Á morgun heldur deildarkeppnin í Englandi áfram, og þar sem okkar menn eru nú jafnir manchester united að stigum og aðeins ellefu umferðir eftir (United eiga þó leik inni) þá er gríðarlega mikilvægt að við vinnum meira og minna alla heimaleiki sem við eigum eftir, og töpum helst ekki leik á útivelli. Þannig að á morgun hreinlega verðum við að vinna Charlton Athletic á Anfield.

Við hefðum átt að spila við Charlton á útivelli í deildinni strax í haust, en vegna þátttöku okkar í European Champions’ Cup í Mónakó varð að fresta þeim leik, og hann var því ekki spilaður fyrr en í febrúarbyrjun. Þá töpuðum við frekar óverðskuldað (meir’að segja Curbishley sjálfur viðurkenndi að þeir hefðu verið heppnir að sigra) en gátum samt engum öðrum en sjálfum okkur um kennt. Okkar menn sóttu og sóttu og fengu flest færin, en nýttu ekkert og sofnuðu svo verðinum á hinum endanum, sóknarmönnum Charlton til mikillar gleði.

Á morgun er ég sannfærður um að annað verður uppi á tengingnum. Fyrir utan það að þeirra besti framherji, Darren Bent, átti víst mjög slakan leik fyrir England á miðvikudag og okkar besti framherji, Peter Crouch, skoraði mikilvægt mark í sama leik og gulltryggði sér farseðil til Þýskalands á HM, þá sé ég okkur bara fyrir mér verða hættulegra liðið í þessum leik.

Rafa hefur verið að stilla upp nokkurn veginn svipuðu liði í undanförnum leikjum og ég býst við að hann geri það áfram, að því gefnu að menn eins og Steve Finnan (meiðsli) og Steven Gerrard (þreyta) verði taldir reiðubúnir í að byrja leikinn. Ef svo er þá mun byrjunarliðið á morgun án efa líta svona út:

Hér geri ég að sjálfsögðu ráð fyrir að Robbie Fowler komi inn í liðið. Finnst bara líklegt að Fowler, sem hefur verið á Melwood með Rafa alla vikuna við æfingar fyrir þennan leik, sé talinn frískari en hinn spænski Fernando Morientes sem ferðaðist til Spánar í miðri viku og spilaði landsleik, auk þess sem hann hefur ekki skorað í núna rúma tvo mánuði í deildinni. Jújú Djibril Cissé var víst ekki í landsliðshópi Frakka að þessu sinni og hefur því líka verið á Melwood með Rafa alla vikuna, en hann virðist vera kominn aftar en Fowler í goggunarröðinni og því held ég að þetta verði byrjunarliðið á morgun.

MÍN SPÁ: Ég ætla að gerast svo kræfur að segja að Liverpool vinni 2-0 sigur á morgun og hefni þar með ófaranna í síðasta mánuði. Peter Crouch, sem hlýtur að vera með alltof mikið sjálfstraust eftir markið á miðvikudag, mun skora fyrsta markið og svo er vonandi loksins kominn tími til að Robbie Fowler skori fyrir framan The Kop!

Áfram Liverpool!