23. nóvember, 2006
Þessi áminning er skrifuð af gefnu tilefni og er ætluð ykkur sem lesið þessa síðu jafnt og okkur sem skrifum á hana. Með öðrum orðum, öllum sem taka þátt í umræðum á þessari síðu.
Þegar við Einar Örn stofnuðum þessa síðu var það í einföldum tilgangi: að fá vettvang þar sem við gætum viðrað skoðanir okkar á málefnum Liverpool án þess að vera ritskoðaðir, og að gera öðrum kleift að gera það sama. Þetta gildir ennþá í dag. Við erum ekki einu sinni alltaf sammála hvor öðrum, hvað þá þeim Agga, Hjalta og Sigursteini sem skrifa einnig á þessa síðu. Einnig erum við oft ósammála þeim sem skrifa ummæli og þá notum við tækifærið og rökræðum málin.
Það hefur gerst æ oftar síðustu vikurnar að menn taka því illa þótt við séum þeim ósammála. Endilega reynið að gleyma því að við stjórnum þessari síðu, það skiptir engu máli í ummælunum. Segjum t.d. að ég skrifi leikskýrslu og svo fari af stað umræður. Ef ég tjái mig í umræðunum í kjölfar leikskýrslunnar er ég ekkert að gera það úr einhverjum fílabeinsturni - ég er ekki rétthærri en þið, mín skoðun er ekkert merkilegri, en ég má viðra hana fyrir því eins og aðrir og ég áskil mér rétt til að vera ósammála ykkur hinum rétt eins og þið megið vera ósammála mér. Þetta er það sem umræðuþráðurinn gengur út á og það er hið fínasta mál.
Af hverju taka menn því þá persónulega ef að einn eða fleiri af umsjónarmönnum þessarar síðu “voga sér” að vera ósammála? Ef þú sem lest þetta skrifar ummæli við færslu á þessari síðu og ég skrifa svo svar við þeim ummælum þar sem ég segist vera ósammála þér, þá er ég ekki að meina að þú sért ömurlegur hálfviti sem þurfi að láta þessa síðu vera. Ég meina bara að ég er ósammála þér um þetta ákveðna málefni. Það þýðir ekki að ég sé að reka þig í burtu, það þýðir ekki að þú megir ekki halda áfram að viðra þína skoðun (og ég mína) … það þýðir einfaldlega að ég er ósammála. Ég má alveg vera ósammála.
Við hér á síðunni höfum hingað til haldið okkur við aðeins eina reglu þegar kemur að því að ritskoða ummæli hérna inni: við tökum út þau ummæli sem eru á einhvern hátt ærumeiðandi og/eða innihalda skítkast. Ef þú skrifar ummæli og segir að Rafa Benítez sé handónýtur þjálfari sem hafi ekkert gott gert fyrir Liverpool ritskoðum við þig ekki, því þetta er þín skoðun og þú átt rétt á henni. En ef þú skrifar að Rafa Benítez sé feitur, heimskur spanjóli sem ætti að drulla sér aftur til síns heima hendum við ummælum þínum út, því þau eru ekkert annað en árás á persónu mannsins.
Ég hef hins vegar undanfarið velt því fyrir mér hvort við þurfum ekki að taka upp aðra reglu fyrir ritskoðun: að henda út öllum ummælum við tiltekna færslu sem varða ekki beint málefni færslunnar. Það hefur nefnilega borið mikið á því síðustu vikurnar, í kjölfar slæms gengis liðsins í Úrvalsdeildinni ensku, að það virðist sama um hvað við pennarnir skrifum færslur, alltaf endar umræðan á því að ræða það hversu lélegir leikmenn liðsins eru og hvað þarf að laga.
Gott dæmi um þetta er færslan frá því fyrr í morgun þar sem Einar Örn sagði frá því að Liverpool væru við það að tryggja sér þjónustu 17-ára argentínsks vinstri bakvarðar. Strax í fyrstu ummælum við þá færslu skrifaði Benni Jón eina setningu um að það væri jákvætt að kaupa unga stráka, og svo tvær langar málsgreinar í kjölfarið þar sem hann fjallaði um það hvaða fimm leikmenn Liverpool þyrftu að selja eða henda út fyrir betri menn. Sem sagt, á mettíma var möguleg umræða um argentínskt ungstirni dauð og menn aftur farnir að ræða það að liðið hafi tapað fimm leikjum á útivelli í vetur og sé ekki nógu gott.
Þetta er vissulega óþolandi fyrir okkur sem skrifum hérna inn. Við erum ekki fréttasíða, við setjum svona færslur inn til að fá viðbrögð við færslunum og til að geta rætt hlutina við aðra Púllara. En í stað þess að geta haldið sig við umfjöllunarefni færslunnar fara menn ítrekað út fyrir efnið og ræða bara það sem þeir vilja. Til hvers erum við þá að skrifa inn færslur, ef enginn vill ræða neitt annað en það að Crouch sé enginn Thierry Henry? Eigum við ekki bara að minnka skrifin hér inn og skrifa bara nýja færslu þegar liðið tapar leik, úr því að það virðist vera það eina sem menn vilja ræða?
Á endanum hef ég þó þá skoðun að það sé ekki rétt hjá okkur að fara að ritskoða öll ummæli sem ekki varða beint efni gefinnar færslu. Bæði af því að slík ritskoðun væri allt of tímafrek fyrir okkur umsjónarmennina og myndi fæla væntanlega ummælaskrifara frá þessari síðu okkar - sem er það síðasta sem við viljum gera, við viljum fá ykkar álit - og eins af því að þá fyrst myndi andúðin í garð okkar umsjónarmannanna fara upp úr öllu valdi. Þannig að ég tel það ekki rétt.
Við ætlum ekki að ritskoða ykkur, en þess í stað langar mig að biðja ykkur öll, sem lesið þessa síðu og skrifið af og til ummæli hérna inn, að sýna okkur þá virðingu að hafa eftirfarandi í heiðri:
Þegar þið skrifið ummæli, gætuð þið þá vinsamlegast haldið ykkur við umfjöllunarefni færslunnar sem þið eruð að skrifa ummæli við?
Ef þið viljið ræða lélegt gengi liðsins, gerið það þá í færslunni fyrir síðasta tapleik, í stað þess að gera það í færslunni fyrir sigurleik í Meistaradeildinni þar sem liðið fagnaði sigri í sínum riðli með leik til góða og setti stigamet í riðlakeppninni. Ef þið viljið ræða ömurleika Peter Crouch, gerið það þá í síðustu færslu sem var skrifuð um hann eða framherja liðsins, í stað þess að gera það í færslu sem fjallar um 17-ára vinstri bakvörð frá Argentínu sem er að koma til liðsins.
Er þetta til of mikils ætlast? Ég vona ekki.
Takk fyrir að lesa síðuna,
Kristján Atli
e.s.
Ég tók ummæli Benna Jóns við færslu Einars frá því í morgun viljandi sem dæmi, aðallega af því að ég veit að hann getur höndlað að vera gerður að dæmi. Benni er einn af fáum ummælurum á þessari síðu sem ég þekki persónulega og því þykir mér miður að hann hafi tekið svörum Einars persónulega. Benni hefur skrifað á þessa síðu í fjarveru okkar og staðið sig vel, og er með málefnalegri pennum sem skrifa hérna inn. Innihald ummæla hans í morgun voru ekki vandamálið, heldur það að hann “stal” umræðunni um argentínskt ungstirni og sneri henni uppí umræðu um þá leikmenn aðalliðsins sem honum finnst ekki nógu góðir.
Benni, ef þú lest þetta þá býð ég þér í einn gylltan næst þegar ég á leið á Players. 
....ahh, hvern er ég að plata, bjór er bjór og auðvitað þygg ég hann 
Sælir félagar og áfram með smjörið. Pistill Kristjáns fínn þó ég sé ekki sammála honum að öllu leyti. Fyrir það fyrsta Benni Jón talaði í raun alveg í rökréttu samhengi þegar hann fór að tala um hvaða mönnum mætti henda og þar með hvernig menn þyrfti að kaupa. Hvað gat hann svo sem sagt annað til að þróa umræðuna áfram um eithhvart ungstirni (við erum búnir að sjá þau ansi mörg á Anfield) sem er auðvitað vonarpeningur en hefur örugglega hæfileika og allt. Hvað var svo sem um það að segja meira mér er spurn.
Margt af því sem Kristján sagði er rétt og á við mig meðal annars. En ég verð að segja að þessi síða hefur oft bjargað geðheilsu minni eftir slæma tapleiki. Það að geta bölvað með mönnum sem maður veit að eru stuðningsmenn gegnum þykkt og þunnt er ómetanlegt. Svo þegar menn eru búnir að ausa úr sér þá geta menn rætt málin.
Ef til vill eruð þið ekki beint hörundsárir pistlahöfundar en stundum takið þið andmælum og mótmælum óstinnt upp. Það er hugsanlega (ath. hugsanlega) ekki rétta aðferðin til að leiða og þróa umræðu. Vænlegri leið er (hugsanlega)að reyna að finna nýja vinkla á viðfangsefnið og leiða umræðuna þannig á nýjar og þroskavænlegri brautir. Það er mikið vandaverk og ég get alveg fyrirgefið ykkur þó það takist ekki stundum/alltaf/aldrei. Þið vinnið gott starf og þarft og elskurnar mínar farið ekki að ritskoða út frá einhverjum umræðuvinklum. Ritskoðið eins og þið hafið gert og leitist við að leiða umræður á skynsamlegar brautir. Fyrirgefið mönnum sárindi þeirra vegna skrifa ykkar og ekki síst vegna stöðu liðsins okkar sem er ansi mikið önnur en vonir allra stóðu til.
Með þökkum og baráttukveðjum
