Fínt svar hjá þér Þórður. Ég þakka málefnalega umræðu og úr því kallað var eftir því skal ég svara nokkrum af þessum punktum sérstaklega:
Shaun Wright-Phillips. Þú kvartaðir yfir frammistöðu liðsins og hafðir síðan þá einu lausn að kaupa hann. Því þótti mér eðlilegt að ætla að þú teldir það lausn allra vandamála hjá okkur. En eins og aðrir hafa spurt spyr ég einfaldlega: hvað hefur hann gert síðustu tvö árin sem ætti að veita honum sæti í liðinu hjá okkur, hvað þá að bæta það? Ég sé enga ástæðu til að hlaupa til og versla mann, bara af því að það tekur Pennant aðeins lengri tíma en menn vonuðust til að finna fæturna. Kannski finnur hann sig aldrei, en þangað til það er fullreynt finnst mér óþarfi að leita rándýrra skyndilausna, eins og kaupin á SWP væru vissulega.
Þér þykir ekki mikið til Riise koma, en ég er hrifinn af spilamennsku hans. Við verðum bara að vera ósammála um það. Hann er ekki fullkominn, en hann hefur samt sína kosti sem er óþarfi að gera lítið úr. Michael Jordan var með hrikalega slappa skotnýtingu sem körfuboltamaður en hann gerði það sem til þurfti, skoraði stigin sem skiluðu sigri. Steven Gerrard skýtur töluvert oftar á mark heldur en Momo Sissoko, en það eitt og sér útskýrir ekki af hverju hann skorar fleiri mörk en Momo. Gerrard skorar mörkin þegar við þörfnumst þeirra og það gerir Riise líka, eini varnarmaðurinn okkar sem leggur til liðsins í þeirri deild.
Og svo svar við nokkrum ummælum:
"City lágu í vörn með ellefu menn segir þú allan tímann! Ég hlýt að vera byrjaður að drekka, nota eitulyf og hættur í vinnunni. Ég sá ekki betur en þær væru að fara skora þarna tvívegis, en hurð skall nærri hælum. Þau skot komu ekki frá miðju og enn síður úr eigin vítateig."
Þú ert að einfalda ummæli mín of mikið. Þegar maður segir að lið liggi í vörn meinar enginn að það lið hafi aldrei farið út úr eigin vítateig yfir 90 mínútur. City-menn stilltu upp 4-5-1 kerfi með Corradi einan frammi. Hans hlutverk var að vinna úr löngu boltunum úr vörn City, halda þeim og reyna að mata fljótu kantmennina Trabelsi og Vassell. Joey Barton kom einnig fram þegar þeir reyndu skyndisóknir, og jú það munaði mjóu tvisvar eða svo í leiknum að þetta skilaði þeim árangri, en að öðru leyti sóttu þeir lítið.
Þeir stilltu upp með fjóra menn á vítateigslínunni og aðra fimm þar fyrir framan, lágu aftarlega til að hindra að Liverpool kæmust í plássin fyrir innan vörnina og því var lítið fyrir vængmenn okkar eða þá Kuyt og Crouch að gera. Okkar helstu marktækifæri hlutu því alltaf að koma úr skotfærum fyrir utan teig, og sigurmarkið kom einmitt úr slíku færi. Þegar lið stilla upp jafn varnarsinnað og City-liðið gerði og standa sig vel í varnarvinnunni er eðlilegt að andstæðingarnir fái fá marktækifæri, sem gerðist um helgina.
City-menn léku sína taktík vel á laugardag og náðu að stöðva Liverpool nær allan leikinn, en ein varnarmistök reyndust þeim dýr. En þótt þeir hafi sinnt varnartaktík sinni vel breytir það því ekki að þeir voru í vörn allan leikinn.
"Málið er að Liverpool leikur leiðinlega knattspyrnu, spilar hægt og hugmyndasnautt og hræddir við að sækja mikinn(sbr að bakverðir taka of lítinn þátt í sóknarleiknum). En þú bætir gráu ofan á svart og pissar yfir það. Segir að Liverpool hafi farið á útivelli í vetur til að stjórna leikjum. Til að vinna og til að spila góðan bolta. Þú hlýtur að vera með sjóngalla, ef ekki þá varst þú sennilega ekki þátttakandi á nokkru stigi á þessum undursamlega leik-knattspyrnu. Liverpool leikur fyrst og fremst varkárann bolta á útivöllum. Taka enga sénsa, og áhættur eru af skornum skammti."
Það er óþarfi að gera lítið úr sjón minni eða þekkingu á knattspyrnu. Ég þykist ekki meiri viskubrunnur um knattspyrnu en aðrir en ég hef enn fulla sjón og hef spilað knattspyrnu í 21 af 26 árum ævi minnar.
Hvað punktinn varðar, þá ertu að mínu mati enn og aftur að einfalda málin of mikið. Þú talar eins og Liverpool eigi að stilla upp með þrjá í vörn, fjóra á miðju og þrjá frammi og hanga í pressusókn allan leikinn á útivöllum, til að svala þinni sóknarþörf? Öll lið spila varkáran bolta á útivöllum, ekkert lið tekur óþarfa áhættur á útivelli og öll lið hugsa fyrst og fremst um það að fá ekki á sig mark. Munurinn er síðan sá hvort að það að halda hreinu er það eina sem lið hugsar um - eins og við höfum t.d. séð PSV og Man City gera undanfarna viku - eða hvort að lið reynir að byggja ofan á varkárum leik með því að ná stjórn á miðjunni og sækja út frá því. Þú nefnir til United, Arsenal og Barcelona. Það síðastnefnda er í annarri deild þar sem öllu tæknilegri fótbolti er spilaður, auk þess að vera hæfileikaríkasta sóknarlið í heiminum í dag og því ætla ég ekki að tjá mig um það hér.
En United og Arsenal spila sömu knattspyrnuna og Liverpool, í grunninn. Öll þessi þrjú lið leggja upp með það að fá ekki á sig óþarfamörk og taka ekki óþarfa áhættur á útivöllum og reyna svo að byggja sigur á því. Í fyrra gekk Liverpool betur en báðum þessum liðum á útivelli, ef undan eru skildir fyrstu tveir mánuðir tímabilsins, en í haust hefur United gengið töluvert betur en bæði Liverpool og Arsenal á útivelli. Það breytir því ekki að hvort sem Liverpool er að ganga vel eða illa á útivelli er liðið alltaf að leika með það að leiðarljósi að fá ekki á sig mörk, ná að stjórna leiknum og ná að skora mark/mörk og sigra leiki.
"Veist þú svona mikið um knattspyrnu vegna þess að þú ritar nafn hans rétt??? Eða vegna þess að þú kannt öll númer leikmanna utan af. Vegna þess að þú veist hvaðan þeir koma, hverjum þeir léku með síðast og hver konan þeirra er. Eða snýst þetta allt um réttritun. Er vandamál Liverpool falið í að senda menn á réttritunarnámskeið? Eða ákvaðstu að draga upp menntahrokann og reyna að rægja þann mann sem vill ekki trúa þér og eða er ósámmalega þér um heimsku?"
Ég kann ekki öll númer leikmanna utan að og þótt ég sé stundum einum og viðkvæmur fyrir réttritun er ekki þar með sagt að ég sé að svara þér af einhverjum "menntahroka" eða saka þig um heimsku. Þú einfaldlega skrifaðir nafn Reina vitlaust og það fór í taugarnar á mér - ekkert stórmál, en ég ákvað að leiðrétta það samt sem áður. Ég var ekki að gera lítið úr þér og þetta kom umræðunni ekkert við. En hafi þetta farið fyrir brjóstið á þér biðst ég góðfúslega afsökunar, ég meinti það ekki á þann hátt að ég teldi þig heimskari fyrir vikið. 
Það skal aldrei sagt að ég sé yfir það hafinn að biðjast afsökunar.
"Mætti ég þá biðja um annað af þessu tvennu, árangur eða fallega knattspyrnu???????? Því hvorugt fæ ég að sjá í dag."
Það sem af er liðið tímabilinu hefur aðeins einn bikar verið veittur, og Liverpool fékk hann fyrir sigur á Chelsea í Samfélagsskildinum. Aðrir titlar - Deildarbikarinn, FA bikarinn, Evrópukeppnirnar og Úrvalsdeildin - verða ekki veittir fyrr en eftir einhverja mánuði og Liverpool er enn með í keppninni um þá alla. Líklegast vinna þeir ekki Úrvalsdeildina í ár, sökum slæms gengis í þeirri einu keppni í haust, en liðinu gengur mjög vel í Meistaradeildinni - þar sem stigamet var sett í síðustu viku og riðillinn sigraður af öryggi með leik til góða - auk þess sem liðið hefur farið frekar áreynslulaust inn í 8-liða úrslit Deildarbikarsins.
Síðasta vor voru þrír bikarar veittir í Englandi og Liverpool vann þann næst eftirsóttasta, FA bikarinn, en Chelsea og Man Utd hina. Árið þar áður, fyrsta ár Rafa Benítez við stjórnvölinn, unnust Meistaradeildin og Súperbikar Evrópu, auk þess sem liðinu var skilað í úrslit Deildarbikarsins og Heimsmeistarakeppni félagsliða. Í vor endaði liðið keppni með 83 stig í Úrvalsdeildinni, en betur hefur liðinu ekki gengið undir stjórn neins þálfara síðan það vann síðasta meistaratitil.
Ég veit að liðið er ekki enn farið að gera alvarlegt tilkall til Úrvalsdeildartitilsins en fyrir utan þá einu keppni er Liverpool sigursælasta enska knattspyrnulið áratugarins, og eru sem stendur nær því en nokkru sinni á síðustu 17 árunum að gera alvöru atlögu að sigri í Úrvalsdeildinni.
Hvað kallar þú árangur? Er sigur í Úrvalsdeildinni það eina sem gildir? Því Rafa er nær því en allir aðrir hafa verið í 17 ár að sigra þá deild, jafnvel þótt hann muni þurfa auka ár til þes í viðbót. Í öllum öðrum keppnum eru þeir fádæma sigursælir á þessum áratug. Hvað kallar þú árangur, Þórður?
Að lokum virðist þú hafa misskilið punktinn minn um Arsenal. Þetta var augljóslega kaldhæðni af minni hálfu - eða í það minnsta hélt ég að ég hefði gert það ljóst með ofnotkun upphrópunar- og spurningamerkja. Þetta Arsenal-lið, sem bölsýnir Liverpool-stuðningsmenn keppast við að hylla sem einhvers konar fullkomnun knattspyrnunnar, hefur ekki gengið hótinu betur en okkar mönnum á síðustu þremur árum né nú í haust í öllum keppnum. Þeir eru keppinautar okkar í næstu umferð Deildarbikarsins, þurfa að forðast tap í síðustu umferð Meistaradeildarinnar til að halda öðru sætinu í sínum riðli (á meðan við unnum okkar riðil af öryggi) og eru heilu einu stigi á undan okkur í deildinni.
Ég var einfaldlega að benda á það hversu illa ígrundað það er að mínu mati að benda á Arsenal-liðið sem eitthvert fullkomið viðmið sem Liverpool stenst engan veginn samanburð við. Já, þeir eru meira léttleikandi en við og já, þeir eru með sneggri menn í sínum röðum en árangurinn talar sínu máli og Rafa hefur vinninginn gagnvart Wenger síðustu tvö árin í þeim efnum.
Hvað tók það Wenger annars mörg ár að vinna Úrvalsdeildina? Voru það tvö, þrjú eða fjögur? Ég man það ekki, en hann naut allavega þolinmæði bæði fyrir og eftir fyrsta deildartitil sinn, rétt eins og hann nýtur þolinmæði nú þegar tvö og hálft ár eru liðin síðan hann vann deildina síðast.
E.s.
Ég vill taka undir það með Atla að menn eiga ekki endilega að gefa ummælum okkar síðustjórnenda neitt meira vægi en annarra þegar við ræðum leiki og aðrar greinar hér inni. Þetta er bara mín skoðun og hún er ekkert rétthærri eða mikilvægari en annarra.
Þetta er ég alltaf að tala um, að lið eigi vera skíthrædd við Liverpool. Þá vinnum við svona áreynslulausa sigra og getum sparað orkuna í leiki við toppliðin og erfiða útileiki.
Snilld.
) þá sér maður alveg að þeir eru af stórum hluta sammála. Báðir segja að hófleg gleði við litlum sigrum sé viðeigandi, en að spilamennska liðsins sé alls ekki nógu góð. Þeir virðast bara segja það með mismunandi áherslum.
