Á morgun spila okkar menn í síðasta skiptið á Highbury í Lundúnum. Arsenal eru úr leik í bikarnum og við erum úr leik í Meistaradeildinni, þannig að það er alveg á hreinu að við mætum þeim ekki aftur í ár, og í sumar flytja þeir yfir á glæsilegan, nýjan leikvöll.

Allavega, Arsenal-liðið þekkja allir og við þurfum ekki að fjölyrða um þá. Við mættum þeim fyrir mánuði síðan á Anfield og unnum þá verðskuldaðan 1-0 sigur, en okkar menn yfirspiluðu þá gulu í þeim leik. Síðan þá hefur gengi liðanna tveggja verið frekar misjafnt, á meðan Arsenal hafa fundið fjölina í deildinni og eru komnir á fullt skrið þar hafa okkar menn hikstað aðeins og svo duttum við óvænt út úr Meistaradeildinni í vikunni, gegn Benfica, á meðan þeir komust óvænt áfram gegn stórliði Real Madríd eftir frábæran sigur á Spáni.

Arsene Wenger hlýtur að gleðjast þessa dagana. Sumir af leikmönnum hans eru að snúa aftur úr meiðslum, á meðan sumir yngri leikmanna hans virðast vera að “fullorðnast” á fótboltalegu máli. Útisigurinn gegn Real Madríd var sennilega vendipunktur á tímabili Arsenal-manna sem horfa nú til betri tíðar. Ég tel líklegt að Arsene Wenger stilli upp eftirfarandi liði á morgun:

Þetta er liðið sem vann Real Madríd, nema þar var Adebayor ólöglegur (hafði spilað í Evrópu með Mónakó) og því voru Hleb og Ljungberg báðir á fimm manna miðju fyrir aftan Henry. Nú eru Arsenal á heimavelli í leik sem þeir munu pottþétt sækja til sigurs, og því fara þeir örugglega aftur í 4-4-2 og þá er að mínu mati bara spurning hvor þeirra Hleb og Ljungberg verða á hægri kantinum.

Okkar menn urðu fyrir áfalli á miðvikudag, vissulega, en á morgun fáum við þrjá leikmenn inn sem ekki gátu spilað þá. Sami Hyypiä mun væntanlega verða orðinn heill af meiðslum og verður því væntanlega í liðinu, á meðan þeir Daniel Agger og Jan Kromkamp koma aftur inní hópinn eftir fjarveru í Evrópukeppni.

Ég spái því að við byrjum með eftirfarandi lið á morgun:

Ég verð að viðurkenna að ég væri til í að sjá Finnan færa sig yfir í vinstri bakvörðinn og Kromkamp spila í hægri bakvörð, í fjarveru Riise, því ég treysti Traoré og Warnock ekki alveg þessa dagana. Þá tel ég öruggt að Daniel Agger verði í miðverðinum ef svo fari að Hyypiä verði ekki orðinn heill heilsu. Svo er spurning hvort að Gerrard verður áfram inná miðjunni og Kromkamp eða García verða á kantinum, en mér finnst samt líklegt að Rafa fari aftur í þá miðjuuppstillingu sem vann Arsenal í fyrri leiknum (nema hvað þá var Momo í stað Didi á miðjunni).

Frammi væri ég mikið til í að sjá Fowler og Cissé fá að spila saman, en Crouch verður í liðinu af því að það er ljóst að Rafa hefur enga trú á Cissé sem framherja lengur.

MÍN SPÁ: Þessi leikur leggst bara illa í mig. Arsenal-liðið er á uppleið núna og sjálfstraustið verður mjög hátt uppi eftir velgengnina í Meistaradeildinni, á meðan okkar menn eru vængbrotnir og þurfa að ná sjálfstraustinu aftur. Ef við náum að skora snemma í þessum leik er aldrei að vita hvað gerist, ef okkar menn fá smá sjálfstraust aftur við mark andstæðinganna, en ég ætla að spá því að þessi leikur fari 3-1 fyrir Arsenal. Henry sýnir okkur hvað í honum býr á morgun og þeir fara frekar illa með okkur, en svo skorar Fowler eitt um miðjan seinni hálfleikinn og lagar stöðuna aðeins.

Ég vona innilega að ég hafi rangt fyrir mér, en þessi leikur bara leggst ekki vel í mig. Því miður.

ÁFRAM LIVERPOOL!