Jæja, West Ham United sigruðu Middlesbrough í dag í undanúrslitum FA Bikarkeppninnar með einu marki gegn engu.

Það þýðir að við mætum Hömrunum í bikarúrslitunum á sunnudag eftir nákvæmlega þrjár vikur. Það ætti að verða skemmtilegur og spennandi leikur.

Svo skemmtilega vill til að við eigum að mæta Hömrunum á Upton Park á miðvikudaginn í deildinni. Við unnum heimaleikinn auðveldlega, 2-0 í október síðastliðnum en síðan þá hafa þeir náð upp góðu skriði í deildinni og eru nú í góðri stöðu til að ná sæti í Evrópukeppni félagsliða, þrátt fyrir að vera nýliðar í vetur.

Þetta ættu að verða hörkuskemmtilegar viðureignir, bæði í deildinni á miðvikudag og í bikarnum eftir þrjár vikur. En fyrst og fremst verð ég bara að segja að ég er feginn að Middlesbrough komust ekki í bikarúrslitin. Þeir eru með svo leiðinlegt lið, og Steve McClaren spilar svo neikvæðan og leiðinlegan bolta að ég hefði ekki séð fram á neitt annað en 90 mínútna varnartaktík hjá þeim gegn okkur í bikarúrslitum. Sem betur fer gerðist það ekki og við fáum að mæta liði sem þorir að sækja.

Til hamingju Hamrar, sjáumst í Cardiff!