Við skulum vona það... annars verður hann seldur til Tottenham og hættir síðan vegna meiðslanna!

Fyrir alla lesendur Liverpool bloggsins, sem eru staddir í Laos, hvað voru Guðjón og Willum að segja???

Þegar maður horfir á mörkin, sérstaklega hjá Crouch og Fowler, þá skilur maður ekki alveg af hverju maður hefur verið að örvænta varðandi framherjamálin. Bæði mörkin eru alveg einstaklega vel kláruð.

Einar Örn, í Blaðinu í dag birtist grein sem fjallar um það að Rafa mun um helgina gera breytingar á byrjunarliði sínu í 100. leiknum í röð. Þeir fengu Willum Þór og Guðjón Þórðarson til að tjá sig um málið. Hér eru allar þeirra tilvitnanir (þótt þær birtist dreifðar í greininni).

Willum Þór:

"Það er auðvelt að gagnrýna Benitez miðað við gengi liðsins, og sjá þessar róteringar hans á liðinu sem orsök þess óstöðugleika sem einkennir leik þess."

"Hann er að reyna að nýta hópinn sinn og reyna að vera klókur í því, en missir sjónar á því að halda heildstæðum kjarna í liðinu. Það eru margir aðrir stjórar sem eru klókir í því að nýta hópinn sinn en vara sig á því að halda alltaf í ákveðinn kjarna," segir Willum og tekur sem dæmi Alex Ferguson, stjóra manchester united sem hefur Rio Ferdinand og Gary Neville alltaf í byrjunarliði ef þeir eru heilir á annað borð.

"Það hefur engin regla verið á þessu hjá Benitez á tímabilinu sem hefur til að mynda verið að setja bakvörðinn John Arne Riise upp á miðju og Stephen Warnock í bakvörðinn." [innsk. KAR - HANN ER BAKVÖRÐUR, Willum!]

"Þá hefur Benitez verið að rótera stöðu Stevens Gerrard, sem hann hefur ýmist á miðju, úti á kanti eða fyrir aftan sóknarmennina. Þótt leikmaður af hans kalíberi geti klárað sig af þessum stöðum er hann orðinn örvilnaður í sínum leik. Þetta er kjarnaleikmaður sem á bara að fá sína stöðu," segir Willum og útskýrir að afleiðingarnar séu jafnframt slæmar fyrir liðsfélagana, sem tapa tilfinningunni fyrir hlutverki hans.
Varðandi framlínuna hjá Liverpool segir Willum að þrátt fyrir að hann sé með sex frambærilega sóknarmenn, verði hann að fara að ákveða hver sé númer eitt og hver sé númer tvö. "Leikmannakaupin hjá Rafael Benitez finnst mér líka hafa verið stórundarleg," segir Willum. "Jermaine Pennant, Fabio Aurelio, Steven (sic) Warnock og Mark Gonzalez eru augljóslega ekki nógu góðir fyrir Liverpool og ég skil hreinlega ekki hvað þeir eru að gera þarna."

Guðjón Þórðarson:

"Það er fljótgert að leysa vandarmál Liverpool-liðsins: Segja Benítez upp og ráða mig. Ég væri fljótur að laga það," svarar GÞ þegar hann er inntur eftir því hvernig Liverpool getur snúið við slöku gengi liðsins undanfarið. "Benítez er með einn besta leikmann Bretlandseyja og jafnvel Evrópu í þvælustöðu eins og ég kalla það. Hann var með Gerrard á kantinum í leiknum gegn Manchester um síðustu helgi og sagði eftir leikinn að ef hann hefði haft hann á miðjunni hefði hann stöðugt verið pressaður af Paul Scholes og Michael Carrick. Hann er betri en báðir þessir leikmenn og hefði alveg þolað þá pressu. Ef ég tæki við þessu liði núna myndi ég fara í einfalda 4-4-2 og nálgast hlutina af meiri krafti og áræðni," segir Guðjón, hógvær að vanda.

Þannig að það er greinilegt að sjálfskipaðir sérfræðingar okkar Íslendinga í Liverpool-fræðum eru búnir að ákveða það að því fyrr sem kallinn er rekinn, því betra.

Reyndar finnst mér ótrúlegt að Guðjón Þórðarson hafi ekki komist hærra í Englandi en að þjálfa lið í annarri deildinni. Hann virðist hafa þetta svo mikið á hreinu að það er mesta furða að Chelsea og Liverpool hafi ekki slegist um hann fyrir tveimur árum.

Orð Willum eru öllu jarðbundnari. Ég get tekið undir það, og hef tekið undir það, að Benítez þarf að hætta að rótera Gerrard innan vallarins heldur leyfa honum að halda sig við eina stöðu, hvort sem það er á kanti eða á miðri miðju. Ummæli hans um leikmannakaup eru hins vegar fáránleg - bæði er allt of snemmt til að dæma nýju leikmennina og svo var Stephen Warnock ekki keyptur, og hann er bakvörður að upplagi en ekki kantmaður. Þannig að Willum skorar þarna nokkur sjálfsmörk með orðum sínum, þótt eitthvað sé til í þeim.