Ég myndi ekki segja að ég hati Everton, allavega ekki þannig. Sem Liverpool-maður hatar maður erkifjendur sína og vill að þeim gangi illa, en það á frekar við um manchester united í dag held ég, og jafnvel Chelsea líka. Og Arsenal, myndu sumir segja, enda eru þetta þau þrjú lið sem standa á milli Liverpool og velgengni í deildinni við upphaf hvers tímabils - þetta eru liðin sem við vitum að munu vera í toppbaráttunni, liðin sem ógna Liverpool.

Fyrirlitning er orð sem ég held að myndi henta betur til að lýsa Everton. Þeir eru jú nágrannarnir, hitt liðið í Bítlaborginni (sorrý Tranmere-aðdáendur) og sem slíkt þá eru þeir ekki beint lið sem okkur stendur ógn af, en þeir eru pottþétt lið sem við viljum slá við á hverju einasta ári. Af og til, eða á svona tuttugu ára fresti, hafa þeir betur en við (gerðist í fyrra) og slíkt mun alltaf gerast, en yfir það heila hefur Liverpool FC verið með yfirburði á flestum sviðum knattspyrnunnar í borgarbaráttunni miklu, allavega hvað varðar titla, velgengni, frægð og frama.

Ég á frænda sem heldur með Everton. Einn frænda, sem var óþolandi allan síðasta vetur. Ég hef haft þá venju síðan við vorum litlir strákar að kalla hann Danny DeVito … sem er tilvísun í kvikmyndina TWINS, þar sem DeVito og Arnold Schwarzenegger léku tvíburabræður sem voru getnir á tilraunastofu - allt það góða, frábæra, sterka og gáfaða fór í Schwarzenegger-barnið, en DeVito-barnið var meira svona eins og afgangarnir, leifarnar. Það sem Schwarzenegger hafði engin not fyrir.

Þannig er samband Liverpool og Everton í hnotskurn, og því kallaði ég frænda minn oft Danny DeVito, honum til mikillar gremju. Hann vildi þó aldrei kalla mig Arnold, eða Schwarzenegger.

Á morgun mætir þetta Everton-lið yfir á Anfield til að reyna að svara fyrir rassskellinn sem þeir hlutu frá okkar mönnum í síðustu jólatörn, en þá unnum við Everton 3-1 nánast áreynslulaust. Það eina vonda við þann leik var að James Beattie náði að ýta einu yfir línuna hjá Pepe Reina, sem þá hafði haldið marki sínu hreinu í nærri því níu leiki í ensku Úrvalsdeildinni. Á þriðjudaginn síðastliðinn afrekaði Reina - og Liverpool-vörnin - það að halda hreinu í sínum þrítugasta leik í vetur, en það er aðeins í sjöunda sinn sem það gerist. Metið er að halda 34 sinnum hreinu á tímabili, og gerðist það síðast tímabilið 83-84 þegar Bruce Grobbelaar var í marki Liverpool. Pepe á góðan séns á að bæta þetta met (þó skal tekið fram að Jerzy Dudek (tveir leikir) og Scott Carson (einn leikur) eiga sinn þátt í þessu meti).

Okkar menn unnu síðasta leik sinn 7-0 og hafa verið í fantaformi þar áður, en Everton hafa líka verið að vinna leiki og því hafa flestir “sérfræðingar” spáð jöfnum og spennandi leik sem Everton gæti hæglega unnið. Sem er bull, segi ég. This Is Anfield … og Rafa Benítez er það snjall þjálfari að hann mun sjá til þess að getumunurinn á þessum liðum komi skýrt í ljós á morgun. Ég hef fulla trú á því.

Eftir 7-0 sigurinn á miðvikudag er örugglega erfitt að ætla að breyta liðinu nokkuð, en ég ætla samt að spá því að Rafa muni gera tvær breytingar á liðinu frá því á þriðjudag; Momo Sissoko víkur fyrir Robbie Fowler og Djimi Traoré, sem meiddist á þriðjudag og er tæpur fyrir morgundaginn, víkur fyrir Harry Kewell eins og hann gerði gegn Birmingham. Liðið á morgun ætti því að verða svona:

Líst mönnum ekki vel á þetta?

MÍN SPÁ: Eins og ég sagði fyrr í þessari upphitun, þá er Everton ekki einungis lið sem við verðum að vinna, heldur lið sem við verðum að vinna á hverju einasta ári til að minna þá stöðugt á það hvor klúbburinn er betri, stærri og merkilegri. Enda þótt þeir hafi verið að vinna einhverja leiki í deildinni undanfarið og séu komnir alla leið upp í níunda sætið (húrra fyrir því) þá held ég að við verðum ekki í neinum vandræðum með þá á morgun. Getu- og gæðamunurinn er einfaldlega of mikill í svona leik.

Reina heldur hreinu fyrir í þrítugasta og fyrsta skiptið í vetur (þó 28. skiptið hjá honum sjálfum) og Robbie Fowler skorar tvennu í 3-0 sigri Liverpool á Danny DeVito !!!

Syngið svo með mér: “Tonight, tonight, tonight is your night bro … tonight is your night bro …” Áfram Liverpool!