Eru engin takmörk fyrir vitleysunni sem vellur uppúr íslenskum knattspyrnu lýsendum?

Í lýsingu við Fulham og manchester united leikinn áðan þá fór Guðmundur Torfa mikinn við að þylja upp markaskorun toppliðanna fjögurra. Hann minntist á að á lista yfir ELLEFU markahæstu menn Úrvalsdeildarinnar væri enginn Liverpool maður, en á listanum væru tveir Chelsea menn, tveir manchester united menn og tveir Arsenal menn.

Sagði Guðmundur þetta lýsandi dæmi um það að FRAMHERJAR Liverpool væru ekki að standa sig og að það væri hugsanlega ástæða fyrir að Liverpool væri ekki í toppbaráttunni. Þetta er alveg makalaust.

Fyrir það fyrsta, þá er það furðulegt að telja upp ellefu markahæstu mennina. Hver ætli sé í tólfta sæti? Jú, Dirk Kuyt framherji Liverpool sem hefur skorað 9 mörk eða einu marki færra en Wayne Rooney og Thierry Henry.

En hverjir eru þessir tveir leikmenn hjá Chelsea og manchester united sem sýna okkur hversu betur þessi lið standa sig í framherjamálum? Jú, markahæstur hjá manchester united er kantmaðurinn Cristiano Ronaldo og næstmarkahæstur hjá Chelsea er miðjumaðurinn Frank Lampard. Arsenal er því eina liðið sem státar af tveim framherjum á þessum topp 11 lista. Ef við skoðum topp 13 yfir markahæstu menn þá eru Chelsea, manchester united og Liverpool með 1 framherja og Arsenal með tvo: van Persie og Henry.

Ef við skoðum heildarskor framherjanna þá lítur þetta svona út:

Arsenal
van Persie 11, Henry 10, Adebayor 6. Samtals 27 mörk

Man U
Rooney 10, Saha 8, Solskjær 6, Larsson 1. Samtals 25 mörk

Liverpool
Kuyt 9, Bellamy 7, Crouch 6, Fowler 1. Samtals 23 mörk.

Chelsea
Drogba 17, Shevchenko 3, Kalou 2. Samtals 22 mörk

Semsagt, framherjar Arsenal hafa skorað 27 mörk. Framherjar manchester united hafa skorað 25 mörk, framherjar Liverpool 23 mörk en framherjar Chelsea 22 mörk. Liðið sem er í fjórða sæti hefur á að skipa marksæknustu framherjunum. Framherjar Liverpool hafa skorað tveim mörkum færra en framherjar toppliðsins.

Þannig að væntanlega hefði verið nær lagi að gagnrýna framherja Chelsea fyrir slælega frammistöðu. En hvað það kæmi lýsingu á leik manchester united og Fulham við er ofar mínum skilningi.

En látum það ekki hindra menn í að blaðra vitleysu í næstu útsendingu. Þetta eru jú bara staðreyndir og þær skipta engu máli þegar að menn vilja gagnrýna Liverpool sama hvað það kostar.

Uppfært (EÖE): Eftir umferð dagsins hafa framherjar manchester united sem áður skorað 25 mörk, en framherjar Liverpool eru nú þeim jafnir með 25 mörk líka þar sem að Robbie Fowler skoraði tvö mörk í dag.