01. febrúar, 2007
Febrúar. Daginn eftir.
Þvílíkur dagur í gær. Miðvikudagurinn 31. janúar 2007 verður sennilega feitletraður í sögu klúbbsins um áraraðir. Atburðir gærdagsins eru þegar farnir að valda hálfgerðum höggbylgjum á meðal forráðamanna og stuðningsmanna Liverpool og það er ljóst að öll áhrifin eru ekki komin í ljós. Enn á mikið vatn eftir að renna til sjávar.
Við skulum aðeins rifja upp hvað gerðist í gær:
Liverpool fengu leyfi frá FIFA til að semja við Javier Mascherano og sendu alla pappíra frá sér til enska knattspyrnusambandsins fyrir miðnætti. Hann er því orðinn löglegur leikmaður Liverpool sem heldur skráningu hans, og er því ekki lengur leikmaður West Ham. Hins vegar tilkynnti enska knattspyrnusambandið í morgun að þeir myndu taka sér smá tíma til að ákveða hvort hann fær leikheimild í ensku Úrvalsdeildinni.
Það sem mun líklega gerast í þessu máli er að þeir taka sér einn eða tvo daga til að fara yfir öll gögn og taka ígrundaða ákvörðun, og svo verður hún tilkynnt. Ef hann fær leyfið verður það sennilegast gefið út seinna í dag eða á morgun og því ætti hann að vera til í slaginn gegn Everton á laugardag, þó svo að ég efist um að Rafa vilji nota hann mikið í þeim leik í þeirri leikæfingu sem hann er í. Ef hann hins vegar fær leikheimild frá enska knattspyrnusambandinu má hann ekki spila í þeim þrettán deildarleikjum sem eftir eru, en yrði samt sem áður gjaldgengur fyrir okkur í Evrópu, að því er mér skilst.
Liverpool FC staðfesti einnig kaup á tveimur leikmönnum til viðbótar í gær: Alvaro Arbeloa og Francisco Manuel Duran. Arbeloa er 24ra ára hægri bakvörður frá Deportivo la Coruna sem er hugsaður sem valkostur á móti Steve Finnan, sem gæti fengið langþráða hvíld fyrir vikið í einhverjum af næstu leikjum, á meðan Duran er átján ára miðjumaður frá Malaga sem verður fyrst um sinn í varaliðinu okkar.
Hvort þessir menn ná að gera alvöru úr ferli sínum hjá Liverpool verður svo bara alveg að koma í ljós, en Arbeloa er þriðji bakvörðurinn sem reynir að hirða stöðuna af hinum tæplega þrjátíu og eins árs gamla Finnan, og ekki gekk það vel hjá þeim Josemi og Jan Kromkamp.
Og síðast en alls ekki síst, þá drógu Dubai International Capital til baka tilboð sitt í Liverpool FC í gær, réttri viku áður en talið var að David Moores stjórnarformaður myndi mæla formlega með tilboði þeirra við aðra hluthafa. Samkvæmt fjármálalögum mega þeir ekki koma aftur inn með tilboð í sex mánuði og því er ljóst að þeir eru endanlega úr leik um eignarhald á Liverpool FC.
Viðbrögð hafa verið nokkuð sterk, eins og sjá má á fréttaflutningi: BBC, D. Post, D. Post 2, Aðdáendur, Rawkblog.
Eins og ég sagði í ummælaþræðinum í gær, þá er aðalmálið í þessu það að við sem stöndum fyrir utan innsta hring klúbbsins vitum einfaldlega ekki nóg í þessu máli til að geta myndað okkur almennilegar skoðanir. Það er til lítils að gagnrýna klúbbinn ef þetta er svo ekki honum að kenna, og það þýðir lítið að reyna að rægja Dubai-menn ef þetta var ekki þeirra sök. Með tíð og tíma mun öll sagan af þessum viðskiptum sleppa út og aðeins þá munu menn vita nákvæmlega hvað fór úrskeiðis, og hverjum var um að kenna.
Það sem er hins vegar vitað í þessu, það sem mér þykir verst, er að Liverpool FC er í kapphlaupi við tímann og því hafa þessir atburðir bundið hendur okkar manna rígfastar. Málið er að Liverpool-borg, í samvinnu við klúbbinn, hefur fengið talsverðan fjárstyrk frá yfirvöldum í Evrópu og Bretlandi og verða samkvæmt heimildum að vera búnir að útdeila og nota þann fjárstyrk þegar síðasti þriðjungur ársins 2007 gengur í garð. Áætlað er að bygging nýs vallar í Stanley Park hefjist í mars og í kjölfarið uppbygging alls norðursvæðis Liverpool-borgar í kringum völlinn og Anfield-svæðið þar sem núverandi völlur stendur.
Liverpool FC einfaldlega getur ekki frestað þessum áætluðu verkum aftur. Þetta er ekki eins og að byggja sér sólpall í bakgarðinum, þar sem maður ákveður að byrja í næstu viku en ekki á morgun af því að það spáir rigningu. Ef þú frestar svona stórri aðgerð tekur marga mánuði að setja hana aftur á dagskrá, og þá er hætt við að klúbburinn sé of seinn til og geti glatað styrkjum sínum.
Þannig að bygging nýs vallar verður að hefjast nú í vor. Og eftir að Dubai-menn hættu við er hinn bandaríski Gillett eini bjóðandinn með tilboð á borðinu. Með öðrum orðum: okkar menn hafa einfaldlega ekki efni á því að segja nei við Gillett.
Þetta er einmitt það sem menn vildu ekki. Kannski er tilboð Gillett frábært og ásættanlegt fyrir alla og kannski verður hann frábær eigandi, en það er vissulega tilefni til þess að hafa áhyggjur að tilboði hans sé tekið einungis af nauðung en ekki af því að hann skaraði fram úr í hópi væntanlegra kaupenda.
Hendur klúbbsins eru bundnar. Gillett hefur alla ása á hendi og ætti að geta eignast klúbbinn nú án þess að þurfa endilega að gera allt það sem hann ætti að þurfa að gera til að sannfæra seljendurna um að hann sé rétti maðurinn. Þá þýðir líkleg yfirtaka hans væntanlega það að David Moores og Rick Parry hverfa á braut, og því er engin trygging fyrir því að yfirmenn klúbbsins í lok tímabils hafi nokkurn áhuga á að starfa lengur með Rafael Benítez.
Óvissan er slæm, en þetta skýrist allt á næstu dögum. Hvort heldur sem verður, hvort sem Gillett reynist himnasending eða martröð í Glazer-líki, þá er ljóst að miðvikudagurinn 31. janúar 2007 mun reynast örlagaríkur í sögu klúbbsins.
Svo ég tali nú ekki um Javier Mascherano. Ef einn efnilegasti miðjumaður heims blómstrar hjá Liverpool munum við allavega að einhverju leyti hugsa brosandi til þessa dags, því það er ekki á hverjum degi sem mönnum hlotnast slíkur fengur án endurgjalds.
