Okkar menn hristu í dag af sér slenið eftir erfiða viku og unnu auðveldan 3-0 sigur á Watford á útivelli í dag. Þessi sigur var allan tímann öruggur og óhætt að segja að okkar menn hafi sjaldan eða aldrei haft jafn lítið fyrir þremur stigum á útivelli. Fyrir vikið eru okkar menn komnir í 43 stig, aðeins fimm stigum á eftir Chelsea sem koma á Anfield um næstu helgi, en þeir eiga þó leik síðar í dag við Wigan.

Rafa Benítez gerði sex breytingar á liðinu í miðri viku gegn Arsenal og stillti upp mjög sterku og reyndu liði. Liðið spilaði lengst af í 3-4-3 leikkerfi sem manni fannst fyrir leikinn geta verið áhætta en annað kom á daginn. Rafa var gagnrýndur fyrir að hafa klúðrað uppstillingu sinni á þriðjudag gegn Arsenal en hann má líka fá hrós þegar vel tekst til og í dag var liðsuppstillingin hárrétt.

Liðið var sem hér segir:

Bekkur: Dudek, Riise, Guthrie, Pennant, Fowler.

Leikurinn fór frekar hratt af stað og Watford-menn virtust ætla að reyna að ná marki snemma. Þeir spiluðu boltanum mjög hátt og reyndu að vinna skallabolta gegn vörn okkar manna sem stóðst áhlaupið og eftir því sem leið á byrjunina kom boltinn oftar niður á jörðina og þá fór gæðamunurinn að skína. Okkar mönnum gekk almennt séð illa að láta boltann ganga í fyrri hálfleiknum, þökk sé háloftatennis Watford-manna, en náðu þó að ógna marki heimamanna nokkrum sinnum.

Daniel Agger skoraði mark á tólftu mínútu sem var réttilega dæmt af vegna rangstöðu, á meðan Hameur Bouazza átti ágætt skot rétt framhjá mínútu síðar, en Reina hefði sennilega haft þann bolta ef hann hefði verið á rammann. Samt, þótt maður sæi augljósan gæðamun á liðunum var þetta leikur sem gæti hæglega farið illa ef svo færi að þeir næðu fyrsta markinu.

Á 34. mínútu kom svo fyrsta markið. Peter Crouch fékk boltann inní teig og lék í gegnum vörn Watford-manna og inná markteiginn hægra megin. Þar stökk Ben Foster markvörður Watford að boltanum og sló hann frá um leið og Crouch sparkaði til hans en Steve Finnan fékk frákastið og gaf hnitmiðaðan bolta beint inná markteig þar sem Craig Bellamy þurfti aðeins að stýra honum í netið. 1-0 fyrir okkar menn. Mark Clattenburg, góður dómari leiksins, hefði getað dæmt hættuspark á Peter Crouch fyrir að sparka að höfði Ben Foster í klafsinu á markteig en mat þetta greinilega sem sanngjarna baráttu um boltann og því fékk markið að standa. Kvörtum ekki yfir því.

Nú, vindurinn var allur úr Watford-mönnum við markið og okkar menn gengu á lagið og voru fljótlega komnir tveimur yfir. Á 40. mínútu vann Craig Bellamy skallabolta á miðjum vellinum og tók strikið innfyrir, á meðan Dirk Kuyt skallaði innfyrir á hann. Bellamy mætti boltanum vel og skaut föstu skoti að marki sem Foster varði stórvel í markinu en Peter Crouch náði frákastinu og skallaði boltann í tómt markið. 2-0 og það var staðan í hálfleik.

Það er oft sagt að þriðja markið í leik sé mikilvægt og okkar menn hefðu getað lent í óþarfa pressu við upphaf síðari hálfleiks. Þá fékk Bouazza gott skotfæri rétt utan teigs en Pepe Reina sá við honum og varði gott skot hans örugglega. Liverpool fóru í kjölfarið í sókn og eftir að Aurelio hafði sent Bellamy óvaldaðan upp í vinstra hornið gaf sá velski góða fyrirgjöf á Peter Crouch sem mætti fyrirgjöfinni og skaut viðstöðulausu skoti í vinstra hornið, óverjandi fyrir Foster og framherjinn risavaxni kominn með tvö mörk í dag og þrettán á leiktíðinni!

Eftir þetta róaðist leikurinn aðeins. Watford-menn virtust sætta sig við tapið og okkar menn stjórnuðu leiknum í hægagangi. Þó skall hurð nærri hælum á 64. mínútu þegar Jordan Stewart átti frábært skot sem small í þverslánni, óverjandi fyrir Pepe Reina, en inn vildi boltinn ekki og okkar menn innbyrtu öruggan 3-0 sigur í þessum leik.

Á síðustu tuttugu mínútunum skipti Rafa svo öllum framherjunum útaf, fyrst Crouch fyrir Pennant, þá Kuyt fyrir Riise og loks Bellamy fyrir Fowler, þannig að þeir verða allir ferskir og til í slaginn eftir viku gegn Chelsea.

ASHLEY YOUNG: Mér finnst rétt að minnast aðeins á framherja Watford-liðsins, þar sem hann hefur verið orðaður við okkar menn í þessum glugga. Fyrir það fyrsta skal það tekið fram að það er erfitt að dæma hann of hart af þessum leik, þar sem Watford-liðið í heild sinni gat ekki rassgat í dag og ber með sér öll einkenni þess að vera á leiðinni beint niður um deild aftur í vor. Þetta er með skelfilegri liðum sem ég man eftir að hafa séð Liverpool spila gegn.

Að því sögðu, þá gat Young ekki neitt í þessum leik. Ég hef séð hann spila betur í vetur, sérstaklega gegn manchester united í haust á Vicarage Road, og hann er vissulega ungur og hver veit hvað hann getur í betra liði, en ef við eigum að vera harðir getum við sagt að miðað við frammistöðu hans í dag er hann ekki nærri því 7m punda virði eins og enska pressan hefur verið að tala um sl. daga.

MAÐUR LEIKSINS: Lið okkar manna var í hlutlausum gír í dag, innbyrti þennan sigur án þess að nokkur maður ætti svo sem stórleik. Áður en ég útnefni mann leiksins vil ég minnast sérstaklega á markvörðinn okkar, Pepe Reina. Með fullri virðingu fyrir Jerzy Dudek, þá var það algjörlega ljóst í dag hver gæðamunurinn á honum og Reina er. Að horfa á Reina spila eftir að hafa horft á tvo leiki í röð með Dudek er sláandi. Reina er svo öruggur í öllu sem hann gerir og réði við þetta allt saman með talsverðu öryggi. Frábær markvörður sem hélt enn einu sinni hreinu í dag og ég vona að hann eigi eftir að spila hvern einasta leik sem liðið á eftir á þessu tímabili.

En maður leiksins var að sjálfsögðu Peter Crouch. Það var forvitnilegt að sjá alla þrjá aðalframherjana okkar byrja saman inná í dag og á meðan þeir léku allir vel og Bellamy skoraði eitt og átti tvær stoðsendingar var það Crouch sem stal senunni með góðri tvennu. Hann er okkar markahæsti maður í vetur og eftir mörkin tvö í dag er hann búinn að skora jafn mikið fyrir Liverpool og hann gerði allt síðasta tímabil. Ef hann heldur þessu áfram nær hann tuttugu mörkunum í vetur, en við höfum ekki átt framherja sem skorar tuttugu mörk síðan Michael Owen var uppá sitt besta í byrjun áratugarins.

Næst: Chelsea á laugardag eftir viku. Vonum að Wigan geri okkur greiða í dag, bara jafntefli í þeim leik myndi gera leikinn eftir viku töluvert forvitnilegri.