19. júlí, 2006
Bill Simmons er Bandaríkjamaður sem skrifar hreint frábærar greinar um íþróttir. Aðallega stóru bandarísku íþróttirnar - hafnabolta, körfubolta og ruðninginn - en hann skrifar um allt hitt líka. Ég myndi segja að hann sé svo skemmtilegur penni að ég get lesið, og fílað í botn, greinar sem hann skrifar um íþróttir sem mér þykir hundleiðinlegar. Það er afrek.
Allavega, Heimsmeistarakeppnin í knattspyrnu í sumar virðist hafa kveikt upp einhverja ástríðu í honum gagnvart undrinu sem Kanarnir kalla “soccer,” og því hefur hann ákveðið að velja sér lið til að halda með í ensku Úrvalsdeildinni í vetur. Enski boltinn mun fá áður óþekkta athygli í bandarískum fjölmiðlum í vetur, einhverra hluta vegna, og Simmons þykir þægilegt að geta byrjað daginn sinn á því að horfa á evrópska knattspyrnu (vegna tímamismunarins), áður en hann snýr sér að bandarísku íþróttunum.
Grein hans er hreint frábær, algjörlega. Sem hlutlaus einstaklingur sem hefur ekki neinar taugar eða söguleg tengsl í garð nokkurs liðs eða svæðis á Englandi gat hann nálgast ensku Úrvalsdeildina á ferskan hátt, og kynnt okkur hinum fyrir sjónarmiðum sem við erum ekki vön að fá á enska boltann.
Lesið bara greinina. Ég ætla ekki að vitna í skrif hans um Liverpool né önnur lið, þar sem ég vill ekki eyðileggja neitt fyrir ykkur, en LESIÐ ÞETTA. Ef þið ráðið við enskuna munið þið ekki hlæja jafn mikið að knattspyrnugrein í ár! Hann telur niður, útilokar fyrst þau lið sem hann langar ekkert til að halda með svo að sex standa eftir. Þaðan fer hann í kjöllinn á hverju liði og telur niður að því liði sem hann hefur ákveðið að halda með í vetur. Liverpool eru eitt af þeim liðum sem koma til greina; lesið greinina bara, hún er frábær.
Ég mæli sérstaklega með því sem hann skrifar um manchester united
og Martin Jol, þjálfara Tottenham. En í alvöru, ekki hlaupa bara að Liverpool-kaflanum, lesið ALLA GREININA. Hún er þess virði. 
Í öðrum (ekki)fréttum þá ætlar Stevie Gerrard sér að vinna Úrvalsdeildina í vetur. Góður strákur, Stevie, góður strákur …
Fyrir þá sem vita betur en ég, er ekki eitt aðalvandamálið með áhorfendur í USA að það eru sjaldnast stuðningsmenn útiliðsins á leikjum?
