Búin? BÚIN? Aggi minn, það stefnir í smá ritdeilu okkar á milli. Ég er vægast sagt ósammála þessari fullyrðingu þinni. 
Maður hefur kannski sterkari taugar til sumra landsliða en annarra, þar sem þau hafa einhvern tímann áður skemmt manni. Þannig hef ég alltaf haft taugar til hollenska landsliðsins, svo dæmi sé tekið, en miðað við þá knattspyrnu sem þeir spiluðu í ár saknaði ég þeirra lítið sem ekkert þegar þeir voru dottnir úr keppni. Sama gildir um England, Spán og fleiri lið sem skarta Liverpool-leikmönnum; maður heldur auðvitað alltaf pínu með þeim, en eftir að upphaflega sjokkið að sjá Englendingana tapa í vító brann yfir var mér eiginlega nokk sama.
Að sama skapi er Portúgal eitt af mínum uppáhalds löndum í heiminum; ég hef komið þangað þrisvar og meðal annars hitt Figo og nokkra aðra, þannig að mér er frekar hlýtt til þeirra persónulega. En það hefur ekki hindrað mig í að standa fyllilega á móti þessu leikara- og svindlaraliði í keppninni í ár. Þannig er það nú bara.
Á endanum er eina landsliðið sem ég held með landslið Íslands, þar sem ég er jú Íslendingur. Svo skil ég vel t.d. að Einar haldi með Mexíkó, þar sem hann bjó þar og kynntist ástríðunni að baki liðinu vel. Það skil ég.
En að öðru leyti finnst mér alltaf hálf skrýtið þegar menn ætla að fara í "fýlu" af því að England, Þýskaland, Brasilía eða eitthvað annað land datt út. Jú, það voru Liverpool-leikmenn í enska liðinu og jú við horfum mest á enska boltann, en það kemur landsliðinu þeirra lítið við að mínu mati.
Pointið er þetta: HM er ENNÞÁ Í FULLUM GANGI, og í kvöld verður enn ein flugeldasýningin til marks um það! Að einhverju leyti hefur þessi keppni valdið vonbrigðum (fá mörk, spjaldaglaðir dómarar, leikaraskapur) en að öðru leyti hefur hún verið langtum framar vonum (stórkostleg upprisa Zizou, þýskur sóknarbolti, mikil háspenna í mörgum ógleymanlegum leikjum) og því hlakka ég ótrúlega mikið til undanúrslitanna. Jafnvel þótt England, Spánn, Holland, Mexíkó, Argentína og jafnvel Brasilía séu dottin út.
Þýskaland - Ítalía í kvöld og Portúgal - Frakkland á morgun. Allt það besta sem Evrópu- og heimsknattspyrnan hafa upp á að bjóða, sem og það versta. Býst við að fyrir hvert gullkorn Zizou sjáum við Ronaldo henda sér einu sinni vælandi í jörðina, og svo framvegis, en það er það sem gerir þetta svo skemmtilegt.
HM er sko ekki búin, og þar sem ég tel bókstaflega sekúndurnar niður að leiknum í kvöld var ég bara móðgaður að lesa þessa staðhæfingu þína Aggi (í góðu samt
) ... þetta mót er bara rétt að byrja fyrir alvöru. Í kvöld skal svorfið til stálsins!
Já, ég veit, ég á það til að vera hálf-fanatískur. 
