekvador
Portúgal – Holland
Ítalía – Ástralía
Sviss – Úkraína
Brasilía – Gana
Spánn – Frakkland

Þetta eru allt feykiskemmtilegir leikir, og það er gaman að velta því aðeins fyrir sér hvaða lið gætu mæst í næstu umferð. Ef við gerum ráð fyrir að líklegra liðið sigri í öllum leikjum, þá myndu 8-liða úrslitin líta svona út:

Þýskaland – Argentína
England – Portúgal/Holland
Ítalía – Sviss
Brasilía – Spánn

Þetta er náttúrulega stórt ef. Það er nú yfirleitt svo að maður fær óvænt úrslit einhvers staðar, í einhverri umferð, og í 16-liða úrslitunum eru öll liðin nógu sterk til að fara áfram. Þó hefur verið vakin athygli á því hvað Ítalir virðast heppnir með stöðu í riðli sínum. Vegna þess að Frakkar álpuðust til að lenda í öðru sæti í sínum riðli, en ekki vinna hann eins og búist var við (Sviss unnu hann) þá þurfa Spánverjar að mæta stórliði Frakka í sínum leik í 16-liða úrslitunum á meðan Úkraínumenn eru stálheppnir og fá Sviss frekar en Frakka. Bæði erfið lið að spila við, en það myndu öll lið fagna því að mæta Sviss frekar en Frakklandi.

Þannig að það er nánast eins og Spánverjar, sem yfirspiluðu sinn riðil og unnu sér það inn að mæta veikara liðinu úr G-riðli, þurfi *samt* að mæta sterkara liðinu. En svona er þetta bara stundum.

Á móti koma Ítalir, sem vinna sinn riðil og mæta fyrir vikið Áströlum, sem fóru óvænt upp úr sínum riðli á kostnað Króata. Þótt Ástralir séu stemningslið keppninnar og alls ekki búnir að tapa fyrir Ítölum fyrirfram, þá er ljóst að Ítalir prísa sig sæla með að mæta þeim en ekki Króötum. Í ofanálag kemur að sigri Ítalir Ástrala mæta þeir sigurvegaranum úr leik Svisslendinga og Úkraínumanna í 8-liða úrslitunum, en sigurvegarinn úr þeim leik yrði klárlega veikasta liðið í hópi síðustu átta. Það er gaman að við skulum geta tryggt eitt spútniklið inn í 8-liða úrslitin, Sviss eða Úkraínu, og þetta er hin afleiðing þess að Frakkar skyldu klúðra sínum riðli. Það gerðist, og fyrir vikið þurfa Spánverjar að mæta einum af stórliðum keppninnar strax á meðan Úkraínumenn mæta Sviss. Það yrði hálf fáránleg tilhugsun ef Úkraínumenn færu lengra í keppninni en Spánverjar, eftir að þeir síðarnefndu rústuðu Úkraínumönnum 4-0 í fyrsta leik og eru klárlega langtum betra liðið.

En allavega, Ítalir virðast eiga nokkuð greiða leið inn í undanúrslitin, að því gefnu að ekkert óvænt gerist. Þeir eru allavega mjög sigurstranglegir í næstu tveimur leikjum sínum, þannig að ef menn vilja veðja á væntanlega sigurvegara væri ekki vitlaust að giska á Totti og félaga. Þeir eru líklegir.

Annars er það að frétta af Englendingum, sem spila gegn Ekvador á morgun, að Sven Göran Eriksson hefur LOKSINS ákveðið að losa Steven Gerrard úr varnarhlekkjunum á miðjunni og veita honum sóknarleyfi. Loksins, og trúið mér að þið sjáið nýtt og betra enskt landslið spila á morgun. Ég skal hundur heita ef Gerrard og Lampard verða ekki eins og frelsaðir menn á morgun, að fá að hafa varnarsinnaðan miðjumann á borð við Michael Carrick fyrir aftan sig. Annað sem Englendingar græða á innkomu hans er að hann býður upp á svolítið sem hvorki Gerrard né Lampard gera; hann dreifir spilinu vel, er góður í þessu Xabi Alonso-hlutverki á miðjunni. Hann er að sjálfsögðu enginn Xabi Alonso, en engu að síður góður.

Neikvæða hliðin á þessum fréttum fyrir okkur Púllara er að þeir Jamie Carragher og Peter Crouch missa stöðu sína í byrjunarliðinu fyrir vikið. Crouch er fórnað fyrir fimmta miðjumanninn, á meðan Owen Hargreaves verður í bakverðinum í stað Carra. Þótt ég sé mikill aðdáandi Carra er erfitt að vera ósammála þessu; Carragher er takmarkaður sem sóknarbakvörður og Hargreaves, sem leikinn miðjumaður, er betur til þess fallinn að sækja upp vænginn með Beckham. Eins lengi og Neville-systirin er ekki að spila er ég sáttur …

En allavega, liðið hjá Englendingum á morgun verður því svona, að því gefnu að Rio Ferdinand jafni sig á meiðslum sínum:

Verður spennandi að sjá hvort enska liðið smellur í gírinn á morgun. Það er síðasti séns, því ef þeir gera það ekki á morgun gæti farið illa. Ef Englendingarnir tapa á morgun verður SGE tekinn af lífi í gulu pressunni í London, og það réttilega svo. Eins og lesendur þessarar síðu hafa séð glöggt er ég alls ekki sáttur við margt af því sem Svíinn hefur gert fyrir þessa keppni, og ég vorkenni honum lítið ef þetta fer illa.

En allavega, nú er að hefjast leikur Þjóðverja og Svía. Þetta verður hörkuleikur og ég spái 3-1 fyrir Þýskaland. Gaman gaman!

Ég veit ekki með ykkur, en mikiða afskaplega var ég ánægður með að sjá Harry Kewell senda Króata heim og tryggja Ástrala inní [16 liða úrslitin](http://news.bbc.co.uk/sport1/hi/football/world_cup_2006/4853428.stm) Í gærkvöldi. :-)

Frábært hjá honum. Og mikið rosalega var þetta skemmtilegur leikur! Og ekki spillti fyrir að Harry Kewell var maður leiksins. Núna vona ég sko innilega að Kewell og félagar vinni Ítala í næsta leik.

Jæja, í dag voru 4 leikir á HM. Snemma í dag unnu Portúgalar Mexíkó á meðan að Angóla og Íran gerðu jafntefli. Þar með komust Mexíkóar og Portúgalar áfram úr D riðli.

Í kvöld gerðu Argentína og Holland jafntefli á meðan að Fílabeinsströndin vann Serbíu. Einsog vitað var fyrir leikinn þá komast Holland og Argentína áfram, en Argentína vann riðilinn. Enginn Liverpool maður var að spila í dag (Kromkamp var á bekknum allan tímann), en Dirk Kuyt sem hefur verið sterklega orðaður við Liverpool lék allan leikinn fyrir Holland auk þess sem Gabriel Milito lék allan leikinn fyirr Argentínu í vörninni.

Aaaaaallavegana, mér þykir vænt um 3 af þessum liðum sem spiluðu í dag. Mínir menn Mexíkóar töpuðu fyrir Portúgal og voru að mínu mati nokkuð óheppnir að gera það. Brenndu m.a. af vítaspyrnu í leiknum. Enn finnst mér Mexíkó ekki hafa náð að smella saman og ef þeir spila ekki betur í næsta leik, þá eiga Argentínumenn eftir að klára þá auðveldlega.

Leikur Argentínu og Hollands var frekar daufur. Argentínumenn voru þó heldur sterkari. Dirk Kuyt lék allan leikinn fyrir Holland, fyrst vinstra megin frammi og síðan sem fremsti maður. Mér þótti hann spila sæmilegaog var einna skásturí annars frekar slöppu liði Hollendinga. Argentínumenn virtust taka þessu létt og ég hef á tilfinningunni að ef þeir hefðu verið undir pressu þá hefðu þeir einfaldlega klárað leikinn.

En núna mætast semsagt Argentína – Mexíkó – og held ég að Argentína klári þann leik. Í hinum leiknum mætast Holland og Portúgal í leik, sem verður einn af stórleikjum 16 liða úrslitanna. Það verður verulega spennandi leikur þar sem Hollendingar ná vonandi að senda Portúgala heim til sín. Núna fer þetta að verða spennandi.

Michael Owen [sleit krossbönd í gær í leiknum gegn Svíþjóð](http://home.skysports.com/worldcup/article.aspx?hlid=396979&CPID=4&clid=114&lid=2&title=Owen+ruled+out+for+five+months) og verður frá í minnsta kosti 5 mánuði. Það á ekki af drengnum að ganga með meiðsli og núna eru það krossböndin frægu. Þetta eru mjög slæmar fréttir fyrir enska landsliðið og Newcastle og alveg ljóst að ef Rooney heldur ekki keppnina út þá mun Eirksson fá heldur betur kastið frá ensku pressunni.

Við óskum allir Owen skjóts bata og vonandi nær hann sér 100% af öllum meiðsla vandræðum eftir þessi meiðsli.

Jæja, þá er búið að spila til lykta A- og B-riðlana og orðið ljóst hverjir mætast í fyrstu tveimur leikjum 16-liða úrslitanna á laugardaginn.

Eftir að Þjóðverjar unnu auðveldan 3-0 sigur á Ekvador, sem hvíldu marga menn í dag, og Englendingar og Svíar gerðu 2-2 jafntefli er ljóst að það verða annars vegar England og Ekvador og hins vegar Þýskaland og Svíþjóð sem mætast á laugardaginn.

Mér líst vel á þessa leiki. Ekvadorum virtist vera sama um sigur í riðlinum sínum í dag og töpuðu frekar mótbárulaust fyrir heimamönnum í dag, en það er ekki þar með sagt að Englendingar valti yfir þá. Sérstaklega ekki því eins og kom í ljós í kvöld er vörn Englendinga ekki eins skotheld og menn héldu, Paul Robinson er ekki að eiga góða daga í markinu og þá vantar ennþá einhvern neista fram á við. Ofan á þetta bætist að Michael Owen meiddist strax á fyrstu mínútu í kvöld og er væntanlega úr leik á HM, auk þess sem Rio Ferdinand er eitthvað tæpur og Gary Neville gæti misst af næstu leikjum. Í ofanálag þá er Frank Lampard einfaldlega fjarverandi í þessari keppni, Wayne Rooney ekki kominn í almennilegt leikform og þá er auðvelt að sjá hvers vegna viðureign þessara tveggja liða á laugardag gæti orðið stórskemmtileg. Sérstaklega ef Ekvadorar skora snemma í leiknum, þá gæti þetta orðið rosaleg viðureign.

Í hinum leiknum munu heimamenn, Þjóðverjar mæta Svíum og það ætti líka að vera hörkuleikur. Þjóðverjar unnu góðan sigur í frekar tilgangslausum leik í dag, úr því að Ekvadorar ákváðu að vera ekki með, en á heildina hafa heimamenn heillað mig eilítið í keppninni í ár. Jú, vörnin þeirra er vafasöm ef sett undir pressu og eins og Svíar sýndu gegn Englendingum í kvöld þá geta þeir pressað lið mjög stíft og sótt grimmt. Í sókninni eru Þjóðverjar svo með hinn unga Podolski, sem komst loks á skrá í dag með mark, og markahæsta mann mótsins til þessa, hinn frábæra Miroslav Klose. Þannig að vörn Svíanna mun hafa nóg að gera á laugardag.

Sem sagt, laugardagurinn er orðinn klár og það er bara fyrsti leikdagur af fjórum í 16-liða úrslitunum. Á morgun kemur í ljós hvaða lið fara upp úr C- og D-riðli og hverjir mæta hverjum á sunnudaginn kemur. Ég get ekki beðið.

Hvað halda menn? Geta Svíar slegið heimamenn út? Verða Ekvadorar öskubuskuliðið í ár eða eru Englendingar of sterkir?

Jæja, þá eru búnar tvær umferðir í öllum riðlum en Spánverjar sigruðu Túnis í kvöld með þremur mörkum gegn einu. Nú eru búnir 32 leikir, eða helmingur þeirra leikja sem verða spilaðir í mótinu, og það hafa alls verið skoruð 75 mörk. Þar af hafa Argentínumenn skorað átta. En allavega, á morgun hefst síðasta umferðin í riðlakeppninni og þá fer að ráðast hverjir mæta hverjum í 16-liða úrslitunum, sem hefjast á laugardaginn. Þegar við komum í útsláttarkeppnina breytist keppnin á dramatískan hátt; í stað þess að þurfa að safna stigum geta lið jafnvel hangið í vörn í 120 mínútur og unnið keppnina á vítaspyrnukeppnum og heppnismörkum, eins og Grikkir gerðu á EM fyrir tveimur árum.

Þannig að það er allt hægt í 16-liða úrslitunum og þar á eftir, það geta öll lið gert gloríur og þetta mót verður vonandi bara enn opnara og meira spennandi með hverri umferðinni sem líður. En engu að síður þá eru alltaf einhver lið sem skara framúr, þykja líklegri. Ég hef horft á 25 af 32 leikjum og fyrir vikið séð hvert lið einu sinni og flest liðin tvisvar, þannig að ég tel mig í ágætis stöðu til að meta hvernig liðin hafa spjarað sig á HM hingað til.

Sem sagt, eftir fyrstu tvær umferðir allra riðla eru þetta þau átta lið sem ég tel að ættu að fara í 8-liða úrslit, svo lengi sem þau dragast ekki saman eða gera einhvern skandal í síðustu umferð riðla sinna eða 16-liða úrslitunum. Þetta eru þau átta lið sem hafa heillað mig mest í keppninni hingað til, í réttri röð:

1. Argentína.
2. Spánn.
3. Brasilía.
4. Þýskaland.
5. England.
6. Holland.
7. Ítalía.
8. Portúgal/Suður-Kórea
.

Þetta er náttúrulega bara mitt mat. Ef við byrjum á toppnum, þá hafa engin lið spilað jafn vel og Argentínumenn og Spánverjar í þessari keppni. Eins og staðan er núna væri draumaúrslitaleikur á milli þeirra tveggja. Þar fyrir neðan koma svo Brasilía og England, tvö stórlið sem eru frábærlega mönnuð og á sigurbraut en virðast samt ekki hafa smollið í gírinn ennþá. Kannski kemur það í næstu leikjum. Þar á milli eru heimamenn, Þjóðverjar, sem þrátt fyrir að vera með ungt lið og að vissu leyti veikara en venjulega þá eru þeir öflugir á heimavelli. Þá koma Hollendingar, sem eru í uppáhaldi hjá mér persónulega, en þrátt fyrir að hafa unnið báða fyrstu leiki sína finnst mér eitthvað vanta uppá hjá þeim, eins og Englendingum og Brössum. Þá koma Ítalir sem voru frábærir í fyrsta leik sínum, og hefðu orðið ofar á þessum lista ef þeir hefðu ekki dottið niður í rugl og leiðindi gegn Bandaríkjamönnum. Síðasta sætið ákvað ég að láta Portúgal hafa en gef þó Suður-Kóreumönnum smá tilnefningu líka. Portúgal eru sterkir og ættu að fara langt en það má ekki afskrifa Kóreumenn, það er karakter í því liði og þeir verða erfiðir í ár.

Frakkar eru eina stórliðið sem vantar á þennan lista, en miðað við frammistöðu þeirra í fyrstu tveimur leikjunum vona ég eiginlega bara að þeir detti út í riðlakeppninni. Þeir eru leiðinlegir og andlausir og með slappan þjálfara. Á móti koma lið eins og Ekvador, Ghana, Króatía og Ástralía sem hafa heillað mig mjög til þessa og gætu hæglega slegið eitthvað af toppliðunum út í 16-liða úrslitum. Það má ekki afskrifa slík lið.

Svo eru það lið eins og Tékkland, Mexíkó og Svíþjóð sem hafa verið frábær í öðrum leiknum sínum til þessa en grútléleg í hinum. Þetta eru lið sem geta miklu betur en verða að girða sig í brók strax í næsta leik ef ekki á að fara illa.

Auðvitað eru fleiri lið ennþá í séns á að komast í 16-liða úrslitin en það yrði að teljast vægast sagt óvænt ef lið eins og Angóla eða Úkraína færu alla leið í 8-liða úrslitin. Liðin hér að ofan eru þau sem eiga að öllu eðlilegu að fara a.m.k. í 8-liða úrslit, og ef einhver geta slegið þá út þá eru það Ekvador, Ghana, Króatía eða Ástralía.

Á morgun er upphafið að endinum í riðlakeppninni. Þetta hefur verið frábær keppni til þessa; mikið um flott mörk, skemmtileg tilþrif og geðshræringar í hverjum einasta leik. Nú er potturinn að nálgast suðu, vonum að hann byrji að flæða yfir á morgun. Mikið ótrúlega elska ég HM-mánuð! :)

**Viðbót (EÖE)**: Kannski að bæta við smá um Spánar leikinn fyrir þá, sem sáu hann ekki.

Luis Garcia og Xabi byruðu báðir inná. Mér fannst þeir báðir vera með bestu leikmönnum Spánar í fyrri hálfleiknum. Xabi og Xavi voru sterkir saman á miðjunni (með slöppum Senna) og í framlínunni fannst mér vera mest ógnun af Villa og Garcia en minni af Torres (sem breyttist þó í seinni hálfleik).

Garcia lagði upp nokkur færi og var nokkuð nálægt því að skora. Hins vegar var honum skipt útaf í hálfleik fyrir Raúl. Aragones vildi hressa uppá sóknina og þar sem Torres er striker númer 1 og Villa hafði ógnað mikið, þá var það Garcia sem þurfti að víkja (Villa veik svo stuttu seinna fyrir Joaquin).

Xabi spilaði hins vegar allan leikinn og var mjög sterkur, en Cesc skyggði örlítið á hann í seinni hálfleiknum, þar sem hann var meira áberandi í sóknarhlutverkinu (sem er í raun ekki hlutverk Xabi fyrir spænska landsliðið).

En þeir geta allavegana báðir verið sáttir við sitt hlutskipti, Garcia og Alonso. Ég held að Aragones haldi sig við sama liðið áfram nema að hugsanlega komi Cesc inn fyrir Senna. Ég hef ekki trú á því að Luis Garcia missi sætið sitt.

Samkvæmt fréttum mun **SNILLINGURINN** Sven Göran Eriksson setja Steven Gerrard og Peter Crouch á varamannabekkinn gegn Svíþjóð á þriðjudaginn. Þetta kemur til af því að Gerrard, Crouch og Frank Lampard eru allir á gulu spjaldi og SGE vill ekki þurfa að vera án þeirra í 16-liða úrslitunum. Þannig að hann mun ekki spila Lampard allan leikinn og Gerrard og Crouch byrja á bekknum, og verða bara notaðir í ítrustu neyð.

Yfirleitt þætti manni það slæmt að sjá tvo Púllara setta á bekkinn en í þessu tilfelli telst þetta sennilega jákvætt. Mjög jákvætt, hvað Peter Crouch varðar. Við vitum að Gerrard er lykilmaður í þessu liði en ef SGE er reiðubúinn að hvíla Crouch til að hafa hann með í 16-liða úrslitunum. Það er jákvætt fyrir hann.

Wayne Rooney og Owen Hargreaves koma væntanlega inn í liðið fyrir þá, og ef Gary Neville er orðinn heill verður Jamie Carragher “að sjálfsögðu” tekinn út úr liðinu. Þannig að við gætum verið að horfa upp á Liverpool-frítt enskt landslið spila á þriðjudaginn.

Ég hugsa að ég haldi með Spánverjum í næstu umferð.

Ég veit hverjir verða heimsmeistarar í knattspyrnu. Fékk vitrun fyrr í dag.

Málið er ekki bara það að Argentínumenn hafi á að skipa mjög reyndum og færum markverði í Abbondanzieri. Málið er heldur ekki það að þeir séu með einn mesta markaskorara í heiminum, Hernan Crespo, í fremstu víglínu. Málið er heldur ekki það að þeir séu með mjög leikreynda, skipulagða og illvíga vörn. Málið er heldur ekki það að á miðjunni séu tveir leikmenn, Cambiasso og Mascherano, sem eru algjör mulningsvél.

Og málið er heldur ekki það að þetta sé landslið sem býður upp á hvorki fleiri né færri en fimm töframenn: Javier Saviola, Leo Messi, Carlos Tevez, Pablo Aimar og Maxi Rodriguez.

Málið er það að í hjarta þessa liðs er leikmaðurinn sem mun að öllum líkindum verða stjarna þessarar heimsmeistarakeppni. Það er að segja, ef Argentínumenn endast mótið með sama hætti og þeir hafa spilað fyrstu tvo leiki sína. Við sáum marga leikmenn skora í dag og marga leikmenn leggja upp mörkin, en glöggir menn hafa líka séð að allar sóknirnar þeirra fara í gegnum sömu gatnamótin.

Þessi gatnamót heita **Juan Roman Riquelme** og þau eru einn besti leikmaður í heiminum. Ekki af því að hann getur tekið leikmenn á eins og Leo Messi getur, ekki af því að hann skorar jafn mikið og Hernan Crespo, og ekki af því að hann vinnur varnarvinnuna sína jafn vel og Javier Mascherano. Heldur af því að í huganum er hann einn snjallasti leikmaður sem ég hef séð. Við höfum einn svona hjá okkur í Liverpool, hann heitir Xabi Alonso og er að fara á kostum með Spánverjum. Riquelme er leikmaður sem Alonso ætti að líta upp til, því hann er sennilega sá eini í heiminum í dag sem er betri í sínum sérflokki en Alonso er.

Riquelme er svo snjall leikmaður að hann þarf ekki að hlaupa hratt eða vera snöggur í hreyfingum. Hugurinn hans vinnur á öðrum hraða en hugur annarra leikmanna, þannig að það er eins og hann sé með sekúndu í forgjöf á alla aðra þegar kemur að því að senda boltann frá sér. Hann sér möguleikann, sendir í svæði sem við hin þurfum þrjár endursýningar til að bera kennsl á, og svo sekúndu síðar rennur upp fyrir varnarmönnum það ljós að það sé búið að spila þá upp úr skónum.

Ef Riquelme heldur áfram að sýna okkur af hverju Maradona segir að hann sé mikilvægasti leikmaður Argentínu síðan hann sjálfur var að spila, af hverju José Pekerman kaus að byggja liðið sitt upp í kringum það að Riquelme gæti spilað sína bestu stöðu (ertu að hlusta, Sven Göran?), þá verða Argentínumenn heimsmeistarar. Það getur ekkert lið stöðvað þá eins og þeir spiluðu í dag!

Peter Crouch, má ég kynna þig fyrir heiminum. Heimur, þetta er **Peter Crouch** … :)

Ég var kominn á fremsta hlunn með að skrifa aðra kvabbfærslu um England og slappan leik þeirra þegar Beckham þrykkti einum sveittum fyrir og Peter Crouch negldi hann inn með enninu, Jan Koller-style. Nokkrum mínútum síðar var Super Stevie G búinn að tryggja sigurinn með þrumuskoti með vinstri (þá sjaldan að hann fær að fara fram fyrir Lampard á vellinum – Sven, hvað ertu að hugsa?!?) og þá ákvað ég að njóta þess frekar að **LIVERPOOL REDDUÐU ENGLENDINGUM** í dag.

Komnir í 16-liða úrslit. Ræðst kannski á eftir hvort þeir vinna riðilinn, en það eru allavega Þýskaland eða Ekvador framundan hjá Tjöllum. Tilhugsunin um England – Þýskaland er slefvaldandi … ;)

Jæja, Ekvador voru að skella liði Kosta Ríka í annarri umferð A-riðils. Þeir unnu auðveldan og sannfærandi 3-0 sigur sem þýðir að þeir eru á toppi riðilsins með sex stig ásamt Þjóðverjum, á meðan Kosta Ríka-menn og Pólverjar sitja eftir án stiga. Það er því ljóst að Ekvador og Þýskaland eru örugg áfram í 16-liða úrslitin, en leikur þessara tveggja liða í lokaumferðinni gæti hins vegar orðið rosaleg.

Málið er þetta: þriggja marka sigur Ekvadora í dag þýðir að þeir eru með betri markatölu en Þjóðverjar. Sem setur þá í fyrsta sæti í riðlinum, og þar munu þeir enda ef leikurinn við Þjóðverja endar í jafntefli (eða ef Ekvadorar vinna, að sjálfsögðu). Sem þýðir að Þjóðverjar verða að vinna Ekvador til að vinna riðilinn.

Af hverju er þetta svona mikilvægt? Jú af því að sigurliðið í þessum A-riðli mætir liðinu í öðru sæti í B-riðli, og svo öfugt. Og miðað við fyrstu umferðina í B-riðli verður að teljast líklegt að Englendingar vinni B-riðil, úr því að Svíar töpuðu stigum gegn Trínídad & Tóbagó. Þannig að ef Þjóðverjarnir ná ekki að sigra Ekvador gætum við verið að horfa upp á **Þýskaland – England** í 16-liða úrslitunum.

Sem yrði geggjaður leikur! :)

Annars leggst þetta Ekvador-lið feykivel í mig. Þeir hafa komið liða mest á óvart í keppninni hingað til og miðað við spilamennsku þeirra í þessum tveimur leikjum myndi ég ekki útiloka það að þeir fari lengra en í 16-liða úrslit. Sérstaklega ef þeir forðast Englendinga í 16-liða úrslitunum, því ég tel möguleika Ekvador gegn Svíþjóð eða Paragvæ bara nokkuð góða. Þá væru þeir komnir í átta liða úrslitin og þar geta öll lið unnið alla. Þannig að ekki afskrifa þetta lið, þeir eru feykigóðir, þrátt fyrir að þeirra frægasti leikmaður sé varaliðsmaður hjá Aston Villa.

Fimmtíu mínútur í England – T&T og byrjunarlið Englendinga í dag mun líta svona út:

Jább, Jamie Carragher er að fara að spila á Heimsmeistaramóti í knattspyrnu fyrir England. Ef það er ekki ástæða til að brosa í allan dag þá veit ég ekki hvað er. Þrír púllarar í liðinu í dag, þannig að maður verður að segja *áfram England!* :)

Spánverjar gerðu sér lítið fyrir og rústuðu Úkraínu, 4-0, í opnunarleik riðils síns í dag. Þeir fóru einfaldlega á kostum frá fyrstu til síðustu mínútu og ef þeir geta haldið áfram þessari spilamennsku þykir mér ljóst að þeir koma sterklega til greina í þessari keppni. Í alvöru, þeir voru það góðir, sjáið bara lokamarkið þeirra þar sem þeir spiluðu sig upp í gegnum alla vörn Úkraínu og Fernando Torres skoraði frábært mark.

Fyrir okkur Liverpool-menn var þessi sigur Spánverja sérstaklega sætur. Í byrjunarliði Spánverja í dag voru tveir menn, **XABI ALONSO** og **LUIS GARCÍA**, og þeir voru meðal bestu manna í dag. Alonso gerði sér meira að segja lítið fyrir og skoraði fyrsta mark Spánverja, með skalla eftir hornspyrnu á 13. mínútu, og fagnaði ógurlega með García og Xavi, sem átti spyrnuna fyrir. Framherji Valencia, David Villa, skoraði svo tvö mörk í sitt hvorum hálfleiknum áður en Fernando Torres innsiglaði sigurinn undir lokin, og miðað við spilamennsku þessa framherjapars verður maður eiginlega að veðja á að annar þeirra verði markakóngur í sumar. Þeir eru einfaldlega sjóðheitir, báðir tveir.

Ég er bara alveg í skýjunum yfir þessu, það verður að segjast. Frábær leikur hjá Spánverjum og frábært hjá Xabi Alonso og Luis García! Pepe Reina var á bekknum allan leikinn, enda Iker Casillas aðalmarkvörður þeirra, en það var gaman að sjá að hann var fyrstur upp af bekknum og að hliðarlínunni fagnandi í *öllum* mörkunum. Þannig að okkar maður er eiginlega virkur þátttakandi í þessu öllu saman! ;)

Og fleiri góðar fréttir fyrir Púllara: Eldri Neville-systirin er tæp fyrir leik Englands á morgun, gegn Trínídad & Tóbagó, og ef hann verður ekki heill fyrir þann leik mun **JAMIE CARRAGHER** taka stöðu hans í vörninni. Því mun ég fagna, því ef það er einhver leikmaður í heiminum sem á skilið að fá að spila á HM í knattspyrnu, þótt það sé ekki nema einn leik, þá er það Carra Legend #23! :)

Seinna í dag spila Túnis – Saudi Arabía og Þýskaland – Pólland, en þar sem þetta verða sennilega tveir ójafnir leikir ákvað ég að fórna þeim og eyða deginum með frúnni. Hún á afmæli í dag og maður þarf að sinna skyldunni, þið vitið hvernig þetta er. ;)

Smáríkið Tógó frá Afríku hefja leik á HM klukkan 13 í dag gegn Suður-Kóreu, og eru einnig með Frökkum og Svisslendingum í riðli en þau lið mætast síðar í dag. Ég hef tekið þá ákvörðun að halda ekki með Tógó í þessari keppni, þvert á móti ætla ég að vona að þeir tapi öllum leikjum stórt og hundskist aftur heim til sín sem fyrst.

ÞETTA ER ÁSTÆÐAN!

>”Players have pressed their demands for 155,000 euros (£105,900) each to play in the World Cup plus 30,000 euros (£20,500) each per win and 15,000 euros (£10,000) per draw.

>Officials from a country with an average per-capita income well below £500 have said the demands are too high and negotiations are still underway.”

Þjálfari liðsins hætti sl. föstudag eftir að leikmennirnir höfðu skrópað á þremur æfingum í röð, í mótmælaskyni við það að knattspyrnusamband þjóðarinnar hafði ekki fallist á að borga þeim þessa bónusa sem þeir heimta fyrir að spila fyrir land sitt og þjóð á HM í knattspyrnu.

Lesist: **ÞEIR FÓRU Í VERKFALL!!! VIKU FYRIR HM!!!**

Ef Eyjólfur Sverris hringdi í mig í dag og segðist þurfa fá mig til Þýskalands til að spila með Íslandi á morgun, en hann gæti ekki borgað mér neitt fyrir, þá myndi ég fara í frá vinnunni minni, versla mér miða til Þýskalands á kredit og gera það sem ég gæti til að hjálpa landsliðinu mínu.

Ég myndi ekki fara í verkfall og heimta sem nemur **211 sinnum hærri upphæð** en meðal-samlandi minn þénar á mánuði fyrir þann heiður að fá að spila fyrir mitt landslið á HM í knattspyrnu.

Fyrir þessa græðgi ætla ég að hvetja Suður-Kóreumenn ákaft til dáða á eftir. Og svo Sviss og svo Frakkland. Ef það er eitthvað lið sem á ekkert betra skilið en að tapa þremur leikjum sínum 5-0 og vera svo látnir labba heim til sín berfættir frá Þýskalandi, þá eru það þessir aumingjar. Allir sem einn.

e.s.
Jú, ég geri mér grein fyrir því að Tógó eru ekki eina landsliðið þar sem leikmenn fá bónusa fyrir að spila með landsliði sínu og aukabónusa fyrir hvert stig/sigur. Ég er ekki fæddur í gær. Enda eru það ekki launagreiðslurnar per se sem fara í taugarnar á mér. Þessir gæjar eru með vonir og bænir heillar þjóðar á bakinu, þjóðar sem hefur aldrei áður fengið að vera hluti af HM í knattspyrnu, og þeir fara í verkfall vegna þess að þeir fá ekki peningana sína. Peninga sem knattspyrnusambandið þeirra á augljóslega ekki til, og er í engu samræmi við efnahag þjóðarinnar.

Jæja, þá er leikdagur fjögur á HM búinn og þremur frábærum leikjum lokið. Þetta hefur svo sannarlega verið stórskemmtilegur leikdagur.

Flugeldasýningin hófst snemma þegar Ástralir unnu Japana, 3-1, í sínum fyrsta leik í úrslitum HM. Þetta var stórskemmtilegur leikur á að horfa; Japanirnir voru vel skipulagðir í vörninni og sóttu mjög hratt fram þegar færi gafst, á meðan Ástralir tóku að sér að spila pressuboltann og reyna að komast yfir. Liverpool-maðurinn Harry Kewell var frammi hjá Áströlum ásamt Mark Viduka, en þeir félagar fóru á kostum í leiknum og voru að öðrum ólöstuðum bestu menn vallarins … þangað til svona tíu mínútur voru eftir.

Það var þó gegn gangi leiksins sem Japanir komust yfir eftir mistök Mark Schwarzer í marki Ástrala, undir lok fyrri hálfleiksins. Í síðari hálfleik sóttu Ástralir síðan djarft og Guus Hiddink þjálfari þeirra henti öllum tiltækum stjörnum inná völlinn en allt virðist ætla að vera fyrir bí þangað til sex mínútur voru eftir af leiknum. Þá tók Everton-maðurinn Tim Cahill upp á því að skora tvö mörk á þremur mínútum og Ástralir voru allt í einu komnir yfir. Varamaðurinn John Aloisi skoraði svo þriðja mark Ástrala í uppbótartíma sem fögnuðu aldeilis frábærum og merkum sigri í dag og eru því í góðri stöðu í sínum riðli, en Brasilíumenn mæta Króatíu í sama riðli á morgun.

Í öðrum leik dagsins tóku Tékkar svo Bandaríkjamenn í kennslustund í knattspyrnu og unnu frekar auðveldan 3-0 sigur. Ég varð fyrir talsverðum vonbrigðum með Bandaríkjamennina í dag, en þeir komust í 8-liða úrslitin fyrir fjórum árum og ég bjóst við þeim sterkari í dag. Það varð þó ekki úr og Tékkarnir unnu auðveldlega. Risinn Jan Koller skoraði fyrsta markið með skalla í upphafi leiks en fór svo meiddur af velli undir lok fyrri hálfleiks. Fregnir herma að hann sé úr leik á mótinu eftir að hafa meiðst í læri, en það eru verulega slæmar fréttir fyrir Tékkana. Vladimir Smicer er þegar farinn heim til Tékklands með meiðsli og ef Koller er frá líka, og Milan Baros tæpur (spilaði ekki í dag), þá gæti það haft alvarleg áhrif á frammistöðu Tékka síðar í keppninni. En þeir voru frábærir í dag og nýr leikmaður Arsenal, Tomas Rosicky, kórónaði frábæra frammistöðu sína í dag með tveimur frábærum mörkum í sitt hvorum hálfleiknum.

Í þriðja leik dagsins unnu Ítalir svo góðan sigur á Ghana, 2-0, í stórskemmtilegum leik. Ítalir voru mjög skipulagðir og agaðir í þessum leik og sigur þeirra var að mínu mati fyrst og fremst góðri taktík Marcello Lippi að þakka. Þeir voru í sjálfu sér vel að þessum sigri komnir, Pirlo og Iaquinta skoruðu mörkin í sitt hvorum hálfleiknum, en þessi leikur hefði samt hæglega getað fallið Ghana-mönnum í skaut. Þeir spiluðu mjög vel í þessum leik, sennilega best af þeim Afríkuþjóðum sem hafa spilað í keppninni til þessa. Þeir voru vel skipulagðir, mjög agaðir og vel spilandi en virtist skorta lokaáherslurnar upp við vítateig Ítala. Kannski skorturinn á góðum framherja sé of stórt vandamál fyrir þá í þessari keppni, en annars voru þeir góðir og gátu í raun bara kennt sjálfum sér um tapið. Mark Pirlo í fyrri hálfleik kom upp úr hornspyrnu, en boltinn var sendur út á Pirlo sem var algjörlega óvaldaður við vítateig Ghana-manna og setti hann snyrtilega í markhornið. Í síðari hálfleik gaf Samuel Kuffour, aftasti maður varnar Ghana, boltann svo á Iaquinta sem þakkaði fyrir sig, sólaði markvörðinn og skoraði. Sem sagt, tvö klaufamörk skildu að annars tvö mjög jöfn lið í þessum leik.

Og þar með er leikdagur 4 búinn og ég lýsi því hér með yfir að Harry Kewell og félagar í **Ástralíu** eru lið dagsins! Á morgun eru svo ekki amalegir leikir en þá hefja bæði stórlið Brasilíumanna og Frakka þátttöku í keppninni. Góðar stundir!

Í dag spiluðu tvö uppáhaldsliðin mín á HM leiki, Holland og Mexíkó.

Ég hef haldið með Hollandi verulega lengi. Ég man að þegar ég var pínulítill þá hélt ég uppá Michel Platini og franska landsliðið. Sú aðdáun dó þó á einhverjum tíma niður. Í stað hennar þá varð Ruud Gullit átrúnaðargoðið mitt. AC Milan var mitt uppáhaldslið í Evrópuboltanum og veggirnir heima hjá mér voru þaktir plakötum af Gullit, van Basten og Riikjard. Þegar ég var 11 ára sá ég svo Hollendinga vinna EM keppnina á eftirminnilegan hátt. Síðan þá hafa mín landslið ekki unnið á stórmóti.

Ég hef haft sterkar taugar til Hollendinga síðan þá og þeir hafa verið mitt helsta lið á stórmótum. Allavegana, ég horfði á þá [vinna Serbíu og Svartfjallaland](http://news.bbc.co.uk/sport1/hi/football/world_cup_2006/4852670.stm) (SOS) í dag. Leikurinn var sæmileg skemmtun, en þó olli hollenska landsliðið mér að vissu leyti vonbrigðum í þessum leik. Í raun má segja að Arjen Robben hafi verið allt í öllu í sóknarleik liðsins. Mér fannst miðjan og þá sérstaklega van Bommel og Cocu aldrei ná sér neitt sérstaklega á strik í leiknum. En það var samt fínt að ná sigri gegn þessu sterka liði SOS.

Fyrir okkur Liverpool menn, þá var Jan Kromkamp á bekknum allan tímann. Dirk Kuyt kom inná fyrir van Nilsteroy og virkaði ágætlega. Hann vann talsvert mikið aftur og átti góðan þátt í spilinu. Hann kom sér líka nokkrum sinnum í ágæt færi, en Arjen Robben var full markagráðugur í dag.

Hitt liðið mitt, sem spilaði í dag er Mexíkó. Þegar ég var tvítugur vann ég hjá Chupa Chups í Mexíkóborg. Eftir það hef ég ávallt haft ákaflega mikið álit á Mexíkó og íbúum þess frábæra lands. Áhugi þeirra á fótboltalandsliðinu hreif mig líka með og síðan þá hef ég alltaf haft sterkar taugar til Mexíkó.

Allavegana, þeir [unnu Írani](http://news.bbc.co.uk/sport1/hi/football/world_cup_2006/4852682.stm) 3-1 í dag. Íran kom talsvert á óvart í leiknum og þeir voru sterkir í fyrri hálfleik. Í þeim seinni kom þó á endanum í ljós styrkur Mexíkóa og þeir unnu á endanum góðan sigur. Rafael Marquez var algjörlega frábær í leiknum. Hann spilar á miðjunni fyrir Mexíkó og var undirstaðan í flestöllum aðgerðum þeirra. Þvílíkur leikmaður. Lofar góðu fyrir framhaldið. Mexíkó ætti að fara ásamt Portúgal áfram úr þessum riðli.

Svo horfði ég með öðru auganu á Portúgal-Angóla, sem var skemmtilegur leikur. Ég hélt með Angóla í leiknum og það lið kom mér á óvart með að taka áhættu. En auðvitað voru Portúgalar of sterkir fyrir þá.

Jæja, Englendingar unnur Paragvæ í frekar leiðinlegum leik á HM í dag. Ég er enginn sérstakur Englandsáhugamaður, því að Holland, Mexíkó og Argentína eru ofar á listanum hjá mér. En þetta vakti áhuga minn þar sem tveir Liverpool menn voru í liðinu.

Leikurinn byrjaði hressilega og Paragvæar skoruðu sjálfsmark eftir aukaspyrnu frá David Beckham. Eftir það var þetta heldur daufur leikur með fáum færum.

Varðandi leikmenn Liverpool, þá var Steven Gerrard lítið áberandi í leiknum. Enn einu sinni er honum ætlað meira varnarhlutverk í liðinu. Enska landsliðið er sennilega eina landslið þar sem besti leikmaður liðsins fær ekki að spila sína bestu stöðu. Hann og Lampard náðu ekki vel saman, en Lampard náði að ógna markinu nokkrum sinnum vel. Sven Göran hlýtur á endanum að sjá ljósið og láta Gerrard fá frelsi til að fara framar á völlinn. Þetta gengur ekki svona áfram.

Peter Crouch var að mínu mati verulega góður í leiknum og sennilega einn besti leikmaður Englands (ásamt Joe Cole). Dómari leiksins lagði Crouch þó algerlega í einelti og dæmdi grimmt á hann. Hann vann gríðarlega vel fyrir liðið og skilaði boltanum frábærlega af sér. Vandamálið var að samherji hans í framlínunni, Michael Owen, var handónýtur í leiknum. Að mínu mati er það ALLS EKKI sjálfsagt að þegar að Rooney kemur inn í liðið að Crouch verði að víkja. Ef að Crouch og Owen spila svona í næstu leikjum, þá væri framlína með Crouch og Rooney að mínu mati mun sterkari en framlína með Owen og Rooney.

En allavegana, England þarf núna að vinna Trínídad & Tobago til að komast áfram úr riðlinu og er það ánægjulegt.

Jæja, enska liðið gegn Paragvæ er komið. Liðið er einsog í síðasta æfingaleik, nema að Gary Nev*?´- er í bakverðinum í staðin fyrir Carragher.

Jæja, Crouch skorar þrennu í dag. Er það ekki? :-)

HM í Þýskalandi hófst með háværum hvelli í dag. Í opnunarleik mótsins í ár unnu Þjóðverjar 4-2 sigur á Kosta Ríka í stórskemmtilegum leik, sennilega einhverjum skemmtilegasta opnunarleik í marga áratugi. Það var mikil pressa á heimamönnum sem voru án fyrirliða síns, Michael Ballack, en þetta fór þó vel fyrir þá. Sumir vilja segja að þetta hafi verið lítið annað en skyldusigur fyrir Þjóðverjana en það verður satt best að segjast að þótt það hafi verið klassamunur á þessum tveimur liðum voru þeir alls ekki öruggir með sigur. Jú, þeir skoruðu fjögur mörk í fjarveru Ballack sem er jákvætt en þeir leyfðu Kosta Ríka-mönnum að fá allt of mikið pláss og mikinn tíma með boltann nær allan leikinn að mínu mati.

Og svo sáu allir hversu veik vörnin þeirra er. Ég meina ef Kosta Ríka með Paulo Wanchope sem sinn aðalmann geta afhjúpað þessa vörn heimamanna nokkrum sinnum getið þið ímyndað ykkur hvað Englendingar með Michael Owen, Frakkar með Thierry Henry, Argentínumenn með Hernan Crespo, Ítalíumenn með Luca Toni og Hollendingar með Ruud van Nistelrooy geta gert þeim. Svo ég minnist nú ekki á heimsmeistara Brasilíu sem virðast stundum sækja á allt að átta mönnum í einu og geta snúið nauðvörn í stórsókn á heimsmetahraða.

Með öðrum orðum; góður sigur í dag hjá Þjóðverjum í stórskemmtilegum leik en betur má ef duga skal!

Í seinni leik dagsins unnu Ekvadorar nokkuð óvæntan 2-0 sigur á Pólverjum í Schalke Arena í Gelschenkirchen. Ég verð að viðurkenna að frammistaða Ekvadora kom mér ekki eins mikið á óvart og hún virtist koma þulunum á Sýn í opna skjöldu, en ég var hins vegar virkilega hissa að sjá hversu hrikalega slappir Pólverjarnir voru. Ekvadorar unnu m.a. Brasilíu og Argentínu í undankeppninni í S-Ameríku og voru því sýnd veiði en ekki gefin í þessari keppni, og á daginn kom að þeir eru með feykisterkt lið; líkamlega mjög sterkir, góðir í loftinu, ofurvel skipulagðir og teknískir. Þeir halda boltanum mjög vel innan liðsins og eru mjög yfirvegaðir í öllum sínum aðgerðum. Þjóðverjarnir munu eiga í miklum vandræðum með þá í síðustu umferðinni, en staðan er samt sú að sá leikur gæti verið hreinn úrslitaleikur um sigur í riðlinum.

Pólverjar eru í mjööög slæmum málum eftir daginn í dag. Eftir tapið gegn Ekvador þurfa þeir að gyrða sig strax í brók og nú dugir hreinlega ekkert annað en sigur gegn Þjóðverjum í næstu umferð. Ef þeir tapa fyrir Þjóðverjum og Ekvadorar vinna Kosta Ríka, sem ég geri fastlega ráð fyrir, þá eru þeir á leiðinni heim eftir aðeins tvo leiki. Þetta lið sem olli Englendingum verulegum vandræðum í undankeppninni átti bara aldrei séns í þennan leik; það segir sína sögu að þeir áttu **fyrsta skot á mark andstæðinganna** á 82. mínútu! Svoleiðis frammistaða fleytir mönnum bara ekki neitt áfram í HM.

Þannig að Ekvador fær þann heiður að vera lið dagsins í mínum bókum, en Pólverjar sitja eftir með sárt ennið og eru fyrstu vonbrigðin í sumar.

Á morgun eru síðan tveir stórleikir og ein skotæfing, eða það ætti allavega að vera svo. Strax upp úr hádeginu er stórleikur Englendinga og Paragvæ, en við munum að sjálfsögðu ræða aðeins um þann leik þar sem okkar menn munu eflaust eitthvað koma við sögu. Svo munu Svíar væntanlega vinna stórsigur á Trínídad & Tóbagó en síðar um kvöldið er stórleikur á milli Fílabeinsstrandarinnar og Argentínu, sem eru í dauðariðlinum ásamt Hollendingum og Serbíu & Svartfjallalandi sem spila á sunnudag.

Sem sagt, tveir flottir leikir í dag og þrír enn flottari á leiðinni á morgun. HM er hafið og ég brosi út að eyrum!

Já, þið lásuð þetta rétt.

Ég var beðinn um að auglýsa hérna á blogginu miða á HM, sem fæst ókeypis.

Þetta er 1 miði á England – Trinidad – 15 júní í Nurnberg. Miðinn er fyrir aftan annað markið í 1 röð.

Sá, sem á miðann fer ekki fram á neina greiðslu, heldur má viðtakandinn einungis bjóða honum uppá einn bjór. :-) Á miðanum er nafn fyrirtækis (en ekki nafn og passanúmer) þannig að eigandinn ábyrgist ekki að viðkomandi komist inn, en það er *mjög* ólíklegt að það sé vandamál.

Ef þú hefur áhuga á miðanum, settu þá inn nafn þitt og email (settu emailið í sjálft kommentið, ekki bara í email hlutann á forminu) og viðkomandi mun hafa samband við þig. Þetta er ekki á vegum okkar á Liverpool blogginu, heldur mun eigandi miðans hafa samband við áhugasama.

Skemmtileg [komment](http://www.liverpoolfc.tv/news/drilldown/N152554060609-1030.htm) frá þjálfara Paragvæ:

>”Peter Crouch is a concern for me. We hardly come across players like him, very seldom. In football it is not easy to find such a tall player with such good control. He has this harmony in his movements, a coordination that is very good and he can go back and help with the game building.”

Jammm

Robbie Fowler [skrifa um enska landsliðið í Echo](http://icliverpool.icnetwork.co.uk/0500liverpoolfc/0100news/tm_objectid=17191756%26method=full%26siteid=50061%26headline=how%2dcan%2dcarra%2dbe%2dignored%2d-name_page.html)

>WATCHING England’s final warm-up match against Jamaica last Saturday, I was left speechless during one part of John Motson’s commentary. As he was talking to Mark Lawrenson about England’s possible starting line-up against Paraguay, Motty suggested that the 11 who began against Jamaica would do so in Frankfurt this weekend.

>Suddenly, though, he seemed flustered and felt the need to correct himself. “Sorry,” he said. **”Gary Neville will come back in for Jamie Carragher at right-back, obviously.”**

>Obviously what? Carra has played in England’s last three matches in three different positions and could not have been more impressive. I thought he was excellent in the holding role against Hungary but what more does he have to do to get credit from the so-called experts?

>Some people have often wondered whether Carra offers enough going forward, but unless my eyes were deceiving me, I’m pretty sure I saw him surge into the box and deliver a perfect cross for Peter Crouch to score his second.

>Play him as a right-back, central defender or central midfielder and he’ll never let you down, but to suggest Neville should walk straight back into the team is at best grossly unfair and at worst, patronising.

Hey heyr, Robbie!

Og þetta:

>Earlier this season, even the legendary Franco Baresi named Carra alongside John Terry as two of the best defenders in the world. Having seen the heroics Carra performed in helping Liverpool win the European Cup, the AC Milan legend is hardly a bad judge, is he?

>You’d be hard pressed to find four better defenders than Carra in the world. He must be given the platform his talents deserve.

Nákvæmlega! Getiði nefnt mér eitt landslið í heiminum (utan Englands auðvitað) þar sem Carragher væri ekki í byrjunarliðinu?

Nokkuð athyglisverðir hlutir eru að gerast í tengslum við franska landsliðið. Samkvæmt Reuters [verður Djibril Cisse](http://in.today.reuters.com/news/newsArticle.aspx?type=sportsNews&storyID=2006-06-06T233635Z_01_NOOTR_RTRJONC_0_India-253094-1.xml&archived=False) í byrjunarliðinu í síðasta æfingaleik Frakka fyrir HM, á morgun.

Raymond Domenech hafði áður gefið það sterklega í skyn að liðið í síðasta æfingaleiknum myndi líka byrja fyrsta leikinn á HM. Og af uppstillingunni má ætla að þetta sé sterkasta liðið. Þess vegna er mjög athyglisvert að sjá nafn Djibril Cisse í liðinu en ekki David Trezeguet.

Allavegana, liðið verður því svona:

Það væri náttúrulega verulega gaman að sjá Cisse í byrjunarliði Frakka á HM. Vonandi að hann nái að standa sig, hvort sem hann verður áfram hjá Liverpool eða ekki.

Ég veit ekki með ykkur, en fréttaþurrðin er alveg að gera útaf við mig. Það er víst eins gott bara að maður hefur HM-fréttirnar til að ylja sér á þessum löngu dögum, annars veit ég ekki hvað ég myndi gera. Tökum sem dæmi þessa grein á SoccerNet. Þarna er landsliðsþjálfari Hollendinga, goðsögnin Marco van Basten að tala um starf sitt og sambandið við leikmennina.

Van Basten hefur verið vel liðinn sem þjálfari Hollendinga; hann náði frábærum árangri í undankeppninni og hefur bylt þessu liði umtalsvert. Menn gera sér miklar vonir. En á móti kemur að hann hefur tekið nokkrar djarfar ákvarðanir, t.d. það að skilja menn á borð við Kluivert, Davids og Seedorf eftir heima, ákvarðanir sem gætu hefnt sín á honum ef Hollendingar valda vonbrigðum í sumar.

Það besta við greinina er samt þessi punktur hér:

>”We’ve abandoned the petty fines for coming late or leaving mobiles on, as this is not the kind of money that will hurt any modern player. As a punishment he now has to tell a joke in front of the group. That works very well. No one has sinned so far.”

MVB: “Hey, þú, Arjen … komdu hérna aðeins. Já, þú. (pssst ppsstt pssst) …”

Robben: “Æji, þjálfari, nei ekki ….”

MBV: “Strákar, safnist saman hérna sem snöggvast. Arjen gerðist svo grófur að svara SMS-skilaboðum á töflufundi inní klefa áðan. Fyrir vikið ætlar hann nú að segja ykkur brandara. Áfram, Arjen.”

Robben: “Ööö … eee … hvað kallar maður tvo Belga á úlfalda?”

Mér finnst þetta snilldartilhugsun. Peningar skipta þessa gæja engu máli, þannig að hann niðurlægir þá bara í staðinn. Alvöru þjálfari!

Hér að lokum er svo yfirlýsing frá Einari Erni varðandi Holland. ;)

JÆJA, okkar maður **Peter Crouch** tók sig til og skorað ÞRENNU með enska landsliðinu gegn Jamaíka í síðasta upphitunarleiknum fyrir HM. Við ættum þar með að geta bókað að hann verði í byrjunarliðinu gegn Paragvæ næsta laugardag.

Hann hefur því skorað 4 mörk í síðustu tveim leikjunum með Englandi. Frábær árangur hjá okkar manni. Ég var því miður svo hroðalega þunnur að ég náði bara að horfa á fyrstu 20 mínúturnar, en það væri gaman að heyra frá ykkur hvernig Gerrard, Carra og Crouchy voru að spila í dag.

Ætli menn hætti að púa á Crouchy núna? :-)

Já, og Harry Kewell [skoraði tvö mörk](http://www.liverpoolfc.tv/news/drilldown/N152515060603-1317.htm) fyrir Ástralíu í gær.

Peter Crouch fór á kostum í leik Englendinga og Ungverja í gær og skoraði frábært mark, sem að hann og Joe Cole bjuggu til. Í tilefni þess, nokkur myndbönd (í boði YNWA)

Markið hans og fagnið:

Hérna er [myndasería](http://news.bbc.co.uk/sport1/hi/football/photo_galleries/5032866.stm) með fagninu.

Og svo Crouchy að dansa í partíi hjá David Beckham, sem er upphafið að fagninu.

Djöfulsins snillingur! Crouchy mun skora meira en Owen á HM. Ég skal veðja 2000 kalli við einhvern.

Dömur mínar og herrar, má ég kynna manninn sem ætlar að [redda öllum miðjuvandræðum](http://sport.independent.co.uk/football/internationals/article621789.ece) Englendinga í sumar…

Samkvæmt Indenpendent ætlar Sven-Göran að spila með 5 manna miðju á móti Ungverjum annað kvöld. Semsagt, á miðjunni eiga að vera Beckham, Lampard, Cole, Gerrard (framarlega) og … **Jamie Carragher**. Gerrard á að vera nokkurn veginn á milli miðju og sóknar og svo verður Michael Owen einn frammi.

Owen er reyndar meiddur og hann virðist vera verulega tæpur fyrir HM. Ef að Owen er meiddur, þá væri ekki ólíklegt að liðið á HM myndi líta svona út:

Magnað helvíti, ekki satt?

Jæja, nú eru opinberlega aðeins **tíu dagar** þangað til Heimsmeistarakeppnin í fótbolta hefst. Hún fer fram í Þýskalandi þetta árið, þannig að ólíkt síðustu keppni fær maður að horfa á leikina á mannsæmandi tímum. Allavega, vegna gríðarlegs fréttaleysis af Liverpool FC í dag ákvað ég að henda inn smá grein, eða samantekt.

Við hér á Liverpool blogginu höfum ákveðið að fylgjast náið með HM í knattspyrnu og munum vera duglegir að skrifa um allt það sem okkur þykir áhugavert á meðan á keppninni stendur. Við verðum kannski engin fréttasíða, en munum hafa skoðun á hlutunum. Það á ennþá eftir að fastnegla niður hvernig við ætlum að hafa þetta okkar á milli, en ljóst er þó að við munum gefa sérstakan gaum að þeim leikmönnum Liverpool sem eru fulltrúar landa sinna á HM í knattspyrnu í sumar.

Þeir leikmenn eru sem hér segir:

**ENGLAND: Steven Gerrard, Peter Crouch, Jamie Carragher, Scott Carson:** Englendingar eru í B-riðli ásamt Paragvæ, Svíþjóð og Trínídad & Tobagó. Gerrard verður lykilmaður í liði Englendinga í sumar á meðan þeir Jamie Carragher og Scott Carson verða varaskeifur; Carson þriðji markvörður á eftir Paul Robinson og David James, og Carra varaskeifa fyrir þá John Terry og Rio Ferdinand í miðri vörninni og hugsanlega líka sem vinstri bakvörður fyrir Ashley Cole. Hlutverk Peter Crouch verður kannski það áhugaverðasta, en þátttaka hans veltur mikið á því hversu lengi Wayne Rooney verður frá vegna meiðsla, og hvort hann missir af keppninni í heild. Crouch gæti spilað talsvert mikið, og jafnvel einhverja leiki sem byrjunarmaður, sem yrði frábært að fylgjast með fyrir okkur Púllarana.

**HOLLAND: Jan Kromkamp:** Þessi hollenski bakvörður mun nær örugglega spila einhverja leiki, þar sem hann hefur verið fastamaður í liði Marco Van Basten síðustu tvö árin eða svo. Hvort hann spilar alla leiki sem byrjunarmaður verður að koma í ljós, en hann verður þarna og því er vert að gefa Hollendingum gaum. Einnig mun athygli okkar Púllara vafalítið beinast að þessu liði þar sem Dirk Kuyt, sem hefur verið margorðaður við Liverpool, verður í eldlínunni með samlöndum sínum. Holland er í C-riðli með Argentínu, Fílabeinsströndinni og Serbíu & Svartfjallalandi.

**ÁSTRALÍA: Harry Kewell:** Ástralir eru í ‘Group Of Death’ þetta árið, F-riðli ásamt heimsmeisturum Brasilíu, Japan og Króatíu. Fjögur stórlið úr fjórum heimsálfum, vægast sagt athyglisverður riðill þar á ferðinni. Kewell hefur átt við meiðsli að stríða síðan í úrslitaleik FA bikarkeppninnar um daginn en verður skv. nýjustu fréttum orðinn heill fyrir fyrsta leik Ástrala gegn Japan. Enda er það vel, því Kewell er algjör lykilmaður fyrir Ástrali í þessari keppni. Það besta sem gæti komið fyrir Liverpool í þessari keppni væri það að Kewell myndi blómstra og sneri aftur til Englands sem stórstjarna á heimsvísu, leikmaður sem sló í gegn á HM í sumar. Ég kem allavega til með að halda með Áströlum í sumar, í þeirri von að Kewell nái sér á strik. Þetta verður feykiskemmtilegur riðill, mikið af sókndjörfum og léttleikandi liðum.

**FRAKKLAND: Djibril Cissé:** Frakkar eru í G-riðli ásamt Svisslendingum, Kóreubúum og Tógó frá Afríku. Á pappírnum er þetta riðill sem fyrrum Heims- og Evrópumeistarar Frakka ættu að valta yfir, en þó veit maður aldrei. Það var líka búist við að þeir völtuðu yfir Senegala í opnunarleik síðustu Heimsmeistarakeppni. Okkar maður í þessum riðli verður framherjinn Djibril Cissé, en þó er aldrei að vita nema að hann verði búinn að semja við eitthvað annað félagslið eftir 10 daga þegar keppnin hefst. Hvað sem verður um framtíð hans komum við til með að fylgjast með honum, og hinum stórstjörnum franska liðsins, í keppninni í sumar. Cissé verður kannski ekki byrjunarmaður hjá Frökkum, enda hinir ótrúlegu Thierry Henry og David Trezeguet fremstir í flokki og Louis Saha með honum á bekknum, en hann mun koma eitthvað við sögu.

**SPÁNN: Xabi Alonso, Pepe Reina, Luis García:** Spánverjar eru í H-riðli ásamt Túnis, Sádi-Arabíu og Úkraínu. Eftir að Xavi hjá Barcelona missti af mestum hluta tímabilsins vegna meiðsla er búist við því að Xabi Alonso taki stöðu sína í byrjunarliði Spánverja í sumar, við hlið David Albelda frá Valencia og/eða Xavi frá Barca. Hann verður að mínu mati lykilmaður Spánverja í sumar. Pepe Reina verður varamarkvörður á eftir Iker Casillas og því ólíklegt að hann komi mikið við sögu. Spurningin er síðan hversu mikið Luis García verður notaður. Eftir frækna frammistöðu hans í undankeppninni kæmi mér ekkert á óvart þótt hann byrji þessa keppni í byrjunarliði Spánverja í sumar, á hægri kantinum, og ég vona það eiginlega. Hann gæti orðið ein af stjörnum þessarar keppni ef hann fær séns, því við vitum allir hversu gaman litli Luis hefur af því að skora eftirminnileg mörk í stórleikjum. :)

Það er því ljóst að við munum fylgjast með Englendingum, Hollendingum, Áströlum, Frökkum og Spánverjum í sumar þar sem þessi lönd eru með leikmenn frá Liverpool innan sinna raða. Þess að auki munum við örugglega gefa fleiri liðum gaum, svo sem stórliðum Brasilíu, Argentínu og Þýskalands, og liðum eins og Tékklandi og Svíþjóð sem skarta leikmönnum sem við þekkjum vel. Þá þykist ég vita að Einar Örn muni leiða okkur í allan sannleik um gengi Mexíkóa í þessari keppni, en það er hörkulið sem gæti hæglega farið langt í sumar. ;)

Það eru aðeins tíu dagar í HM í knattspyrnu, veislan er að hefjast. Hverjir verða meistarar? Flestir veðja á Brasilíumenn en Englendingar, Argentínumenn, Spánverjar, Ítalir og jafnvel Hollendingar gera sér góðar vonir um sigur í sumar. Þetta verður spennandi! :)

Jæja, Van Basten virðist vera hættur í fýlu útí Jan Kromkamp, þar sem hann hefur valið hann í 23 manna [landsliðshóp Hollands fyrir HM 2006](). Gott mál. Dirk Kuyt (sem ég lærði að er borið fram Dirk Kæt) er líka í hópnum, en hann hefur auðvitað verið orðaður ítrekað við okkur. Spurning hvort það verði því tveir Liverpool menn í þessum hóp þegar HM byrjar. Hópurinn lítur svona út:

**Markverðir**: Edwin van der Sar (Manchester United), Maarten Stekelenburg (Ajax), Henk Timmer (AZ Alkmaar).

**Varnarmenn**: Khalid Boulahrouz (Hamburg SV), Giovanni van Bronckhorst (Barcelona), Tim de Cler (AZ Alkmaar), Kew Jaliens (AZ Alkmaar), **Jan Kromkamp (Liverpool)**, Joris Mathijsen (AZ Alkmaar), Andre Ooijer (PSV Eindhoven), Johnny Heitinga (Ajax).

**Miðjumenn**: Mark van Bommel (Barcelona), Phillip Cocu (PSV Eindhoven), Denny Landzaat (AZ Alkmaar), Hedwiges Maduro (Ajax), Wesley Sneijder (Ajax), Rafael van der Vaart (Hamburg SV).

**Framherjar**: Ryan Babel (Ajax), Dirk Kuyt (Feyenoord), Ruud van Nistelrooy (Manchester United), Robin van Persie (Arsenal), Arjen Robben (Chelsea), Jan Vennegoor of Hesselink (PSV Eindhoven).

Þarna sjá menn að af þekktum hollenskum leikmönnum vantar til dæmis Clarence Seedorf (en þeir MVB talast ekki við – algjör synd), Jaap Stam (sem er hættur) og George Boateng.

Jerzy Dudek er ekki í [pólska landsliðshópnum fyrir HM](http://home.skysports.com/list.asp?HLID=387539&CPID=4&title=Dudek+Pole-axed&lid=2&channel=Football_Home&f=rss). Þjálfarinn valdi þrjá markmenn og er Dudek ekki einn af þeim. Markmennirnir eru Artur Boruc (Celtic), Tomasz Kuszczak (West Bromwich Albion), Lukasz Fabianski (Legia Warsaw)

Það kemur mér í rauninni ekkert stórkostlega á óvart. Og þó…. hvað hefur Nando fram yfir hina leikmennina? Hann hefur ekki verið mjög iðinn við kolann í vetur, en hann býr yfir mikilli reynslu sem gæti komið sér vel á HM. Villa er búinn að vera besti framherji Spánverja í vetur og Torres er frábær. Luis Garcia og Reyes eru þarna líka. Raúl verður ekki skipt út fyrir neinn.

Við eigum þrjá leikmenn í hópnum, Reina, Xabi og Luis Garcia. Það verður að teljast gott en líklega verður bara einn þeirra í byrjunarliðinu, Xabi Alonso. Það verður samt sem áður nóg af mönnum til að styðja á HM í sumar….

Markmenn:: Iker Casillas (Real Madrid), Jose Reina (Liverpool), Santiago Canizares (Valencia)

Varnarmenn: Carles Puyol (Barcelona), Michel Salgado (Real Madrid), Sergio Ramos (Real Madrid), Carlos Marchena (Valencia), Asier Del Horno (Chelsea), Antonio Lopez (Atletico Madrid), Pablo Ibanez (Atletico Madrid), Juanito Gutierrez (Real Betis)

Miðjumenn: David Albelda (Valencia), Xabi Alonso (Liverpool), Joaquin Sanchez (Real Betis), Cesc Fabregas (Arsenal), Andres Iniesta (Barcelona), Xavi Hernandez (Barcelona), Marcos Senna (Villarreal)

Framherjar: Jose Antonio Reyes (Arsenal), David Villa (Valencia), Fernando Torres (Atletico Madrid), Raul Gonzalez (Real Madrid), Luis Garcia (Liverpool).

Jæja, Djibril Cisse sem hefur verið útí kuldanum hjá franska landsliðinu í smá tíma er aftur kominn inní [23 manna hópinn fyrir HM](http://news.bbc.co.uk/sport1/hi/football/world_cup_2006/teams/france/4769857.stm). Í hópnum er einnig Alou Diarra, sem Liverpool seldi til Lens síðasta sumar.

Franski hópurinn er svona:

**Markverðir**: Fabien Barthez (Olympique Marseille), Gregory Coupet (Olympique Lyon), Mickael Landreau (Nantes).

**Varnarmenn**: Eric Abidal (Olympique Lyon), Jean-Alain Boumsong (Newcastle United), Pascal Chimbonda (Wigan Athletic), William Gallas (Chelsea), Gael Givet (Monaco) Willy Sagnol (Bayern Munich), Mikael Silvestre (Manchester United), Lilian Thuram (Juventus).

**Miðjumenn**: Vikash Dhorasoo (Paris St Germain), Alou Diarra (Racing Lens), Claude Makelele (Chelsea), Florent Malouda (Olympique Lyon), Patrick Vieira (Juventus), Zinedine Zidane (Real Madrid).

**Framherjar**: **Djibril Cisse (Liverpool)**, Thierry Henry (Arsenal), Franck Ribery (Olympique Marseille), Louis Saha (Manchester United), David Trezeguet (Juventus), Sylvain Wiltord (Olympique Lyon).

Þarna verður að teljast líklegast að Henry og Trezeguet séu framherjapar númer 1. Svo er spurning hver er varamaður fyrir þá. Louis Saha hefur leikið vel fyrir Man U að undanförnu, en ég hallast samt að því að Cisse verði framherji númer 3 í liðinu. Það er allavegana vonandi að hann fái tækifæri til að sanna sig á HM.

Marca menn segjast hafa heimildir fyrir því hverjir 22 af 23 leikmönnunum, sem leika fyrir hönd Spánar á HM, eru. Samkvæmt [blaðinu](http://www.marca.com/edicion/marca/futbol/camino_al_mundial/es/desarrollo/643960.html) eru allir Liverpool mennirnir í hópnum. Þeir sem eru öruggir samkvæmt Marca:

**Markmenn**: Casillas, **Pepe**, Canizares
**Varnarmenn**: Salgado, Ramos, Puyol, Juanito, Pablo, Marchena, Antonio López og Pernía
**Miðjumenn**: Xavi, **Xabi Alonso**, Fabregas, Marcos Senna, Albelda, **Luis Garcia**, Reyes
**Framherjar**: Torres, David Villa, **Fernando Morientes**, Raúl.

Þeir, sem berjast svo um síðasta sætið samkvæmt Marca eru Joaquin og Vicente.

Það er allavegana ljóst að það verður verulega skemmtilegt fyrir okkur Liverpool menn að fylgjast með Spáni. Það er alls ekki ólíklegt að bæði Xabi Alonso (Baraja ekki í hópnum) og Luis Garcia verði í byrjunarliði Spánverja, með Reina og Morientes á bekknum.