19. nóvember, 2006
Það verður að segjast: ef ég hefði getað valið eftirá hvaða eina deildarleik Liverpool ég missti af á haustmánuðum þessa árs hefði ég ekki getað valið betur en leik gærdagsins. Steindautt jafntefli og markaleysi gegn hundleiðinlegu Middlesbrough-liði á Riverside Stadium. 0-0 urðu einmitt úrslit sömu viðureignar í fyrstu umferð deildarkeppninnar í fyrra, en ég missti einmitt líka af þeim leik, og rétt eins og þá skilst mér á öllu að okkar menn hafi verið glæpsamlega miklir klaufar að innbyrða ekki sigur.
Faðir minn og bræður, sem ég horfi venjulega á leikina með, sögðu mér að eini bjarti punktur leiksins hefði verið framganga Steven Gerrard á miðjunni. Hann var víst mjög góður og sannaði að þar á hann heima. Ókei, hugsaði ég með mér, en svo kíkti ég á þessa síðu og sá Einar Örn fara hamförum um aðra miðjumenn liðsins (og fleiri) í leikskýrslu. Ég hafði ekki geð í mér að svara þeirri skýrslu, né taka þátt í umræðunni sem fylgdi, þar sem ég vissi lítið um málið og hafði ekki séð leikinn.
Bjartir punktar? Var Gerrard góður í gær? Kannski, en það virtist litlu breyta fyrir liðið. Annar bjartur punktur er kannski sá að Pepe Reina hélt hreinu, sem mér telst til að sé í fimmta sinn á þessu tímabili sem honum tekst það, og þar af aðeins í annað sinn í Úrvalsdeildinni og fyrsta sinn á útivelli. Það telst þó seint til afreka í dag að halda hreinu gegn einu af fáum liðum deildarinnar sem liggur bara í vörn í 90 mínútur á eigin heimavelli. Ef þið haldið að það sé leiðinlegt að halda með Liverpool ættuð þið að prófa að styðja þetta Boro-lið í nokkrar vikur. Ég lofa ykkur að þið mynduð hoppa fyrir strætó fyrir jól.
Annar bjartur punktur er sá að Daniel Agger spilaði þennan leik frá byrjun og þótt ég viti lítið um það hvernig hann stóð sig sé ég margt jákvætt við að hann fái leiki. Hvorki Carragher né Hyypiä eru að spila það vel þessar vikurnar að hann þurfi að hanga á bekknum og að mínu mati mætti hann alveg vera fyrsti kostur næstu vikurnar og hinir tveir eldri skiptast á að spila með honum. Carragher er að sjálfsögðu okkar aðal varnarmaður og ég er ekki að gefa annað í skyn, en hann hefur ekki verið að spila vel og gæti örugglega notað smá hvíld í einum og einum leik til að ná áttum. Menn eins og hann koma alltaf sterkir til baka.
Þá sé ég annan bjartan punkt í þessu. Mér skilst að Mark Gonzalez og Jermaine Pennant hafi verið slappir í gær, haft feykinóg pláss til að moða úr á köntunum en skilað litlu af viti af sér inní teiginn. Engu að síður eru þeir báðir ungir og að venjast því að spila fyrir Liverpool, auk þess sem Gonzalez er að venjast Englandi eins og það leggur sig, og því er næsta víst að þessir leikir þeirra í byrjunarliðinu núna munu koma okkur til góða þegar líður á tímabilið. Því meira sem þeir spila núna, því fyrr aðlagast þeir og þótt það sé kannski frústererandi uppá að horfa á meðan þeir aðlagast/venjast aðstæðum og leikaðferð liðsins þá munum við uppskera eftir áramót.
Engu að síður, þá hef ég sagt það áður og segi það aftur: mikið óskaplega er Luis García mikilvægur þessu liði. Síðast þegar hann lék fyrir liðið skoraði hann tvennu gegn Bordeaux án þess að vera mjög góður í þeim leik en hefur síðan verið meiddur. Hann er akkúrat sá leikmaður sem við þörfnumst núna; hann þarf ekki að vera mikið í boltanum eða að eiga stórleik á kantinum til að vera hættulegur. Hann virðist þefa tækifærin uppi, auk þess að láta sér detta í hug hluti sem myndu hvarfla að fáum öðrum. Hann getur ekki komið nógu snemma til baka í liðið, og helst strax í næsta leik.
Talandi um næsta leik. Við eigum leik gegn PSV á miðvikudag á Anfield í Meistaradeildinni og ef okkar menn vinna þá sigra þeir í riðlinum sínum með leik til góða. Það yrðu fádæma góðar fréttir og mjög þarft gleðiefni þessa dagana. Þessi leikur verður fyrsti af þremur heimaleikjum okkar á næstu tíu dögum, en um næstu helgi leikur liðið á Anfield gegn Man City og svo strax á miðvikudegi gegn Portsmouth, sem eru tveimur stigum fyrir ofan okkur í dag í sjötta sætinu. Ef úrslit eru okkur í hag um næstu helgi gætum við sett þá fyrir neðan okkur eftir tíu daga og þá gæti taflan litið betur út.
Ég sagði það eftir tapið gegn Arsenal að við eigum að líta okkur nær, hætta að einblína á manchester united
og Chelsea sem eru núna heilum 16/13 stigum á undan okkur. Arsenal, Bolton og Aston Villa skilja toppliðin og Portsmouth að, eru þremur stigum á undan okkur með 21 stig og það er sá pakki sem við eigum að einbeita okkur að næstu vikurnar. Arsenal gjörsigruðu okkur kannski um síðustu helgi en þeim hefur ekkert gengið sérstaklega í vetur og ég sé ekki af hverju við ættum ekki að komast upp fyrir þá fyrir jól, ef þeir halda áfram að hiksta.
Auðvitað er samt alveg ljóst að okkar menn fara ekkert mikið ofar í deildinni ef þeir ekki fara að vinna sigra á útivelli. Við töpuðum kannski ekki í gær en eitt stig dugir lítið þegar liðin fyrir ofan okkur eru að vinna. Næstu þrír leikir eru heima á Anfield og ættu allir að geta unnist (vonandi þrír sigrar, en það kæmi mér ekki á óvart ef liðið gerði einhver jafntefli) en þar á eftir kemur útileikur í deildinni og svo Meistaradeildinni og því hlýtur maður að spyrja sig hvort nokkuð muni breytast í þeim leikjum þótt við vinnum núna þrjá leiki í röð? Að mínu mati er liðið hægt og rólega að rétta skipið við á útivelli og það þarf aðeins einn sigurleik til að sjálfstraustið komi aftur og þá getur liðið farið að hala inn stigin á ferðalögum.
Ég sá ekki leikinn í gær og er því feginn. Þeir Dirk Kuyt og Craig Bellamy spiluðu þennan leik sem framherjapar, þrátt fyrir að hafa hvorugur skorað fjarri Anfield í vetur, á meðan maðurinn sem var keyptur sem útivallaframherji sat á bekknum. Þeir eru margir sem hafa gagnrýnt Crouch síðasta árið og fleiri sem hafa keppst við að hrósa Kuyt og Bellamy síðustu daga og vikur í von um að þeir blómstri, en það er ljóst að þangað til þeir tveir síðarnefndu fara að skora reglulega á útivelli eiga þeir ekki sjálfkrafa erindi í liðið fram yfir stóra manninn að mínu mati. En rétt eins og með spilamennsku liðsins í heild sinni grunar mig að það þurfi bara eitt mark hjá þeim til að brjóta ísinn.
Við spilum á miðvikudag gegn PSV á Anfield og Dirk Kuyt er að sjálfsögðu líklegastur til að skora í þeim leik, enda ratar hann að netinu fyrir framan The Kop. Ætli Peter Crouch sitji líka á bekknum þá? Fá Gonzalez og Pennant smá runu í byrjunarliðinu? Spilar Gerrard áfram á miðjunni, og það sem mikilvægara er að mínu mati, ná hann og Alonso saman sem miðjupar? Verður Agger áfram í liðinu, og á kostnað hvers?
Þetta tímabil hefur kannski verið vonbrigði hingað til í deildinni en það er margt að gerast - sumir leikmenn eru að skóla sig í byrjunarliðsfræðum Liverpool, aðrir eru að berjast við slæmt form, allir eru þeir að berjast við sterkasta andstæðinginn: sjálfa sig. Þótt þetta tímabil hafi hingað til fært okkur fleiri súr epli en sykruð fylgjumst við öll áköf með næsta leik. Það skal aldrei sagt að það sé leiðinlegt að halda með Liverpool, þótt það sé stundum pirrandi. 
