24. desember, 2006
Varúð: Langur pistill!
Svona í tilefni að því að ég hef lítið skrifað á síðuna undanfarið ætla ég að bjóða upp á dýran pistil að þessu sinni. Gaman væri ef einhver nennti að lesa hann allann! Þar er ég að fjalla um liðið okkar í dag, tek svo til hvern einasta leikmann, eða stöðu reyndar, og segi hvað mér finnst. Hvaða menn ég vil út og hvernig ég sé framtíðina, nánustu framtíð eiginlega…..
Markmenn: Jose Reina, Jerzy Dudek, David Martin og Scott Carson
Það hefur verið orðrómur um það að Pepe sé á leiðinni aftur til Spánar. Ég gaf jafn lítið fyrir þann orðróm og þann um Crouch og Newcastle. Enda kom á daginn að hann langar ekkert í burtu og er ekki á leiðinni neitt. Hann stóð sig frábærlega á síðasta tímabili, dalaði aðeins í upphafi tímabils núna (eins og svo margir í liðinu) en er að koma sterkur inn. Hann er ekki að fara neitt.
Dudek kallinn hlýtur að vera orðinn þreyttur á bekkjarsetunni. Hann hefur gefið það út að hann vilji spila meira, sem er svosem ekkert skrýtið, hann hefur verið á bekknum frá því í Istanbúl. Hann er líka á þeim aldri að hann getur farið að hætta þessu ef hann spilar ekki og því tel ég nokkuð ljóst að hann fari næsta sumar. Það lið sem fær hann verður heppið enda góður markmaður þar á ferð.
Scott Carson hefur, eins og áður hefur komið fram, verið líklega eini ljósi punkturinn hjá Charlton á tímabilinu. Hann hefur staðið vaktina vel en ekki má gleyma að þetta Charlton lið er búið að vera svo lélegt að það er næstum því ekki fyndið. Samt bara næstum því. Hann klárar tímabilið þar, kemur svo til baka til okkar og verður markmaður númer tvö hjá okkur á næsta tímabili.
Martin verður númer þrjú áfram.
Vinstri bakvörður: John Arne Riise, Fabio Aurelio og Stephen Warnock.
Hinn geðþekki norðmaður hefur verið einn af lélegustu leikmönnum okkar á tímabilinu. Eins og Einar sagði einhverntíman, þá er ótrúlegt að þetta hafi ekki verið okkur dýrara en þetta. Hann hefur ítrekað misst menn framhjá sér auk þess sem hann hefur ekki lagt mikið til í sókninni. Hvað sem líður held ég að hann verði nú ekki seldur eða neitt svoleiðis.
Ég bind enn feykimiklar vonir við Aurelio. Þetta er góður leikmaður, með frábærar sendingar en hann er kannski soldið eins og aðrir brasilískir bakverðir, full sókndjarfur. Samt sem áður tel ég að þetta verði vinstri bakvörður númer eitt hjá okkur á síðari hluta tímabilsins.
Ég held líka að Warnock verði hjá okkur áfram. Riise og Aurelio spila einnig sem vinstri kantmenn og því er alveg pláss áfram fyrir Warnock. Það er alltaf gaman að hafa uppalda leikmenn í liðinu en ljóst er að hann er ekki framtíðarmaður, að mínu mati. Hann er ekkert unglamb lengur, þó að hann sé ekkert gamall, en hvar framtíð hans liggur veit ég ekki.
Hægri bakvörður: Steve Finnan og Lee Peltier
Finnan hefur verið einn allra stöðugasti leikmaður liðsins undanfarin ár. Hann er mjög traustur en hefur kannski helst verið gagnrýndur fyrir að sækja ekki nóg upp kantinn. Mér finnst hann hafa bætt sig mikið í þeim efnum og hann er einn af þeim sem eiga fast sæti í byrjunarliðinu.
Hinsvegar er Lee Peltier líklega ekki alveg tilbúinn í þetta strax. Finnan þarf sína hvíld eins og aðrir og því er þörf á nýjum manni.
Ég tel að hann komi nú í janúar og það þarf engan kjarneðlisfræðing til að sjá út að sá maður verður Lucas Neill. Hann var mjöööög nálægt því að koma síðasta sumar en allt bendir til þess að hann gangi í raðir okkar manna í janúarglugganum. Hann er fínn leikmaður, hefur mikla reynslu og ég held að hann muni nýtast okkur vel. Auðvitað ef hann kemur, ekkert er öruggt í boltanum eins og við vitum. Peltier kemur svo inn í þetta seinna bara….
Miðverðir: Jamie Carragher, Sami Hyypia, Daniel Agger og Gabriel Paletta.
Daniel Agger hefur verið einn besti leikmaður liðsins á tímabilinu að mínu mati. Hann er smátt og smátt að taka við af Sami Hyypia sem miðvörður nr 1, fyrir utan Carra sem vissulega á sitt sæti. Sami kallinn er að eldast og reyndar kæmi mér það ekki mikið á óvart ef hann yrði seldur næsta sumar. Hann verður 34 ára þá og er farinn að hægjast soldið mikið en maður veit svosem ekki.
Carra er bara Carra. Það er bara einn Carra… We all dream of a team of Carraghers
Paletta hefur ollið mér smá vonbrigðum. Ég var gríðarlega spenntur fyrir komu hans en auðvitað er hann bara nýkominn og er mjög ungur. Ég er sannfærður um að hann komi til með að gera góða hluti hjá okkur.
Niðurstaðan; Hyypia seldur næsta sumar og nýr miðvörður inn? Tel það líklegt….
Vinstri kantur: Harry Kewell, Luis Garcia, Mark Gonzalez. (Riise og Aurelio)
Tveir síðastnefndu geta leyst þessa stöðu, sem og Zenden sem ég flokka samt sem miðjumann núna. Luis Garcia er svo þessi alltmúlígmann, getur spilað allar stöður fram á við….
Sko, Kewell er búinn að vera meiddur allt tímabilið en ég vona svo ótrúlega innilega að kallinn nái sér og komi sér í form. Það er spurning hvað hann fær langan tíma, Rafa hefur ekki endalausa þolinmæði, ekki frekar en stuðningsmennirnir. Meiðslasaga þessa kappa er sorgleg. Þau hafa aftrað því að ferill þessa frábæra leikmanns hefur komist á almennilegt flug hjá Liverpool en hann er samt sem áður einn af mínum uppáhalds leikmönnum. Þegar hann nær sér á strik getur hann gert ótrúlega hluti en meiðist svo og er frá í hálft ár. Vonandi getur hann spilað eitthvað á tímabilinu, komið sér í form í sumar og sýnt okkur eitthvað á næsta tímabili. Ef ekki verður hann seldur.
Mark Gonzalez er allur að koma til. Þetta hefur verið erfitt ferli fyrir hann, að koma svona í nýtt lið og til nýs lands og allt það eftir vesenið með vegabréfið. Mér finnst hann vaxa með hverjum leiknum og hef trú á því að hann geti orðið frábær fyrir okkur. Hlakka til að sjá hann bæta sig meira, maður hefur alveg séð hvað í honum býr.
Garcia…. dæs… Þessi maður er ótrúlega mikill snillingur en ótrúlegur klaufi inn á milli. Það er eins og hann þurfi alltaf að fara erfiðari leiðina og þegar það heppnast hælir maður honum í hástert en rífur svo hár sitt þegar það misheppnast. Engu að síður mikilvægur fyrir okkur og hefur svo sannarlega sannað ágæti sitt.
Hægri kantmenn: Jermaine Pennant. (Margir! Garcia, Gerrard osfv)
Pennant er í raun okkar eini hægri kantmaður í dag. Hann hefur, líkt og Gonzalez verið stigvaxandi og er alveg að sanna sig. Hann byrjaði aaaaalls ekki nógu vel og maður var engan veginn sannfærður um þessi kaup eftir hvern dapran leikinn á fætur öðrum. En hann er allur að koma til og ég held að hann eigi eftir að geta gert vel, EN þá tel ég samt að við fáum okkur nýjan mann þarna.
Ég vil fá Daniel Alves. Því miður en hann lykilmaður í toppliðinu á Spáni og er nýbúinn að framlengja samninginn sinn, þrátt fyrir að það þurfi ekki að þýða neitt sérstakt. Rafa var ekki langt frá því að klófesta hann en því miður sigldi það í strand, líkt og með annan mann sem ég væri til í, Simao Sabrosa. Hinn spræki leikmaður Benfica yrði draumur á kantinn en Benfica er nú í Meistaradeildinni og svona og ég held að hann verði ekkert seldur. Vona samt alveg það besta. Langar sérstaklega að vita hvað lesendum finnst um þessa stöðu og þá hugsanlega menn í hana?
 |
Miðjumenn: Steven Gerrrard, Xabi Alonso, Momo Sissoko og Bolo Zenden
Gerrard. Fyrirliðinn okkar.
Alonso. Þarf ekkert að ræða þennan mann heldur.
Sissoko. Því miður meiddist þessi magnaði leikmaður, gætum svo sannarlega notað hann núna þegar hvíla þarf hina tvo. Framtíðarleikmaður hjá okkur, ekki nokkur spurning.
Bolo Zenden…. Ég er alls ekki nógu ánægður með hann. Jújú, hann er fjórði miðjumaður Liverpool, en ef einn meiðist er hann skyndilega orðinn næstur inn, eins og núna. Þá þarf að vera almennilegur maður en mér finnst hann bara ekki hafa sýnt nógu mikið, því miður. Hvort hann verði seldur veit ég ekki. Kannski ekki. Vona samt að Rafa kaupi miðjumann næsta sumar, má endilega vera í eldri kantinum. Kannski ekki alveg McCallister gamall en ég sakna Didi Hamann óneitanlega…..
Framherjar: Dirk Kuyt, Craig Bellamy, Peter Crouch og Robbie Fowler
Rafa sagði í viðtali í vikunni bara held ég að hann ætlaði ekkert að hreyfa við sóknarlínu sinni í janúar. Eina spurningin er bara held ég hvenær Fowler hættir.
Kuyt og Bellamy eru heitir þessa dagana saman og Crouchy kemur með annan pól í sóknarleik okkar sem er virkilega góður kostur. Ekki gleyma að hann er markahæsti leikmaður okkar í öllum keppnum.
Fowler hefur ekki fengið marga leiki, en hann vissi líka alveg hver staðan var þegar hann kom aftur fyrir ári síðan. Ohhhhh… ég var í Kop í endurkomu hans í byrjun febrúar, þegar hann skoraði með hjólhestaspyrnu gegn Birmingham, mark sem var dæmt af á lokamínútunni…. pínu vonbrigði. Hvað sem líður er erfitt að finna betri fjórða framherja held ég. Fowler er uppalinn hjá klúbbnum, er enn frábær í teignum og er mikilvægur innan sem utan vallar. Hann sættir sig líka við að vera númer fjögur, sem er mikilvægt. Ég býst við að hann spili í eitt ár til viðbótar áður en Rafa kaupir nýjan framherja.
Ekki má svo gleyma því að við eigum enn Florent Sinama Pongolle sem er að standa sig mjög vel með nýliðum í La Liga, Recreativo og Djibril Cisse sem er þegar búinn að skora fyrir Marseille eftir að hann jafnaði sig af fótbrotinu. Held nú samt að hann spili ekki aftur fyrir Liverpool en það er spurning með Pongolle….
Jæja, þetta er orðið helvíti langt!!! Þakka þeim sem nenntu að lesa þetta
Nú heimta ég viðbrögð, þrátt fyrir jólin og það allt
Hvað er rétt, hvað er rangt, hverja viljið þið út og inn?
Óska öllum gleðilegra jóla að lokum
