12. desember, 2006
Í dag kom inn á bloggið færsla þar sem áhugi Newcastle á Peter Crouch var opinberaður. Glenn Roeder segist vera aðdáandi hans, en reyndar finnst mér aaaaaalltof mikið gert úr þessum ummælum. Það er líka eitthvað verið búið að tala um hversu lítið Crouch hefur verið að spila….
Ég ákvað að athuga málið og með aðstoð stórkostlegrar kunnáttu í Excel (hehemm), setti ég upp einfalda töflu sem má sjá hér til hliðar. Upplýsingarnar eru fengnar frá BBC af því þær voru mjög þægilegar og aðgengilegar þar.
Talan efst eru leikir í öllum keppnum (deild, báðum bikarkeppnum og Meistaradeildinni) og talan í sviganum segir til hversu oft viðkomandi hefur komið inn á sem varamaður. Mörk í EP eru mörk í ensku úrvalsdeildinni (English Premier League, fyrir þá sem ekki átttuðu sig á skammstöfuninni 
) Út frá þessu væri hægt að reikna út mörk á leik og svo framvegis en mér finnst það ekki skipta öllu máli.
Þar kemur í ljós að Peter Crouch er búinn að spila flesta leiki af framherjum Liverpool á tímabilinu, 23 talsins sem þýðir að hann hefur byrjað 15 sinnum inn á í öllum keppnum fyrir Liverpool. Í þeim leikjum hefur hann skorað 9 mörk. Til samanburðar hefur Dirk Kuyt byrjað 17 leiki samtals og skorað í þeim 6 mörk. Annars getið þið auðvitað bara lesið úr töflunni……
Auðvitað er Peter Crouch ekki að fara neitt í janúar, og reyndar ekkert í bráð held ég. Næst þegar framherji verður keyptur til liðsins giska ég á að það verði vegna þess að Fowler verður boðin einhver staða innan klúbbsins, sem þjálfari eða eitthvað, ég vona í það minnsta að hann fari ekki eitthvað annað. Hann á heima hjá Liverpool og ég vona að hann endi ferilinn hjá okkur og auðvitað vill hann það líka.
Ég hef það alltaf á tilfinningunni að Fowler sé nánast sama hvort hann spili eða ekki. Auðvitað vilja allir spila sem mest og allt það en ég held að eftir að hann fór frá klúbbnum, fór til Leeds og City en kom svo aftur, þá sé hann bara að gera það sem hann hefur alltaf langað til að gera, að vera tengdur Liverpool FC. Þeir sem hafa lesið ævisöguna hans vita líklega enn betur hvað ég á við.
Framherjarnir okkar hafa samtals skorað 23 mörk í öllum keppnum á tímabilinu. Ég held að það sé nokkuð viðunandi árangur. Til samanburðar má reyndar nefna að Wayne Rooney, Louis Saha og Ole Gunnar Solskjær hafa skorað 26 mörk á milli sín fyrir Man U. Alan Smith tel ég ekki með og ekki Giggs heldur, ekki frekar en td Garcia hjá okkur. Það er endalaust hægt að bera saman, bæta við Ronaldo (6 mörk) og Gerrard (4 mörk) og svo framvegis.
Af framherjunum okkar fjórum komu tveir þeirra til liðsins í sumar. Það tekur alltaf tíma að aðlagast nýju landi eins og Kuyt (þessi klisja er reyndar að verða þreytt) og Bellamy hefur verið með hugann annarsstaðar á tímabili. Crouch hefur verið að standa sig mjög vel og Fowler gert sitt.
Eiginleikar framherjanna okkar er frábær blanda að mínu mati. Crouch tekur frábærlega við boltanum, vinnur marga skallabolta og skorar mörk, Kuyt er þessi týpíski klárari af Guðs náð sem okkur hefur alltaf vantað (sbr Nistelrooy), Bellamy er skruggufljótur og Fowler er ótrúlegur í að klára færin sín. Við erum því með þrjár mismunandi týpur af sóknarmönnum sem henta mismunandi eftir því hvaða lið við erum að spila við, á útivelli, í Evrópukeppni, eru miðherjar hins liðsins slakir í loftinu eða hægir? osfv….
Við eigum líka ennþá Djibril Cisse. Reyndar held ég að hann hafi spilað sinn síðasta leik fyrir Liverpool, sumir vilja fá hann aftur, aðrir ekki. Ég held að hann verði seldur endanlega nú í janúar eða næsta sumar, fer eftir ýmsu. Það er spurning hversu mikið af kaupverðinum (14 milljónir punda) við fáum til baka og hvort að það sé þegar búið að gera ráð fyrir þeim í eyðslu á td Bellamy. Líklega ekki.
Þetta snýst því líklega bara um það hvenær Fowler fer eða hættir, ef við lítum raunsætt á hlutina. Bellamy var að koma og er ekki að fara neitt, Crouch ekki heldur, sama hversu leiðinlegan bolta Liverpool spilar (eða ekki) með hann innanborðs. Tölfræðin talar sínu máli. Kuyt þarf ekkert að ræða.
Ég ætla svosem ekkert að velta mér upp úr því hvort að Fowler hætti eftir tímabilið eða ekki, held nú alls alls ekki reyndar. Nenni því ekki að telja upp framherja sem koma til greina eða slíkt í bili
Mun hinsvegar fljótlega bjóða upp á pistil, nema einhver verði fyrri til, um hugsanleg kaup í janúar og/eða næsta sumar….
Maður er orðinn svo paranoid hérna að maður túlkar allt á versta veg. 
