06. mars, 2006
Jæja, það eru tveir dagar í stórleikinn gegn Benfica og þótt það sé langt því frá að ég vilji vera að ýta undir svartsýni hjá Púllurum þá er varla hægt að flýja það að ræða hvort nokkur möguleiki sé á að hið óhugsanlega gerist í sumar: gæti Rafael Benítez yfirgefið Liverpool í sumar?
Auðvitað langar okkur stuðningsmenn Liverpool til að segja hreint og klárt nei, og við vitum að í fullkomnum heimi myndi Rafa líka gera það, en þetta er bara ekki svo einfalt. Lífið er aldrei svona einfalt. Hér eru nokkrir punktar sem við verðum að hafa í huga þegar þessari spurningu er svarað:
Við vitum öll hvaða áhrif og aðdráttarafl Real Madríd hefur þegar leikmenn/starfslið sem þeir girnast eru annars vegar. Það virðist engu gilda hvort menn eru ánægðir hjá sínum klúbbi eða ekki, hin óskráða regla er að ef Real Madríd hafa áhuga segja menn yfirleitt ekki nei. Þar við bætist að Rafael Benítez er Real Madríd-maður inn við beinið og hefur viðurkennt að vilja þjálfa þá einhvern tímann. Og að þeir eru þjálfaralausir núna, og nýji forsetinn þeirra er víst búinn að setja hann á topp óskalistans síns fyrir sumarið.
Evrópumeistaratitillinn. Það er kannski langsótt en þó vert að hafa í huga, að kannski telur Rafa sig eiga auðveldara með að fara frá liðinu nú, eftir að hafa gert liðið að Evrópumeisturum. Hann væri allavega að skilja liðið eftir sig í talsvert betra ásigkomulagi en hann tók við því fyrir tæpum tveimur árum. Eins og ég sagði, langsótt en samt þess virði að gefa gaum.
Peningar. Rafa hefur margoft sagt að hann stefni á velgengni í öllum keppnum, en helsta takmarkið sé að vinna Úrvalsdeildina með Liverpool nú þegar Evróputitillinn er í höfn. Og eins og margar greinar í gær og í dag hafa dreypt á, þá telur Rafa það ljóst að hann þarf meiri pening til leikmannakaupa í sumar en hann hefur fengið sl. tvö sumur ef hann á að geta tekið lokaskrefið í að byggja upp meistaralið.
Þetta síðasta dæmi virðist ætla að geta orðið það sem ógnar framtíð Rafa hjá Liverpool hvað mest. David Moores hefur margoft sagst ætla að styðja sinn mann en þrátt fyrir að hafa reynt ákaft sl. tvö ár hefur klúbburinn ekki náð að tryggja sér nýja fjárfestingu, og fyrir vikið er engin bein peningainnspýting fyrirsjáanleg í nánustu framtíð. Það hefur bæði áhrif á tilraunir klúbbsins til að byggja nýjan knattspyrnuvöll á Stanley Park, sem og leikmannakaupin.
Að mínu mati er það alveg klárt mál að Rafa þarf að fá meiri pening til leikmannakaupa í sumar. Sl. tæpu tvö ár hefur hann eytt um 50 milljónum punda í leikmenn, en fengið til baka um 20 milljónir í leikmannasölu. Og á meðan þrjátíu milljón punda nettó eyðsla er ekkert til að skammast sín fyrir, þá er í mínum huga ljóst af hverju við þurfum meiri pening í sumar: heimsklassaleikmenn. Rafa er búinn að losa sig við mesta óþarfann í hópnum sem hann erfði frá Gérard Houllier og byggja upp sterkt lið og mikla breidd þess í stað. Það sem hann þarf ekki er að kaupa fjóra eða fimm miðlungs dýra leikmenn fyrir samtals 20 milljónir punda, og fjármagna það með sölu á kannski tveimur leikmönnum fyrir um 10-12 milljónir punda, í sumar. Við erum búnir að smíða hálsmenið, okkur vantar bara síðustu tvo demantana af fimm til að úr verði frábær skartgripur.
Breiddin sem við erum með í dag er frábær og það er gott jafnvægi í liðinu. Þar ofan á bætist síðan heimsklassa mannsskapur eins og Pepe Reina, Jamie Carragher, Steven Gerrard og Xabi Alonso, menn sem bera þetta lið uppi og eru leiðtogar þess. Okkur vantar þó ennþá áþreifanlega leiðtoga í fremstu víglínu - heimsklassa framherja - og sennilega heimsklassa vængmann líka.
Og þess háttar leikmenn sem ég hef í huga kosta ekki undir tíu milljón pundum stykkið. Þannig að jafnvel þótt aðeins tveir leikmenn verði keyptir í sumar gætum við verið að horfa á lágmarks kostnað uppá einhverjar 25 milljónir punda. Lágmark! Vandamálið er bara að það er lítið sem ekkert sem bendir til þess að Rafa fái þann fjárhagslega stuðning sem hann þarf - og á skilið - til að geta keypt síðustu púslin í heildarmynd sína.
Nýlegar fréttir þess eðlis að menn séu helst að horfa á um 10 milljónir punda til leikmannakaupa í sumar eru vægast sagt þungbærar, og ef þær reynast sannar held ég að það skilji allir hvers vegna sú saga gangi nú fjöllunum hærra í Liverpool-borg að Rafa sé frekar uppsigað við David Moores og stjórn Liverpool-klúbbsins þessa dagana. Og ef Real Madríd, með öllum sínum áhrifakrafti og skriðþunga, ákveða að nýta sér það ósætti til að biðla alvarlega til mannsins sem hefur alltaf stutt þá ákaft og dreymir einn daginn um að stýra þeim, hvernig getum við aðdáendur Liverpool þá með góðri samvisku útilokað að hann fari í sumar?
Eins og ég segi, mig langar ekkert að tapa mér í svartsýninni og vonleysinu tveimur dögum fyrir mikilvægasta leik tímabilsins hingað til, en þetta er samt spurning sem hvílir þungt á öllum Púllurum þessa dagana: gæti Rafael Benítez yfirgefið Liverpool í sumar?
